|
الحلقه الثالثه لنصايح ابوحسين الذهبيه وفر +فكر+احذر السلام عليكم ورحمه الله اعزائي جميعا لكم اجمل تحيه وها انا اطرح بين يديكم الحلقه الثالثه من نصائح ابوحسين الذهبيه نجمع كل ما يهمكم من خبرتي في الصيد خلال 17 سنه ونهديها لكم وان شاء الله حتكون هناك مفاجئات قادمه وخاصه جدا وسيتم طرح حلقات خاثه في شهر رمضان الكريم باذن الله وقبل ما اطرح لكم الموضوع احب انوه على نقطه هامه وهو اني لما اقول لاي واحد : ان شاء الله استفدت من الموضوع فذلك من محبه واطمئنان انك استفدت مني او ذكرتك بحاجه نسيتها ومو انقص من احد من مره سواء كنت خبير او مبتدء فيا جماعه مهما وصل الواحد فمو عيب ان ياخذ معلومه من مبتدء بشرط ان تكون صحيحه مرره مو عيب وياما انا شخصيا استفدت من ناس مبتدئين ومو معانتو انو عندي خبره اني افضل الناس لكن فيه اللي اخبر مني ولا يمنع ان اكون من اهل الخبره ولا اضحك على نفسي واقولكم مبتدي في نفس الوقت وبرضو حاجه مهمه انا افضل استخدام البساطه في عده الصيد مو اجيب معايا شنطه سفر واترس السياره بالامريكي والصيني من محلات البنقله زمان كنت اروح البحر مع صاحبي جميل جلب الله يذكرو بالخير وكنا نصيد باي حاجه وكان اخويا جميل ماعندو سناره ويصيد بالمشبك الدبوس حق الملابس يستخدمو بدل الشوكه وكان يطلع بيه حوت بس يتعبو مرات ما يستحمل المهم خلينا نديكم شويا من معلومات حلوه لمحبي الجلب من الشاطىء وحاذكرلكم كم نقطه كدا ننعش فيها المعلومات العوامه او الطفاحه : فيه طريقه يا شباب من ابتكاري ومن مميزات الطريقه هادي بدون تكاليف ماديه تلقاها باي مكان تستخدمها 2×1 فعاله وممتعه للصيد قولو كيف ؟ تقدر انك تستخدم عوامه وثقل في وقت واحد انك تجيب قاروره مويه ابونص ريال واعبي نصها مويها او اقل من النص المويه داخل العلبه حيكون لها وزن وتقدر تستخدمها كثقل والهواء في داخل القاروره بيخليها تعوم وكدا نستغني عن العوامه والثقل الرصاص بحاجه واحده بدون ما ندفع ريال واحد هدي تصلح في جميع الاماكن وخصوصا الشعب وهدي الطريقه من ابتكاري انا وصاحبي جميل جلب ونقدمها لكم حصريه لهذا المنتدى ونخش في النقطه الثانيه وهيا مشكله ترامس الثلج في ناس كتير مو قادرين يشترو الانواع الغاليه وعندي لكم طريقه حلوه وما تكلف شي في محلات المواعين بتلقو اكياس حافظه للبروده بخمسه او عشره ريال حسب المقاس حطو الثلج فيها وحطوها في صندوق فلين صغير وقفلوها بغطا الفلين وشوف كم حيجلس التلج معاك النقطه الثالثه وهيا النتر او النتش لما نرمي الجلب من الشاطي وننتظر اول ما يبدا النقر ننتر ولا تمسك السناره اذا شفت نفسك انو تكررت معاك للمره التانيه فجرب طريقتي اول ما تحس بالنقر لف يدك متل الدائره يعني بطريق لولبيه وانتر سريع يعني كانك تحاول تسوي دائره بالخيط وان شاء الله حتشوف النتايج الحلوه ولو تسالني اش راح تسوي الطريقه طبعا فيه اسماك لما تحس بالخطر تلفظ الطعم او ممكن انك نترت والسمك لسا ما بلعت والطريقه اللي اقلكم عليها راح تخلي السناره تتحرك وتلف وتمسك قبل ما تطلع الطعم جربوها وبتلقو خير ان شاء الله وترى برضو تصلح لو نشبت السناره لكن مو على كل حال النقطه الرابعه يا اخوان اللي يروحو محلات بعيده عن المدن ينتبهوا لانو التهريب مع البحر الاحمر صار كتير من القوارب وادا شكيت في شي غريب او حركه مشبوهه فبلغ على طول الاخوه في حرس الحدود اخر قضيه صارت مسكو في الليث قريب الشاطي قارب كلو حشيش الله يكفيكم شرهم النقطه الخامسه في الصيف كتروا من السوايل والعصيرات الطازجه لانو الانسان يفقد سوايل كتيره من جسمو النقطه السادسه للاخوان اللي يشتروا من محلات الصيد فيه منتج شفتو متل الغلاف بطول الاصبع يستخدم انو ينحط فوق المصفر عشان يضمنلك انو ما ينقطع على شكل انبوبه اخذروا منها يا اخوان لانو مكتوب عليها تحذير انه تحتوي على مواد مسببه للسرطان وهادي لقيتها في كدا محل والله اني استغرب كيف يبيعو شي يسبب اخطر الامراض والى هنا اكتفي من النصايح الذهبيه اللي اتمنى كلكم تستفيدو منها وممكن اللي حاب يشاركنا بشي او يستفسر فراح يسعدني هدا الشي واتمنى لكم التوفيق محبكم في الله ابوحسين |
| الساعة الآن 04:58 PM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir