منتدى استراحات زايد - كشتة خمس شيّـآب في ليلة قمرى ~ وحصل اللي حصل

بسم الله الرحمن الرحيم

السلام عليكم ورحمة الله وبركاته ~

حيّ الله اخواني المكشـآتيه من (مشرفين واعضاء وقرّآء خيمة السوالف الشعبيه ~

هالسالفة منذو مبطي صحيح ..

نبداها على طول

فيه رجال يسولف علي وهو قريب لي اكبر مني بحول 6 او 5 سنين !
يقول : منذو مبطي , الجماعه طاحو في الدداسن وذيك الحين تتراوح اسعارها بين6500 ل 7500 ,
موديل 72 ,
الوالد عنده مزيرعه وعنده دبيش , ووده يشتري ددسن والخال شاري الددسن قبله بسنه
في ليلة من الليالي/ جا يسلّم علينا وعلى الوالده , وبعد السلام دار الكلام وشاوره في الددسن . وقال ما مثله !!! يقضي الحاجه ونشيّط ولايصرف بنزين !
قام الشايب وطنت معه مشترى الددسن , وقال لخالي سو خير دامك ابخص مني ف المواتر وفي مشتراها جب لنا واحد جديد بباغاته , قام وعطاه ربطة امهـآت ميّه ذيك الحمر في علوها مغاط واسفلها مغآط >> كني اشوفها الحين !!
خذنا اسبوع عقب الوصاة او أقل شوي

يوم والله جا الددسن عند الباب
بباغاته ذيك الرهاف اللي على المراتب وريح الجدّه اللي يشلخ الرآس :d تسنه من اجود انواع الطيب ..

يقول أفرح وتفرح العايله كلها خواتي واخواني وابوي اكثر واحدن تشقق تِشققّ
والدليل نبي نقوله هالحين ..

وانتم خابرين الدداسن من اول خاصة الشيّـآب منكم >> اللي مثلي
الددسن يجي معه 3 مفاتيح في بوك !
قـآم ابوي الله يجزاه خير من زود الحرص والذكاء خذ بوك المفاتيح وعطاني واحد بدون ميداليه وبدون حبل "بالحاله " وانـآ بزر ماتجاوز عمري ال11 سنه !!!!
انا بحكم ان خالي معه الموتر الددسن متعلمن قبل على يده شوي وعندي مبادئ القياده وزودن على ذا علمني خالي اسبوع ,

جا ذاك اليوم وهذا دليل ان الشايب متشقق ...
قالي وانا أبوك : ولّم عمرك تراي عازم باتسر فلان وفلان وفلان ..
4 عوده
كل واحد يقول الحق عندي في العواده . .
طبعا يبي يوريهم الددسن وولده اللي يسوق
قلت : خير يـآبوي , وش ودك !
قـآل : نبي نروح الموقع الفلاني يبعد حوالي 25 كيلو عن الديره
مناقط مـآء ويصب مياه مع شلخان في الضلع طول السنه - سبحان الله العظيم-
قلت : ان شاء الله يـآبوي . .
عودك عود مب سهل مولّم القش في ظهر الددسن من الليل !! :d

جا الفجر : ولا شيّـآبك عند الباب كل واحد معه ولده كبري واصغر
والا والله انا مزبّن مع القش كوره (صب) بنلعب فيها انا وهالصغار 0 0
قلطو عند الوالد
تقهوو .. ومـآبيّن النور الا وحنا ماشين
ويركب ابوي قدام مع ارفق من له من الشياب " سبيشل"
والباقين نقزو في الصندوق هم وبزارينهم .. ومن قدنا ياعم الددسن وجديد
والسواق أنا " الدريول"
وأدق سلف ! وخذ ياسواليف وصجه من اللي ورى ومن شيابنا اللي ف الغماره
وصلنا محلنا والا ماشاء الله طبيعه وجو مناسب ويوم15 يعني ليلة قمرى ,
شيّـآبك مهب سهلين ضبطو الفطور وضبطو الغدا
وبريق ورى بريق . .
وسوالف شيء صدق وشيء تسذب !!!

هذي حالة الشياب
وحنا يالصغار معنا هالكوره وطردي وراها ولعب

المهم مالكم بالطويلات "" ثقلنا عليكم ""
وبعد صلاة المغرب والعشاء تجهزنا للرجعه للديره .
ونجمع قشنا واغراضنا ولعد بقى شي وندور بالكهربانات امهات حجر .. يمين ويسار لايكون نسينا شي

ويركبون اللي ورى ورى . . والي قدام قدام ,,

واتلمس جيوبي ولاها والله والخلا لا مفتاح , ولا غيره !!!

اتلمس صدري وجنوب جيوبي
انعكست الآيه انقلب فرحنا الى زعل وهوشن علي
ويلومني الشايب والشييّـآب > رحت طعام شيّـآب

-دار النقاش بينهم-
وحنا يـآالصغار ماتكلمنا والملامه علي وانا سـآكت !!

توصل الأمر إلى ان ثنين من الشياب انشطهم
وقالو : بندخل للديره على رجولنا
ونبي نروح لفلان من الجماعه كودنا نلقاه ولا يلقون خالي , يجي ياخدنا . .

المهم ..
قصو لهم من شجرة عندنا على عصا غليظه ,لأن الموقع اللي حنا فيه كله وحوش وجنّه اكثر من نمله وهذا ثابت, وقالو يالله مشينا , اتكلو على الله
والشيـآب ماغير مناظر وضيقة صدر
وكل شوي تجيني (لعنه)

.. وكل واحدن يده على خده يناظر قدامه مهنا سواليف , ومثل ماذكرنا ليلة قمرى

والا والله
جانا الفرج ادقق في النظر ولا ذا اللي يلمع لمعان
مع القمرى لأن المفتاح جديد ومتجاوب مع نور القمر , وانا اللي أطمر يمّه
ولاه ( عين حميّده )

المفتـــــــآح المفقــود !!!

وأطمر من الفرح واعلمهم قلت ابشرو به هذا هو !!!
ويفرحون شيّـآبك وندق سلف ونركب ..
ونتجه يم الديره , ونروح يم اللي ذكروهم اللي عندهم مواتر
وقلنا لهم / ان جاكم فلان وفلان قولو لهم ترى حنا وصلنا
ومعنا موترنا ولقينا المفتـآح .