|
سحاب نجد - يوم انه صغيـر وهو لابس كرته السلام عليكم ورحمه الله وبركاته يالله انك تحيي الغالين كلكم وكلن بسمه والله يوسع صدوركم جميع بالعافيه اللهم امين يارب العالمين هذي السالفه على شرف الغالي راعي العجراء - ابو جلمبو- الله يحفظه من كل شرويسعد قلبه اذكر منول يربطون في الغمى او السقف حبل ويربطون فيه مثل شغيه النباطه يسمونه محجان والمحجان مثل شغيه النباطه ارجعو تكفون واقرو ذا السطر قال يا كثر كلام الناس قال من كثر ترديده ههههههه المحجان زي الشغيه بالظبط بس طرف اطول من طرف علشان يعلقون فيها زبيل خوص يحطون فيه اللي يخافون عليه من القطو او يجي شي يلحسه لان الفار حيوان اليف منول والبرصي اولف اذكر البراصي تقعد تطنقرفوق روسنا قبل وحنا نايمين ولا صاحين قبله مباهزنا - ويطنقر هذا اسم صوت البرصي يطنقرههههه يامصله هو وطنقرته منيب اواطنه ذا المفصخ لا ريش لا شعر بس ياصبره الا هبت شماليه وجاناذاك البرد الي يروع ولا الاهبت نسري كلش يجمد بس هومدري وش يجيه لوني منه كان اموت منذا البرد ترانا مانسميه البرصي لا نسميه الابرص وحلل الماء بعد الجهدي بالمائي ههههههههههه والبيوت منول فيهن اوتاد والاوتاد عباره عن عودين بينهن مسافه تقريبن نص متر مدخلات في الجدار يسمونهن اوتاد جمع وتد اقول عسا الله يستر علي ادهرت ههههههههههه والاوتاد علشان يحطون عليهن اللي يحط بندق واللي يحط مشعاب والمشعاب اداه للدفاع عن النفس الله يكون بعون الي تهبده وتكون مصنوعه من جذوع الاثل او السلم تجي عصا بطول متر او متر وربع في راسها مثل الشغيه بس تصير مدحربه مهيب العجراء غير العجرا اسمعكم تقولون العجرا بس المشعاب غير ومنول بعض البيوت يجي باب الحوش كبير ويحطون فيه باب صغير يسمونه الخوخه مهيب اللي توكل لا هذا اسم الباب الصغير اللي يجي في وسط الباب الكبيرهوالي ندخل ونطلع معه واذكر مره عطتني امي جعلها في عليين قطع خرق يعني قطع اقمشه صغيرات مهناش منول شي ينطل كلش يستفاد منه ههههههه المهم عطتنيهن امي وقالت رح ونا امك ودهن لم ام الفلان علشان تخيطهن بيزه البيز الي نمسك به البريق والدله الا صارن حارات وقلت ان شا الله يحليلي منول وهالحين بعد بس منول اكثر ههههههههههه هلحين صرت عودمقوا واخذ قطع الاقمشه واركب سيارتي وانا خاط شنبي تدرون وش سيارتي عسيب نخل فاحش عليه ماسكه من عند الكربه والعسيب بخوصه اسحبهن وراي شوفو البراءة وتبونا نصنع شي بعد المهم ومنطلق مع السكيك وغبرتي واصله الغيم لا تنسون ان شنبي خاط قمه البراءة واذا جيت في اللفات يعني ابا الف مع سكه وانا على سرعتي وفاحش على العسيب اقول طططططططا طط يعني بوري لياه يجي احد واخبط فيه بس الله من مره خبطت يافي شايب ولا عجوز هم الي يجون يدقسون يعني يمشون بشويش ثمن وجه لوجه الله من عودن كرفسته بس بحسن نيه مهوب قصدي وليتي بعد اسلم لا يمحطني بعصاه كم مره قبل لا انحاش وذكر مره كنت جاي مسرع مررره ونا طبعن فاحش على العسيب وتجيني ذيك السكه ونا بصراحه ماقلت طططط ولا شي ناسي ويوم لفيت مع السكه ولا وجه لوجه مع شايب كان شايل تنكه مليانه الله يكرمكم غسال يعني بقايا اكل يبي يوديه لبقرته وتنكب التنكه والغسال علي وعليه ويدخل راسي داخل التنكه هههههههههه وهو الي يمسكني ويروغني روغ ويدحوسني في التراب مهوب علشان التنكه انكبت لا علشانه مرتاع هههههههه هو يقوله لاني هبلته وهو هبلني انا وش دراني بعد ابغا اقولكم سالفه والله انها واقعيه حاصله لي مره رقيت للطايه او السطح عندي حمام ويوم جيت احول واشوف على الفتاش او النبر اللي يطلع معه الدخان اذا شبو نار ونسميها الضو مهوب النار المهم الا فيه رجال صغير جالس على النبر واجيك مع الدرجه واتدربا الين وصلت المجبب وانا اصارخ توي بزر واقول رجال صغير رجال صغير في الطايه على النبر ويجي ابوي ويرقا معي يقول ورنيه قسم بالله انها صايره ويوم رقينا وقول لبوي شفه تدرون وش طلع والله العظيم اني صادق طلعت بومه كبيره هما وجهها كنه وجه صغير واول مره اشوف البومه الله لا يلومني هههههههه زين بعد الي ما انهبلت خل اعلمكم بشي بعد والله اني صادق فيه تراي يومني صغير تلبسني امي كرته هههههههههه حقه البنات ذيك الي تجي مزمومه عند الصدر انا مدري امي جعلها للجنه كانت تحلم انها تجيب بنت وجيت انا مالها تفسير الا كذا ولا وشوله تلبسني كرته بنات ههههههه المهم اذكر امي ياملا الجنه تلبسني الكرته ونا صغيرلحد يقول شي لياني اوريكم صورتي وهي علي الكرته هههههههههه تراذاك الاوربي الي ماخلا شي في الدنيا الا صوره تراه مصورني ههههههههه المهم في رمضان اوله العام جيت يوم لم شقراء في النهار اتمشى واروح وادخل بيت الطين حقنا وهو خرابه ومعي جوال التلفون واقوم واتمشى وسط البيت صدقوني ماني امزح واتمشى واتذكر واصيح شوي وسكت شوي انتم خابرين الذكريات ولوزينه طواريها تهد الحيل ولاه توه يذن الظهر والشمس حاره هذا الكلام اوله العام قبلي منكوس ولا فيه احد يتمشا في الشموس والحروهوصايم واتذكر وقلت وراي مااصور بالجوال البيت معلميني عيالي منيب لعب واقعد اصور علشان اذا جيت للرياض اتفرج عليه وصيح شوي المهم صورت بالفديو معي ورقه كاتب فيها وشلون اشغله المهم واقعد اصور الين اوحيت المسجد يقيم واروح اصلي الظهر ويوم قضيت من الصلاه واروح يوم رجعت للرياض جلست اتفرج على تصويري والله اني صادق وانا يومني اصور المجبب وسط البيت ولا اللي تويق علي من وراء الساريه والله العظيم اني صادق بنت يجي عمرها 16 الى 18 سنه يا حضي وكلها ملح ولابسه كرته زي كرتتي يومني صغير مزمومه تحت الصدر اخاف انها كرتتي بس ونا مدري ويومني اصور ما شفتها بس بالكمره شفتها وريتها كم واحد اخاف انه يزول لي عند عيوني ونفس الشي كلهم شافوها اصلا واضحه وضوح الشمس وتناظرني بعد وتضحك عااااااادي يمكن تبي تذكرني بالكرته مثل الي تقول لاتنسا الماظي ههههههههه اشوا انها ما تكلمت كان انطلق وجي للرياض على رجلي هههههههههههههه وحافي بعد فيذا الشموس وسلامه قلوبكم يالغالين وسبحان الله وبحمده سبحان الله العظيم عدد خلقه وزنه عرشه ومداد كلماته |
| الساعة الآن 02:23 PM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir