|
قـرنـآس نـآدر .... اندر ماطرح بالمملكه خلال ثلاثين سنه مضت.............ذراع الذيب بسم الله الرحمن الرحيم السلام عليكم ورحمة الله وبركاته اسعد الله اوقاتكم بكل خير زوار واعضاء ومشرفين منتديات مكشات وشحالكم عساكم طيبين كلن باسمه ، اليوم جايب لكم صورة اندر قرناس حرار طرح بالمملكه ولا أعتقد ان هناك طير طرح اطيب منه خلال هذه المده (30 سنه مضت) واكثر ويعتبر الاغلى ثمن من بين جميع الحرار اللي طرحت بالمملكه وقد تم طرحه قبل طرح القرناس المسمى بعديم بست سنوات وصنفوه بأجمل طير حتى ان جماله يفوق وصف جمال القرناس عديم الطير المعروف وهذا كلام الطواريح والصقاقير القداما عليهم رحمة الله وسالفة طرحه يضرب بها المثل في الرزق وهذا هو عالم شبك الصقور فيه من العجائب والغرائب اللي ماتنتهي وان الارزاق من الله سبحانه مقسمه تقسيم على عباده هذا القرناس جلس فتر طويله ويشوفونه الطواريح اكثر من مره وفي عدة مناطق بشمال ينبع لاكنه عاصي مايهد ابد وتخاشروا عليه سته اشخاص وعقدو النيه على طرحه ومنهم الشيخ بندر بن نايف بن حميد العتيبي ولاحق بن شري العتيبي واحمد البلوي وعبدالرحمن بن مذرب العتيبي ومحمد النفيعي والسادس مجهول اسمه وهذي المعلومات اعدها لنا لاحق بن شري ولايذكر من هو السادس فقد نساه وعمره الآن 66 سنه الله يطول عمره على الرضا والطاعه المهم بعد ماعقدو النيه وكلن راح يدور رزقه وكلن تمنى فيهم من يبشر خوياه بهالنادر العاصي اللي اتعب طواريح الساحل وراده الله سبحانه ان يجعل هالقرناس في درب لاحق بن شري وهو قانص بأتجاهه وكان موقع على السيف بمنطقة الشرم ومن اول وهله شافه فيها لاحق يحسبنه ابومجداف من جماله ومن لونه اللي يحير العقول وهي لحظات عصيبه تمر على كل طاروح ما اقول غير الله يثبتنا:) وجهز له حمامه بشبكه طلق من دون ثقاله وحذفها للطير وابعدت الحمامه عنه والقرناس العاصي ماكنه يشوف شي كعادته وضاعت جميع الامال والقرناس هذي طرايقه لاكن الله سبحانه موجود في جميع الاحوال ومايخلي عبده اللي راح يدور رزقه وتارك وراه عياله وهله وارسل الله سبحانه على الحمامه المشبكه شيهانه جبليه وحش وراح تطرد ورى الحمامه وتقلبها والقرناس يشوف المشهد كامل قدامه وانحدم عليها وهذي عزه وغرور في نفس كل قرناس وراح يطلب يم الشيهانه الجبليه وقام يشهر في عمره لاكنها الاقدار من الله سبحانه وخطف الحمامه من قدام الفرخ وراح يقلب الحوم والنايلوا كان له تأثيره على كفوف الطير وحس بها القرناس وفك الحمامه ولا هي مطوحه تحته عالقه فيه الحمامه واختل توازن طيران الحر وماله بعدها الا الميقاع معاد فيه حيل وكان لاحق بن شري معاه اول بأول ماوقف الموتر الا عند القرناس وحول عليه والقرناس وقتها على نحره وضف الحر وراح يبشر فيه ربعه ويازينها من بشاره وجلس هالنادر فترة طويله بالمنطقه يسرح ويمرح ويتنقل من حروه لحروه وكلن حاوله ولاكن الله سبحانه كاتبه لهالشخص ولهالمجموعه من الطواريح ومصادفة الجبليه وهدتها على الحمامه فعلاً مشهد يستحق التامل والله كبير في فزعاته والطواريح اللي ذكرتهم هم من القنوص الاوائل في شبك الصقور واغلبهم قد توفاهم الله ولم يبقى من المجموعه على قيد الحياة الا الشيخ بندر بن حميد وطارح الطير لاحق العتيبي وفيه واحد من المجموعه انقطعت اخباره عنهم ولايدورن وش اخباره هل هو حي او ميت لاكن اسأل الله العظيم رب العرش العظيم ان يتغمدهم برحمته وان يجعل مثواهم الجنه واللهم مثل ماجمعتهم في هالدنيا الفانيه ان تجمعهم في جنهً قطوفها دانيه وان تطول بعمر من عاش منهم وان تحسن لهم الختام والمسلمين اجمعين اللهم امين والحين اعرض لكم صورة القرناس صورة للطير مع لاحق بن شري العتيبي وطرح الطير في عام 1404 هـ وللأسف لاتوجد الا هذي الصوره واغلب صور الطير ضاعت وللأستمتاع اكثر بمشاهدة الطير بأفضل صوره حملوها على الجوال والطير صافي وابيض خالص ومافيه من راسه الا سواد عيونه والطير كبير في مقاسه ويتعدا ال 17 عرض والطير كل مافيه حلو وخصوصاً سراويل الطير تفوق الوصف وعليه مناكب ووسره اجمل ماشفت واللي اخذ للطير صوره هو الشيخ بندر بن حميد بكاميرته الخاصه والطير تم طرحه بمنطقة الشرم شمال ينبع جنوب الحنو وشرى الطير سمو الامير رحمة الله عليه محمد العبدالله الفيصل وتم تثمين قيمة الطير بـ 600،000 الف ريال سمعنا عن عديم لاكن ماشفناه وهذا الطير اجمل منه والله اعلم على كلام شيبان هذاك الزمان والله يكرم الجميع من واسع فضله وهذي الصوره قبل 15 يوم وتجمع كلن من الصقار لاحق بن شري والصقار شبيب العتيبي (مقناص كراوين شمال الرياض ) واتمنا ان يحوز الموضوع على رضاكم ويرتقي لذائقتكم والشكر موصول لبندر بن لاحق بن شري العتيبي لدعمه لنا بالصوره وبالقصه |
| الساعة الآن 03:13 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir