#poem_513d3b86bf715 td { font-family: Arial, Helvetica, sans-serif; font-size: x-large; font-weight: bold; } ياثالث الاثنين وشلون معذور لاصار صمتك اثبت العنصريه لو قلت قول الحق والحق دستور كان انتهت في وقتها هالقضيه متى جبرتك ؟ وانت ماتثني الشور وطبع الصراحه فيك ماهو شويه انا لك اكثر من غطا البير مستور وانا رفيقك والبناخي سويه عند الاوادم عنْك احارب الجور وعند الاوادم نفسها تسب فيه غيبه نميمه كذب بهتان مع زور بالوجه نيه والقفا الف نيه قصوركم من حسدكم صارت جحور وحنا النخل وظلالنا فيه حيّه اقسم برب منزل التين والطور ربي وربك رب كل البريه ماجاكم الا حب مع طيب مذخور مع احترام وحشمة الاقدميه واللي يشوف ان الفخر عيب وغرور محروم والمحروم نفسه رديه واللي تكلم في محارمه محقور قله يعيبك مايعيب البنيه للأرمله ذكرى الرجل اربع شهور والاخت تذكر للأبد زول خيه واللي يظن الظلم وجروحه تبور ذكي ذكي وافكار راسه غبيه لكن ترا اخراجكم كان محكور تأليف قصه كذبته واقعيه قالوا نشّوه سمعته خله يبور كريم / واحرجنا مع الاغلبيه كذبة ملك بالصدق والعار منثور تحت الملك منثور فوق الرعيه وعوير خطط لكن صوير مطيور وابليس جاهز مخرج المسرحيه واليوم ماقصرت يابليس مشكور زال احترامك واحترام البقيه حبل العلاقة بيننا صار مبتور لاتبتره وتحط سيفك بيديه لو يكذب لساني قطعّته بساطور وانتم كذبتوا كذبت(ن) عالميه شمّر علْم والعلم لأشكالكم نور امن اليمن للدولة الهاشميه ولاني ولد لاشن ولاني بمغمور انا ابن عباس زبن العطيه الشاعر اللي راسه يشوش ويثور عز الخوي اليا اعتزابه خويه ماهي قويه شاعر يصير دكتور لكن اذا دكتور يقصد قويه قارب نجاتك لو قطْع عدة بحور بحر القوافي اغرق المهمهيه شفت الحريري موكبه كيف مفجور ؟ مثل انفجاره انفجاري وزيه لاصرت ضابط والمخاليق جمهور والعسكري قافك يدق التحيه وجيش القوافي جاك ماهو بمجبور قدامك يحّضْر سريه سريه في وقتها بتحس لو مابك شعور ان ابتلاء الجيش اكبر خطيه شاعر انا معنى وحكمه ومنظور راسي شباب وجنب راسي وصيه ماهي وصية موت واكفان وقبور وصيتي تاتيك والنفس حيه نذراً علي مادام لي بالزمن دور ويشهد علي الله واحمد نبيه اني لحارب راعي الكذب والزور وش قيمة الرجال دون الحميه ؟ دام الشجاع ان مات بيموت مغدور وايامنا اجهل من الجاهليه أشوف منهو بالردى صار مذكور واشوف منهو رّمْل التغلبيه واشوف سيف وبير وجبال وقبور واشوف جدي راح وابطى مجيه واشوف عبقر وادي الهم ديجور واطقْ من همي او العبقريه وان شفتني طقيت نفذ على الفور نفذ بي الاعدام بالقادسيه ماقول انا عنتر وفارس ومشهور لكن ابي أذكْر العنتريه يوم ان عنتر خايف يواجه الثور ضحيت انا بالثور قبل الضحيه قاعي وعر وحفور وعقوم وصخور فجر وضحى وعصير ولا عشيه الراس مثل العش والقاف عصفور بافكاري ابني عش قافي هنيه اكتب سطر واترك سطر وامسح سطور لجل الشموخ الشيخه الشمريه لاجلك انا جزئي من النص محظور ولاجلك اجيبه تحت رجلك هديه ولاجلك اسامحهم ولو كنت مكسور كسر الخواطر بالزمن خاص فيه حتى لو اللي طاح من عالي السور رجال يغني عن حضور البقيه بين المخيخ وبين الاعصاب محشور وخدي ودمعي بينهن جاذبيه عيني محِّير وجامعن دمعي شهور والرمش لاجله صار مثل الشغيه والخد ناقع ومتشرب وممطور هلْت سحابة حزني الموسميه هلْت قهر هلْت من الضيم والجور فاقد خوي والعين تنْعّا خويه يامولعن في داخل الجوف دافور اقصر على الدافور تكفى شويه صدمات وقتي والبشر مابه اقصور اليوم هذا وامس هذا وذيه ياهموم خفي لاتقولين ماجور ماعاد لي طاقه ولا مقدريه أمر انا مخلوق ماني بمأمور إلى متى والطيب يامر عليه ؟؟