فاح جو العيص واهتز الجبل=وارتخى صلب الوطا عن مستواه
دلا يختل الحصى لو هو قفل=لو تزامى الضلع فالخالق قواه
وابتدا ذعر البشر باللي حصل=حادثن حول على القلب ولواه
حللوا جوف الثرى وادنى محل=قالوا النيران تطبخ بالنواه
قام رختر يرسم هزوز الخلل=وارتفع ذيب الخلا يسري عواه
ما تفيد البال حزات الزعل=ما له الا من بدا الكون وطواه
ما له الا موجدن نقع الطفل=مرسي جبالن على القفرا زواه
الصبر سيف الملا هو خير حل=والتضرع واقي الروح ودواه
رجوا رب الكون درعن للدول=من عصى الجبار واستكبر شواه
والا ربي يقلب الحره سهل=قادرن يهلك شياطين الغواه
يالفتى ما لك سوا حسن العمل=واطلب الغفار ما ينفع سواه
تاتي باكر زلزلة يوم الفصل=يوم كلن يحصد زراعة هواه
من بذر شوكن جنى منه الفشل=يمسي براسن تزايد به خواه
واللي يزرع خير تضويه النحل=يرتوي من شهدها باول ثواه
يالله انك تغفر ذنوب الزلل=ثم تجير البال من همن ضواه