منتدى استراحات زايد - فلم أكشن والا قراده>> قصتي يوم الخميس

السلام عليكم ورحمة الله وبركاته
وحشتوووني مره لأني من زمان عن المنتدى
هالخميس هذا كان أزفت خميس يمر علي
خلوني أقولكم شصار لي،، انا رجال قدر الله علي أني أبني بيت العمر> أمحق من بيت مايبي يخلص :angry4:
والحين واصل لين أعمال السيراميك والبلاط،، المهم أن واحد قالي يابو خلود ورى ماتروح طريق الخرج يقولون في محلات سيراميك زينه هناك
قلت خلني اروح اشوف وان شاء الله آشتري كانه زين.
ركبت سيارتي وطلعت والطريق حيل زحمه من شرق الرياض لجنوبه، وصلت عالمغرب ووقفت عند بقاله قلت ابي اشتري عصير :)
هنا يبدا الأكشن،، كالعاده الإنسان مرات يتفلسف على الناس وينسى نفسه، كان دايم أقول اللي يترك سيارته شغاله هذا دلخ، هالمره صرت انا الدلخ، قلت خلني اوقف عند الباب وان شاء الله مو صاير شي، نزلت من السياره وماوصلت باب البقاله الا وقلبي ناغزني من واحد خال،، شكله شبهه كان يمشي باتجاه سيارتي، انا رجعت للسياره وهو كان أقرب، وعلى بعد خطوات مني فتح باب سيارتي ورمى نفسه فيها وسكر الباب :looking: هنا انا حسيت اني راح انهبل،، لو راحت السياره يضيع مستقبلي، آيفون، لابتوب ماك، آيبود، بوك مليان فلوس واثباتات وشغلات مهمه، وصك ملكية البيت، كلهم بالسياره، يعني لو راحت مالي الا اني اقط حالي بالطريق العام وأخلي سياره تدعسني وارتاح لآن شرطتنا (ماعندك أحد)، فتحت الباب وكان يقاوم علشان يسكره وفعلاً سكر الباب وقبل يقفل الأبواب الحمد لله اني فتحت الباب ثاني مره رغم انه كان يسحبه، حطيت كتفي علشان مايقفل الباب كأني ستيفن سيجال المهايطي، المهم الحرامي نزل القير تحت عالأخير،، هنا انا سويت حركة الأكشن ونطيت جوا وكان دايس البنزين عالأخير وانا مديت رجلي ابي الفرامل لكن جت بالوقت بدل الضائع، ضرب عمود من أعمدة المحطه على جنب السياره، وكان فيه سياره واقفه تبي تعبي بنزين وصدمناها وانعدم الوجه حق السياره، والمصيبه الأكبر ان السياره كانت متجهه للماكينه اللي تعبي البنزين وطالع منها ليات، مدري شسمها لكن ربي ستر لأن الصدمه الأخيره جت على الصبه اللي تحتها، هنا انا قدرت اني اوقف السياره لأني حطيت القير على N يعني (فاضي) للبنات اللي مايسوقون، شمعرفكم :hawageb:، ، المهم أول شي سويته اني التفتت :humm2: طبعاً كنت بحضنه، ولما تخيلت سيارتي واستوعبت اللي صار فيها انقهرت، لأنها كابرس وتوني شاريها، وسددت بكس على وجهه، والآول، والثاني، الحرامي هنا خلااااص يبي عمره لأن الناس تجمعوا تقل ذبان، كان يحاول ينحاش، لكن من حظي انه كان كدش>> ياكرهي لهم،، ومن شوشته سحبته بالشارع وهاك ضرب، لين بردت حرتي، المهم جا واحد يبي يفكه مني وانا اصيح ياناس امسكوه معاي هذا حرامي، والكل كان يتفرج، الثاني قدر انه يفك الخال من ايديني وبالأخير طلع صاحبه لأنهم انحاشوا سوا، والكثره تغلب،،، مت من القهر لأنه انحاش، والعالم تتفرج وبالأخير يقولون ماندري انه حاول يسرق سيارتك نحسبها مشكله بينكم.. انا ماأقول غير الحمدلله أن السياره ماراحت، ولو راحت كان يضيع مستقبلي لأن فيها شغلات مهمة. وراح الخميس كله بانتظار حماة الوطن والمرور هم وإجراءاتهم اللي تقود إلى الإمساك بالحرامي >>> أفلقني :tounge_smile2:

هالقصه حبيت أقولها علشان أكون عبره لغيري،، لأن شخص يسوى مثل كذا أكيد مايهمه لو فيه ولد والا بنت بالسياره، كان خطفهم بعد.
ولااااااااا تخلي سيارتك شغاله أبد،، لأن اللي سوا فيني هالفلم اليوم كان بعد مترين عني، يعني مهما كنت قريب من سيارتك لاتخليها
شغاله.
لاتنسى أذكار الصباح والمساء يمكن ربك يحبك وينجيك من مصيبه علشان تتعلم، أول شي سويته لما وصلت البيت صليت ركعتين وسجدت شكر لربي، أقل شي كان راح يصيرلي ان رجولي تتكسر لما صدم العمود اول مره لكن الحمدلله جت سليمه.
لاتعتمد أو تثق بأغراب، أكثر من 20 واحد ولا فيهم أحد ساعدني ومسكه معاي، مع ان صاحبه جا ومسكني لين قدر ينحاش الحرامي وقدام الكل..

وهذا اللي صار معاي ليوم الخميس هذا والله يستر من اللي جاي :b&th: