|
سالفه راعي العجراء والسيكل والتكسي السلام عليكم ورحمة الله وبركاته اليكم هذه السالفه القديمه عمرها 50 عام تقريبا بعنوان راعي العجراء والسيكل والتكسي منول كان المشوار للتكسي خط واحد مثل من البطحاء للشميسي بربع ريال والطلب بريال وريالين حسب بعد المشوار وكان صاحب التكسي من اول اذا بغى يوقف يشيل راكب او ينزل راكب يرفع يده فوق التنده يعني تراي ابسفط على اليمين واذا يبي يوقف يخلي يده مستقيمه والاشارات غير معترف بها ولا هي مرغوبه يمكن او مايعرفون وش معناها اهم شي استعمال اليدين المهم في ذاك اليوم اخيكم راعي العجراء معه سيكل مقاس 20 اسود ماهنا ملح ذاك السيكل ومركب عيه دينمو يشغل لمبه الكبس وكنت مسرع بالسيكل على شان تستقوي اللمبه وماسك الطريق يمين مبعد عن درب السيارات المهم تقدم علي راعي تكسي يبي يحول راكب وطله يده من فوق التنده يعني ابسفط الرجال سفط بموتره ويفتح الباب الراكب بالمرتبه الخلفيه شايب يبي ينزل وانا اصفق بالباب بالسيكل وانا انقز ولاي بحجر الشايب ومع الروعه بالصدمه وشي طب على رجوله وهو يطمر للجهه الثانيه وهويفتح الباب من الروعه وهو يقطع الشارع لاشعورين ركيباته تتنافض الا بجيت سياره وهي تدق البريك وتزيد الروعه روعه ثانيه ويوم فاق شوي الا بالسياره الثانيه وهي تصفق بالسياره الاولى وتكمل على الروعتين روعه وهو ينقز للخط الثاني ويقطع قدام السيارات وخذ من البريكات الشايب شاف الموت بعيونه خمس مرات وهو يجيك ركض تعدا بيته وهو يركض ويمكن الى الحين وهو يركض الضعيف تسبب عليه راعي العجرا ولمبة السيكل انا اخذت السيكل وهو غادي تقول عش ام سالم متكوم فوق بعضه من الصدمه وتبون الصراحه مايلام العمر ياشامان انتهت السالفه وقبل الختام سبحانك اللهم وبحمدك لااله الاانت استغفرك اللهم واتوب اليك نشوفكم على خير في سالفه جديده والله يحفظكم راعي العجراء الدار البيضاء ولاية مدريد محافظة نيودلهي بالفلبين |
| الساعة الآن 12:23 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir