منتدى استراحات زايد - الشايب ومشروع تسمين العصافير !!*

بسم الله الرحمن الرحيم . .

السلام عليكم ورحمة الله وبركاته .. حيَ الله اخواننا المكآشيت من /مشرفين , اعضاء , زوّآر

رجعنا لكم بعد انقطاع وولهين على مكشات واهل مكشات وعلى خيمة " سوالف شعبيه " والحمد لله على كل حال .

وهذي السالفة اهداء خاص لصاحبنا " نجد سحاب " ( رآعي شقراء ) - الله يطول بعمره

ونبدأ السالفه ..

فيه شآيب من الجماعة رجآل حدآد ويحسب الصغيره قبل الكبيره ويحسب القرش قبل الريآل ودقيق في حساباته وساكن في الديره كل حياته , توّفت ام عياله - الله يرحمها - ووالديَ ووالديكم وعياله راحو للرياض يدورون العيشة , وصار بالحاله في البيت وحداني " عزوبي"

المهم مانطول عليكم انتم عارفين القرى من اول , وانا راعي قريه ولد قرية , بيوتهم كانت طبعا من الطين وسقفها من السعف والعسبان ومن الاثل , نرجع لشايبنا صار بالحيلَه في هالبيت وماعنده الا هالعصافير ورجالن عاقل ولاهوب يوذيها والعصافير انتم عارفين انها تعرف الصغار وتعرف الكبار , وجا يوم من الايام وهو داخلن بيته ولاها ايام تفريخ العصافير , ولآه يسمع صوت هَ " المفرخه " داخل الجخر اللي في الجدار لها لجّه تبي الاكل . . .

شآيبنا مثل ماذكرنا شايبن مهوب سهل قام يراقب بيت العصافير ويناظر يوم تأكد إلا المفرخه قريبه في متناول يده ويقوم يطلع المفرخه على واحد واحد ولاها والله سته او خمسه على مايقولون ( مقآصيب) الرجال ركد قلبه ونوى النيه انه يتعشى عليها في يوم من الايام ولكنها ماعجبته صغار وضعاف ,

كل يومين ثلاثه يجي يطل عليها ويطمّن قليبه ويوم على مايقولون صارت ( مطآيير ) يعني كبرت معد بقى عليها الا شوي وتطّير قام وبكل دهاء ومكر وخبث .. قال في نفسه اخاف تطير باتسر ولاعقبه وانا نايم ولا رايح , خلني بأجيب المقص واقصص جنيّحآتها ,,,, فعلا جاب المقص وحرّت جنيّحاتها هالمسيكينات ,, وابوان هالعصافير يحسبون لهم بالايام في " حساباتهم " حـآن وقت التطيير وقام الاب والام بالدخول على عيالها وتدّفها بالقوه على برا على شان تطير وتوكّل نفسها بنفسها .... !!!

مآيدرون الاهل ان الشويّب الخبيّث مقصص جنآحينها , ومن طاحت من المفرخه ولآهي في
:eek:

:eek:

ثم الهر >>> ولنّه هر قريه تسنه اسد ياكلها في الهوا

ويوم جا الشآيب ياخذها بيتعشى عليها مالقى إلا ( ريشها ونقيطات دم ؟؟؟؟؟؟؟ ) حتى العظام جارشها الهرّ - الله يكافي-

( وَســـــــلآمتكم يآجماعة الربع )
أخوكم : خوي مخباته .