السلام عليكم ورحمة الله وبركاته

.
.

هذا خوينا اللي قلنا لكم سالفته بالربع الخالي

http://www.mekshat.com/vb/showthread.php?t=559674

سير يتقهوى عندي امس .. وجلس معي بعد العصر

يتقهوى وسألته .. ما كملت سالفتك مع ابوعدي صدام حسين ..

وهو اللي يستقعد بمحله ويمد الفنجال واصب له ..

قال اي سالفه .. طبعا ناسي الموضوع ..

قلت سالفتك بالعراق ... قال اييييييييييه ..

وانا الان برويها على لسانه ...

يقول .. كنت قاعد بالبيت العصر اتقهوى ودق البيجر ..قبل الجوالات

واناظر الرقم ولاه خارجي ولا رديت ..

شوي الا يدق ثانيه نفس الرقم وحاط تسعات ...

قلت بس شكله ضرووووري .. وارفع السماعه وادق ..

ويرد علي واحد .. من انت .. قلت ياخوي انت اللي داق بيجر ..

قال ابوفلان .. قلت نعم ابوفلان .. والله ويهلي ويرحب ..

قلت من معي قال ابوعدي .. قلت صدام .. قال ايه ...

قلت ياهلا ومسهلا .. واسولف انا وياه شوي .. وهاه وش عندك داق ..

قال ابد كل خير بس ابي خدمه ومستحي .. قلت وش تبي تامر امر ..

قال كل خير ... بس ابي عازه من عندكم بسوق الجرده ..

قلت وش ودك بس ... قال تخبر الان حرب مع ايران ...

وناقصنا فشق شوزن .. قلت ابشررررررر كم تبي ..

قال عشرين صندوق .. قلت ابشر لكن وشلون بطلعها مع الحدود ..

قال تكفا يابوفلان .. قلت ازهلها واذا دخلت حدود العراق تراك انت اللي بتزبني ..

قال ماعليك اذا دخلت العراق ازهلها ..

والله واكلم لي رجال ويجيب الصناديق واحملها واطربلها ..

واقعد اهوجس .. وشلون اوصلها .. واتذكر واحد خوي لي ..

واجيب دفتر التلفونات وادور رقم بيجره وادق عليه ..

ودقيقه ويرد علي .. هلا من داق بيجر .. قلت ابوفلان ..

والله ويهلي ويرحب ويقول وينك يالقطوع .. قلت بالدنيا ..

قاطعته وسألته من هو اللي دقيت عليه يابوفلان ..

قال كارتر ريس امريكا ..


يقول .. وانا اللي اقول له ناصيك وناخيك يا كارتر .. قال ابشر بالسعد ..

قلت اعرفك كفو .. وقلت له معي فشق لابوعدي وودي اوصلها للعراق ..

قال والله انك احرجتني تخبر الحدود واخاف تفضحنا اذاعة لندن ..

قلت والراي .. قال شف اطلع للعقير باكر بعد المغرب واوقف قدام البحر ..

وكبس مرتين بس .. وبتجيك حاملة طائرات وتقلص موترك للعراق ..

بس ترا ما نقدر نركب الموتر بالحامله .. قلت ازهله .. الوعد باكر ..

واروح من باكر للعقير وقبل اوصل وانا اللي اوقف عند بنشري

واخذ عشرة لساتك ... وانفخها واربطها تحت الموتر ..

وعقب المغرب بالضبط ومن اول تكبيسه .. الا حاملة الطائرات

تكبس لي اثرهم واقفين على الشاطي ومطفين الانوار ..

ويقربون وادخل الموتر للبحر يوم طفح من اللساتك ..

ويمدون واير ويربطونه بالموتر ويقلصونه ... وانا متكي بالغماره ..

معي سنتوب اشربه " هذا ما يقول " ... ويومين بعرض البحر والموج فوق حدر

وشوي الا انوار العراق تبينت .. قلت ياسواق السفينه ..

وقف .. والله ويوقف وانزل واسبح للشاطي .. والقى حرس الحدود ..

قالوا ابو فلان قلت نعم .. قالوا والله انك كفو .. ارتح وتروش هنا ..

وخل الموتر نسحبه عنك

... والله ويسحبونه ويجيبون للشاطي ويغسلونه ويلمعون الكفرات ..

وقال امس عندنا الليله وباكر الصبح نروح لصدام ..

..... السالفه طويله وانا اتعب من الكتابه اعذروني على التوقف مع وعدي لكم باكمالها

قريبا جدا

اشكر لكم مروركم وردودكم