منتدى استراحات زايد - ( لا حياة لمن تنآدي ) موضوع مهم أرجو الدخول ..

السلام عليكم ورحمة الله وبركاته ..

أحبائي إخواني أعضاء مكشات , وضعت عنوان الموضوع
( لاحياة لمن تنادي )
للـ لفت الإنتباه والدخول ..

الى متى وأراضينا تسوء من الأسوؤ الى الأسوء والسبب الإنسان عدو البيئه ..
انا لا أتكلم عن اخواني المكشاتيون بل أتكلم عن الناس اللتي لاتدرك ولا يوجد لديها وعي في حماية البيئه كأن الأرض له لوحده فقط ..

-أراضي الصمان تزداد سوءاََ
-الربيع بدل ماهو يزيد ترجع له بعد أسبوع يقل الربيع
-أراضي وأماكن الربيع يُترك فيها القمائم أعزكم الله وتُهمل
-الرعي وقلة الوعي لدى بعض أصحاب الماشيه .. , أول مايفكون أغنامهم الا بعد ماتنبت الأرض ويرتفع العشب .. , الآن من يطلع الباذر فك الماشيه لماذا ؟
-الكشاته الجُدد وبصراحه ناس
( غير واعيه - مُزعجه - لاتهتم بالنظافه - يدوسون بسيارتهم بأي مكان .. , إلا القليل النادر .. )
- لماذا .. لماذا .. لماذا ..
ياناس حرام اللي صرنا نشوفه والله , أول نقول ليش يحمون الفياض والإحتطاب , الحين بالعكس ياليت يحمونها والسبب الناس الغير واعيه .. وليس لديها أي إهتمام
صرنا نجي الفياض , نشوف مناظر ماتسر العين أبداََ , صرنا نجي الفياض وقبل مانجلس ننظف الفيضه ووننظف بعد الكشاته اللي أهملوا أوساخهم وتركوها وذهبوا ,
ياخي اذا انت مانت بقد البر ولا انت قد الكشته واهتمامك في البيئه أجلس في بيتكم أزين لك وخل الخدامه الله لايهينك تنظف بعدك ..

تعبنا والله من التوجيه والارشاء .. لكن ؟
نعم صحيح في ناس الله يجزاهم الجنه صار لديهم وعي , لكن اللي لايوجد لديهم وعي ؟؟

- الفياض اول جنه من جنات الرحمن عز وجل , الحين حتى العشب في بعض او اغلب الفياض صار مايطلع الا حول السدر والسبب ؟؟

دوس السيارات .. ياخي اذا صار في الفياض ماء وطين ماهوب لازم تدخل الفيضه اجلس في أطراف الفيضه واستمتع بالمنظر ..

دوس السيارات واللامبالاه ايام المطر والماء في الفياض يعدم الغطاء النباتي ,
ماعاد ينبت العشب وتخرب الارض والسبب دوس السيارات ..

- ياخي اذا خلصت من كشتتك جمع اوساخك في أكياس زباله وانت بكرامه وخذها معك لامنك طلعت على الشارع , اقرب براميل بلديه ارمها فيه ,
ولاتحرق اوساخك في الفيضه ,
أغلب اللي تحرقه مايتحلل تدور السنين وهو كما هو وفوق هذا الحرق يعدم المكان ماعاد ينبت فيه الربيع ..

الله يهدي الكشاته الجدد بس والله ان اغلب الجدد مهملين ..

والله والذي لا اله الا هو اللي يحب البر ويعشقه من قلب ماهو حتسي فاضي انه يحافظ عليه مثل مايحافظ على أغراضه الشخصيه ..
ويهتم في البيئه وعدم الازعاج والاحترام والتنظيف ..
( دع المكان افضل مما كان )

*للأسف الكثير صار ( دع المكان أسوء مما كان )

ينشرح صدري للكشاته اللي من تناظرهم وهم مهتمين ودك تروح لمهم وتبوس خشمهم والله

أعذروني على طرح هذا الموضوع او اني طولت فيه لكن اللي صرنا نشوفه والله انه شي يفقع الكبد ..

ولكم جزيل الشكر والأمتنان / أخوكم :عبدالعزيز الزامل