تعلم واحترف التطعيس مع نصايح
 

^&^ تــعال تعلم و احترف التـــطــعـــيـــس هنااا ^&^








السلام عليكم ورحمة الله وبركاته

اخواني بدون اخواتي الا اذا سمحوا للمرأة القيادة في ذاك الوقت اقول اخواني اخواتي

كيفكم اخباركم

التطعيس وما ادراك مالتطعيس يا حبي لها

هذه مجموعة من النصائح للي يحب يطعس..طبعا مو تجي تقرأها وتدق سلف على طعس التحدي تبي تطبق واخرتها تتفشل..لا طبعا..اقرأ شوي شوي
1- اول شي لا تنسى تسمي بالله قبل لا تبدأ بالتطعيس
2-احذر ثم احذر ثم انتبه زين لا تطلع لحالك ابدا..خذ معك واحد خبير وخله يسوق ويعلمك
3- يفضل ان تطلعون على اكثر من سيارة علشان اذا غرزت الأولى تسحبها الثانية
4- خذ معك واير للسحب مصنوع من اسلاك حديدية..مو اللي مصنوع من مطاط..هذا تقل مرونته مع الوقت وينقطع
5-نسم الكفرات..حاول تخلي في الكفرات الامامية 15-17 والخلفية 10-12
6- شغل الدبل الخفيف وانت مفضي القير للاوتو ولا تلمس الدبل الثقيل (بتكلم عنه بعد شوي)
7- تجنب الانطلاق المفاجئ او الكبح المفاجئ..اذا دعست بقوة راح تحفر الكفرات وكذلك اذا دست بريك بقوة..
احسن شي تخلي السيارة تهدي من نفسها
8- تذكر انو مو كل الرمال نفسها..بعض الانواع تكون خفيفة وسهل تغرز اي سيارة فيها (الرمال المتحركة)
وبعضها ثقيل اذا مشيت عليه كأنك بازفلت
يعني انا مثلا طلعت طعوس في الثمامة ما توقع الشباب ان الموتر يقدر ينطحها..كانت حادة جدا ولكن رملها متماسك الى حد ما..بينما هناك اراضي شبه مستوية ومع ذلك اجتزتها بصعوبة جدا..الرمل فيها كثيف جدا..ومن امثلة هذه المناطق بطون الشعبان..يعني اذا انت بتقطع لك شعيب حاول تدخله وانت مسرع (مو اذا دخلت تعطي الموتر عزم)
وبهالطريقة بتتمكن من قطعه بسهوله
9- لا تكسر الدركسون بقوة..حاول توسع اللفة
حاول تخلي دعستك ثابتة..لا تزيد ولا تنقص الا بشوي شوي
10- اذا ودك تطلع طعس فاحذر ان تنطحه مباشرة..لأنو احتمال ان تكون هناك هاوية خلف راس الطعس..فتروح انت وموترك في خبر كان
11- اذا انت ودك تطلع طعس فاحسن طريقة هي التقويس (التسييف) وهو انك تطلعه بشكل موازي مع الجنب وبشكل مائل..بس احيانا يبغالها واحد جزوم..يعني يقرر التسييف من اول مو بعد ما يبدأ يطلع
وجاتني قصه عليها ذي وهي كنت بالدائري بمدينة الأحساء وشفت طعس وجيت اطلعه مباشرة
وعطيتها عزم خخخخ والسيارة ما غرزت تعلقت يعني الكفرات بالهوا وبطن السيارة القمة
وحاولت يمين يسار حفرت دبل قوي دبل ضعيف نسمت كبيت جالون ماي مااافي أمل :g-13:

مشيت اللين مالقيت واحد يعطيه الف عافيه (( دوسري )) كان يدور على وحده من بعارينه

وقلت له تسحب معي ؟؟ وجا النشمي ساعدني يعطيه العافيه

بس انت
كيف تتصرف اذا غرزت؟؟؟
افضل طريقة هي انك ما تغرز اصلا...بتقولون اني استهبل ..اوكي اشرح لكم
اكثر ما يسبب التغريزه هو اصرار السائق على دعس البنزين مع ان السياره ما تمشي الا بشكل ضعيف جدا..
يعني اذا خار عزم السيارة وحسيت انها ما تمشي وقف الدعس مباشرة..فكل شي سيكون بخير دام ان السيارة ما حفرت بالرمل..(معروف ان الرمل ما يعاند..يعني اقشر..تعانده يعاندك زياده وانت الخسران)

مثل واحد بالجوف منفس الاخ راح يطعس بمكسيما وشوفوا النتائج



يستاهل عشان كذا خذو جيب دبل (( دفع رباعي ))

نكمل اذا غرت ويش تسوي
انزل من السيارة وبرح للكفرات (شل التراب اللي قدام وخلف جميع الكفرات بيدك..
نسم للكفرات زيادة
عشق الدبل الثقيل
ارجع بالريوس الان مع الدعس على خفيف..اذا حفرت الكفرات ثانية فكرر نفس الخطوات لين يحلها ربك
اذا ما نفعت الطريقة (مع ان احتمال نجاحها كبير جدا)..مالك الا تشوف واحد يسحبك
احيانا يكفيك تعشق الدبل الثقيل مع الريوس (بس هذي الطريقة ما تنفع الا اذا غرزت وانت تحاول تطلع طعس)
اذا طلعت من الغراز فك الدبل الثقيل وعشق على الخفيف
تذكر انه لا يوجد ذلك الشخص اللي ما يغرز..اكثر المطعسين احتراف يغرزون احيانا..بس تغريزتهم محترمة وواضح انها تغريزة بني ادم محترف
اذا خلصت من التطعيس لا تنسى تعبي الكفرات هوا قبل لا تمسك الازفلت...اشتر لك ماطور هوا من الغرابي (وافضل الانواع هو سوبر سفاري) وخله بالسيارة ولو تشتري لك ماطورين احسن علشان توفر الوقت



مع تمنياتي لكم بتطعيس ممتع