تحذيرخاص لأهل شمال الرياض .. وشكر
 

هو من لوبي الأشقاء اليمنيين في البناشر ومحلات الإطارات والبطاريات، نراهم ونعتقد أنهم يعملون بشكل فردي .. لكنهم في الحقيقة يعملون بشكل منظم ولايكتفون بالتحكم في الأسعار فقط بشكل طبيعي .. بل يتجاوزون ذلك إلى الاحتكار والغش

أضرب لكم مثل بشغلتين :

١- تغيير الزيت إذا جبته انت :

نظرا لأنهم يرفعون سعر الزيت بواقع ريالين - ٣ ريالات في العلبة ، اتجه البعض وأنا منهم إلى شراء الزيت بالكرتون وتغييره عندهم و كانوا ياخذون ١٠ ريال شغل يد

بعد فترة انتبهوا لهذه الظاهرة ويبدو أنهم اجتمعوا واتفقوا مايقل التغيير عن ٢٠ ريال ، وكذا صار الفرق بسيط بين انك تشتري الزيت من عندهم أو بالكرتون من محلات الجملة .. مريت أكثر من بنشري في التعاون والمصيف ووصلت إلى حي الملك فهد ، السعر موحد : ٢٠ ريال


٢- أسعار الزيت و الإطارات والبطاريات :

تكلمنا عن الزيت ، أما الإطارات والبطاريات يشترونها من شارع الريل ويستغلون بعد شمال الرياض والزحمات في منطقة البطحاء والغرابي والريل اللي تخلي الواحد يتعيجز يروح .. ويرفعون هامش الربح بشكل خيالي

سمت بطارية عند بنشري في طريق أبي بكر الصديق عند جامع القاضي ب ٢٥٠ ريال ، نوعها Golden تايوانية ٥٠ امبير وبعد المكاسر قال لي ٢٤٠

وبعد نصيحة أخوي "دايم الخير" صاحب بطارية ابن عمار .. رحت اليوم للريل تتوقعون بكم لقيتها ؟

كم تتوقع هامش الربح عن الريل ؟

نقول ٢٠ ريال ؟ يعني البطارية في الريل ب ٢٢٠ ؟

لأ

نقول ربحه ٤٠ ريال يعني البطارية ب ٢٠٠ ؟

لأ

لقيتها ب ١٧٠ ريال !!

وهذا في محل واحد سألته وأنا ماشي على الرصيف مادخلت وكاسرته

يعني ربحه عن الريل ٧٠ ريال وربما أكثر !! فما بالك بربحه عن الوكيل ؟!

طبعا لو رحت للبنشري اللي قبله في محطة ساسكو على نفس الشارع .. بيعطيك نفس السعر .. ولو رحت لمحل الإطارات والبطاريات في حي الملك فهد بيعيطيك نفس السعر .. أو أقل شوي أو أكثر شوي


وبالمناسبة :

الذين يديرون البنشرين الاثنين في طريق أبي بكر الصديق اللي ذكرتهم هم شلة وحدة .. لأني أوقف عند الاثنين وأشوف العمال يتنقلون بين المحلين


ومريت عليه قبل شوي قلت له : هاه ماودك تنزل لي من سعر البطارية لو عشرة .. خلها ب ٢٣٠ يارجال

قال : ٢٤٠ آخر كلام

ولما علمته عن شارع الريل قال : هذي بطاريات معاد تصنيعها هههههههههههه

الزبدة :


ملعوب علينا في شمال الرياض .. فرق ٧٠ ريال تستاهل مشوار مرة في السنة أو السنتين .





لأعضاء مكشات كافة على تكاتفهم وسعيهم في خدمة إخوانهم بكل مايقدرون عليه وبكل طيب نفس

وشكر خاص لكل من :

١- مهندس مكشات : طلبت منه صندوق البطارية، وطلبت تعديلات .. وصلني الصندوق بالتعديلات وفوق كذا غثيته بالاتصالات والاستفسارات وبالواتساب .. وماقصر أبدا وكان نعم النصوح

٢- دايم الخير : رغم اني ما اشتريت بطاريته اللي هو معدل عليها وقاعد يسوق لها ، إلا انه ماقصر معي برضو غثيته بالاتصالات والواتساب .. ووفر علي فلوس كثيرة كنت أبدفعها على غير سنع


واللي أعجبني وأكبرته في الاثنين ان كل واحد منهم يمدح شغل الثاني ، مهندس مكشات يمدح شغل دايم الخير في بطارية ابن عمار ، ودايم الخير يمدح شغل مهندس مكشات في الصندوق .. محد قال الزين عندي أنا بس فجزاهم الله ورياكم كل خير وبيض وجيههم ووجيهكم


وإن شالله أول ما أكمل شغلي في الصندوق ( باقي تركيب المحول فقط ) أبنزل تقرير كامل

تحياتي للجميع