|
راعي العجراء سالفه غير شكل السلام عليكم ورحمة الله وبركاته اليكم هذه السالفه بعنوان راعي العجراء واللفت (الصنبصير او القفنصير) المهم هذا اللي يزعب الاوادم ويرقيهم فوق ويحول فيهم للقاع في يوم من الايام سكنت فندق في الامارات يقولون انه فايف صتار خلوني اترجمها لكم بالعربيه يعني هو نجم مثل بنات نعش 7 نجمات ويسمونهن السبع بس ثنتين مابغن يشاركن ماودهن وخلوهن على راحتهن وصارن خمس صتار وحطوهن على جبهت الفندق المهم نرجع للموضوع انا توي واصل دايخ من الطريق اكثر من 1100 كيلو وانا على ضهر السياره من غير الوقوف بالمنافذ المهم اني وصلت وقعدت ادور على فندق ساعه كامله ادور حتى حصلت هالفندق قال اطلع شوف الروووم يقصد الحجره او الصفه تراي تعبت وانا اترجم لكم مره بالعنقليزي ومره بالفرنساوي طلعت مع واحد وشفت الغرفه ولاها زينه من يوم شفت السرير وانا احلم قبل مانام من التعب شكله يجيب النوم من قبل امس المهم حولت واتفقت مع الجرسون اللي يكتب على الكفنتر واخذ جوازي قال معك شنط قلت لا مامعي الا اللي في يدي كيس من اسواق العثيم حاط فيها هدومي ماغير ثوبين وفنيله والسرو؟؟؟ السكري من سباحة القلبان اعطاني المفتاح وقال عارف الغرفه قلت ايه ادل الصمان شبر شبر وتبيني اضيع الدور التاسع والغرفه قال خذ المفتاح اخذت المفتاح ورحت للعنفصير ورعصت الزرار وقعدت احتري واحد من الاربعه يحول يزعبن لفوق المهم نزل واحد خامس بعيد عنهن شوي ورحت اركض له وكيس العثيم في يدي وركبت ورعصت ازرار رقم ناين يعني 9 في بريطانا لعل هالعنفصير حق خدمه المطابخ والعفوش ريحته زفر وريحة سمك غرض القطاوه طلع اللفت ومريت من عند الدورالخامس ولافيه طقطقه على ما اعتقد ناس عندهم عرس صجه ولجه يوم تعداهم شوي وهو يطفى الكهرب باللفت قال بس هذا مكاني واقعد ارعص بالازره مافيه فايده اطق الباب اصوت ماحد يسمعني من صوت المعاريس اطقق الجدران ولا مافيه فايده واقعد ساعه كامله ويوم بدا الحر ياخذ نصيبه مني ومع الخوف والربشه يوم صرت اصبصب عرق اخر شي تعبت وقعدت على حيلي ماغير اصارخ في اعلى صوتي والناس ماهم يمي بلشين بالعرس مره اقول لابارك الله فيهم ولا بعرسهم عساه يطلق حرمته الحين ومره اقول هم وش دخلهم فيني الا الله يوفقهم ويجمع بينهم بالموده والرحمه اخر شي شفت نفسي طولت زياده وحلقي انكسر قلت ياولد ليه ماقول نيو نيو يمكن يسمعوني جمعيه الرفق بالحيوان يقولون عنهم افضل من جمعيه الرفق بالانسان المهم ماجاوبوني قلت يمكن ماهم حرصين على البس ليه مانبح ا.... لكلاب محبوبه عند العنقليز نبحت مافيه فايده قلت ياولد انهق يمكن يقولون وش دخل الحمار بالفندق ويبحثون عن صوته نهقت نهقتين الا واسمع العالم عند باب الفندق ولاهم يقولون هاتوا الليور باب اللفت اكثر من نصفه بالجدار وشوي منه على الباب واسمعهم يقولون اتصلوا على الدفاع المدني حاول يفتحون الباب ماقدروا يفتحونه الا يوم جو حقين الدفاع المدني وهم يقلعون الباب بالقوه وهم يفتحون الباب ولاي بالخضيرا بعيد عنهم وهم يحطون ذيك الطاوله ويرقون عليها وانا منسدح باللفت ويرقون على الطاوله اثنين من الدفاع المدني وفيه واحد منهم يقول حجي حجي ماعليك اطلع شوي شوي احنا بنمسك فيك وننزلك لاتخاف انا خايف ان اللفت يشتغل وانا مضغط ازره الادوار كلها قال ماعليك حجي لاتخاف وهم يطلعوني تقول مطلعين حاقول من مفرخه عصافير بخلوة مسجد وانا انزل واقول يازين الارض وهم يسدحوني على كنب ويجيبون ماء وعصير وانا انتعش واقعد على حيلي انا كل اللي فيني روعه المهم يوم شافوني صحيت جاء واحد من حقين الشرطه مدري الدفاع المدني قال حجي نبي نسوي تقرير محضر ونبي ناخذ اقوالك وهذا شي لصالحك قلت مابي شي ابي امي ابي ابوي ابي غرفتي انسدح قال على راحتك المهم راحوا جاني واحد قال غلطان ليه ماخذت تقرير تسكن ببلاش مدة اقامتك ويعطونك بعد بدل روعه عشره او خمسه الاف ريال قلت ياعمي انا فرح بسلامتي ذيك الساعه لو يبون قروش عطيتهم وانا اتركهم واروح ابي اطلع مع الدرج السلم قالوا لا تتطلع مع الدرج وانت تعبان قلت افضل من لفتكم قال لاتخاف انا اطلع معك قلت وهو يلزم وينادي واحد ثاني من الفندق وهم يطلعون معي وانا اطيح بالفراش وانام وكل احلامي وانا نيو نيو وه وه وه ومرات انهق ويازينها من احلام ياهي احلام ورديه ذيك الليله انتهت السالفه وقيل الختام سبحانك اللهم وبحمدك لااله الا انت استغفرك اللهم واتوب اليك وفي النهايه ارجوا ان تحوز هذه السالفه على رضاكم والسموحه على التقصير مع السلامه اخوكم راعي العجراء ابوجلنبو مدريد |
| الساعة الآن 02:18 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir