|
رجّة دركســون البــاترول و تجربة ( ترهيم ) أو تدبيل مساعد الدركسون والنتيجة ؟ بالصور! بسم الله الرحمن الرحيم .. وبه نستعين صباح / مساء الخيرات للجميع .. مساء الفل والياسمين .. بدون أي مقدمات بتكلم لكم عن مشكلتي مع رجة دركسون موتري الباترول فتك 2002 .. وهي تقريباً تجي مع المطبات او الطرق اللي زفلتتها سيئة وتجي على سرعة 80 وانت طالع .. أول ماتاكل المطب يرج الدركسون .. وسويت الآتي علشان أحل المشكلة .. أول شي : 1- شديت الرمـــــان مانفع 2- سويت ترصيص أرضي مانفع 3- دقيت على ميكانيكي وقال لي من مساعد الدركسون .. ونصحني بالمساعد الاسترالي الأصفر وشريته من الرماية بقيمة 395 ريال تقريباً .. وركبته وخفت الرجة قليلاً لكن ماراحت .. 4- قال لي الميكانيكي الأذرعة عندك مرتخية مرة .. ورحت الرياض وسويت له كبس .. لكن لم تذهب المشكلة .. .. وجيت مرة من المرات عند يمني حق ميزان ببريدة .. وقلت له عن الرجة قال رهم مساعد دركسون ثاني ..! وأنا أول مرة تمر علي ..!! المهم قال أنت مرهم قبل ؟. قلت لا .. قال فيه قواعد ملحمه ! قلت انا شاري الموتر مستعمل .. قال خلاص أكيد اللي قبلك مرهّم ..والحين يحتاج تركيب فقط .. المهم طلعت من عنده ,, قلت ماني مستعجل , مالي الا مكشات فيهم البركة اكيد ماتخفى عليهم .. والله وأجي أبحث عن هالفكرة وحصلتها عن الاخوان بارك الله فيهم على المواضيع هذي موضوع كامل ومفصل لأخي ( قرم ) (((( عون الباري للقضاء على رجة السفاري.))))) وأيضاً اخونا راعي الهدد (((((التدبيل.. يهم سـيارتـك .. لايفووووتك .. مع .. راعي الهـــدد))))) بارك الله فيهم ماقصروا وأنا استفدت منهم وقررت أسوي مثلهم .. طبعاً أنا رحت لورشة تربيط عندنا وسألته قال ايه أرهم وكد سويتها قبل قلت له طيب بجيب لك مساعد وانت ركبه قال خلاص .. طبعاً قريت في موضوع أخونا راعي الهدد ان أفضل ترهيم مساعد دركسون للباترول هو Acdelco ايسيديلكو .. الأمريكي .. وفعلا رحت أشتريته بـ 130 ريال .. وهو حق جمس .. وهذا شكله 1 وهذي شكل القواعد .. هذي على الذراع 2 وهذولي على الشاص .. بس أنتبهوا لاترهمون قاعدتين على الشاص لأن اللي قبلي مرهّم غلط وراح أبين كل شي بالموضوع .. والهندي قال لي لازم أشيل لك وحدة منهن .. المهم قلت ركبه على القاعدتين بجرب أول بعدين اذا مازبط رجعت لك .. 3 ورحت اجرب وصار فيه فضاوة ورجعت للهندي .. وقلت له ضبطها لي .. وبدأ بالشغل .. قص لي القاعدة الثانية .. 7 وهذا الشكل النهائي بعد ماركبه 10 النتيجة للأمانة : الرجة اختفت بنسبة 95% .. وأنا أشوف انها تجربة ناجحة ولله الحمد .. خلاصة الموضوع أنت إذا تبي ترهم أول شي تسويه عند الورشة 1 -تلحيم قاعدة على الذراع 2- تلحيم قاعدة على الشاص .. 3- مساعد دركسون Acdelco أمريكي وأفصل انك تدور ورشة سبق لهم وسووا هالشغله وعن نفسي حبيت أنقلها لكم لكي تعم الفائدة للجميع .. وإذا أشكل عليك أي شي في موضوعي عندك روابط الاخوان اللي ذكرتها لكم فوق.. واضحة وضوح الشمس .. هذا والله أعلم أخوكم أبو يعقوب |
| الساعة الآن 06:37 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir