|
راعي العجراء والعجوز القشراء السلام عليكم ورحمة الله وبركاته اليكم هذه السالفه بعنوان راعي العجراء والعجوز القشراء اهداء الى اخي الغالي نجد سحاب في سنة من السنين يوم كان عمري 13 سنه تقريبا ازيد خمس او انقص خمس مدري بالضبط وكنا نسكن في بيت طين له مقدمه حوش مثل الفيلا الديبلوكس فيه غنم ودجاج ونخلة وفيه احضار اوعريش من العسبان جاي من مقدمة البيت الى سور الشارع في زاوية الحوش واذكر كان فيه مكينة خياطه وزير للماء ونقارات للسقى والمعروف ان الضحويه كل حريم الجيران يجتمعن عند الوالده الله يرحمهن جميع وكان بيتنا اكبر بيت مساحته 180متر الله المستعان كلهن عجز حتى سنونهن طوال تقول فشق خرازه وبعضهن يلبسن برقع عين وحده من قل شوفهن ولا يبن يبينن محاسنهن للرجال ولاقابلهن رجال غمضن بالعين المفتوح لها البرقع وتشوف بالعين الثانيه من وراء الغطوه لو نظرها ضعيف لما يتعداها الرجال ثم تكشح بالنور العالي (زنون) اذا تعداها المهم من بين هالحريم عجوز قشرا تطق الورعان لو امهم عندهم ماتبالي ولسانها ماتسلم منه وعليها قبصه الى قبصت الواحد يقعد الورع اسبوع وهو يتحقرص منها ويصير محلها ازرق تقول ختم الجوده وعندها ورع اقشر من امه وكان اكبر مني ذاك الوقت بسنه او سنتين ولامسك الواحد ماعنده الا يغول الواحد مع حلقه لما تناقز عيونه بالصحيح موذي وهالعجوز ماتخاف لامن صغير ولا من كبير ماتخاف الا من ولدها من قشارته يوم صار ذاك اليوم ولاي قلعد عند العجز واسمع ام الولد تسولف على الحريم وتقول ولدي ذابحه المشق مايقوى يتحرك ولايمشي شبر فخوذه متشطبات ورجليه ماعاد تعرفه من يديه والبارح انه مانام ماغير يتقلب من المشق وانا اتسمع كلامها قلت بس هذي فرصتي يوم صار من باكر وانا اطلع من البيت ولا ولدها قاعد بعتبة الباب عيونه متنفخه من قل النوم وخدوده غاديات تقول غضار غرش مكفيات حمر مدري خضر تقول اللي فيه جدري ماهو مشق وانا اروح لمه واقعد عنده شوي ولا نفسه شينه قلت له وشفيك وجهك ماهو زين قال فيني مشق ومانمت الليل و لا اقدر بعد امشي قلت خلني اشوف مشيتك ويوم قام يمشي ولا هالضعيف يمشي مفوحج فاتح رجليه للاخر قلت بس فرصتي وانا اتقعدله بذاك الكف يوم قرقشن غضار خدوده ويدخل بيتهم وانا اهج ولا يردن الا بيتنا وماعاد ادري وش صار عليه اشوي يوم جت امه وانا ازبن السطح ولها تلجلج على الوالده وتقول هين لو امسكه لمصع اذانه وعطيه اذانه بيده وانا اتلمس اذاني المهم قعدت بالسطح لما طق خلقي لازم اطلع من البيت بس خايف منها ودي اروح العب وانا اطل مع السطح الا العريش ماهو بعيد عن جدار السطح قلت لو اطب على العريش من الجدار وامشي عليه حتى جدار الحوش ثم اطب على الشارع وانا احول على العريش كله عسبان نخل يوم توسطت وهي تنكسر العسبان وانا اجيك على ضهري ولا اطيح الا على سيقانها وهي ممدده رجولها عاد سيقانها يابسه ومع الطيحه وهو ينكسر ضلع غير الرضوض وهي مع الروعه زاد غلها غلين والله وتكمل الناقص علي بالطق والتقبيص والطق مايهمني مثل القبصه لو تقبص ثور مع رقبته يروح الثور يعرج من شدة وجعها انتهت السالفه وقبل الختام سبحانك اللهم وبحمدك لااله الاانت استغفرك اللهم واتوب اليك اشكركم على سعة صدوركم والله يحفظكم مع تحيات اخيكم راعي العجراء منتدى مكشات |
| الساعة الآن 01:46 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir