منتدى استراحات زايد - سالفة رقعة السيكل ( النبهاني )

بسم الله الرحمن الرحيم

السلام عليكم ورحمة الله وبركاته

اخواني واخواتي مشرفين واعضاء وزوار مكشات

أسعد الله اوقاتكم بالخير والمسرات

هذي السالفه صارت على واحد من البزران وهي قديمه بلحيل ايام كنا صغار وكانت السياكل اللي اذكر ثلاث احجام 18 و 22 و 24

يعني ما فيه مثل هالحين سياكل صغيره حقت الاطفال

والى حصل لنا سيكل كبير 24 نسوقه وحنا نتمروج على العامود يمين وشمال مانطول الوطايه الى قعدنا على المرتبه

وكان السيكل الى بنشر حنا اللي نرقعه ما فيه بنشر نروح يم الدكان ونشري رّقَعْ وسليسيون عصار حق الرقع ومكينة رقع

والدكان هكالوقت كل شي به تلقا كيس الرز والبرتكان والموز ولساتك السيكل وادوات الرقع والقهوه والهيل والفشق والحلاو

والحبال والمساحي والمخالب والفصفص والثياب والكوته وكل اللي تحتاجه تلقاه بدكان واحد

المهم رفيقنا صغير جاه صاحبه وقال عيوني تعورن قال عندي لك مرهم زين ادهن عيونك به وتطيب

قال ما يخالف

تعرفون بزران ومثل ما قالوا اخوانن الكويتيين يهال

المهم الولد دهن عيون صاحبه بالسليسيون حق الرقع ويوم اخذ شوي يوم قام يصرّخ ويناقز

وينشده رفيقه وش بك قال اشتبت عيوني وعجزت افتح

بلشوا بهالعمله وراحو لهلهم وعلموهم بالسالفه واختبو اهله وانحاسوا

اللي يقول خل نوديه للصحيّه واللي يقول اسدحوه بالشمس غديه يلين

والوليد ماغير يصيح ويمطط عيونه

قالت وحده من الحريم جيده فوّحوا لي ماء وعطونن منشفه وطاسه

وقامت تكمده وعلى هالطريقه تفويح ماء وتكميد

وعقب حول ساعتين دلا الوليد يشوف بصيص السفر وشوي شوي لين فتّح

لكن عيونه صارت ما يحتاج توصيف لكن مابه من الرموش شيٍ يذكر

والحمد لله انه سلم من الإلتهابات والمضاعفات وانه ما إستجرحت عيونه

أنتهت السالفه الله يغفر لنا ولكل مسلم

مع تحيات

محبكم النبهاني