غش ونصب الـــرمايــــة .. مساعدات ويايات "" احذروهم
 

السلام عليكم ورحمه الله وبركاته


قبل خمسة شهور ذهبت فرع الرماية ببريدة وطلبت منه مساعدات ويايات اولد مان طقم كامل للبرادو 2011 واشتريته بـ 3510 ريال بدون تركيب لانهم ماعندهم ورشة للتركيب
المهم اخذتهم وركبتهم بأحد الورش وبعدها لاحظت بعض المشاكل بامامي السيارة كالحذف يمين وميلان

رحت لاكثر من ورشة وسويت وزن اذرعة وكمبيوتر ودفعت مبالغ وقدرها
وكان اخر ظني ان المشكلة من المساعدات الامامية فقط عرضت على محل الرماية بالرياض من قبل الفني وقال انها مساعدات فورتشنر وليست للبرادو ؟؟!!!!!


طلب منهم الاستبدال او ترجيع المبلغ ولكن رفضو وقال المدير ارجع للفرع بريده هو المسؤول وهو بيبدلها لك


رحت لفرع الرماية بريده ودخلت عليهم (طبعاً كان ناسيني مايعرفني) قلت له ابي مساعدات امامية للبرادو 2011 وطلعهم لي وسألته عن رقمهم قال : 141
( طبعاً حقات الفورتشنر الي غشوني فيهم رقمهم 167 ) قلت لهم مو حقات البرادو 167 قال : لا حقات فورتشنر البرادو 141
لاحظ انه اكد الغش الي حصل لي منهم ... وشهد شاهد منهم

فقلت له كل السالفة من الى .... وقالي خلاص بكلم مدير الفرع وبيبدلهم لك ..

جاء واحد ثاني وقام يتحجج باني لي خمس شهور وان المساعد وصخ مب نظيف (الي يشوفه يقول انه المساعد يركب بالتكاية مو اسفل الموتر) المهم حجرت له وقلتله خويك قال بلسانه انهم للفورتشنر وفرع الرياض بعد ... تبدلهم يعني تبدلهم


قال انه طول عمري ابيع للناس وماشتكو منهم (يبيع للبرادو والفكس ار والافجي مساعدات فورتشنر !!!!! ) قلت له اذا الناس اغبياء انا مني غبي .. واتصلت بالشرطة
وبعدها جاء المدير الكبير حق الفرع ببريده وقال خلاص بكرة بحلها لك بس خل الشرطة يمشون واتفقنا على كذا


جاء بكرة ورفضو التبديل !!!
وكلمني واحد سعودي من فرع بريده افتكرت انه بيفهم المشكلة ويفزع لي طلع مثلهم !!!!!!!!!!!!
وقال اقدر ابيعهم لك مستعمل ... انا رفضت لانه بيغش واحد من هالناس (هذا كلامهم هو ومدير الفرع الاجنبي)
وقلت لهم خلونا نحلها ودياً انا جايكم من شخص مدحكم لي باحد مواقع السيارات مالها داعي تخربو سمعتكم ... انا راح اكتب عن هالمشكلة بالنت ... قال رح واكتب الي تبي !!!!


والان رفعتها لوزارة التجارة (غش ونصب واحتيل) وطالبت بأرجاع كامل المبلغ والتعويض عن الضرر الي حصل لي وللموتر

والحمدلله تواصلو معي الوزارة يوم الاربعاء خلال دقائق فقط ورفعت لهم ... ماتوقعت انها بهالسهولة ... بصراحة فاجأوني بسرعة تواصلهم معي , وان شاء الله يكملونها ويأخذون لي حقي



.