منتدى استراحات زايد - سالفة:منثور والغزو..قوافي

http://t1.gstatic.com/images?q=tbn:A...BOpY_rHdFatKVz
بسم الله الرحمن الرحيم
مشرفينا، أخواني ،أخواتي ،زوار مكشاتي الحبيبه وخيمتي العزيزه
السلام عليكم ورحمة الله وبركاته
كل شتاء وأنتم طيبون جعله الله شتاءً ممطورً متبوع غير مقطوع متوسط البروده كثير المخيمات..
كنت بالمنجم قصدي بالمستودع ابي اطلع الكنابل (البطانيات)أغسلهم أستعدادً للبرد ،غسلتهم و قلت(وياليتني ماقلت)الشمس طالعه وزينه ابنشرهم على الحبال وبعد ساعه طاحت هي وحبالها على الارض وزعلت على تعبي اللي راح،، اللي صار ذكرني بسالفه قديمه ..
ببيت جدي رحمه الله كنا نجتمع كل أسبوع والبيت كان ماشاء الله مليان ،، انا وبنات خوالي بالسطح نلعب دور(بيوت) ومعظمنا بسن 10 و11 و12 سنه ومعنى واحد من عيال خوالي صغير عمره 6 سنوات وخواف واسمه :
مــنــصــور
منصور كانت عنده لتغه ولين سألناه وش أسمك يقول:
مـــنــــثــــــــور
حريم خوالي طيبات بالحيل إلا وحده منهم على انها طيبه لكن عصبيه و عليها الله يكرمكم ضربة نعله تخلي الواحد يتلوى ساعه وعندها الضرب عادي زي الكلام ،، وحنا عارفين طبعها أي غلطه نتغبى عند أمهاتنا على طول ..
@نجي للسالفه@
كان يجي بالتلفزيون مسلسل ابيض واسود والمسلسل يجي خيام وعرب وبر ،،بالمسلسل واحد أقشر أسمه فليحان حايس الدنيا بالكذب والفتنه وعيب المسلسل انه كان يجي بالصيف ،،عاد تعرفون البر بالنسبه لنا عزيز وغالي ،،كان الجو حر يعني ناظر المسلسل وانت ساكت مافيه طلعة بر:( :s
http://t2.gstatic.com/images?q=tbn:A...IDDT76H9dVI2sg
بمره من المرات قررنا نلعب نفس المسلسل:D
ولين العصبيه مرت خالي تغسل ملابس وتنشر على الحبال بالسطح ويوم قضت من الغسيل حولت حدر ومن ضمن ما غسلت مفارش ،،قررنا نسويها خيام ونشبك واحد بواحد بمشابك الغسيل ،،
تم نصب الخيام وصارت شي ،نــــفــــــاه تنقط علينا ماء والجو مايحتاج رطوبه تصلخ وجه الوحد ..
بدينا باللعب وصجنا منثور ،مره يبي يصير الشيخ ومره الشيخه وهو موب عارف يقول اسمه عشان يصير شيخ ،،
فقلناله خلاص خلك قهوجي الشيخ وزين قهوه ورحب بالضيوف ..
جمعناله شوي قشاش وولعنا ضونا وحطيناه بطرف الشق اللي هو بطرف الخيمه اللي من مفارش مرت خالي..
انا الشيخ ويقالك رحت اتفقد العرب،، وسمعت صوت رجلين على الدرج ،يوم طليييييت :
:eek::l:f مرت خالي :f:l:eek:
رحت بسرعه ابي منثور ينحاش وما حسيت إلا وأنا أقول:
جافليحان:f جا فليحان
عاد منثور يحسب اننا نلعب لين الحين مايدري الضعيف اني غلطانه من الخوف،يوم قال:
وثو ؟أمي الثيخ ،أمي الثيخ ذانا الغذو ،الغذو ياثيخ
الترجمه
(وشو؟عمي الشيخ،عمي الشيخ جانا الغزو،الغزو ياشيخ)
وما امداه إلا وصار جلد منثور منتثر وموسم :eek: وحنا على حدر قبل ياصلنا فليحان ونوسم مثله ..
تحياتي
اختكم
..قوافي..