موقف غريب ارجو المساعدة
 

بسم الله الرحمن الرحيم

اﻻخوة اﻻعزاء

السلام عليكم ورحمة الله وبركاته واسعد الله اوقاتكم بالخير والمسرات

اخواني اﻻعزاء

بالامس القريب صار موقف غريب ويا ليت الجميع يشاركني الرأي من خلال السلبيات والايجابيات اللي حصلت في هالموقف وخصوصا اﻻخوة المدربين واصحاب الخبرة لتعم الفائدة للجميع .

قبل كم يوم اتفقت مع أحد اﻷصدقاء على الغوص ليلا من احد المواقع طبعا احنا حاصلين على دورة ادفانس ولنا اكثر من 30 غوصة تقريبا مع بعض يعني فاهمين بعض المهم نزلنا وكل شي كان تمام ولله الحمد وصدنا وكانت اﻻمور ماشية عال العال وصلنا لعمق 120 قدم تقريبا وكان خويي يصيد وفجأة اسمع صوت خويي يصيح بشكل غريب ما ادري كيف اوصف لكم الوضع لكن كان والله شي مخيف صراخ غريب مع حركة قوية وغبار شي يفجع وكان يأشر لي بالكشاف وانا قريب منه لكن مو فاهم الوضع المهم قربت منه لقيته ﻻبس وحدة من الزعانف بس فتوقعت انها طاحت منه قمت هديته واشرت له انتظرني وانا بادور عليها وفعلا رحت ادور عليها حول مكاننا وخلال لحظات انتبهت لاضاءة الكشاف بشكل غريب ولما ناظرت للخلف لقيت خويي ييأشر بالنور بشكل غريب ورجعت له لقيته بدون زعانف والله العظيم فانفجعت المهم صار ياشر لي نطلع واعطيته اشارة الموافقه لكن ما دريت اﻻ خويي مثل الصاروخ طالع وحاولت امسكه ما مداني وحاولت الحقه خفت نتوهق اﻻثنين بالصعود السريع المهم صرت اطلع بسرعه خفيفة مع التنفس الطبيعي واخراج صوت عند الزفير الين ما وصلت فوق ونفخت البي سي دي ولقيت خويي ولله الحمد بصحة وعافيه بس مفجوع ويصيح قرش شاقة عقام نتش الزعانف ما ادري وش وكلام كثير المهم اخر شي قال اسحبني ما عندي زعانف وسحبته ويوم وصلنا لبر اﻻمان لقيت الهواء عندي 1500 وعند خويي حدود الصفر تقريبا وجلست اساله وش فيك قال فيه قرش ما ادري شاقة نتشت الزعانف نتشت اﻻوله وبعدها الثانية قلت له انا كنت قريب منك ولا شفت شي وكنت انا ماسك السمك اللي صدناه لو قرش والا شاقة كان جتني انا مو انت قال انا حسيت فيها لمن نتشت الزعانف قلت له والله ما شفت شي صح اننا في ليلة والرؤية ما كانت جيدة بس انا قريب منه وما شفت شي .

هذا ما حصل فيا ليت يا اخوان تعطوني تفسير للي حصل واﻻيجابيات والسلبيات والشي اللي كان مفروض اسويه واخفقت فيه عشان تعم الفائدة للجميع .

شاكر ومقدر لكم


اخوكم ابو ناصر