منتدى استراحات زايد - هوى النفس .... " تبقى هجوسي للفلا مستهمه "

بسم الله الرحمن الرحيم

سلام الله على هل القصيد شعار وذواقه

جاني بيتين ورديت عليها

البيتين ما اذكرها
وسامحوني

لكن إليكم ردي

فقلت :

يا مرحبا ترحيب يتلاه ترحيب
يا مرحبا يا خال قلبي وعمه

يا مرحبا ياذيب من ماكر الذيب
محزم وشلفى للرفاقه وعِــمّــه

ياصاحبي والراس لو لاحه الشيب
تبقى هجوسي بالفلا مستهمه

ويلي وانا بنـــدر على تلــة الجـيب
في خايعـــن مـــا وجّـه اللاش يمــّه

مع سجة المقنــاص نذبــح لنـا ذيـب
ونطش راس اللي مـلا الســـم فمّــه

مع رفقة الطيب عطيــب المضـــاريب
الصاحب اللي طنخـة الــراس همـّه

سمح الجناب اللي يعرف المواجيب
مع شدّتــه فـ الباس يـا خـف دمـــّه

راسي تعلى فوق روس المراقيب
وا ويل حالي من هجوسه وهمه

ونفسي تبا درب الشيوخ المحاديب
اللي حداهم عطّــر الدين فمّه

والبر يحداني بروس المشاعيب
يسوقني يم الفياض المزمــه

واحب راع الجيد والجود والطيب
واحب من يشفق على ابوه وامه

واحب من جنب عن الذنب والعيب
واحب من يارد ع الطيب جمـّـه

واحب من ينقل عطيب المخاليب
حرنٍ عن عيون الحواسيد غمه

وأحب هتان المـزون المســـاكيب
واحب عنقود الخزامى وشمّـــه

واحب ذيدان المغاتير يا ذيب
لا روحت تجلا عن القلب همه

يالله ترزقنا لذيذ المشاريب
ويالله جنبنا الدروب المطمه

محبكم / بندر بن محمد بن عويف