منتدى استراحات زايد - راعـــي الدلــــه والشــــواريخ

بســــم الله الرحمـــن الرحــــيم
السلام عليكم ورحمة الله وبركاته...
الكل اكيد يعرف الشواريخ لعبتنا المفضله منول اللي اغلبنا يسميها
(زن طع ) المهم حصل لي موقف مع الشواريخ يوم كنت صغير كان
باديره بقاله وفي وقتها كانت عندنا تسوى سبرماركت كانت
تبيع الشواريخ؟؟
وحنا شفناها بس ماكان عندنا قروش ولو اطلب ابوي الله يطول
عمره ويدري انها لشواريخ احلم انه يعطيني؟ المهم فكرت انا واخوي
كيف نحصل عليها وعلى مانفكر الا وصوت الشواريخ يوم طلعنا الا
ولد خالي يشبها وقصده يقهرنا يعني انا معي شواريخ وانتم مساكين
مامعكم .وهو من الشر اللي فيه جاي قريب من بيتنا ويطلقها زن طع
المهم وولعنا انا واخوي وقلت اخوي ياخوي قال سم قلت كيف
نحصل عليها
قال افا عليك ,, نسيت اللي في موتــــر ابوي هههههه قلت ايه صدقت مشينا..
ابوي كان موتره قديم والدرج حق الموتر مقفل حاط فيه القروش
شوفوا الاجرام .. دخلنا المطبخ وخذينا شفره ورحنا للموتر نفتح
الدرج نفتحه ماانفتح احاول فيه يمين يسار مافيه واعطيه اخوي وقلت حاول
واخوي قاعد يحاول في الدرج الاويجيني هاك التخطيط .. اللي على كيفك
قلت ايييييه واسعى واروح للبيت وادخل غرفة امي بهدوء عشان امي ماتدري
وافتح صندوق امي واخذ المقراط حق الاضافر .. واجيك مسرع وارجع لخوي والموتر
افتح الدرج بالمقراط الا وهو اللي ينفتح واتلفت يمكن ابوي يشوفني وانا مدري
واخذ 100 ريال واحذف المقراط على اخوي واقول قفله وانحااااااش
وانتظر اخوي ماجاء واقوله تعال يقول شوي بقفل الدرج اثر فراسه مواااالااااات
قلت بسرعه وبعد رفعة الضغط جاء واروح امر على ولد خالي وبنظره ونروح
على رجلينا الا وسمع اخوي معه خرفشه قلت وش ذا
قال انا ماخذ200 ريال على شان نفلها :D قلت جعلك السلال ردها
ردها بسرعه لايكشفنا ابوي هههه راح تدرون وش سوا مافتح
الدرج لقى دريششه الموتر مفتوحه حذفها وجاني يسعى
والله الاجرام .. المهم وادخل على البقاله واشتري10 حزمات
ب100 ريال اطنخخخخ واجيك انا واخوي ونروح في مكان بين بيتنا
وبيت خالي علشان ولد خالي يموت قهرر هههههه ونقعد نطرطع
زن طع زن طع الوحده ورى الثانيه ههه وشبت اصبعي من كثر ماولع
المهم شوي لولد خالي عند موتر :eek: جدي خخخخخخ ويمشي مار علينا منقهر
ويروح ويششتري هههه وزن طع حنا واياه ..كل واحد يرد على الثاااني
شوي يوم فتح بابنا والتفت انا واخوي بسرعه طلعت امي ادخلوا ياعوال ابيكم
من شاريلكم ذي الشواريخ قلنا ولد خالي .. قالت والله تكذبون ابوكم جاني
وقال العوال ماخذين قروش وحذفوا بعضها في الموتر مني
معطيهم المفتاح ؟؟ههه وتاخذنا امي لا ابوي واقعد انا واخوي
نبلع الريق لين نشف حلقي ويوم جيناه قال مني جاي الموتر قلنا مدري
قال ماتدرون؟؟ اللي طايح في الغماره وشو فالتفت على اخوي
ويدق هاك الابتسامه اللي واصله لاذنيه ودرى ابوي انه حنا وياخذ هاك
الي ويجلدني مرتين واخوي مره شكل الابتسامه سوت واسطه
ونطلع من ابوي ووجيهنا طماط والواحد مايحاكي الثاني لان الجريمه
انكشفت هههههههه والله كانت ايااااام