منتدى استراحات زايد - تيسنا والكوكاكولا

السلام عليكم ورحمة الله وبركاته

كان عندنا غنم مربينها بالبيت ولها حظيرة خارجيه. وكان فيهن تيس مبشوم. وكان علاج البشمه عند البدو ان تسقي الماعز او الضان كوكاكولا.وكان احد مهماتي ان ترسلني جدتي الله يرحمها ويغفر لها وتعطيني اربع قروش نسميها (الصمخ) يعرفونها الشيبان اللي معنا. واشتري من عند عم صالح صاحب الدكان كوكاكولا لمعالجة تيسنا المبشوم.
اللي علينا تكاد تكون ممنوعة وغير ذالك صعبة المنال وحتى لو طلبناها ماحد يوفرها لنا.لكن لعيون التيس المبشوم لامانع بل البيت كله يشجع هذا حتى يشفى المذكور وترجع له عافيته.
وعندما احضرت الكوكاكولا ولا جدتي تفرح وتغرغرها بحلق التيس اللي يحاول بكل قوته انه مايشربها.وانا اقول بيني وبين نفسي ياليت جدتي تغرغرها بحليقي بدل هالمقرود اللي ماحنا مستفيدين منه شئ.
ولكن حصلت مفاجاءة انه جدتي قالت لي ان هودرت التيس معي زين اترك لك شوي من الكولا. وانا تبين على وجهي ملامح السعادة والسرور وامسك مع جدتي التيس ونصب ثلاث ارباع القارورة ببطينته وانا اقول لجدتي كافي ....كافي ورحمتني و اعطتني الباقي اللي بالقارورة. وما شربته لكن طلعت برا بالحاره حتى يشوفوني اصحابي وكلن يقول عطني رشفه تكفى وانا تشوفني نافش ريشي واتأمر عليهم وهم مساكين حولي حتى اعطيهم وجه ليظفروا بالكوكاكولا
ورجعت للبيت وبنفسي اقول ياعسى الغنم كلها تنبشم حتى نشوف هذا المشروب السحري اللي شربته غنمنا قبل مانشربه ونتهنا فيه

والى لقاء