السلام عليكم
بدون مقدمات والسالفة غير مرتبة بس عاد ركزوا :D

قصة مضحكة حصلت لي وحبيت انقلها لكم والقصة تتعلق بعدد وادوات الرحلات

في عام 2008 رحت لسوق الخميس (يسمونه سوق الخبول سابقا ) في حفر الباطن كنت ادور خيمة من خيام الجيش
وتعرفون خيام الجيش مهيأة للضروف المناخية الصعبة وجودتها قوية وتتحمل ماهي زي الخيام العادية وكان عندي وحدة استخدمها الى الآن اكثر من 10 سنوات
واخوكم من عشاق ادوات الجيش

المهم وانا احوس في المحلات حصلت عند واحد شايب يقول عندي خيمة من خيام الجيش بس ناقصها عمدان والا نظيفة قلتله ورني هالخيمة

فك الكيس حقها طبعا الكيس نفس قماش الخيمة وعليه سحاب

وفل الخيمة على الارض وعليها شعارات عسكريه كتابات انجليزية وعربية واضح انها للجيش السعودي
بعد مافكها وفلها على الأرض طلعت كبيرة جدا يعني تقريبا 6 في 10 او اكبر وقال هذي عمودين لان في راسها فتحتين واضحة
شكلها اعجبني جدا وقماشها ممتاااز ونظيفة
وشكل الخيمة في البداية شكلها غريب يعني ماتدري وشلون تنصبها يعني ماهي مثل خيام العادة رواق وغطاء

هذي رواقها مع غطاها جميع وشكلها لحد الآن مادخل براسي
اقصد شكلها وهي منصوبة عجزت اتخيله لان فتحات العمدان قريبه لم بعض وقصتها دائرية تقريباً وزوايها غريبة قلت يمكنها جحشه عمودين :D

المهم قلتله وكم يالحبيب قالي ب 1500 وانا وياه رسينا على 1250 شرينا على بركة الله
ركبها في السيارة ونزلتها في مستودع البيت وعليها من ذاك اليوم لين امس طلعتها من المستودع عشان هالشتا نبي نتجهز له

فرشت الخيمة في الحوش بشوف وش وضعها ووشلون طريقتها وش ناقصها حتى اكمله لها

لحست مخي ماني عارف وش وضعها وكيف طريقتها ابد
قلت بروح اجيب عامل من حقين الخيام غديه يعرفلها
يوم جبته وشافها انلحس مخه معي وجلس يتفلسف ويسوي انا الفاهم وطلع من جنبها مثل الي جايبه

بعد التقليب والشيل والحط قلت خلني استخدم عقلي شوي لعل وعسى اطلع بنتيجة

المهم مالكم بالطويله قعدت اقرا الكتابات الي عليها
من قدام مكتوب بالعربي ( المقدمة ) وحروف انجليزية AMX 10 PC

قلت خل نسوي بحث في قوقل على AMX 10 PC وبعد البحث طلعت دبابة http://www.adslgate.com/dsl/images/s...miliedbaba.gif

واكتشفت ان الخيمة صارت طربال للدبابة والفتحات الي فوق فتحات لسبطانة الدبابة قلت عزالله انه سوق الخبول صدق :D
قال ايش قال خيمة عمودين هههههههههههه

ضحكة دايمة

تحياتي