|
وراحت البكره على نيله *قصه من الموروث الشعبي **مـحـمد الظــاهــري السلام عليكم ورحمه الله اخواني ... اعضاء ,وزوار ومشرفين منتديات مكشات حياكم الله في سالفه جديده من موروثنا الشعبي ونعود اليكم بعد غياب والحمد لله سالفتي تعود الى شخصيه كبيره يقولون الناس من اول فيه شيخ كبير وشاعر وكريم وعلومه طيبه والكل يتمناه انه يتعرف عليه وهو الشيخ فراج القرقاح وتقول الروايه فيه حرمه من ديره بعيده سمعت بفراج وقصايده وشهرته وقالت يالربع يالربع الي يبشرني بفراج القرقاح والله ان هاك البكره الفلانيه انه له قال واحد عندها اشهدو ياربع اذا وريت ام فلان فراج ترها تبي تعطيني هاك الشقحاء قالو شهدنا ومن بعدها راحت الايام وراحت والافي هاك اليوم هاك الرجال يروح عند الحرمه وقال يأم فلان يانيله يانيله قالت وش تقول قال تعالي معي تعالي قالت وش العلم ياولد قال البكره والله ان تجي والا فراج ومعه رياجيل مسيرين على واحد من العرب وهو يجي هو والحرمه من وراء البيت وقال ها شوفي الي تبينه شوفيه وتقول وينه هو قال هاذاك الي اكبرهم ظهر والا تشوفه وشافت فراج وتحسبه انه ولد ومزيون وقالت الحرمه ياحلاياه يابكرتي ياحلاياه يابكرتي قال الرجال لا تونين بكرتي يعني بكرتي وسمعهم فراج وعرف السالفه ويوم تغدو عند هاك الرجال ويقمون يركبون ركايبهم وفراج يقصد بهاك على ظهر ذلوله ويرفع صوته ويقول سلـم عـلـى نيـلـه بـوسـط الجمـاعـه فـإن السـلام الجـرز مــا فـيـه منـقـود ليتهـا تخاويـنـا عـلـى الهـجـن سـاعـة حـتـى تـعـذر وجيهـنـا لـغــدت ســـود في الليـل نسـري مثـل راعـي زراعـه وفي اليوم تلفحنا السمايم على القود وتـشـوف مــن مناصـبـي الشـجـاعـة وتـشـوف مـنـه كـنـه الـســدو مـــدود وتــشــوف مــقــدام بــتــوع ذراعــــه مثـل الفهـد ياتـي مـن الصيـد بضمـود وتشـوف حفـش دبـرتـه فــي متـاعـه لا يقـضـي الـعـازه ولا هـــو بمـفـقـود وانتهت سالفتي وراحت البكره على نيله :d واعذوني يا اخواني اذا حصل اي تقصير في الروايه هاذا ما سمعت عنه واعذروني على الغياب وانتظروني في سالفه اجمل ان شالله وتقبلو تحياتي محبـــكم محـــمــد الـــظـــاهـــري |
| الساعة الآن 05:31 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir