سالفة سيل شارع شرق المطار 00 (النبهاني ) بسم الله الرحمن الرحيم السلام عليكم ورحمة الله وبركاته اخواني واخواتي مشرفين واعضاء وزوار مكشات أسعد الله أوقاتكم بالخير والمسرات حبيبي راعي العجراء يقول نبي من سوالفكم يالشيبان اول وهالحين وانا اقول له هذي سويليفه تصلح لك يالغالي والسالفه جرت لي بجده قبل خمس وعشرين سنه او حوله - ياسرع السنين - كان علينا مطر هكاليوم والجو على كيف كيفك وانا ماشي بالسياره بشارع مشهور بالحفر والنقر ما بين حفره وحفره يمكن عشر سانتي كأنه مضمار سباق خيل الشارع هذا بين المطار القديم وجامعة الملك عبدالعزيز يطلع من شارع باخشب جنوب ويتجه شمال جهة شرق بني مالك كنا نسميه شارع شرق المطار الحين كل شي تغير المطار القديم عماير وشوارع وانفاق المهم من السيل ما اشوف الحفر مغطيها الماء وانا امشي وكل شوي دب دب قربع قربع وفيه سياره تمشي وراي ملحّمه فيني وانا اقول هذا وش عنده يوم انه يمشي وراي ويوم وصلنا الاشاره اللي عند بالبيد ( للي يعرف الشارع ) والاه حمراء وناقف ويجي راعي السياره اللي من اليوم يمشي وراي وياقف بجنبي طاق لطمته يطنب (يضرب بوري ) وانا افتح الدريشه احسبه يبي ينشد عن شي ولا سلام ولا علام على طول قال صدق اللي قال 00 من تجوّد باذناب البقر طاح بالجفر وانا احنتش وأتّش وأتشتش تقل قدر كاتم قلت 00 أي والله انه صادق انا ابصم له بالعشر 00 وهو يلف يمين جهة السريع منحاش وماهي الا لحظات وانا انقلب 180 درجه وانفجر ضحك 00 ضحك ماهو عادي ضحك هستيري0 وانتهت السالفه اللهم اغفر لنا محبكم النبهاني |
الساعة الآن 06:20 PM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir