منتدى استراحات زايد - راعي العجراء ....قله ترانا تمدنا .... كلن يولع بدافوره

السلام عليكم ورحمة الله وبركاته
اليكم هذه السالفه
قله ترانا تمدنا ... كل يولع بدافوره
في سنة من السنين سكنا فيلا جديده وشرينا طقم من التمدن اسمعهم يقولون عيالي ترانا تمدنا شل افكارك الاوله عنا
لاتحسبنا مثل اول الدجاج يحوم في بطن البيت والعنز تطلع للسطح باليوم عشرين مره وتحول خلاص انتهينا من ذيك الصفحه الحين ساكنين في فيلا سوبر شل ديلوكس وانا على نياتي احسب الديلوكس صابون لوكس بع الغنم والدجاج وخلنا نتمدن صح مثل الناس
قلت للحرمه ابشري نتمدن نتمدن ليش لا
المهم سكنا بالبيت وبدات بوادر التمدن تضهر على محيانا
مكيفات وموكيت طقم كنب وطقم مخاد ومراكي مجلس عربي وصحون قزاز وشوك وملاعق تقول فندق في اوربا بالبرازيل
والثوب غدا يلق بالبياض والسكري المقوصر راح زمانه عيالي يلبسوني شراب طويل يسمون هيلاهب
يقولون يدفي عن براد المكيفات مايحتاح صرنا في جنة ؟؟؟؟ ثغب وثيل
والغنم حطينا بدالهن سمك بحوض عليهن شراشيح وزبرقه تقول رايحات لعرس
كل يوم ارعابهن داخل الحوض وطلق رجلينهن
والدجاج بدلوهن بكناري يقولون عنهن طيور الحب والله ماشفت الا رزت اخشش
والمهم الباب حق البايكه قبل مايجينا الابواب الطماطيك باب القراش مثل الابواب العاديه يس كبير لازم احول افتحه واحط بلكتين مقاس عشرين لايصفق الباب من الهواء اذا بغيت ادخل سيارتي
داخل البيت
ويم صار ذاك اليوم وانا اوقف عند البيت ومعي بعض الاغراض وانزل من السياره
الا ومراكي المجلس العربي بالحوش وش جابها هنا ومعي الاغراض قلت اباشوتها برجلي
وادخلهن معي وانا اتحمس وان اشوت وحدة منهن ضفر مع اصابع رجلي
مادريت الا انا ماسط على بطني واصابعي صارن تقول اقفال باب سياره انحاف من تحت ومفلطشات من فوق من قوة الضربه وانا اجدع اللي بيدي واقعدت اتلوى من الوجع شعر بعرش الرجل وكسر اصبعين وشلون صارت المركاة ثقيله لعلها من زود التمدن
عيالي شافوا البلك بالحوش دائم حاطهن وقالوا شكلهن ماهو زين ولبسوهن قماش مثل حق المراكي احمر وماعلمون وياغافل لك الله
وانا اصيح هذا التمدن اللي تبون ماشفت منه الاتكسير الاصابع اجل بلك بلحوش تلبسونهن قماش
قالوا تحمل مايجيك كلها سنتين وتعرف معنا التمدن
فانا نصبر ونتعلم الشكوى لله اذا طاعك الزمان والا طيعه
انتهت السالفه وقبل الختام
سبحانك اللهم وبحمدك لااله الا انت استغفرك اللهم واتوب اليك

مع تحيات اخيكم راعي العجراء