ردي على مايحصل في المنتدى هذه الايام
 

قبل تبدون بالموضوع ابعلمكم سالفته
هذا سلمكم الله رد على موضوع وسالفة الــ(2000)طير
بس يوم شفت ان الكلام واجد ويصلح موضوع قلت ابحطه موضوعن لحاله لاني بيني وبينكم تحسفت يروح كله هالحتسي برد
واتمنى المشرفين يسمحون لي والاعضاء مايزعلون علي



" والذين يؤذون المؤمنين والمؤمنات بغير ما اكتسبوا فقد احتملوا بهتانا وإثما مبينا " الأحزاب


لقيت في بعض الردود ناس تدعي المثاليه وتنادي بالحفاظ على الحياة الفطريه((واجزم انه ولا واحد منهم يعرف معنى هالكلمة ولا يدري وش حياة فطرية))
لكن الغريب الي يجي باسم الدين ويقول هذا تبذير ويجيب ايات لكن بنفس الوقت يدعي على صاحب الصورة ويسبة ومهايطي و....الخ.
ياجماعة الخير الشرع ماهوب بسطة مساويك تاخذ الي انت تبي وتخلي الباقي
يعني يجي واحد الله يهديه ويجيب دليل من القران :{وَلا تُبَذِّرْ تَبْذِيراً * إِنَّ الْمُبَذِّرِينَ كَانُوا إِخْوَانَ الشَّيَاطِينِ وَكَانَ الشَّيْطَانُ لِرَبِّهِ كَفُورا}.
الى هنا ممتاز وبيض الله وجهك من حقك انك تنكر اذا شفت منكر بل انه واجب عليك
لكن بعد كذا تجي وتقول مهايط ولا يامال البعد ولا جعله مايحدر؟؟؟؟
ليش كذا ماهوب مسلم هو مثلي ومثلك ليش ماتنصحه بلين وادب وتذكره
يعني اخذت الدليل الي ينهى عن التبذير وخليت قوله تعالى:(فَبِمَا رَحْمَةٍ مِنَ اللَّهِ لِنْتَ لَهُمْ وَلَوْ كُنْتَ فَظًّا غَلِيظَ الْقَلْبِ لانْفَضُّوا مِنْ حَوْلِكَ فَاعْفُ عَنْهُمْ وَاسْتَغْفِرْ لَهُمْ وَشَاوِرْهُمْ فِي الأَمْرِ فَإِذَا عَزَمْتَ فَتَوَكَّلْ عَلَى اللَّهِ إِنَّ اللَّهَ يُحِبُّ الْمُتَوَكِّلِينَ)

اذا كان هذا منطق بعض الناس الي يصخر الدين لحاجاته واستعطاف الناس
احب اقول ان دافع البعض ليس الدين والنصح بل الحسد والحقد
لان البعض يجيب دليل برد والرد الي عقبه يدعي ويشمت بصاحب الصور وبهالحال يناقض نفسه وينقي من هالادلة ياخذ الي يجوز له ويتجاهل الباقي تقول الوضع سوق خضرة

وبعض الردود جت مطفية النور بغظ النظر عن المبالغة الشنيعة الي حاصلة بالموضوع
2000 طير:eek:؟؟؟؟
اتوقع لو اعد الصفار والدخل والسيارات والحصى الي بالصورة ماوصلن 2000



والشي الثاني هالحملة الي قايمة على الي يبيعون الي مدري وش تبي
انا والله ماعمري بعت ولا عمري شريت منهم لكن الحق ينقال
الحمام رزق ساقه الله لهم وهم احرار بكيفية تصريفه سواء يبيعونه او ياكلونه دامهم ماتعدوا حدود الشرع ليش احسدهم على كسب الحلال؟؟؟؟
ماشفت منهم اذى ولاشي تبي تشري منهم اشر ماتبي الشعبان عندك والطيور نزل يعني لايمكن يحتكرهن احد
انتبهو ياجماعة الخير من الحسد اظن مايقطع الرزق الا هو
وش الي تغير وصار المسلمين "يلعن بعضهم بعضا"علشان ريشة عصفور
بعد ماكانو يوثرون على انفسهم ولو كان بهم خصاصة؟؟

ولا الي يغبن الي يجي يقول لقيت بزر عمره بالطعش معه جيب وبنلي ويتنحب هالضعيف
هذا الحسد بعينه وعلمه ولا ينقد اذا شاف واحد صغير يدور بالشعيب معه قام ينقد عليه ويجي بالمنتدى يشمت به ياخي الكريم الصيد يعلم المرجله والله اني احب علي اشوف
واحد صغير يدور علم المرجله وعلم ابوه وجده ازين من الدوجه بالاسواق ولا عند المدارس
وبعدين اكثر اهل الصيد متولعين بالصيد منذ الصغر وانا منهم ليش الي علمونا هاك الحين ماقالو ورعان ذولا يخربون علينا ومدري وشو؟؟؟؟
لان القلوب صافيه هاك الحين وكلن يرزق على قد نيته
وصحيح بعض الصغار بالسن يحصل منهم مضايقات واخطاء بسبب قلة الخبرة
لكن اذا صار معك هالشي رح ووقفه وعلمه وانصحه بالليلن سواء تقبل منك او ماتقبل اذا كان كلامك زين تراه يبي يعلق براسه او ادع له بالهدايه والرزق
ازين من انك تجي وتلطلط ورا هالشاشة وتطالب وتهايط وكلام ماله اي فايده




الله المستعان بس





ملاحظة:
الحياة الفطرية ماخوذه من الفطرة يعني الكائنات الحية الموجودة بدون اي تدخل من الانسان
سواء نباتات او حيوانات ...الخ
يعني مثلا اذا جبت لك غرس شجر من برا المملكه وزرعتهن بالسعودية مايعتبرن من الكائنات الفطرية في المملكه
نفس الكلام الطيور المهاجرة فهي تفرخ وتعيش في دول غير المملكه والمملكه خط عبور للهجرة ومن اصغر المعابر والله اعلم
معروف مايقضي على الصيد الا اذا تم صيده بوقت تفريخه ويعرفون هالكلام راعين الضبان عامه وراعين المكون والبيض خاصة;):p
يعني الحمام والصفار باذن الكريم ماهوب مقضيه صيدنا يالسعوديين





خاتمة:
الديناصورات ماهيب تنصاد وهذاهن منقرضات مالهن بينة قضى عليهن القوي العزيز
يعني لو الله اراد ان الحمام ينقرض والله ماتمنعه عنهن لاحماية فطريه ولاحقوق حيوان ولا هالخرابيط تعوذو من الشيطان وخلو ايمانكم بالله قوي







عاد اعذروا بعض الاخطاء الاملائية تخبرون الساعه 1 والحتسي واجد




هذا وصل الله وسلم على نبينا محمد

والسلام عليكم ورحمة الله وبركاته.