ابا المرحان ياعليه مرقه هوايه لاوالله لعانه.....صقار الاسياح
 

السلام عليكم ورحمة الله وبركاته
ادري عنواني غريب ولاكن بعطيكم شرح مفصل وهو اهل الطيور واهل البنادق والكلام يطول ويطول
ابدا بقصه قبل عدة سنوات واجهت واحد من الشباب اعرفه كان يحب صيد الدخل والقميري والحصد ولاله علاقه مع اهل الطيور سالته وش لقيت من الصيد قال صدت قميري ودخل ولقيت جول ابا المرحان بعوسج متضللات وخليتهن قلت ابا المرحان وش قال السمق قلت ليه ماتصيده قال اعوذ بالله والله الفشقه خساره عليه هذا وصخ دايم على الجيف والديران قلت وصف لي مكانهن ابا ادق على حقين الطيور نهد عليهن ونستانس قال اجله يهد الطير عليه قلت ايه وصف لي مكان من راسه ولالقيت شي راحت الايام دق علي راعي طير من اخوياي ويعرف هاك الشخص قال فلان رامي كراوين اليوم ودق ثاني ودق ثالث معلم الناس كلهم يفتخر وبعد شوي لاهو يدق علي مستانس قال رميت كراوين قلت اجله زين قال والله ياعليه مرقه مامرت علي سكت ولاذكرته كلامه الاول
يعني يوم درى ان اهل الطيور يهدون عليه صار زين وهذي هي حقيقة اغلب اهل السلاح لما يرمي حبارى او كروان يحاول يوصل الخبر لاهل الطيور بنفسه انهم ينقهرون
واحد داق عليه يقول تبي ملاويح قلت وش السالفه قال لا بس رميت حبارى
واحد دق علي اخوه قال فلان رامي حبارى قلت وانا امزح وش عرفه للحبارى يمكن كروان وبعد اسبوع رجعت للديره ورحت للا ستراحه يوم جلست اتقهوى للرجال داخل علينا بالحبارى من اسبوع مخليها بالثلاجه علشان يوكد لي انها حبارى
وقبل العام كان فيه واحد يدور على الاجهزه ويرمي الكراوين اللي عندها ابالليل
وواحد يقص علي قصه يقول كنا قانصين ولقينا جرة حبارى وواحد من اخويانا راعي بندق يقول المهم الارض وعره دورنا دورنا مالقينا امسانا الليل كان معي ذبيحه وقفت وذبحتها وقطعتها وجو اخويانا نبي نمرح يقول يوم قطعت الذبيحه زاد لحم فوق طاقت ثلاجتي يقول واروح ابا احط اللحم اللي زاد بثلاجة خوينا اللي ماهو راعي طير راعي بندق يقول يوم فتحتها لهذي حبارى بثلاجته ومعها حبارى ثانيه بعد راميها واخوياها مادرو
اخواني كلامي هذا ماهو تهجم على اهل البنادق فيهم رجال واشناب انا اتكلم عن عينه ليسش بالعربي حاقدين على راع الطير
وش الاسباب
اخوكم
صقار الاسياح