منتدى استراحات زايد - الصمت في بعض المواقف شهامه.......

اعزائي مشرفين خيمة القصائد المكشاتيه:
ارجوا قراءة القصيده كامله قبل حذفها
حيث سبق حذفها من قبل احد المشرفين
وانا ارى انها ليست غزليه كما يعتقد مشرفنا العزيز
حيث انها تحث على العفه والابتعاد عن الاثام والالتزام بتعاليم الدين الاسلامي بالرغم من المغريات:

جتني تسلم في سلامه عمى عـين = ياليت ربي فـكـني من ســلامـــــه

مدت يمينٍ ساعـدتها الشياطــــــن = وزود على ضغط اليمين ابتسامـه

ثم اكـشفت وجهٍ حوى كامل الزين = بدرٍ تجـلى عن سواد الغمـامــــــه

وقالت بصوت بحه الهـــــم والبين = والحزن واضح في ثنايا كلامـــــه

وينك ثمان اسنين مالك عـنـــاوين = ولا لقينا بالوطن لك عـلامــــــــــه

درت البلاد ودرت كل الـميـــــادين = ودرت الشمال ونجد واعلي تهامه

تركـتني واقـفيت مثل الشيــــاهين = حـطمت قلبي واسود الوقـت ظامه

لازال حبي لاجيٍ بالشــرايين.....؟ = والا خـذا قلبك فــريد الـعـــدامـــــه

وتبسمت والدمع وصل الشفـاتيـن = واليأس ركـز بالضماير خـيامــــــه

قالت وانا صامت ولا قلت حرفـين = الصمت في بعض المواقف شهامه

وسحبت انا يدي وقفيت بالحيــــن = وابعدت عن درب الخطا والندامــه

حـماني الله في ثلاثٍ مع الـــــدين = العقل والعـفه وخوف المـلامـــــــه

احمد بن عبدالرحمن العريفي
(نديم المجره)