|
هذا اللي صــــــار مــــــــــــعي.... !!! من كثر ما اهوجس بالمقناص وشبك الطيور وعدم روحتي للمقناص وتأخري هذه السنة عن المطاريش والسبب رصيد الاجازة صفر او بالسالب ...!!! صار معي حدث مثل الفلم !! اسمعوا القصة ... يوم الاربعاء قبل امس وانا جاي من الدوام بحدود الساعة 3 عصرا نمت بعد العصرية حوالي ساعة الى ساعة ونصف المهم اني صحيت بحدود الساعة 5 قلت ياولد : الحلال له يومين مارحت له والصبي موصيني اعبي له جركل قاز انا حوش بيتي كبير شوي والجركل موجود في الجهة الغربية من البيت رحت ابي اخذه والا اني اشوف هاك الطير اللي مدنق ويأكل له حاجه انا من المفاجأة توقفت ولا عاد ادري ويش السوات ارميه 000 اطير عليه 000 المهم ركزت شوي واذا الطير ماسكن له قوقسية وجالس يمزرها ويعلف وهو مابعد فرى نحرها .... يعني توه طرحها وانا والله مدري وين اروح تفاجأت من الموقف ... حتى ان الجوال كان معي ونسيت اني اصوره .... والله من الطمع :good2: المشكله كيف اتصرف انا قلت ياولد انا بقرب من الطير يمكن امسكه مير يوم قربت منه هو يضف صيدته هو يطير من فوق الحوش واجلس اراقبه لين شفته كنه نزل خلف واحد من البيوت واطلع للموتر ... واروح ادوره حول المكان اللي توقعت انه نزل فيه ولكن للاسف ماحصلته جلست ادوج لين المغرب وماعينت له اثر المهم قلت هذا المقسوم طبعا انا بقول لكم مواصفات الطير اللي انا شفته الطير حجمه وسط او اكبر من الوسط ظهره مجهم نحره ارقط واكثره سواد عيونه حولها سواد مثل البرقع الطير بالنسبة لي اقرب ماله شيهانه هذه قصتي طبعا موقعي : شمال البجادية والبجادية تقع غرب الدوادمي 60 كلم |
| الساعة الآن 04:01 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir