منتدى استراحات زايد - سالفة الوصايا الثمينه ( النبهاني )

بسم الله الرحمن الرحيم
السلام عليكم ورحمة الله وبركاته
اخواني واخواتي مشرفين واعضاء وزوار مكشات
أسعد الله أوقاتكم بالخير والمسرات
هذه السالفه جرت علي وانا توي متوظف يعني قبل سنين ودنين وطاخن لي سياره جديده ويني عند روحي ما احد قدي وفي الاعياد اعيّد بالديره والاجازات كله اقضيه بالديره
وبجيه من الجيات استانست بالديره ويوم بغيت أسافر أرسلن معي حريم قريبات لي وصايا
الوصايا من ثلاث حريم ويقولن هذا لفلانه وهذا لفلانه يبوني اوصلهنى لحرمتين وحده تقربلي وحده لا
وشن عاد الوصايا خلقان وكراتين وطوابيق مدري وش بهن يمكن حفله ( بهارات ) وحنا ومن هالخرابيط وسفرتين من خوص مطويات مع بعض ومحزومات هذا اللي اذكر المهم ان الوصايا ملن شنطة السياره
أيه سافرت و وصلت ويوم بغيت اودي الوصايا لهلهن والاني ناسي منهن له ذولن ومنهن له ذولن
قلت يالنبهاني لازم توديهن لهلهن هذولن امانه لكن وشلون تعرف اللي يخص هذي من هذي
يوم والله بلشت 00 الديره اللي انا جيت منه مابه تليفون هكا الوقت واستحيت اقول للمره اللي اعرفه تعالي شوفي اللي لك وخوذيه لأن الوصايا متشابهات الا السفر
المهم اني بحلت وقلت انا ورا ما اجدعهن بالقمامه وافتك بس والله حرام وفشيله
تقولون وش سويت 00 اقولكم قمت وقسمت الوصايا قسمين وخليت كل قسم كثر الثاني تقريبا حتى السفر فكيتهن وحطيت كل سفره مع قسم وانا ادري اني حايسن الدنيا حوس :mad:
وش اسوي ما لي الا ان اصير حقاني واروح اوديهن وكل حرمه اعطيه قسم
وعقب حول شهر وصلن حكي وكنت ( احتريه ) يقولون الشرهه ماهي عليه الشرهه على اللي يوصيه هذا خبل وهذا فيه ومالا فيه
قلت لنفسي انا اشهد اني خبل اللي آخذ وصاة ما كتب عليه اسم وانا اشهد اني خبل اللي ما طوحتهن طول يدي بالخلا الخالي000 يالله لك الحمد هالوصايا ذهب وعملات صعبه 00خلقان وحفله وسفرتين 0
انتهت السالفه وسامحونا
محبكم
النبهاني