|
أبغي وطن أبغي وطن الكل يحلم يلتقي ويا الحبيبة في مطاعم أو مقاهي أو على شاطي البحر لكن أنا أحلم ألاقي لي وطن أبغي وطن خالي من الآلام والأحزان بأهله يفتخر أبغي وطن يا ناس ما عندكم وطن؟ أبغي وطن مليت أبغي أستقر أذكر سنين اللي مضت عندي وطن هذا الوطن محبوب من كل البشر خلّوني أوصف هالوطن هذا الوطن جنة مثل جنة عدن فيه البلابل تصدح الألحان من فوق الشجر فيه الأوادم مؤمنة تأكل فتات الخبز وتفطر قهوة وشويّة تمر لا ماي صحة عندهم والماي نشرب كنا من ماي المطر لا كهربا عندنا مكيّفنا نسيم ٍ بارد ٍ نلقاه في فيّ العصر وفي الليل كنا في البراحة نقعد إنسولف على ضيّ القمر الله يا محلى السوالف ننسى همنا نقعد إنسولف إلى وقت الفجر وتحلى السوالف من يسولف حجي طاهر عن سنين الغوص وأصناف الدرر والكل حوله يستمع صوته مثل فنان يعزف بالوتر ولو غاب واحد ليلة ماجا كلنا نسأل ليش أخونا ما حضر؟ كلنا فزعة إنروح بيته نسأل أهله عسى ما صابه ضرر؟ واليوم أولادي ومن صلبي يغيب الواحد إسبوعين أو حتى شهر ما يدري قلبي يحترق من أقعد إبوحدي ويقتلني القهر ولو جاني ليلة نقعد إنسولف وهذا ما ندر يستأذنوا مني أبونا إسمح لنا الساعة عشر وقت المسلسل يبتدي لا تفوتنا لقطة ومنك نعتذر والكل يسهر لكن النومة إلى وقت الظهر هذا السبب وأسباب خلتني أحن وأرجع إلى ذاك الدهر يا ليت تلقوا لي وطن أبغي وطن هذا الوطن ميّت وأهله تحتضر |
| الساعة الآن 11:32 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir