|
عزيزة يا بيوت الطين لك وسط الحشا منزال .. سرهيد السلام عليكم ورحمة الله وبركاته تحية طيبة للجميع وتقبل الله من الجميع صالح الأعمال . من يجيبي عن سر تعلق النفس ببيوت الطين .. فلا يمكن تمر بجوارها الا وقد بدأت عليك علامات من الحزن لفقد هذه البيوت ، ثم يتبعها آهات لتاريخ جميل عاشها الانسان في هذه البيوت ... ومع قل ما باليد الا ان تاريخها جميل لا ينسى . مررت خلال شهر رمضان المبارك على محافظة ضرماء العزيزة بأهلها وكانت لي جولة مصورة على بعضٍ من تراثها القديم الذي جعلني اتوقف عنده . فعندما وصلت لتلك المحافظة ، بحثت عن الأماكن الجميلة فيها فتوقفت عند هذه الاطلال التي تأسرك بشموخها وروعتها ... فأنا انسان محب لبيوت الطين وكلما اراها استحضر هذه القصيدة التي يقول فيها الشاعر : يشوق العين شوف اللي بقى من شامخ الاطلال والاقي في سككها كل ذكرى عشقها غالي أسوق اقدام شوقي للبيوت وخاطري مازال يعيش بشوفهن ذكرى طفولة تحفظ آمالي نعم فانا لي طفولة في تلك البيوت الطينية ولا زلت اتذكرها بعبقها الذي اشتمه مع كتابة هذا الموضوع ... عزيزة يا بيوت الطين لك وسط الحشا منزال امرك واترك دموع الغلا تحكي لك احوالي اجي لك كل ما جا للحزن في داخلي مدهال واجي لك كل مافاض الحنين لشوف مدهالي اروح البير لين اني اوقف عند حد الجال واطل بوسطه ودمعي تناثر فيه من عالي نعم وربي فانا يأسرني الحزن عندما اقف بجوارها ، وكأني بها قد اعادة شريط الماضي وعيشتي بداخلها .. وامر السكه اللي في وسطها حفرة المصقال وانا اغلى شي ملكته وقتها هو كسب مصقالي هذا البيت خاص لفهد الغيهب فانا اجزم انه ممن لعب المصاقيل ههههههه فقدت بها رفيق ٍ لا لقيته قال كيف الحال رفيق ٍ وافي وطيّب ولا قد غاب عن بالي واجي عند الشعيب اللي يمر بديرتي لا سال هنا ذكرى وقوفي في وسطه وسيله قبالي واروح لبيت عمّي وان طلعت امر بيت الخال واروح لجدتي واطلع وفي مخباتي ريالي اطير بفرحتي واللي سالني قلت معي ريال اطير بفرحتي واللي سالني قلت معي ريال واروح اشري من الدكان توت مثلج وحالي رجاءً لا يجي احد يبكي ويقول يا سرهيد هيضتنا لذيك العلوم ... لاني تراني متهيض قبله . واروح لبيت جيراني وادوّر وينه المدخال انا اذكر يوم انا صغيّر نسيت بوسطه نعالي هنا اذكر معاليق السراج وحوله المنخال وهناك الدله اللي عندها مكسور فنجالي وهنا فراش الحصير اللي جلس به مستريح البال ينام وما بقلبه شي للأول ولا التالي http://www.mekshat.com/pix/upload06/...810_173904.jpg كفايه .. بطلع من البيت يوم انه بدا ينهال مع اني صرت احس ان التراب دموع تنهالي عسى الله يرحم اللي مات منهم طيبين الفال ويجمعنا معاهم في وسط جنات وظلالي تمر سنين من عمري واردد للملا موال ترى اللي ماله اول ماله بهذا الزمن تالي اللهم آمين وربي يجمعنا بهم في جنانة وفعلا اللي ما له اول ما له تالي . فأنا انسان محب للقديم جدا واتوقف عنده كثيرا ، واول الاماكن التي اعشها لزيارتي لأي بلد هي تلك المباني القديمة التي توحي لك بتراث جميل وحضاره سادات ثم بادت . القصيدة التي تم عرضها منقولة عن عبدالله سليمان العـمّـار – القرائن اضغط هنا تحياتي لكم يا احبة اخوكم ابو عبدالله حرر في يوم الاثنين الموافق 9/10/1433هـ |
| الساعة الآن 03:58 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir