|
مشكله .. وهل لها حل ؟؟؟ السلام عليكم ورحمه الله وبركاته شخباركم ... انشالله بخير ؟؟؟ حبيت انزل موضوع والصرااحه انا تعبت من كثر التفكير الزااايد يخص حالتي النفسية !!!!! انا انسان حالتي النفسية صعبه يعني جدامك فالمنتدى شخص حبووب و برع يعني فالطبيعه شخص مكتثب ودومه يفكر <<< على شو م أدري ؟!! اولن (الصلاه ) ما اعرف شي عنها وما اعرف كيف يصولنها ولا اعرف كيف نتوضا والتشهد بعد ما اعرفه ؟؟!! ولدرجة يوم الوالد يسالني صليت وانا اقوله هيه ..وانا من هناك ما اصلي ؟؟!! المهم حالتي النفسية هي الأكتئاب والسكووت واحب الوحده ..أنا شخص مب عايش حياتي فكرت بالموت !!! واحسد الناس المستانسه ودومي اكون مضايق وملان وحياتي كلها ارقاد وملل وعالنت ..! سالت عمري الي فيني هل هو عشان المشاكل العائليه بين العم والأبو صح انه كان مب وياي واايد أو من الصلاه أو انا شخص طبيعي حالتي جي وشخصيتي <<شخص ممسوح عنه الشخصية جبان أناني خواف كسول عايش عشان ارقد واكل و اطلع و افكر اتم وحيد !! الاحظ انه محد يبا يرابعني ودوم السكوت فالصف وكل احط ف بالي انه الناس هالزمن كله عندها مجامله ومصلحه !! شخص ما كون علاقة ويا حد ( يعني الكل ما يطيقني ليش انه دووم ساكت وما احتك فالشخص واايد ) مادري شو الي اقوله اكثر عن جي تراني عضو من شهور وياكم ومسجل على نك 2 يعني ( مجهول الهوية ) << محد بيعرفني !! واتريا نصايحكم لي !!واتمنى محد يطنشني ..لاني شخص محتاجلكم وااايد !! ....... |
وعليك السلام ورحمة الله وبركاتة يامرحبا ملااييـــــــــــن ولا يسدنك والله من ماتكون ونعم فيك ، لأنك انسان صريح ، وحريص ومؤمن ، حريص ومؤمن لأن رب العالمين يحب النفس اللوامه وسبحان الله كثير من الناس فيهم ايمان ولاكن ايمانهم مدفور وفوقه ضيق وكدر وغش وافكار شيطانية ، والسبب هو قوة وسيطرة الشيطان الرجيم على قول بعض الشباب من الجنسين .. اخي الكريم انا احمد ربي وانا اقرا الرساله انك انسان تلوم نفسك واهلك ، ومحتاي نصيحة الغير ، بس الأهم هنا انك تكون مثابر في نفسك وتبعد الكلمات السلبية ( اريد اموت ولا انتحر - انا مالي شخصية - انا انسان محد يباني ....الخ ) بابعد نفسك تماما عن هذه الجمل السلبية واشحن نفسك بجمل ايجابية تشجيعية ( انا قوي _ انا انسان احب الناس _ انا انسان ابا اكون جزء من المجتمع الإماراتي ) 0 0 ( بالنسبة للصلاة ) سهله جدا جدا جداً وصدقني ياخويه ان كل صلاة ماتاخذ من وقتك دقيقتين او 3 دقائق بالكثير ( صلاة الصبح =ركعتين) ( صلاة الظهر=اربع ركعات) (صلاة العصر=اربع ركعات ) (صلاة المغرب= ثلاث ركعات ) ( صلاة العشاء=اربع ركعات ) الصور مع الشرح http://www.ibtesama.com/vb/imgcache/7451.jpg http://www.ibtesama.com/vb/imgcache/7449.jpg http://www.ibtesama.com/vb/imgcache/7450.jpg 0 0 امانه عليك ياخويه واذا حبيت تاخذ مني نصيحه وان شالله بترتاح اداوم على الدعاء والأذكار والإستغار وداوم على الصلاة ( فالمسجد ) وليس فالمنزل .. واذا حسيت بصعوبة التعلم ( تعلم الصلاة) حاول تسير المسجد وترمس امام المسجد بينك وبينه وصدقني هو مابيمتنع عن مساعدتك .. بس بينك وبينه .. واذا مرتاح حق شخص ثاني يعلمك لاتتردد ، لاهو عيب ولا حرام .. وصدقني متى ماحطيت فبالك تبا اتصلي وتكون مع الله دائما فـ رب العباد بيكون معك دائما وابدا ... 0 0 بالنسبة للوحده واوقات الفراغ . انا اريد اعرف انته في اي امارة بالظبط ، ياليت تخبرني وانا بشوف لك مكان فيه انشطه مفيده او معاهد تستفيد منها ولا محاظرات .. وقت الفراغ هب شي هين بالعكس ، الفراغ يقتل الانسان ويزرع فيه تصرفات تخرج عن ارادته احيانا مثل تأثير الشيطان عليك .. وان شالله انا بطرش لك رساله على الخاص وبعطيك هديه بسيطه اتمنى انها تفيدك وتفرح فيها .. 0 0 اخوك / غديّر النعيمي |
و عليكم السلام و الرحمة اخوي ... انت تقول انك وحيد ... بس انت مب وحيد لكنك انت تدعي الوحده و الدليل على هالشي كلامك اللي يقول انه ابووك اللي يسالك صليت و لا لا ... و بعدين كيف محد يطيق يقعد و ياك اذا انت ما بادرت كيف تبغيهم يرابعووك غير اللي بنفسك و كون انسان اجتماعي ...اقعد ويا اهلك خل لك دوووور فعااال بينهم خلهم يقووولون الله لا يحرمنا من هالولد ... و الله انه ما مقصر ... و اهم من كل هالكلااااااااااااااام الصلااااااه الصلااااااااااااااه .. دخيلك لا تتركها لانها مصدر سعادتك و هذي اللي تحاااسب عليها اول ما تقااابل ربك ... حافظ عليها فرض فرض ... وبعدين انت عاااارف خطاك ... و اعترفت انك لا وضوء و لا صلاة تتقنها .. و هالشي طيب بدر منك و اسعدنا ... و جرب كل ما تحس بكدر و ضيج صلى لك ركعتين و شوووف كيف بترتااااح ... و الله ما راح يفيدك شي غير صلاتك ... و الله يةفقك و يسعدك دنيا و آخره |
اول شي يزاك الله الف خير اخوي النعيمي كفيت و وفيت بالشرح والصور وبعدين ياخوي الوحيد مااا شي مشكلة بالدنيا مالها حل اول شي واهم شي انك تعود للصلاة مايجوز تتركها والله انك تحس انك قريب من رب العالمين وانه يحرسك ويرعاك و ودر عنك الافكار السلبية مثل الموت والانتحااار لان طول ما انك تفكر بيها راح يبقى تفكيرك سلبي الحياة كدامك ليش جي تفكر انت بعدك شاب والله حراام وان كانت في مشكلة بحياااتك تره مافي حد فينا ماعنده مشاكل وهموم بس الحياة لازم تستمر بالشكل الصحيح السموحة اني طولت بالكلام الله يوفقك ويرعاك وعساك ماتشوف شر تقبل مروري :unsure: |
اقتباس:
واللــه أخوي الغالي ما اعرف شو اقولك صدق أحرجتني ما اعرف بس أحس عمري اني واايد متلوم مادري والله احس اني استحي ادش المنتدى مره 2 والله ردك الصراحه اقنعني .!! و تخلي الواحد يصارحك ف أشيا ثانيه ! واذا عن الاماره انا عايش ف الشارجه وكل اجازة اروح عند الأهل فدبي مشكور على ردك الغالي |
| الساعة الآن 03:53 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir