|
وراك وراك ( والمـــســــخــــرة ) وراك !!! السلام عليكم ورحمة الله وبركاتة لا اعلم ماهي طريقة اطروحات تلفزيونات (دبي وسما دبي) في محتوى البرامج والمسلسلات الرمضانية التي بدأت اشمئز منها وللأسف ان جميع القائمين عليه من( معدين وممثلين وكتاب سيناريو ) هم من المواطنيين.. اليوم وعن طريق الصدفة كنت اشاهد مسلسلنا المحلي "حاير طاير" وفي (حزة الإعلانات) ادرت الى محطة سما دبي وبالصدفة كان هناك برنامج (الكاميرا الخفية- وراك وراك ) من تمثيل ( مواطن ومواطنه) اليوم كان الحوار او المقلب مع المطرب الإماراتي هزاع وفي اثناء المقلب اتيي المذيعة (الممثلة المواطنـــة) وتوجه التلفون على المطرب هزاع بطريقة غريبة من اسفل لأعلى وحول جسمه وحتى على جوانبة والإقتراب من اذنة ولمسها وحتى لمس يد المطرب ...!!!!! بدا الإحراج على المطرب وهي ماشالله ( مصختها وخارتها ) وياه ، لاحشيمة ولا تخيل على روحها .. هذا التوطين اللي ادورونة يا قناة سما دبي !!!! البارحة في حلقة مسلسل ( ابلة نورة ) الممثل العامري يالس ويا الممثلة الحوسنية ، وماشالله ماوحينا الا الأخ حاط يده على جتوف الممثلة ويقول لها ( قولي احبك )!!!؟!!!؟!؟!؟ وممثلين مواطنين !!! والله العظيم اني متعييب من هالمحطات والمنتجين واللي ينادون بـ توطين الإعلام الإماراتي واخص بالذكر ان اغلب المسلسلات والبرامج الرمضانية تمر على اعضاء مجلس ادارة المحطات مافكروا بسمعة هل البلاد ولا اسلوب التمثيل ( الساقط ) عند هؤلاء الممثلين والممثلات .. اما برنامج تواصل ، يقدمة ( مذيع ومذيعه ) للأسف ماعندي اسماءهم او بالآحرى هب حافظنهم عدل ، هايج المره المذيع يضحك ويا المذيعة وعلى الهوى مباشر والله اللي يقول ريلها ولا اخوها من لحمها ودمها .. للأسف ان اعلامنا الاماراتي بدأ يتجة الى الإختلاط وللأسف اختلاط ( غير شريف) يعني وضعية اليد على الكتف هاي راح تضييف شي للمشهد!!!!؟!!! ( هيه بيزيد من قلة الأدب) او جهاز الهاتف ويوم تمرره على جسم الريال هل هذا بيزيد شي من المشهد ( هيه اكيد بيزيده قلة الأدب ) ادري ان البعض منكم يمكن يقول فخاطرة ( والله ياغديّر انته ماعندك سالفة وشكلك ماتشوف غيرنا على الأقل نحن اهون عنهم ) وانا ارد واقول مانبا نقارن عمرنا بالغير ، نحن مسلمين وعدنا عادات وتقاليد واعراف لازم نمشي عليها بس الظاهر ( القطو العود مايتربــى ) !!!! وع قولة فطوم علوم والسابقين من دق الباب ياه اليواب !! اترك التعليق لكم كتابة وتحرير اخوكم / غديّر النعيمي |
لا يــأأ خوويه غديَر محد راح يقولك انك فاضي ., او بيستصغر من كلاامك نحن كلنا وياااك فرمستك لان هالشي حاز بخاطرنـا نحن كونا مسلمين ومانرضا على اعراضنا ولا سمعة بلادنا بهالطريقه .. وانا شفت اللقطات اللي ترمس عنها .. والحركه التافهه اللي بادرت بها المذيعه واللممثلة { غزلان } مع المطرب { هزاع } لدرجة انها نشة من كرسيهاا وصاارت قرييبه منه ولو تخرطفت شوي لصـار العجب ................. اما عن مسلسل ابله نوره .. وايد خايرنها العامري .. وهالدور اللي عاطينه .. وماعرف شو اللي خلااه يوافق عالنص من قرااه .. وغير ان الحلقه الاولى وبما انه اول يوم دراسه وبدايه الفلم كلهم عالفراش .. وكأنهم زوجين حقيقيين .. وناشين سوا ولا العامري يوم اقترب من الحوسنيه اونه يوعيها .. صح اني حبيت حركة الانشاد الوطني وهالشي برز لنا دولتنا .. والتمثيل برايهم يمثلون بالطريقه اللي يبونها ويظهرون المشكلات الاجتماعيه مثل مايبون لكن بحدووود واحترااااااام مصــاااااااااااااااااخــــــــــه × مصاااااااااااااااااااااااااااخه والله يرحم ايام مسلسلاتنا المحترمه .. يا انهم يسوون مسلسلات اجتماعيه شراا حاير طاير .. وطماشه .. او انهم يحفظون كرامه عيال البلاد من السمعه الدنيه .. والله يهدينا وايااهم .. ويبعد المناكر عنا .. وتسلم اخويه عالموضوع الجميل .. واللي يستحق المناقشه والتقييم اخوك / حمدان |
النعيمي كلامك صح امية بالميه نفس الشي اللي جذبني اليوم يعني الاهل لين يشلون الفطور وغيره يكون ظهر هالبرنامج والمهم يالس هو يغني وغزلان هب مقصره والفضيحه العوده انه يقول الها ايلسي مكانج اتخيل يعني واحد يقول لوحده ايلسي مكانج لانه انحرج ما باقي غير تيلس عداله والله ولا اساسا ما يحتاي لان هي طول الوقت تصور بطريقة شو اقولك عنها والله ما اعرف كيف اكتبها بس اكيد فهمت عليه اوكي الموقف يعني تباه مثل مقلب تبعد عنه هب جيه لاصقه فيه صح سمعنا توطين وتوطين لكن اي توطين اشوف عادات وتقاليد الامارات اندفت تحت التراب ما بقى شي اذا هالشي صار بتصوير اذا غير الاماراتين شافوه شو بيقولون او واحد اجنبي شو بيقول نفسهم والله ما بقى شي الحين ع سالفة محمد العامري حتى هاللقطه يعني فضيحه يسويها نحن وين عايشين ويا الاجانب و غيره هاي الحركات المواطن لازم ما يسويها واذا سواها المخرج لازم يحذفها يعني غلط بغلط هالمسلسل يقدم مجتمع الامارات يعني هالحركات شو تعتبر ما شي اي وطنيه بالدوله وسما دبي سوت توطين لكن التوطين غلط بعد لان شو ورا هالتوطين غير حركات وحركات ...... ؟؟؟!! وهالظاهره لازم تتعالج اذا بمجتمعنا والله انا بقول لك جمله وهاي فبالي دووووم من مات ابويه زايد الله يرحمه صارت البلاد جيه قمنا انشوف اشيا جنا هب عايشين فالامارات فبلاد فرررري تسلم ع الطرح والسموحه ع الاطاله نترقب منك كل يديد |
والله صدقتوا خواني بكل كلمة قلتوه وما عندي رمسة غير كلمة كفيتوا ووفيتوا بالكلام وتسلم اخوي غدير على صراحتك وبالعكس هذا دليل على حبك لبلادك وما ترضى عليه الغلط |
وعليكم السلام والرحمة تسلم أخوي النعيمي على طرحك للموضوع والله يعطيك العافية وصدقت في كل كلمة كتبتها وصدق أنا أتابع مسلسل أبله نورة وأمس جفت الحركة البايخة اللي سواها العامري يعني بصراحة ما أدري شو الهدف من هالحركات اللي مالها معنى وخصوصا في مسلسل خليجي يعني المفروض ايراعون مشاعر الناس اللي اتابع وخصوصا انه هالمسلسلات ايتابعونها أشخاص من مختلف الأعمار والله حتى الواحد استوا يستحي ايتابع أي مسلسل وهو يالس ويا الأهل لأنه ايخاف تطلع لقطة نفس اللقطات اللي ذكرتهم أخوي النعيمي واللي كلها قلة أدب وفي نفس الوقت حتى اليهال يتابعون هالبرامج والمسلسلات وما شالله عليهم يلقطون أي شي وإيحاولون إيقلدونه وبعدين أي توطين الله ايخليك اللي يتكلمون عنه إذا نص الممثلين من بلدان عربية ثانية لا أنهم مواطنين ولا شي بس العتب على إدارة المحطات اللي تسمح ببث هالبرامج وهالمسلسلات اللي لا تحترم كبير ولا صغير ولا فيها أي شي من العادات والتقاليد والسموحة |
| الساعة الآن 08:02 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir