{{{{{غناتي{{{{
 

مرحبااااااااااااااااااااا......
عندي قصة حب روووعه و يااااريت لو تناال اعجاابكم و على فكرةة ردوووودكم واايد تفرحني
و ترااني اتمنى ردوودكم

البارت1

كان بطي راقد في سابع نومه .. وكان يحلم انه مع ربيعه حريز الهاملي ومع ولد عمه هزاع المحيربي .. وكانو الربع يلحقون وحده حلوه قمر اربعة عشرتطيح الطير من السما ومطفريبها،إلا يبون يرقمونها ، بس هي وحليلها كانت لابستنهم وواقفه على برد تتريا اخوها يطلع من محل التليفونات ، واول ماطلع اخوها وشاف الشباب يقردنون اخته ، تغيرت ملامح ويهه وصدق كان مغيظ وما حس بطي إلا بيد حد على جتفه وصدق قفز وحليله وماسمع إلا صوت حد يزاعق ويزاقر : بطوووووووووووووووووووووي بسك رقاد وراك دوام ، يلا عاد مصختها
بطي : أمايه الله يهديج روعتيني .. الحمدلله كان حلم وإلا كنت اليوم مرقد في مستشفى توام
أم بطي : بسم الله عليك ولديه .. شبلاك ؟ ليش بعيد الشرعنك ..لاتييب طاري المستشفى
بطي : أمايه الساعه كم الحينه ؟
أم بطي : الساعه تسع ونص فديتك
بطي : أمايه خلي عنج السوالف ... لاتقولين الساعه تسع ونص ..أدريبج تسولفين معايه
أم بطي : من متى تحيدني اتغشمر ؟
بطي : اوهو .. شوهالمحنه كل يوم إلا متحير عالدوام آخرتها بيروغوني .. ادريبه ابويه الحينه مغيظ عليه .. كم مره قلتله مااريد اداوم في الشركه معاه
أم بطي : الله يهدي سرك .. من الصبح وانا ادق الباب عليك .. زين ماطاح البيت علينا من كثر ماادق الباب عليك .. وبعدين صدقه ابوك هذا حلالك ولازم تجابله ..عيل تخلي اخوك سيف من حرمة ابوك الثانيه يجابل ابوك كل يوم؟ وكفايه ابوك راضي عنه اكثر عنك..ماشاالله عليه سيف ريال عن عشر رياييل هب شرواتك انت .. بطوي.. بطي ..حووه..بطوووووووووي وصمخ جلاب .. رد عليه ..بعدك راقد اشو هالرقاد اللي ماكل فوادك ؟.. يلا فديتك رح اتغسل واتسبح وتوكل على الله وجبل صوب الدوام هب تسير صوب بيت قوم عمك .. ترا اذا سرت هناك حرمة عمك روضة بتخبرني وياويلك مني يا بطاي إذا عرفت انك هناك
بطي : خلاص ان شاالله ساير الدوام الحينه .. وبعدين دخيل والديج امايه لاتطرشين حد يتجسس عليه ..وحرمة عمي ماتخيل عويهها ..عيوز و غاديه وشايه..الله واكبر من شركن يالحريم .. بس فالحات في الرمسه
أم بطي : خيل عويهك واستح.. وبسك رمسه ولا تغلط على حرمة عمك تراها حسبة أمايتك .. ويلا رح الدوام تراك مصختها
بطي : قصورها هالعيوز المخرفه تكون حسبة امايتيه .. أمايه اندوج سويج سيارتيه وخلي هالهرم عبدالملك دريولكم يشغل السياره ويحرها لين مااتسبح .. وشوي شوي عالسياره تراني امسات إلا شارنها ..اوووف ابويه اليوم صدق بينحرني تراني والله متحير
أم بطي : الله يهديك .. الله يهديك .. ترى محد مخربك ومدلعك غيري .. وإلا الشيبه أبوك أمسات مغيظ عليه والسبه انت
بطي : وشحقه مغيظ بعد ؟
أم بطي : يقول اونه انا مدلعتنك ومبزتنك واااااااااايد
بطي : يهبي الشيبه .. انا ولده البجر والوحيد وماعنده غيري إلا من حريمه الثانيات.. وجان هو فالح إلا يدلع خواتي ترى انا عندي امايه الله يخليها لي ..و ينش ويحب راس امه ويجبل صوب الحمام
أم بطي وهي رافعه يدها للسما : يارب .. احفظ لي ولديه .. ترى ماعندي غيره اشد فيه ظهريه
.
.
.
.

خلص الحبيب بطي من سبوحته ، وطبعاً تلبس وتسفر وتدخن وتدهن وتعطروماخلا شي على المتسواليت ماتعطربه (معرس حشى ( ..
ونزل من حجرته واول مانزل شاف امايته فحبها على راسها وطلع وسار القاراج وركب سيارته الكايين تيربو (بورشيه فورويل اليديده) ..صراحه ماعليها كلام ..
وعلى طول حط شلة عيضة وكان يشل معاه( وصوت بطوي خبال ماشاالله عليه) وخذ تليفونه واتصل في ربيعته نورة ، واول ماردت عليه كان يشل : حظ عيني لو تشوفك كل يوم ..حظها وانت لناظرها الضيا .. نام فيها نام وانعس لا تقوم بالسعادة يا تباشير الحياة ..
نورة : كل هذا حقي ؟
بطي : لاتصدقين عمرج وايد .. اصلاً انا قبل لا اسويلج كنت اشل واول مارديتي عليه كملت الشله
نورة : ههههه.. مرحبا عيوني
بطي : مرحبتين حبيبي .. وينج انتي ؟ عنبو قاطعه
نورة : عثــــــــــــــــــــره ..إلا هو يوم واحد ماسويتلك فيه .. يعني بس البارحه ماسويت .. وغديت قاطعه؟
بطي : والله حبيبي ماصبر عنج ، والود ودي اكون وياج واكلمج 24 ساعه
نورة : يعلني افداك والله
بطي : لاخلاني الرب منج حبيبي .. نورة اريد اشوفج والله تولهت عليج .. وين تريدينا نشوف بعض ؟
نورة : بطاي .. مااروم اكلمك الحينه عندي محاضره الحينه .. خلاف بسويلك .. وداعة الله حبيبي .. باااااااااااااي وبندت قبل لا ينطق بطي بكلمه
بطي : عنلاتها الهرمه .. قصورها هاي تبند في ويهي .. والله ماارد عليها جان سوتلي.. تتحراني ميت عليها..
بطي كان انسان مستهتر ، رغم حلاته وجماله اللي مافي شرواته .. غزال ماشاالله عليه .. كانت لون بشرته بيضا مايله للسمره شويه ( من كثر مايروح البحر ) بس كان ملك جمال بصراحه .. يوم يخطف حذال حد غصبٍ عن خشمه لازم يصد ويشوفه .. بنات كانو وإلا شباب ..لان جماله كان يلفت الانظار..خصه البنات متخبلات عليه ..ماشاالله عليه .. بس عوقه الوحيد انه لعّـــــــــــاب ويخرط عالبنات ومايهمه حد وكل يوم يكلم وحده وإذا كان يريد شي يسويه لو انطبقت السما عالارض.. غير عن حسه الحلو اللي يسحر الكون بعذوبته خصه يوم يشل وإلا يغني .. بالرغم من كل هالحلاة وهالعيوب كان طيب وحبوب وكان يحب امايته وخواته لأبعد الحدود..
وتوه الحبيب واصل الشركه واول ماوصل طبعاً حصله هزبة محترمة من الوالد وخلاف كل هاي الهزبه طلع من عند ابوه وويه صوب مكتب هزاع وظربوها يلسه سوالف عيال العم .. ومااشتغل مول بطي ورد البيت وعلى طول سار حجرته ورقد ولا همه أي شي
.

البارت2

وعالغدا كان بوبطي مغيظ على ام بطي حليلها : عوشه ادبي ولدج تراه هب مرباي .. هذا كل من دلعج له
ام بطي : هذا ولدك البجر والوحيد مني انا .. ولازم ادلعه
بو بطي : يلسي عاندي ودلعيه زياده .. عنبوج ماتدلعيني انا كثره .. حتى حرمتيه شاديه ماتدلع عيالها كثرج ..
ام بطي(عوشه) : والله حليلها شاديه مصريه وماتعرف تدلع عيالها .. وبعدين هي عندها ولدين وبنت وحده سيفو وخلوف ومريم .. يعني إلا هم ثلاثه .. هب شراتي انا عندي ولد واحد وبنتين الله يحفظهم لي.. يعني انا ماعندي غير ولد واحد
اليازيه : فديت امايه والله (اليازيه عمرها 17.5 يعني صف ثالث ثانوي)
شما : وانا بعد .. فديت بابا ( شيخه عمرها سنتين ..وهي آخر العنقود)
(بطي : 22سنة..سيف : 20 سنه .. خليفه : 19 سنه .. مريم : 10 سنوات ) وكانو عيال الشيبة كلهم حلوين ماشاالله عليهم حتى عياله اللي من شادية كانو حلوين (لازم من حلات الشيبه بروحه .. اكيد عياله بيطلعون عليه)
اليازيه : طبي ثمج انتي .. فديت بابا اونه .. اتفدي امايه هي اللي تستاهل هب ابويه
بو بطي : ياللي ماتخيلين .. خليها تتفداني .. هب شغلج هذا.. وبعدين ليش انتي من الصبح مغيظه عليه.. ماكل حلال ريلج انا؟
اليازيه .. هيه ..ليش ماتخليني اسير بيت عمي سهيل ..كان هزاع بيي وبيشلني اليوم .. يعني هاي هب اول مره اسير مع هزاع
بوبطي : والله انج فاصخه الحيا .. قلتلج جان بتسيرين عندج عبدالملك سيري معاه .. هب مع هزاع هذا اللي مايخيل
اليازيه : والله انتو تتواقعون مع بعض انا لا تدخلوني في مواضيعكم الشخصية .. وعالعموم هو الحينه في الدرب وبسير معاه
بوبطي : والله ولد عمج مايحشمني واخوج معاه بعد .. يقبضون التلفون وينسون عمارهم وسوالف ولاجنه وراهم شغل .. يتحروني مااعرف سواياهم مع البنات ؟
اليازيه : هزاع مايكلم بنات .. وبطاي فديته يتسلى شويه .. عنبوه طفر من شغلكم هذا المكود اللي مايخلص
بوبطي : فقدتج يالهرمه .. من وين يايبه هاللسان اللي عليج ؟
اليازيه : طالعه عليك يالشيبه
بوبطي : طبي ثمج قبل لا اكوفنبج هني .. يلا اشتلي وقومي ولد عمج يترياج برع ..شال البقعه من كثر مايهرن
اليازيه وهي تحب راس ابوها : يحيا شويبتيه .. قلت انا عبيد المحيربي مايردني
بوبطي : حبتج العافيه غناتي.. بس اقولج لو علاية اخت هزاعو هب معاكم ماشي سيره
اليازيه : الوالد انت تعرف اني مربايه عدل .. يعني مايحتاي توصيني .. وبعدين هزاع مايرضى على بنت عمه لاني شروات اخته علاية .. يعني اللي مايرضاه على علاية مايرضاه عليه
بوبطي : يحفظج الرحمن الغاليه .. اول مابتوصلين هناك سويلي فديتج عسب اطمن عليج
اليازيه : انزين انت وين بتكون ؟ في بيتنا وإلا بيت خالو شادية ؟
بوبطي : لا ابشرج بيلس في بيتكم اسبوع لين ماتلوع جبدج مني
اليازيه : فديت ابويه والله .. خلاص بسويلك خلاف ان شاالله.. بااااااااااااي
بوبطي + ام بطي : وداعة الله
كان بوبطي يحب اليازية لدرجة فظيعة .. وكانت هي الوحيده اللي مدلعه عند ابوها.. وكان مايرضى ان حد يجرحها حتى لو بشعره ..
في حجرة بطي اللي مبهدله كان التيلفون يصيح بس طبعاً الاخ بطي مسوله اكبر طاف .. وتم التلفون يصيح لين ماتكرم الشيخ بطي ورد عالتلفون : انا راقد بااي
هزاع : يالهرم .. شوف كم مسد كول عالتلفون .. عنبو حرقته وانت بعدك راقد.. هذا اللي يوم قال لي اخطف عليه البيت وبنسير رباعة بيتنا ؟
بطي : ................. ( يناخر الحبيب)
هزاع : بطوووووووووووووووووووووووووي .. رد عليه يالهرم
وحليله هزاع عيز من كثر مايزاعق .. فبند التلفون واتخبر اليازيه اللي كانت راكبه السياره من زمان بس كانوا يتريون بطوي : اليازية .. في حد في بيتكم؟
اليازية : هب شغلك
هزاع : اقولج طبي ثمج وإلا مابوديج العزبة ... قصورهم اليهال يطولون حسهم عالكبار
اليازية : الياهل حرمتك .. ويلسو يتواقعون وعلاية وحليلها كانت ساكته وتشوفهم لانها ظاريه عضرابتهم اليوميه لين مانزل هزاع من السياره وطلع فوق حجرة بطي عسب يزقره بس بطي كان قافل باب الحجرة فدق الباب هزاع لدرجة ان ام بطي تروعت الفقيره ونشت من الرقاد وسارت فوق عسب تشوف شو سالفة الزلزال اللي في بيتهم
ام بطي : هزاع ولديه .. انت اللي شال البقعه من الحشره .. والله اني تروعت
هزاع : اووووووووه .. السلام عليج والرحمه عموه .. السموحه الغاليه واعيتج من رقادج .. وحبها عراسها
ام بطي : افا عليك بالحل الغالي .. اشو تسوي هني ؟ اليازيه قالت بتسير معاكم انت وعلاية ؟
هزاع : لا الغاليه بعدني.. اتريا الشيخ بطي ..قال لي اليوم في الدوام اخطف عليه وعلى اليازيه وكلنا بنروح رباعه البيت وخلاف بنروح الهير وعلايه اختيه بتي معانا
ام بطي : اشعنه بتروحون الهير؟
هزاع : عموه الغالية .. عزبتنا هناك .. نسيتي ؟
ام بطي : هيه صدقه .. عزبتكم هناك .. الغالي توكل على الله ورح ..ترا بطاي لوانطبقت السما عالارض مابينش ..
وشويه وإلا باب حجرة بطي تتبطل .. بطي وهو شفط الدنيا من كثر المثاوب : شو السالفه .. عنبوالواحد مايروم ينخمد في هالبيت ؟
ام بطي : خيّل يا ولد الحلال .. اشو هالمذهب بعد .. صبح ومسا ونحن اندق هالباب والله لو ان الباب عنده لسان جان اشتكى منك
بطي : خلاص امايه ..ظريت عالمحاضره هاي .. والله اني حفظتها .. كل يوم اتعيدينها لي .. والله خلاص خمس دقايق وبكون زاهب وبنزل تحت
هزاع : ههههه .. تتغشمر معايه انت ؟ المعرس بطي بيتزهب في خمس دقايق .. اقول الشيخ انا بروح البيت وانت خلاف الحقني البيت .. وان شالله في بيتنا بنتفاهم عسيرة العزبة .. وداعة الله الغالية
ام بطي : الله يحفظك الغالي .. يلا بطاي فديتك رح اتيدد وصل صلاة العصر وخلاف توكل ورح بيت عمك سهيل
بطي : ان شاالله امايه ..
واول مادش بطي حجرته كان التلفون يصيح وكانت ربيعته نجلا عالخط فرد عليها : نجول الخبله لاتردين اتسوين عالرقم هذا وديه ثانيه .. تراج بتندمين .. وسكر التلفون في ويهها وحط التلفون عالسايلنت لانها الاخت نورة كانت حارقه التلفون بعد .. بس ماشي فايده لان بطي قرر انه مايكلم بنات عقب اليوم لانه مل من سوالفهن البطاليه .. بس صدق بطي بيودر البنات وسوالفهن؟ معقولة ؟ بنشوف ان شاالله في الحلقة اليايه شو من التطورات اللي بتصير..
..
..
..
يلا اتريا ردوودكم

البارت3

وصل بطي بيت عمه سهيل وخلاف اتفقوا انهم كلهم يسيرون بسيارة هزاع العزبة..لان سيارة بطي يديده وماكانوا يريدون يخيسونها .. واول ماوصلوا العزبة راحوا الشباب في صوب والبنات في صوب..
بطي : " هزاعووووووه .. وين بكرتية صوغة .. هلكت وانا أدورها .. اخاف إلا بعتوها ؟ والله اتسوونها .. ماتنلامون .. منو ابوكم ؟ "
هزاع : " لابعناها ولاشياته .. هذي جداك صوغة .. انت إلا ماتعرفها واونها ناقتك بعد .. وبعدين تعال الشيخ .. بلاه ابويه هب مازرعينك ؟ "
بطي : "لاافا .. كل شي ولا عمي سهيل بن سعيد المحيربي .. منا وفينا والله .. بس قلت يمكن كنتوا محتايين فبعتوا الناقة.. تعرف انت الحاية بعد "
هزاع : " والله لو كنا محتايين وبنموت.. ماطلبنا منك شي "
بطي : " ليش عاده ؟ انا خويّك "
هزاع : "امبونك لحف .. البارحه قلتلك باخذ سيارتك بغيت تموت عليه "
بطي : "ورفجة بو خليفة كنت مواعد البارحه ليلوه الخبلة هاي اللي من اهل الشارجة .. وإلا ماتغلا عليك السيارة .. تفداك السيارة وراعيها بعد.."
هزاع : " يعني تبدي عليّه وحده ؟؟ .. "
بطي : " افااا .. كل شي ولا الزوز .. مانبدي عليه مخلوق في الدنيا .."
هزاع يقول الكلمة باستهزاء : " مبين ؟؟ .. "
بطي : " خلاص هزاع .. والله اسمحلي .. " ..ويحب هزاع على خشمه .. " ونحبلك هالخشم الغاوي .. والله لو طلبت مني شي ودية ثانية .. مااردك..انت آمر بس .."
هزاع : " يعلني افداك الغالي .. ماتقصر والله .. بس ان شاالله الاسبوع الياي باخذ شروات سيارتك.. الوالد يوم خبرته انك ماخذ سيارة يديده .. قال لي افا عليك رح خذ شرواتها .. "
بطي : " ياريال لاتاخذ شرات موتريه .. خذلك رنج اليديده عسب نكشخ بسيارتك بعد هب نفس المواتر .. كل يوم نخق بسياره .. "
هزاع : " صدقك والله .. خلاص بكلم الوالد ويصير خير .. "
بطي يرمش بعيونه بسرعة شروات اليهال يوم يسوون عمرهم بريئين : " زوزو .. حبيبي .. فديتك .. قلبي .. عمري.. يابعد جبدي والله .. "
هزاع : " اللهم اجعله خير.. يوم ان السالفه فيها تفدي اكيد عيل مسوي شي وتباني اعاونك فيه .. اسمحلي بطووي .. مايخصني فيك "
بطي : " افا ولد العم ماهقيتها منك .. عنبو يعني يوم اتفداك لازم مسوي مصيبة .. ابشرك من اليوم ورايح مابوهقكم انت وحريز .. لاني ودرت البنات .. "
هزاع : " اوووووووووووووه .. والله مااصدق .. شو اللي ياك مرة وحده ؟؟ "
بطي : " بس جذي .. مليت منهن .."
هزاع : " لازم بتمل منهن .. من حلاتك يالهرم .. حتى البنات ماييبون راسك في الحلاة .. "
بطي : " الله واكبر من عينك .. قل اعوذ برب الفلق .. تففف على عمري.. تفل عليه بسرعة .. تففففففففففففلللللللللل .."
هزاع : " عيوني هب حارة انزين ..تتتتتتتتتتتتفففففففففف عليك ولاتزعل .."
بطي : " اتحرا بعد .."
.
.
وفي صوب ثاني من العزبة .. فوق العراقيب .. كانن عليا واليازية في دنيا ثانية
علاية : "والله اني تولهت على خلوف اخوج .. خاطري اشوفه .."
اليازية : " نسيت اخبرج ؟؟؟؟؟؟؟؟؟؟؟؟؟؟ "
علاية : " اشوووووووووووووووووووووووووه ؟؟؟ "
اليازية : " كلمني البارحة اخويه خليفة وقال لي سلمي على علاية.."
علاية : " يعله في ذمتج ؟ "
اليازية : " وغلاتج عندي .."
علاية قامت من مكانها ويلست تعافد وتناقز : " فديييييييييييييت قلبه والله .. ربي يسلمه ويحفظه .. "
اليازية : " سكنهم مساكنهم .. شو ياج بسم الله عليج ؟؟ بسج عاد .. مصختيها ثرج تتفدينه جدايه .. وتناقزين شروات الخبايل بعد؟؟ "
علاية : " حرام عليكم والله نحب بعض .. "
اليازية : " تدرين يوم رد خلوف من لندن .. خطف عليّه البيت وسلم عليّه ويابلج دبدوب يخبل .. "
علاية : " وليش ماعطيتيني الدبدوب يوم كنت في بيتكم؟ "
اليازية : " عيبني وقلت باخذه حقي.."
علاية : " عن البزا .. طلبتج لا ترديني .. دخيييييل والديج .. ييبيه .."
اليازية : " بوسي يدي وريلي اول .. وخلاف بفكر جان بعطيج وإلا لا .."
علاية : " والله بخبر خلوفي.."
اليازية : " خلوفي بعد .. وينك ياخليفة عن كل هاي الرمسة .. خلاص ان شاالله اليوم بطرش الدبدوب مع عبدالملك بيتكم.."
علاية : " فديتج والله.."
اليازية : " اسميج مصلحجية .. بس تتفداني عسب خلوف.."
علاية : " لازم .. تتشابون ماشاالله عليكم .. جنكم توم.."
اليازية : " شي اكيد .. لان خلوف اخويه ودوم مجابلني 24 ساعة .. صح انه هب خليصي بس بعد الحمدلله وااااااايد متقاربين ونحب بعض.."
علاية : " ربي يحفظكم جميع.."
اليازية : " آميــــــــــــــــــــــن .."
وفجأة : " بوووووووووووووووووووو .."
علاية + اليازية : " بسم الله الرحمن الرحيم .."
بطي + هزاع : " ههههههههههههههههههه .."
هزاع : " شو رايج اليازية بالحركة .."
اليازية : " سخيفة شرواتك ... والله اني تروعت .."
هزاع : " السموحة الشيخة اليازية .. ودية ثانية قبل مااروعج بخبرج عسب تاخذين احتياطاتج..ههههه .."
اليازية : " دمك ثقييييييــــــــــــــــــــل وايد .. ماادري على منوطالع ؟"
بطي : " على منو بعد ؟ .. اكيد على العم سهيل .."
هزاع : " انت اشو بلاك من الصبح على ابويه؟.."
بطي : " والله اتغشمر .. انت تدري اني اموت في عمي سهيل .."
علاية : " بطاي .. طلبتك.."
بطي : " تم بنت العم .. آمري انتي بس كم علاية عندنا.."
علاية : " ماعندكم غيري.."
بطي : " لاتصدقين عمرج .. عالعموم شو تريدين الغالية ؟.."
علاية : " اريد اركب البانشي مالتك.."
هزاع : " كلي خراج وطبي ثمج .. ماعندنا بنات يركبن دراجات قصورج بعد.."
بطي : " تعــــــــــــــــــال .. الحينه اتذكرت ان البانشي مالتيه عندكم .. يالهرم وين خاشينها؟ "
هزاع : " انت العام يوم يبتها قلتلي ايّودها في عزبتنا لان عزبتكم كانوا ينظفونها ويعدلونها العمال .. وإلا نسيت؟ "

بطي : " هيه احيد .. انزين وين البانشي لايكون بعتوها ؟ "
هزاع : " انت شبلاك كل مايبنالك طاري شي قلتلنا بعتوه ؟ الغالي كل شي في الحفظ والصون.."
بطي : " هزاعو نسيت اخبرك.."
هزاع : " خير ان شاالله .."
بطي : " حريز مواعدنا اليوم في المارينا يعني لازم نرد البنات البيت ..ونسير نتسبح ونتعدل .. وخلاف نويّه صوب المارينا .."
هزاع : " عنلاتك الهرم وشعنه ماخبرتني .. لازم نسير نوصل البنات الحينه ونتلاحق عالريال ..والله بنتحير عليه والسبة انت.."
بطي : " الحينه انا المتسبب وانا الغلطان؟؟ .. بس ماعليه الله يخلي سيارتيه بتطيربنا طير وبنوصل بسرعة.."
هزاع : " دخيل والديك جان ماتريد عمرك برايك .. بس انا اريد عمري وفي ناس بعد يحبوني ويريدوني.."
اليازية : " افا ولد العم .. لايكون غديت شروات اخويه اتقردن بنات ؟ .."
هزاع : " بعيد الشر عني .. كل شي ولا هالسوالف البطالية .."
بطي : " الحينه انا غديت بطالي .. وانتي يزووووووووووووي بتطبين ثمج وإلا اشو سالفتج .. كم مرة قلتلج يوم الرياييل يرمسون الحريم يسكتن .."
اليازية : " وايد مغترين بعماركم ..اونه .. رياييل .. رياييل.."
بطي : " جب .. جب .. لاتيلسين تباغمين .. تتحريني مااسمعج ؟.."
هزاع : " بطوي دخيلك هب وقته تتواقعون .. الريال يتريانا .. خلاف اتدافنوا وكفخوا بعض على راحتكم.."
اليازية : " انت محد طلب شورك.."
بطي : " احشمي الريال .. ويلا اشتلن بوصلكن البيت.."
علاية : " بطاي تونا إلا حادرين العزبة .. دخيل والديك طفرنا من البيت لاتردنا البيت.."
بطي :" والله مااروم اردج الغالية .. بس شواسوي والله اني مواعد الشباب اليوم .. وخذي مني وعد اني مرة ثانية اطلعج انتي واليازية أي مكان تريدن .. ومن هاالخشم .." .. ويأشر عخشمه..
علاية : " يعله في ذمتك ؟ "
بطي : " من متى تحيديني اخرط ؟.."
هزاع : " منو اللي يخرط ؟ كل شي ولا بطاااي .. ولد العم ما يجذب موووووول .. والله انك اكبر سيّيح .. تويدينا السيح وتيبنا .. هههه"
بطي : " عنلاتك .. تتغشمر عليه ثرك .. صح اني اجذب عالبنات ساعات .. بس مااجذب على اهليه ..وبعدين قلتلك انا مااكلم بنات .."
اليازية : " علاية .. سمعتي شي غلط ؟.."
علاية : " على مااظن سمعت شي غلط .. بس ماادري ..يمكن اذني هب منظفة ؟.."
بطي : " تتغشمرن عليّه اشوفكن ؟ وإلا هب يايزتلكن رمستيه .. والله اني ودرت كل البنات ومااكلم بنات .. وجان ماتصدقن دوكن تلفوني واتاكدن ان محد يسويلي الحينه .."
علاية وويها محترق من الحيا : " السموحة ولد العم .. والله اني كنت اتغشمر ..ماهقيتك تغيظ .."
بطي : " بالحل الغالية .. بس بغيتكن تعرفن اني خلاص .. غديت واحد ثاني .. وان شاالله بغيّر كل تصرفاتي .."
اليازية : " ربي يوفقك فديتك .."
.. وردن البنات البيت وعلاية نزلت بيت عمها عبيد والشباب اتزقرتوا واتكشخوا وساروا المارينا .. وبطي ماكان يريد يتحير على حريز .. لانهم مايشوفون بعض دوم لان حريز في العين ..والكل كان ملتهي بصوب ..بس علاية واليازية كانوا بروحهن في البيت ..بس منو قال اليازية اتم بليا شغلة .. واليوم الخميس .. الله يعين البنات دودة مايقدرن يقرن مكانهن ..
اليازية : " علاية ..مليت بصراحة .. طفرت من البيت .. طوفي نطلع خاري.."
علاية : " اشهد انج استخفيتي .. وين تريدين تسرين ؟ وبعدني مانسيت .. وين دبدوبي .."
اليازية : " مابعطيج الدبدوب لين ماتوافقين على شروطي.."
علاية : " ذليتينا يابنت الحلال .. يوم كنا في العزبة حلفتي يمين انج تعطيني الدبدوب .. وإلا نسيتي ؟"
اليازية : " مانسيت .. بس لازم استغلج شروات ماتستغلوني انتي وخلوف.."
علاية : " خلاف بتفاهم معاج .. ردي على تلفونج قبل لااكسره على راسج .."
اليازية : " برايه علاية .. الحينه بتكسرين التلفون على راسي .. الله يالزمن .. ماادري منو من ساعة كانت تترجاني عسب اعطيها الدبدوب .. بس والله لااذلج يالبقره .. خليني ارد عالتلفون وخلا ف برويج .."
اليازية : " مرحبا مليون ولايسدن وان زادن لاباس .. شحالك حبيبي ؟.."
علاية والفضول بيذبجها : " يزووووووي .. تمكلين منو ؟؟.."
اليازية : " حبيبي خلوف وينك انت ؟ شحقه ماتخطف وتسلم .. عنبوه اختك انا .."
علاية قلبها قام يدق بسرعة شروات دق المعلاية : وااابويه انا .. خلوف عالتلفون .. يزوي عطيني التلفون دخيلج .."
اليازية وهي لابسه علاية :" وشوالعلوم بعد الغالي ؟.."
خليفة : " اوب اوب .. شوسالفة هالترحيب كله اليوم .. ومنو حذالج ؟.."
اليازية : "بس جي .. تولهت عليك .. حرام ؟ بس في وحده حذالي مأذتني إلا تبا ترمسك.."
خليفة : " ختولي .. انا امبوني مااكلم بنات .. بعد اكلم وحده غريبه الحينه ؟ ابداً والله .."
اليازية : " سمعتي وإلا اسمعج.."
علاية : " اشوووو؟.."
اليازية : " قال خلها تولي .. وقال بعد مايكلم غرب.."
علاية وهي تزاعق عسب يسمعها خليفة : " ماعليه خلوف .. والله مااكلمك.." .. وطلعت علاية خاري وجبلت صوب حديقة البيت لانها صدق اتضايقت من الرمسة اللي سمعتها .. وخلت اليازية بروحها في حجرتها
خليفة : " هذي علاية اللي كانت تزاعق .. وإلا يتهيء لي ؟.."
اليازية : " هيه .. هي اللي كانت حذالي من ساعة .. بس زعلت من رمستك.."
خليفة : " وغلاتها عندي اني ماكنت اعرف انها حذالج .. واني الهرمة شعنه ماتخبريني ؟.."
اليازية : " كيفي .. كنت اريد اصيحها شويه ..من زمان ماصيحتها.."
خليفة : " يزوي .. والله لرويج شغل الله .. بخليج انا ..لاني بحدر بيتكم الحينه.. بتفاهم معاج الحينه .. face to face.."
اليازية : " اترياك فوق انا .. مابنزلك تحت .. تعال حجرتيه.."
خليفة : " تتشرط بعد الخايسة .. باااااااي.."
وحدر خليفة بيت ابوه .. وكانوا مسوين يلسه صوب الزراعة اللي في الفلة .. فانتبه خليفة على وحده كانت تصيح وتباغم وتكلم عمرها .. فقرب صوبها بدون ماهي تنتبه..
علاية وهي محمرة عيونها من الصياح : " الحينه انا غريبه ياخلوف .. الله يسامحك.. والله ماكلمك .. والله .. " ..وقامت تناهي من كثر الصياح .. وماحست إلا يد حنونة رقيقة على كتفها وصوت شروات الغزال يقوللها : " دموعج غالية عليّه .."
علاية : " خليفة ؟؟؟؟؟.."
خليفة : " هيه نعم .. خليفة اللي ماتريدين تكلمينه .. عنبوه من اول مارديت من لندن ولا تخبرتي عني ولا سلمتي عليه بعد .."
علاية وبدت تناهي من خاطرها : " بعتني خليفة .. خلاص مااسوى عندك شي؟.."
خليفة : " اشو هاي الرمسة المخبقة .. هاي يزوي إلا تريد تخرب من بينا .. قلتلي من ساعة اونه وحده تريد تكلمك .. وانتي تدرين اني مااكلم بنات ولااشوف وحده غيرج.. خلاص يلا فدبتج قومي اغسلس ويهج وانا الحينه باخذ حقي وحقج من اليازية .." .. وخذ يد علاية ومسكها وسار معاها لين مغاسل الميلس اللي كانت اقرب مكان للماي.. عسب يغسل خليفة عيون غزالته من الدموع .. وغسل خلوف ويه علاية ووحليلها كانت صدق محمرة من المستحا .. اول مرة ريال يغسل لها ويهها وهب اي واحد حبيب القلب بعد .. الله يكون في عونها .. صدق كان ويهها غادي شروات اشاير المرور .. كل حزة لون وكان خليفة يضحك عليها.. وخلاف يوم خلص من غسل ويهها .. سار الفقير وياب كلينكس عسب ينشف لها ويهها .. هالحزة صدق ماتت .. ومارامت تنطق باي كلمة .. جنها قاصيلها لسانها .. وخذ يدها وحبها على جفها .. خلاص بتنتحر الحرمة الحينه ..ياويل حالي عليج ياعلاية .. ومسكها من يدها وماطاع يهد يدها وساروا فوق حجرة اليازية بس كانت قافلة الباب وماطاعت تفتح الباب .. بس هالحزة هد خليفة يد علاية فارتاحت شويه البنت ..
خليفة : فديتج الغالية .. شبلاج غادية شروات الطماط ؟ كل هذا بس عسب غسلت لج ويهج الغاوي ونشفته لج .. وزخيت يدج شويه وحبيتها .. الله يعينج عيل يوم باخذج ان شاالله.. شوبتسوين خلاف ؟.."
علاية وهي خلاص ماتروم تتنصخ ..تحس جنه حد زاغدنها : " خلووف .. جب .."
خليفة : " هههههه .. انزين خلاص مابقول شي .. " ؟؟ورد يدق باب حجرة اليازية .. " زوزو فجي الباب والله مابسويبج شي .. والله متوله عليج .."
واخيراً رضت اليازية تفج الباب ..
خليفة : " افا الغالية .. ماتريدين تشوفيني ؟.."
اليازية : " ماكنت اريد اشوف علاية .."
خليفة : " ليش ؟.."
اليازية زعقت زعقة الكل تروع منها : " ااااااااااييه .. خلوووووووووف .. اشو مسوبها انت؟ .. البنية غادية هي والطماط واحد .."
خليفة : " ههههه .. روعتيني يالسبالة .. اتحريتج بتموتين!! .."
اليازية : " ادريبكم تبون الفكاك مني عشان تاخذون راحتكم .. بس مابموت .. بيلس علّة على قلبكم .."
خليفة : " بسم الله عليج وعلينا من طاري الموت .. ان شاالله عدوينج ..وبعدين لاتتروعين .. الجملله انا وعلاية مانسوي شي مع بعض وأصلاً نادر مانقعد مع بعض .. والكل يدري ان علاية محيرة لي .."
علاية وويهها غدا احمر اكثر عن قبل : " اليازية .. اريد تلفونج علشان اتصل بدريولنا .."
اليازية : " شحقة دريولكم ودريولنا موجود؟ تعالي .. تعالي .. لاتقولين بتردين البيت وبتخليني ؟.."
علاية : " هيه.."
خليفة : " افااا .. وين بتسيرين عيوني ..وإلا مليتي مني ؟ .."
علاية وويهها يفور : " لا والله .. بس برد البيت .. اتحيرت عالاهل
خليفة : خلاص انا اللي بوصلج البيت .."
علاية : " لا لا .. اسحاق بيردني البيت .."
خليفة : " حشا والله مايوصلج البيت .. وبعدين ماعندنا بنات يركبن مع غرب آخر الليل .. يلا البسي عباتج وانا بترياج تحت .."
اليازية : " علاية .. غدي حرمة رزينة حشيمة .. ولا تعبرين اليهالو .."
خليفة : " يزووووووي .. شبلاج انتي الثانيه ؟ بروحها هب طايعه وانتي تزيدينها بعد .."
اليازية : "هههه ..خلاص .. انت وعلاية حولوا تحت .. وانا الحينه بييكم .. افا عليك اخويه .. انا اليازية والاجر على الله .."
علاية وهي مغيظة : " الياااااااااااازية ..."
اليازية : " جب ولا كلمة .. بسير اييب لج عباتج والدبدوب وبييج .."
ووحليلها سارت علاية مع خليفة غصبن عنها واليازية ماسارت معاهم .. وفي السيارة ..
خليفة : " بتمين ساكته ؟.."
اليازية : " خليفة والله ماكنت اريد اركب معاك .."
خليفة :" ليش ان شاالله ؟ .. تركبين مع الغريب الهندي دريولكم عادي .. لكن انا ولد عمج لا .. والله ماكنت بخليج تركبين معاه .."

علاية : "......"
خليفة : " شكلج ما بترمسين ؟؟.. ادريبج زعلانه مني .."
وشغل المسجل وحط سيدي وحط اغنية.. وقال: " علاية فديتج هاي الاغنية اهديها لج .. وان شاالله دوم اكون على بالج .."
انت من تستاهل اشواقي .. والخفوق وناظر عيوني .. ساكن في داخل اعماقي .. راسخ ومشيد ركوني .. لك يتوق القلب مشتاقي .. خذتني عن كل مزيوني .. بالجمال وحسن الاخلاقي .. وانسجام بدد شجوني .. يارفيع المستوى الراقي .. فيك انا مولع ومفتوني .. بك اتوّج قمة اذواقي .. وانت انسي وجوي وكوني .. يامخجل شمس الاشراقي .. يابديع الحسن واللوني .. قول وش خليت للباقي .. فيك كل الزين مخزوني .. ( الاغنية لميحد حمد)
واول ماخلصت الاغنية وصلوا البيت ..
خليفة : " شي في الخاطر الغالية ؟.."
اليازية : " سلامة راسك فديتك .."
خليفة : " واااااااااغشي انا .. عيديها ودية ثانيه .. عشان خاطري .. بس قولي فديتك مرة ثانية .."
اليازية وهي مستحية : " خلاص فديتك بحدر انا .."
خليفة : " فديت روحج والله .. حافظنج الرحمن .."
اليازية : " تحمل على عمرك .."
خليفة : " افا عليج .. كم علاية عندنا .. لازم بتحمل على عمري بس عسب خاطر علاية.."
ونزلت البيت وعلى طول جبلت صوب حجرتها .. ولاسلمت على حد ولا عبرت حد .. وعقت عمرها على الشبرية ولوت على الدبدوب اللي كان في يدها … " فديتك والله.."
وخليفة ماكانت حالته أخيرعن حالة علاية .. هو الثاني كان ذايب بعد .. سار البيت وطاح عالشبرية .. وهاي الليلة لا علاية رامت ترقد ولا خليفة ..

وفي بيت عبيد المحيربي .. الساعة 12.30 .. والاخت اليازية هب قادرة ترقد .. وفشلت كل خططها .. لانها كانت مفكره تطلع مع علاية بس علاية ردت البيت مع خليفة .. يلست اليازية تتجلب اونها بترقد بس لاحياة لمن ينادي .. فقامت ونزلت تحت والدنيا ظلمة .. كل الخلق رقود إلا اليازية .. وبطوي اكيد هب في البيت لان اليوم بات في بيت عمه .. قامت الاخت تحوم في البيت وسارت المطبخ التحضيري .. وسوتلها سندويشه عسب تقضي وقتها .. بس مافي فايده .. فاتذكرت انها ناسخه مفتاح حجرة بطوي .. فقررت انها تسير حجرته وتنبش شويه .. بس يوم دشت الحجرة انصدمت من اللي شافته .. الحجرة كانت مبهدلة لدرجة فظيعة .. فقامت وبدت ترتب الحجرة وتخمها وتنظفها .. بس وهي كانت ترتب اوراقه طاحت صورة واحد غاوي ماشاالله عليه .. اكيد ماييب راس بطي في الحلاة .. بس بعد لونه الحنطاوي كان جنان .. فخذت اليازية الصورة وخلتها على صوب .. وهي تنظف شافت اشيا واشيا ..صور بنات وارقامهن .. واشيا وايده .. بس مااستغربت من هالشي لانها تعرف اخوها وسوالفه .. بس ماحطت في بالها شي لان اخوها وعدها ان مايكلم بنات ..ورتبت الحجرة وغدت الحجرة نظيفة .. جنها من سنين هب منظفة .. لان بطي مايخلي البشاكير يدخلن حجرته .. بس يوم خلصت كانت الساعة 2.10 .. وهلكت وحليلها من كثر ماتحط وتشل في الحجرة عسب تغدي الحجرة نظيفة .. فانسدحت على شبرية اخوها واتذكرت الصورة اللي شافتها من ساعة .. فقامت وخذتها وردت طاحت على الشبرية ويلست تشوف الصورة وقالت : " الله يحفظك لاهلك ويخليك .. ماشاالله عليك غاوي .." ..ونست عمرها اليازية ورقدت في حجرة اخوها وهي ميوده الصورة في يدها ..
شو اللي بيستوي في اليازية ؟ وشو من التطورات اللي بتصير ؟
ان شاالله الجزء الياي بتعرفون شو اللي بيستوي ؟؟..


يللا اتريا ردوودكم
::
::
::
::

البارت4

في بيت عبيد المحيربي ..الساعة 5.15 .. بوبطي ظاري انه ينش هالحزة عسب يسير المسيد .. وام بطي بعد نشت معاه عسب تصلي الفجر ..
بوبطي : " عوشة فديتج .. ناوليني صفرتية الحمرا .."
ام بطي : " ان شاالله .. عبيد بغيت اخبرك شي .."
بوبطي : " يوم برد من المسيد خبريني .. اقول ام بطي .."
ام بطي : " آمر فديتك .."
بوبطي : " مايآمر عليج عدو الغالية .. اقول وين ولدج الهايت بطوي ؟؟ ليش ماواعيتيه عسب ايي معايه المسيد ؟؟ .."
ام بطي : " ولدك هب في البيت .. بات في بيت عمه البارحة .."
بوبطي : " والله انه هايت .. كل يوم مكان .. مايقر مكانه هذا الولد .."
ام بطي : " شبلاك على ولدك .؟؟.."
بوبطي : " خلاص .. خلاص .. طبي هالسالفة .. بسير الصلاة الحينه .."
ام بطي : " يحفظك الرحمن .."
طلع بوبطي عن ام بطي عسب يسير المسيد .. بس اول ماحدر رد مرة ثانية عند ام بطي ..

بوبطي : " عويييييييييش .. "
ام بطي : " بسم الله !! روعتني .. شعنة رديت ؟؟ .. "
بوبطي : " وينها يزوي ؟؟ احيدها الفجر تشل البيت على راسها ؟؟ .."
ام بطي : " لبد راقدة البنية ؟؟؟ .."
بوبطي : " بسير اشوفها وخلاف بسير المسيد .."
ام بطي :" وداعة الله الغالي .."
قامت ام بطي من مكانها عسب تسير تصلي ..بس بوبطي مامداه طلع من الحجرة إلا رد ودية ثانية ..
بوبطي : " غناتي ..."
ام بطي : " عونك الغالي .. شعنة رديت مرة ثانية؟؟ .."
بوبطي : " بس بغيت اقولج شي .."
ام بطي : " خير بوبطي .."
بوبطي : " امممم .. "
ام بطي بدت ملامح ويهها تتغير : " ارمس عبيد .. لاتروعني .."
بوبطي : " بس اريد اقولج .. اني احبج .."
ام بطي : " والله انك روعتني .. ادري انك تحبني .. "
سكتت ام بطي وردت رمست بس ويهها كان محمر : " بوبطي حتى انا ...."
بوبطي : " حتى انتي شو؟؟ .."
ام بطي : " لاماشي .. بس كنت اريد اقولك انا نحن كبرنا على هالسوالف .."
بوبطي : " اووووووف .. حتى كلمة احبك مستخسرتنها فيني ؟؟؟؟.."
ام بطي : " لاوالله .. مايغلا عليك غالي.. بس .."
بوبطي : " بس شوووو ..؟؟؟.."
ام بطي : " بس استحي .."
بوبطي : " ياويلي على اللي تستحي .. والله اني احب الحيا اللي فيج .."
ام بطي : " فديت روحك والله .. بوبطي بتتحير عالصلاة .."
بوبطي : " لاحق عليها .."
ام بطي :" استغفر ربك عبيد .. "
بوبطي : " هههههه.. استغفر الله .. بس بعدني ماشبعت منج .."
ام بطي : " يوم بترد من الصلاة .. بيلس معاك لين ماتشبع .."
بوبطي : " ههههه .. والله مابشبع منج .. خلاص الغالية بسير عند اليازية وخلاف بسير الصلاة .. تحملي على عمرج .. "
ام بطي تتنهد : " ربي يهديك ويهدي عيالك .."
.
.
راح بوبطي فوق عسب يشوف اليازية .. دق بوبطي باب حجرة اليازية بس محد رد عليه ..ورد دق الباب مرة ثانية .. بس محد رد عليه .. فقرر بوبطي انه يفتح الباب .. بس يوم فتح الباب استغرب .. لان الحجرة كانت مرتبة .. واللحاف شروات ماهو .. يعني محد دقه .. والليتات كانت مبندة ..
بوبطي : " اليازية ... يزووووووووووي .. وينها هاي ؟؟؟ .."
طلع بوبطي من حجرة اليازية وهو مستغرب .. وافكاره تييبه وتوديه .. بس وهو كان يمشي في الممر .. انتبه ان باب حجرة بطي كان ملايم والليتات ملبقة .. دخل بوبطي الحجرة وشاف بنته اليازية وارتاح فواده .. وتقرب بوبطي من اليازية اللي كانت هب ملحفة .. بس اليازية انتبهت ان في حد حدر الحجرة فنشت على طول .. وبحركة لاإرادية ومن دون ماتنتبه .. خشت الصورة اللي كانت في يدها تحت اللحاف ..
اليازية : " ابوووووويه ؟؟ .."
بوبطي : " هيه ابوج .. شبلاج تروعتي ؟؟ .. "
اليازية : " لا .. ماتروعت .. بس تحريتك بطي .. "
بوبطي : " ولو كنت انا الحينه بطي .."
اليازية : " والله ليذبحني من الضرب .."
بوبطي : " ليش .؟؟؟..."
اليازية : " لاني داخلة الحجرة بدون علمه .."
بوبطي باستهزاء : " وشو فيها حجرته ؟؟ اسرار الذرة وانا ماادري ؟؟.."
اليازية : " هههه .. لا .. بس هو مايحب حد يدخل حجرته .."
بوبطي : " عالعموم انا مابطول عليج .. لاني بسير المسيد الحينه .. بس ييت ادور عليج .. والله ان ظربتني الغبنة .."
اليازية : " ليش ؟؟؟.."
بوبطي : " لاني ظريت اشوفج قبل لااسير المسيد .. واليوم ماشفتج .."
اليازية : " اها ... تدري ليش مانشيت اليوم من غبشة ؟؟.."
بوبطي : " شعنة ياالخبلة ؟؟.."
اليازية : " انا خبلة ؟؟ الله يسامحك .. عالعموم .. انا مانشيت اليوم لاني هب راقدة في حجرتية .. وبعدين تيلفوني في الحجرة .. يعني ماسمعت المنبه اليوم .."
بوبطي : " خلاف تفلسفي عليّه .. بسير المسيد الحينه .."
اليازية نشت وحبت ابوها على راسه : " الله يحفظك .."
.
.
.
راح بوبطي المسيد .. واتذكرت اليازية انها خشت شي تحت اللحاف .. بس ماكانت تعرف اشو هذا الشي .. فرفعت اللحاف وشافت الصورة .. فضحكت اليازية ضحكة باردة .. وقالت في خاطرها : " كنت بتوديني في ستين داهية .. " وخذت الصورة وراحت حجرتها ..
وحطت الصورة في مذكرتها اللي تكتب فيها كل اللي يستجد في حياتها وكل اللي يضايقها وكل اللي تحبه .. لانها كانت وحيدة .. ماعندها اخت في عمرها تاخذ وتعطي معاها .. صح ان علاية من سنها وهن في نفس الكلاس .. بس علايه ماكانت تفهم على اليازية وايد .. لان اليازية غريبة المشاعر وصعب الواحد يفهملها .. فكانت ظاريه انها تكتب كل اللي في خاطرها في المذكرة مالتها .. فحطت المذكرة على مكتبها وراحت تتيدد عسب تصلي وتقرا قرآن .. وخلاف يوم صلت وقرت قرآن ردت ورقدت مرة ثانية لانها كانت صدق تعبانة.. من كثر ماخمت في حجرة بطوي المبهدلة .. بس حليلها ماتهنت في رقادها لان ابوها كان في بيتهم هاليوم وكان صدق متوله عليها وفي خاطره يتريق معاها .. فقام ابوها ودق عليها الباب بس ماشي فايده فدخل الحجرة فشافها راقدة.. فغمضته وتقرب صوبها وهمس لها في اذنها بصوت الاب الحنون اللي يحن على عياله : " يزوي فديتج .. نشي حبيبي .. خاطري اتريق معاج .."
اليازية وتوها انتبهت ان ابوها حذالها : " ابويه ؟ خير في شي فديتك ؟ .."
بوبطي : " لا فديتج .. بس كنت اريدج تتريقين معايه .. بس الحينه خلاص مااريد ... ردي ارقدي فديتج شكلج تعبانه .."
اليازية : " لا افا .. عبيد المحيربي ياي لين حجرتيه شخصياً وأرده .. لا والله ماعاش من يردك .. صح اني تعبانه واريد ارقد بس عشان خاطرك بنزل وبتريق معاك .."
بوبطي : " خلاص فديتج .. دام انتي تعبانه ردي ارقدي .. بتريق مع امايتج.."
اليازية : " افا الغالي بتتريق بدوني ؟ .. ثواني وانا عندك تحت في حجرة الطعام .. بس بسير الحمام وبتغسل وبييك .. كم عبيد عندنا ؟؟ إلا هو واحد .."
اليازية : " ابويه .."
بوبطي : " عونج غناتي .."
اليازية :" عانك الرحمن .. ابويه بصراحة بغيت اقولك انك اليوم غادي مزعج .."
يوّد بوبطي اليازية من اذنها ويرها : " انا مزعج ؟؟؟..."
اليازية : " آاااااااي .. الحينه اللي يقول الصدق هالأيام ينضرب ؟؟.."
بوبطي : " فقدتج .."
اليازية : " صدق والله .. كم مرة خربت عليّه رقادي ؟؟.."
بوبطي : " تبدين رقاد على ابوج ؟؟؟.."
اليازية : " لاوالله .. ماعاش من يبدي شي على عبيد المحيربي .. بس دخييييلك فج يدك عن اذني .."
بوبطي : " ههههه .. تصدقين نسيت السالفة .. ربي يحفظج لي ان شاالله .. " وحب بنته على خدها .. وفجأة دخلت عليهم شمامي وهي تصيح والدموع اربع اربع : " بابا عبيداني .. دلبتني لوز .." (ضربتني روز)..(تدلع ابوها بعد.. هب هينة هالياهل)
بوبطي شل بنته ولوا عليها : " حبيبي .. كم مرة قلتلج لا تصيحين .. خلاص فديتج الحينه بنروح انا وانتي عند روز مالتج وبنواقعها .. "
شمامي وبدت تهدى شوية : " باباتي .. بندلبها بعد.."
بوبطي : " هههه .. لاعيب .. مانضرب الحريم نحن.. منقود عن العرب .."
شمامي : " انزين .. يلاّ نلوح نواقعها.."
وشل بوبطي شواخي ونزلوا تحت عند البشكارة عسب يعرف بوبطي شوالسالفة ..
بوبطي : " Rose .. Rose ..come please? "
روز : " Yes sir , can I help you ? "
بوبطي : Shamah said that you fight with her and you beat her , It is true Rose ?
( شما تقول انج تواقعتي معاها وضربتيها.. صحيحه هاي الرمسة روز ؟ )
روز : لاء سير .. She want to eat ice-cream , and her mother said to me to give Shaikha the milk ….I love Shamah very much .. and I can't beat Shaikha..
بوبطي : " خلاص روز سيري .. شمو تعالي .. روز تقول انج تريدين ايس كريم .. صح شمامي ؟ "
شمامي اونها تبا تغير السالفة : " بابا .. بنلوح بيت عمي ثهيل اليوم ؟ "
بوبطي : " لا تحاولين تغيرين السالفة .. عنبوه من صباح الله تريدين تاكلين شي بارد .. الناس يتريقون ويشربون شي دافي .. هب ايس كريم .. "
شمامي وهي هب مقبضة ولا كلمة لانها ياهل ماتفتهم : " انا بثير عند بيبي .." (بيبي : حبيبي) .. شمامي ماكانت تقدر تقول بطي فكانت تقول بيبي ..
بوبطي : " اشو بيبي بعد ؟؟ شواخي .. تعالي .. "
بس شمامي ماعبرت ابوها .. وسارت تدورعلى حبيبها..

في بيت سهيل المحيربي .. هزاع شال البيت على راسه .. تتوقعون ليش؟
اكيد عشان يواعي الاخ بطي من الرقاد ..
هزاع : " بطووووووووووووووووووي .. هب حالة هاي .. عيزت وانا ازاعق.."
بطي صد الصوب الثاني ولا عبر هزاع ..
هزاع : " والله محنه .. بطوي فديتك نش عسب خاطر بعض الناس .."
بطي من سمع بعض الناس قفز من مكانه : " منو بعد بعض الناس .. ماقلتلك اني ودرت هاي السوالف .. تستعبط حضرتك ؟؟.."
هزاع هب رايم يود من الضحك : " ههههههههه .. قمنا نغيض بعد ..ههههه .. والله وانصلح حالك يابطبوط ..هههه.."
بطي وهو يفلع هزاع بالموسده : " طب ثمك يالهرم .. تتحراني شرواتك بموت من الحيا إذا شفت بنيه .؟؟ انت أصلاً ولا تعرف شقايل تتعامل مع الجنس اللطيف .."
هزاع : " خلينا معاملةالجنس اللطيف حقك .. هههههه .. والله هب رايم اصدق البارحة يوم كنا مع حريز في المول شقايل رمت تيود عمرك عن هذيج الغزالة ؟؟ والله كانت غاوية ..هههه.."
بطي : " والله لو كانت داشه خاطري ..عادي لأطيحها بخزة من عيوني .. بس انا ودرت هالسوالف .. اوكيك.." .. ورد انسدح بطي مرة ثانية
هزاع : " ياولد الحلال .. اليوم الجمعة .. قم عسب تسبح ونسير الصلاة .. وخلاف بنسير بيتكم .."
بطي : " شعنة نسير بيتنا ؟؟.."
هزاع : " لاوالله . احلف انت بس!! .. نسيت ان اليوم الجمعة .. ولازم نتيمع في بيتكم وإلا بيتنا .. واليوم دوركم .."
بطي : " والله ناس فاضية .."
هزاع : " بطوي دخيلك قم عشان خاطري .. دخيييلك .."
وآخر شي قام بطي وراح يتسبح عسب يسيرون الصلاة .. لانهم خلاف كانوا بيسيرون بيت بوبطي ..
.
.
في بيت عبيد .. الجميع متيمعين لان العايلة الكريمة ظاريين على يمعة الجمعة ..
واليازية كانت في حجرتها وامها محتشرة عليها ..
ام بطي : " انتي اشو تسوين في حجرتج ؟؟.. شعنة ماتحدرين المطبخ وتعاونينا .. ماادري منو هذا الي بياخذ وحدة ماتحدر المطبخ ؟؟..الله يكون في عون اللي بياخذج .."
اليازية : " اماية الله يسامحج .. توني إلا مخلصة سبوحتية .. ومامداني حتى البس .. عقب شوية بيون قوم عمي سهيل وقوم خالو شادية .. وبعدين اماية اللي بياخذني المفروض يحمد ربه ويشكره .. و يصلي ركعتين شكر لربه كل يوم .."
ام بطي : " الله اكبرمن شرج .. والله ماقول غير الله يهديج .. يلاّ دخيلج استعيلي .. لان خالوتج شادية هي وعيالها تحت .."
اليازية : " احلفي ؟؟ .. "
ام بطي : " من متى تحيديني احلف ؟؟ .."
اليازية : " انزين اماية .. طرشي خلوف حجرتيه.."
ام بطي : " والله انج ماتخيلين .. اخاف إلا اطرش الريال وخلاف يحدرلنا وهو متروع من كشتج .."
اليازية : " أصلاً وده بشعر شروات شعريه .. وزين اماية ذكرتيني .. دخيلج خلي وحده من البشاكير توري الضو عسب ادخن شعريه .."
ام بطي : " والله انكم يابنات هالأيام انكن لوتيات .."
اليازية : " والله يوم الواحد يهتم بعمره تسمونه لوتي ؟؟.. وبعدين انا قلتلج لو تريدين مااهتم بشعريه واعابلبه .. عادي عندي بقصه وبحشه حش .. "
ام بطي : " قصورج تقصين شعرج بعد .. ماعندنا بنات يقصن شعورهن .."
اليازية : " هههه .. أصلاً مستحيل اقص شعريه .. عاد يوم وصل لين تحت ركبتيه اقوم واقصه ؟؟ والله بعدني مااستخفيت .."
ام بطي : " والله الرمسة ضايعة وياج . والله حتى نسيت العرب تحت يتريوني من الصبح .. لاتتحيرين دخيلج .."
اليازية : " ان شاالله اماية .."
طلعت ام بطي من عند اليازية وسارت عند عديلتها شادية .. ام بطي كانت تحب شادية مع انها ظرتها وعمرها ماكرهتا ..
ام بطي : " حياالله ام سيف .. والله زاتنا البركة .. وينج ماتقربين صوبنا ولاتحدرين ؟؟.."
شادية (ام سيف) تتكلم بلغتنا بس بلهجتها المصرية .. يعني تكسر الرمسة : " والله موجودين .. "
سيف : " اماية .. وين بطوي ؟؟.."
ام بطي :" بطي في بيت عمك سهيل .. ان شاالله بيون خلاف كلهم .."
سيف : " ليش هو كان بايت عندهم ؟؟.."
ام بطي : " هيه فديتك . اوووه زين ذكرتني .. خليفة فديتك قوم رح لاختك اليازية فوق .. تترياك هي .."
خليفة : " خلاص انشاالله اماية .. الحين بسيرلها .."
مريم : " انا بعد بيي معاك .."
خليفة : " لاتغدين لزقة عنزروت .. اماية عوشة قالت اليازية تريدك فوق .. ماقالت مريم يريدونج .."
ام بطي : " ماعليه .. خلها تروح معاك .."
خليفة : " لااماية .. في سالفة مهمة من بيني وبين اليازية .."
ام بطي تنغز بعيونها : " اشو هذا الموضوع المهم اللي ماتبونه مريوم تسمعه ؟؟ .. اكيد عن الحرمة .."
خليفو وهو قافط : " اممم .. اقول خلاص انا بسير عند اليازية .."
ام سيف : " مالوش داعي .. اكيد الموضوع عن عليا .."
ام بطي : " لاتحرجين الريال .. خلوه يحب على راحته .. عنبوه هاي هب غريبة .. إلا هي بنت عمه .."
راح خليفة حجرة اليازية وهو يباغم ويكلم عمره .. وقبل لايدق الباب فجت اليازية الباب ..
اليازية : " ههههه .. سبحان الله .. القلوب عند بعضها .. "
خليفة يكلم عمره بلغة مافهمت عليه اليازية ..
اليازية : " خلوف .. خلوووووف .."
خليفة : " هااااااا .. اسمعج .."
اليازية : " مبين ؟؟ من الصبح انا اكلمك وانت هب معاية .."
خليفة : " والله شو اقولج .."
اليازية : " تعال ادخل حجرتية وقولي كل اللي في خاطرك .."
خليفة : " ماشي وقت الحينه .. قوم عمي عند الباب .. يعني علاية الحينه بتي .."
اليازية : " انزين خلاص .. بلبس الشيلة وبحول تحت .."
خليفة : " اوكي .. خلاص انا بترياج تحت .."
وصلوا عايلة سهيل .. بطي كان مع هزاع وأحمد في سيارة وحدة ( عيال سهيل : هزاع – أحمد – ميثا- علاية ) .. والبنات كانو مع ابوهم في سيارة وحده .. واتيمعوا الكل وكانت اليمعة حلوة .. ويت حزة الغدا .. وحطوا الصماط في الصالة اللي تحت هب في حجرة الطعام .. لانهم كانوا يريدون يغيرون وكانوا يبون ياكلون عالأرض عسب يتذكرون ايام اول على قولتهم ..
بوبطي : " اخويه سهيل .. تعال ايلس حذالي .."
بو هزاع ( سهيل) : " والله اتذكرت ايام اول .. على ايام ابويه الله يرحمه .."
بوبطي : " والله بس ناقصتنها اليلسة اماية .."
ام بطي : " صدقك والله ..ان شاالله السبوع الياي بسير انا وبييبها من العين .."
بوهزاع : " ضحكتيني عوشة .. مابغيتي إلا اماية تطلع خارج حدود العين ؟؟.. أصلاً دومها تقول انا شروات السمجة اللي ماتطلع من الماي وإذا طلعت من العين بموت .. "
ميثا : " ابويه .. "
بوهزاع : " عونج ميثانه .."
ميثا : " عانك الرحمن .. ابويه بغيت اتخبرك .. يدوه غبيشة هب مريضة ؟؟.."
بوهزاع : " هيه اماية مريضة .."
ميثا : " انزين شورايك نسير المانيا ونوديها معانا هناك .. منها علاج ومنها كشته .."
أحمد : " صدقها ميثانه .. خلنا نسير المانيا هالسنة والله لاعت جبدنا من لندن .."
بوبطي : " الله يهديكم .. اماية لو انطبقت السما على الأرض مابطلع من العين .. والحينه تقولولها المانيا . والله لتاكلكم بقشوركم .."
بطي : " انزين خلاص .. انا مابسافر معاكم هالسنة .. ان شاالله بتم في البلاد .."
سيف : " ههههه .. تتغشمر انت ؟؟؟ بطوووي مايسافر ويقر في البلاد؟؟ .."
بطي : " هيه نعم .. مابسافر .. وان شاالله بأجرلي بيت في دبي في القيظ وبيلس في دبي .."
هزاع : " انا بيي معاك .."
بطي : " اكيد انت معايه . أصلا انت سكاني . انا مااتحرك من دونك .."
ام هزاع ( روضة) : " محد بيسير دبي .. انا اريدكم انتوا يالشباب في شغلة في القيظ .."
بطي : " لادخيلج عموه .. ادريبج في شو تريدينا .. تريدين تشغلينا في العزبة .. حالنا من حال البيادير .."
خليفة : " انا مابكون فاضي .. بكون مشغول هاييج الحزة .."
علاية : " واشو وراك ؟؟.."
خليفة وهو يخزلها بعيونه : " ورايه عرس .."
الكل ضحك على رمسة خليفة .. لانهم فهموا انه يطري علاية بهاي الرمسة .. ووحليها علاية ماتت من المستحا ..
اليازية : " انت اول انجح من الثانوية اللي انت مغرز فيها .. وخلاف ارمس عن العرس .."
خليفة : " ان شاالله بنجح وبرفع راس ابويه .. وبدخل اكاديمية الشرطة وبعرس بعد .."
بوبطي : " ظرينا على هاي الرمسة .. كل سنة وانت تقول بنجح .."
خليفة : " ابويه ليش تكسرون مياديفي .. هذا بدل ماتشجعوني وترفعون من معنوياتي ؟؟.."
أحمد : " الله يخليك ياراعي الشعور المرهف .."
كانت اليلسة حلوة والكل يسولف من صوب وتموا يسولفون الين العصر .. وخلاف المغرب كل حد راح بيته .. ومااظن حد منهم بينسى هذا اليوم ..
.

البارت5

مرت الأيام بسرعة وقربت أيام الامتحانات .. والخلق كلهم معتفسين .. والكل يدرس من صوب .. فالاخ خليفة شل يميع قشه وغدا شروات اللاجئين.. وسار بيت ابوه عند اليازية عسب يدرس معاها.. وكانت علاية اتييهم علشان تذاكر معاهم بس ماكانت تبات عندهم .. ومايحتاي اخبركم عن الأفلام الهندية اللي تستوي .. وكانت اليازية طفرانة لانها هب قادرة تذاكر وخلوف وعلاية يلوس على راسها ..
اليازية : " خلوووووووووووووف .. يوز عن البنيه .. انتو منو عزمك وقال لك تفضل بيتنا ؟؟ والله هب قادره اركز.."
خليفة : " اصلاً بيتنا وبيتكم واحد يالسبالة .. وبعدين احمدي ربج ان في حد معبرنج وياي يدرسج.."
اليازية رافعة حياتها : " ياسلااااام .. قصورك انت بعد يالرسيّب العود تدرسني ؟..."
خليفة : " يزوي احترمي عمرج .. إلا هي سنة وحدة رسبت فيها .. يوم كنت في اول ثانوي .. وكانت عندي ظروف .."
اليازية : " ههههه .. ياويل حالي على ظروفك .. ولو سمحت صحح معلوماتك .. انت رسبت سنتين .."
خليفة : " يعني لازم تذكريني بمأساتي؟؟ .."
اليازية : " خلوووف .. دخيلك طب ثمك واسكت .. والله ظلم ياناس .. والله مايصير ثلاثة يقعدون في نفس الحجرة ويذاكرون مع بعض .. والله ثانوية عامة هاي .. هب لعبة .. والله جان رسبت لاكفخك انت وحبيبتك اللي يالسه معانا .."
علاية وكالعادة غدا ويهها شروات الطماط : " يزوووووووووي .."
اليازية :" شو يزوي بعد ؟؟.."
خليفة : " اوووب .. اوب .. ههههههه ... الزوز لاتعيدين هاي الكلمة وإلا بتنحرنا علاية .."
صدق كانت مغيظة اليازية .. فقامت وشلت كتبها وطلعت عنهم وسارت تدرس في حديقة البيت ..
علاية : " زين جي الحينه ؟؟.. زعلتها .."
خليفة : "ههههه .. لازعلتها ولا شياته .."
علاية : " انزين انا بخليكم وبسير بيتنا لان صدقها اليازية .. مابنقدر نركز ونحن مع بعض .."
خليفة : افااااااا .. انا مااقدر اركز وانتي معايه ؟؟؟ .. والله اني يوم اشوفج احفظ الكتاب .. أي كتاب ؟؟ إلا المنهج بكبره احفظه واصمه صم .."
علاية : " هههه .. والله انك لوتي .."
خليفة : " افاااااااااا .. أول مرة اسمع وحدة تقول حق حبيبها انت لوتي ؟؟.."
علاية : " خليفة .. هب وقتها هالسوالف .. خليفة اريد اقولك شي .."
خليفة : " آمري الغالية .."
علاية : " مايآمر عليك عدو .. خليفة طلبتك .."
خليفة : " لوتريدين عيوني ماتغلى عليج .."
علاية : " تسلملي عيونك .. خليفة دخيلك ادرس وانجح علشاني هالسنة .."
خليفة :" والله دام انج طلبتي مني هالشي .. والله اني مااردج .. وصدقيني بنجح هاي السنة وبييب نسبة غاوية ان شاالله .. "
علاية : " ان شاالله .. خلاص عيل .. انا بسير البيت عسب تدرس انت .. وداعة الله الغالي .. الدريول يترياني برع.."
خليفة : " ومنو معاكم ؟؟.."
علاية : " لاتتروع .. البشكارة معانا في السيارة .."
خليفة : " اتحرى بعد .. يلا فديتج بوصلج لين السيارة .."
ووصل خلوف علاية ورد يذاكر من أول ويديد .. لانه مادرس شي من اول مايتهم علاية .. واليازية كانت فقيرة تدرس بس في الهواء الطلق على قولتهم .. يمكن المعلومات تثبت يوم الآدمي يدرس والهوى يضربه ؟؟
.
.
أحمد بن سهيل المحيربي اخو هزاع .. كان ربيع سيف بن عبيد المحيربي الروح بالروح .. وكانو اثنين في جسد واحد .. كانت طلعاتهم مع بعض .. ومن كثر مايحبون بعض كان كل واحد منهم يدافع عن الثاني ويساعده إذا كان محتاي .. واللي كان مقربنهم اكثر انهم في نفس العمر (20 سنه) ..
سيف : " الوووووووووووووووو .."
أحمد : " الووين .. اسمعك ياريال مايحتاي تزاعق .."
سيف : " وينك انت .؟؟ عيزت وانا اترياك .. واقف عند الباب جني حارس .."
أحمد : " هههههه .. ناطور كاشخ .. والله مطلوب هالحارس .."
سيف : " تستظرف دمك يالسخيف ؟؟ وينك ؟؟.."
أحمد : " عنبوه .. ماتشوف سيارتي اللي جداك ؟؟.."
سيف : " عجييييييييييييييييييييييييبه الرنج الرصاصية .."
أحمد : " يلاّ احدر السيارة .. بااااي.."
أحمد : " وداعة الله .."
وراح أحمد وحدر السيارة .. وأول ماحدر تخاشموا الشباب ..
أحمد : " حشا هب خشم عليك .. سلة سيف.."
سيف : " الله واكبر من عينك .. وبعدين لازم خشمي بيغدي سلة سيف لاني سيف .."
أحمد : " واااااايد مصدق عمرك .."
سيف : " ماخبرتني .. سيارة منو هاي ؟؟.."
أحمد : " سيارتيه اليديدة .."
سيف : " خل عنك .. قبل شهرين خذتلك نيسان من الوكالة .. يلا اعترف بسرعة .. سيارة منو ؟؟.."
أحمد : " سيارة اخويه هزاع .."
سيف : " اها .. يلاّ بالبركة عليه .. انزين عالعموم يلاّ نسير ميلس محمد الكعبي .."
أحمد : " أي محمد انت الثاني .. هزاع يتريانا هو وبطي .. كلنا بنسير رباعة بوظبي مول .."
سيف : " والله لأرويه الهرم بطبوط .. يقولك .. اليوم خلاني اوقع عنه في الدوام وهو في سابع نومة الحبيب.. وأنا اللي توهقت .."
أحمد : " شقايل اتوهقت ؟؟.."
سيف : " يقولك ياحمادة ياسيدي .. يوم كنت اوقع بدل بطوي ..الوالد كان ورايه وانا مانتبهت عليه ..وهزبني هزبه محترمة .."
أحمد : " ههههههه .. يزاك واقل من يزاك .. عسب تتأدب ماتوقع بدل حد .."
سيف : " ياريال والله تبت .. بس ابويه كان صدق مغيظ .. وكان متحلفله .."
أحمد : " ماادري متى بيوز بطبوط عن سواياه ؟؟.."
سيف : " والله ماادري .. بس اخبرك ترى بطبوط بدى ينصلح حاله .."
أحمد : " كيف ؟؟.."
سيف : " انا بقولك كيف .. يااخي ودر سوالف البنات .. و بدا يصلي الحينه ومايهد ولا صلاة إلا ويصليها .."
أحمد : " لا .. صدق والله ؟؟ الله يهدي الجميع .. والله لاهلكه اليوم في المول .. كل مابتخطف وحده بقوله رقمها .."
سيف : " لاتسويبه جي .. لانه قابل للانحراف بس يحتاي من يوجهه .."
أحمد : " هههههه .."
ووصلو يميع المول وسلموا على بعض .. وساروا يتمشون رباعه وكان حريز بعد مواعدنهم بس اتحير شويه عليهم .. وخلاف وصل حريز .. وسلمو عليه الربع وكملوا حواطتهم ..
و حريز ماشاالله عليه .. كان محبوب للكل .. لانه كان انسان طيب والطيبة اللي كانت في قلبه كانت طيبة هب طبيعية .. كان يخلي الواحد يحبه غصبن عنه ويدخل في قلبه حتى قبل لايعرفه .. لان ملامح ويهه هادية وحلوة وطفولية .. وسمرته المايلة للون الحنطاوي كانت تجذب الكل ..
كانت اليمعه حلوة .. الكل يضحك ويتغشمر .. وماكان في مجال للحزن في هاي اللحظة ..
حيرز : " هههه .. تحيد يوم كنت ساكن حذالكم .. قبل لانتحول العين .. شو سوينا ببشكارتكم الاوليه ؟؟.."
بطي : " ههههه .. هيه احيد.."
هزاع : " شو السالفة ؟؟ تضحكون بروحكم ..ضحكونا معاكم.."
بطي : " هههه .. هاك اليوم دخلنا البيت انا مع حريز .. وحصلنا عباة اماية وبرقعها في الصالة على الكنبة .. ويقولك قمنا وشلينا العدة .. وطلعنا خاري .. وخلاف دخلت البيت وحريز لبس العباة والبرقع بس مادخل البيت معايه .. واقولك رحت وزقرت البشكارة وقلتلها في حد يدق الباب .. والفقيرة راحت تفج الباب .. وفقيرة صدقت ان حريز وحدة من الحريم اللي يحدرن عند اماية .. ووحليلها يابتله فوالة وقهوة وماخلت شي .. وخلاف راحت وزقرت اماية .. واماية كانت مغيظة لانها كانت راقدة والبشكارة واعتها من رقادها وخربت عليها رقدتها .. ويوم يت تتخاشم مع الحرمة وتسلم عليها .. هههههه .. مااروم اكمل..هههه .. والله مااقدر ارمس .."
هزاع : " يلاّ عن المصاخة .. كمّل السالفة .."
حريز : " هههههه .. انا بكمل السالفه عنه .. ويوم يت تحبني العيوز .. عاد استحيت ورديت قبل لاتحبني .. بس يوم رديت استغربت العيوز .. فقمت ورفعت البرقع .. صدق ضربتها الغبنة هاييج الحزة العيوز .. والله ماريت ويهها شقايل غدا .."
أحمد : " هههههه .. وماسوتبكم شي العيوز ؟؟.."
حريز : " والله يلست تربع ورانا انا وبطوي في الحوي وفي يدها شوزن .. كانت تريد تثوربنا.."
سيف : " هههههه .. اسميها اماية هب هينة.."
وخطفت بنت كاشخة حذالهم والكل صد عليها .. لانها كانت صابغة ويهها بالميك آب .. بس الميك آب كان فظيع .. يعني كانت متمكيجة جنها رايحه عرس هب مول .. والواحد غصبن عنه كان يصد ويشوفها ..
حريز : " هههههه .. شوي شوي .. عن تاكل البنيه بعينك ..."
بطي : " طب ثمك حروز .. ويوز عني .. والله اني مااكلم بنات الحينه .."
أحمد : " خل عنك ياريال .. من ساعة تلفونك صاح وقفزت ورحت يلست بعيد عنا .. اكيد كانت وحدة من غراشيبك .. هههههه.."
بطي : " الرضيعة كانت تريدني في حاية .."
سيف : " ههههه .. الرضيعة .. متأكد ؟؟.."
بطي : " سيفو والله لافلعك بنعلتيه .. الزوز كانت تريدني .."
أحمد : " انزين .. لوصدق كانت رضيعتك هي اللي كانت مسويه من ساعة .. ليش ويهك اخضر واحمر واصفر وغدا جنه اشاير ؟؟؟؟ههههه.."
بطي : " والله والرفجة اني من اربع شهور ماكلمت أي بنت .. والحمدلله ربي هداني .. بس انتو إلا هب طايعين تصدقوني .."
أحمد يريد ينرفز بطوي باي طريقة : " لا والله .. حرام ..بطاي مايكلم بنات .."
سيف : " أصلاً مايقدر يعيش بليا مزايين .. هن ملح حياته.."
بطي وهو صدق مفول : " أصلاً انا الغلطان اللي يالس معاكم .."
وشل بطي بعمره ونزل عنهم .. وخلاهم لحالهم
هزاع وهو مغيظ : " زين جي الحينه .. زعلتوا الريال.."
حريز : " الله يهديكم سيف وأحمد .. يعني لازم تقرضونه ؟؟ الريال قال لكم انه مايكلم بنات يعني لازم اتجذبونه ؟؟.."
هزاع : " بس بطي ماكان يجذب .. هوصدق مايكلم بنات.."
سيف : " بس كنا نمزح معاه .. مااتوقعنا انه يزعل ؟؟.."
هزاع والود وده يقوم ويكفخ احمد وسيف : " بصراحة غشمرتكم ثقيلة .. أحمد ناولني سويج سيارتية .. اخاف يسير ويسوي شي بعمره .. انتو ماتعرفون بطي يوم يغيظ اشو يسوي .. عادي يدعمله وإلا يصقعله أي سيارة تخطف جداه .."
أحمد : " انزين انا ماعندي سيارة اردبها البيت .."
هزاع : " والله مشكلتك.. شعنه تلعوزون ربيعي ؟؟ الحينه اتحمل مابييكم انت وسيف .. والله لاخليكم تردون البيت بتكسي اليوم .. والله لالتهكم اليوم .. وداعة الله.."
وراح عنهم هزاع وهو مغيظ ..
حريز : " ههههه .. خربتوا اليلسة علينا .."
سيف : " الحينه شقايل بنرد البيت ؟؟؟.."
حريز : " افا عليكم .. انا اللي بوصلكم البيت .. بس لازم تعطوني حلاوتيه خلاف .."
أحمد : " بنرد بتاكسي ولا مذلتك .."
حريز : " هههههه .. اتغشمر معاكم .. والله محد يوصلكم البيت غيري اليوم .. وحلفت يمين بعد .."
سيف : " انزين .. بس انا بعزمكم على حسابي على عشا محترم .. وخلاف بنرد البيت .."
حريز + أحمد : اوكي

بطي كان صدق مغيظ .. لدرجة انه ماشاف أي حد جداه ونزل .. بس وهو نازل كانت في وحده شروات حالة بطوي .. شكلها هي الثانية كانت مغيظة بعد .. وكانت شاله يميع الاغراض في يدها .. وقاموا وصقعوا بعض .. وكل الاغراض اللي كانت في يد البنت طاحن وتنثرن عالارض .. وطاحت غشوة البنيه .. بس البنت ماكانت حلوة .. البنت كانت تحفة من الحلاة .. كانت تقول حق القمر قم وانا ايلس مكانك .. كانت ماشاالله عليها ملاك .. وكان ويهها ابيض بياض الثلج بس كان ويهها محمر لان شكلها كانت مغيظة .. وعيونها كانت عودة الله يحفظهن لها وكان لونهن عسليات.. وحياتها كانت مقرنة جنها حافتنهن بس ماكانت حافتنهن .. وقف بطي يطالع البنيه وهو امبهت .. جنه شايف شي غريب اول مرة يشوفه في حياته .. واتيبس بطي في مكانه ولا تحرك .. وتم على هالحالة ثواني الين مارد في حاسيته
بطي : " اااه .. السموحة اختيه .. والله ماريتج.."
البنت ردت على بطي بصوتها اللي يخبل : " بالحل الشيخ .. حتى انا كنت مستعيله وماريتك .."
بطي وخى ويلس يلقط الاكياس والخرايط مع البنت ويلست اتيمع اغراضهامع بطي .. كانوا يتبادلون النظرات .. جنهم يعرفون بعض من سنين طويله .. وبالغلط يد بطي يت على يد البنت .. فقفطت البنت واحترق ويهها ..
بطي : " السموحة الشيخة .. ماكنت اقصد .."
والبنت رفعت غشوتها و شلت الخرايط اللي في يد بطي وماردت عليه .. وراحت بسرعة وركبت السيارة اللي كانت واقفه جداهم .. محد كان في السيارة غير الدريول .. واختفت الغزالة شروات السراب .. وبطي تم واقف مكانه مانطق باي كلمه .. بس يوم صد تحت شاف بوك البنت طايح عالارض .. قام بطي يزاعق عل وعسى يوقف سيارتهم .. بس ماشي فايده .. خذ بطي البوك وركب سيارته بس مافكر حتى يفتح البوك ويشوف شوفيه لانه كان بعده متأثر بالصدمة اللي استوتبه .. وسار بطي البيت بس ماكان منتبه كيف وصل البيت .. كان صدق امبهت ..
ودخل بطي البيت وكانت اليازية في الصالة تدرس .. وكانت ترمسه بس هو ماكان منتبه عليها وراح حجرته فوق وقفل الباب على عمره وكان البوك في يده ..
اليازية تكلم عمرها : " اشهد ان كل اللي في البيت اتخبلوا .."
.
.
بطي كان في عالم ثاني .. كان واقف جدا المنظرة ويكلم عمره ..
بطي : " صدق اللي شفته وإلا كنت اتحلم .. معقولة في انسانة في الدنيا بهاي الرقة والحلاة كلها ؟؟؟؟؟.."
وانسدح بطي على الشبرية وكان يغني بصوته الغاوي : " ياحياتي كم بشكيلك عن تعب روحي من اسبابك .. خلني يالغالي دخيلك سالمن من ضرب نشابك .. ريح قلبي من تعليلك دارني شروات مدرالك .. ياحبيبي مااقدر اجفيلك لان وسط القلب منزالك .. آآآآآآآآه ..والله ماادري شبلايه ..عمري ماحسيت بهاي النغزة اللي في قلبي .. معقولة احب انا ؟؟؟؟؟؟.."

وفي نفس الليلة كان خليفة بن عبيد هب قادر يرقد .. شكلهم العرب كلهم هب قادرين يرقدون .. وسار صوب حجرة امايته لانه كان حاس بشي بصدره .. كان يحس انه قلبه يقوله امه تريدك .. ودق باب حجرة امايته وحدر الحجرة وكانت واعية ومنسدحة عالشبرية.. واشرتله بايدها عسب يقرب ويرقد حذالها .. وخش خلوف عمره تحت اللحاف حذال امايته .. وحبها على خدها ..
خليفة : " اماية .. ماادري شعنة .. حسيت انج تريديني .."
ام خليفة وهي تكسر في الرمسة : " فديتك .. تصدق اني كنت عاوزاك ؟؟ .."
خليفة : " هههه .. حلوة هاي عاوزاك .. اماية خلصتي اكل البلاد وبعدج هب قادرة ترمسين شرواتنا .."
ام خليفة : " والله انك ماتخيل .. انزين انا شو اسوي يوم انا مصرية .."
خليفة : " افاااا .. والله مصر في عينا .. اصلاً مصر ام الدنيا .."
ام خليفة : " غصبن عنك .."
خليفة : " اماية .. ان شاالله يوم بيقبلوني في كلية الشرطة وبلبس الدريس .. ثاني يوم تسيرين وتخطبيلي علاية .."
ام خليفة : " من عيوني .. كم خليفة عندنا ؟؟.."
خليفة : " فديت عيوزتيه .. ليتهم يقبلوني في الكلية الحينه عسب تيوزوني علاية .."
ام خليفة وهي تتغشمر : " شوتريد في علاية .. انا عندي وحدة من مصر.."
خليفة : " الله لايبلينا بوحدة من مصر .. حشا هب لسان عليهن المصاروة .."
ام خليفة والعرق نطر : " نعم .. نعم .. نعم .. اولت ايه ؟؟؟ "
خليفة : " ياحافظ .. العرق نطر .. ابويه اسمحولنا جان إلا غلطنا .. "
وتم خليفة يسولف مع امايته لين مارقد .. وورقدت هي معاه بس رقدة ام خليفة واللي هي ام سيف ( شادية ) كانت رقدة ابدية .. خذ ربنا امانته وخذ روح ام خليفة .. وخليفة كان راقد في حظن امايته .. وماوعى إلا على اذان الفير حق الصلاة .. و يوم نش حب امايته على خدها بس حس بخدود امه باردة برود الثلج .. تروع خليفة بس يوّد اعصابه .. وحاول انه يواعي امايته.. وكان يلعوزها في البداية : " شادية .. يامصر ياام الدنيا .."
خليفة تيبس في مكانه ورد يحرك امايته : " اماية .. اماية .. نشي صلي الفير .."
بس ماردت عليه امايته .. يلس خليفة يكلم امايته جنها هي واعية وتسمعه .. وتم على هذي الحالة لين مااتأكد ان امايته توفت .. وكان يالس على الارض واموخي راسه على صدر امايته وكان يصيح من خاطره ومن كثر الصياح هب قادر يرمس : " اماية دخيلج ردي عليه .. اماااااااااااااية .. اماية شعنة خليتيني بروحي .. انتي قلتيلي بتخطبيلي علاية .. خلاص مااريدها باخذ وحدة مصرية بس دخيلج ردي عليه .. اماية خلاص مابأذيج انصاص الليالي .. والله بسمع رمستج ومابطفر يزوي بس دخيلج انطقي " ويلس يناهي من قلبه .. خليفة كان يموت في امايته وعمره ماتوقع انه يفقدها بالساهل ..
.
.
.
العصر ..الساعة 5:30
الكل كان في حالة من الحزن في العزا .. وخصة خليفة اللي مانطق بنص كلمة من توفت امايته .. الكل حاول معاه لكن بدون فايده .. كان يرد عليهم بهيه او لا .. وماكان ياكل ..
الكل كان ياي يعزي .. وخلصوا الرياييل وطلعوا .. سيف كان متمالك اعصابه صح انه صاح امايته بس بعد كان ايمانه قوي بقدر وحكمة ربه .. ونفس الحالة بوبطي كان ايمانه قوي بربه بس كان صدق يبين عليه انه تعبان ..
سيف وهويكلم ابوه : " ابويه وين خليفة ؟؟.. "
بوبطي : " خليفة من ساعة طلع من الميلس .. ماادريبه وينه ؟؟ "
سيف : " اخاف إلا يسوي شي بعمره .."
بوبطي : " إلا اقول اليازية وعوشة داخل البيت ؟؟ "
سيف : " هيه .. عيل اترخص منك .. بسير البيت بشوف خليفة وينه "
بوبطي وهو مستهم : " مرخوص فديتك .."
.
.
.
دخل سيف البيت وشاف اخته مريم لاويه على اليازية وتصيح .. واليازية كانت تحاول تهديها .. ومارامت عليها وصاحت معاها .. وقف سيف مكانه ونزلت دموعه على خدوده من غير صوت .. كان يصيح بحرقة .. كان وده يرد الساعات بس عسب يشوف امايته ويشوف اخوه واخته مرتاحين .. حس سيف في هاي اللحظة بالمسؤولية .. ومسح دموعه وتقرب من خواته ولوى عليهن هن الهنتين ..
سيف : " اذكروا الله .. اماية كانت امانة وربنا خذ امانته .."
اليازية وهي تمسح دموعها : " مريومة فديتج بسج .. ذبحتي عمرج من الصياح .."
مريم وهي تناهي : " منو بيسحيني الصبح ومنو بيلبسني عسب اسير المدرسة؟؟ .. منو بيرقد معايه الفليل اذا كنت متروعة؟؟ .. منو بيلعب معايه ؟؟ منو ؟؟ منو ؟؟ "
سيف ماقدر يشوف اخته وهي تناهي .. فطلع عنهم وسار حجرة خليفة عسب يتطمن عليه ..
اليازية : " حبيبي مريوم .. تدرين انج تعذبين امايتج بصياحج .. "
مريم تكمل صياحها وهي هب مهتمة ..
اليازية : " تهون عليج امايتج تخلينها تتعذب بسبتج ؟؟.."
مريم وهي تفتر صوب اليازية : " صدق تتعذب والسبة انا ؟؟ "
اليازية : " هيه فديتج .. امايتج ماتحب تشوف دموعج لانهن غالية عليها .. صدقيني امايتج ماتريد تشوفج إلا وانتي مستانسة .. وإذا تريدينها ماتتعذب بس ترحمي عليها .. وان شاالله تكون مرتاحة .."
مريم وهي تلوي على اختها : " اليازية انا اريد ايي بيتكم .. ومابتم بروحي هني .. "
اليازية : " فالج طيب .. خلاص انتي بتيين بيتنا ..لا وبخليهم يحطولج شبرية معايه في الحجرة .. شورايج .."
مريم : " فديت روحج .."
وتمت مريم على هذي الحالة لين مارقدت على ريول اليازية .. وام بطي كانت يالسه مع الحريم .. اللي ين واللي سارن .. واترخصت ام بطي من الحريم عسب تشوف بناتها الهنتين مريم واليازية ..
ام بطي وتوها حادرة الصالة : " فديت روحها رقدت .."
اليازية : " هيه .. والله انها غمظتني .. من صباح الله وهي تصيح .."
ام بطي وتمسح دموعها : " الله يكون في عونهم .."
اليازية : " اماية طلبتج .. ولاترديني .. واريد هالشي اليوم .."
ام بطي : " آمري الغالية .."
اليازية : " اريد شبرية .."
ام بطي : " والله اني هب متفيجة حق سخافاتج .. عنبوه ماتخيلين .. الناس في عزا وانتي إلا طايحتلنا شبرية ومااردي شو .."
اليازية : " اماية مااريد الشبرية حقي .."
ام بطي : " لا حقج ولا لغيرج .. طبي ثمج واسكتي .."
اليازية : " اماية .. مريامي قبل لاترقد قالتلي انها تريد تسكن معانا في بيتنا .. وانا اريد الشبرية حقها .."
ام بطي : " ياحيبها بنتي الثانية .. ان ماسدها البيت بنشلها في عيوننا .. سيري اتصلي في ابوج وخليه يطرش عبدالملك عسب يوصيه على الشبرية .."
اليازية : " ان شاالله .."
.
.

البارت6

وفي حجرة خليفة وتوه سيف حادر الحجرة وخليفة كان يالس على الارض .. وكان يالس شروات اليهال .. كان ميّمع ريوله بايده ومنزل راسه ..
وماانتبه خليفة على سيف اللي يلس حذاله ..
سيف : " خلوف .. "
خليفة وتوه انتبه على سيف وافتر صوبه ورد على حالته ..
سيف وبدى يصيح لانه طفر من كثر مايوّد دموعه : " خلوف كلنا نحب اماية .. بس دخيلك لاتسوي في عمرك جي .. خلوف جان تحب اماية دخيلك رد عليّه وسير اشرب لك شي على الاقل .."
خليفة يوم حس ان صوت اخوه اتغير ماهان عليه ولوى عليه ويلسوا يصيحون .. ودخل عليهم بطي وكان بطي منزل السفرة وكان لاف صوب من السفرة على ورى والصوب الثاني على تحت وكان تعبان وشكله منتهي من الدنيا ..
وتقرب بطي منهم ويلس على الارض مجابلنهم ..
بطي : " لاحول ولاقوة إلا بالله .."
ويحاول بطي انه يدز سيف ويفجهم عن بعض ..
بطي : " اذكروا الله .. ترحموا عليها ولاتصيحونها .."
خليفة واخيراً نطق بكلمة : " الله يرحمج ويغمد روحج الجنة ان شاالله .."
سيف + بطي : " آمين .."
بطي : " قوموا تعالوا معانا .."
سيف : " وين .. "
بطي : " عند الديايه .. يعني وين بنسير هاي الحزة ؟؟ إلا بنسير بيتنا .. خلاص من اليوم ورايح انتوا بتسكنون معانا .. ومحد يقوللي لا .. وانا حلفت يمين عليكم .. والله اتون بيتنا .."
سيف : " وبيتنا نخليه لمنو ؟؟ "
بطي : " خلاف بنتفاهم على هالسالفة .. الحينه قوموا خذولكم كمن كندورة تحتايونها اليوم وباجر بنطرش البشاكير يشلون يميع الاغراض .. "
خليفة مارد عليهم لانه ماكان راضي انه يسير معاهم .. بس ماحاول انه يبين لهم انه هب راضي لانه احترم رمسة اخوه هزاع وماحاول انه يردله كلمه .. خصة ان خليفة قرر انه يتغير في كل شي لانه وعد امه في آخر ليلة لها انه يحترم الكل وانه يغدي ريال الكل يفخر به ..
.
.
.
سيف وخليفة ومريم .. سكنوا في بيتهم الثاني .. صح ان الجو تغير عليهم بس ام بطي كانت تحاول كثر ماتقدر انها تعوضهم بحنان امهم .. وكانت تحسسهم انها صدق امايتهم اللي هم محتايينها ..

كان واعي من الرقاد غبشة .. وهب قادر يقرر شويريد .. كان مصدع من قلة الرقاد وزود التفكيربامايته الله يرحمها .. نش من مكانه وفتح الستا رة .. وحس ان الشمس تغلل في خلايا جسمه وحس ان اليوم يوم يديد فيه الامل وبيحاول انه يجدد كل حياته ويبدا حياته من اول يديد ..
فتح باب البلكونة .. وحدر البلكونة .. وهبت عليه نسمة باردة ارتاح منها ..
" يالله .. ليتني ياامايه اقدر اشوفج لو مرة وحدة .. "
استغفر ربه خليفة .. ودخل حجرته وسار يتسبح .. وحاول انه يبدا يومه بأمل وينسى كل همومه .. وتوكل على ربه اللي ماينسى عباده .. وكان يقول في خاطره ان ربنا يمهل ولا يهمل .. وان شاالله ربنا بيهون عليه همومه.. وان هذا قدر الله ومكتوب على امايته الموت .. والموت مكتوب على كل انسان ..
.
.
.
خلص خليفة سبوحته .. وحس براحة كبيرة عقب السبوحة ..
فتح خليفة كبته .. وطلعله كندورة .. وكانت الكندورة بيجية عجيبة .. ولبس الكندورة وتسفربسفرة حمرا .. كان شكله يخبل .. رغم الهالات السودة اللي تحت عينه من قلة الرقاد .. وخصة من عقب وفاة امايته ماكان يرقد براحة .. وكان طول الليل يتجلب ومايقدر يرقد ..
تعطر خليفة من العطور اللي موجودة على تسريحته وحوّل تحت عسب يطلع من البيت ..
ويوم حدر الصالة كانت ام بطي يالسة بروحها ..
خليفة يحب راس ام بطي : " صبحج الله بالخير امايه .."
ام بطي : " صبحك الله بالخير والسرور ..شحالك ولديه ؟؟ ان شاالله مرتاح في بيتك اليديد ؟؟ .. "
خليفة ييلس حذال ام بطي : " الحمدلله مرتاح .. ماشاالله عليكم ماقصرتوا معايه .. "
ام بطي : " خل عنك هاي الرمسة .. تراك ولديه وعمري مابقصر عليك .. وهذا واجبي .. "
خليفة : " يعلني ماخلى منج الغالية .. "
ام بطي : " ها فديتك .. اليوم اجازة .. شو موعنك اليوم من غبشة ؟؟ .. "
خليفة : " ورايه شغل امايه .. "
ام بطي وهي مستغربة : " اي شغل هذا اللي في عز الاجازة ؟؟ .. "
خليفة : " امايه تراني خلصت الثانوية الحمدلله .. وان شاالله الحينه ببدا اعتمد على عمري وبرفع راس ابويه ان شاالله ( اتغيرت ملامح ويهه ) .. بس نسبتيه ماتساعد.. "
ام بطي : " وايه فديتك .. إلا هي نسبة لاتييب ولاتودي .. "
خليفة : " لا امايه .. النسبة وايد مهمة .. يعني هي اللي تأهلني للقبول .. وإذا كانت نسبتيه ماتسوى اكيد مابيعبروني .. "
ام بطي وتوها تفهم السالفة : " لاتحاتي فديتك .. انت حطلي اوراقك وانا بخلي ابوك يكلم عرب يدخلونك وين ماتريد .."
خليفة : " لالالا .. "
ام بطي : " شعنة غناتي ؟؟ "
خليفة وهو مرتبك : " امايه انا استحي من ابويه لاني من كمن سنه وانا ارسب .. ويوم نجحت يبت نسبه ماتسوى .. وبعدين انا اريد اعتمد على نفسي .. "
ام بطي تقبض خليفة من ايده : " خليفة .. نحن اهلك ومهما استوى وصار لازم نعاونك .. وصدقني ابوك مستانس عليك .. وعمره مافكر في نسبتك .. ودومه يقولي ولديه خليفة رفع راسي ونجح .. "
خليفة حس براحة من رمسة ام بطي .. وتنهد وسكت ..
ام بطي وهي تلوي على خليفة : " وايه .. فديت هالسمحه .. والله انك غاوي شروات يزوي اختك .. ربي يحفظك فديتك .. وتوكل على ربك .. وانا دوم بوقف معاك .. "
خليفة وهو مستانس : " امايه .. صدق انتوا مستانسين مني ؟؟ "
ام بطي وهي تقرص خليفة على خده : " والله ياخليفة حتى لو مانجحت تراك بترفع راسنا .. وانت ريال ومايعيبك شي .. "
خليفة وهو يحاول انه مايفج من حضن امايته : " امايه والله اني احبج .. والله العالم انج بحسبة امايه واكثر .."
ام بطي وهي تفج خليفة : " ربي يجبر بخاطرك ولديه .. والله اني كنت متروعة انك ماتحبني .. صح اني هب امايتك .. بس ربي يشهد عليّه اني حاسبتنك واحد من عيالي الستة .."
خليفة وهو يحب ام بطي على خدها : " يالله ياامايه .. عنبوه انا رابي في بيتكم وماكل من اكلكم .. وكل هذا بعدج تشكين في حبي ؟؟ افاااااا .. "
ام بطي : " حسبي الله على بليسك ياخلوف .. لاتقول بيتكم .. ترى هذا بيتك وبيت اخوانك .. وبعدين عمري ماشكيت في حبك لي .. بس يوم ... ( بلعت ام بطي ريجها وكملت رمستها ) بس من توفت المرحومة امايتك وانت ماتعبرني .. جني عدوتك هب امايتك الثانية ؟؟ .. "
خليفة حس بنغزة في قلبه : " اسمحيلي امايه ( وتقرب من ام بطي وحبها على راسها ) والله اني كنت مضيج .. وماكلمت حد هذيج الايام .. حتى سيفو مغيظ عليّه .. بس صدقيني عمرج مابترخصين في قلبي الغالية .. وشروات ماقلتي انا ولدج وانتي امايتيه .. وعمرها الام مازعلت على ولدها .."
ام بطي انمزرن عيونها دموع وماقدرت ترمس .. وحست ان العبرة خانقتنها ..
خليفة : " افاااا .. ام بطي تصيح والسبة هذا السبال خلووف ( ويأشر على عمره ) .."
ام بطي وهي مغيظة : " محد سبال غير العدو .. ولاتقول عن ولديه سبال .. ترى ولديه غاوي و شيخك و شيخ اهلك كلهم .. "
خليفة وهو يضحك : " يخسي خاس قدره الخايس يوم انه بييب راسي في الحلاة .. "
ام بطي : " هب هباك الله .. ولديه يطيّح البنات من حلاته .. ( تحمست ام بطي وخذت السالفة جد ) انت ماريت ثمه الصغيراللي جنه حبة يوز .. وإلا عيونه اللي من كبرهن تقول عين بقر .. وإلا خشمه اللي جنه حد سيف من طوله .. كل شي صوب وبياضه صوب .. جنه قطنة ماشاالله عليه.. "
خليفة ناقع من الضحك : " امايه .. هذا اللي ترمسين عنه وتتمدحين فيه من الصبح .. هب جنه انا ؟؟ .. "
ام بطي توها انتبهت : " ها .. "
خليفة وهب قادر يوّد عمره : " ههههه .. منو هذا ؟؟ .."
ام بطي : " هذا الشيخ خليفة المحيربي .. "
خليفة : " حشا هب حلاه فيه ؟؟ .. "
ام بطي : " قول ماشالله وصل عالنبي .. ترى مايحسد المال إلا صاحبه .. "
خليفة : " ماشاالله عليّه .. الللهم صلي وسلم على النبي من عيون الحسّاد .. "
ام بطي : " فديتك .. زهب اوراقك وحطها عندي دامك مابتكلم ابوك انا بكلمه .. وفالك طيب .. "
خليفة وهو متشقق : " فالج مايخيب .. بس لاتنسين انا اريد كلية الشرطة .."
ام بطي : " عنبوه انا انسى الكلية اللي انت تريد تدخلها ؟؟ .."
خليفة : " تسلمين فديتج .. "
ودخلت عليهم شمامي اللي كانت توها واعية من الرقاد وشعرها واقف ..
شما : " امايه .. وينج ؟؟ .. "
ام بطي : " تعالي غناتي انا هني .. "
خليفة : " ههههه .. شمامي تروع كشتج .."
شما بدت تصيح ..
ام بطي : " الله يسامحك ياخليفة .. توها واعيه من الرقاد ومافينا على حشرتها وويع الراس .."
خليفة قام وشل شمامي .. ورد مرة ثانية ويلس حذال امايته.. وحط شمامي على ريوله ..
خليفة يلعب بشعر شمامي : " شمامي شعرج غاوي .. بس يوم تنشين من الرقاد ماادري شو يستويبه .. شكلج تشوفين افلام رعب بالليل .. "
شما : " امييييي .. شوفي خوخه.."
ام بطي : " ههههه .. يالخوخ يوز عنها .. "
خليفة : " شمامي قولي خليفة .. "
شما : " خوخه .. "
خليفة وهو يلوي على شمامي : " والله انج عسل .. "
شمامي تحاول تفج عن خليفة : " ماليدك .. "
ام بطي : " شمامي تعالي .. بسير اسبحج وااكلج .. "
شلت ام بطي شمامي وسارت صوب حجرتها .. بس ردت مرة ثانية ..
ام بطي : " غناتي .."
خليفة : " عونج امايه .. "
ام بطي : " عانك الله .. فديتك وصلني بيت عمك سهيل .. الدريول مسير صوب العزبة ومحد بيوصلني عند حرمة عمك .."
خليفة وهو مبهت : " ها .. "
ام بطي : " بسم الله عليك .. شبلاك ؟؟ قلتلك بتوصلني بيت عمك وإلا لا .. "
خليفة : " وينه عبدالملك ؟؟ .. "
ام بطي : " لحوووول .. قلتلك ساير العزبة .. "
خليفة : " ................ "
ام بطي : " شكلي ييت عالعوق .. "
خليفة : " ها .. اي عوق .. امايه سبحي شمو واكليها وانا بوديج .. "
ام بطي : " حشا كل هذا مستحى ؟؟!! .. هذا ونحنا بس يبنا طاري بيتهم وويهك غدى طماطه .. عيل لو يبنا طاريها شو بيغدي ويهك ؟؟ .."
خليفة والغبنة ظاربتنه : " امايه انا اترياج في السيارة .. "
وطلع خليفة وسار ركب سيارته عسب يتريا امايته ..
خليفة يكلم عمره وهو في السيارة : " علاية .. يالله امايه يت عالعوق .. ماادري كيف كنت ناسنج هاي الفترة كلها .. والله ماانلام .. اللي استوابي هب هين ..ليتج بس تعذريني .. ليتج مانسيتيني.. "
يلس خليفة يكلم عمره الين ماتبطل باب السيارة عليه ..
ام بطي وتوها حادره السيارة مع شمامي : " بسم الله .. توكلنا على الله .."
خليفة : " خلصتي الغالية ؟؟ .. "
ام بطي : " هيه فديتك .. "
خليفة : " امايه ماقلتيلي شورايج في سيارتيه ؟؟ ابويه عطاني السيارة هدية يوم نجحت .. "
شمامي رازة ويهها : " مث حلوة .."
ام بطي وهي تضحك : " ماشاالله غاوية .. بس فديتك اتحمل على عمرك .. وهالله الله في السواقة .. "
خليفة : " لاتوصين حريص .."
ام بطي : " يلاّ تحرك فديتك .. "
وطلعوا من البيت ..
سيف وخليفة ومريم .. تحولوا بيتهم الثاني .. صح ان الجو تغير عليهم .. بس الكل كانوا يحاولون يسعدونهم .. بطي حاول انه يخفف طلعاته وييلس مع اخوانه في البيت عسب مايحسون بالغربة .. اما اليازية فكانت الصدر الحنون اللي الكل يلجأ لها ,, خصة مريم اللي كانت مستانسة لانها ترقد مع اليازية في نفس الحجرة .. بس سيف وخليفة زهبولهم حجرفوق قريبة من حجرة اليازية وبطي كانت فاضية.. وكل واحد صار له حجرة يديده ..

وصل خليفة بيت عمه وكل ماقرب من بيتهم كانت دقات قلبه تزيد ..
وحدرت ام بطي وشمامي من السيارة ..
ام بطي : " يلاّ احدر .. شوتتريا ؟؟ .."
خليفة : " انا بسير البيت .. "
ام بطي : " يالله بالستر .. هذا بيت عمك هب بيت غريب .. "
خليفة : " امايه دخيلج مااريد احدر.."
ام بطي : " شعنه ؟؟ .. "
خليفة وهو منزل راسه : " امايه .. يوم توفت المرحومة تواقعت مع علاية .. "
ام بطي : " ياحافظ .. ليش ؟؟ .. "
خليفة وهو مغيظ : " كانت يايه تعزي وانا ... "
ام بطي : " وانت شو ؟؟ .. "
خليفة : " هزبتها ورغتها من حجرتيه .. "
ام بطي : " هههه .. علاية ماتاخذ على خاطرها من حد وصدقني هي عاذرتنك .. وتعرف انك ماكنت في حاسيتك هذيج الحزة .. "
خليفة : " هزرج ؟؟ .. "
ام بطي : " هذي علاية شيخة الحريم ماتزعل من اهلها .. يلاّ فديتك احدر .. "
خليفة وهو يبند السيارة : " ان شاالله .. بس سويلي درب الغالية .. "
ام بطي : " ان شاالله .. "
ودخلوا كلهم بيت سهيل .. وخليفة شل شمامي وماخلاها تمشي وهي كانت متشققة ..
شمامي : " خوخه احبك .."
خليفة : " يالله يالمصلحة .. "
ام بطي : " اتريا انت هني .. بسويلك درب وبرد.."
حدرت ام بطي .. وشافت ام هزاع يالسه تشوف التلفزيون ..
ام بطي : " السلام عليج روضة .. "
ام هزاع وهي توايه ام بطي : " وعليج السلام والرحمة .. حياالله عوشة .. استريحي الغالية .. "
يلست ام بطي مع ام هزاع .. ويلسن يسولفن ..
وحدرت عليهم علاية وهن يسولفن ..
ام بطي توايه علاية : " مرحبا .. مرحبا بحرمة ولديه .. شحالج الغالية بنت الغالي ؟؟ "
علاية ويهها لابج : " يسرج الحال طاب حالج .. "
ام بطي وتوها تتذكر : " ااااااه .. "
علاية : " بسم الله عليج عمو .. شبلاج ؟؟ .. "
ام بطي : " علاية فديتج سيري دخلي ولد عمج .. من ساعة وهو يتريا برا .."
علاية وهي تعدل شيلتها : " ان شاالله عموه .."
وسارت علاية تدخل ولد عمها اللي هو خليفة ..
علاية كانت حاطة في بالها ان بطي هو اللي برا ..
كان خليفة يالس على الدجة في الحوي مع شمامي وكان عاطي ظهره حق اللي وراه .. كان خليفة مطفر بشمامي وعلاية كانت تضحك من بعيد .. وعلاية ماعرفت انه خليفة اللي يالس مع شمامي ..
علاية حطت ايدها على عيون خليفة وغيّرت صوتها : " بطوووي .. شوتسوي في شمامي .."
خليفة ماعرف صوت علاية لانها كانت مغيره صوتها : " ........ "
شمامي : " خوخه .. هذي اللي انت تليدها .."
يوم سمعت علاية رمسة شمامي شهقت ورفعت ايدها من على عين خليفة ..
خليفة وقف على حيله وهب مصدق اللي يشوفه : " مرحبا بالغالية .. "
علاية حاولت انها تتهرب منه بس ماقدرت ..
علاية وقلبها يدق معلاية : " حياك .. تفضل البيت .. "
سارت علاية ومانطقت باي كلمة ثانية ..
خليفة : " عليا .. "
وقفت علاية مكانها وماصدت عليه ..
خليفة يتقرب منها : " الشيخة اسمحيلي جان غلطت عليج هاك اليوم .. والله اني ماكنت في حاسيتي .. "
حز في خاطر علاية رمسة خليفة .. يالله ياخليفة حتى علاية هب قادر تقولها .. وااايد تغيرت ياخليفة من وفاة المرحومة
خليفة : " بنت عمي .. سويلي درب عسب احدر بيتكم .. "
غيظت علاية وفورت .. حست انها تريد تذبحه .. يالله ياخليفة .. انا اللي غالية عندك جي تكلمني .. وين سارت رمستك الاوليه .. ويـــن ؟؟
علاية وهي مغيظه : " امايه وامايتك يتريونك في الصالة .."
خليفة : " علاية هيدي .. بقولج شي .. "
علاية : " قول اللي عندك .. "
خليفة : " علاية اسمحيلي جان غثيتج ..انت اكثر وحده تعرفين طبعي .. "
علاية تشوف خليفة من طرف عينها : " انزين ويعني .. "
خليفة : " انسي اللي فات وسامحيني .. "
علاية : " انا نسيت اللي فات .. بس شوبينسيني اللي استوى الحين ؟؟.."
خليفة : " شو اللي استوى الحينه ؟؟ "
علاية وهي تمشي عسب تدخل البيت : " خلاص انسى .. "
خليفة غيّظ ومسك علاية من ايدها : " يوم اكلمج لاتعطيني ظهرج وتسيرين .. تفهمين .."
علاية : " فج عني .. عورت ايدي .. "
خليفة : " يعلها الكسر دام انج ماتخيلين .. "
علاية : " خليفة تدري انك سخيف .. "
خليفة فج ايد علاية : " انا سخيف ؟؟ .."
علاية باستهزاء : " لا انا .. "
خليفة : " انا اكلمج بالزين .. فلوسمحتي كلميني بالزين قبل لاارويج العين الحمرا .. "
علاية : " هاها .. اي عين حمرا .. يعني شوبتسوي ؟؟ بتظربني ؟؟ .. "
خليفة وصل حده : " علاية كلميني عدل .. "
علاية : " تراك مصختها .. ليش تتحرى عمرك منو ؟؟ "
خليفة : " ثمني رمستج قبل لاترمسين .. "
علاية : " وإذا ماثمنتها ؟؟ .. "
ماوعت علاية إلا بطراق على ويهها .. حست ان الدنيا تدور بها .. انا في حلم وإلا علم .. خليفة يمد ايده عليّه .. معقووووولة ؟؟ !!
ربعت علاية داخل البيت وهي تصيح .. وشمامي ربعت وراها ..
وسارت علاية حجرتها وهي تربع وماكلمت حد وقفلت الباب ..
ام هزاع : " شبلاهم العيال اتخبلوا .. يربعون ويناقزون ومايكلمون حد ؟؟ "
ام بطي : " خليهم تراهم شباب .. إلا نحن عيزنا وراحت ايامنا .. "
شمامي وهي تربع صوب امها : " اميييييي .. خوخه لاح .."
ام بطي : " ياحافظ .. وين راح ؟؟ ليش ماحدر يسلم على عمتج ؟؟ .."
شمامي وهي هب فاهمه شي : " مااعلف ؟؟ "
طلع خليفة من بيت عمه وهو متلوم على اللي سواه .. كان مغيظ ورد البيت ..
وشوي وتلفونه يصيح بس مارد عليه .. وتم يصيح لين ماشله ..
ام بطي : " وينك خليفة ؟؟ شعنة ماترد عالتلفون ؟؟ "
خليفة وهو مضيج : " في البيت .. "
ام بطي : " وشعنة رديت البيت ؟؟ وليش ماحدرت تسلم على عموتك روضة ؟؟ .."
خليفة : " امايه بطرشلج بطي عسب يردج البيت .. "
ام بطي :" خليفة شبلاك فديتك ؟؟ "
خليفة : " امايه اريد ارقد .. "
ام بطي : " الله يهدي سرك .. برايك فديتك .. برد البيت وبتفاهم معاك .. "
خليفة وهومتلوم : " امايه اسمحيلي .. "
ام بطي : " بالحل فديتك .. "
خليفة : " خلاص الحين بييج .. "
ام بطي : " استريح فديتك دامك تعبان .. خلاص برد مع دريول عمك .."
خليفة : " لالا .. انا بييج .."
ام بطي : " حبيبي انت تعبان .. ومااريد اتعبك .. خلاص برد مع الدريول .."
خليفة : " بس .. "
ام بطي : " لاتيلس تبسبسلي .. قلتلك ارقد .. "
خليفة : " ان شاالله .. بس منو بيي معاج ؟؟ "
ام بطي :" لاحول ولاقوة إلا بالله .. لاتتروع برد مع البشكارة .. ارقد فديتك واستريح .."
خليفة : " برايج امايه .. "
ام بطي : " في داعة الله .."
تلوم بطي عالطريقة اللي كلم فيها امايته .. شوهاي النحاسة .. محد راضي عني اليوم .. لا امايه ولا علاية .. ياربي ارحمني ..
يلس خليفة يهاذي لين مارقد ..
.

علاية كانت تصيح .. وهب مصدقة اللي استوابها .. كنت ماخذه عنك فكرة ثانية ياخليفة .. بس الحينه اتأكدت اني كنت عميه ومااشوف جاديه .. مستحيل اكلمك ياخلوووف .. مستحيييييل ..
حليلها علايه عمرها ماتخيلت ان خليفة وغد .. بس خليفة ماكان وغد وعمره مابيغدي وغد لكنه كان مضيج ومايعرف شويسوي ..
وشكله ماحصل غير علاية االلي طلع غيظه فيها..
.
.
.
الساعة عشر ونص الصبح في الهير..
حمدة كانت واعية وماتعرف شوتسوي .. خذت تلفونها عسب تسوي حق اليازية ..
تم التلفون يصيح لين ماقطع ..
وردت مرة ثانية تسوي ..
حمدة : " مرحبا ملايين ولايسدن .. وان زادن لاباس .."
..... : " مرحبا باجي .. هلا الغالية .."
حمدة ارتبكت وماعرفت شو تسوي : " ها .. اسمحلي اخويه .. غلطانة في النمرة .."
...... : " لا انتي هب غلطانة .. انتي يغيتي يزوي ؟؟ .. "
حمدة : " هيه .. بغيت اليازية .. "
...... : " انا بطي اخو اليازية .. ويزوي كانت في حجرتيه البارحة ونست التلفون عندي .."
حمدة تحس ان قلبها بيطلع من صدرها : " هلا بطي .. شحالك ؟؟ عساك مرتاح الشيخ ؟؟ .. "
بطي .. دام اني سمعت هالصوت اكيد مرتاح : " والله بخير يسرج الحال .. طاب حالج الغالية .. حمدة معايه صح ؟؟.. "
حمدة .. فديت ثمك يوم تنطق اسمي : " هيه الشيخ .. حمدة معاك .."
وعقب ثواني من السكوت ..
بطي : " شخبار فلي هزاع ؟؟ شو الجو عندكم ؟؟ .. "
حمدة : " تسلم عليك وتقولك احدر صوبها .."
بطي : " ههههههههه .. ردي السلام عليها .. وقوليلها فالج طيب .. خلاص ان شاالله اليوم بنحدرها .."
حمدة : " حياك الشيخ .. وجان ماسدك المكان بنحطك في عيونا .. "
بطي .. فديت عيونج .. يعلني افداها .. : " تسلملي عيونج الغالية .. ان شاالله بسير عند يدتيه شما .. وخلاف بخطف صوبكم .. بييب اليازية عندج.. لانها من يومين تحن عليّه عسب اييبها صوبكم .."
حمدة وهي متشققة : " ياحيبكم .. فديتاه يزوي .. خلاص الشيخ بخليك الحينه امايه تزقرني .. ودخيلك خبر علاية اني سويتلها .. "
بطي .. بعدني ماشبعت منج .. : " يبلغ ان شاالله .. في داعة الله الغالية .. "
حمدة : " الله يحفظك .. "
بطي الدنيا هب شالتنه من الوناسة .. ياالله ياربي .. اخيراً سمعت صوتها .. يعلني مااخلى منها .. والله احبها .. صدق متوله عليها .. اوووف مااقدر اهيد لين العصر .. الله يصبرني ..
قرر بطي انه يسير فلي هزاع اليوم .. وخزن بطي رقم حمدة في تلفونه .. وكان متردد في البداية بس خلاف خذ رقمها وتوكل على ربه .. وسار حجرة اليازية ..
بطي يدق الباب .. بس لا من سميع ولا من مجيب ..
وحدر بطي الحجرة وهو مستانس ..
بطي وهو يزاعق : " يزوووووووووووي .. نشي .."
يلس بطي عبرد الشبرية وير اللحاف عن اليازية ..
اليازية مغيظة : " يعلك الساحق والماحق والرصاص المتلاحق .."
بطي : " هههه .. عثـــــرة .. كل هذا عسب خربت رقادج ؟؟ "
اليازية : بطوووووووووي .. اطلع برا .. خلني اكمل رقادي.."
بطي يوقف ويسوي عمره بيطلع من الحجرة : " كنت بسويلج مفاجأة .. بس هونت الحينه .. "
اليازية تقفز من على الشبرية وتوقف جدا بطي : " الشيخ بطي اسمحلي .. والله آسفة .. خلاص مااريد ارقد .. دخيلك قول شو المفاجأة .. "
بطي يرفع ريله : " حبي ريلي وخلاف بخبرج .. "
اليازية تدز بطي : " خل عنك السوالف .. شو السالفة ؟؟ "
بطي : " بسير الهير عند غبيشة .. "
اليازية تناقز عالشبرية : " ههههه .. فديت روحك بطوي .. والله لو تسمعك يدوه شما وانت تقوللها غبيشة والله لتذبحك .. حتى ميثانة تعادت منك .. قبل فترة كانت تزقرها غبيشة .. "
بطي يشارك حمدة فرحتها ويناقز معاها عالشبرية : " هههه .. خلها برايها .. كيفي بزقرها غبيشة .. يزوي بقولج مفاجأة ثانية .."
يزوي بعدها تناقز وتزاعق : " يااااااي .. شو المفاجأة الثانية ؟؟ "
بطي : " بوديج عند ربيعتج حمدة .. "
اليازية تلوي على بطوي ويناقزون مع بعض : " ههههه .. فديتك .. والله ان اليوم يوم المفاجآت .. "
بطي يفج عن اليازية وينزل من على الشبرية : " هههه ... اتزهبي العصر وبوديج .. ولو تحيرتي والله اني لاخليج واروح عنج .. "
اليازية تنزل من على الشبرية وتوقف عالارض : " اهبي واخسي إذا تحيرت .. اول مايخلصون صلاة العصر بتحصلني يالسة في سيارتك .."
بطي يناول اليازية تلفونها : " خذي تلفونج ولاتنسينه مرة ثانية في حجرتيه .. عنبوه من صباح الله وهو يصيح .. خرب عليّه رقادي لابركتن فيه .."
اليازية تشهق : " اااااه .. لاتشتم تلفوني .. وكيف نسيت تلفوني في حجرتك ؟؟ "
بطي : " بعد ربج .. نسيتي وخلاص .. "
طلع بطي من حجرة اليازية وخلاها وهي مستانسة .. وهوحالته كانت شروات حالة اخته واكثر ..
.
.

تيمعوا عيال عبيد المحيربي عالغدا مع ابوهم .. ماشاالله عليهم كلهم متيمعين دور ماداير ابوهم .. واليمعة كانت حلوة بس خليفة كان مزاجه زفت ..
بوبطي وتوه حادر حجرة الطعام ..
بوبطي : " السلام عليكم والرحمة .. "
الكل يرد السلام ويحبون ابوهم على راسه وردوا قعدوا مكانهم مرة ثانية ..
بوبطي وهو ييلس مكانه على طاولة الطعام : " حبتكم العافية .. ان شاالله دوم نتيمع هاليمعة .. وربي لايحرمني منكم ان شاالله .. "
ام بطي : " آمين .. انجب الغدا بوبطي ؟؟ "
بوبطي : " هيه الغالية .. بس دخيلج اغرفيلي شويه .. ومرة ثانية لاتيوعين عيالي ولا تترييني جان اتحيرت .. "
ام بطي : " ويدي .. كيف ناكل وانت محد ؟؟؟ الاكل ماله مزة من دونك .. "
سيف : " صدقها امايه .. "
بوبطي : " لا فديتكم .. ودية ثانية جان اتحيرت اتغدوا عني .. "
شمامي : " ابويه .. خوخه زعلان .. مايكلمني.."
بوبطي : " ياحافظ .. شو هالخوخ اللي زعلان عليج ؟؟ .. "
الكل يضحك ..
مريم : " هههه .. ابويه خوخه يعني خليفة .. "
بوبطي : " ههههه .. غربلات سوالفج ياشميم .. خليفة شعنة ماتكلم بنيتي ؟"
خليفة توه انتبه ان حد يكلمه : " ها ... "
بوبطي : " خلوف شبلاك ؟؟ وين وصلت ؟؟ .."
خليفة : " لا انا معاكم .. "
اليازية : " مبين !! لوكنت صدق معانا قول شو كان يقول ابويه من ساعة ؟؟ "
خليفة : " ها .. لا ماشي .. كنتوا تسولفون عن العزبة وعن الرجاب .. "
اليازية : " هههههه .. جنه خلوووف يحاتي بكرته .."
بوبطي : " هههه .. خليفة نحن في وادي وانت في سيح .. ابداً هب مقبض .. هههه .. اللي شاغل عقلك يتهنى به .. "
خليفة ينش من مكانه : " الحمدلله شبعت .. سفرة دايمة ان شاالله .."
ام بطي : " غناتي وين ساير ؟؟ ماهبشت شي انت .. "
خليفة : " من ساعة تفولت من الفوالة اللي في الصالة .."
ام بطي : " الله يهدي سرك فديتك .. انت من ساعة راقد في الصالة .. متى مداك تهبش شي ؟؟ .. "
خليفة : " امايه انتي ماريتيني .. من ساعة كلت موزة .. "
ام بطي : " وايد عليك .. "
خليفة : " خلاص امايه بسير ارقد .."
وطلع خليفة من الحجرة قبل لاتنطق امايته بكلمه..
ام بطي : " ماادريبه هالولد شبلاه .. كل ماحد يكلمه يقوله بسير ارقد .."
اليازية : " امايه انا بكلمه خلاف .. ولاتزعلين .. "
ام بطي : " تسوين خير فديتج .. "
سيف : " ابويه .. "
بوبطي : " ياعونك .. "
سيف : " عانك الرحمن .. اريد آخذ اجازة اسبوعين .. "
بوبطي : " شعنة ؟؟ .. "
سيف : " بسافر مع ربعي .. "
بطي داخل عرض : " وين بتسافرون ولاتعزمون ؟؟ "
بوبطي نغز بطي بعينه .. عسب يحس بطي بالغطة اللي سواها ..
حس بطي انه غلط يوم تكلم قبل لايتكلم ابوه ..
بطي : " السموحة الوالد .."
بوبطي ماعبّر بطي وسواله طاف : " (يكلم سيف) ماقلتلي وين مسافرين ان شاالله ؟؟ .. "
سيف : " بنسافر الكويت يومين وخلاف بنخطف صوب هولندا .. وآخر شي بنسير لندن وبغيت مفاتيح بيتنا في لندن ماعليك امارة الغالي .. "
بطي : " انت ياللوتي ماتفكر في اخوك الفقير .. "
بوبطي مفول : " بطي انت ماكل قرصك ني .. عنبوه ماتروم تهيد لين مااتكلم واقول اللي عندي .. "
بطي : " اسمحلي الوالد .. "
بوبطي : " بالحل .. ( يفتر صوب خليفة ) جان بتسافر الله معاك .. تسير وترد بالسلامة .. بس مفاتيح البيت هب عندي .. "
بطي رز ويهه مرة ثانية : " وين مفاتيح البيت ؟؟ "
بوبطي : " لحوووول ويا هالولد الرزة .."
مريم تضحك : " ههههه .. طالع عليك ابويه .. "
بوبطي : " بسم الله عليّه .. انا ماارز ويهي في كل شي (رفع ايده للسما).. الله لايبلينا.."
شمامي (تقلد ابوها وترفع ايدها) : " الله لا ليلنا .."
اليازية : " هههه .. شمامي هب ليلنا .. الله لايبلينا .. هههه "
شمامي : " الله لا ...(سكتت).. مااعلف .. مااعلف .."
بوبطي : " ههههه .. فديتها انا .. انزين سيف مرخوص جان بتسافر .. بس مفاتيح البيت عند واحد من العرب سافر لندن حق العلاج وعطيته المفاتيح .. (افتر صوب بطي ) طاحت دودتك الحينه يوم عرفت ؟؟ "
بطي : " ههههه .. هيه ارتحت الحينه .. "
سيف : " خلاص برايه .. بناخذلنا شقة وبنقزر فيها عمارنا هاليومين .."
بوبطي : " خذ اخوك خليفة معاك .. خله يغير جو ؟؟ "
بطي : " وانا هب ولدك ؟؟ .. بتخبرك انت ليش ماتفكر فيّه ؟؟.. "
بوبطي : " والله انت صاحي ومابلاك شي الحمدلله .. وبعدين انت لازم تعوض مكان اخوك في الشركة .. "
بطي يشهق شروات البنات : " اااايييه !! . يعني بغدي بشكار !!.."
بوبطي : " هههه.. نوعاً ما .."
سيف : " انا اعرف خلوف زين .. مااظن بيطيع يسافر .."
ام بطي : " بوبطي .. "
بوبطي : " لبيه عوشه .. "
ام بطي : " لبيت حايه .. اريدك تقدم اوراق ولديه خليفة في كلية الشرطة "
بوبطي : " آمري الغالية .. من عيوني .. تامرين على شي ثاني الغالية ؟؟ "
مريم : " احم احم .. نحن هني لاتنسون .. تراني صغيرة وماافتهم شي.."
بوبطي : " ههههه .. عيال هالايام مايطوفهم شي .. يفهمونها عالطاير ..ويفتهمون كل شي .."
اليلسة كانت حلوة .. ماكان ناقصنها غير خليفة ..
خليفة كان صدق مضيج من الموقف اللي استوى من بينه ومن بين علاية ..
محد يعرف حالة خليفة اللي كان فيها غير بنا ..
بعد ماخلصوا الغدا سارت اليازية عند اخوها عسب تعرف شواللي مضيجنه ..
دقت اليازية الباب ..
خليفة : " احدر .. احدر .. الباب مفتوح .."
اليازية تحدر وتبتسم : " مرحبا خلوووف .."
خليفة ارتاح من ابتسامة اليازية اللي محد يقدر يقاومها : " فديت هالعرضة .. تعالي يلسي حذالي الغالية .."
تتقرب اليازية من خليفة وتيلس حذاله : " شحالك خليفة ؟؟ ان شاالله مرتاح ؟؟.."
خليفة انسدح عالشبرية ويتنهد : " اااااه .. الله سبحانه ادرى بحالي .."
اليازية تنسدح حذال اخوها وتشوف السقف شروات اخوها : " ياحافظ .. مقصرين نحن في شي حبيبي ؟؟ .. "
خليفة : " حشا والحشا عن الف يمين .. ماقصرتوا في شي . كفيتوا ووفيتوا .."
اليازية : " عيل شبلاك ؟؟ "
خليفة يغمظ عيونه: " ماادري شواقولج ؟؟ "
اليازية : " شفخاطرك ؟؟ .."
خليفة : " ................. "
اليازية : " علاية في السالفة ؟؟ "
خليفة ارتبك : " ها .. لا .. علاية مايخها في شي .. انا بس افكر .."
اليازية ترفع عمرها وتتربع وتيلس : " تفكر في شو ؟؟ .. "
خليفة يلس وحط عينه في عين اخته : " اليازية .. بسافر .."
اليازية استانست : " تصدق من ساعة ابويه كان يقول حق سواف .. جان بتسافر خذ اخوك معاك .. "
خليفة : " اليازية .. انا بسافر عسب ادرس .. يعني بتم خاري بعيد عن البلاد .."
اليازية جنه حد صب عليها ماي بارد : " شو ؟؟ وكلية الشرطة ماتريدها ؟؟ .. ونحن بتهدنا ؟؟؟ .. وعلاية نسيتها ؟؟؟ "
خليفة يوم سمع اسم علاية حس بنغزة بصدره : " خلاص عفتها الكلية .. "
اليازية : " يعلها الحراق الكلية .. بس نحن ؟؟ .. "
خليفة : " يزوي انتوا في عيني .. بس صدقيني مااقدر اتم في بوظبي .. "
اليازية : " شبلاها بوظبي؟؟ .. بوظبي بلادك .. بوظبي دار اهلك ودارك .. بوظبي المكان اللي كلنا ربينا فيها .. "
خليفة : " اليازية دخيلج لاتزيديني .. ترى اللي فيني يكفيني .."
اليازية : " حبيبي .. قول اللي فخاطرك .. صدقني بترتاح .. "
خليفة يحاول يتهرب : " يزوي .. انا مافي شي في خاطري .. بس صدقيني اريد ادرس خاري .. "
اليازية : " زين .. عندك دبي تقدر تدرس فيها .."
خليفة : " يزوي مااريد اتم في البلاد .. "
اليازية : " انزين خلاص .. جان ماتريد كلية الشرطة ادخل كلية زايد العسكرية .. بس دخيلك لاتسافر .. "
خليفة : " عيوني .. السالفة هب سالفة كلية ولا غيره .. "
اليازية : " عيل شوالسالفة ؟؟ احيدك تريد تدخل اي كلية عسكرية .. يعني ماتفرق عندك .. بس المهم تكون عسكرية .. "
خليفة : " اليازية .. دخيلج لاتصدعيني .. خلاص انا خذت قراري .. وماباخذ شور حد .."
اليازية غيظت من رمسة خليفة وطلعت من حجرته .. بس قبل لاتطلع افترت صوبه : " خليفة اسمحلي جان إلا غثيتك وادخلت في خصوصياتك .. ويغيت بس اقولك شي .. انت واااايد تغيرت عن اول .. "
وطلعت اليازية من الحجرة ..
ماقدر خليفة يقبض عمره وعلى طول لحق اليازية ..
خليفة يقبض اليازية من ايدها : " يزوي حبيبي .. اسمحيلي .. والله ني مضيج .. دخيلج لاتاخين على خاطرج مني .. والله هب ناقص .. كل حد يزعل مني اليوم .. شوهاليوم النحس .. والله يزوي مااقدر اصبر عنج .. "
اليازية ماصدت على خليفة وكانت عاطتنه ظهرها ومانطقت بكلمه : "........"
خليفة تغير صوته : " اليازية انتي ادرى بحالي .. اسمحيلي غناتي .. خلاص دخيلج لاتزعلين .. "
كان خليفة يتوسل اليازية عسب اتكلمه ..
خليفة اللي عمره مااترجى حد او عمره ماتوسل حد انكسر اليوم وحس بالضعف ..
اليازية حست ان اخوها تعبان وانه هب صاحي .. فقربت منه ولوت عليه ودفن خليفة ويهه في حضن اخته ويلس يصيح ويطلع كل اللي في خاطره .. صدق خليفة كان متوله لامه .. كان يريد بس يشوفها ويرتاح فواده .. كان مضيج وماحس بعمره إلا يلوي على اليازية ويصيح امايته ..
اليازية تروعت على خليفة اللي عمره ماصاح بهالطريقة .. بس كانت حاسه انه متوله لامايته .. فماحبت تفاتحه الموضوع.. واكتفت بالسكوت .. وحاولت انها تعوض خليفة لو بشويه بحنان امايته .. ومافجت عنه وكانت لاويه عليه بالقو ..

.. انت عيني وانت شوفي والبصير .. والقمر لي زان به داج الليال .. وانت نسمات الصبا وانت العبير .. وانت نوري وانت السحر الحلال ..
وانت شوقي في مغاليج الظمير .. وللوليع انت الشفا وانت العلال .. طفت من نومي على طيفٍ مزير.. زايرن خطاف في صحوة خيال ..
مر بي في هودج الليل الستير .. يوم جفني الخالية بالنوم ذال .. عقب طيفك صارلي حالٍ مرير .. لاشراب ولا منام ولا محال ..

اليازية ماتعرف شوتسوي : " خلاص فديتك .. صل عالنبي وهد اعصابك .."
دخل خليفة الحجرة مانطق بكلمه .. اليازية وااايد اتضايجت .. حليلها كانت الدنيا هب شالتنها من الوناسة لانها بتسير العين .. بس هذا اللي صار .. ومودها اعتفس ..
.
.
.
.
عقب صلاة العصر .. الشباب ردوا من المسيد .. واولهم بطي .. وعلى طول جبّل صوب حجرة اليازية ..
بطي يدق الباب : " زوزو .. احدر الحجرة ؟؟ "
اليازية : " حياك .. حياك .. "
بطي متشقق : " يالله الغالية .. اتزهبي لين مااسير اتسبح واتزهب انا .. "
اليازية مضيجة : " ان شاالله .. "
بطي حس ان اليازية هب طبيعية : " يزوي .. شوياج مرة وحدة ؟؟ بتخبرج انتي كل حين بمزاج ؟؟ .. اخاف إلا هونتي عن سيرة العين ؟؟ "
اليازية : " لا ماهونت .. بس شويه مضيجة .. خلاص بتزهب الحينه .. "
بطي : " الغالية شفيج مضيجة .. جان إلا انا اللي مزعلنج تراني استسمح منج بدل المرة مليون .. "
اليازية انمزرن عيونها دموع : " خلوف .."
بطي فز قلبه : " شبلاه خليفة ؟؟ .. "
اليازية تبغم وتناعر من زود الصياح : " يريد يدرس خاري البلاد.. "
بطي ارتاح باله : " فقدتج يالخمام .. روعتيني .. اتحريته متعوق وإلا فيه شي .."
اليازية : " بسم الله عليه .. "
بطي :" خلاص فديتج مثي دموعج .. وان شاالله بنشوف السالفة خلاف .. "
اليازية : " ........ "
بطي : " يزوي جان إلا فيج هبه صياح قولي؟؟ تراني صدق بصيحج .. خلاااااااص صخي دخيلج والله بكلمه انا خلاف .. "
اليازية : " في ذمتك ؟؟ .. "
بطي يفتر عنها ومجبل صوب الباب ويسوي عمره بيطلع : " يزوي جان بتيين العين تراني ارقبج ولاتبطين .. وجان إلا هونتي خبريني .."
اليازية : " ........... "
بطي مغيظ : " يزوي انطقي بكلمة شبلاج دهمانة ؟؟ .. والله ويأني حلفت يمين انج تيين معايه .. "
وطلع بطي من الحجرة ..
وسارت اليازية تتزهب عسب تغير مودها الزفت ..
.
.
.
طلع بطي من الحمام وخلص سبوحته .. ولبس كندورة سودا تخبل .. وتسفر بسفرة حمرا .. كان شكله يخبل .. وكان شعره طالع شويه من ورا الحمدانية .. وكمن خصلة من بكلته كانت نازلة من تحت السفرة على يبهته ..
طلع من حجرته وسار صوب حجرة اليازية ودق الباب وحدر قبل لاترد عليه اليازية ..
بطي : " ارقبج في السيارة .."
ونزل بطي عنها .. وسار يحر سيارته ..
لبست اليازية عباتها وتشيلت .. وحولت تحت .. وقبل لاتطلع من الصالة تغشت وطلعت ..
حدرت اليازية السيارة وعقت الغشوة عن ويهها لان السيارة مخفيها شامل ومحد يقدر يشوف داخل السيارة من زود الاسوده ..
بطي يتحرك بسيارته : " هافديتج .. بعدج ماخذه على خاطرج ؟؟ "
اليازية : " لا .. الحينه احسن عن اول .. "
بطي : " الحمدلله .. انا قلت بنسير العين وبنغير الروتين اللي انتي عايشتنه ؟؟؟ بس ثرج جالبه البيت بغام ومناعر.. "
اليازية تدمع : " شو اسوي ؟؟ . "
بطي : " لحووووول . انا شعنة فجيت هالسالفة ؟؟ ترا يزا الاحسان خيزران .. "
اليازية : " هههههه .. "
بطي : " هيه حصلت اللي كنت ادوره .. "
اليازية : " واشوا هذا اللي كنت مضيعنه ؟؟ .. "
بطي يفتر صوب اليازية ويشوفها : " ضحكتج الغالية .. "
اليازية شهقت : " ااااييييه !! .. ياويل حالي .. كم بعيش انا .."
بطي ضرب بريك ووقف في نص الشارع : " بسم الله عليج ؟؟ شبلاج؟؟"
اليازية : " ثرك غاوي ولاعندي خبر ؟؟ .."
بطي يكمل سواقته : " ههههه .. روعتيني يالسباله .. امبوني غاوي .. "
اليازية : " لاوالله صدق .. تخبل بالكندورة السودا .. وإلا هاي الخصل اللي نازله من تحت السفرة .. تينـــــن .."
بطي : " لازم .. انا بطي بن عبيد بن سعيد المحيربي .. هب اي واحد .."
اليازية : " مداح نفسه .. "
بطي : " يباله بوسه .. ههههه .. "
اليازية : " هههه .. وايد مصدق عمرك .. "
كان بطي يتغشمر مع اليازية عسب ينسيها الحزن اللي كانت فيه .. حليله بطي كان يحب اخته ويحاول باي طريقة انه يفرحها ..
تموا يسولفون لين ماوصلوا فلي هزاع .. ومن كثرالوناسة والسوالف ماحسوا بالوقت ووصلوا بسرعة ..
وكانوا مجابل بيت يدوتهم شما ..
الباب العود كان مفتوح ودخل بطي بيت يدته وبركن السيارة في الكاراج ..
بطي يشوف عمره في المنظرة ويعدل سفرته : " يلاّ وصلنا .. "
اليازية : " هيد فديتك .. بكلم ربيعتيه وخلاف بحدر .. "
بطي فز قلبه وعرف انها بتسوي حق حمدة : " فديتها غناتي .. اريد اسمع صوتها .. "
اليازية : " بطوي بدينا ؟؟؟ "
بطي : " عوذ بالله .. ماقلت شي .. بس اريد اسمع صوتها .. دخيلج يزوي .. الحينه هذا يزايه ؟؟؟ خلاص مرة ثانية مابطلعج .. "
اليازية : " الحينه بتذلنا ؟؟؟ كل شي ولا منتك .."
بطي : " دخيلج .. والله متوله عليها .."
اليازية : " معوفك .. خلاص بحطه عالسبيكر .. بس ياويلك لونطقت .."
بطي متشقق : " خلاص بغدي ابلم ومابنطق بكلمة .. "
اليازية : " يكون احسن .. "
سوت اليازية حق حمدة .. بس حمدة ماردت عليها ..
اليازية : " يلاّ نحدر .. ماترد عليّه البنيه من حوباتك .. "
بطي : " سويلها وديه ثانية .. "
اليازية : " مااريد .. "
بطي : " رفجتبج يايزوي .. ردي سويلها .."
اليازية : " اووووف .. زين .. بس جان ماردت والله ماارد اسويلها مرة ثانية .. "
بطي متشقق : " اوكي .. "
صاح التلفون وماردت حمدة عليه ..
بس قبل لاتبند اليازية التلفون ردت حمدة عالتلفون بصوتها اللي يخبل .. وبطي حس ان روحه ردتله ..
حمدة : " الوو .. "
اليازية : " ويدي!! .. عن يطيح نصج امايه !! .. كل هذا بزا !! (اليازية تقلد حمدة وترقق صوتها شروات صوت حمدة) الوو .. الوو .."
بطي غيّظ على اليازية وقرصها على ايدها ..
اليازية : " آآآآآآي .."
حمدة صدق كانت رقيقة .. كانت تخبل هاي البنيه .. كانت ظارية عالدلع والبزا يعني ماكانت تمثل أو انها تحاول تغير صوتها .. لا .. بس صوتها كان امبونه رقيق وحلو ..
حمدة : " شبلاج حبيبي ؟؟ .. "
بطي تخبل يوم قالت حبيبي .. آآآآه .. ليتها تقوللي هالكلمة ..
حمدة وهي تتحلفه : " ماشي غناتي .. اقولج حمدوو تراني الحينه بحدر بيت يدتيه وخلاف بخطف صوبكم .. "
حمدة : " عيل بتزهب لين ماتيين .. "
اليازية : " عنلاتج .. بعدج هب متزهبة ؟؟ .."
حمدة : " هههه .. هذا ولد خالتيه حميدو من الصبح في بيتنا و مطفربي وهب مخليني اسوي شي .. "
اليازية : " هيه .. هذا اللي يريدج ؟؟ .."
حمدة : " هيه هذا هو .."
غيّظ بطي ونزل من السيارة ..
اليازية : " خلاص انشاالله اول مابطلع من بيت يدوه بسويلج عسب تدليني بيتكم.. "
حمدة : " بطرش دريولنا صوبكم .. "
اليازية : " اوكي .. "
حمدة : " ارقبج لاتبطين الغالية .."
اليازية : " اوكي .."
لحقت اليازية اخوها ..
اليازية : " بطوووي .. هيّد .. "
وقف بطي مكانه وهو مفول ..
ويفتر صوب اخته ..
بطي : " منو هذا حميد ؟؟ .."
اليازية : " هههه .. شبلاك ؟؟ تغار ؟؟ "
بطي : " لاتغيرين السالفة .. منو حميد ؟؟ "
اليازية : " حميد ولد خالتها .. "
بطي غيّظ ومارد على اخته واكتفى بالسكوت ..
اليازية : " ههههه .. لاتتروع هي ماتريده .. بس هو يريدها .. "
بطي : " يعني هي محيرة له ؟!! "
اليازية : " نوعاً ما .. بس هي ماتريده .."
بطي ارتاح فواده : " زين .. خلينا نسير عند غبيشة .."
اليازية : " هههه .. ماعليه بخبر يدوه الحينه .."
بطي : " خبريها .. يعني انا اتروع منها ؟؟ .. "
اليازية : " خلك قد رمستك اوكي.. واتحمل شوبييك الحينه.. "
بطي : " يعني شوبتسويبي العيوز ؟؟"
وحدروا بيت يدتهم .. وكانت العيوز فارشة عمرها وقشارها في الحوي ..
بطي : " السلام عليج غبيشة .."
وافترت العيوز صوب بطي وهي مغيظة بس اول ماصدت وشافت انه ريال على طول رفعت غشوتها ..
ام عبيد ( يدة بطي "شما" ) : " غربلات العدو .. منو هالريال اللي ظوانا بدون مايهود .."
بطي ناقع من الضحك : " ههههه .. هود هود ..."
يدة بطي : " هب هباك الله .. وشعنة تهود الحينه .. ثرك فاصخ الحيا ومضيع المذهب .. اطلع خاري من بيتي ياللي ماتحشم .. "
اليازية قربت من يدتها وحبتها على راسها : " شحالج يدوه ؟؟ .. "
يدة بطي : " ومنو انتي الثانية ؟؟ .. "
اليازية ترفع غشوة يدتها : " يدوه صدي هاك الصوب (تأشر على بطي) .. هذا شبيه المرحوم ريلج .. ماعرفتيه ؟؟ .."
يدة بطي وهي منصدمة : " ها .. صدقج .. هذا مرة يشابه المرحوم سعيد .. وايه .. يخبل هالريال .. مرة شروات ريلي .."
بطي وهو يضحك ويصلب عوده ويغير صوته : " مرحبا شما .. ماعرفتيني ؟؟ انا سعيد ريلج .. "
اليازية غيظت : " بطوووي يوز .. "
دمعت عيون يدة بطي يوم تذكرت المرحوم : " الله يرمحك ويغمد روحك الجنة ياسعيد .."
اليازية : " جي زين .. صيحتها .."
بطي يتقرب من يدته ويحبها على راسها وييلس حذالها : " يدوه شما .. انا بطي ولد ولدج عبيد .. "
يدة بطي تشققت وتلوي على بطي : " فديت روحك ياولديه .. ثرك انت بطاي وانا ماعندي خبر .."
بطي يمسح دموع يدته : " يعلني افدى هالدموع .. اسمحيلي يدوه جان غثيتج .."
يدة بطي : " وايه .. فديت هالعرضة .. يعلني مااخلى منها .. كيف انغث من بطي ولد عبيد ؟؟؟ والله انك ونستني ورديت فيّه الروح بشوفتك .. ليتني ريتك من زمان .."
بطي عوره قلبه على يدوته : " فديتج يدوه .."
يدة بطي : " ياللي ماتحشم يابطوي .. ويتك انت ماتحدر دارنا ؟؟ .."
اليازية : " ههههه .. جلبت يدوه .."
بطي يدهن سير يدوته .. ويسويلها مسكة باليس : " لايدوه فديتج .. انا ولد عاقل طالع على المرحوم يدي سعيد .. اداري حلالي وشغلي .. ماعندي وقت ايي العين .."
يدة بطي : " وايه فديتك .. ان شاالله اخوانك يطلعون شرواتك ويحاتون حلالهم .. "
اليازية : " يدوه .. هذا لوتي لاتصدقينه .. عنبو مايقدر يسويلج عالتلفون عسب يتخبر عنج ؟؟ .. "
يدة بطي : " إلا صدقها يزوي .. عنبوه ماتقدر تقبض تلفونك وتسويلي خمس دقايق ؟؟ .. "
بطي : " لابركتن فيج يايزوي .. قلنا الحينه مابتتشره ولابتلومنا ولابتعاتبنا العيوز .. والحينه جلبت علينا .."
يدة بطي : " عيزن ركبك يالخمام .. انا بعدني شباب .."
بطي : " ههههه .. مبيّن .. تشقحين وتنطحين بعد .."
اليازية بطنها يعورها من الضحك ..
يدة بطي : " اشو قلت ؟؟ ماسمعتك ؟؟ .."
بطي : " لا ماشي .. قلت يدوه شما ماشاالله عليها كل ماتكبرتغدي اغوى عن قبل .."
يدة بطي مستانسة : " يعلني مااخلى منك .."
اليازية : " والله انك سييح وبييع رمسة يابطوي .."
ويلسوا عند يدوتهم لين ذان المغرب .. صلوا وطلعوا من عندها ..
بطي : " خلاص يدوه .. نترخص منج الحينه .."
يدة بطي : " ويدي .. وين بتسيرون هالحزة ؟؟ "
بطي : " بنسيّر عند عرب حذالكم وخلاف بنرد بوظبي .. مافينا نتحير .."
يدة بطي : " منو هالعرب ؟؟ .."
اليازية : " والله مادلهم .. بس اللي اعرفه انه ابوهم متوفي واسمه علي النيادي وحرمته اسمها ناعمة .. وبنتهم ربيعتيه .."
بطي من سمع اسم جبيلتهم فز قلبه .. فديت النيادية يعلني افدى ترابهم ..
يدة بطي : " مارحتي بعيد الغالية .. بيت علي النيادي مرة ملاصق بيتنا .."
بطي : " في ذمتج يدوه ؟؟.."
يدة بطي : " والله انهم ييرانا .."
اليازية : " زين عيل ماتعبنا عمارنا ودورنا بيتهم وضيعنا .. الحمدلله حصلناه .."
يدة بطي : " وايه فديتها بنتهم حمدة .. كل يوم تسيّر عليّه وتيي عندي .."
بطي متشقق : " صدق يدوه ؟؟؟ زين شورايج فيها ؟؟ .."
يدة بطي : " ماشاالله عليها غاوية وتعرف الواجب .."
بطي .. ويل حالي .. كم بعيش انا .. : " خلاص عيل يدوه نترخص منج الحينه .."
يدة بطي : " تو الناس ؟؟"
بطي : " ورانا درب الغالية .."
يدة بطي : " بس لاتقطعون .. احدروها داركم كل فترة .. وقول حق ابوك تراه هب ولديه ولااعرفه .."
اليازية : " افاا يدوه .. ابويه السبوع اللي طاف خطف صوبكم .."
يدة بطي توها اتذكرت : " ماعليه .. بس انا امايته .. جنته وناره .. المفروض ييني كل يوم .."
بطي يحب راس يدته : " ولاتزعلين الغالية .. بخليه يجابلج لين ماتلوع جبدج .. "
اليازية تحب راس يدتها عسب يطلعون ..
يدة بطي : " سلم .. سلم .."
بطي : " يبلغ الغالية .. تحملي على عمرج غبيشة .."
يدة بطي : " غبيشة في عينك .. من وين يبت هالاسم ؟؟ .."
بطي : " هههه .. احيدج ماتدانين غبوش حرمة ييرانكم الاوليه اللي كانت ساكنه حذالكم .."
يدة بطي : " الله يذكرها بالخير .. بس ودية ثانية لويبت طاريها والله ياني اكسر العصا عظهرك (وتأشر عالعصا).."
بطي : " ان شاالله يدوه .. خلاص برايج الغالية .."
يدة بطي : " الله يحفظكم .. فداعة الله .."
وطلعوا بطي واليازية من بيت يدتهم .. وهم في السيارة ..
اليازية : " بسوي حق حمدوو .."
بطي : " سويلها واتخبريها وين بيتهم .."
وتسوي يزوي حق حمدة ..
حمدة : " مرحبا .. مرحبا ..وينج ؟؟ "
اليازية : " جدا بيتكم .."
حمدة : " والله اني يالسة اوصي الدريول عسب يخطف عليكم .. إلا تعالي كيف اندليتي بيتنا ؟؟.."
اليازية : " تراكم ييران يدتيه شما .."
حمدة : " ايوااا .. يدوه شما هي يدتكم .. يالله يالصدف .."
اليازية : " يالله اطلعي .. من ساعة وانا اترياج برا البيت .."
حمدة : " بلبس شيلتيه وبييكم .. يالله برايج .."
اليازية : " فداعة الله .."

الجزء السابع ..
في فلي هزاااع ..
بطي واليازية وقوف جدا بيت حمدة .. وبطوي متحرقص يريد يشوف غناته ..
شويه إلا حمدة فتحت باب البيت وكانت مطلعة بكلتها .. ويوم شافت ريال على طول عدلت شيلتها ..
حمدة : " السلام عليكم ورحمة الله .."
اليازية تتقرب من حمدة وتوايهها : " وعليج السلام والرحمة .. هلا عيوني .."
حمدة توها انتبهت ان بطي هو اللي مع اليازية : " مرحبا الشيخ .. شحالك ؟؟.."
بطي يريد يطير من الوناسة : " يسرج الحال طاب حالج .. "
حمدة افترت على سيارة بطي .. ياويل حالي عالبورش الكايين الغاوية .. وردت صدت على بطي وطاحت عينها في عينه .. ياويل حالي عليك والله انك غاوي .. والله انك تذبح بالكندورة السودا والسفرة الحمرا .. : " حياكم .. تفضلوا احدروا .. شعنة وقوف خاري ؟؟ .. البيت بيتكم .."
بطي : " دام فضلج .. خلاص اليازية انا بترياج في السيارة .."
حمدة : " افااا الشيخ .. شعنة تتريا في السيارة والبيت بيتك ؟؟ .. حياك الميلس .."
بطي : " اسمحيلي الشيخة بتريا في السيارة .. بيت عرب هذا ومااقدر احدر دام مافي ريال في البيت .."
حمدة : " برايه .. اماية عن عشر رياييل .."
بطي : " هههههه .. اسمحيلي الشيخة مااقدر احدر .."
حمدة : " والله العظيم انك تحدر البيت وتتقهوى وتهبش لك شي من الفواله وتتعشى بعد .."
بطي : " ههه .. اوكي خلاص .. مانقدر نردج دام حلفتي .. بس دخيلج مااريد آكل شي .."
حمدة : " اسمحلي انا حلفت .. عالاقل اتقهوى من قهوتنا.."
اليازية : " يعني بتذل البنيه .. يلاّ احدر .."
بطي : " مااقدر اردكن .. حشا هنتين على واحد .."
وحدروا يميع البيت .. ووصلت حمدة اليازية البيت .. وتم بطي واقف في الحوي بروحه .. وردت حمدة عند بطي عسب تدخله الميلس ..
حمدة تتقرب من بطي : " حياك الشيخ .. "
بطي : " الله يحييج الغالية .."
حمدة : " تعال ورايه عسب ادليك الميلس .."
بطي : " ان شاالله .."
ومشى بطي ورى حمدة عسب تدليه الميلس ..
فتحت حمدة باب الميلس وكان بطي وراها .. وشغلت الليت .. واتأكدت ان البشكارة مدخنة الميلس وارتاحت .. وافترت صوب بطي ..
حمدة : " تفضل الشيخ .. البيت بيتك .."
بطي .. فديت هالسمحه يعلني مااخلى منها .. : " دام فضلج .."
حمدة : " تفضل اييلس .. دقايق وبييب الفوالة والقهوة .."
بطي : " لاالشيخة لاتكلفين على عمرج .. "
حمدة : " اشو هاي الرمسة ؟؟ عنبوه يايينا من بوظبي وظاربين درب لين هني وتقولي لاتكلفين على عمرج !!!! المفروظ نخدمكم بعيونا .."
بطي ... فديت عيونج .. : " تسلملي عيونج الشيخة .. ماقصرتوا .."
وسارت حمدة صوب المطابخ .. وشافت امايتها هناك ..
حمدة : " امايه دخلت الريال الميلس .. بس انتوا الله يهديكم هب حاطيين الفوالة في الميلس .."

ام حمدة : " ويدي !!! والله انه راح عن بالي .. تحريتها ربيعتج بتيي مع دريولهم .."
حمدة : " لا .. يت مع اخوها .."
ام حمدة تناول حمدة صينية الفوالة : " دوج انتي هالصينية ووديها صوب الميلس وتراه الصماط امبونه مفروش في الميلس.. وانا بطرش دلال القهوة باييد البشكارة .."
حمدة تشل الصينية من عند امايتها : " ان شاالله .. بس عن تتحير هاي البغام .."
ام حمدة : " ههههه .. ان شاالله .."
وسارت حمدة صوب الميلس عسب تودي الفوالة ..
كانت حمدة تريد تدخل الميلس لكنها هب قادرة تفج الباب ..
انتبه بطي عليها وعلى طول سار وفتح الباب وعاونها ..
بطي : " ييبي الصينية عنج الشيخة .."
حمدة تحط الصينية عالطاولة الصغيرة اللي حاطينها في الميلس : " لاوالله ماعطيتك .. الواحد يخدم خطاره مايشغلهم !! .."
ووخت حمدة وعدلت الصماط .. وخذت الصينية وفرشت الفوالة عالصماط ويلست ترتب الصماط .. وكان بطي امبحلق عينه ويطالعها ..
حمدة وقفت عَـــحيلها وافترت صوب بطي ..
حمدة استحت من نظرات بطي وويهها احمر من الحيا : " حياك الشيخ .. اهبشلك شي من الفوالة .."
بطي .. واااايه .. حتى في الحيا غير عن الناس .. : " مشكووورة الشيخة .. تسلمين ماقصرتي .."
حمدة : " الله يسلمك الشيخ.."
وطلعت حمدة وسارت عند اليازية ..
اليازية : " لا دخيلج .. جان ماييتي ؟؟ .."
حمدة : " هههه .. والله سرت اعدل الصماط في الميلس .. بشكارتنا البغام ماادريبها وين زابنه .."
اليازية : " زين .. بس هالمرة بسامحج .. تعالي اقربي حذالي خلينا نسولف .. "
حمدة تتقرب من اليازية : " يزووووي .. سيارة اخووج تخبل .. والله ان الاسود خطيــــر .."
اليازية تغمز بعينها : " بس السيارة غاوية ؟؟؟ وراعي السيارة هب غاوي ؟؟.."
حمدة : " يالله .. ماشاالله عليه يخبل بالكندورة السودا والسفرة الحمرا .. صدق غادي حليو اليوم .."
اليازية : " امبونه اخويه غاوي .. "
حمدة : " لا .. وبعد مطقم مع السيارة .."
اليازية : " ههههه .. خسج الله .. تنتبهين على كل شي .."
ويلسوا حمدة واليازية جنهن عيايز ..
وفي صوب ثاني من البيت كانت ام حمدة تدور البشكارة بس كانت هب محصلتنها ..
ام حمدة : " غربلات العدو .. وين نافده هاي .. خلاااص بروحي بودي دلال القهوة ..."
وشلت ام حمدة دلال القهوة وجبلت صوب الميلس ..
حدرت ام حمدة الميلس وكان بطي يتعبث في تلفونه وماانتبه على ام حمدة يوم حدرت ..
ام حمدة : " السلام عليك ولديه .."
وقف بطي على حيله وماعرف شو يسوي .. منو هاي ؟؟ اكيد هاي ام حمدة .. تقرب بطي من ام حمدة وشل الدلال من ايدها لانها حرمة عودة واستحى بطي منها وزقرها بامايه..
بطي يحب ام حمدة على راسها : " وعليج السلام اماية .."
ام حمدة .. ماشاالله عليه هالولد مرباي ويعرف الحشيمة والادب : " حبتك العافية ولديه .. شعنة كلفت على عمرك وشليت الدلال ؟؟.."
بطي يحط الدلال عالارض : " تعبج راحة الغالية .."
ام حمدة تخبلت على بطووي.. والله ياانك بحسبة ولديه اللي مايبته .. واااايه ماشاالله عليه غااااوي مأدب ويزقرني امااايه .. واااهيه هالولد غير نمونة ..
ام حمدة : " تسلم فديتك .. حياك تفضل الشيخ .. اهبش شي .."
بطي : " لامشكووورة امايه .. ماقصرتوا .."
ام حمدة : " عَـــهواك هو ؟؟ .."
ام حمدة يلست جدا الصماط وخذت السجينه ويسلت تقطع من كل شي شويه وناولت الصحن بطي ..
ام حمدة تناول بطي الصحن : " دوك الغالي .. "
بطي : " ماقصرتي امايه .."
واتطعم بطي شويه من الفوالة عن خاطر العيوز اللي يلست تقطعله الفوالة ..
بطي : " الحمدلله .. صفرة دايمة ان شاالله .."
ام حمدة : " وابويه عليك !! ثرك ماهبشت شي .."
بطي : " مشكورة الغالية .. والله شبعت .. من ساعة ياي من بيت يدتيه وتوفلت عندها وماخلت شي ماعطتني اياه.."
ام حمدة : " هههه .. هيه ماشاالله عليها امي شما .. ماتخلي حد في حاله .. لازم تمزر بطون الخلق .."
بطي والغبنة ظاربتنه : " ها .. انتي شدراج بيدوه شما ؟؟ .."
ام حمدة : " حمدة بنتي خبرتني انها يدوتكم .."
بطي : " زين الحمدلله طلعنا نعرف بعض .."
ام حمدة : " لا .. وازيدك من القصيد بيت .. تراها امايتك كانت ربيعتيه وكنا دوم نلعب في الحارة مع بعض .. بس هزري الحينه ماتحيدني .. "
بطي يطلع تلفونه من مخباه : " لحظة امايه .. الحينه بسوي حق امايه وكلميها .."
اتصل بطي في امايته ..
ام بطي : " مرحبا بشيخ المزايين .. مرحبا بالمحيربي .."
بطي : " هههه .. مرحبا باجي الغالية .. شحالج امايه ؟؟.."
ام بطي : " والله نشقح وننطح .."
بطي : " هههه .. تحملي عن تنطحين الشيبة .."
ام بطي : " هههه .. حشم تراه يالس حذالي.."
بطي : " اوووه .. ماقلت شي انا.."
ام بطي : " ياالله ياللواته .."
بطي : " امايه وحده تريد تكلمج .."
ام بطي : " ياحافظ .. منوهاي ؟؟ .."
بطي : " كلميها وبتعرفين من هاي .."
بطي يناول ام حمدة التلفون ..
ام حمدة : " السلام عليج عوشة .."
ام بطي : " وعليكم السلام ورحمة الله .. "
ام حمدة : " شحالج عوشة ؟؟ .."
ام بطي : " بخير ربي يسلمج .. من الغالية ؟؟ "
ام حمدة : " اممممم .. عوشة تحيدين ربيعتج اللي كانت تلعب معاج يوم كنتي صغيرونه ؟؟.."
ام بطي : " هيه احيدها .. ناعمة الله يذكرها بالخير كانت ربيعتيه .. "
ام حمدة : " وصلتي الغالية .. تراني ناعمة .."
ام بطي : " خلي عنج ؟؟ صدق انتي ناعمة !! "
ام حمدة : " تحيدين الشيرة اللي كانت حذال بيتكم اللي كنا نخش تحتها قشارنا ؟؟؟ "
ام بطي : " وايه .. فديتج ناعمة .. من وين طالعة الشمس ؟؟ "
ام حمدة : " هههه .. من فلي هزاع .."
ام بطي : " هههه .. بعدكم في فلي هزاع ؟؟؟.."
ام حمدة : " هيه بعدني .. انا مااقدر اصبر عنها .."
ام بطي : " ياالله .. وينج انتي ؟؟ وشو علومج ؟؟.."
ام حمدة : " إلا انتي وين ارضج ووين سماج ؟؟ طلعتي من فلي هزاع وماادريبج وين سرحتي ؟؟؟.."
ام بطي : " إلا هني حذالكم .. في بوظبي .."
ام حمدة : " عوشة لازم تحدرين صوبنا .."
ام بطي : " وشعنة انتي ماتحدرين صوبنا ؟؟ "
ام حمدة : " عوشه ... يوزي عن سوالفج .."
ام بطي : " نعووووم .. انتي إلا يوزي .."
ام حمدة : " والله ماادري منو اللي طلعت من دارها ؟؟ انا وإلا انتي ؟؟ .."
ام بطي : " ههههه .. والله مانروملج .. خلاص انشاالله يوم بحدر صوب امايه شما بحدر صوبج .."
ام حمدة : " هههه .. خلاص برقبج ولاتنسين رمستج.."
ام بطي : " لاانشاالله بسرح صوبكم ولا تزعلين .."
ام حمدة : " خلاص عيل الغالية .. فداعة الله .."
ام بطي : " الله يحفظج .."
ام حمدة : " مع السلامة .."
وبندت ام حمدة التلفون ..
وتناول بطي التلفون..
بطي : " ياالله .. ثركم كنتوا وااايد مع بعض .."
ام حمدة : " هيه فديتك .. كنا مانفارق بعض .. كنت كل يوم مطيحة في بيت امايتك .."
ويلس بطي يسولف مع ام حمدة اللي كانت صدق مستانسة من بطي اللي دخل قلبها من اول يلسة معاه ..
.

.
.
وفي بيت عبيد ..
كان خليفة ساير صوب مكتب ابوه ..
دق خليفة الباب ..
بوبطي : " اقرب .. اقرب .."
حدر خليفة المكتب..
خليفة يحب راس ابوه : " السلام عليك بوبطي .. شحالك؟؟ .."
بوبطي يحط الفايل اللي في ايده عالمكتب : " الحمدلله .. يسرك الحال .. "
خليفة يلس على الكرسي وسكت : " ........... "
بوبطي : " شبلاك ساكت ؟؟ في شي فخاطرك ؟؟؟.."
خليفة : " هيه ابويه .. اريد اقولك شي .."
بوبطي قام من على كرسيه ويلس عالكرسي اللي مجابل خليفة .. : " شكلك تريد تتكلم عن الكلية ؟؟ .. لاتتروع تراني اليوم وصيت عرب على اوراقك .."
خليفة : " لاابويه .. مااريد الشرطة .."
بوبطي والغبنة ظاربتنه : " شوو ؟؟ وشعنة ماتريدها ؟؟.."
خليفة : " خلاص مااريد ادرس في البلاد .. "
بوبطي : " يعني تريد تدرس خاري البلاد !! .."
خليفة : " هيه ابويه .."
بوبطي : " بس احيدك تموت وتحيا يوم نييب طاري الكلية !! اشو اللي صابك ؟؟.."
خليفة : " ماصابني شي .. بس اريد اغيّر جو .."
بوبطي : " جان تريد تغير جو.. رح مع اخوك سيف باجر بيسافر .."
خليفة : " ابويه .. سيف بيسير اسبوعين وبيرجع .. وانا اريد اتم هناك .."
بوبطي : " انا مااريد ادخل في مستقبلك .. بس تراني بقولك كلمتين .. بلادك هي دارك وصدقني مابتقهر الغربة .."
خليفة : " ............."
بوبطي : " خلوف .. انا ان شاالله بزهب اوراقك وبطرشها كلية من الكليات اللي في بريطانيا .. وبالتحديد في لندن عسب تييلس في بيتنا وماتتوهق .."
خليفة وهو مستحي : " بس درجاتي ماتساعد .."
بوبطي : " الدرجات ماتهم دام نحن بندفعلهم بيزات .. بس مابترد عن رمستك ؟؟ .."
خليفة : " لا .. خلاص بسير ادرس هناك .."
بوبطي : " اللي يريحك .. تريد شي ثاني ؟؟ .."
خليفة يحب راس ابوه : " لاتسلم الغالي .. مااريد شي .."
وطلع خليفة من مكتب ابوه وسار حجرته .. واتطمن لان ابوه رضى انه يدرس خاري ..
.
.
.
.
.
وفي فلي هزاع ..
حمدة : " يزوووي امايه تزقرنا عسب نيلس مع اخوج ومعاها في الميلس .. ثرنا طلعنا اهل ونعرف بعض .. "
اليازية : " حلفي ؟؟ .."
حمدة : " والله العظيم .."
اليازية : " عيل طوفي نسرح صوبهم .."
حمدة :" اوكي .."
وسارن حمدة واليازية الميلس لان ام حمدة كانت تريدهن ييلسن معاها ومع بطي لانهم كانوا يسولفون ..
حمدة تدق الباب ..
ام حمدة : " احدرن ولاتدقن الباب .. ثره هذا بطي ولد عبيد هب ريال غريب .."
حمدة واليازية حدرن ..
اليازية : " عيل انا بعد هب غريبة .."
ام حمدة : " هههه .. اكيييد هب غريبة .. دام انتي بنت عوشة .."
اليازية : " عمووو.. شدراج في اماية ؟؟ "
ام حمدة : " يوم بتردين البيت تخبريها .. اقربن يلسن حذالي .."
ويلسن صوب ام حمدة .. وظربوها يلسة سوالف ..
وبطي كان مستانس وكل حين يصد صوب حمدة ..
اليلسة كانت حلوة ..
وعقب اذان العشا .. كلهم صلوا وبطي سار المسيد .. واول مارد من المسيد خذ اليازية وسرحوا بوظبي ..
.
.
.
وفي سيارة بطي ..
بطي : " ماشاالله عليهن حمدة وامايتها .. شروات الدوا اللي ينحط عاليرح وينبرى ..."
اليازية : " هيه والله .. صدقك .."
بطي : " ماقالت حمدة شي عني ؟؟ "
اليازية : " هب شغلك .."
بطي : " يزووي .. قولي دخيلج .."
اليازية : " بقولك بس بشرط .."
بطي : " آمري .. اللي تريدينه بيصير .. "
اليازية : " بسير باجر المارينا .."
بطي : " افا عليج .. بس المارينا ؟؟؟ إلا اوديج القمر واردج .."
اليازية : " هههه .. عثـــرة .. كل هذا عسب حمدوو ؟؟ .. ياحيبج حمدوو..عندج حد يحبج .."
بطي : " يلاّ عاد .. انطقي .. "
اليازية : " دام انا يوم ريتك تخبلت عليك اكيييد البنيات بعد بيتخبلن .."
بطي : " يلاّ بلا مقدمات .."
اليازية : " بطوووي البنيه تخبلت عالكندورة السودا والسفرة الحمرا .. وإلا شعرك اللي ذابحنها .. وسيارتك ذبحتها.."
بطي متضايق : " يعني انا ماعيبتها ؟؟ "
اليازية : " ههههه .. انت راعي الحلاه كلها .. كيف مابتعيبها ؟؟ إلا البنيه هيمانه فيك .."
بطي متشقق : " صدق والله !! هي قالت انها تحبني .."
اليازية : " ههههه .. لا .. بس نحن البنات نعرف حركات بعضنا .. يعني مايحتاي الوحده تقول انها تحب .. كفايه عيونها اللي فاضحتنها .."
بطي متشقق من رمسة اليازية .. ياالله واخيراً دخلت قلبها ..
سكت بطي ومارد نطق باي كلمة .. وشغل الاف ام ..
ويلس يتصوخ الشلة ..

مكتوب قلبي بحبك يذوب .. ويصير بيني وبينك اعجاب ..
وتكون لي في العمر محبوب .. تامر وامرك كله مجاب ..
انا اشهد اني منك مغلوب .. والحب للعشاق غلاب ..
انا بامر الرمش مغصوب .. حاضر وألبي لامر الاهداب ..
ترفن نعيم العود غرشوب .. شكله جميل وصدق جذاب ..
مافي وصوفه شي عذروب .. ياغير طيب وحسن واداب ..
لبى الغلا في قلبي دروب .. يختار منها كل ماطاب ..
والشوق له ياخذني بصوب .. واسج به مابين الاصحاب ..
مكتوووب قلبي بحبك يذووووب ..

يالله ياحمد العامري .. ييت عالعوق مررررة .. والله مكتوب اني احبها ..
.
.
.

وفي الهيلي .. في بيت حريز المنهالي ..
كان حريز يالس مع اخوه راشد الوحيد اللي عمره 15 سنة .. يعني كان صف اول ثانوي .. وماكان عنده خوات ..
كان راشد مجابل الكمبيوتر اربع وعشرين ساعة ولايفارج عنه..
وفي هاي الحزة كان يالس عالمسنجر..
حريز : " هههههه .. غربلات بليسك .. اشو تكتبلها ؟؟ .."
راشد : " ماشي .. اخرط عليها بكمن كلمة واقوللها اني احبها.. وخلاف بتذوووب البنيه وبتسوي اللي انا اريده .."
حريز : " هههههه .. والله عيال هالزمن هب هينيين .. "
راشد : " يعني انتوا ماكنتوا تقردنون ؟؟"
حريز : " لاوالله ولاعندنا خبر .."
راشد : " خل عنك .. اكيد كنت تقردن بنات الحارة .."
حريز : " هههه .. لاوالله .. نحن يوم كنا نحب .. كنا نحب وحده هب مليووون وحده .. "
راشد : " اها .. بس نحن مانحب .. نحب نقردن لمصلحتنا الشخصية .. زين خل عنك هاي السوالف .. يلاّ اعترف كنت تحب منو ؟؟ .."
حريز : " يالله يابوسنيدة .. ييت عالعوق .."
راشد : " لاااا .. شكله اخويه هيمان .."
حريز : " إلا من كثر الحب بغرق .."
راشد : " لهاي الدرجة ؟؟؟؟ "
حريز : " واكثر يارشووود .."
راشد : " من هاي اللي مخشعة حريز المنهالي ؟؟ .."
حريز : " هاي وحده مامنها هنتين .."
راشد : " ياويل حالي عليك يااخويه .. يضرب الحب شو بيزل.."
حريز : " كنت احب بنت ييرانا .."
راشد : " انت تطري قوم عمي عبيد المحيربي اللي كانوا حذالنا قبل لانتحول ؟؟!! "
حريز : " عليك نور .. "
راشد : " امممم .. يعني انت تحب يزووووي .."
حريز يتنهد : " آآآآآآه .. والله اني اتخبل عليها .. "
راشد : " بس انت من سنين ماريتها ؟؟ .."
حريز : " ادري .. وهذا اللي معور قلبي .."
راشد : " والله انا لوكنت مكانك وبهالحلاة كلها وعمري 23 .. والله لاقردن البنات .. ومااخلي وحده إلا وارقمها .. وبنسى حب الطفولة العذري مالك .."
حريز : " والله في شباب كبري يرقمون ويغازلون .. بس انا مااحب هالسوالف .. وبعدين حب الطفولة العذري اخيرعن حب الطفاسة مالكم .."
راشد : " ههههه .. زين كيف تحب وحده مريتها من سنين ولاتعرف شكلها كيف ؟؟ يمكن غدت خسفة ؟؟"
حريز : " خسفة في عينك .. امبونها كانت غاوية المحيربية .. والله ماريت وحده فحلاتها .."
راشد يقلد اخوه ويتمصخر : " محيربية .. محيربية .."
حريز مغيظ : " المحيربية تاج راسك يالهرم .."
راشد : " هههههه .. تهبي من اصلها .."
حريز يكفخ راااشد : " لاتغلط .. لاتغلط .. والله لادفنك مكانك جان غلطت وديه ثانية .."
راشد : " آآآآآآي .. خلااااص .. ولابييب طاريها علساني وديه ثانية .."
حريز : " يكون احسن .."
راشد : " آآآآي فج عني .. "
حريز يفج عن اخووووه : " بس هالمرة بسامحك .."
راشد : " عنلاتها هاي الخمام .. ياخي رح خذها وفكنا دام تريدها ولاتييلس تكفخنا.."
حريز مغيظ : " عيل برقبك !! .."
قام حريز وير اخوه من كندورته .. ونزلوا تحت وساروا حجرة امايتهم ..
حريز حدر حجرة امايته بدون مايدق الباب حتى : " امااااااايه .. امااااايه .."
ام حريز قفزت من رقادها متروعة : " بسم الله الرحمن الرحيم .. اشو بلاك ؟؟ وليش قابظ اخوك من كندورته ؟؟؟.."
حريز يفج عن اخوووه : " امايه اريدج اليوم تخطبيلي .."
ام حريز ارتاح فوادها : " وااايه .. ابركها من ساعة .. والله انك روعتني .."
راشد يفتر صوب حريز وكان مغيظ : " يعني بتظوي المحيربية عناااد ؟؟ "
حريز طنش اخووه وافتر صوب امايته : " امايه اريد اليازية بنت عبيد المحيربي .. اخت بطووي ربيعي .."
ام حريز : " يعلني افداها .. والله انها شيخة المزاييين .. "
راشد افتر صوب اخوه .. بس يوم شافه ضحك في ويهه وتقرب منه ولوى عليه .. : "هههه .. بالبركة اخويه .. منك المال ومنها العيال.."
حريز نسى غيظه : " الله يبارك في حياتك .. "
ام حريز توقف عَــحيلها : " ويــدي !! شعنة تباركون لبعض ؟؟ بعدنا ماشاورنا البنيه ولاشاورنا اهلها .."
راشد : " بس اباركله مقدماً .."
حريز : " امايه .. كلمي اهلها الحينه .."
ام حريز : " عنبوه .. والله ماسويت حق الناس انصاص الليالي .."
راشد : " مايقدر يصبر .. المحيربية خشعت المنهالي تخشيع ..ههه .."
ام حريز : " هههه .. شبلاك عأخوك ؟؟ خلاااص ان شاالله باجر بكلم عوشة وبسرح صوبهم .. بس انا من زمان هب مكلمتنهم ولاادل بيتهم ولااعرف رقمهم ؟؟.."
حريز : " ماعليه .. انا بكلم بطي وبخليه يعطيني رقم عمووو عوشة .."
ام حريز : " خلااص .. يصير خير .."
وقررت ام حريز انها تكلم ام بطي مبدئياً .. يعني لو وافقوا بتسرح صوبهم وبتخطب اليازية لولدها رسمي ..
وحريز كان متشقق .. يالله .. واخيراً بقربج بالحلال يااليازية .. والله اني كنت ارقب هاللحظة من سنين .. ليتك يارشووود سويت هالحركة من زمااااان ..
ويلس حريز بروحه ويهاذي ويهويس .. حليله كان يريد اليازية من زمااان والحينه تحققت امنيته ..
.
.

يوم الخميس .. في بيت سهيل المحيربي .. هزاع يالس يعلب بليستشين مع ميثانة .. وشالين البيت على راسهم من الحشرة ..
هزاع : " هههاااااااي .. هاي تاسع مرة اغسل شراعج .. خلاااص اعترفي انج خسرانة .."
ميثانة : " لا .. بلعب مرة ثانية .. بغلبك هالمرة .."
هزاع : " من ساعتين وانتي تقولين بغلبك وبغلبك .. ميثانة اعترفي بالهزيمة .. "
أحمد : " هههههه .. انت تدري انها عيناوية .. والعيناوية مايعترفون بالهزيمه ولايرضون بها .. "
هزاع : " هب هباج الله .. غدي وحدايه شراتي وصدقيني هاييج الحزة محد بييب راسج .."
ميثانة تمد ايدها جدى اخوها : " تشوف عروق ايدي .. (تأشر على ايدها) العين متربع في عروقي ويمشي شروات مايمشي الدم .. "
أحمد : " ياويلي عالولاء .. بصراحة سكتيه .. تسلمين والله دافعتي عنا كلنا .. "
هزاع وهو قافط : " بسك .. بسك .. اونكم كلكم عيناوية .. ماعليه بنشوف شوبتسوون في المباراة اليايه .. "
ميثانية : " أكيد بنفوز .. وبمرتبة الشرف وامتياز بعد .. "
احمد : " ايوه .. ايوه .. عاشت العيناوية .."
هزاع يوقف على حيله : " انت العب مع العيناوية .. انا بسير عند بطبوط .. من زمان ماريته .. "
ميثانة : " بطوي بعد عيناوي .."
هزاع مفول : " بتطبين هالسالفة وإلا شكلج متولهه عالضرب .. من زمان محد أدبج .. "
أحمد : " لا دخيلك استريح .. محد بينضرب .. رح عند حبيبك وفكنا من حشرتك .."
وسار هزاع حجرته عسب يتسبح .. وخلص من سبوحته .. ولبس بنطلون بيج وبودي عليه رسمات وشخابيك بس كان حلو .. كانت البدله مبينه ملامح جسمه الحلو .. وخذله قميص بس ربطه على خاصرته ومالبسه .. وكان شعره مش طويل .. يعني تقريباً شعره يوصل الين خشمه ..ورفع شعره الخرسان على فوق ... وطلع من حجرته ..
وهونازل يبا يطلع من البيت ميثانة انتبهت عليه ..
ميثانة مبهته : " حماده .. صد على هزاع .."
أحمد سوالها طاف وطنشها : " العبي .. العبي .. خلي عنج هزاعو.. "
ميثانة تحط ايدها على ويه أحمد وتلف ويهه صوب هزاع : " ريت اللي انا اطريه ؟؟!!! .."
أحمد مبحلق عيونه جنه اول مرة يشوف هزاع : " شومسوي بعمرك ؟؟ وشعنة جي متكشخ ؟؟؟ ساير تقردن بنات ؟؟ "
هزاع : " اي كشخة الله يخليك .. إلا هي بدله .. وبعدين انا مااقردن هالاشكال .. تدري اني مااحب هالسوالف .."
أحمد : " يالله .. جسمك غاوي يالهرم .. خلاص انا بسجل معاك في النادي .."
ميثانة : " ههههه .. يعني بتشل حديد ؟؟ "
أحمد : " هيه .. بغدي شروات اخويه .. "
هزاع يفتر عنهم ويجبل صوب الباب عسب يطلع : " اتواقعوا على راحتكم .. انا طالع الحينه .. تشاااااااو .."
أحمد : " زوزو .. "
هزاع يفتر صوب أحمد . وشعره الخرسان يتحرك معاه : " هلاااا .. "
أحمد : " والله شكلك عجييييب .. وخصة بالشعر اللي رافعنه .. "
ميثانة : " هيه والله .. خلاااص دوم ارفع شعرك .. "
هزاع غمزلهم بعينه .. وطلع من البيت .. وركب سيارته الرينج ..
.
.
.
.
.
وصل هزاع بيت عمه .. ودخل بسيارته داخل البيت لان باب القاراج كان مفتوح .. وطبعاً هو ظاري انه يدخل سيارته بيت عمه .. وبركن السيارة ..
نزل هزاع .. وخذ نظارته الشمية ولبسها ..
وقبل لايحدر البيت هوّد ..
هزاع : " هود .. هود .. "
سيف كان يشوف التلفزون : " هدا .. هدا . .اقرب محد اهنه .. "
هزاع يحدر : " السلام عليك والرحمة .."
سيف يوقف على حيله ويخاشم هزاع : " مرحب .. مرحب .. وعليك السلام .."
هزاع : " مرحب باجي .. شحالك سواف ؟؟ "
سيف : " والله يسرك الحال .. طاب حالك .. شوكل هالكشخة ؟؟ ساير تقردن من ورانا ؟؟ .. "
هزاع : "هههه .. ويني ووين البنيات .. وشوعلومك بعد ؟؟ .."
سيف : " والله اليوم ان شاالله عقب ساعتين بسافر .. "
هزاع : " والله ؟؟ وشعنة ماتعزم ؟؟ .. "
سيف : " والله مامداني اسوي شي .. الشباب قرروا فجأة .. ان شاالله مرة ثانية .. "
هزاع : "يالله تروح وترد بالسلامة .. "
سيف : " تسلم الغالي .. "
هزاع : " بطوي في حجرته ؟؟ .."
سيف : " لا .. في المطبخ اللي حذال الملاحق .. "
هزاع :" شويسوي هناك ؟؟ "
سيف : " انت تعرف بطي . اكيد يريد شي ويتحايل على امايه .. "
هزاع : "هههههه .. انزين .. اليازية وينها ؟؟ اخافها إلا تكون هناك وهب متلحفه ؟؟.."
سيف : " لاتتروع .. في حجرتها .. رح المطبخ .. "
هزاع : " Ok .. thanks .. see you later .."
سيف : " قلنا انك لابس بدله .. بس ماقلنا تحيس لسانك ؟؟ "
هزاع : " تدري بعد .. الواحد لازم يساير اللبس .. يعني لازم الحينه ارمس انجليزي دام اني لابس بدله .."
سيف : " الحمدلله والشكر .. الله يكملك بعقلك .. "
هزاع : " هههههههه .. يالله برايك .. "
سيف : " وداعة الرحمن .."
.
.
.
.

وفي المطبخ ..
بطي : " امايه خلاااص .. دخيلج بعرس .. بودر الصياعة واللواته .. بس دخيلج اخطبيلي اللي اريدها .. "
ام بطي : " لاحول ولاقوة إلا بالله .. خلني انت الحينه وخلاف يصير خير .. "
بطي : " امايه توعديني ؟؟ "
ام بطي : " اشو بعد توعديني ؟؟ جيه تتحراني وحده كبرك يالس تسولف معاي جي وتقوللي توعديني وماتوعديني ؟؟ "
هزاع حدر : " السلام عليكم ورحمة الله وبركاته .."
ام بطي تفتر بس ماعرفت هزاع وعلى طول تغشت بشيلتها : " اشو هالمذهب بعد ؟؟ منو هذا اللي يحدر بيت الناس ولايهود ؟؟ "
بطي يخاشم هزاع : " ههههه .. وعليكم السلام والرحمة .. هلا هزاع .."
ام بطي ترفع الغشوة عن ويهها : " وايه .. هزاع ؟؟ ..اشو لابس؟؟ غادي جنك واحد من البيادير ؟؟ .. "
بطي ناقع من الضحك : " ههههههه .. ايه يالبيدار اطلع خاري .. "
هزاع يحب راس ام بطي : " الله يسامحج عمو .. هاي لزوم الكشخة .."
ام بطي : " والله انك بالكندورة والسفرة اغوى .. "
بطي : " حرام عليج تكسرين مياديف الريال .. والله انه يطيح البنيات .."
ام بطي : " هب هباك الله .. ولديه هزاع هب شراوتك .. "
بطي : " شوقصدج امايه ؟؟ "
ام بطي : " هزاع مايعبر البنات ولايسويلهن سالفه .. "
بطي مغيظ : " والله اني مااقردن ولااغازل .. وجان إلا في خاطرج شي ثاني قوليه ولاتخلين شي في خاطرج .."
هزاع : " ههههه .. هد اعصابك .. عمو تسولف معاك .. "
ام بطي : " خله يزعل .. ثره بيخسر شي كان يريده توه .."
بطي يتقرب من امه : " افااااا .. انا ازعل من امايه ؟ والله ماعاش من يزعل من ام بطي .. امايه .. بتسويلي اللي كن اريده ؟؟"
ام بطي : " هههههه .. يالله ياللواته .. اسميه ولديه يمشي ورى مصلحته وبس .."
هزاع : " هههههههه .. لازم .. كل واحد يدور مصلحته في هالدنيا .."
بطي يفتر صوب هزاع : " هزاع .. بصراحة شكلك يخبل .. "
هزاع : " تسلم .. عيونك الاحلى .."
بطي يرمش بعينه : " فديت عيوني .. ياويلي عليهن .. "
ام بطي : "ههههه .. ماادري هالولد طالع على منو ؟؟ "
بطي : " طالع على عوشة حرمة عبيد .. "
ام بطي : " هههه .. بسم الله عليّه .. انا يوم كنت كبرك ماكنت اسوي سواياك .. "
وشويه وتلفون المطبخ يصيح وام بطي تشله ..
ام بطي : " مرحب .. "
سيف : " هلا امايه .. "
ام بطي : " هلا بولديه سيف .. خير امايه .. تريد شي ؟؟ "
سيف : " لاسلامة راسج الغالية .. بس في حرمة تقول انها ام حريز تريد تكلمج .. "
ام بطي : " ام حريز ؟؟ انزين خلاص حوّل المكالمة على تلفون المطبخ .. "
سيف : " ان شاالله امايه .. "
وعقب ماحوّل سيف المكالمة ..
ام بطي : " السلام عليكم ورحمة الله .."
ام حريز : " وعليج السلام والرحمة .. مرحبا عوشه .. شحالج وكيف صحتج ؟؟ عساج مرتاحة ؟؟ .."
ام بطي : " والله بخير ربي يسلمج .. والله اسمحيلي الشيخة ماعرفتج ؟؟ "
ام حريز : " والله ماالومج .. من سنين مارينا بعض .. "
بطي يرز ويهه كالعادة : " امايه . هذي ام حريز ربيعي .. اللي كانو ساكنين حذالنا وخلاف تحولوا العين .. "
ام بطي توها تتذكر : " هيـــــــه .. هلااا والله بام حريز .. شحالج الغالية ؟؟ والله توني اتذكرتج .. وين كل هالغيبة ؟؟ .."
ام حريز : " والله في هالدنيا .. انتو شحالكم ؟؟ "
ام بطي : " الحمدلله يسرج حالنا .. وشو علومكم انتو ؟؟ "
ام حريز : " والله بخير ربي يعافيج من كل شر .. عوشه انا مااريد اطوّل عليج وبدخل في السالفة على طول لان ولديه حريز حشرني .. "
ام بطي : " خير ان شاالله ؟؟ .. "
ام حريز : " والله نحن نريد نقربلكم اكثر .. نحن نريد بنتكم اليازية حق ولدنا حريز .. "
ام بطي : " والله اربكها من ساعة .. ولدكم حريز بحسبة ولديه .. وماشالله عليه ريال وماعليه كلام .. بس بعد لازم نشاور البنيه وابوها .. "
ام حريز : " خذوا راحتكم الغالية ونحن هب مستعيلين .. "
ام بطي : "يصير خير ان شاالله .. "
ام حريز : " تسلمين الغالية .. ماقصرتي .. خلاص عيل برايج .. "
ام بطي : " وداعة الله الغالية .. "
ام حريز : " الله يحفظج .. "
وسكرت ام بطي التلفون ..
بطي : " امايه شوالسالفة ؟؟ .. "
ام بطي : " والله خير .. حريز ربيعك يريد اليازية اختك .. "
بطي : " افااااا .. حريز يظوي ختيه وانا ولا عندي خبر ؟؟ والله ماهقيتها من حريز !! .."
ام بطي : " عالعموم شكلنا بنردهم .. "
هزاع : " شعنة عمو ؟؟ حريز ريال ماعليه كلام والكل يتمناه .. "
ام بطي : " بس انت ولدعمها واولى من الغريب .. "
هزاع : "بس انا مااريد اعرس وهب مستعيل عالعرس .. ولاتوقفون في ويه نصيب البنيه .. وخلوها تروح مع نصيبها .. "
ام بطي : " هذا شورك ؟؟ .."
هزاع : " هيه .. وشاوروا البينه .. تراها هي اللي بتعرس هب انتوا .. "
بطي : " صدقه هزاع .. "
ام بطي : " خلاص ان شاالله يصير خير .. ودامك رخصت بالبنيه بنشاورها وبنرد عالعرب خبر .. "
بطي : " يالله خير ان شاالله .. "
هزاع : " بطي .. رح البس شروات بدلتيه وخلنا نطلع .. "
بطي : "والله ماادلها وين بدلتيه اللي شروات بدلتك ؟؟ تعال بنسير الحجرة وبندور .. "
هزاع : " يلاّ قم .. "
وراحوا بطي وهزاع حجرة بطي ..
وسارت ام بطي حجرتها عسب تتصل في بو بطي ..
ام بطي تتصل في بوبطي ..
بوبطي : " مرحبا .. مرحبا ملاااايين .. هلا بغناتي .. هلا بشيخة المزايين .. "
ام بطي : " هههه .. شحالك عبيد ؟؟ .. "
بوبطي : " والله كانت حالتيه ماتسر عدو ولاصديق .. بس من سمعت هالحس غديت احسن عن اول .. والله احس بعمري مرتاح الحينه .. "
ام بطي : " فديتك والله .. "
بوبطي : " يالله .. والله اني اموت واحيا يوم تتفديني .. "
ام بطي : " هههه .. بوبطي مشغوول انت ؟؟.."
بوبطي : " والله لوكنت مشغول بفضى عشان خاطرج .. "
ام بطي : " تسلملي والله .. "
بوبطي : " الله يسلمج الغالية .. آمري الغالية .. شي في خاطرج ؟؟ "
ام بطي : " مايامر عليك عدو .. عبيد .. عرب يريدون يظوون بنتنا اليازية.."
بوبطي : " منو هالعرب ؟؟ .. "
وخبرت ام بطي بوبطي كل السالفة ..
بوبطي : " يعني ولد عمها رخصبها ؟؟ .."
ام بطي : " هيه الغالي .. "
بوبطي : " خلاص عيل .. بشاور البنيه ان شالله يوم برد من الدوام .."
ام بطي : " خلاص عيل برايك .. "
بوبطي : " شي في الخاطر الغالية ؟؟ "
ام بطي : " لاوالله .. تسلم .. قلت كل اللي عندي .. "
بوبطي : " وداعة الرحمن .. "
مادخلت ام بطي في السالفة .. وحبت ان ابوها هو اللي يكلم البنيه ويشاورها لان بوبطي وايد يحب اليازية ..
.
.
.
.
في حجرة بطي ..
هزاع : " هذي البدلة .. حصلتها .. "
بطي يفتر صوب هزاع : " صدق ؟؟؟ .."
هزاع : هيه والله .. حصلتها .. "
بطي : " يالله .. تحيد من وين خذنا هالبدله ؟؟ .."
هزاع : " هيه احيد .. من السيتي في دبي ..من زارا .. "
بطي : " تحيد منو اللي اختارتلنا البدله ؟؟ .. "
هزاع : " هيه .. اليازية اللي اختارت البدله وهاييج الحزة كانت مغيظة بعد .."
بطي : " ههههه .. كنت مطفربها .. هي تريد تروح ستاربكس .. وانا اقوللها اختاريلنا بدله .. "
هزاع : " هههههه .. هيه احيد .. يالله الحينه غدت عروس .. "
بطي : " مسرع ماكبرنا .. "
هزاع : " هيه والله .. صدقك .. يالله عاد اتحيرنا .. رح اتسبح وخلنا نطلع .. "
بطي : " بسير الحينه .. بس تعال .. انت اشو سالفتك ؟؟ من ساعة وانت مشتط إلا وتريد تطلع .. لا يكون مواعد من ورانا ؟؟ .. "
هزاع : " بطوي دخيلك رح اتسبح .. مالي بارظ حق سخافاتك .. "
وسار بطي يتسبح .. وخلص من سبوحته واتكشخ واتزقرت .. ولبس شرات بدله هزاع .. وقلده ورفع شعره شراته ..
وساروا المارينا ..
.
.
.
.
عالغدا ..
بوبطي : " اليازية .. "
اليازية : " نعم ابويه ؟؟ .. "
بوبطي : " اريد اكلمج في المكتب عقب الغدا .. "
اليازية : " ان شاالله .. "
مريم : " ابويه عادي ايي معاها ؟؟ .."
شما : " حتى انا .. "
بوبطي : " استريحوا .. "
مريم : " انزين .. عقب ماتخلص من هالسالفة الخطيرة .. انا بيي الحجرة وقوللي سالفة خطيرة .. عسب نكون متساوين .. "
ام بطي : " ههههه .. اسميها مريامي تريد تسوي مساواة .. "
اليازية : " مريامي .. لاتحاولين انج توصلين مستواي .. اصلاً انا المفضلة عند ابويه .. "
مريم : " ابويه .. صدق اللي تقوله اليازية ؟؟ "
بوبطي : " هالرمسه كانت صدق .. بس انتي الحينه بتاخذين مكانها .. "
اليازية تفتر صوب ابوها : " شوووو ؟؟ ليش ان شاالله ؟؟ .."
بوبطي : " بخبرج عقب الغدا .. "
حست اليازية بغزة في صدرها .. حست انها صدق بتبعد عن ابوها ..

000000000000000
000000000000000
0000000000000000000000
000000000000000000000
0000000000000000
000000000000000
00000000000
000000000000
بسكم عااد عن الطمع وايد حطيتلكم و انشالله ماببطي

الجزاء8

لظاهر وايد بطييت عليكم

يللا بكملها

ترا هاذي عيديتكم.. ^_^

عقب الغدا .. في حجرة بوبطي ..
اليازيه تدق باب المكتب : " ابويه .. احدر ؟؟ "
بوبطي : " اقربي .. اقربي .. "
اليازية تحدر الحجرة : " خير ابويه .. شو السالفة ؟؟ .."
بوبطي : " سكري الباب وراج وتعالي يلسي حذالي .. "
اليازيه : " ان شاالله .. "
وتقربت من ابوها ويلست حذاله ..
بوبطي يمسح بايده على راس بنته : " والله وكبرتي يااليازية .. "
اليازية بدلع : " هيه .. بس انتو ماتقدرون .. "
بوبطي : " هههه .. يالله يالبزا .. "
اليازية : " ماعندك غيري .. لازم بتدلعني .. "
بوبطي : " فديتج والله .. اليازية انا مابطول عليج وبدخل في السالفة على طول .. "
اليازية : " خير ان شاالله ؟ .. "
بوبطي : " الخير في ويهج .. البنيه مهما كانت مدلعة ومهما كانت مقربه لاهلها لازم آخرتها تعرس وتروح بيت ريلها .. "
اليازية : " ............ "
بوبطي : " تحيدين حريز المنهالي اللي كانوا ساكنين حذالنا ؟؟ "
اليازية : " هيه .. "
بوبطي : " حريز خطبج .. وصدقيني مابتحصلين ريال اخير عنه .. ماشالله عليه الكل يمدحه .. وانتي غاليه عندي ومستحيل اقولج خذي واحد مايستاهلج .. "
اليازية بعدها مااستوعبت رمسة ابوها ..
بوبطي : " خذي راحتج وفكري .. واذا انتي ماتريدينه محد بيجربج عليه .. "
اليازية توها تستوعب السالفة : " ها .. ان شاالله .. "
بوبطي : " ههههه .. شبلاج دهمانة ؟؟؟ .. عادي هالحالة تصيب كل بنيه .. "
اليازية ويهها محترق وماتعرف شوتقول : " ها .. خلاااص ابويه .. تامرني بشي ؟؟ .. "
بوبطي : " هههههه .. لاسلامة راسج .. فكري على راحتج .. بس لاتيخسين الريال لانه يتريا الرد .. "
اليازية ويهها محترق : " ان شاالله .. "
وطلعت اليازية من الحجرة .. وعلى طول جبلت صوب حجرتها ..
وفرت عمرها عالشبرية ..
ياربي .. صدق اللي سمعته وإلا كنت احلم ؟؟؟
معقوووولة انا اعرس ؟؟
يالله ياربي مااتخيل عمري وانا في بيت ثاني غير بيت ابويه ..
والله ماادري شواسوي .. بستخير وخلاف بتوكل عالله ..
تمت اليازية تهاذي وماعرفت شوتسوي .. لان موقفها صعب ..
.
.
حست انها اليوم انسانه ثانية .. حست انها في عالم غير عالمها .. حاولت انها ترقد بس ماياها رقاد .. وكانت الساعة 3:30 .. طلعت من حجرتها وجبلت صوب حجرة خليفة .. ترددت قبل لاتدخل قالت في خاطرها يمكن يكون راقد .. بس اول ماتقربت من حجرته شافت الباب ملايم والليتات هب مبنده ..
دقت الباب ..
خليفة يوايج : " هلا اليازية .. احدري .. مايحتاي تدقين الباب .."
اليازية تحدر : " بس من الذوق والاتيكيت اني ادق الباب .."
خليفة يرتب نطة السفربس ماعرف كيف يرتبها .. تدرون الرياييل ماينفعون في شي ..
خليفة يفتر صوب اليازية ويشوفها بنظرة ترجي : " اممممم .."
اليازية : " أعاونك ؟؟ .."
خليفة متشقق : " هيه .. هيه ..."
اليازية : " اول شي عطني بدلك وثيابك وخلاف عطني القشار الباقي .. ولاتودي معاك بدل وايد .. لانك اكيد بتاخذلك بدل من هناك .. "
خليفة : " اوكي .. "
اليازية ترتب الشنطة وترمس : " تصدق ماياني رقاد ؟؟ .."
خليفة : " اكيد تفكرين في عريس الغفلة ؟؟ .."
اليازية : " والله مااقدر مااحاتي وافكر .. هذي حياتي اللي طول عمري بعيشها معاه .."
خليفة : " استخرتي ؟؟ .."
اليازية : " هيه .."
خليفة : " وشو ريتي ؟؟ .."
اليازية : " ماريت شي .. "
خليفة : " ماحسيتي بشي ؟؟ .."
اليازية : " امممم .. حسيت اني من كم يوم مرتاحة نفسياً وماافكر فيه وايد .."
خليفة : " فديت ختيه .. والله غدت حرمة .. لاتتروعين هذا يعني انج مرتاحتله وانه بيريحج ان شاالله .. "
اليازية محمر ويهها : " ان شاالله .."
خليفة يلوي على اخته : " بتوله عليكم .."
اليازية : " خلوووف .. ماتولهت على علاية ؟؟ .."
خليفة فج اخته واتغيرت ملامحه : " وليش اتوله عليها ؟؟ جي هي منو ؟؟ .."
اليازية : " اريد افهم ليش تكابرون في حبكم ؟؟ هاي حياتكم .. ليش تحاول تبتعد .. وإذا كنت غلطان اعترف بغلطتك .. لاتتحرى ان شخصيتك بتضعف اذا اعتذرت أو استسمحت منها .. بالعكس انت بتكبر في عينها وبتسويلك الف حساب .. "
خليفة : " انت ماتعرفين شواللي صار .."
اليازية : " ومن متى تخش عني شي ؟؟؟ والله ماهقيتها منك يا(بو دعي) .."
خليفة مغيظ : " تريديني اقولج اني لايمتها بطراق ؟؟ تريديني اقوللج اني هزبتها ؟؟ .."
اليازية منصدمة : " ااااه .. شوتقول انت ؟؟ اكيد انت هب صاحي .. صفعت البنيه ؟؟ .."
خليفة بضعف : " هيه .."
اليازية : "وبتسافر عقب كم ساعة والبنيه هب راضية عنك ؟؟ .."
خليفة : " رضت وإلا مارضت .. هالشي مايهمني .. "
اليازية مفوله وهدت اللي بيدها : " ايه .. اعقل شوي .. وين مخك انت ؟؟ خليفة كيف بتسافر وهي هب راضية عنك ؟؟ يعني انت تتهرب من اللي سويته ؟؟ .."
خليفة : " لا .. انا مااتهرب ولااتروع من شي سويته .."
اليازية تحط عينها في عينه : " خليفة .. حبيبي اللي انت تسويه غلط .. صدقني غلط .. خلوف انت تريد كلية الشرطة بس انت ماتقدر تتحمل اللي يستويبك عسب جي انت تريد تسافر وتحاول تنسى كل اللي صار .. خليفة انت تهدم مستقبلك وصدقني سفرك بيزيد هموم قلبك ومابينقصها .. "
خليفة اتنهد : " آآآه .. زادن همومي وإلا نقصن .. منو يفتكر ؟؟ .."
اليازية : " شو منو يفتكر ؟؟ صدقني حال البنيه ماتسر .. من كم يوم واهلها يودونها من مستشفى لين مستشفى وماحصلولها علاج .. بس علاجها في يدك انت .. "
خليفة يضحك باستهزاء : " ليش ؟؟ انا غديت دكتور ولاعندي خبر !! .."
اليازية : " خليفة ليش تكابر ؟؟ خليفة اصحى من اللي انت فيه .. صدقني انت هب حاس بشي .. خليفة انت بتتغرب والسبة هالسالفة السخيفة .. صدقني السالفة ماتسوى .. "
خليفة : " كيف ماتسوى ؟؟ انا خسرت كل شي .. حتى آخر انسانة كنت حاط كل آمالي فيها خسرتها .. اصلاً انا نحس .. "
اليازية : " للأسف ايمانك بربك ضعيف .. بالعكس الانسان يتعلم من مصايبه ويقوى عقب كل مصيبه ومايضعف .. خليفة انت انسان قوي ومااظن بترضى بالهزيمة .. خليفة دخيلك لاتسافر .."
خليفة : " خلاص مااقدر ارد عن رايي .. عطيت ابويه كلمة ومابرد عنها .. "
اليازية يودت يد اخوها وعيونها كلها دموع : " خليفة لاتسافر .. صدقني علاية بترضى عنك ومااظن اصلاً هي ماخذه على خاطرها منك .. دخيلك خلوف .. انا بكلمها وبتفاهم معاها .. وابويه اكيد بيفرح إذا عرف انك مابتسافر .."
خليفة : " يزوزي .. وايد اتأخرتي .. مااظن بترضى .. لان السالفة استوت من شهر ونص .. "
اليازية : " يالظالم !!! من شهر وشويه وانت ماتكلم علاية ؟؟ خليفة انت وايد تغيرت .. مااحيدك تصبر عنها ؟؟ .."
خليفة : " والله عمري ماصبرت عنها ولابصبر .. بس الدنيا .."
اليازية : " الدنيا مايخصها .. كل شي بيدك انت وبس .. خليفة انا باجر بتفاهم معاها بس لاتسافر .. "
خليفة : " استسمحي منها وقوليلها اني بعدني احبها وعمره حبي لها مابينقص حتى وانا بعيد .. "
اليازية : " يعني بتسافر ؟؟ .."
خليفة : " خلاص هالشي من زمان تقرر .. "
اليازية : " خلوووووف .. "
خليفة : " حبيبي يزوي .. سيري ارقدي .."
اليازية : " بس ... "
خليفة يقاطعها ويحبها على خدها : " اتذكريني ولاتنسيني .. وانا بحاول اني دوم اكون على اتصال معاج .. بس دخيلج كلمي علاية ولاتنسين الرمسة اللي وصيتج عليها .. "
اليازية ودموعها شلال على خدها : " ان شاالله .. لاتوصي حريص .. بكلمها واكيد بترضى عنك .. بس دخيلك اتحمل على عمرك .. "
خليفة يلوي على اخته : " ان شاالله .. بس دخيلج بسج صياح .. غرقتينا .. "
اليازية تضرب اخوها : " سخيييف .. "
وسارت اليازية حجرتها عسب ترقد وتخلي اخوها يرقد عسب يرتاح لان باجر وراه سفر .. ولانها كانت ناويه تنش من غبشة عسب تسير وتقدم اوراقها في الجامعة .. بس هالليله خليفة النوم ماقارب جفونه لانه كان يفكر كيف بيعيش بعيد عن اهله واحبابه ..
وسيف كان راد في هاليوم من السفر .. يعني سيف خلص من هياته .. بس ماكان يعرف ان اخوه بيسافر عنه ..
.
.

الصبح الساعة 9:30 بالضبط .. الكل مستعد لتوديع خليفة .. إلا ام بطي اللي كانت مندسه في حجرتها وماكانت قادره تشوفه .. كانت تحس بتأنيب الضمير .. كانت تحس انها قصرت في حق خليفة عسب جي هو بيسافر ..
الكل كان في البيت .. حتى عايله عمهم سهيل كلهم إلا علاية ماكانت معاهم ..
كان خليفة يدور بعينه عنها بس ماحصلها وفقد الأمل في انه يشوفها مرة ثانية .. حس ان هموم الدنيا شروات الجبل الكبير على صدره .. ودع اهله بضيج بس ماشاف امايته ..
خليفة يتخبر سيف وبطي : " وين امايه ؟؟ .."
بطي باستهزاء : " يهمك ؟؟ .."
خليفة : " اكيد يهمني .. هذي امايه ورضاها عندي عن رضى الدنيا كله .. "
بطي : " وجان انت وايد مهتم لرضاها .. عيل شعنة بتسافر ؟؟ .."
هزاع : " بطي اذكر الله .. هالسالفة خلصنا منها .. "
بوبطي : " بطي يوز عن اخوك .. "
بطي مغيظ : " ان شاالله .. "
وسار خليفة عند امايته عسب يودعها والكل كان يترياه برع ..
حدر الحجرة لان باب الحجرة كان مفتوح ..
كان يدور امايته بعينه .. ماانتبه إلا على جسم طايح عالشبرية منهمك في الصياح ..
تقرب منها بكل عفوية ويلس حذالها : " امايه .. "
ام بطي ترفع راسها وعيونها كلها دموع وتصد عاللي زقرها : " عون امايتك انت .. "
خليفة بلا احساس دمعت عينه على صياح امايته ولوى عليها : " خلاص بسير انا .. اتحملي على عمرج الغالية .. "
ام بطي ماتقدر ترمس من الصياح : " خليفة انا قصرت عليك بشي ؟؟ انت تريد شي وانا ماسويتلك اياه ؟؟؟ خليفة والله جان تريد عيوني بعطيك .. بس دخيلك لاتسافر .. "
خليفة مايريد يفج عن حضن امايته ومايريد يبتعد عن حضن امايته الدافي : " امايه .. خلاص انا بسافر عقب ساعة .. وهاي السالفة انتهينا منها .. امايه انتي عمرج ماقصرتي عليّه بشي .. الله العالم انج عوضتيني عن امايتي ويمكن اكثر بعد .. امايه انا عمري مابنسى جميلج معايه .. "
ام بطي تناهي : " لاتوفي رمستك .. اي جميل واي خرابيط .. انت ولديه وواجب عليّه اني مااقصر عليك بشي .. "
خليفة يمسح دموعه ويوقف على حيله عسب مايضعف ويرد عن كلامه : " خلاص الغالية .. برايج .. واتحملي على عمرج .. "
وطلع من الحجرة ومسح دموعه وقوى قلبه وركب سيارة هزاع (رينج) ..وكان بطي وسيف وهزاع وخليفة في الرينج ..وكان بوبطي وبوهزاع في سيارة ثانية وراهم .. ووصلوا المطار ..
بس من وصلوا المطار صاح تلفون خليفة لانه شل التلفون معاه ونسى ان يهده في البيت .. لانه عنده رقمه اللي في لندن .. بس كان الرقم غريب فماحاول ان يرد على رقم غريب .. وافتر صوب سيف ..
خليفة : " سواف .. خذ تلفوني معاك .. نسيت ويبته معايه .. "
سيف ياخذ تلفون خليفة ..
سيف يفتر صوب اخوه : " التلفون عالسايلنت ويصيح .. "
خليفة : " ماارد على ارقام غريبة .. "
هزاع : " رد عالتلفون .. يمكن حد من ربعك متصل فيك عسب يودعك .. "
خذ خليفة التلفون ورد عليه .. وياه صوت انثوي يريح الاعصاب ويرد الروح ..
...... : " الو .. "
خليفة قلبه يدق بسرعة جنه دق معلايه : " لحظة .. "
وابتعد خليفة عن اهله بس ياخذ راحته في الرمسة ..
خليفة يرمس بثقة زايده : " السلام عليكم والرحمة .. "
....... : " وعليك السلام .. شحالك خليفة ؟؟ .. "
خليفة : " يسرج حالي .. منو معايه ؟؟ .."
......... : " وحده تحبك وراضيه عنك .. لوانك ماصخ وماتستاهل حد يرمسك .. "
اتشقق خليفة : " علاية ؟؟ .."
علاية : " هيه علاية .. "
خليفة يكابر : " هلا علاية .. "
علاية بكل رقة : " اهلين .. مشغول انت؟؟ .. "
خليفة : " لا .. بس الحينه ببند لان الطيارة بتطير عقب شوي.. "
علايو وصوتها اتغير : " خليفة .. انا مابقول انك غلطان ولا بقول اني غلطانة .. خلاص انسى كل اللي صار وانا بنساه ومايحتاي انك تسافر .. "
خليفة خاطره يقوللها انه يموت فيها بس كرامته كانت فوق كل شي : " جان في شي خاطرج قوليه .. لاني ثواني وبسافر .. خلصوا كل الاجراءات ولازم اسير الحينه .."
علاية تصيح : " خليفة جان مالي خاطر عندك برايه .. بس دخيلك .. احلفك بكل غالي لاتسافر وتخلينا .. حرام عليك .. والله ماجان ماتريد تشوفني خلاص بيتكم مابحدره بس دخيلك لاتسافر .. "
خليفة قلبه يتقطع : " تامريني بشي ؟؟ .. "
علاية مغيظة : " برايك ... "
وبندت التلفون في ويهه لانه رفعلها الضغط ..
وعقب ماخلصوا كل الاجراءات الكل صدوا عن خليفة وراحوا عنه ..
بس ثواني وسمعوا صوت حد : " ابوووويه .. سيف .. بطااااي .. "
الكل صد صوبه وعلى طول اتقربوا منه ..
بوبطي : " خير ولديه .. تريد شي ؟؟؟ .."
خليفة : " ابويه مااريد اسافر خلاص .. "
بوبطي يلوي على ةلده بكل حنان الأبوه : " فديتك ... خلاص لاتسافر .. اصلاً انا مااريدك تسافر .. "
الكل استانس من قرار خليفة .. خصة انه تراجع عن السفر ..
.
.
.
.
.
ردوا البيت كلهم بس محد في البيت كان يعرف عن تراجع خليفة عن السفر ..
حدر بوبطي وهو يسمع صوت اليازية وهي تكلم ام بطي وكان خليفة معاه بس الكل حدر إلا خليفة لانه حب انه يفاجئ امايته بس انصدم من اللي يصير ..
اليازية : " امايه .. استهدي بالله .. انتي عمرج ماقصرتي في حقه .. وهذا مستقبله وهو ادرى بمستقبله .. "
ام بطي حليلها عيونها وارمه من الصياح : " انتي ماتعرفين خليفة .. اكيد في خاطره شي .. اكيد انا مقصره في حقه .. ليتك بس تسمعني وترد .. "
وشويه وإلا ام بطي تسمع صوت ولدها .. وكان يربع صوبها ..
خليفة : " اماااااايه .. "
وربع صوبها ولوى عليها بكل قوة وهي ماحاولت انها تفج عنه .. ماصدقت اللي تشوفه جداها .. يلست تصيح ودموعها شلالات على خدودها ..
خليفة : " خلاص امايه .. مايحتاي كل هالصياح .. خلاص مابسافر .. امايه والله احبج .. "
فرحت ام بطي وحست ان ردت الروح فيها من شافته ..
الكل تأثر بهالموقف .. هزاع وسيف وبطي سكتوا وكانوا يشوفون اللي يستوي جداهم .. ماتوقعوا ان علاقة خليفة بام بطي بهالقوة ..
اما بالنسبة لابو هزاع وابو بطي فوقفوا وكانوا يعرفون غلاة خليفة في قلب ام بطي ..
وعقب هالسكون اللي عم المكان .. نطق بوبطي ..
بوبطي : " يالله بسكم الحينه .. اليوم انا عازمنكم عالغدا بمناسبة هالمفاجأة .. "
بوهزاع : " لاافااااااااااا .. ابداً .. الكل اليوم معزوم في بيتنا .."
يفتر بوهزاع صوب هزاع : " هزاع ولديه .. رح البيت ووصي امايتك عالعزيمة .. وطرش الدريول عسب يسير العزبة ويذبحلنا كم ذبيحة .. "
الكل تزهب عسب يسير العزيمة اللي كانت على شرف خليفة ..
.
.
.
.
فصخ خليفة بدلته ولبس لبسه الاصلي .. لبس اهل الامارات اللي مافي منه لبس .. لبس كندورة بيج وتسفر بسفرة حمرا ..
حس انه انولد من اول ويديد .. بس خليفة اتزهب قبل الكل وسار صوب بيت عمه سهيل ..
.
.
.
هود خليفة قلب لايحدر بس محد رد عليه .. وايج قبل لايحدر وشاف غنات روحه يالسه بس كانت في دنيا ثانية ..
خليفة : " احم احم .. هود هود .."
انصدمت علاية من اللي تشوفه جدامها .. يمكن انا احلم .. اكيد انا اهاذي .. مستحيل .. خليفة سافر من ساعة ..
خليفة : " احم احم .. نحدر ؟؟ .."
علاية منصدمه : " انت خليفة وإلا انا اهاذي ؟؟ .."
خليفة يضحك من قلبه : " هههه .. حبيبتي انتي .. "
استحت علاية من رمسته بس حاولت انها تتجاهله .. افترت علاية عن خليفة وحاولت انها تكابر .. دارت في الصالة وماعرفت وين تشرد عنه وماحصلت إلا باب حجرة الطعام جداها وفتحت باب حجرة الطعام اللي كان مجابلنها ودخلت من دون ماتصد عليه بس عسب تتهرب منه..
لحقها خليفة وكان يعرف انها تتغلا عليه ..
حدر خليفة حجرة الطعام وسكر الباب وراه ..
علاية شهقت : " شعنة سكرت الباب ؟؟؟ .. "
خليفة : " ههههه .. بعظج .. ههههه .. يعني شو بسوي فيج الله يهديج ؟؟ .."
علاية تفتر عنه وتحاول انها ماتحط عينها في عينه عسب ماتضعف في ويهه وتذوب جداه : " شو تريد ؟؟ .."
خليفة سحب علاية من يدها ودخلها حمامات حجرة الطعام ..
انصدمت علاية من حركته واتروعت كانت تريد تنطق بس حست ان لسانها انعقد وماقدرت تنطق بكلمه ..
خليفة رفع ويه علاية وحط يده على ويهها وخلاها تصد عالجامات اللي في الحمام وكان يشوفها جنه اول مرة يشوفها جداه ..
خليفة ماهد علاية وماحاول انه يشل يده عن ويهها : " تشوفين هاي اللي في المنظرة .. هاي غناتي .. هاي قلبي وكل حياتي .. انا غلطت وايد في حقها بس هي قلبها كبير واكيد بترضى عني .. احبها وعمري مابتخلى عنها .. وان شاالله ترضى عني .. "
علاية ماقدرت تنطق باي كلمه .. كانت قافطه ويهها محمر من الحيا ..
خليفو يوّد يد علاية ووافتر صوبها وهي بدون احساس افترت صوبه ..
كانوا يشوفون بعض كأنهم اول مرة يشوفون بعض .. كانوا متولهين على بعض لانهم من شهر وشويه ماشافوا بعض ..
خليفة ماقدر يوّد عمره وحبها على يبهتها وطلع عنها ..
ماحس خليفة بالغلطة الكبيرة اللي سواها .. بس اصلاً هو كان حاط في باله انه اليوم يفاتح ابوه وعمه في سالفة خطبه علاية ..
تمت علاية واقفة مكانها وبعدها هب مصدقه اللي استوابها ..
ثواني وحست بصدمة ثانية ..
دخل عليها خليفة مرة ثانية ..
خليفة : " نسيت اقولج شي .. اتــزهبي حق العرس .. تراني اليوم بخطبج .. "
وطلع خليفة بدون مايعطيها فرصة بانها تتكلم ..
علاية قلبها يدق بكل قوة .. تحس انها سافرت في عالم ثاني .. سافرت في عالمها الخاص اللي بس خليفة فيه ..
اليوم يوم المفاجآت .. خليفة صدم علاية بثلاث صدمات ..
اول صدمة انه ماسافر .. وثاني صدمه انه حبها على يبهتها وهاي الصدمة كانت وااااايد قويه .. وثالث صدمه صدمه الخطبة وهذي كانت اكبر صدمه ..
الكل مستانس وخصة خليفة اللي الدنيا هب شالتنه من الوناسة
.
.

في العزيمة وعالغدا ..
الكل متيمع .. عايلة بوبطي كلها .. وعايلة بوهزاع كلها ..
بس خليفة وعلاية كانوا في عالم ثاني .. كل ساعة كان خليفة يصد صوبها وهي ميته من الحيا ..
الكل يسولف وكل حد كان مستانس ..
وقطع رمستهم صوت خليفة ..
خليفة : " ابويه وعمي .. اريدكم تسمعوني .. ودخيلكم لاتردوني .. تراها طلبه .. "
بوبطي : " عيوني لك .. آمر .. مايردك غير لسانك.. "
بوهزاع : " تم الغالي بدون ماتقول اللي في خاطرك .. "
خليفة يصد على علاية ويرد يفتر صوب ابوه وعمه : " اريد اعرس .. "
كانت الصدمه قويه .. الكل سكت وماردوا عليه ..
بوهزاع : " ياحيبه بودعي .. يريد يعرس .. هالساعة المباركة والله .. "
ام بطي : " وااااااااايه .. انت اشر وانا بخطبلك اللي تباها .."
خليفة : " والله ؟؟ بتخطبيلي اياها ؟؟ يعني بس أأشر ؟؟ .."
بوبطي كان واثق ان ولده يريد علاية : " أشر وانا اللي بخطبها لك هب امايتك .. "
بكل قواة عين وبدون اي تردد رفع خليفة يده وأأشر على علاية : " هاي اللي اريدها ومااريد غيرها .. وجان بتسوون العرس اليوم انا راضي .. "
احترق ويه علاية وطلعت من حجرة الطعام..
اليازية : " هههه .. ياقوات عينك ياخلوووف .. "
ولحقتها اليازية .. وخلاف سارت ميثانه وراهم ..
مريم : " انا بعد بسير .. "
ولحقتهم مريامي ..
بوبطي : " ها اخويه عبيد ..شو قلت ؟؟؟ "
بو هزاع : " البنت بنتكم .. وجان تريدونها من اليوم خذوها بليا زهاب .. تراها بنتكم شروات ماهي بنتي .. "
ام بطي تفتر صوب ام هزاع : " خلاص ام هزاع .. العرس ان شاالله عقب شهرين لين مايتثبت ولديه في دوامه .."
ام هزاع : " خلاص ان شاالله وفالكم طيب .. "
بوبطي : " فالكم مايخيب .. "
بوهزاع : " وين بيداوم خليفة ؟؟ "
بوبطي : " بقدم انا اوراقه في الشرطة .. "
بوهزاع : " بس على مااظن ماياخذون الاوراق الحينه .. لان الكل قدم من زمان .."
بوبطي : " ماعليك .. انا بتصرف .. "
بطي مغيظ : " شوالسالفة ؟؟ الكل بيعرسء إلا انا .. انا العود وانا لازم اللي اعرس هب هاليهال .. اليازية وخلوف بيعرسون وانا لااااا ؟؟ .. "
ام بطي :" هههههههه .. على قولتك لاحق عالعرس .. "
بطي شهق شهقة : " حشا عليّه .. انا ماقلت اني مااريد اعرس ؟؟؟ خلاص امايه يوم بنرد البيت بقولج من نريد .."
بوبطي واثق من كلامه : " يعني من غيرها ؟؟ اكيد ميثانه .."
بطي مغيظ : " لامااريدها .. "
بوبطي : " نحن مابناخذ شورك في هالسالفة .. "
بطي : " بس ابويه انا اريد بنت النيادي اللي بيتهم حذال بيت يدوه شما .. "
بوبطي مغيظ : " طب هالسالفة ولاتحاول انك تفتحها أو انك تييب طاريها على لسانك .. "
الكل كان ساكت وحاس ان الجو متكهرب..
بطي : " ابويه انا اللي بعرس هب انتوا .. دخيلكم خلوني اعيش حياتي .."
بوبطي : " نحن ادرى بمصلحتك .. وجان ماتريد ميثانه ماشي عرس من غيرها .. "
بطي مفول : " مااريدها ومااريد غيرها .. "
بوبطي : " لاترادد .. واحشم .. ولاترفع صوتك .. ولاتييب طاري العرس مرة ثانية عـــلسانك .. واذا فيك خير رح اتزوج اللي تريدها وشوف شواللي بيصير فيكم .. "
بطي حس انه انسان ضعيف هب قادر يوقف على حيله : " ابويه .. دخيلك .. "
بوبطي : " جان انت تحبني وتريد رضايه لاتاخذ اللي تريدها .. وجان عالعرس لاتعرس بس لاتاخذ هاي البنيه .. ولاتييب هالطاري مرة ثانية .."
الكل انصدم من موقف بوبطي الصارم .. وماحبوا انهم يدخلون في الموضوع .. واصلاً ميثانه انخطبت لواحد غير بطي وعرسها عقب سنه لان اللي خطبها يدرس خاري البلاد ..
طلع بطي من البيت وماكان يعرف وين يسير .. ماحس بعمره إلا وهو واصل دبي على بحر جميرا ..
نزل من السيارة ويلس في صوب من الشاطي بحيث محد يشوفه ويلس يصيح من خاطره .. كل احلامه انهدمت وماله امل انه ياخذ غناته .. يالله يالدنيا في كل شي مخالفتني .. ليش ابووويه دوم معارضني ؟؟؟ ليش مايحبني ؟؟ ليييييييييييش ؟؟؟
كان بطي في حالة ماتسر ..
وغلق تلفونه عسب مايرد على حد والكل كان متروع عليه وخصة امايته ..
ومارد بطي البيت في هاك اليوم ..
.
.

على رمال شاطي جميرا البارده .. كان بطي منسدح ويتأمل في السما جنه يدور شي ضايع عنه .. كان يشوف النجوم في السما وكان يكوّن منها أشكال تنرسم في مخيلته الواسعة .. اكتفى بطي بالجلوس على رمال شاطي جميرا الجميل الذي يتسم بهدوئه الكلي ..
افتر بطي الصوب الثاني .. جان يشوف برج العرب العالي الارتفاع اللي شكله يخبل خصة في الليل لانه يكون منور ..
خطر على باله انه يبات في برج العرب .. وكان وايد قريب من البرج .. فاشتل من مكانه وركب السياره ووصل بسرعه لانه كان وايد قريب ..
حاول بطي انه يرفه عمره في هاليوم .. صح ان هموم الدنيا كلها على صدره بس حاول انه يتجاهلها لو في يوم واحد .. بس هيهات ينسى .. واتعمد انه يغلق تلفونه ومايرد على اي حد ..
.
.
.
.
.
وفي ناحيه ثانية من البلاد .. وبالتحديد في بوظبي ..
هزاع في سيارته بعد مادار بوظبي بكبرها والعين يدور بطوي .. بس ماشي فايده ..
تخبل هزاع وحس ان بطي اكيد بيسوي شي بعمره ..
حس هزاع بعمره ضايع من دون بطي ..
وقّف هزاع سيارته الرنج على برد الشارع لانه تعب من الدواره .. وحط راسه على سكان السيارة ..
" بطاي وينك ؟؟ عيزت وانا ادورك .. دخيلك اتصل فيني وطمني عليك .. افففف .. ان شاالله ماسويت شي بعمرك "
كان هزاع يكلم عمره شروات الميانين .. مايعرف شويسوي حليله ..
وبعد مافقد الامل ..اتذكر هزاع ان بطي عنده رقم يديد مطلعنه حق تلفون السيارة بس محد يعرفه غير هزاع .. خذ تلفونه واتصل على طول ..
اول مااتصل كان يعطيه مغلق .. بس رد واتصل مرة ثانية .. كان يجذب على عمره ويقول يمكن مافي ارسال عنده ..وفعلاً صدق احساس هزاع ورد بطي عليه وكان مستغرب كيف انه نسى تلفون السيارة ..
هزاع بكل شوق ولهفه : " بطااااااااااي وينك ؟؟ .. "
بطي بكل برود : " في جهنم الحمرا .. "
هزاع : " بسم الله عليك .. بطوي وينك انت ؟؟ انا الحينه بييك .. "
بطي مفول : " قلتلك في جهنم الحمرا .. ماتسمع انت ؟؟.."
هزاع حز في خاطره اسلوب بطي في الكلام معاه : " خلاص برايك .. اسمحلي عالمغثة .. "
بطي متلوم : " زوزو .. لاتبند .. انا محتاي حد يسمعني ويفهمني .. ومحد يفهمني غيرك .."
هزاع نسى غيظه وابتسم : " الحينه بييك .. وين دارك ؟؟ .. "
بطي : " دبي .. "
هزاع : " وين بالضبط ؟؟ .. "
بطي : " جدا برج العرب في جميرا .. توني كنت بحدر إلا تلفون السيارة صاح .. ماادري كيف نسيته ؟؟ "
هزاع : " سلااااااامي .. ياحيك والله .. وبعدين زين انك نسيت تلفون السيارة .. والله كنت بتخبل لوماكلمتك اليوم.. عالعموم .. شوالجو في دبي ؟؟ "
بطي : " والله المكان عجيب بس الهم اللي في قلبي مخرب الجو .."
هزاع : " ثلث ساعة على الاقل وبكون عندك .. "
بطي : " لاتتخبل ..سوق على راحتك .. ودخيلك لاتخبر حد وين انا .."
هزاع : " حتى امايتك ؟؟ "
بطي : " قلتلك لاآدمي ولاسكني .."
هزاع : " بس عمو يالسه على اعصابها وتحاتيك حليلها .. والله لوريتها وهي تصيح جان كسرت خاطرك .."
بطي متلوم : " انزين ..بس خبر امايه وحلفها انها ماتخبر حد .. خصة ابويه .."
هزاع : " ان شاالله .. يلاّ برايك .. "
وبند هزاع عن بطي .. وحس براحة كبيره لانه اتطمن على بطي ..
وعلى طول اتصل في ام بطي عشان يطمنها لان حالتها كانت حاله ..
هزاع : " مرحبا عمو .. "
ام بطي تتنهد : " مرحبا باجي هزاع ..بشّر .. حصلته ؟؟.."
هزاع : " عمو.. عمي حذالج ؟؟ .. "
ام بطي : " هيه .. "
هزاع : " اشتلي من مكانج وسيري بعيد عنه .. "
ام بطي شلت بعمرها وطلعت عن بوبطي ..
ام بطي : " شو السالفة هزاع ؟؟ لاتروعني.."
هزاع : " خير عمو .. حصلت بطي .. "
ام بطي : " الله يبشرك بالخير ياولديه .. وينه هو ؟؟.."
هزاع : " مااقدر اقولج وين .. بس بغيت اطمنج واقولج انه بخير وسهاله .. وانا الحينه بسير عنده .. "
ام بطي : " خلاص ..برايك .. انا مابجبرك تقوللي وين بطي .. بس طلبتك طلبه .."
هزاع : " آمري الغالية .. عيوني لج .. "
ام بطي : " تسلملي عيونك الغالي .. بس اول مابتوصل عنده .. اتصل فيني وخله يكلمني .. دخيلك .."
هزاع : " ان شاالله عمو .. ادريبه مابيطيع .. بس انا بحاول معاه .. "
ام بطي :" اسمحلي فديتك .. تعبتك معايه .. "
هزاع : " افاااا عمو .. اشو هالرمسه ؟؟ بطي اخويه وانتو اهليه .. "
ام بطي :" لاخلاني الرب منك .. "
هزاع : " برايج عمو .. "
ام بطي : " مااوصيك عليه .."
هزاع : " ان شاالله .. بحطه في عيوني .. وداعة الرحمن .."
ام بطي : " ربي يحفظك.."
وبند هزاع عن ام بطي اللي ارتاحت بعد مااتطمنت على ظناها .. وجبّل هزاع صوب دبي وماخف السرعة مووول .. كان حاط ريله عالريس ومافج عنه .. وفجأة وبدون اي شعور صقع هزاع بسياره كانت جداه وانجلبت سيارته جلبتين ..
.
.
.
وفي صوب ثاني من مدينه العين كانت حمدة يالسه مع امايتها ..
ام حمدة : " ان شاالله بسير بوظبي باجر .. "
حمدة : " شعنة؟؟ .. "
ام حمدة : " بسرح صوب عوشه حرمة عبيد المحيربي .. "
حمدة فز قلبها من سمعت المحيربي : " منو عوشه ؟؟ .."
ام حمدة : " ويدي ؟؟ اشو بعد منو عوشة ؟؟ هاي ام ربيعتج اليازية .. وربيعتيه من ايام الطفوله .. "
حمدة : " ايواااا .. تطرين ام بطي ؟؟ .. "
ام حمده : " هاي هي .."
حمده : " امايه طلبتج لاترديني .. "
ام حمدة : " ياكثر طلباتج اللي ماتخلص .. الله يعين ريلج عليج .. قولي اللي عندج .. "
حمدة بدلع : " بيي معاج عند يزوي .. "
ام حمدة : " ان شاالله .. بوديج معايه .. بس اركزي ولاتغدين خريشه واحشمي العرب ولاتربعين وتناقزين مع يزوي ووو....... "
حمدة : " امااااااااااايه .. مايحتاي توصيني ..الحمدلله عاقله وافتهم.."
ام حمدة : " بس ساعات تنسين عمرج وتخورينها .. "
حمدة وقلبها يدق طبول : " لا خلاص .. دام اني سايره بيت عمي عبيد .. بغدي رزينه .."
ام حمدة : " وشعنة يعني بتعقلين وانتي في بيتهم بس ؟؟ .. يعني لوسرحتي بيت عرب هب بيتهم بتتخبلين ؟؟ .."
حمدة : " لا .. بس بيتهم سبيشل .. "
ام حمدة : " واشو هذا سبيل ؟؟ .."
حمدة ناقعة من الضحك : " هههه .. سلامة راسج الغالية .. سبيشل يعني مميز وغير نمونه .. "
ام حمدة : " وليش يعني بيتهم غير نمونه ؟؟ .."
حمدة تتذكر بطي : " آآآآه .. سلامة راسج امايه .. بس انا اموووت في يزوي لانها حبوبه ربي يحفظها .. "
ام حمدة : " خلي عنج يزوي وام يزوي .. اباج في سالفة .."
حمدة : " خير امايه ؟؟ .."
ام حمدة : " حبيبتي حمده .. مصيرج بتعرسين وبتسيرين بيت ريلج .. وانا مابدوملج .."
حمدة : " بسم الله عليج .. عسى يومي قبل يومج .."
ام حمدة : " لافديتج .. كل ولحد ياخذ نصيبه من الدنيا .. "
حمدة مغيظة : " امايه .. اشو هالرمسة ؟؟ دخيلج طبي هالسالفة .. انتي حياتي كلها ومااقدر اعيش بدونج .. انتي قلبي اللي اعيش به .. كيف الانسان يعيش بليا قلبه ؟؟ .."
ام حمدة لوت على بنتها وماحست إلا دموعها مخرسه ويهها ..
حمدة : " اماااااايه .. بس عاد .."
ام حمدة تمسح دموعها : " نسيتيني السالفة اللي كنت بخبرج عنها .."
حمدة : " خير امايه .. "
ام حمدة : " ولد خالوتج خطبج اليوم .. و .."
حمدة مغيظة : " امايه دخيلج لاتوفين رمستج .. انا مااريد حميد .. "
ام حمدة : " حميد ريال وماعليه كلام والكل يمدح فيه .. وولد خالوتج اخير عن الغريب .. "
حمدة تتوسل وتترجى : " امايه .. لاتجبريني على شي مااريده .. دخيلج امايه .. انتي علمتيني من صغري مااسوي شي انا هب راضيه عنه .. حميد والله شروات اخويه .. وبعدين احسبه ياهل ومايفكر غير بعمره .. امايه دخيلج مااريده .. "
ام حمده غمظتها بنتها : " بس فديتج انا افكر فيج ؟؟ منو بيحاتيج وبيهتم فيج من عقبي ؟؟؟ .."
حمدة : " لاحوووول .. امايه محد بيهتم فيني غيرج .. وحميد شليه من بالج .. انا مااريده .. "
ام حمدة عمرها ماجبرت حمدة على شي ماتريده .. كانت تحبها لدرجة انها لوبغت عيونها بتعطيها .. فاقتنعت بكلام حمدة ..
ام حمدة : " الله يهدي سرج .. خلاص اللي يريحج فديتج .. "
حمدة تلوي على امايتها : " حبيبتي والله .. "
ام حمدة : " ياللواته .. حبيبتج حزة الحاية ؟؟ .."
حمدة : " هههههه .. والله احبج .."
ارتاحت حمدة من رضى امايتها .. كانت متوقعه ان امها تجبرها على حميد بس الحمدلله ماصار إلا الخير ..
.

في بيت عبيد المحيربي ..










اليازية يالسة في الصالة على اعصابها .. كانت تحاتي اخوها بطي ..
ومريم وشما كانوا معاها.. وشالين البقعة من الحشرة ..
مريم : " ههههههه .. شمووو .. لاتعظيني .. "
شمامي : " انا مااعلج .. انا ابوثج .. " ( انا مااعظج .. انا ابوسج ..)
مريامي : " ههههه .. جذوووووب .. والله تعظين .. "
اليازية كانت كل حزة تتصل حق بطي من تلفونها ومن تلفون الصالة.. بس بطي كان غالق تلفونه ..
اليازية : " يااااااهي محنه .. ليش غالق تلفونه بطوي ؟؟ افففففف .. وانتوا الهنتين مابتسكتن اليوم ؟؟ .."
وشويه وإلا تلفون الصالة يصيح .. وعلى طول ردت اليازية ..
اليازية : " بطوي .. حبيبي .. وينك .."
ام حريز : " السلام عليج ورحمة الله الغالية .."
اليازية والويه محترق : " ااه .. وعليكم السلام .. "
ام حريز : " اليازية تكلمني ؟؟؟ .. "
اليازية : " هيه نعم .. انا اليازية .. "
ام حريز : " مرحبا الغالية .. هلا وسهلا .. شحالج فديتج ؟؟ .."
اليازية : " بخير ربي يعافيج ويسلمج .. منو معايه ؟؟ .."
ام حريز : " انا ام حريز.. "
اليازية احمرت واخضرت واصفرت : " هلا عمو .. اسمحيلي ماعرفتج.."
ام حريز : " بالحل الغالية .. اليازية امايتج موجوده ؟؟ .."
اليازية : " هيه .. الحينه بسير ازقرها.. "
ام حريز : " تسلمين فديتج .."
وسارت اليازية تزقر امايتها ..
وحريز كان يالس حذال ام حريز ..
حريز : " امااااايه .. حرام عليج .. كنت بسمع حسها .."
ام حريز : " انت ماتخيل ؟؟؟ اعقل ياولد الحلال .. ان شاالله خلاف بتشبع منها .."
حريز يرفع يده : " آميـــــن .. "
.
.
والصوب الثاني ..
اليازية تدق باب الحجرة .. : " امايه .. امايه .."
ام بطي : " حياج فديتج .. "
اليازية تبطل الباب : " امايه تلفون .. "
ام بطي : " منو فديتج ؟؟ .."
بوبطي : " يالله يالعيوز ... لازم تتخبر منو اللي مسوي .. تراج بتعرفين منو يوم بتسيرين .."
ام بطي : " انا عيوز يالشيبة ؟؟ الحمدلله انا بعدني في عز شبابي .."
اليازية : " امايه هب وقت المواقع الحينه .. الحرمة تترياج .."
بوبطي : " قوليلها ام بطي راقده .. ومابتكلم حد .."
ام بطي مغيظة : " عبيــــــد ؟؟!! .."
بوبطي : " ههههه .. اليازية منو عالخط ؟؟ .."
اليازية والويه محمر : " عمو ام حريز .. "
بوبطي : " ههههه .. يالحيا .. الويه غادي احمر .. هههه .. اكيد متصله تريد تعرف جوابكم .. "
ام بطي : " وانتي اشو رايج فديتج ؟؟ .."
اليازية منزله راسها : " اللي يريحكم .. "
بوبطي : " وابوك انا على منكر البنيات .. اسمهين يتمنكرن .. عالعموم على قولتهم السكوت علامة الرضا .. ومبروك مقدماً فديتج .."
وقام بوبطي وباس بنته على يبهتها ..
اليازية والويه من الخاطر محمر : " الله يبارك في حياتك .."
وربعت وسارت حجرتها ..
وقامت ام بطي وسارت ترد عالتلفون ..
ام بطي : " السلام عليج الغالية .."
ام حريز : " هلا وسهلا بالغالية ام الغالية .. وعليج السلام والرحمة .. شحالج عوشه ؟؟.. "
ام بطي : " يسرج الحال فديتج .. ومن صوبج ؟؟ .."
ام حريز : " والله الحمدلله .. بس ناقصنا شي واحد .."
ام بطي : " افاااا .. شو اللي ناقصنكم ونحن موجودين ؟؟ .."
ام حريز : " تسلمين الغالية .. والله اللي ناقصنا جواب الغالية اليازية .."
ام بطي : " ههههه .. عيل ابشرج البنيه وافقت .."
ام حريز : " والله ؟؟ .. ربي يبشرج بالشهادة الغالية .. ماقصرتي فديتج .."
حريزيدش عرض : " امايه .. شوالسالفة ؟؟ .."
ام حريز : " خلاف .. خلاف بخبرك .."
ام بطي : " اكيد هذا حريز حذالج .. ادريبه مطفربج إلا يريد يعرف شو الجواب .."
ام حريز : " هههه .. هيه .. هذا حريز .. "
ام بطي : " عطيه السماعة .. انا اللي ببشره .. "
وتناول ام حريز حريز السماعة ..
حريز : " مرحبا ملايين .. هلا والله بعموتي .. "
ام بطي : " ههههه .. يالمصلحة.. "
حريز : " ههههه .. لاوالله عمو .. ثرج غالية شروات بنتج .."
ام بطي : " زين والله .. عالعموم السلام عليك .. "
حريز : " هههه .. نسيت والله .. وعليكم السلام والرحمة .. "
ام بطي : " لازم تنسى .. "
حريز : " ههههه .. "
ام بطي : " حريز فديتك .. بنتي وافقت عليك وادري انك بتحطها في عيونك بس دخيلك اتحمل عليها .. تراها طول عمرها وهي معايه والحينه بتكون امانه عندك .. "
حريز متشقق : " افااا عليج عمو .. والله بحطها في عيوني وبتحمل عليها .. ومابخلي حد يدق شعره منها .. لاتوصين الغالية .."
ام بطي : " تسلم فديتك .. "
حريز : " ربي يسلمج الغالية .. "
ام بطي : " عطني امايتك دام اني بشرتك .."
حريز : " ان شاالله .. "
وتاخذ ام حريز السماعة ..
ام حريز : " هلا الغالية .. "
ام بطي : " خلاص فديتج انا قلت اللي عندي .. ومبروكين .. "
ام حريز : " الله يبارك في حياتج .. خلاص عوشه انتوا حددوا يوم عسب نسرح صوبكم ونملج عالبنيه .."
ام بطي : " ان شاالله .. شو رايج بعقب اسبوعين ؟؟ .. "
ام حريز : " والله الود ودنا عقب اسبوع .. بس لازم البنيه تتزهب .. خلاص ان شاالله عقب اسبوعين .."
ام بطي : " ان شاالله .. خلاص برايج الغالية .."
ام حريز : " ماقصرتوا فديتج .. تسلمون والله .. وداعة الرحمن .."
ام بطي : " الله يحفظج .."
وسكرت ام بطي عن ام حريز ..
حريز : " اماااااااااااااايه .. فديتج والله .. واخيراُ تحققت امنيتي .. "
ام حريز : " الحمدلله والشكر .."
حريز : " يالله .. عقب اسبوعين بالضبط بتغدي اليازية حرمتيه .. يعني ..امممم .. عقب 14يوم بتغدي حرم السيد المحترم حريز المنهالي .."
ام حريز : " هههههه .. حريز تخبلت ؟؟ .."
حريز : " اما يه خلوني في حالي اليوم .. اليوم احلى يوم في حياتي .."
وطلع حريز من البيت بدون مايكلم حد .. سار يحوم في الشوارع من الوناسه ..
.
.

وفي حجرة اليازية ..
اليازية كان قلبها يدق طبول .. كانت احاسيسها ومشاعرها مختلطة ..
ماكانت تعرف شو اللي في قلبها بالضبط ..
كانت تريد تصيح وتضحك في نفس الوقت ..
وشويه إلا حدروا مريامي وشمامي الحجرة ..
اليازية : " انتوا ماتخلون الواحد ياخذ راحته ؟؟.."
مريامي : " نحن نحبج .."
شما : " نحبج .."
اليازية نست غيظها شوي : " بس مرة ثانية يوم بتحدرون دقوا الباب .."
مريامي : " ان شاالله .."
شما : " ان ثاالله .."
سكتت اليازية وسرحت في عالمها بس كانت تحاتي اخوها بطي ..
وشمو ومريوم شالين الحجرة على راسهن من الحشرة ..
اليازية : " وبعدين وياكن ؟؟ ..."
شما تحط سبابتها (اصبعها) على ثمها : " اصصصص .. ميمي ثكتي .. يزوي بتظلبنا .."
كانت شمامي تدلع مريامي ميمي..
اليازية : " وشعنة تسكتينها هي ؟؟؟ سكتي عمرج انتي اول .."
مريم : " يزوي شبلاج مشتطه علينا اليوم ؟؟ .."
اليازية تتنهد : " اااااه .. سمحولي فديتكن .. والله اني مستهمه .. "
مريم : " مستهمه على منو ؟؟ .."
اليازية : " محد فديتج .. محد .. "
مريامي : " لاتتحريني صغيره وماافهم شي .. انا ادري انج تحاتين بطوي .. "
اليازية : " والله ماادريبه وينه ؟؟ عيزت وانا اسويله على تلفونه .."
مريامي : " يزوي بخبرج شي بس لاتزعلين ولاتهزبيني .. "
اليازية : " قولي فديتج .. انتي تدرين اني عمري مازعلت منج ولابزعل .. "
مريامي : " من ساعة كنا انا وشمو في حديقة البيت نلعب كورة .. جان اسمع امايه تكلم هزاع .. والله ماتصوخت الرمسة وماسمعت شي .. بس اللي فهمته ان هزاع يعرف وين بطاي .. "
اليازية فز قلبها واستانست : " وايه .. فديت هزاع .. طول عمره وهو مع بطوي .. عمرهم ماهدوا بعض .. ربي يحفظهم لبعض وعساهم مايفترقون .. "
على طول اتصلت اليازية في هزاع عسب تتخبر عن بطي .. بس من اتصلت واحد صوته غريب رد عليها ..
اليازية : " مرحبا زوزو .. "
......... : " السلام عليكم ورحمة الله .. "
اليازية ارتبكت : " وعليكم السلام ورحمة الله .. "
............ : " منو معايه ؟؟ .."
اليازية : " اخويه هذا هب تلفون هزاع ؟؟ .."
................ : " هيه نعم .. هذا تلفونه .. "
اليازية باستغراب : " عيل وينه ؟؟ .."
........... : " بس بغيت اعرف انتي منو ؟؟ .."
اليازية حست ان السالفة هب طبيعيه : " وشعنة تتخبر ؟؟ .."
.......... : " السموحة الشيخة .. بس راعي هالتلفون واللي هو على مااظن هزاع مسوي حادث وهو الحينه في حجرة العمليات بين الحيا والموت .. "
اليازية شهقت شهقه : " اشو تقول انت ؟؟؟ اكيد تتغشمر ؟؟ .."
........... : " السموحة الشيخة .. الناس مايتغشمرون في هالسوالف .. "
اليازية عيونها انمزرن دموع وتغير صوتها : " الشيخ في اي مستشفى هو ؟؟ .."
......... : " في مستشفى توام .. "
اليازية : " في العين ؟؟ .."
.......... : " هيه نعم في العين .."
اليازية والدموع على خدودها وتقول في خاطرها " ليش ساير العين ؟؟ اكيد سار يدوّر بطي .. ياويل حالي عليك ياولد عموتي .. "
اليازية : " يزاك الله خير الشيخ .. ماقصرت .. "
............... : " الله يسلمج .. هذا واجبنا .. "
اليازية : " وداعة الرحمن .."
بندت اليازية التلفون وحست ان الدنيا تدور فيها .. بعدها كانت هب مصدقه اللي سمعته ..
.
.
.


مرحبا ملايين ولايسدن وان زادن لاباس ..
هلا والله باليميع .. عساكم مرتاحين فديتكم ..
هذا الجزء وكتبته .. وان شاالله يعيبكم ..
بخليكم مع القصة .........
.
.
.
.
.
.
.
.
.
اليازية بندت التلفون وهي حالتها حاله .. " معقوله هزاع مسوي حادث وإلا انا دهمانه ؟؟؟ .."
كانت يزوي حليلها منصدمه وهب حاسه بالدنيا ..
ومريومه وشمامي وكانوا بعدهم حذالها ..
مريومه تروعت من شكل اليازية : " يزوي شبلاج ؟؟ .."
اليازية توها تنتبه ان مريومه تكلمها : " هاه .. "
مريامي : " حبيبتي شبلاج ؟؟ .."
اليازية : " هزاع مسوي حادث .. مريم ابويه واعي ؟؟ .."
مريامي تروعت : " هيه .. من ساعه كان يالس في الصالة يتطالع الاخبار .."
واشتلت اليازية من مكانها وربعت قبل لاتكمل مريومه رمستها ..
مريم طنشت لانها كانت تتوقع ان الحادث بسيط ..
.
.
.
ومن حولت اليازية شافت ابوها يالس بروحه .. فتقربت منه ..
اليازية والتعب باين في عيونها : " ابويه .. "
بو بطي : " هلا غناتي .. "
اليازية يلست حذال ابوها : " ابويه بتوديني العين الحينه ؟؟ .."
بوبطي : " هالحزة ؟؟ .."
اليازية ماانتبهت عالساعة : " جيه الحينه الساعة كم ؟؟ .."
بوبطي : " يابوج الحينه الساعة 12:30 .. شبلاج فديتج ؟؟ فيج شي ؟؟ .."
اليازية تيمعن الدموع في عينها : " ابويه ... "
بوبطي : " بسم الله عليج .. شبلاج يزوي ؟؟ انطقي فديتج .."
اليازية خلاص ماتقدر تيود عمرها وانفجرت من الصياح ..
بوبطي : " حبيبتي شبلاج ؟؟ دخيلج ارمسي لاتروعيني .. "
اليازية تناهي : " ابويه .. هزاع مسوي حادث .."
من سمع بوبطي هالكلمه وقف على حيله : " شووو ؟؟ هزاع ؟؟ .."
اليازية : " هيه .."
بوبطي على طول شل بعمره وسار تلبس وتسفر ..
وام بطي كانت تشوفه وهي مستغربه بس هو مارد عليها وطلع ..
بس قبل لايطلع شاف اليازية لابسه عباتها وواقفه عند باب الصالة ..
اليازية : " ابويه دخيلك .. لاتردني اليوم .. دخيلك ابويه بيي معاك .."
كانت تشوف ابوها بنظرة ترجي وتوسل وماحب بوبطي انه يتحير زياده .. فقاللها تعالي ..
.
.
وفي الدرب اول شي سواه بوبطي انه سار بيت اخوه سهيل عسب يخبره ..
ومن وصل وصى اليازية انها تيلس في السياره لانه مابيتحير وبيي بسرعه ..
هوّد بوبطي قبل لايدخل ..
ميثانة : " هدا .. هدا .. "
بوبطي حدر ..
ميثانة وقفت على حيلها وسلمت على عمها وتخاشمت معاه ..
بوبطي : " ميثانة وين الوالد ؟؟؟ .."
ميثانة : " والله توه حدر حجرته عسب يرقد .."
بوبطي : " سيري ازقريه .. اريده الحينه .."
ميثانة : " ان شاالله .."
وسارت ميثانة عسب تزقر ابوها ..
دقت ميثانة الباب قبل لاتحدر ..
بوهزاع : " احدر .. احدر .. الباب مفتوح .."
ميثانة تحدر : " انا ميثا .. هب ولد .. عالعموم ابويه عمي عبيد هني .. يريد يشوفك بس شكله مايسر .."
ام هزاع : " بسم الله .. ليش ياي هالحزة .."
بوهزاع : " والله علمي علمج .. "
وسار بوهزاع عسب يشوف اخوه ..
.
.
بوهزاع يتخاشم مع اخوه ويسلم عليه ..
بوبطي : " سهيل رح تلبس وتعال معايه .."
بوهزاع : " وين تريدينا نسرح هالحزة ؟؟.."
بوبطي : " ولدك مسوي حادث .. وهو في العين الحينه .."
بوهزاع قرصه قلبه .. وماقدر يوقف مكانه .. وعلى طول بدون ماينطق بكلمه سار الحجرة عسب يتلبس ..
ومن حدر كانت ميثانة يالسه مع امايتها تسولف .. وكان شكله مايسر .. حست ام هزاع ان في شي ..
ام هزاع : " سهيل شبلاك ؟؟ .."
بوهزاع : " ييبي كندورتيه والسفرة والعقال .. "
ام هزاع قلبها قارصنها : " سهيل شوالسالفة ؟؟؟ شعنة بتطلع هالحزة ؟؟ .."
بوهزاع : " لاتيلسين تحنين على راسي الحينه .. اشتلي سيري ييبي ساماني .. "
وقامت حليلها ام هزاع من مكانها .. وميثانة منصدمة من تعامل ابوها ..
ويابت ام هزاع الكندورة السفرة والعقال ..
ولبس بوهزاع الكندورة بسرعه واتسفر بطريقة سريعة ..
بس قبل مايطلع من الحجرة وقفت جداه ام هزاع ويلست تشوفه وكلها رجى وتوسل ..
بوهزاع غمظته ام هزاع ..
بوهزاع : " ولدنا مسوي حادث .. "
شهقت ام هزاع شهقة : " هزااااع ؟؟ .."
بوهزاع : " خلي ايمانج بالله قوي .. وان شاالله مافيه إلا العافية .. ودخيلج لاتقولين بيي معاك .. خلاص انا طالع الحينه .."
وطلع بوهزاع قبل لاتنطق ام هزاع ..
حليلها ام هزاع ماقدرت تيود عمرها .. كانت تريد تسير تشوف ظناها .. بس للأسف بوهزاع ماعطاها مجال للنقاش حتى ..
.
.
وطلع بوهزاع من البيت وشاف سيارة اخوه الـ Bmw 760 موقفه على برد ..
تقرب من السيارة وماعرف ان اليازية يالسه جدام لان السيارة مخفيه شامل ..
من فج الباب شاف اليازية .. وعلى طول حدرت وسلمت على عمها وركبت ورى ..
كان بوبطي يسوق بسرعه فظيعه .. ومحد نطق في السيارة والكل كان على أعصابه ..
.
.
.
ووصلوا المستشفى .. وحدروا يميع ..
وبعد ماتخبروا الريسيبشن عرفوا ان هزاع في حجرة العمليات ..
وساروا يلسوا جدام حجرة العمليات يتريون متى يطلع هزاع من غرفة العمليات ..
.
.
.
وفي بيت عبيد المحيربي ..
كانوا مريامي وشمامي بعدهن في حجرة اليازية ..
بس هالمرة غير .. خصة ان اليازية محد .. يعني ان غاب القطو العب يافار ..
كانوا لاعبات ملاعيبهن في الحجرة .. لانهم كانوا في بدايه اجازة الصيف وماكان عندهم مدارس .. بس مرة وحده تلفون اليازية صاح ..
وافترت مريومه صوبه .. " اليازية نست تلفونها .. "
وربعت وسارت ترد عالتلفون ..
مريامي بدلع : " مرحبا .. "
بطي : " وليش تردين على تلفون يزوي ؟؟ .."
مريامي حز في خاطرها اسلوب بطي لانها وااايد تحبه : " السموحة .. مرة ثانية مابرد .. "
بطي متلوم : " سوووري فديتج .. بس وين اليازية ؟؟ .."
مريامي : " يزوي سارت العين مع ابويه .. "
بطي : " هالحزة ؟؟ .."
مريامي : " هيه .."
بطي : " شعنه ؟؟ .."
مريامي ببرود : " هزاع مسوي حادث وساروا المستشفى عنده .. "
بطي فز قلبه وتروع حليله : " مريوم لاتتغشمرين .. "
مريامي : " والله مااتغشمر .. "
بطي حليله فز من مكانه : " مريوم متى صار الحادث .. "
مريامي : " من ساعة يمكن أو أكثر .."
بطي والعبرة خانقتنه .. فديتك ياهزاع .. كنت اكيد مسرع عسب تيي دبي .. : " في اي مستشفى هو ؟؟ .."
مريامي : " ماادله .. "
بطي بند التلفون في ويه مريامي وعلى طول طلع من برج العرب ..
وفي الدرب اتصل في يميع المستشفيات اللي في العين لين ماعرف هزاع في اي مستشفى ..
وصدق بطي كان مسرع .. كان يتجاوز السيارات والرادار كان كل شوي يصيده وماهمه .. المهم عنده الحينه هو هزاع ..
.

ومن وصل بطي المستشفى حدر بسرعه البرق .. حليله كان يربع ووصل الريسيبشن واتخبرهم عن هزاع .. وقالوله انهم توهم مطلعينه من غرفة العمليات وهو الحينه في غرفة الانعاش وحالته خطيرة .. كان يريد يشوفه بس ماخلوه ..
سار بطي صوب غرفة الانعاش ..
حليله كان وده انه يكون قريب من هزاع ..
صد بطي على هزاع من الجامة .. خنقته العبرة يوم شاف الوايرات موصله بهزاع .. وهو هب قادر يحدر ..
يلس بطي عالارض .. وحط يده على ويهه ويلس يصيح شروات اليهال .. كان يلوم عمره ..
كان يتحرى انه هو السبب في الحادث .. بس كل اللي صار كان مكتوب وقدر ..
بطي وهو يناهي : " كل مني انا .. انا ليش قلتله اني .... اني في دبي ؟؟ انا السبب .. ان السبب .. والله مابسامح عمري جان استوابك شي ياهزاع .. يعلني انا اموت ولاانت .. "
حليله بطي كان يالس يصيح لانه مايعرف شويسوي .. صح ان اللي يسوي غلط .. وان هذا يكسر رجولته .. بس كان مضيج وماعرف شويسوي ..
الهموم وراه وراه وين مايسير ..
خطفت هالحزة اليازية .. بس حليلها تروعت من اللي تشوفه ..
شافت ريال يالس عالارض ويصيح .. يبست اليازية مكانها وماعرفت شوتسوي ..
بس من ردت صدت انتبهت ان هذا الويه هب غريب عليها .. وعرفت انه بطي ..
ربعت اليازيه صوبه ويلست عالارض حذاله ..
اليازية متروعة : " بطاي .. لاتسوي جي بعمرك .. ان شاالله هزاع بيقوم بالسلامة .."
بطي ميمع ريوله وحاط راسه على ريوله : " انا السبب .. والله انا السبب .."
اليازية غمظها اخوها واتقربت من اخوها .. ويوم اتقربت منه لوى عليها بطي ويلس يصيح ..
فر عمره في حظنها وطلع كل اللي في خاطره ..
اليازية تمسح بيدها على شعر بطي : " حبيبي اذكر الله .. هذا قضاء وقدر .. مكتوب له انه يسوي حادث اليوم .. انت مايخصك في الموضوع من اساسه .. بطاي اذكر الله وقم صل ركعتين واقرا قرآن وادعي ربك .. صدقني بترتاح .. وان شاالله ربنا بيستجيب دعاك .."
وهالحزة بوهزاع وبوبطي وصلوا ..
انصدموا من اللي شافوه ..
وقف بوهزاع على برد وماحب انه يعلق واكتفى بالسكوت لانه بروحه كانت حالته ماتسر ..
خصة ان الدكتور قاللهم ان حالة هزاع خطيرة .. وريوله وايد متعوقة ..
تقرب بوبطي من ولده.. صح انه غمظه بس ماحب موقفه الضعيف بالصياح ..
بوبطي : " بطي اوقف على حيلك .. "
بطي رفع راسه من حظن اخته وشاف ابوه بنص عين ..
بوبطي ماحب موقف بطي الغير رجولي .. بس حليله كان مستهم وهب قادر يتحمل اللي يصيرله ..
بوبطي مفول : " بطي قلتلك اوقف .. "
وقف بطي على حيله وشاف ابوه من طرف عينه وراح بدون مايكلمه ..
بس قبل لايروح قبظه بوبطي وكان صدق مغيظ ..
بوبطي مغيظ : " يوم اكلمك اوقف مكانك واسمعني .. تفهم .."
بطي ماصد على ابوه : " ............"
بوبطي : " اصلاً انت هب ريال .. الرياييل مايصيحون .. ويوم حد يكلمهم يردون عليه .. بس انت هب مرباي عدل .. انا الغلطان دلعتك وبزيتك بس وو ..."
بطي يقطع رمسة ابوه : " خلصت رمستك ؟؟ .."
بوبطي يزاعق : " لاتكلمني بهالاسلوب .. انا هب اصغر عيالك عسب جي تكلمني .."
بطي مفول وقام يزاعق : " ابويه دومي انا في عينك غلطان .. لوشو ماسويت ببقى غلطان في نظرك .. ابويه انت السبب في كل شي .. لوانك ماقلت هالرمسه اليوم الظهر جان انا ماسرت دبي .. وجان مالحقني هزاع وسوى حادث .. انت السبب وصدقني جان استوى في هزاع شي بتكون انت السبب ......."
وقبل لايكمل بطي كلامه ياه طرااااااق من ابوه .. بوبطي ماحس بعمره يوم صفع بطي لانه كان مغيظ من رمسته واسلوبه في الكلام معاه ..
في هالحزة تدخلت اليازية في الموضوع : " نحن في مستشفى هب في البيت .."
بطي مغيظ : " خلاص .. طلعت اللي في خاطرك ؟؟ .."
بوبطي مغيظ : " بطوي اقصر الشر ويوّد لسانك .. تراك لين الحينه ماريت شي .. "
بطي : " يعني شوبتسوي هالمرة ؟؟ بتظربني ؟؟ .."
بوبطي قبظ بطي من كندورته ويرّه صوبه : " بطوي مااريد اشوفك في البيت .. وإذا ريتك في البيت بتندم عاليوم اللي يابتك فيه امك .. "
سحب بطي عمره من يد ابوه : " اصلاً انت من زمان ودك تروغني من البيت بس ماكنت تقدر والحينه حصلت فرصه ورغتني .. "
بوبطي باستهزاء : " هيه والله .. شفت عاد .. انا من زمان ارقب شروات هالفرصة عسب اروغك من البيت .. "
بطي افتر عن ابوه وطلع من المستشفى ..
اليازية : " ابويه الله يهديك شوسويتوا ؟؟ شعنه تواقعتوا ؟؟ المفروظ انكم تواسون بعض وتتقربون في المحن ..هب تتواقعون .."
بوبطي : " بتصخين انتي الثانية وإلا تبيني الايمج بطراق شروات طراق اخوج ؟؟؟.."
سكتت اليازية وماحبت انهم تتدخل لانها لوتكلمت كانت هي الثانية بتنظرب ..
وبوهزاع كان يالس بعيد عنهم وماكان له نفس حق شي .. بس كان يشوفهم من بعيد وماحب انه يتدخل لانه كان يحاتي ولده ..
ياهم الدكتور هالحزة .. والكل اتقرب منه ..
الدكتور : " بليز مش عاوزين مخانق في المستشفى .. ده مستشفى مش سوق الغنم .."
بوبطي غيظ : " وانت شلك ؟؟ المستشفى مستشفى ابوك وانا ماادري ؟؟ .."
بوهزاع يحاول يهدي الوضع : " عبيد هب وقت المواقع الحينه .. " وافتر صوب الدكتور : " دختر شخبار ولديه الحينه ؟؟ .."
حليله بوهزاع كان انسان طيب .. والكل كان يستغله لانه انسان متواضع وطيب لأبعد الحدود ..
الدكتور : " والله مااعرفش أؤولك ايه ؟؟ بس ربنا كريم .. وهزاع حالته مش مستقرة.. لانه نزف كتير .. وفي احتمال انه مايقدرش ييمشي مرة تانيه .. وغير عن كدهلازم حد يتبرع بكليته لانه محتاج كليه .."
بوهزاع : " دختر جان يحتاي بنعالجه خاري البلاد .."
الدكتور : " لاء .. لاء .. دي حالته مش مستقرة ومايتحملش السفر .. ولازم بكره نحصله متربع للكليه.. "
بوهزاع : " انا بتبرعله بكليتيه .. "
بوبطي : " سهيل انت فيك القلب .. وماتقدر تتبرع بكليتك .. "
بوهزاع : " ماعليه .. خله يسوي الفحوصات ويشوف جان اقدر وإلا لا .. "
وافتر مرة ثانية صوب الدكتور : " دختر متى تقدر تسوي الفحوصات عسب تشوف جان اقدر اتبرع حق ولديه بكليتيه وإلا لا ؟؟ .. "
الدكتور : " والله دلوقتي إذا مافيش ازعاج .."
بوبطي : " حتى انا بسوي الفحوصات .."
اليازية : " انا بعد .."
الدكتور منصدم من اللي يشوفه .. الكل وده يتبرع بكليته لهزاع : " والله انتوا شكلكوا بتحبوا ولدكوا كتير .. خلاص .. تعالوا ورايه وحنعمل الفحوصات دلوقتي .. "
وراحوا كلهم ورى الدكتور عسب يسوون الفحوصات .. بس اليازية خذت تلفون عمها واتصلت في اخوها عسب تتطمن عليه ..
بطي رد عالتلفون مع انه كان مابيرد .. بس من شاف رقم عمه على طول رد لانه وايد كان يحترم عمه ويمووووت فيه ..
بطي : " مرحبا عمي .. "
اليازية : " انا اليازية هب عمي .. "
بطي : " خير اليازية .. شوتريدين ؟؟ هزاع فيه شي ؟؟ .."
اليازية : " بطي .. هزاع حالته خطيرة ولازم يحصلوله متبرع.."
بطي : " متبرع حق شو ؟؟ .."
اليازية : " هزاع كليته متعوقه ولازم يحصلوله متبرع .."
بطي : " انا بتبرعله .."
اليازية : "نحن الحينه نسوي فحوصات ونشوف منو اللي يقدر يتبرع .. "
بطي : " انزين .. انا بيي وبسوي الفحوصات بعد .. "
اليازية : " جيه انت وينك ؟؟ .."
بطي : " انا في السيارة .. جدام المستشفى .."
اليازية : " انزين .. تعال وسو الفحوصات .. "
بطي : " الحينه بحدر .. "
وحدر بطي عسب يسوي الفحوصات ..
.

وطلعت نتايج فحوصات بوهزاع وبوبطي واليازية .. وللأسف ولاواحد منهم يقدر يتبرع بكليته .. لان المتبرع بالكلية لازم تكون انسجته متطابقة بأنسجة هزاع .. لان العملية مش بسيطة ..
بس فحوصات بطي ماطلعت لين الحينه وكانوا يتريونها .. وحطوا املهم الوحيد في بطي ..
كانوا كلهم يتريون .. وبوبطي كان كل شوي يصد على ولده وكان متلوم فيه .. بس بطي مانسى غيظه وماحاول انه يشوف ابوه ولو بنص نظرة ..
وعقب ساعات من الانتظار .. ياهم الدكتور ..
الكل وقف واتقرب من الدكتور ..
بوهزاع كان صدق تعبان : " بشر دختر .. شو النتيجة ؟؟.."
الدكتور كان متفيج وحاول انه يترفزهم : " والله انتوا ناس ايمانكم بربكم قوي .. "
بطي مغيظ : " عطنا الزبدة ولاتيلس تتفلسف .. "
الدكتور قفط وكمل كلامه : " الحمدلله .. النتايج ايجابية .. وان شاالله بكره حنعمل العملية .."
الجميع : " الحمدلله .. "
الدكتور : " انت لازم تنام عندنا النهارده .. وتريّح عشان تكون عمليه النقل سهله .. ولازم تكون جاهز في اي وأت .. "
بطي : " خلاص .. انا في رسم الخدمة .. متى ماتريدوني انا حاضر .."
ورقدوا بطي في المستشفى بعد ماكانت نتايج الفحوصات ايجابية .. والحمدلله حصلوا المتبرع بسهوله وماتعنوا وايد ..
.
.
.
بالباجر الكل متزهب عسب يسرحون المستشفى ..
وفي بيت بوبطي .. الظهر قبل العملية بكمن ساعة .. كانت ام بطي تتزهب عسب تسير العين .. وشويه وإلا نانسي تدق الباب عليها ..
نانسي ( بشكارتهم اللبنانية ) : " مدام .. في وحده عم تستناكي برى .. "
ام بطي بتعب : " احدري نانسي .. مااسمعج .. "
حدرت نانسي : " مدام .. في وحده اسمها رفيعا تستناكي برى .."
ام بطي فز قلبها : " اسمها رفيعه هب رفيعا .. "
ام بطي توها اتذكرتها : " وافديتها انا .. رفيعة يايه من العين عشاني .. كيف نسيت ؟؟ "
وطلعت ام بطي حق رفيعه اللي هي ام حمدة ..
ومن شافت ام بطي ام حمده لوت عليها .. لانها صدق متولهه عليها ..
ام بطي : " فديت روحج يارفيعه .. والله تولهت عليج .. "
رفيعة والدموع اربع اربع : " فديتج والله .."
العيايز يلسن يصيحن وحمده كانت واقفه ومبهته .. لانها ماكانت تتوقع انهم جي يحبون بعض ..
وعقب ماخلصوا الفلم الهندي .. سلمت ام بطي على حمدة ..
ويلسوا كلهم في الصالة ..
وصاح تلفون الصالة ..
ام بطي : " اترخص منكم .. برد عالتلفون .. "
ام حمدة : " مرخوصة الغالية .. خذي راحتج .. "
ام بطي : " مرحبا الساع .. "
اليازية : " امايه وينج ؟؟ عيزت وانا ادورج وماحصلتج .. "
ام بطي : " انا في الصالة .. تعالي سلمي عالعرب اللي عندنا .."
اليازية : " منو هاللي ياي هالحزة ؟؟ والله انهم متفيقين .."
ام بطي : " من تيين بتغيرين رايج .. "
اليازية : " امايه هب وقته .. نحن لازم نسير العين الحينه .. عبدالملك يتريانا برع .."
ام بطي : " خله يلتعن .. إلا هو دريول .. يلا تعالي بسرعه .."
اليازية : " ان شاالله .."
وسارت اليازية الصالة .. ويوم حدرت شافت حمدة واستانست يوم شافتها وعلى طول تقربت منها وتوايهن ..
اليازية : " شوهالمفاجأة الحلوة ؟؟ من وين طالعه الشمس اليوم ؟؟ .."
ام بطي : " غربلات العدو .. انتي ماتخيلين .. شعنه ماسلمتي على عموتج .. "
اليازية : " والله ماريتها ,, من ريت حمدة طرت ونسيت الخلق اللي دور مادايري .."
وكلهن ضحكن عليها .. وسلمت اليازية على ام حمدة ..
ام حمدة حست انهن يبن يسيرن مكان .. لان اليازية يوم حدرت كانت لابسه عباتها ..
ام حمدة : " شكلكم بتسرحن مكان وإلا انا غلطانه ؟؟ .."
ام بطي مفتشله : " السموحة رفيعه .. بس ولد سهيل اخو ريلي مسوي حادث ..واليوم بيسووله عملية .. وبياخذون كليه ولديه وبيعطونه اياها .. "
حمدة فز قلبها : " انتي تطرين بطي ؟؟ .."
ام بطي : " هيه نعم .. "
ام حمدة متلومه لانها يتهم في وقت غير مناسب : " اسمحيلي الغالية والله ماكنت ادري .. "
ام بطي : " بالحل فديتج .. وصدقيني ان شوفتج ريحت فوادي وخلتني اتطمن شويه .."
حمدة دشت عرض وماعبرتهن : " عمو .. يعني بيسوولهم عملية هم الاثنين ؟؟ .."
ام بطي : " هيه فديتج .. بيسوون عملية زرع كليه .."
اليازية : " وانتي شبلاج مبهته ؟؟ .."
حمدة : " ها .. لاماشي .. حليلهم والله .. مايستهاهلون ماياهم .. الله يكون في عونكم .."
ام حمدة : " خلاص الغالية .. انا عيل بسير الحينه .."
ام بطي : " لاوالله ماسرتي مكان .. انتي بتوقفين معايه وبتباتين عندي .. "
ام بطي كانت وايد متعلقه ف ام حمدو .. وكانت تعتبرها شروات اختها واكثر ..
وام حمدة ماحاولت انها تردها .. وكانت تريد انها توقف مع ام بطي في محنتها ..
ام حمدة : " فديت روحج .. اكيد بوقف معاج .. اذا انا ماوقفت معاج في محنتج منو بيوقف معاج ؟؟؟ .. "
ام بطي استانست : " يعلي مااخلى منج .. "
اليازية : " حمدوه .. هاي الصداقة وإلا بلاش .. هب صداقة هالايام .. على ادنات الدون بتحصلين الربع تواقعوا وكل واحد راح في صوب .. "
حمدة : " هيه والله صدقج .. "
ام حمدة : " خلاص فديتج .. انتي سيري العين وانا بلحقج .. بخلص اشغالي شوي وخلاف بييج .."
ام بطي : " وشو هالاشغال ؟؟.."
ام حمدة : " بطرش الدريول يحجزلنا في فندق من الفنادق .. "
ام بطي : " افاااااا يارفيعة .. تسيرين تحجزين في الفنادق واختج عوشه موجوده ؟؟ والله ماهقيتها منج .. "
ام حمدة : " اسمحيلي فديتج .. بس مااريد اغثج .. خصة ان الاجازة بدت وانا اريد اتم في بوظبي .. يعني كم بيلس في بيتكم ؟؟ .."
ام بطي : " والله لوبتيلسن سنه انا راضيه .. والله وحلفت يمين انج تباتين في بيتنا .. "
ام حمدة : " انزين .. بس ببات هاليومين وخلاف بسير .. "
ام بطي : " لاوالله .. اجازة القيظ بكبرها بتباتين في بيتي .. "
ام حمدة : " اسمحيلي عوشه .. والله مااقدر .."
ام بطي : " لاتوفين رمستج .. عنبوه من عشر سنين ماريتج وانتي إلا طايحتلي اسمحيلي واسمحيلي ؟؟ .."
اليازية : " عموه دخيلج وافقي .. "
حمدة : " امااايه ؟؟ .."
وآخر شي رضخت ام حمدة للأمر الواقع .. ووافقت انها تيلس عند ام بطي في اجازة الصيف بكبرها ..
حمدة واليازية استانسوا لانهن بيكونن مع بعض لمدة شهرين ..
وام بطي استانست .. لانها كانت وااايد ترتاح لام حمدة ..

في بقعة من بلادنا .. بلاد الامارات الغاوية .. وفي بوظبي بالتحديد ..
في بيت عبيد المحيربي
كان سيف يالس ويا أحمد .. وكان سيف مطنش أحمد ويرمس في التلفون ..
أحمد طفر من اليلسة بروحه : " افففف .. عنلاتك ياسيفو .. والله انك خام .. "
سيف : " لحظة بو حميد .. " ويفتر صوب أحمد : " شبلاك تباغم وتفاتن ؟؟ .."
أحمد : " اخرط على هندي هب عليّه انا .. اونه بوحميد .. "
سيف يضحك : " مجذبني حمادي ؟؟ .."
أحمد : " هيه مجذبنك .. "
سيف : " خلاف بتفاهم معاك .. " ورد يرمس في التلفون من اول ويديد ..
أحمد : " سوّاااااااااف .. يلاّ ياريال .. بنتحير عالعرب .. عمو ويزوي يتريونا .."
سيف : " لحظة .. لحظة .. (يفتر صوب أحمد) .. شعنه يتريونا ؟؟ احيدهم بيسرحون العين مع عبد الملك .. "
أحمد مفول : " بس عمو غيرت رايها والحينه بتسير معانا .. "
سيف : " انزين ثواني بخلص من التلفون وبييكم .. " ورد يرمس شوي وخلاف بند التلفون ..
وافتر صوب أحمد : " ارتحت الحينه ؟؟ .."
أحمد : " والله المذلة إلا من عقبكم ياعيال عبيد المحيربي .."
سيف : " يالله ياحمادة .. شوهالزعل اللي حضرتك زعلان به اليوم علينا ؟؟ .."
أحمد ببرود : " قم اشتل .. يلاّ خلنا نسرح الدختر .. "
سيف : " حمااااادة!! لاتكلمني جي .. "
أحمد باستهزاء : " كيف يعني تباني اكلمك ؟؟ (يغير صوته) حبيبي .. سوافي .. دخيلك خلنا نسير .. "
سيف : " بوشهاب شبلاك ؟؟ كل هذا عسب التلفون ؟؟ .."
أحمد : " لاتتحراني ماادري عن سواياك .. انا اعرف كنت تكلم منو من ساعة .."
سيف : " كنت اكلم منو؟؟ .."
أحمد : " لامايحتاي اقوول .."
سيف : " لالا .. انا اريد اسمعها من منطوقك .. كنت اكلم منوانا ؟؟ .."
احمد مغيظ : " سيفو .. انت كنت تكلم آمنه اللي ريناها في الهايد بارك في لندن قبل اسبوعين .. كنت ادري انك متخبل عليها وهب قادر تيّود عمرك .. "
سيف منصدم : " لالا .. انت من وين تييب هالرمسة ؟؟.."
احمد : " سواف .. انا خابزنك واعرفك اكثر عن اي واحد .. انت ربيعي الروح بالروح كيف ماتريدني اعرف ؟؟ .. سيفو ليش ماتعترف انك تحبها وتريدها ؟؟ عنبوه انا اخوك اللي طول عمري مجابلنك !! والله هذا اللي مزعلني .. كيف تحب ولاتخبرني ؟؟ صدقني ياسواف اني مابوقف في ويهك .. بالعكس انا بساعدك جان انت محتاي .. بس لاتخش عليّه .. "
سيف منزل راسه : " بصراحة مااقدر اخش شي عنك .. لاني لوحتى حاولت اخش .. تراك تعرف باللي بقلبي .."
احمد : " يعني انت تكلمها ؟؟ .."
سيف : " منو ؟؟ .."
احمد : " اسميك بغام ياسواف .. يعني منو ؟؟ يدوه ولاعندي خبر ؟؟.."
سيف توه يستوعب السالفة : " هيــــــه .. انت تطري منّايه ؟؟ .."
احمد : " بعد .. ندلعها منايه !! .."
سيف : " احمدوو احبها والله احبها .. "
احمد : " ياللوتي كيف رقمتها ؟؟ .."
سيف : " حرام عليك .. من متى تحيدني ارقم ؟؟ .."
احمد : " واااابويه .. خل عنك هالرمسه .. ثرك طلعت هب هيّن وانا ماادري .. شكلكم انتو تتناوبون هالشي .. قبل فترة كان الاخ العود بطي مدمن عالتلفون والحينه جنه دورك .. زامات والله .. ههههه"
سيف : " ههههههههه .. حرام عليك .. بطوي كان يكلم مليون وحده في اليوم .. انا حليلي ماعندي غير ربي ثم هذي راس مالي وبس .. "
احمد : " سلاااااااااااامي .. راس مالك اونه .. ههههه .. "
سيف : " طب ثمك .. لاتيلس تتطنز .. "
احمد : " يالله يالدنيا .. سيفو اللي عمره ماطبني .. اليوم يطبني عسب وحده .. "
سيف : " حمااااااااااااااده !! .."
احمد : " ههههههههه .. والله يااني كاشفنك .. بس كيف يبت راسها ؟؟ .."
سيف : " اممممم .. والله .."
احمد : " بتيلس تفكر وايد ؟؟ .."
سيف : " هههه .. خلاص خلاص بخبرك .. انت تدري ان شقتهم كانت في البنايه اللي حذالنا؟؟ .. "
احمد : " امممم .. لا.. ماكنت ادري .. بس انت كيف عرفت ؟؟ .."
سيف : " والله اللي يسأل مايضيع .. عالعموم نرجع لمحور حديثنا .."
احمد : " حشى استاذ وانا ماادري ؟؟ هههه .. عالعموم .. كمّل رمستك .."
سيف : " انزين .. انا مرة شفتها في الحديقة .. او بالأصح انا كل يوم كنت اشوفها في الحديقة .. ودوم كنت ابتسملها من بعيد .. وجد مرة لحقتها من الحديقة وعرفت وين ساكنه .. وقمت احطلها رسايل عند الريسيبشين .. بس ماكانت تعبرني .. بس خلاف ردت عليّه برساله مختصره لانها طفرت مني وكانت تكرهني البنيه .. وخلاف حبتني من عقب الكره ..و بدت قصة الحب والغرام .. وتطورت الرسايل لين ماوصلنا للتلفون .."
احمد : " الله الله يابوالغرام .. بس انت شدراك انها هب شروات البنات الخايسات ؟؟ .."
سيف : " والله سؤال وجيه .. اسمع حماده .. اولاً هي ماعندها تلفون .. يعني تكلمني من تلفون البيت .. بس هب دوم لان نحن نتواصل مع بعض بالماسنجر .. وثانياً انا مراقب الايميل مالها .. وبعدين انت تعرف انها حرمة حشيم ومن شكلها تعرف انها بنيه مربايه هب خايسه .. "
احمد : " في هاي صدقت .. ماشاالله عليها غاوية و حرمة حشيم .. احيد يوم كنا نشوفها في لندن ماكانت تعبر حد .. بس شكبرها ؟؟ .."
سيف : " والله هي في اول سنه في الجامعة .. "
احمد : " الله يهنيكم ان شاالله .. بس اتحمل من البنات لانهن لعابات وماتعرف الزينة من الشينة منهن .. "
سيف : " انت ليش ماخذ فكرة شينه عالبنات ؟؟ صدقني هب كل البنات خايسات واصابعك هب شروات بعض .. "
احمد : " زين .. خلنا من هالسالفة الحينه .. قولي .. انت حاط في بالك انك تاخذها ؟؟ .."
سيف : " عيل تتحراني شروات الشباب اللي يكلمون البنيات بس عسب يقضون وقتهم ؟؟ لاحبيبي .. انا اكلمها لاني احبها وان شاالله باخذها .."
احمد : " بس اخاف عمي يسويبك شروات ماسوى في بطوي ؟؟ .."
سيف : " ماعليك انت من هالسالفة .. انا بقنعهم .."
احمد : " والله كيفك .. يلاّ تحيرنا على عموه .. "
وساروا الشباب الصالة عسب يشوفون ام بطي ..
ومن حدروا شافوا حريم وكل واحد قفط واحترق ويهه واستسمحوا وردوا على ورى .. بس قبل لايطلعون زقرتهم ام بطي ..
ام بطي : " احدروا .. احدروا .. ماعندنا حد غريب .. هذي عموتكم ناعمة .. اقربوا سلموا عليها .."
وحدروا الشباب وحبوا ام حمدة على راسها لانها حرمة عوده ..
ام حمدة : " حبتكم العافية فديتكم .. "
ام بطي تأشر بايدها : " ناعمة .. هذا ولديه سيف .. وهذا أحمد .. ولد اخو ريلي .."
ام حمدة : " ماشاالله عليهم .. ربي يحفظهم .. بس اللي احيده ان عندج ولد واحد واللي هو بطاي ؟؟ .."
ام بطي : " هذا ظنايه من عقب بطي .. وهو اصغر عن بطي بكمن سنه .. هذا الله يسلمج ولد المرحومة شادية ربي يرحمها ويغمد روحها الجنة وهذا ولديه اللي انا مايبته .. وافتخر به .."
استانس سيف من رمسة ام بطي .. خصة انها كانت ماتفرق من بين عيالها .. يعني تعاملهم كلهم على اساس انهم عيالها واكثر ..
ام حمدة : " ماشاالله عليه .. ربي يحفظهم لج .."
ام بطي : " آمين .. "
اليازية وحمدة كانو يلوس ويتصوخون الرمسة .. ورزت اليازية بيوهها ..
اليازية داشه عرض : " سواف لاتصدق عمرك وايد .. "
أحمد : " دخيلج يالعروس سكتي .. مافينا يصيبج شي .."
اليازية والويه محترق : " انا ماكلمتك .. انا كنت اكلم سواف .. "
سيف : " ههههههه .. شكلك ييت عالعوق .. "
ام حمدة توها تتذكر : " هيه .. توني إلا تذكرت .. بالبركة فديتج وعقبال اللي عندي .."
حمدة : " بسم الله عليّه .. انا هب مستعيله عالعرس .."
احمد وسيف بهتوا من تكلمت حمدة .. لانهم من حدروا وهي ساكته .. بس من تكلمت فجوا عينهم ويلسوا يطالعونها .. كانت تخبل ماشاالله عليها .. حتى كل كلمة تطلع من منطوقها عسل ..
ام بطي : " لاان شاالله .. انتي حق ولديه بطي .. وماعندنا بنات مايعرسن .."
الكل سكت .. خصة اليازية وسيف وأحمد لانهم يعرفون ان بوبطي رافظ فكرة زواج بطي من حمدة .. بس ماحبوا انهم يعلقون عالموضوع واكتفوا بالسكوت ..
وعقب دقايق من السكوت .. نطقت ام بطي ..
ام بطي : " سواف فديتك .. بتودينا الدختر الحينه ؟؟ .. "
سيف : " هيه امايه .. ثرنا تحيرنا وايد .. "
ام بطي : " يلاّ ناعمة .. تعالي ويانا .. "
ام حمدة : " اكيد بيي وياج .. عيل بخليج بروحج ؟؟ .."
ام بطي : " تسلمين فديتج .. ( تفتر صوب البنات ) وانتن بتون ويانا ؟؟ .."
اليازية تصد على حمدة .. وتغمزلها بعينها .. وتردلها حمدة بغمزة ثانية .. بمعنى انها موافقة انها تسير معاهم .. عاد انتوا تدرون بحركات البنات ..
وفعلاً الكل اتزهب وسرحوا المستشفى ..

وفي المستشفى .. من عقب ماوصلوا ..
كلهم كانوا عند بطي قبل العملية ..
استانس بطي من شاف ام حمدة بس ماكان يعرف ان بنتها كانت معاها .. لان اليازية وحمدة كانوا سايرين صوب غرفة الانعاش عسب يتطمنون على هزاع .. وساروا عند الدكتور عسب يتخبرونه ..
وحدروا عالدكتور ..
اليازية وحمدة : " السلام عليكم والرحمة .. "
الدكتور يتكلم بلهجته المصرية : " وعليكم السلام ورحمة الله وبركاته .. ايوا ياعسل .. اي خدمة ؟؟ .."
اليازية وحمدة هلكوا من الضحك على رمسته ..
اليازية : " دكتور .. انا بنت عم المريض هزاع بن سهيل المحيربي .. اللي اليوم بتسووله عملية زرع الكلى .. "
الدكتور ماصدق خبر .. من عرف من هي ويلس يتفلسف عليهن : " ايواااا .. اهلاً وسهلا ً فيكي .. والله المريض هزاع عنده فشل كلوي عشان سبب غير مباشر واللي هوّا النزيف الشديد ونحن مطرين اننا نعمله عملية زرع الكلى .. وان شاالله تنجح العملية .. "
حمدة واليازية ماقدروا بنطقون بكلمة من كثر الضحك .. وطلعوا عن الدكتور ..
وفي المرر ..
اليازية : " هذا عبيط وإلا يستعبط ؟؟ .."
حمدة : " ههههه .. الاثنين .. "
اليازية : " يالله ان شاالله يقوم هزاع بالسلامة .. والله تولهت على سوالفه .. "
حمدة : " آمين يارب .. "
اليازية : " يلاّ .. نسرح صوب بطوي خلنا نشوفه قبل لايسووله العملية .. "
وساروا عند بطوي ..
وفي حجرة بطي ..
كانوا العيايز يلوس مع بعض .. ام هزاع وام بطي وام حمدة .. وبطوي كان طفران من سوالفهن ... وفي الصوب الثاني ميثانه وعلاية كانوا يلوس
وشويه وإلا تحدر اليازية وحمدة .. بس بطي مانتبه عليهن لانه كان سرحان في عالمه الخاص ..
اليازية تقربت من اخوها : " بطوي .. بطوووووووي .. "
بطي توه ينتبه ويصد صوبها : " ها .. شو ؟؟ .."
وانصدم من شاف حمدة .. قام قلبه يرقع ويدق طبول .. حس انه يحلم ..
اليازية : " حوووه .. وين وصلت ؟؟ اكلمك انا من الصبح .. "
بطي مطنش اليازية : " السلام عليج حمدة .. "
حمدة بكل دلع : " وعليك السلام والرحمة .. "
بطي : " شحالج حمدة ؟؟ .."
حمدة : " ربك إلا بخير وسهاله .. ومن صوبك ؟؟ .."
بطي في خاطره .. والله من ريتج .. كل العوق والاسقام زالن .. : " والله بخير ونعمه .. "
حمدة : " يلاّ شد حيلك .. ان شاالله العملية ناجحة باذن الله .. "
بطي متشقق : " ان شاالله .. "
ام بطي دشت عرض : " ها بطوي .. يبنا العوق ويانا عسب ترتاح .."
في هاللحظة بطي وحمدة احترق ويههم وماعرفوا شويسوون .. واتعلثت حمدة بالحمام وطلعت من الحجرة ولحقتها اليازية ..
بطي يكلم امايته : " امايه .. مايحتاي تجسين النبض .."
ام حمدة ضحكت لانها كانت تعرف ان حمدة وبطي ذايبين في هوى بعض بس للأسف ولاواحد منهم يعرف عن اللي في قلب الثاني .. بس سبحان الله دايماً الام تعرف عن اللي في قلب ظناها .. فام بطي وام حمدة كانن يعرفن بالللي في قلب عيالهم ..
وعقب ساعات من الانتظار .. دخل الدكتور عليهم وقاللهم ان العملية عقب دقايق ..
وشلوا بطي من الحجرة اللي كان فيها وودوه غرفة العمليات .. بس قبل لايخدرونه حدر عليه ابوه ..
بوبطي باس بطي على يبهته ومانطق بكلمه ..
بطي ماقدر يقاوم ابوه ولوى عليه ومات من الصياح .. بطي كان قلبه ابيض وعمره مايعرف يزعل من حد وخصة من الاغلى الناس عنده ..
بطي ميت من الصياح : " اسمحلي ابويه .. والله اني كنت مضيج وقلت رمسه ماكانت من قلبي .. "
بوبطي : " بالحل فديتك .. انا ادري انك تحبني وانا بعد احبك .. بس شد الهمة وتوكل عالله .. وصدقني هزاع محتاينك هالحزة .. وتعال بخبرك قبل لاانسى .. ثرها حبيبة قلبك غاوية ماشاالله عليها.. "
بطي طار من الوناسه من سمع كلام ابوه .. وتوكل على ربه .. ارتاح بطي راحه كبيره من رمسه ابوه .. يعني حس ان ابوه يمكن يغير رايه في موضوع الخطبة .. وسوو العملية ..
.
.
الكل كان يتريا خاري غرفة العمليات
وماشاالله عليها ام بطي ماصاحت وتمالكت اعصابها .. ماشاالله عليها كان ايمانها بالله قوي ومابينت انها ضعيفة .. وام حمدة كانت مستغربة من قوتها ..
اما ام هزاع فكانت غرقانة من الدموع .. ماتنلام وحليلها .. لان نسبه نجاح العملية هب مضمونة .. وهزاع كان بعده في غيبوبة وماكلم حد من يوم الحادث ..
والبنات كانوا يالسات على صوب .. ميثانة وعلاية واليازية وحمدة .. ويلسن يسولفن ..
وفي الصوب الثاني الشوّاب مع الشباب يلوس .. بوبطي وبوهزاع وأحمد وسيف .. وخليفة كان ياينهم في الدرب ..
ماشاالله العايله كلها كانت متيمعه ..
حمدة حليلها كانت مستانسه .. لانها كانت تحس بجو اسري مفتقدتنه .. كانت تقول في خاطرها : " ماشاالله عليهم .. الله يحفظهم .. دومهم متيمعين عالحلوة والمرة .. الله يرحمك ياابويه ويغمد روحك الجنة .. والله متولهه عليك .. "
ونزلت دمعه حارة على خدها .. وانتبهت اليازية عالدمعة ..
اليازية : " حمدوه .. شعنه تصيحين ؟؟ .."
حمدة تمسح دموعها : " ماادري شودخل في عيني .. بسير اغسلها .. "
واشتلت حمدة من مكانها وسارت الحمام .. وطلعت كل اللي في خاطرها ويلست تصيح .. وخلاف غسلت ويهها وردت يلست معاهم ..
.
.
خليفة توه وصل لانه كان في الدوام وماعرف بالحادث إلا اليوم ..
وعلى فكرة خليفة قدّم اوراقه في كلية الشرطة وقبلوه .. وماشالله عليه كان منضبط في دوامه ..
وحدر عليهم بلبسه (الدريس) .. ومن شافته علاية تخبلت ..
خليفة : " السلام عليكم والرحمة .."
الكل صد صوبه وردوا السلام : " وعليكم السلام والرحمة .. "
ويلس خليفة صوب الرياييل ..
اليازية تنغز علاية : " هيه يابودعي .. ثرك غاوي .. ومن غواتك ذبحت ناس .."
ميثانة هلكت من الضحك : " ههههه .. واللي عراسه بطحه .. يتحسسها .."
حمدة كانت شروات الاطرش في الزفة .. حليلها ماكانت تعرف ان علاية خطيبة خليفة ..
حمدة : " شوالسالفة ؟؟ انتوا تطرون منو ؟؟ .."
اليازية : " الستهانم علاية .. "
علاية محترق ويهها من الحيا : " شوشو ؟؟ عادي .. خطيبي .. كيفي .."
حمدة توها تفهم السالفة : " ياويلي انا .. صراحة طبيتيها .. "
اليازية :. " تهبي إلا هي اطبني .. وبعدين ياقوات عينج ياعلاية.. اونه خطيبي .. يابعد روحي انتي اعقلي واركزي شويه ولاتفرين رمسة .. "
هلكن البنات على رمسه اليازية .. وعلاية كانت مفوله ..
والكل كان في صوب ..
وعقب ساعات طويلة من الانتظار .. طلع الدكتور ..
والكل تقرب منه ..
بوهزاع : " بشّر دختر .. كيف كانت العملية ؟؟ .."
الدكتور متشقق : " والله العملية نجحت وان شاالله حيؤومو بالسلامة .. "
كلهم استانسوا وفرحوا بنتيجة العملية .. الحمدلله ماخاب ظن حد ..
.
.

وعقب اسبوع من العملية .. بطي الحمدلله كان صاحي ورد بقوته اللي كان عليها ..وماتأثر بفقده لكليه وحده ..
وهزاع في هالحزة كان توه ناش من غيبوبته .. وامايته كانت يالسه حذاله تقرا عليه ..
هزاع فج عينه ويلس يدور بعيونه عن المكان اللي هو فيه ..
هزاع يتكلم بصعوبه بعد ماانتبه على امه : " امايه .. "
ام هزاع حليلها من سمعت صوته ربعت حذاله .. ويلست تبوس راسه وتلوي عليه وتصيح ..
هزاع اتضايق : " امايه شبلاج ؟؟ وين انا ؟؟ .."
ام هزاع : " فديتك انا .. انت في المستشفى .. "
هزاع : " شعنه ؟؟ .."
ام هزاع : " لانك سويت حادث .. "
ودارت كل الاحداث في راس هزاع واتذكر كل اللي صار ..
هزاع : " امايه وين بطي ؟؟ .."
ام هزاع : " بطوي في المستشفى هنه ..لاتتروع .."
هزاع : " انزين خلوه يي هني .. اريد اشوفه .. "
ام هزاع : " هو مرقد في حجرة من الحجر اللي في المستشفى ومايقدر ايي عندك .. "
فز قلب هزاع : " ليش مرقدينه في المستشفى ؟؟ .."
ام هزاع : " لانه تبرعلك بكليته .. بس دخيلك لاتتخبر وايد .. الرمسه هب زينه حقك .. "
وماحس هزاع بعمر ويلس يفكر ببطي ورد رقد من اول ويديد ..
فرحت ام هزاع لان ولدها نش من الغيبوبة اللي كان فيها ..
.
.
وعقب اسبوعين تحسنت حاله بطي ورخصوه عسب يطلع من المستشفى .. وكان حليله دومه مطيح عند هزاع ..
كان بطي يالس حذال هزاع ويسولف معاه .. وحدر عليهم الدكتور اللي كان شكله مايسر ..
الدكتور : " اهلاً ياشباب .. عاملين ايه النهارده ؟؟ .."
هزاع : " والله الحمدلله .."
الدكتور : " الحمدلله .. بص يابني هزاع .. انا حبيت اني اكلمك على انفراد .. وبطي مش غريب .. صح ؟؟ .."
هزاع باستغراب : " هيه .. بطي هب غريب .. "
الدكتور : " بص ياهزاع .. انت ايمانك بربك كبير.. وكل واحد مننا ياخد نصيبه في الدنيا دي .. "
هزاع متروع : " شوالسالفة ؟؟ .."
الدكتور : " انت مش حتأدر تمشي .. "
هزاع انصدم وحس جنه حد صب ماي بارد عليه .. كان هب مصدق اللي يسمعه .. كانت دموعه تنزل من دموعه بدون مايحس ..
الدكتور : " انا آسف ياابني .. بس في أمل انك تمشي اذا كانت رغبتك أويه (قويه) وعندك دافع .. "
بطي غمظه هزاع : " كيف يقدر يمشي من اول ويديد ؟؟ .."
الدكتور : " انا مشغول دلوأتي .. عندي عملية طارءة ولازم اروح .. وحبعت النيرس عشان تؤولك بكل حاجة .."
وطلع الدكتور وماخبرهم بالعلاج ..
وتم حليله هزاع على حالته وماتكلم ..
بطي مايعرف شويسوي : " هزاع .. لاتتروع .. ان شاالله بترد تمشي من اول ويديد .. "
وشويه وحدرت النيرس ..
والنيرس كانت متدربة يديده في المستشفى وكانت آيه في الجمال ماشاالله عليها ..
بطي : " انتي النيرس الللي مطرشنج الدختر ؟؟ .."
النيرس : " هيه نعم .. "
بطي : " انزين .. كيف يقدر هزاع يمشي من اول ويديد .. "
النيرس : " لاتتروعون .. ترى يمكن روعكم الدكتور زيادة عن اللزوم .. شوف الشيخ .. انت بتقدر تمشي باذن الله إذا انت تجاوبت مع العلاج الطبيعي .. العلاج مابيكون سهل .. بس ان شاالله بالارادة وبالعزم بتتغلب على هالشي .. وان شاالله بتقدر تمشي من اول ويديد .. بس هالشي هب اكيد .. لان العلاج الطبيعي شويه صعب ويحتاي وقت .. "
هزاع ارتاح من كلامها ..
بطي : " وكم ياخذ هالعلاج ؟؟ .."
النيرس : " والله على حسب تجاوبه مع العلاج .. وأقل شي بياخذ عليه ست اشهر .. "
هزاع تسند عالسرير وحط راسه عالمخده واتنهد ..
بطي : " مشكوورة الشيخة .. ماقصرتي .. بس متى نقدر نبدى العلاج ومنو بيتابع حالته ؟؟ .."
النيرس : " انا اسمي مها .. وانا متدربه وان شاالله بغدي دكتوره بعد فترة من التدريب .. وانا ان شاالله اللي بشرف على علاج هزاع .. وبنبدى في اي وقت يريح هزاع .. "
كانت مها تتكلم جنها حرمة عوده ماشاالله عليها .. حتى انا كلامها ريّح قلوبهم ..
بطي : " خلاص ماقصرتي الشيخة .."
النيرس ( مها) : " انا في رسم الخدمة .. واي شي تحتايونه مايردكم إلا لسانكم .. وان شاالله دوم بكون موجودة .. "
وطلعت النيرس مها من الحجرة ..
بطي : " الزوز لاتتروع .. ان شاالله بترد تمشي باذن الله .. "
هزاع : " ............. "
بطي : " هزاع توكل عالله .. وصدقني ربنا مايغفل عن عباده .. ودوم حط في بالك ان الشفا والمرض في الله سبحانه .. وبقوة ايمانك بترد تمشي ان شاالله .."
ارتاح هزاع اكثر من كلام بطي ..
هزاع يصد صوب بطي : " بس ماشاالله عليها غاوية .."
هالحزة نقع بطوي من الضحك : " هههههه .. عنبوه !! حتى وانت على فراشك يالس تتمدح في البنات ؟؟ والله ياانكم يالرياييل مامنكم امان .. "
هزاع : " منو اللي ماله امان ؟؟ انا وإلا انت ؟؟؟ ايييييه .. نسينا ماكلينا يابطوي .. ماتحيد ايام التقردين والمغازل ؟؟؟ .."
بطي : " بسم الله عليّه من هالطاري !! انا واعوذ بالله من كلمة انا عمري ماغازلت .. "
هزاع : " خلني ساكت .. والله اني هب متفيق .. لو كنت متفيق .. كنت طلعت كل فضايحك يالهرم .."
ويلسوا الاثنين يسولفون ..
كان بطي يحاول باي طريقة انه ينسي هزاع حزنه .. وكان دومه يقوي قلبه بذكر الله سبحانه ..
واليوم الثاني كانوا بيرخصون هزاع ..
وسار بطي عند النيرس مها وخبرها عن حالة هزاع النفسية .. حليلها كانت طيبة ووايد متجاوبه مع بطي .. وخذوا المستشفى رقم بطي لانه كان بعبارة المسؤول عنه .. حتى انه كان يهتم في هزاع اكثر من ماتهتم ام هزاع فيه ..
وطبعاً خذوا رقمه عسب يخبرونه بأي تتطورات واستفسارات ثانية ..
ورد بطي البيت .. عسب يخطف على هزاع بالباجر ويرده البيت ..
بطي كان مستانس .. لانه من يرد البيت بيشوف غناته وروحه وقلبه (حمدة) ..
.
.
ووصل بطي البيت .. ومن وصل صاح تلفونه ..
وتم يرمس في الحوي وماحدر البيت ..
وكانت حمدة توها طالعه من الملحق وسايره الفله ..
بس انتبهت على ان بطي كان يرمس في التلفون .. ووقفت على برد ويلست تتصوخ ..
بطي : " ههههه .. والله ولكم وحشه .. وين كل هالغيبة ؟؟ .."
..........
بطي : " هههههه .. انزين .. متى نقدر نشوفكم ؟؟ .."
............
بطي : " افاااااا والله .. ماهقيتها منج ؟؟.. "
............
بطي : " عالعموم .. انا بخليج الحينه لاني بحدر البيت .. وان شاالله نتفاهم عالموضوع خلاف .. "
............
بطي : " هههههه .. لاخلاص .. ان شاالله بنتفاهم يوم بنتقابل وبنشوف بعض .. "
.............
بطي : " يلاّ برايج .. فداعة الرحمن .. "
طبعاً بطي كان يكلم وحده لبنانيه من الشركة .. كانت متصله عسب تتأكد من بعض الفايلات .. لان عندهم اجتماع والاوراق كانت ناقصه ..
وحمده شروات قبل .. مايهزها ريح .. بس اكيييييد كانت تحترق في داخلها مليوووون مرة ومرة ..
واتعمدت انها تخطف جدام بطي ..
وبطي من شافها فز قلبه وسلّم : " السلام عليج والرحمة .. "
حمدة ماصدت صوبه وكملت دربها : " وعليكم السلام الشيخ .. "
حمدة ماصدت صوبه لان عيونها كانت غرقانه دموع .. وماحبت تبين في يوم من الايام لاي حد انها ضعيفه ..
وحدرت حمدة الفله ..
وبطي كان مبهت .. لانه كان متعود على ابتسامة حمدة العذبة اللي توزعها على كل الناس ..
بطي يكلم عمره : " غريييييبة ؟؟!! حمدة فديتها ظارية انها تبتسم وتسلم عالناس .. شبلاها اليوم ؟؟ .."
وتم بطي يتساءل ويتخبر عمره .. وفي الاخير حدر البيت ..
ومن حدر ماشاف حد في الصالة .. يلس يزاقر ..
بطي : " يزووووي .. يزووووي .. "
وسمع صوت اليازية من المطبخ التحظيري وسار صوبها ..
ومن حدر شاف حمدة ..
وحمدة تيبست مكانها من شافت بطي .. وكانت تريد تتطلع .. بس عرفت ان هالحركة هب حلوة ..
بطي تم يطالع حمدة وخلاف افتر صوب اليازية : " اليازية .. تعالي اريد اكلمج خاري .. "
وطلعت اليازية وكلمت اخوها .. وردت مرة ثانية المطبخ ..
حمدة : " شعنه ماتكلم جدايه ؟؟ .."
اليازية : " والله ماادريبه .. "
حمدة : " شو كان يريد ؟؟ .."
اليازية : " فايلات واوراق مال الدوام .. "
وكملوا شغلهن .. كانن يطبخن العشا ..
.
.

بطي سار حجرة اخوه سواف ..
وكان الباب ملايم .. ويلس يتصوخ الرمسة ..
سواف : " والله متوله عليج .. والله بموووت من الشوق .. ليش جي تعذبيني ؟؟ .."
..............
سيف : " لاوالله .. من يومين ارقبج .. كل يوم اقول بتسوي اليوم .. وكل يوم اعيش على نفس الامل .. حبيبتي والله اني مااقدر اعيش بدونج .. دخيلج ارحميني وعالاقل كل يومين سمعيني صوتج .. "
بطي من سمع سوّاف هلك من الضحك عليه .. وقال في خاطره " هيه ياسواف .. وين اللي كان يحط علينا .. اونه بطوي بوالبنات ويكلم بنات .. ونحن ودرنا البنات وانت طحت طيحه .. "
ودق بطي الباب ..
وحدر بطي ..
سيف تغيرت ملامح ويهه : " بوحميد سولي خلاف .."
...........
سيف : " لالالا .. ربع ساعة ورد اتصل .. اترياك انا اوكي ؟؟ بااااي .."
وبند سيف التلفون ..
بطي بدون اي لف أو دوران : " خل عنك اللواته .. ابويه انا انسان عندي خبره واكثر واحد اعرف سوالف الشباب يوم يكلمون البنات .. "
ويلس بطي عَـــبرد الشبرية .. وسيف مبهت وبعده هب مصدق اللي يسمعه ..
بطي بكل غرور : " ومنو هاي اللي كنت تكلمها ؟؟ ولو سمحت جاوبني بصراحة .. "
كان بطي يرمس جنه واحد من التحريات .. وكان شكله يضحك ..
سيف : " والله انك هب هيّن يابطاي .."
بطي : " قلتلك لاتلف ولاتدور .. منو هاي اللي تكلمها من ورى اهلك ؟؟.."
سيف : " دخيلك يالمصلح الاجتماعي .. عن ينطرلك عرق !! .."
بطي : " هههههه .. كنت اتغشمر معاك .. بس صدق سواف انا مااحيدك تكلم بنات .."
سيف : " وهاي المعلومة صحيحه 100% .. انا ماالكم بنات .. "
بطي : " كيف صحيحه وانا يّودتك عالخط السريع وانت تكلم وحده ؟؟.."
سيف : " يعني يالاخصاءي الاجتماعي انا مااكلم غير وحده .. "
بطي : " اها .. ماعلينا الحينه من هالسالفه .. ان شاالله خلاف بنتفاهم عليها .."
سيف : " هههههه .. والله تنفع تكون اخصاءي اجتماعي .. هههه .. "
بطي : " ههههه .. تصدق كان في خاطري اكون .. بس للأسف القدر ماسمحلي .."
سيف : " هههههه .. والله انك تحفه .. "
بطي : " تحفه وإلا تمثال ؟؟ .. ههههههه .."
سيف : " هههههه .. والله انك متفيق .. "
بطي : " انا وإلا انت المتفيق ؟؟ يابوالحب والغرام .. "
سيف : " هيه نعم .. انا بوالحب والغرام .. والحب هب عيب .. وشروات ماقال ميحد .. حيث لانه في العرب سنه .. خصه عند الناس الاشرافي .. "
بطي : " ياويلي على بوالمنطق .. سلااااااامي عليك ياسيفو .. والله انا يوم حبيت ماقلت هالرمسه .."
سيف : " ومنو هاللي حبيتها ؟؟ .."
بطي : " عن العبط .. اظني كلكم تدرون منو اللي احبها ؟؟.."
سيف : " هههه .. لازم الواحد شويه يستعبط .. عالعموم .. ترى حمدة حرمة غاوية وحشيم ماشاالله عليها .. وماعليها كلام .."
بطي : " آآآآآه .. ان شاالله يقتنع ابويه ويوزني اياها .. "
سيف يرفع ايده : " آآآآآميــــــــــن .. وان شاالله انا آخذ منايه .."
بطي : " اسمها منايه ؟؟ .."
سيف : " اسمها آمنه .. بس انا ادلعها منايه .."
بطي : " هههههه .. مشكله يوم اليهال يحبون .. ههههه .."
سيف : " يهال في عينك .. عنبوه كبر البعير واقف حذالك وتقول عني ياهل ؟؟.."
بطي : " يعني تعترف انك بعير ؟؟ .."
سيف : " انا ماقلت جي .. "
بطي : " لالالا .. توك إلا قايل انك بعير .. خلاص اليوم بنطرشك العزبة صوب الرجاب .. هههههه .."
سيف : " ههههه .. ( يقلد صوت البعير) بااااااع ..."
بطي : " ههههه .. بصراحه اثبت بجدارة انك بعير .. "
سيف : "ههههه .. انا احب البعران والرجاب لاني ولد بدو .. بس انا هب بعير .. "
بطي : " لاتحاول .. خلاص الاسم ركب عليك .. البعير سيف .. هههه .."
سيف : " جان انا بعير .. عيل انت ناقة .. ههههه "
بطي : " عالاقل انا نثيه .. والكل يحب الجنس اللطيف والناعم .. "
سيف : " ههههه .. والله محد يقدر ييب راسك يا بطوي .. "
بطي : " اكييييييييييد .. "
سيف : " الله يعين هاللي بتظويها .. اظني لاليلها بيكون ليل .. ولانهارها نهار .. "
بطي : " اصلاً اللي بتاخذني بتبوس ايدها ليل ونهار وبتحمد ربها مليون مرة .."
سيف : " الله لابليتنا .."
بطي : " الله لابليتنا بشو ؟؟ .."
سيف : " لاماشي .. سلامة راسك .. "
بطي : " عالعموم .. انا بسير ارقد الحينه .. بس حبيت اتطمن عليك .. "
سيف : " مشكوووور يابطاي .. ماقصرت .. "
وطلع بطي من الحجرة وسار حجرته عسب يتسبح ويرقد .. وماكان يريد يتعشى لانه عرف ان حمدة مسويه العشا .. وهو كان ماخذ على خاطره من حمدة لانها ماعبرته ..
************************************************** *************



بسكـــــــــــم

وانشالله ما ببطي....^^

كان بطي توه طالع من عند سواف ..
سار حجرته عسب يرقد .. لانه كان تعبان .. من الصبح وهو عند هزاع ..
وباجر بيطلع هزاع من المستشفى..
حدر بطاي الحجرة وكان هب متعشي ..وكان حاط في باله انه مابيتعشى دام حمده هي اللي مسويه العشى مع اليازيه ..
بطي ماكان يعرف سبب قسوه حمده وزعلها .. كان حليله يحاتي ويفكر..
وصدق كان منقهر من اسلوب حمده معاه في الكلام..
وفصخ الحمدانيه وفرها عالارض .. وفصخ الكندوره وتم بوزار وفانيله..
وطاح عالشبريه عسب يرقد ..
وشويه وإلا حد يدق الباب ..
بطي ببرود : " منوووو ؟؟ .."
مريامي وشما : " انااااااااااااااااا .."
بطي ضحك عليهن : " منو بالضبط ؟؟ انا اسمع صوت هنتين .."
مريامي : " انا مريم وشمو معايه .."
بطي : " شو تبن ؟؟ .."
مريامي : " نريد نسولف معاك .."
شمامي : " حبيــــبي .. نليد نلعب معاك.." .. انتوا تدرون ان شمو ماتقدر تقول بطوي عسب جي تدلعه حبيبي ..
وبطي عوقه شمامي ومايقدر يردها ..
بطي : " احدرن .. "
وحدرن الهنتين ..
وشمامي ربعت صوب بطي وفرت عمرها في حظنه ..
وبطي شلها ولوى عليها وتم يبوسها وهي تضحك
شمامي : " هههههه .. يعولني .. هههه.." (يعورني)
بطي : " فديت روحج والله .. شو اللي يعورج ؟؟ .."
شمامي تأشر بايدها على شنبه
وهالحزه هلك من الضحك
بطي وهب قادر يرمس من زود الضحك : " افاااا عليج والله .. بس عشان خاطرج بسير وبزلغ شنبيه اليوم ..ههههه "
مريامي : " هههههه .. مااتخيل شكلك بليا شنب .. ههههه .."
بطي : " هههه .. حووووه .. لاتحطين في بالج هالشي .. مستحييييييييل اخف شنبيه .. اصلاً الرياييل مايخفون شنبهم .. منقووووود.. "
مريامي : " اووووووه .. "
بطي : " شبلاج ؟؟ .."
مريامي تتقرب من بطي وتيلس عالشبريه حذاله وتمسك شعره
مريامي : " بطاااااااي .. شعرك هالطووووول ؟؟ .."
بطي : "روعتيني .. اتحسبت صرصور على راسي .. هيه فديتج .. شعري هذا طوله .."
مريامي : " ماشاالله عليه .. والله انه غاوي .. بس هب جنه وايد طويل ؟؟ وانت ريال ومنقود الريال يطول شعره الين تحت جتفه .. "
بطي : " لاحوووول .. انتي بعد بتبدين المحاضره اليوميه ؟؟ والله خلاص .. بحشه وبفتك منه .. بس ان شاالله يوم يصير نصيب .. تعالي مريومه انتي بتسيرين صف كم الحينه ؟؟ .."
مريامي : " يقولون بسير grade 7 (صف اول اعدادي).. وماادري جان اشاعه السالفه وإلا صدق ؟؟ ..."
مريومه ماشاالله عليها تحاول انها تتكلم شروات الكبار .. وكانت تحاول انها تقلد اليازيه في كل شي .. حتى في ظحكتها ..
بطي : " حلفي مريووووم ؟؟ صدق والله ؟؟.."
مريامي : " شعنه احلف ؟؟ السالفه ماتسوى .."
بطي : " ماشاالله عليج كبرتي وانا ماعندي خبر .."
مريامي : " اسمحلنا الشيخ .. ان شاالله يوم بكبر بيي بشاورك .."
بطي : " لاوالله مااطري جي .. بس والله الدنيا تمشي بسرعه .."
مريامي : " شفت عاد .."
بطي : " تعالي .. شخبار الدايناصور اللي في صفكم ؟؟ .."
كان في واحد في كلاس مريامي مطفربها .. وهي كانت تسميه دايناصور .. ودوم كانت تشتكي حالها عند بطي ..
مريامي : " هههههه .. والله بفتك منه .. لان ابويه قال انه بيحولني مدرسه ثانيه عسب المشاكل اللي استوت.. "
بطي باستغراب : " شو هالمشاكل اللي استوت ؟؟ .."
مريامي : " اسميه كان يطفربي هالبغام .. تخيل آخر يوم من الامتحانات ياي عندي ويقولي ( تحاول انها تقلد الولد وتغلظ صوتها ) مريووووم لاتسيرين مدرسه ثانيه حرام بنتولهه عليج .. اصغر عياله انا عسب يدلعني ؟؟ ..والله هالحزه غيظت وقمت عظيت اذنه.. بس ابويه الله يسامحه خلاني استسمح منه جدام اهله .. "
بطي ناقع من الضحك : " هههههههه .. والله انج قويه .. بس ليش استسمحتي من اهله ؟؟ .."
مريامي : " لان الحقير وشاي وولد امه .. سار وخبر امه .. وامه يتني وتمت تحتشر عليّه بس انا ماعبرتها .. قامت وسارت عن المدير وخبرته بالسالفه .. وطبعاً المدير الخايس اتصل في ابويه وخلاه يطلع من دوامه وايي المدرسه .. "
بطي : " هههههه .. خييييـــبه ؟؟!! .. خليتي ابويه يطلع من دوامه ؟؟ .. اكيد ابويه كان معصب هالحزه ؟؟ .."
مريامي : " صح انه كان مغيظ بس طبعاً مثلت عليه دور البريئة ويلست اصيح واتدلع عليه .. وقلتله ان الدايناصور هو اللي يتحرش فيني .."
بطي : " انزين .. وخلاف شو صار ؟؟ .."
مريامي : " انت تدري ان ابويه بيخليني استسمح منهم حتى لو كنت مش غلطانه .. بس الحمدلله السالفه عدت على خير وبسير مدرسه ثانيه .. "
بطي : " وانتي عادي عندج تودرين ربعج ؟؟ .."
مريامي : " والله my friends على عيني وراسي .. بس انا انسانه احب اجدد صداقاتي .. وربعي اصلاً مايستغنون عني .. يعني كلهم بيون معايه المدرسه اليديده بس طبعاً هذا كله بدون علم ابويه .. لان ابويه يريد افرق من بينا ولو عرف انهم بيون معايه هالمدرسه والله ليذبحني .. "
بطي : " هههههه .. والله انج داهيه .. بس صدقيني ابويه يبا مصلحتج عسب جي يبعدج عن ربعج .. "
مريامي : " بس ربعي ماسووا شي .. هذا كله من الدايناصور البغام .. خرّب علينا حياتنا .."
بطي صد صوب شمامي عسب يشوفها لان من يلست معاهم مانطقت بكلمه .. بس يوم شافها كانت حليلها طايحه حذال بطي وراقده ..
بطي شلها ورقدها عالشبريه ولحفها ..
بطي : " وين روز الهبله ؟؟ .."
مريامي : " والله ماادريبها وين ؟؟ شو تريد منها ؟؟ .."
بطي : " بس اريد اعرف جان عطتها وجبتها وإلا لا .. لانها رقدت وامايه لوعرفت انها راقده بليا اكل بتذبحنا .. "
مريامي : " امايه من ساعه هي اللي اكلتها وكانت بترقدها بس شمو ماطاعت .. "
بطي : " الحمدلله .. اشوى انها كلت .. "
مريامي : " بطاي .. اريد اتخبرك عن شي .."
بطي : " آمري غناتي .. "
مريامي : " بشكارتنا وين ؟؟ .."
بطي : " والله بشكارتكم سفرناها .. "
مريامي : " ليش ؟؟ والله اني تولهت عليها .."
بطي : " نحن الحمدلله بدل البشكاره عندنا ثلاث .. روز وتاما ونانسي .. وهب محتايين وحده رابعه .. فطرشناها بلادها .. بس دريولكم موجود وماسفرناه .."
مريامي : " وليش هذا الخايس ماسفرتوه ؟؟ والله حليلها بشكارتنا سافرت وهذا عبدالكريم الخايس تم في البلاد .. "
بطي : " سمعي فديتج .. انا قلتلج ان بشكارتكم مالنا حايه لها .. بس الدريول نقدر نستفيد منه .. خصه ان امايه دومها تحوم وتسرح صوب الحريم .. ودريولكم بيسد مكان دريولنا .."
مريامي : " انزين خلاص .. طب هالسالفه .."
خلاص انا برقد وبخلي شمو عندي .. "
مريامي : " انا بعد اريد ارقد معاك .. "
بطي : " مممم .. انزين .. بس انتي تعشيتي ؟؟.."
وشويّه وإلا تلفون بطي يصيح ..
بطي : " اتريي فديتج .. ربيعي عالخط .."
ورد بطي عالتلفون ..
بطي : " نعم ؟؟ شو تريد ؟؟ .."
حريز : " عثــــــــره ؟؟!! .. الناس يسلمون اول .. "
بطي ببرود : " السلام .. نعم ؟؟ .."
حريز بدى يغيظ : " بطوي شبلاك جي تكلمني ؟؟.."
بطي : " حريز قول اللي عندك وفكني .. "
حريز : " يعني انت تبا الفكاك ؟؟ .."
بطي : " والله انت شورايك ؟؟ .."
حريز : " والله اللي اشوفه انك ماتريد تكلمني .."
بطي : " وانت ماتخبرت عمرك ليش انا مااريد اكلمك ؟؟.."
حريز : " والله مااحيد عمري سويت شي غلط .. "
بطي : " لاوالله ؟؟ تخطب وبتعرس وانا آخر من يعلم .. لا .. والمشكله العوده إنك بتاخذ ختيه وانا ولا عندي خبر .."
حريز : " اوووووه .. والله اسمحلي بطوي .. والله امسحلي .. ادري اني مااستاهل .. سووووري الغالي .. "
بطي : " وين اصرفها هاي ؟؟.."
حريز : " في الدكان .. خخخخ .."
بطي : " تستعبط الاخ ؟؟ .."
حريز : " والله من حقك تزعل .. بس دخيلك هالمره طوفلي اياها .."
بطي : " انا مابطوفلك اياها إلا عسب خاطر ختيه فديتها .. بس صدقني انت ماتستاهلها .."
حريز : " افاااا .. شعنه مااستاهلها ؟؟ .."
بطي : " لانك زعلت اخوها .. "
حريز : " روعتني والله .. اتحريتك شايف عليّه شي .. المهم بطاي .. انت شو علومك ؟؟.."
بطي :" والله نشقح وننطح .. عايشين في هالدنيا .."
حريز : " الحمدلله على سلامتك .. وتستاهلون سلامة هزاع .."
بطي :" الله يسلمك ويسلم غاليك .."
حريز : " بطوي .. عيزت امايه وهي تتصل على تلفون امايتك .. بس عمو ماترد عليها .. يمكن التلفون عالسايلنت ؟؟ بس المهم انت خبرها ان نحن عقب يومين ان شاالله بنخطب اختك رسمي .. والملجه ان شاالله متى ماتريدونها انتو .."
بطي : " انزين .. امايتك حذالك ؟؟ .."
حريز : " هيه .. شعنه ؟؟ .."
بطي : " بعطي امايه التلفون وخلهن يتفاهمن على راحتهن .. "
حريز : " مممم .. صدقك .. هن بروحهن بيتفاهمن .."
واشتل بطي من مكانه عسب يسير عند امايته ويعطيها التلفون .. وطبعاً مريامي وراه وراه ..
بطي يصد صوبها : " على وين ؟؟.."
مريامي : " عــحمر عين .. "
بطي : " هههه .. عن العبط .. بتخبرج امايه وين ؟؟ .."
مريامي شهقت شهقه : " تصدق نسيت ؟؟ .."
بطي : " شووو ؟؟ .."
مريامي : " امايه كانت موصتني ازقرك عسب تتعشى معانا.."
بطي : " انزين هب مشكله .. "
وساروا كلهم حجرة الطعام ..
ومن حدر بطي عينه طاحت في عين حمدة وشافها بنظرة وهي بادلته هالنظره .. بس نظرات حمده كانت كلها الم وحزن .. وافتر بطي صوب امايته ..
بطي يحب راس امايته : " السلام عليج امايه .. "
ام بطي : " وعليك السلام والرحمة .. هلا والله بالغالي .. "
بطي : " امايه دوج التلفون .. ام حريز تريد تكلمج .."
وطلعت ام بطي عسب تاخذ راحتها في الرمسه مع ام بطي .. عاد انتوا تدرون بالحريم وسوالفهن اللي ماتخلص ..
وكان بطي يريد يطلع عسب يرد حجرته ويرقد ..
وافتر عسب يطلع .. لان حمده هي بس اللي كانت يالسه وحاول انه يتجاهلها ..
مريامي : " بطاااااي .. تعال اتعشى معانا .. "
بطي عاطنها ظهره : " هني وعافيه عليكم .. انا مااريد اتعشى .."
وشويه وإلا اليازيه تحدر ..
اليازيه : " افاااا والله .. عاد اليوم رضيعتك هي اللي مسويه العشى مع حمده .. وماتريد تطعم اكلنا ؟؟ .. افااااااااااااااا .."
بطي سحب اخته من ايدها ويرها صوبه ..
بطي يساسر اخته : " تدرين اني مااقدر اردج .. بس هالمره اسمحيلي .. مااريد .. "
اليازيه : " بطوي دخيلك .. "
حمده رغم غرورها الزايد وبرغم الويع اللي تحسبه في قلبها .. ماهان عليها حبيب قلبها مايتعشى .. خصه وانه مسوي عمليه من اسبوعين .. ويعني اكيييييييد لازم ياكل .. صح انها تحاول تتجاهل بطي وتبتعد عنه .. لانها تتحسبه يكلم بنات .. بس هي ماتعرف عن اللي في قلب بطي ..
حمده : " بطي .."
حمده كانت تتكلم والرمسه بحيل وقوه تتطلع من ثمها .. لانها ماكانت تريد تكلمه .. بس طبعاً مهما يصير هذا الغالي ..
بطي فز قلبه من سمعها وافتر صوبها : " لبيه الغاليه .."
حمده وهي متلومه وتقول في خاطرها ليش كلمته .. : " بطاي .. اليوم انا واليازيه طبخنا العشى .. دخيلك لاتردنا واطعم الاكل .. "
بطي : " والله اني تعبان .. وباجر لازم انش غبشه واسرح المستشفى لان هزاع ان شاالله باجر بيرخصونه .."
حمده : " بس انا طلبتك ؟؟ .."
بطي : " مممم .. الله يسامحكن .. والله مااقدر ارد حد طلبني .. "
ويلس بطي حذال مريامي اللي كانت مجابله حمده ..
يعني حمده كانت في ويه بطي .. وكانوا كل ساعه يتبادلون النظرات الجانيه ..
وحدرت هالحزه ام بطي مع خليفة وسيف ..
خليفة و سيف : " السلام عليكم والرحمة .. "
الجميع : " وعليكم السلام والرحمه .. "
بطي نش من مكانه وسار اتخاشم مع اخوه .. لانه كان توه راد من الدوام ..
بطي : " ها خلوف .. متى العرس ان شاالله .. "
خليفة يفتر صوب امايته : " والله اتخبر امايه .. هي ادرى عني .."
ام بطي : " والله بتخبل .. انت من صوب وحريز من صوب .. "
اليازية فز قلبها : " ليش شبلاه حريز ؟؟ .."
ام بطي : " والله مشتط ومعزر إلا يعرس قريب .. والود وده يعرس اليوم .. "
اليازية : " على هواه هو ؟؟ لازم يشاورني بعد .. "
ام بطي : " ان شاالله باجر بيون وبيخطبونج رسمي وانتي تفاهمي معاه .. "
هالحزه قفزت اليازية من مكانها وسارت صوب امها دبيج ..
ام بطي : " ياحافظ .. اشو بلاج تربعين جنج ناقه مهدوده ؟؟ .."
سيف : " هههههه .. والله تشبيهات امايه عجيبه .. "
اليازية طنشت سيف وتكلم امايتها : " امايه .. اشو قلتي من ساعه ؟؟ .. "
خليفة : " اظني سمعتي وإلا تتصيمخين ؟؟ .."
اليازية : " خلوف .. بلييييز لاتتدخل في شي مايخصك فيه .. ( وتفتر صوب امايتها) امايه ليش خليتيهم ايون باجر ؟؟ .."
ام بطي : " يالله بالستر .. نحن محيرين العرب من شهر .. وكل يوم نأخرهم ونأجل السالفه .. بصراحه انا افتشلت منهم .. "
مريامي شهقت شهقه .. شكلها توها تستوعب السالفه .. : " يزوي .. انتي بتعرسين وبتخليني بروحي ؟؟.. "
اليازيه احترق ويهها .. حست ان كلمه العرس شويه كبيره ..
اليازيه : " ها .. لالا .. مابخليج بروحج .."
حمده : " شعنه تقصين عالبنيه .. خبريها انج بتعرسين وخلاص .. "
مريامي : " لااااااااااا .. يزوي يعني بتخليني بروحي ؟؟ .."
اليازيه ماعرفت شو ترد على اختها وتمت ساكته ..
وقطع هالسكوت كلام بطي
بطي : " وانا فديتج ماتريديني ؟؟ .."
مريامي : " والله اريدك .. بس انت ماتيلس دوم معايه .. اليازيه دومها تكون معايه .. "
اليازيه عورها قلبها على اختها ودمعت عينها بدون ماتحس ..
بطي : " حبيبتي مريومه .. البنيه مصيرها تعرس وتسير بيت ريلها .. وانتي ان شاالله نحن بنعوظج .. عندج شمو فديتها ماتقدر تعيش من دونج .. وبعدين انا مااطلع وايد هالايام .. يعني بتملين من مجابل ويهي .. واذا انا طلعت وكنتي طفرانه .. بس دقيلي رنه وحده وان شاالله بكون عندج .. وبعدين عندج سواف بعد .. "
سيف : " صدقه بطوي .. يوم تريدين شي فديتج تعالي عندي .. "
مريامي ارتاحت شوي من كلام بطي .. بس طبعاً هي وايد متعلقه في اليازيه وماتقدر تفترق عنها ...
خليفة قطع عليهم رمستهم : " انااااااا يوعاااااااااان .. "
ام بطي : " وا فديت ولديه .. راد من الدوام يوعان .. ظكي يزوي هاك الصوب عسب اغرفله .. "
وقامت ام بطي وغرفت حق خليفة ..
بطي : " وانا ولد البطه السودا ماتغرفيلي ؟؟.. "
حمده : " شو تريد تاكل ؟؟ انا بغرفلك .."
بطي استانس من حمده .. لانه حس انها ردت شروات قبل .. بس طبعاً حمده داهيه وكانت تفكر بشي تسويه في بطي ..
بطي : " بس اريد المعكرونه بالبشميل .. "
حمده : " ماتريد شي ثاني ؟؟ .."
بطي : " لا مشكوره .. "
وغرفتله حمده المعكرونه ..
وسواف ومريامي اليازيه غرفتلهم ..
ويلسوا كلهم يتعشون ويسولفون ..
بطي : " امايه وين ام حمده ؟؟ .."
ام بطي : " والله ام حمده تعشت قبلنا ورقدت .. "
بطي : " افااا .. والله كان فخاطري ايلس معاها .."
وشويه وإلا تلفون بطي يصيح ..
بطي : " امايه ناوليني التلفون .."
حمده صدت صوب بطي وشافته باحتقار لانها كانت حاطه في بالها ان اكيد وحده من اللي يكلمهن بطي متصله ..
بطي رد عالتلفون ..
بطي : " السلام عليكم والرحمه .. "
.........................
بطي : " هااا .. بعدكم تدورون الفايلات ؟؟ .."
..........................
بطي : " والله هب عندي .. لو عندي شعنه بخشهم يعني ؟؟ .."
.........................
بطي : " لحظه عيوني .. "
هالحزه غيظت حمده بس عظت شفايفها وسكتت وحاولت تبين انها عاديه ..
وطلع بطي من حجره الطعام عسب يتفاهم مع موظفه الشركه .. بس طبعاً حمده ماكانت تعرف انها موظفه من الشركه .. فقامت من مكانها ..
ام بطي : " حمده فديتج وين سايره ؟؟ .."
حمده : " بسير ارقد .. "
ام بطي : " انزين ماكلتي شي ؟ .. "
حمده : " لا والله شبعت .. بسير ارقد .. "
وطلعت حمده من الحجره .. بس وهي طالعه انتبهت على بطي وهو يمشي في الصاله ويرمس في التلفون ..
ووقفت تتصوخ الرمسه
بطي : " سمعي .. انا يوعان وواصل حدي .. ان شاالله باجر بنتفاهم على هالسالفه .."
بطي : " هههههههه .. اوكي خلاص .. ربي يحفظج .. باااي .. "
وبند بطي التلفون ..
وافتر الصوب الثاني عسب يسير حجره الطعام .. بس شاف حمده جداه ..
حمده تمت تتطالعه ومانطقت بكلمه .. بس عيونها هي اللي تكلمن عنها ..
كانت حليلها تصيح ودموعها مخرسه خدودها ..
تقرب بطي منها
بطي : " شبلاج حمده ؟؟ .."
ماردت عليه حمده ..
بطي حليله كان متروع وماكان يعرف شو يسوي ..
بطي : " شعنه تصيحين ؟؟ .."
حمده خطفت حذاله وطلعت من الصاله وخلت بطي واقف بروحه في حيرته ..
بطي ربع وراها ومسك ايدها ..
حمده : " لو سمحت هد ايدي .. "
بطي : " مابهدج الين ماتقوليلي شبلاج .. "
حمده : " بطي فج عني .. "
بطي مفول : " مابفج عنج الين ماتخبريني شو السالفه .. "
حمده وهي تصيح : " تريد تعرف شو السالفه .. اوكي .. انا بخبرك السالفه .. السالفه ومافيها اني اكرهك وماادانيك ومااحب اشوف شيفتك .. يعني باختصار جبدي لايعه منك .. وانت تحاول انك تفرظ عمرك عليّه .. "
كانت رمسه حمده شروات السجاجين في قلب بطي ..
بطي : " بس دخليج .. لاتوفين رمستج .. "
وطلع بطي من الصاله وسار حجرته ..
وحمده حالها ماتسر بعد .. وربعت وسارت حجره اليازيه .. لانها كانت ترقد عند اليازيه .. بس حجره اليازيه مجابله حجره بطي .. يعني اكيد بيتلاقوا ..
وفعلاً وهي سايره فوق شافت بطي واقف بروحه في المرر ويرمس عمره .. بس هو ماانتبه عليها ..
بطي كان حاط راسه عالايدار ويكلم عمره .. " انا شو سويتبها ؟؟ شعنه تكرهني ؟؟ ليش ؟؟ ليش ؟؟ انا كلي فداها وهي تيازيني بصدودها .. انا اقترب منها وهي تبتعد.. انا ارخي وهي تشد .. يالله يالدنيا .. الين متى بتم جي ؟؟ ..انا شو ذنبي ؟؟ انا ذنبي الوحيد اني حبيتها ووفيت في حبها .. "
كانت حمده واقفه ومنصدمه من اللي تسمعه .. كانت هب مصدقه ..
" معقوله بطي يحبني ؟؟ معقوله ؟؟ وهو لو يحبني ليش يخوني ؟؟ ليش ؟؟ .."
وكانت واقفه بعيد وتشوف بطي شو يسوي ...
حدر بطي حجرته وخلاف هي حدرت حجره اليازية ..
تمت حمده واقفه مكانها جدا المنظره وتكلم عمرها .. وخلاف يلست عالارض .. كانت حاسه ان ريولها هب قادره تشلها ..
وفرت عمرها عالارض ويلست تصيح ..
حاولت انها تطلع كل اللي فخاطرها .. بس اللي في قلبها اكبر من جي ..
ماقدرت تتحمل حمده اكثر .. وآخر شي اشتلت من مكانها وخذت ورقه وقلم ويلست تكتب كل اللي فخاطرها ..

خلاص قررت ابتعد وارحل عن اراضيك..
خلاص القلب ماعاد يتحمل خطاياك..
تلعب على الحبلين لاجل تساليك..
خلني ارجوك عسى ربي يخليك..
ما كنت حشى والله بخليك..
في يوم ولا اقدر انساك..
والحين ارجوك روح اسمحلي وحياك..
وعسى ربي يحفظك للي يغليك..
*( من خواطر الحبوبة )

وخلاف طرت الورقه ويلست تصيح

...................
وفي الصوب الثاني كان بطي منسدح عالشبريه وهب قادر يرقد ..
كان يحاول يجبر عمره بالرقاد عل ووعسى ينسى ..
كان يتجلب ويصد الصوب الثاني ويشوف شمامي فديتها راقده ..
وخلاف يفتر الصوب الثاني ..
تم على هالحاله الين الساعه هنتين الصبح ..
بس شو ينسيه اللي صدره من طعون ..
قام بطي من مكانه وكان ناوي يسير يكلم حمده .. بس عزه نفسه فوق كل شي .. وخلاف خذله ورقه وقلم وقرر انه يكتبلها رساله .. بس كانت هالرساله آخر تواصل من بينهم ..

(غدار)
الهوا داير من مغيبه ... لي هبوبه دوم جافي
ير قلبي من دواليبه ... شاحيه شوحه بالخافي
يا جماعه جيف كيف اسويبه ... ماترفقبي ولارافي
تاحني قي دروبٍ صعيبه .. واتبع الصحرا ونا حافي
موسم الصيف ولواهيبه .. وازقره ويرد بالجافي
كم خدعني في ترحيبه ... والسلام يعيده ارضافي
والذي اهواه لمصيبه ... مايعرف الحق بانصافي
ونا خايف من تعذيبه ... ظالم وجبار مايخافي
والغدر مدسوس في جيبه ... يظهره لو كنت له صافي
لو طلابة حق بشكيبه ... عند من للحق عرافي

وشخط بطي تحت البيت السادس عس تنتبه عليه حمده
خذ بطي القرطاسه وجسفها .. وطلع من حجرته عسب يحطها في مكان تشوفه حمده وتاخذ الورقه خلاف
كان الممر مظلم لان كلهم رقود ..
بس شاف بطي نور من تحت..
سار بطي عسب يشوف من هذا اللي واعي الين هالحزه ..
وصد من فوق وشاف حمده مربعه ريلها ويالسه بروحها ..
ففكر كيف يعطيها الورقه ..
فرد حجرته وتم يفكر ..
وهو يفكر شاف كره شمامي طايحه عالارض ..
والكره كانت صغيره ..
خذها وتم يفكر ..
وخلاف قرر انه يلصق الورقه بالكره ..
وطلع من حجرته وتم يوايج .. وشافها يالسه مكانها .. وفر الكره عليها من فوق ..
قفزت حمده يوم سمعت صوت شي يطيح من فوق ..
صدث فوق بس ماحصلت حد .. وشافت كره طايحه عالارض ..
حليلها كانت متروعه ..
خذت الكره وشافت قرطاسه لاصقه فيها ..
خذت الورقه وكانت بتفرها .. بس انتبهت على كتبه ..
وفجت الورقه ويلست تقرى ..
انصدمت حمده من اللي كان مكتوب .. وعلى طول عرفت ان بطاي راعي القصيده ..
ردت قرتها مره .. ومرتين وثلاث .. ومليووون ..
كانت منقهره من بطي .. خصه وانه شاخط على كلمه (خدعني)
"شو قصده هذا ؟؟ انا خدعته ؟؟ هو اصلاً اللي خدعني .. هب انا اللي خدعته .. انا وفيت في حبه .. بس للاسف مايستاهل هالوفا .. والله انه مضيع المذهب ولايعرف شي في دنيته .. وانــــــ "
وقطع عليها كلامها بطي ..
بطي : " يعني انتي تحبيني ؟؟ .."
حمده قفزت وعلى طول عدلت شيلتها ..
حمده منصدمه : " شوووو ؟؟ اناا احبك انت ؟؟ .."
بطي : " حمده شحقه تكابرين في حبج وماتعترفين ؟؟ .. "
حمده : " ليش اعترف بشي انا مااحس فيه .."
قبظها بطي بايده صوبه .. وتم يكلمها وعيونه في عينها ..
بطي : " حمده انا مااقدر اصبر عنج اكثر من جي .. صدقيني بتخبل والسبه انتي .. دخيلج حسي فيني ولاتسويبي جي .. انا شو سويتبج عسب جي تعاملني ؟؟ جان غلطت في حقج دخيلج خبريني وصدقيني بصلح غلطتي .. "
حمده حست ان روحها بتتطلع منها ..
كان بطي واااايد قريب منها وعيونه كانت بعينها ..
حمده عيونها دمعن وسكتت ..
بطي : " عيوني دخيلج لاتصيحين .. دخيلج قولي اللي في قلبج ولاتخبين شي .. "
حمده بصوت يقطع القلب : " بطي ليش تخوني ؟؟.."
بطي انصدم من كلامها
بطي : " حمده انتي شوتقولين ؟؟ انا والله من حبيتج مافكرت في وحده غيرج .. "
حمده بدت تزيد دموعها : " جذاب .. انا سمعتك باذني تكلم وحده.. "
بطي : " قولي متى خنتج ؟؟.. دخيلج خبريني .. "
كان بطي ميّود حمده من جتوفها بالقو ومافج عنها ..
حمده : " بطي لاتنكر .. دخيلج لاتجذب عليّه ,, انا سمعتك وخلاص .. "
بطي مفول : " متى صار هذا ؟؟ .."
حمده تصيح : " اليوم من رديت من المستشفى وكنت في القاراجات اتصلتبك وحده وانا سمعتك تكلمها .. وخلاف عالعشا بعد وحده اتصلت .. "
بطي : " والله العظيم انهن من الشركه .. والله كل ووحده فيهن اكبر عن امايه .. وكانوا يتصلن عسب الفايلات اللي مضيعنهن الفراش الثور .. والله عمري مابفكر اخونج ولابخونج .. "
حمده سكتت وماردت عليه
بطي : " بعدج هب مصدقتني ؟؟ .. "
حمده : " .............. "
بطي : " اوكي .. انا بييبلج تلفوني وانتي نبشي فيه .. وبتحصلين كل الارقام موجوده ومامسحت اي رقم .. واذا ماصدقتي بعد خلاف بوديج الشركه وتفاهمي مع الموظفات .. "
حمده صدقت بطي واستحت من غباءها الدنيء ..
حمده : " لاخلاص .. مايحتاي .. "
بطي : " اكييييد ؟؟ يعني انتي هب زعلانه مني ؟؟ .."
حمده مستحيه وهب قادره تتكلم : " لا .. "
بطي : " وشو اللي يثبتلي هالشي ؟؟ .."
حمده : " كيف تباني اثبتلك هالشي ؟؟.."
بطي سحب حمده اكثر صوبه وطاحت شيله حمده وماقدرت تعدلها لان بطي كان ميودنها ..
بطي : " قوليلي احبك .. "
حمده كانت ساكته وماردت عليه .. لانها كانت منصدمه من اللي يستويبها ..
بطي : " اوكي خلاص .. يعني انتي بعدج زعلا نه مني .. خلاص اللي يريحج .. انا من صوب وانتي من صوب .. واللي من بينا انتهى .. "
حمده مستحيه والرمسه بحيل وقوه تطلع من ثمها : " اح.. احبك .. "
بطي استانس وحس ان الدنيا هب شالتنه من الوناسه
بطي : " واخيراً قلتيها .. عقب ماترييت ست اشهر وانا ارقبج وارقب هالكلمه منج .. يالله ياربي .. شو اسوي الحينه ؟؟ .."
حمده ضحكت على خبال بطي .. وتمت تشوفه ..
بطي : " دخيلج اقرصيني وإلا اصفعيني .. خليني احس اني في علم هب في حلم .."
حمده ماصدقت خبر .. قامت وقرصت بطي ..
بطي : " آآآآي .. عورتيني .. "
حمده : " ههههه .. عسب تصدق .. "
وتموا شويه يلوس مع بعض وخلاف ساروا يردقون لانهم كانوا بروحهم ومافيهم حد يشوفهم بروحهم وخصه آخر الليل ..
محد قدر يرقد فيهم من الوناسه ..
واخيراُ تحقق حلم بطي ..
من عقب ست اشهر من الانتظار والعذاب ..
اكتشف بطي ان غناته تبادله الشعور في الحب ..
اليوم الخميس ..
بيت عبيد مختبص فوق تحت ..
الكل يربع من صوب ويتزهب ..
اليوم خطبه اليازيه ومحد متزهب .. خصه اليازيه اللي ماكان عندها شي تلبسه ..
اليازيه : " امااااااااااايه .. كله منج .. "
ام بطي : " شو هذا اللي كله مني ؟؟ .."
اليازيه : " يعني شو بعد ؟؟ امايه انا ماعندي شي البسه .."
ام بطي : " طبي ثمج .. اتحريتج عندج سالفه .. إلا هي خطبه هب ملجه وإلا عرس .. "
ام حمده : " صدقها امايتج .. البسي اي شي من ثيابج اللي عندج .."
اليازيه : " حمدووو .. لحقي .. حتى امايتج واقفه مع امايه .. لاحوووووول .. "
حمده : " شبلاج مشتطه .. صدقهم .. إلا هي خطبه .."
اليازيه : " حتى انتي ؟؟؟ لاحول ولاقوه إلا بالله .. اسير حجرتيا اخيرلي .. "
وسارت اليازيه حجرتها ..
وحدر بطي هالحزه الصاله ..
بطي : " السلام عليكم والرمحه .. "
الكل : " وعليكم السلام والرحمه .. "
بطي : " ها .. اشحالكم وشحال التجهيزات ؟؟ .."
ام بطي : " والله نحن مشين كل شي .. بس اختك ماادري شبلاها ؟؟ .."
بطي يصد صزب حمده ويبتسملها.. وردت له الابتسامه ..
بطي : " حمده .. شبلاها ختيه ؟؟ اخاف إلا انتي مزعلتنها ؟؟ .. "
حمده : " افاااا والله .. ازعل الدنيا كلها ولاازعل يزوي .. "
بطي : " حتى انا تزعليني ؟؟ .."
ام حمده دشت عرض : " جيه هي تقدر ؟؟ .."
هلكوا كلهم من الضحك .. بس حمده كانت مستحيه وماردت عليهم ..
ام بطي : " ها وليدي .. بشّر .. رخصوا هزاع ؟؟ .."
بطي : " هيه الحمدلله .. رخصوبه .. ووصلته توني بيتهم وييت .. "
ام بطي : " الحمدلله على سلامته .. المهم .. خبرت حرمه عمك عن الخطبه ؟؟ .."
بطي : " انا ماخبرتها .. هذا هب شغلي .. "
ام بطي : " مسود الويه .. محد يوصيك على شي .."
بطي : " وانتي شعنه ماتخبرينها يالعيوز ؟؟.."
ام بطي : " عيزن ركبك يالهيس .. انا خبرتها بس بغيتك تأكد عليها .. "
حمده : " هههههه .. بطاي لو سمحت لاتغلط على عمو .. عمو بعدها ماشاالله عليها شباب .. "
بطي : " اي شباب ؟؟ إلا انتهت صلاحيتها .. "
ام بطي : " ثرك مصختها .. تغلط علينا جدانا .. "
وفلعته ام بطي بالفنيال اللي كان في ايدها ..
الله ستر والفنيال ماكان فيه قهوه ..
بطي يطلع لسانه ويعاير امايته : " امممم .. مادقني .. "
ام بطي : " مادقك يالخمام .. انا برويك الحينه .."
وتمت العيوز تربع وراه .. وشلوا البيت على راسهم ..
وحمده كانت تشوف بطي وتضحك عليه ..

.
.
.
.
.
.
.
وعالمغرب الكل اتزهب حق الخطبه ..
إلا اليازيه كانت معانده وهب طايعه تتعدل ..
وحمده ومريامي وميثانه وعلايه كانوا يحاولون معاها ..
بس محد ياب راسها ..
ام بطي وام حمده كانن مشغولات بشغل الميلس والمطابخ ..
وبطي سار بيت عمه عسب اييب هزاع ..
هزركم منو يقدر اييب راسها ؟؟
اكيد خلوف يقدر اييب راسها .. بس خليفة محد ..
ميثانه : " يلاّ فديتج .. اتعدلي .. العرب شوي وبيوصلون .."
اليازيه : " هب مشكلتيه ... "
حمده : " حبيبتي .. لازم الريال يشوفج عالاقل وانتي كاشخه .. "
اليازيه : " يباني جي اهلاً وسهلاً ... مايباني جي برايه .. خله يولي .. "
علايه : " غناتي الريال راضي فيج بحلوج ومرج .. بس هب حلوه تطلعين حق العرب وانتي جلحه ملحه .. "
وعيزن البنات من المحايل .. بس محد ياب راسها ..
.....
وفي الصوب الثاني .. كان هزاع حليله هب طايع يسير الخطبه .. لان مايحب الناس يشوفونه وهو يالس عالكرسي المتحرك ..
بطي : " يلا هزاع .. لاتردني .. "
هزاع : " صدقني لو ماكنت عالكرسي هذا .. كنت بيي .. بس والله مااقدر .. "
بطي : " حرام عليك تكسر بخاطر البنيه .. حليلها اليوم خطبتها ووصتني اييبك معايه .. "
وتم يتحايل بطي عليه الين ماوافق ..
طبعاً بطي كان يسوي كل هذا عسب يطلعه من عزلته ومايحسسه انه انسان عاجز .. وكان يحاول انه يعاونه ..
..
..
وبالاخير بعد جهدٍ جهيد .. حمده مكيجت اليازيه وعدلتها ..
وطلعت قمر ماشااللله عليها ..
صح ان الميك آب كان بسيط .. بس اليازيه ماشاالله عليها ماتزداد في الحلاه..
ويووا العرب وخطبوها ..
والحمدلله كل شي عدى على خير ..
واتفاهموا الرياييل مع الرياييل ..
والحريم تفاهمن مع بعضهن ..
بس حريز كان معزر إلا يريد يشوف اليازيه ..
بس اليازيه ماكانت موافقه ..
بطي : " يلاّ الريال يترا من الصبح .. "
اليازيه : " مااريد .. مااريد .. "
بطي يرها من ايدها وماعبرها ووداها صوب الميالس .. وقبل لايدخل وصاها ..
بطي : " يزوي .. احترمي عمرج ولاتخورينها وايد .. انا بسير الصاله ربع ساعه وبرد .. لاتطفرين بالريال .. اوكي .. "
اليازيه : " حرام عليك .. ربع ساعه وااايد .. "
بطي : " طبي ثمج واسكتي .. نحن ماناخذ شور الحريم .. "
وسار بطي عنها وخلاها جدا الميالس ..
تمت وواقفه بروحها .. وخلاف توكلت على ربها وحدرت ..
من شافها حريز تحدر وقف على حيله ..
اليازيه حليلها مستححيه والود ودها الارض تنشق وتبلعها ..
اليازيه بحيا : " السلام عليك .. "
حريز تخبل عليها من شافها .. ويوم سلمت الريال وصّل حده ..
حريز : " وعليج السلام ورحمه الله وبركاته .. هلا والله .. هلا وغلا .. هلا بالزين كله .. يا حيبج والله .. استريحي شعنه واقفه ..
اليازيه يلست مجابل حريز .. بس كانت بعيد عنه .. ومارفعت راسها من الحيا .. وكانت تكتفي ببعض النظرات ..
ويوم انتبهت على ملامحه اتذكرت انه هذا الريال هو راعي الصوره اللي عندها .. وشهقت شهقه..
حريز متروع : " خير ان شاالله .. عسى ماشر ؟؟ .."
ماعرفت اليازيه شو ترد عليه هالحزه .. سكتت وحست انها قفطت ..
وتم حريز يكلمها ويحاول يسحب الرمسه منها .. بس الياززيه ماكانت ترد عليه إلا بهيه أو لا ..
..
وبطي سار يشوف غناته .. خصه ان اليوم عندهم مناسبه واكيد بتكون متعدله ..
حدر الصاله بس ماحصلها ..
وشاف شمامي يالسه بروحها تلعب بلعبتها ..
تقرب بطي منها واتخبرها عن حمده ..
شمامي : " حمدااااا .. "
بطي : " حمده .. هب حمداااا .. المهم .. وينها ؟؟ .."
شمامي : "لاحينه بتيي .. لاحت تييبلي حواوه وبتي .. "
(الحينه بتي .. راحت اتييبلي حلاوه وبتي )
حمده كانت متخبله على شمامي .. خصه انها وايد تحب الصغاريه ..
وشمامي ماشاالله عليها حبوبه وتدخل القلب ..
وشويه وإلا حمده اتي وهي تغني .. بس طبعاً ماكانت تعرف ان بطي في الصاله ..
قام بطي وانخش ورى الغنفات عسب ماتنتبه عليه حمده .. لانه كان يريد يسمعها وهي تغني ..
ومن حدرت الصاله وخت حمده ويلست مجابل شمامي ..
وتمت تغنيلها ..
وشمامي مستانسه عليها
" انا ماكنت ابي اكثر من اللي فيك لاقيته .. "
وشويه وإلا تسمع حمده صوت حد داش عرض يكمل الاغنيه معاها ..
" حنان ورقه وطيبه وقلبٍ ياكبر بيته .. "
انصدمت حمده وتمت ساكته ووقفت على حيلها .. كانت تدور على مصدر الصوت ..
حست ان في حد ورى الغنفات ..
يوم وايجت .. قفز بطي في ويهها : " بووووووووووو .. "
تروعت حليلها وردت على ورى وطاحت ..
وبطي هلك من الضحك وتلوم من الحركه السخيفه اللي سواها ..
حمده مفوله : "انزين ماعليه .. والله لاردلك اياها .. مابنساها .. "
وشمامي ماكانت تعرف شو السالفه .. ب كانت تضحك على ضحكة بطوي ..
شمامي : " ههههههههه .. حبيبي انا اليد العب معاكم .. "
وتم بط يتحايل على حمده عشان ترضى .. بس كانت تتغلى عليه ..
بطي تخبل من شافها .. كانت ماشاالله عليها محلوه ..
خصه انها كانت لابسه قميص وتنوره جنان ..
وخلاف رضت حمده وسار عنها بطي عسب يسير يشوف هزاع ..
هزاع كان في حجرة خليفة .. لان حجرة خليفة تحت مش فوق .. لانه مايقدر يصعد الدري..
بطي : " ها هزاع .. شو تسوون ؟؟ .."
هزاع : " ماشي .. نلعب بلايستيشن .. "
ارتبش هزاع ونسى الكرسي الاسود اللي كان معذبنه ..
ميثانه وعلايه وخليفة وسيف ومريامي كلهم كانوا في حجره خليفة يلعبون بلايستيشن .. كل واحد منهم يترا دوره وشالين البقعه من الحشره ..
بس طبعاً هم محتشرين عقب ماساروا العرب عنهم .. بس حريز الوحيد اللي ماسار لانه كان يريد يشوف اليازيه ..
الجو كان فنان .. الحشره من كل صوب .. فريق الشباب وفريق البنات ..
طبعاً الشباب غاسلين شراع البنات .. بس البنات معاندات وإلا يبن يلعبن ..
وسار بطي الميلس عسب يشوف شخبار الثنائي ..
بس الحبيبه اليازيه كانت غاديه طماطه ..
وبطي ماقدر ايّود عمره وطاح في الميلس عالارض ويلس يضحك ..
وحريز ترخص منهم وسار عنهم .. لان وراه درب ..
وخذ رقم اليازيه من اخوها عسب يكلمها .. بس اليازية ماكانت تعرف لانها حتى لوعرفت ماكانت بتطييع ..
هاي هي الحياه في بيت عبيد .. كان البيت ولااحلى ..
.......

تريوو الباارت اليااي و انشالله ما ببطي ^^

** بيت عبيد المحيربي **
كانوا عيال عبيد وعيال سهيل متيمعين كلهم في حجرة خليفة .. طبعاً بعد ماساروا العرب عنهم واتفقوا ان الملجة عقب اسبوع والعرس عقب ثلاث شهور ..
خليفة كان هالحزه يلعب مع هزاع .. بس هزاع كان غاسل شراعه ..
هزاع حليله نسى همومه وكان مستانس باليمعه..
هزاع مستانس : " هههههه .. خلوووف بس عاد .. غسلت شراعك اربع مرات .. اعترف بالهزيمه .. "
خليفة : " انزين انت هب خسران شي .. كمّل اللعب وصدقني بتخسر .. "
حمدة : " خلوف .. خلاص راحت عليك .. انا الحينه اريد العب .. "
بطي دش عرض : " انا بلعب ضدج .."
حمدة ابتسمت في ويه بطي .. بس هالابتسامه كانت ابتسامه نصر ..
كانت حمدة واثقة انها بتغلب بطي .. بس محد يعرف شو بتكون النتيجه ..
ميثانه : " اوكي .. انا ومريامي وعلاية ويزوي بنشجع حمده .. وهزاع وخلوف وسواف وحماده بيشجعون .. يعني بنسوي فريقين .. فريق الصبايا وفريق الشباب .. "
أحمد باستهزاء : " ياويلي عليكن يالصبايا .. "
مريامي : " بليييز .. لاتتطنز .. يوم بنخلص اللعب وبنعرف النتيجه خلاف اتطنز واتغشمر على هواك .. "
سيف : " نحن ضامنين النتيجه .. "
علاية : " هالثقة وهالغرور هي اللي بتخليكم تخسرون .. "
خليفة : " صدقيني بنفوز .. "
اليازية : " وإذا مافزتوا شو بتسوون ؟؟ .."
مريامي : " شو رايكم نعقد اتفاق ؟؟ .."
حمدة : " كيف يعني ؟؟ .."
مريامي : " يعني إذا نحن فزنا .. الشباب بيطلعونا باجر وبيحوطونا وبيودونا المكان اللي نريده وطبعاً بنحوم وبنتشرى على حسابهم .. "
حمدة : " ياويلي عليج ياام الافكار انتي .."
بطي : " لحظه .. لحظه .. انتن فرظتوا شروطكن وقلتوا اللي عندكن .. ولازم نحن بعد نتشرط وإلا شو رايكم ياشباب ؟؟ .."
هزاع +خليفة+سيف+أحمد : " هيه نعم .. "
اليازية : " انزين .. قولوا اللي عندكم .. "
بطي : " شباب .. حان وقت الاجتماع السري .."
وطلعوا الشباب برع الحجرة واتفقوا على الشرط ..
والبنيات كانوا على اعصابهن ويريدن يعرفن شو يقولوا الشباب ..
خمس دقايق وحدروا الشباب .. وكانت ويوهم واضحه عليها علامات الفرح ..
بطي : " باسمي وباسم جميع اعضاء الفريق .. ونيابة عن كل عضو .. اتفقنا نحن الشباب على تأديب (الصبايا) .. ومابنقول اللي اتفقنا عليه إلا يوم بنعرف النتيجه .."
علاية : " لا بطاي .. ماايوووز .. لازم انعرف شرطكم .. "
ميثانه : " صدقها علاية .. "
واحتشروا البنات عالشباب .. بس اتفقوا انهم يخبرونهن بالاتفاق خلاف ..
ولعب بطي ضد حمدة ..
وكانوا يلعبون سباق سيارات .. لان حمدة ماكانت تعرف تلعب كوره ..
واتفقوا انهم يلعبون خمس مرات ..
في المرة الاولى بطي غلب حمده .. والبنات احتشرن ..
علاية : " يلاّ حمدة .. شدي حيلج .. "
خليفة : " هههههه .. جيه داخلين حرب نحن عسب تشد حيلها ؟؟ .."
علاية مغيظة : " محد طلب رايك .. "
بطي : " لو سمحتوا .. محد من اعضاء فريق الشباب يكلم البنات .. والكلام لفريق البنات بعد .. لانكم لو كلمتوا بعض بتتواقعون .."
وكملوا اللعب .. وثاني مرة بطي فاز على حمدة ..
مريامي ماقدرت تمسك عمرها وصاحت .. والشباب يلسوا يحطون عليها ..
والبنات غيظوا وطاحت الدفنه من بين الفريقين ..
خليفة : " ويييييو .. بعدنا ماكملنا اللعب وبديتن بالصياح .. اسميكن خدايا .."
علاية : " خلوف .. دخيلك لاتغلط .. "
أحمد : " خليفة ماقال شي غلط .. "
ميثانه : " حماده وخليفه طبوا ثمكم ..
أحمد : " ميثوووه لاتطولين لسانج واحترمي عمرج .."
ويلسوا يتواقعون .. وبطي كان ساكت ويشوفهم ..
الين ماوصل حده وزعق زعقه الكل سكت من عقبها ..
بطي مفول : " خلاااااص .. كل واحد منكم قال اللي عنده ؟؟ اصلاً انتوا هب ويه حد يلعب معاكم .. والله ثم والله .. وانا حلفت الحينه .. اذا تواقعتوا والله اني لاظربكم وماعليّه من ابويه وامايه .. واذا الرمسه هب يايزتلكم طلعوا برع .. "
سكتوا كلهم واكتفوا بتبادل النظرات ..
وردوا وكملوا اللعب ..
وفي المره الثالثه والرابعه فازت حمده على بطي .. لان بطي كان مغيظ وماكان منتبه عاللعب .. وطبعاً البنات طارن من الوناسه ..
الشباب تعادلوا مع البنات ..
ومابقى غير المره الاخيره ..
وتموا الشباب يحمسون بطي .. والبنات يشجعون حمدة ..
هزركم منوا فاز ؟؟
الشباب وإلا البنات ؟؟
طبعاً الشباب فازوا ..
والبنات حليلهن خسرن ..
والله يستر من اللي اتفقوا عليه الشباب ..
حمدة مدت ايدها عسب تسلم على بطي ..
حمدة : " مبروك عالفوز .."
بطي مستانس : " الله يبارك في حياتج .."
ميثانه : " ممكن نعرف شو طلبكم ؟؟ .."
سكتوا الشباب .. وتموا يتبادلون النظرات والابتسامات ..
علاية : " الله يستر .. اظاهر رحنا فيها .. "
حمدة : " اظاهر .. "
بطي : " شباب .. كل واحد يبركن سيارته في نص الحوي ..

حمدة شهقت شهقه : " ليش ؟؟ .."
بطي : " لاتستعيلين على رزقج .. بتعرفين شو السالفه .. "
وقاموا الشباب ووقفوا مواترهم في نص الحوي ..
وكانت الساعه 12 الفليل ..
المهم ..
طبعاً بطي كانت سيارته بورش كايين سودا ..
وسيف وحماده كان عندهم ستيشن (لاند كروزر) ذهبيه .. انتوا تدرون انهم ربع واكثر من اخوان ودومهم يطقمون مع بعض ..
وخليفة كان عنده نيسان ..
وطبعاً هزاع كان عنده رينج بس تكنسلت من عقب الحادث ..
ومن عقب مابركنوا مواترهم الشباب .. ساروا صوب البنات ..
كانت علامات النصر واضحه في عيون الشباب ..
ومحد منهم الين الحينه خبّر البنيات عن خطتهم..
اليازية : " ممكن نعرف شو السالفه ؟؟ .. "
هالحزه نقعوا الشباب من الضحك .. والبنات كانوا مغيظين ..
حمدة : " شو اللي يضحك في الموضوع ؟؟ .."
هزاع : " ممكن تسيرن وتبدلن هدومكن .. "
علاية : " ليش ؟؟ .."
هزاع : " هههه .. لاتتخبرن .. بس البسوا هدوم جديمه ومريحه .. عسب ترتاحن فيها وانتن تغسلن السيارات .."
فجن البنات عيونهن عالآخر وشهقوا .. ولاوحده منهن طاعت تغسل اي سياره ..
بس بطي هددهن وحلف انه يعذبهن بشي اخس عن الغسيل .. فرضوا بالامر الواقع وسارن وبدلن هدومهن لانهن كانوا لابسات هدوم صعب انهن يتحركن فيها .. لانهم كانوا متكشخات عسب العرب اللي يوهم ..
ونزلن البنات ..
والشباب كانوا يظحكون عليهن ..
اليازية كانت متجدمه الشله والبنات كلهن وراها .. وهي كانت المتحدث الرسمي ..
اليازية بليا نفس : " وين العده ؟؟ .."
وناولوا الشباب الصبايا العده والادوات اللازمه ..
بطي : " يلاّ توكلن على الله .. وانا وصيت البشاكير والدريوليه انهم مايحدرون الحوي .."
حمده : " نريد ماي .. "
وناولوا البنات هوز الماي وعطوهم كذا سطل ..
ويلسوا الشباب على كراسي .. وكانوا ناقعين من الضحك ..
طبعاً شكل البنات غلط .. خصه وانهن كانوا يغسلن وهن لابسات شيلهن .. حليلهن كانن معتفسات ..
بدوا يغسلن سياره بطي .. وسياره بطي كانت يديده وكان هو متروع عليها .. وكل حين كان يتأمر عليهن .. إلا تحملوا عالجامات .. وإلا تحملوا عالبونيت .. ماخلاهن في حالهن ..
وخلاف خلصوا من سياره بطي ..
هلكن حليلهن
اليازية بتعب : " حرام عليكم .. والله مانقدر نكمل .. "
مريامي : " والله هلكت .."
حمده : " ثيابنا اختسرت.."
هزاع : " ماعليه .. كملوا شغلكم .."
ميثانه : " والله حرااااااااااام .. "
أحمد : " لاااااااا .. عالاقل اغسلن سياره ثانيه وخلاف بنخليكم .. "
وغسلن سياره خلوف .. لانهن مايقدرن عالستيشن لانها مرتفعه ..
طبعاً ماكانوا يقدرون يوصلون للقبه .. فكانوا ييلسون عالبونيت .. والشباب كانوا ناقعين من الضحك .. ويمسحن السياره بالفوط ..
خليفة : " ايه .. لوسمحتن بلسن التواير .. "
هني صدق غيظن البنات .. وقامت اليازية ودخلت داخل البيت .. وماعبرتهم .. وخلاف البنات كلهن لحقوها وخلوا الشباب بروحهم ..
هزاع : " هههههه .. والله حرام عليكم .. صدق هلكن .. "
أحمد : " ماعليه .. خلهن يتأدبن .. "
بطي : " هههههه .. هذا ونحن بعدنا ماخبرناهن عن شرطنا الثاني .."
سيف : " الله يستر.. اخاف إلا يسون حزب ويروغونا برع البيت .."
خليفة : " ههههههههه .. والله اول مره استانس في حياتي .. اشكالهن كانت تضحك وهن ينظفن .. "
ودخلوا الشباب البيت .. وحدروا الصاله ويلسوا فيها ..
وسار بطي حجرة اليازيه عسب يزقر البنيات ..
بطي دق الباب بس محد رد عليه ..
ورد دق الباب مره ثانيه وثالثه .. بس محد رد عليه ..
وآخر شي اليازيه طلعتله برع الحجره ..
اليازيه مفوله : " نعم .. شو تريد ؟؟ في تعذيب ثاني تريدون تعذبونا بعد ؟؟ ماخلصتوا اللي عندكم ؟؟ .."
بطي : " هدي اعصابج .. "
اليازيه : " بطوي قول اللي عندك .. والله اني طفرانه وتعبانه .. اريد اتسبح لاني متوصخه من راسي لين ريولي (تأشر بايدها) .."
وتم يطالعها بطي .. وتلوم فيها لانها صدق كانت مخترسه ..
بطي : " فديتج والله .. خلاص سيري اتسبحي وخلاف انزلن كلكن تحت .. نريد نقوللكم عن البند الثاني من الاتفاقيه .."
اليازيه وشويه بتصيح : " بطااااااي والله حرام عليكم .. شو بتسووبنا بعد ؟؟ .."
بطي : " هههه .. لاتتروعين .. انتن حولن تحت وخلاف بنخبركن .."
دمعت عيون اليازيه وانتبه بطي عليها ..
لوى بطي عليها وانفجرت اليازيه من الصياح .. لانها صدق كانت متضايقه..
بطي عرف انها كانت متضايقه من طلعت من عند حريز ..
بطي : " بس فديتج .. خلاااص لاتصيحين .."
اليازيه تناهي : " اا.. انت .. ماتعرف .. عن .. اللي في خاطري .. "
بطي وهو بعده لاوي عليها : " افاااا يزوي ؟؟ من متى تخشين عني اللي فخاطرج ؟؟ قولي فديتج اللي في قلبج وانا بسمعج .. "
اليازيه حاطه راسها على جتف اخوها : " بطاي .. انا متروعه .. "
بطي سحب اخته ويلسها عالغنفات اللي كانت في الصاله اللي فوق ..
بطي : " من شو متروعه فديتج ؟؟ .."
اليازيه حليلها كانت ترمس وتصيح وكانت هب قادره تمسك عمرها ..
اليازيه : " اح.. احس انا مابقدر اتفاهم مع حريز .. "
بطي فج عينه واتقرب منها ويلس مجابلنها .. يعني كان يالس عالارض وهي يالسه عالغنفه .. ومس ايدها ..
بطي : " ليش ؟؟ حريز قالج شي يزعلج ؟؟ .."
اليازيه : " لا .. بس .."
بطي : " بس شو ؟؟ .."
اليازيه : " ماادري ؟؟ والله مااعرف ؟؟ بس تدري يمكن لاني اول مره اقعد معاه ونسولف .. "
بطي : " هههههه .. عادي فديتج .. لازم اول شي بتحسين انه غريب .. وصدقين خلاف مابتصبرين عنه يوم واحد .. "
استحت اليازيه من رمسه بطي واحمرن خدودها ..
قرصها بطي على خدودها : " فديت اللي تستحي والله .. سيري فديتج واتسبحي وخلاف ارديكن كلكن تحت .."

اليازيه : " ان شاالله .. بس دخيلكم خفوا علينا .."
بطي : " هههه .. ان شاالله .."
وسارت اليازيه واتسبحت ..
كل البنات اتسبحن .. وكل وحده كانت تتريا دورها .. يعني وحده ورى الثانيه كانوا يدخلون الحمام .. وكل وحده كانت تتريا دورها ..
اول وحده اتسبحت ميثانه .. واليازيه كانت تترياها عسب تتسبح عقبها..
وحمده سارت حجره امايتها اللي تحت .. وسارت تسبحت هناك ..
بس مريامي ماقدرت تتريا دورها ولا علاية ..
فسارت مريامي حجرة امها وابوها عسب تتسبح .. لان اساساً امايتها وابوها وعمتها ام حمده وشما كانوا سايرين العزبه .. يعني محد كان في البيت ..
وعلايه سارت اقرب حجره عسب تتسبح فيها .. يعني سارت حمام خليفة .. لان حجره خليفة مجابله حجره اليازيه امره .. وخبرت اليازيه انها بتسير ..
حدرت علاية الحجره وكانت الحجره ظلمه ..
وحدرت الحمام على طول واتسبحت ..
وعقب ماطلعت من الحمام .. يلست شويه عالشبريه لانها كانت ميهوده ..
كان الباب مفتوح والليتات مبنده .. وكان في نور من ليتات الممر داخل الحجره .. وماكلفت علايه على عمرها وفتحت الليتات لانها ارتاحت من اليلسه على الشبريه واتهايزت تسير وتشغلهن ..
كانت لابسه علايه جلابيه بيج عليها روزات .. كانت تخبل ..
وخت علايه براسها عسب تنشف شعرها بالفوده ..
شعرها ماشاالله عليها غليظ .. بس هب طويل .. وكان شعرها الين خاصرتها ..
ورفعت علايه راسها .. ومن رفعت راسها سمعت صوت حد ..
...... : " سبحتيــــــــني بشعرج .. "
قفززت علايه .. وعلى طول فرت الفوطه على شعرها لان ماكان عندها شيله ..
علايه : " منو انت ؟؟ .."
شغل خليفه الليتات وسكر الباب واتقرب من علايه ويلس حذالها ..
خليفة : " يعني حجره منو هاي ؟؟ ومنو بيحدر غيري ؟؟؟.."
علايه وقفت على حيلها وكانت تريد تتطلع من الحجره : " اسمحلي .. والله كنت اريد اتسبح .. وماحصلت حمام قريب من حجره اليازيه غير حمامك .. "
مسك خليفة علايه من ايدها وخلاها تيلس ..
خليفة : " والله يفداج الحمام وراع الحمام وعيوني بعد .. "
علاية : " تسلم خليفة .. "
خليفة : " ههههه .. والله شكلج كان عجيب وانتي تغسلين السياره .. ان شاالله يوم باخذج بتريحيني .. بخليج كل يوم تغسلين سيارتيه .. "
علايه : " قصورك بعد تخليني اغسل سيارتك .. "
خليفة : " ههههههه .. اسميج تصدقين اي شي .. علايه شكلج والفوده على راسج ترتوب .. "
علاية : " تراني من الصبح ساكته عنك .. تحط عليّه وانا صاخه .. "
خليفة : " يعني شو بتسوين ؟؟ بتحقريني ومابترمسيني ؟؟ .."
علاية : " هيه .. عادي .. "
خليفة : " ماتقدرين .. "
علاية : " خلوف لاتخليني اسويها .."
خليفة : " صدقيني ماتقدرين تصبرين عني .. "
علاية : " احلف ؟؟ .."
خليفة : " والله العظيم .. "
وطلعت علاية من الحجرة وخلت خليفة بروحه .. وضحك خليفة على حركات علاية .. وهو يعرف انها عقب خمس دقايق بتكلمه ..
وخلاف كلهم تيمعوا في الصالة .. بس محد نطق بكلمه .. لا البنات تكلمن .. ولا الشباب نطقوا بكلمه..
وخلاف أحمد هو اللي بدى يتكلم ..
أحمد : " اولاَ نعيماً عالسبوحه .. "
اليازيه + حمدة + علاية + مريامي + ميثانه (من غير نفس) : " الله ينعم عليك .."
أحمد : " هههه .. ادري انكن ترمسن من ورى خاطركن .. المهم .. ثانياً نعتذر عالعقاب الشديد .. بس طبعاً انتن ماكملتوا شغلكن .. يعني لازم نعذبكن .. "
احتشرن البنات عليه ..
أحمد : " لحظه .. لحظه .. خلوني اكمل رمستيه .. "
حمدة : " تفضل .. "
أحمد : " ثانكس .. العقاب الثاني هو ان نحن نريدكن باجر تتلبسن وتكشخن بس طبعاً الكشخه هاي كلها تحت الغشوة .. وان شاالله بنسرح صوب دبي وبنوديكن المراكز والسناتر اللي ترديدونها وبنخليكن تتشرن اللي تريدونه وطبعاً على حسابنا .. "
ماتتخيلون موقف البنات هالحزة .. طارن من الوناسه .. ومريامي ربعت صوب أحمد وفرت عمرها عليه ولوت عليه وباسته ..
أحمد : " هههههه .. يالمصلحه .. "
مريامي : " كيفي .. كيفي .. "
وتموا يسولفون كلهم مع بعض ونسوا زعلهم ..
حتى علاية رمست خليفة ونست انها زعلانه منه ..
وخلاف عيال سهيل ساروا بيتهم عالساعه هنتين ..
واتفقوا انهم باجر عالساعه 10 الصبح يتيمعون في بيت عمهم سهيل ويترقون هناك وخلاف يطلعون من بوظبي ويسيرون دبي ..
.
.

هزاع واعي غبشه .. وهب قادر يرقد .. كان يتجلب ويتجلب
وآخر شي خذ تلفونه واتصل في بطي
طبعاً بطاي في سابع نومه .. ومستحيل يرد عالتلفون لو ينقع
بس سبحان الله .. بطي نش ورد عالتلفون
بطي بصوت ماينسمع : " الو .. "
هزاع مستغرب : " والله ماتوقعت ترد عليّه .. انا ادري ان رقادك ثقيل وماترد عالخلق .."
بطي توه ينتبه : " منو انت اللي ماتخيّل ومسولي هالحزه ومخرب رقادي ؟؟"
هزاع : " هههههه .. انا هزاع .. "
بطي : " ها هزاع .. شوتبا متصلبنا من صباح الله ؟؟ .."
هزاع : " بس بغيت اخبرك اني مابيي معاكم دبي .."
بطي فج عينه عالآخر وكان منصدم : " شو تقول انته ؟؟ اصلاً انت راعي الفكره .. وانت كنت اول واحد تريد تسير .. شو اللي استوى ؟؟ .."
هزاع : " لا ماشي .. بس بغيتكم تسيرون تستانسون .. ومااريد اغثكم .."
بطي مفول : " شعنه ان شاالله تغثنا ؟؟.."
هزاع باحراج : " انت تدري ان لازم حد يدز الويلشير (الكرسي المتحرك) .. وانا مااحب اتعب حد معايه.."
بطي : " غربلات بليسك ياهزاع .. انت تدري اني مااتضايق منك .. وعمري مابتضايق منك أو اتعب منك.. وانت اساساً تقدر بروحك تيّر الكرسي .. "
هزاع : " ادري .. بس .."
بطي : " بس شو ؟؟.."
هزاع : " انا عندي شي ضروري اسويه اليوم .. بس متردد في اني اسويه وإلا لا ؟؟.."
بطي : " شو هالشي الضروري ؟؟؟ .."
هزاع : " لا لا .. ماشي .. خلاص انسى السالفة .."
بطي : " هزاااعو .. تتحراني راقد في العسل ومااعرف عن اللي فخاطرك ؟؟ لاحبيبي .. لااا .. انا ادري ان اليوم عندك موعد مال العلاج الطبيعي .. وانا ادري انك ماتبا تسرح .. بس هب على كيفك .. تتحراني انا مااعرف مواعيدك ؟؟ .. انا مخزن تاريخ كل موعد في تلفوني .. وزين سويت يوم انك اتصلت وواعيتني لاني ماكنت بنش وماكنا بنسير المستشفى .."
هزاع : " بطوي .."
بطي : " عيون بطوي .. "
هزاع : " والله مااعرف شواسوي ؟؟ .."
بطي : " زوزو .. اتوكل عالله .. وربنا ماينسى عباده .. وصدقني باذن الله بترد شروات قبل واحسن .. "
هزاع : " واذا مامشيت ؟؟.."
بطي : " يالبغام .. انت حالتك هب حاله مستعصيه .. وانت اتدري ان في امل كبير انك تمشي .. ونسبة نجاح العلاج 70% .. يعني نسبه كبيره هب صغيره.. يلا شد حيلك واتوكل على ربك .."
هزاع : " لا إله إلا الله .."
بطي : " محمد رسول الله .. يلا زوزو اتلبس واتزقرت واتكشخ .. واريدك اتطيّح كل الغراشيب اللي في المستشفى اليوم .. "
هزاع :" ههههه .. ان شاالله .."
بطي : " ومااوصيك .. اريدك تقنص اليوم.."
هزاع : " ليش ؟؟ نحن هب في موسم القنص .. كيف بقنص ؟؟.."
بطي : " هههههه .. يالعبيط .. انا اطري تقنص مزايين .."
هزاع : " ههههه .. ولايهمك .. بقنص الفراشات والنيرسات اللي هناك .."
بطي : " هااا .. علينا .."
هزاع : " شو علينا وماعلينا ؟؟.."
بطي باستفزاز : " اونك يعني ماتذوب يوم تشوف الدكتوره مها ؟؟.."
هزاع مغيظ : " بطوووي .. انا قلتلك اني مااريد اتعالج عند هاي .. واصلاً هي ماتنزل مصرطيه .. كيف تريدني اذوب فيها ؟؟ دخيلك لاتييب هالسالفه مره ثانيه علسانك .."
بطي : " هههه .. ان شاالله .. خلاص انت تزهب وانا نص ساعه وبكون عندك .."
هزاع : " اترياك انا .. "
بطي : " فمان الرحمن .."
وقام بطي من سريره وسار الحمام عسب يتسبح ويلبس وخلاف يمر على هزاع ..
كان بطي بالنسبه لهزاع شروات الدافع اللي يدفعه للامل .. كان بطي ما شاالله عليه مايقصر مع هزاع .. دومه يوقف معاه ويعطيه الامل في المشي ..
وهزاع كان في هالفتره متعلق في بطي بطريقه فظيعه .. خصه انه يحس انه منبوذ بين الناس .. يعني لازم يوم يخطف حذال حد يشوفه .. وانتوا تدرون ان الكرسي المتحرك دومه يجذب الانتباه .. حتى لو الواحد ماكان يريد يشوفه بيشوفه ..
وقام هزاع وسار الصالة .. وامايته كانت يالسه في الصالة .. طبعاً هزاع كان متكشخ شروات عوايده .. ماشاالله عليه دومه يتعدل حتى وهو عالكرسي هذا ..
كان لابس قميص وبنطلون لانهم موصينه في المستشفى يلبس هاللبس ..
خصه انه بيتعالج علاج طبيعي .. يعني لازم بيحركون ريوله ..
كان البنطلون شويّه وسيع ولونه ابيض .. والتيشيرت كان شوّيه ضيّق .. يعني عضلاته كانت مبينه .. لانه اساساً كان يسير الصاله .. بس من عقب الحادث ماسار..ولون التيشيرت اسود وعليه كتبه بالابيض
ام هزاع : "هلا والله بولديه .. هلا براس مالي والله .."
هزاع يبتسم ابتسامه باهته : " هلا وسهلا الغااليه .. انا راس مالج ؟؟ .."
ام هزاع : " ويدي ؟؟ اذا انت هب راس مالي .. عيل منو راس مالي ؟؟ .."
هزاع يغمز بعينه : " اكيد حبيب القلب سهيل .. "
ام هزاع : " ابوك ربي يحفظه حبيب قلبي شروات ماقلت .. بس انت راس مالي وكل اللي عندي في هالدنيا .."
هزاع : " وعيالج الثلاثة الباقيين ؟؟ شو مصيرهم ؟؟.."
ام هزاع : " تراهم عيالي ومالي غنا عنهم .. بس انت ولديه البجر اللي دوم افتخر به وارفع راسي بك .. "
هزاع يتقرب بالكرسي من امه اللي كانت يالسه عالغنفات .. وحبها على راسها ..
هزاع : " ان شاالله دوم اكون عند حسن ظنج .. ويعلني مااخلى منج .."
ام هزاع عورها قلبها على حالة ولدها ودمعت عيونها غصبٍ عنها ..
هزاع : " ام هزاع شعنه هالدمعه ؟؟ افاااااا .. خلي عنج هالسوالف .."
ام هزاع تلوي على ولدها : " يعلني اشوف عيالك قبل لااموت.."
هزاع : " الله يطول بعمرج ان شاالله .. وتشوفين عيالي دور مادايرج.. ويطفروبج بعد.. ويزقرونج امايه ويخبلوبج .. بس منو بتاخذ هالسكراب ؟؟ (يأشر على ريوله) .."
ام هزاع : " والله ودهن البنيات شروات ولديه .. ريال ومافيه عيب .."
هزاع : " ههههه .. اللي يسمع ولدج ولدج مطيّح البنات ؟ .."
ام هزاع : " فديتك والله .. الحرمه موجوده .. بس انت أشر وانا اقولك لبيه .. بس انت هب راضي تعرس.."
هزاع : " ان شاالله بعرس يوم بحصل بنت الحلال اللي تناسبني .. انتي لاتكدرين خاطرج .. "
وشويّه وإلا يسمعون حس بطي ..
بطي : " هود .. هود .."
ام هزاع : " هدا .. هدا .. اقرب ولديّه .. محد هني غريب.."
وحدر بطي الصالة وباس راس ام هزاع وتوكلوا وساروا المستشفى رباعه..
.

موعد هزاع كان عالساعه تسع ونص .. وهم وصلوا المستشفى تسع وربع ..
وكانوا في حجرة الانتظار..
بطي : " مااوصيك .. لاتيلس تعاند الحرمه .."
هزاع : " اوووف .. انزين .. "
بطي : " جنها الرمسه إلا هب عايبتنك ؟؟.."
هزاع : " تبا الصدق .. هيه .. هب عايبتني .. انا مااريد هالحرمه تدقني .."
بطي : " يعني شو بتسويبك الحرمة ؟؟ إلا بتمشي اجراءات علاجك .. يعني هي بس بتشرف عالعلاج ومابتدق شعره من ينبك .."
هزاع : " انزين خلاص .. خلاص.."
بطي : " شو خلاص ؟؟ هزاع .. انا مااريدك تسوي شي انت هب راضي عنه .. يعني اذا ماتريدهه الحينه بسير احولك على دكتور ثاني غيرها .. "
هزاع : " لاخلاص .. مايحتاي .."
بطي : " شبلاك انت عالحرمه ؟؟ ماشاالله عليها يمدحونها .. ويقولون ان عندها خبره في هالسوالف .. صح انها متدربه .. بس ماشاالله عليها حرمه تحب الشغل .. حتى اسلوبها في الكلام حلو .. دومها تحاول انها تقنعك بكلامها .. وماتحاول انها تجبر الناس .. صدقني بتحب اسلوبها .."
هزاع : " خير ان شاالله .."
بطي يفلع هزاع بدبه الماي : " توكل على الله .. "
وهالحزة زقرت النيرس اسم هزاع ..
بطي : " يلا .. شرات ماوصيتك .. "
هزاع : " كلت جبدي .. تتحراني ياهل ماافتهم ؟؟.."
بطي : " خلاف بنتفاهم خلاف.. يلاّ رح .."
وسار هزاع مع النيرس .. ودخلوه عالدكتوره ..
لانها كانت بتشوف حالة ريوله .. وخلاف بتسرح معاه عالعلاج الطبيعي..
.
.
وبطي سار يتريق وخلاف كان بيمر عليه عسب يسيرون رباعه كلهم دبي ..
وعند الدكتورة مها ..
كانت ماشاالله عليها مها غاويه .. وكانت لابسه تنورة بيضا ومتداخل فيها اللون الوردي .. وكانت لابسه البالطو عاللبس اللي لابستنه .. بس كانت جنان ماشاالله عليها .. وكانت حاطه جلوس وردي فاتح ومتجحله .. وكانت متحجبه بـ (سكارف) .. ولون السكارف ابيض وفيه كتبه ورديّه .. >>سكارف شوبارد scarf Chopard
بس كانت بنت حشيم ماشاالله عليها .. الكل يشهد باخلاقها العاليه
مها كانت تكشف على ريول هزاع .. وهزاع في خاطره يكفخها .. رغم انه كان منبهر في جمالها .. بس بعد كان يكرهها ..
مها : " خلاص الشيخ .. ان شاالله من اليوم بنبدى معاك العلاج الطبيعي .. "
هزاع من طرف خشمه : " ادري .. "
ابتسمت مها في ويهه وماردت عليه .. لانها تعرف كيف تكون نفسيه المرضى .. وخصة يوم تييها حالات من حالة هزاع ..
مها تحاول انها تعدل الجو المتكهرب : " شو النفسيه اليوم ؟؟ ان شاالله تكون متفائل ومستعد .."
هزاع شافها بطرف عينه ومارد عليها : " ............. "
مها : " شي فخاطرك هزاع ؟؟ .."
هزاع : " لااا .. "
مها : " خلاص عيل .. بنسير الحجره الثانيه وبنبدى العلاج .."
وعاونت هزاع عسب يقعد عالكرسي المتحرك .. بس هزاع دز ايدها دزه قويه .. حليلها حز فخاطرها .. ماتوقعت انه يكرهها بهالطريقه ..
بس استغفرت ربها واتجدمت وهو لحقها الحجره الثانيه ..
ووصت الدكتور محمد على هزاع .. والدكتور محمد كان المسؤول عن قسم العلاج الطبيعي .. زكان ريال عود وشيبه بس كان مواطن ..
وتمت واقفه الدكتوره بعيد وتشوف هزاع ومدى تجاوبه للعلاج ..
بس طبعاً هزاع ماانتبه عليها ..
كان الدكتور يحاول يحرك ريوله بحركات خفيفة ..
هزاع : " آآآي دكتور .. "
الدكتور محمد : " ماعليه ولديه .. انا بس اريد اشوف انفعالك ومدى تجاوب ريولك معايه .. والحمدلله ريولك تتجاوب .. وانا اضمنلك انك بترد شروات قبل .. "
هزاع حس ان الروح ردتله : " الله يبشرك بالخير يادكتور .. بس متى بقدر بمشي ؟؟ .."
د. محمد : " ان شاالله قريب .. بس انت ماتحاول انك تحرك ريولك في البيت صح ؟؟. ."
هزاع : " تبا الصدق .. لا .. "
د. محمد : " اسمع ولديه .. انا ادري انك متروع .. بس المفروظ انك تحاول تحرك ريولك .. لانك الحمدلله هب معوق أو عاجر عن الحركة .. انت بس شوّيه متروع والحادث اثر في ريولك .. يعني مايبالك إلا شهرين بالكثير وترد شروات قبل .. واريدك توعدني انك تدرب ريولك عالحركة .. لانك لو ماحركتها صدقني بتيبس .. "
هزاع متشقق : " ان شاالله .. بحاول اني احركها .."
د. محمد : " بس لاتضغط على ريولك .. يعني لاتسوي شي فوق ارادتك وطاقتك .. ابغيك تحركها بحدود .. "
هزاع مستانس وشاق الحلج : " ان شاالله .. "
وكمّل معاه الدكتور .. وكان هزاع متجاوب مع الدكتور اكثر من الدكتورة مها ..
دمعت عين مها وهي تشوف هزاع من بعيد ..
وطلعت من الحجرة وسارت مكتبها .. ولا إرادي حطت راسها عالمكتب وتمت تصيح .. " ليش ياربي ليش ؟؟ انا شو سويتبه عشان جذه يحتقرني ؟؟ ليتني مت قبل لايعاملني حد بهالطريقة .. اول مرة حد من المرضى جذه يعاملني .. يارب هوّن عليّه .. "
حليلها ماقدرت تتحمل معاملة هزاع لها .. وقامت وغسلت ويهها .. وتوكلت على ربها وقوّت قلبها وخذت قرار انها تكون اقوى من هزاع وتكمّل معاه العلاج .. وشويّه وتسمع حد يدق عليها الباب ..
مها : " تفضل .."
بطي : " دام فضلج دكتوره .. "
مها : " حياالله بطي .. حياك ايلس عالكرسي .. "
وحدر بطي داخل ويلس على كرسي من الكراسي اللي مجابله المكتب ..
مها : " هلا وسهلا الشيخ .. "
بطي : " تسلمين والله .. ها دكتوره ؟؟ شو صار على هزاع ؟؟ .."
وهالحزه تغيرت ملامح الدكتوره 180 درجة..
بطي اتروع : " خير ان شاالله .. لايكون هزاع فيه شي ؟؟ .."
مها : " لا لا لا .. بسم الله عليه .. بس .."
بطي : " بس شو ؟؟ .."
مها : " الحمدلله الدكتور محمد بشرنا وقال انه بيتعلاج في وقت قريب وبيرد يمشي شروات قبل واحسن .."
بطي ارتاح فواده : " الله يبشرج بالخير .. بس شو السالفة ؟؟.."
مها مستحيه : " اخويه بطي .. هزاع ابداً هب متجاوب معايه .. يعني كل ماحاولت بس اني ادقه ظك بايدي الصوب الثاني .. يعني انا بس حاولت اني اعاونه في اليلسه .. جان يدز ايديه .. حتى انه مول ماحاول انه يكلمني .. كنت احاول اني اعدل المود والمزاج .. بس والله ماتوقعته يكرهني لهالدرجة ؟؟ .."
وهالحزة دمعت عيونها غصبٍ عنها .. وعلى طول مسحت دمعها ..
بطي : " لاحول ولاقوة إلا بالله .. خلاص اختيه .. لاتزعلين .. انتي ادرى بحالة هزاع .. "
مها : " والله اني مقدره ظروفه .."
بطي : " الله يجبر بخاطرج .. صدقيني هو وايد متضايق .. خصه هو كان يمشي قبل .. يعني هالشي وايد اثر عليه .. بس اريدج تصبرين وتكونين اقوى منه .. صدقيني هو انسان طيب وحبوب .. بس من عقب الحادث وايد تغير .. "
مها : " الله يشفيه ان شاالله .."
بطي : " ان شاالله .. "
وهني يدخل عليهم هزاع بالكرسي ..
بطي يفتر صوبه : " هاهزاع .. خلصت ؟؟ .."
هزاع شاف الدكتوره من طرف عينه وافتر صوب بطي : " هيه .. يلا نسير .. "
وافتر الصوب الثاني هزاع .. بس مها حاولت انها تكلمه عسب تتطمن عليه ..
مها : " هزاع كيف كان العلاج الاولي اليوم ؟؟.. "
هزاع ماصد صوبها : " بطي شوقلتلك انا ؟؟ ... يلاّ اشتل .."
وطلع هزاع عنهم وسبق بطي ..
بطي وقف وقبل لايطلع قال بيجبر في خاطر هالفقيره ..
بطي متلوم : " اسمحيلي اختيا .. والله ان راسه يابس وعنيد .. ماكان جذه قبل .. المهم .. امسحيها في ويهي على قولتهم (ويمسح بايده على لحيته ).."
ضحكت مها على حركة بطي : " هههه.. ولايهمك .. انا اصلاً مازعلت وماخذت على خاطري .. مصيره بيكلمني .. "
بطي : " خلاص عيل انا اترخص .. "
ولحق بطي هزاع .. وفي السيارة ..
بطي : " بلاك انت ؟؟ .."
هزاع ببرود : " ليش شو سويت ؟؟ .."
بطي : " اونك تستهبل وتسوي عمرك هب مسوي شي ؟؟ .."
هزاع رد السيت ولبس بطي وانسدح ..
بطي : " حووووووه .. اكلمك انا .. "
هزاع : " يعني شوتباني اقولك ؟؟ .."
بطي : " حرام عليك اللي تسويه في هاي الفقيرة .. ليش جذه تكلمها ؟؟.."
هزاع : " كيفي .."
بطي : " والله مااحيدك كنت جذه .. واااايد تغيرت ياهزاع .. انا هزاع اللي كنت اعرفه كان يكلم الناس بتواضع وبكل عفويه .. وكان يحب الكل .. بس الحينه هزري راح هاك الهزاع .."
حس هزاع بتأنيب الضمير .. وطبعاً بطي تم يفر عليه الرمسه الزينه الين ماوصلوا البيت ..
بطي : " بالذمه .. بالذمه .. الحرمه ماكانت غاويه ؟؟ .."
هزاع : " وعععع .. إلا عبره وماتتشاهد .. "
بطي : " حرام عليك .. والله انها قمر ماشاالله عليها .. واليوم كانت غاديه باربي بهاللون الوردي .. بصراحه كانت طرررررر .. "
هزاع سرح بافكاره ولبس بطي .. وتم بطي يكلم عمره ..
هزاع يلس يتذكر لمسه ايدها الناعمة .. وويهها الاكثر من طفولي .. وخدودها الورديه ولبسها الوردي .. ورموشها الكثيفه .. وتنهد هزاع ..
هزاع : " آآآآآآه .. بس بعدني مااستلطفها .."
بطي :" ماتستلطف منو ؟؟ .."
مارد هزاع على بطي ..
ورن تلفون بطاي هالحزة ..
وانصدم يوم شاف الرقم .. كان مكتوب (حياتي)..
وعلى طول رد .. بس طبعاً هزاع ماكان معاه .. هزاع كان في دنيا ثانيه .. محد يعلمبها غير ربنا سبحانه ..
بطي : " مرحبا .. مرحبا .. مرحبا ملايين .. هلا والله بحياتي .. "
حمدة حليلها قفطت وماردت عليه ..
بطي : " الوووو .. الووو .. "
حمدة بكل دلع : " مرحبا .. "
بطي : " فديت هالنصخ وراعيه النصخ وفديت هالتلفون اللي يابلي حس هالنصخ .. "
حمدة : " صباح الخير .."
بطي : " صباح النور والسرور .."
هالحزة انتبه هزاع على بطي .. زمسك ايده ..
هزاع : " تكلم منو ؟؟ .."
بطي : " لحظة غناتي .. (ويفتر صوب هزاع) ويصاصره .. اكلّم حرمتيه .. انت كمّل رقادك .."
هزاع فهمها عالطاير وابتسم في ويه بطي وافتر الصوب الثاني وكمّل رقاده ..
بطي : "والله الين الحينه هب مصدق .. من وين يبتي رقميه ؟؟ .."
حمدة : " اللي يبا الصلاة ماتفوته .. "
بطي : " والله انج هب هينه يابنت النيادي .. "
حمدة : " وينك انت ؟؟ .."
بطي : " انا الله يسلمج توني طالع من المستشفى .."
حمدة متروعه : " بلاااااك ؟؟ .."
بطي ضحك وقال انه بيخرط عليها وبيروعها ..
بطي يمثل : " تعبان وراسي يعورني ومدوخ .. "
حمدة : " بسم الله عليك .. يعله فيني ولافيك .. "
بطي : " ههههه .. لابسم الله عليج .. امزح معاج .. اليوم موعد هزاع ووديته .. وتونا طالعين من المستشفى .. "
حمدة : " اها .. ربي يعافيه ان شاالله .."
بطي : " آمين .."
حمدة : " خلاص عيل برايك .. بس بغيت اتطمن عليك .. "
بطي : " فديييييت روحج والله .. خلاص عيل فديتج .. تامريني بشي ؟؟ .."
حمدة : " سلامة راسك .. ومن صوبك ؟؟ .."
بطي : " بتسوين اللي بقولج عنه ؟؟ "
حمدة مستغربه : " شو ؟؟ .."
بطي : " بتسوين اللي بقوله وإلا لا ؟؟.."
حمدة بتردد : " مممم . هيه .. بس شو ؟؟ .."
بطي : " احلفي انج تعطيني هالشي .."
حمدة : " انزين شووو ؟؟ .."
بطي : " اول احلفي .. "
حمدة : " اوووف .. والله .."
بطي : " لااا .. قولي والله العظيم بسوي اللي تباه وبعطيك اللي تريده .. "
حمدة : " والله طرار ويتشرط .. "
بطي : " بتقولين وانتي تضحكين بعد .. "
حمدة : " السالفة سالفة عناد عيل .. يلا برايك .."
بطي : " لااااا .. والله السموووحه .. بس دخيلج لاتذليني .."
حمدة : " انزين خلاص بالحل .. مسموح .."
بطي : " طاح الحطب .. يلا احلفي الحينه .."
حمدة : " لاحول ولا قوة إلا بالله .. والله العظيم بعطيك اللي تريده .."
بطي بهمس : " اريد بوووسه .. "
حمدة : " برايك .. برايك .. اجلب ويهك ابركلك .. انا الغلطانه لاني اتصلت فيك.. "
بطي : " افاااااا .. اهون عليج ؟؟.."
حمدة : " بااااااي .. "
بطي : " حبيبي ؟؟.."
حمدة : " بااااي .. "
بطي : " حياااااااااتي .."
حمدة : " عيون حياتك .. "
بطي : " لاتزعلين مني .. "
حمدة : " انت تدري اني مااقدر ازعل عليك .. "
بطي : " فديييييت هالسمحه والله .. انا آسف ومابطلب شي منج مرة ثانيه .."
حمدة : " ..........."
بطي : " خلاص برايج .. "
حمدة : " تحمل على عمرك .. "
بطي : " ان شاالله .. "
حمدة : " فمان الله .. "

حليله بند بطي التلفون وماخذ اللي كان يريده .. بس طبعاً بطي انسان سياسي .. وحاول اونه يكسر خاطرها عسب خلاف ياخذ اللي يريده ..
ومن بند عنها افتر صوب هزاع عسب يشوفه .. بس كان هزاع في سابع نومه ..
بطي : " فديته رقد .. يلا ماعليه .. يوم بنوصل بواعيه .. "
ووصل بطي بيت عمه .. وواعى هزاع ونزلوا رباعة البيت .
ومن حدروا شافوا حمدة واليازية ومريامي وشما وام بطي وام حمدة في البيت ..وكان سيف معاهم وخليفة .. وميثانة كانت يالسه معاهم وعلاية .. وطبعاً راعية البيت كانت يالسه وياهم واللي هي ام هزاع ..
بطي + هزاع : " السلام عليكم والرحمة .. "
الكل : " وعليكم السلام والحمة الله وبركاته.."
بطي : " ماشاالله .. كلكم متيمعين هني .. خير ان شاالله ؟؟ .."
اليازيه : " يعني لازم تصير مناسبة عشان نتيمع ؟؟ .. "
بطي : " لا .. بس هاليمعه شويه عوده .. "
ام حمدة : " قول ماشاالله ياولديه .. رى مايحسد المال إلاصاحبه .. واحمد ربك عالنعمه هاي .."
ام هزاع : " هزاع وبطي .. تريقتوا فديتكم ؟؟ .."
بطي : " الحمدلله تريقت .. "
ام هزاع : " وانت فديتك ؟؟ .."
هزاع : " ماتريقت .. وهب مشتهي شي .. "
وسار هزاع عنهم حجرته .. ولحقه بطي وعاونه وساروا الحجرة .. وخلاف رد بطي ويلس معاهم في الصالة ..
ام بطي : " شحال هزاع الحينه ؟؟ .."
بطي : " والله الحمدلله .. اليوم كان مستانس لان الدكتور بشره انه بيمشي عن قريب .. "
ام هزاع : " الحمدلله ياربي .. الحمدلله .."
ام بطي : " الحمدلله .. عيل بلاه مضيج جذه ؟؟ .."
بطي طاحت عينه في عين حمدة وابتسملها ورد كمّل رمسته : " والله ماادري شواقولج ؟؟ .."
ام هزاع حليلها تروعت : " شوالسالفه ولديه ؟؟ .."
بطي : " ماشي عمو .. بس ولدج طايحلنا كل يوم مواقع مع الدكتوره الفقيره .."
ام بطي : " ويدي ؟؟ .. شعنه يابوك ؟؟ .."
بطي : " والله ماادريبه ليش مايستلطفها .. مع انها وايد طيبه وحبوبة ماشاالله عليها .. "
وتشوفه حمدة بنص عين .. وهلك بطاي من الضحك ..
وتموا يسولفون لين الساعة 11 .. وخلاف توكلوا وساروا دبي .. بس شما ماسارت معاهم .. لان يبالها محاتاه وتبديل ثياب وحفاظات .. فماطاعت ام بطي تخليها تسير معاهم .. واكيد هي شغلت الونان مالها وشلت البقعة على راسها ..
كانوا البنات كلهن في سيارة بطي ..
وفي سيارة خليفة الشباب .. وطبعاً خلوف كان مشتط لانه كان يريد علاية تكون معاه .. بس علاية ماطاعت ويلست مع البنات ..
وفي سيارة بطي ..
مريامي : " بطوي .. نريد نفرفش .. شغللنا شي .."
بطي : " فالج طيب .. ماطلبتي .. "
وشغل بطي الاف ام .. وكانوا حاطين أغنية عيضة ( تدري اني موت احبك ) ..
بطي ماصدق خبر .. وعلى طول الصوت عسب تسمعها حمدة .. الكل فهم الحركة .. بس سكتوا وطوفوا السالفة ..
مريامي : " بطووووي .. انا قلتلك نريد نفرفش .. مانريد نزعل .. "
بطي : "ان شاالله الغااااااليه .. من عيوني .. "
وشغل cd الجسمي.. وحط اغنية عالي مستواه ..
البنيات ارتبشن .. واللي تصفق .. واللي تضحك .. واللي تسولف .. الجو كان ولا اروع .. وبطي كان كل شوي يصد من المنظره ويشوف غناته ..
اما في سيارة خليفة فكانوا الشباب من الخاطر مخترشين وشالنهم الهوى ..
كانوا يسمعون ( آه ونص ) .. خخخخ .. صدق من الخاطر مرتبشين ومطولين عالصوت ..
وعقب ساعة ونص وصلوا دبي .. ومن وصلوا دخلوا سنتر من السناتر عسب يصلون ..
وحدروا الميركاتو عشان يصلون ..
ومن خلصوا صلاتهم كلهم تيمعوا وساروا بقعة المطاعم عسب يتغدون .. ماشاالله عليهم كانوا وايدين .. حتى الناس اللي في السنتر كانوا يشوفونهم باستغراب .. وطبعاً هم مسويلهم طاف ..
ومن تغدوا وخلصوا سارن البنات اكيـــــد المحلات عسب يتشرن ..
واول محل حدروه زارا .. واتخبلن البنات وماخلوا شي ماخذوه ..
بطي : " حووووه .. انتن .. منو ان شاالله بيدفع بيزات السامان هذا كله ؟؟ .."
شافته اليازية بنظرة ويلست ترمش بعيونها شروات الصغارية .. طبعاً مارام يقاوم بطي وتوكل على ربه ودفع الفاتورة ..
وخلاف حدروا مانغو وبريشكا ومحلات ثانية .. ماخلوا شي ..
وطبعاً الشباب ساروا بروحهم يحومون .. وبطي بس كان مع البنات ..
وخلاف خلصن البنات .. وتيمعوا وركبوا المواتر ..
طبعاً شروات التنظيم الاولي .. البنات مع بطي .. والشباب عند خليفة ..
وكانوا بعدهم في الباركنات وماتحركوا ..
بطي : " هاصبايا .. ماشبعتن من الحوامه ومن المشترى ؟؟ .."
كلهن : " لاااااا .. "
بطي : " بسم الله الرحمن الرحيم .. عوذ بالله من شركن .. حشى روعتوني .. متفقين الحبيبات .. مممم .. بسير بشوف الاجواء في سيارة خليفة وبردلكن .. وبتخبرهم وين بيسيرون .."
وحدر بطي وسار صوب سيارة خليفة ..
بطي : " ها شباب .. على وين ناوين هالحزة ؟؟ .."
أحمد : " والله فخاطري اسير وافي .. "
هزاع : " هيه والله .. حتى انا .. "
سيف : " خلاص بطاي .. خلنا نسير وافي .."
بطي : " والله ماادري ؟؟ بسير بتخبر الحزب الثاني وبردلكم خبر .. "
وسار بطي صوب سيارته ..
بطي : " اقول صبايا .. الشباب اتفقوا على سيره وافي .. انتن شورايكن ؟؟ .."
مريامي : " هيه .. هيه .. والله فخاطري اسير العب هناك .. من سنه هب سايرتلها.. "
ميثانه : " دخيلك خلنا نسير وافي .. عمري ماحدرتها ولاطبيتها .. "
علاية : " حتى انا ماحدرتها .. "
بطي : " سمعنا شوركن كلكن .. بس ماسمعنا راي اليازية وحمدة ؟؟ .."
حمدة : " والله من صوبي ماتفرق عندي .. "
اليازية : " حتى انا .. "
بطي : " خلاص عيل .. بنسير وافي ان شاالله .. "
وساروا كلهم وافي .. وطبعاً وافي جنان ..
وسارت مريامي تلعب ..
وهالحزة تلفون اليازية صاح ومحد انتبه ..
ورد التلفون وصاح مرة ثانية .. وانتبهت حمدة ..
حمدة : " يزوي .. اظني تلفونج يرن .. "
اليازية : " تلفوني ؟؟ .."
وطلعت تلفونها من الشنظة وشافت ان الرقم غريب وماردت عليه ..
اليازية : " والله ماادري منو ؟؟ الرقم غريب .. بخليه عالسايلنت .."
حمدة : " يمكن حد من البيت متصل فيج من رقم غريب ؟؟.."
اليازية : " اللي يباني .. بيرد يسويلي خلاف .. "
وكملوا دربهم .. وصدق تعبوا من الحواطه ..واتفقوا انهم يردون بوظبي ..
وردوا البيت .. وفي الدرب مريامي حليلها رقدت في السيارة ..
ووصلوا البيت عالعشا .. وصلوا الشباب في المسيد والبنات في البيت .. وخلاف أحمد وهزاع وميثانة وعلاية ساروا بيتهم ..
واليازية سارت ترقد لانها صدق كانت تعبانه .. بس سارت تشوف السامان اللي خذته وكانت معاها حمدة ..
وفي حجرة اليازية ..
حمدة : " ماخلينا شي ماخذناه .."
اليازية : " تدرين .. كان فخاطري اسير السيتي وصحارى .. "
حمدة : " حرام عليج .. ماشفتي شكل بطي كيف كان تعبان ؟؟ حليله من غبشة واعي وسار المستشفى هزاع .. وخلاف ضربنا خط الين دبي .. والحينه تقوليلي صحارى ؟؟ والله حرام عليج .. تريدينه يسير الين الشارجه بس عشان صحارى ؟؟ والله حرام .."
اليازية : " بدت المحامي الرسمي .. "
حمدة : " هب سالفة محامي وإلا غيره .. بس حرام عليكم .. ارحموا الريال .."
اليازية : " تتحسبيني مافيني قلب ومااحاتي اخويه ؟؟ والله اني احاتيه اكثر منج ( وتطلع لسانها ) .."
حمدة : " لا والله ؟؟ .. انزين ماعليه .. بس مصيرج بتحاتين حريز وبتنسين بطي .. "
اليازية : " ياويلي عالحب .. "
وهالحزة رن تلفون اليازية ..
حمدة : " لاحووووول .. بلاه اليوم تلفونج مايصخ ؟؟ .. "
اليازية : " ماعليج امارة .. ييبي تلفوني .. "
وناولتها االتلفون ..
اليازية : " حمدووه .. هذا الرقم شروات الرقم اللي طلعلي اليوم .."
حمدة : " انزين ردي عالتلفون .. يمكن وحده من ربيعاتج مغيره رقمها .."
اليازية : " يمكن .. "
وردت اليازية عالتلفون ..
اليازيه : " مرحبا .. "
......... : " مرحبا ملايين ولايسدن .. "
اليازية : " ......... "
........... : " شحالج الغالية ؟؟ .."
اليازية : " لو سمحت اخويه .. بغيت منو ؟؟ .."
........ : " اريدج انتي .. "
اليازية : " لوسمحت الشيخ احترم عمرك .. "
........... : " بس انا اريدج انتي واموووت فيج .. "
اليازية : " برايك الشيخ .. "
........... : " اليازيه غناتي .. انا حريز .. "
انصدمت اليازية من اللي سمعته وتمت ساكته .. وحطت ايدها عالتلفون عسب مايسمعها وافترت صوب حمدة ..
اليازيه : " حمدوووه .. هذا حريز .. "
حمدة : " احلفي .. تعالبي حذالي خليني اسمع صوته .. "
ويلست اليازيه حذالها .. ويلست حمدة تتصوخ الرمسة ..
اليازيه : " هلا وسهلا .. "
حريز : " اهلين وسهلين .. شحالج فديتج ؟؟ .."
اليازيه : " يسرك الحال طاب حالك .. "
حريز : " ان شاالله دوم .. هب يوم .. "
حمدة سمعت صوته واشرت بايدها (اوكي) .. يعني صوته حلو .. وشلت بعمرها وطلعت من الحجرة عسب تخليها تاخذ راحتها في الرمسة .. وخصة ان هالمرة اول مرة يكلمون بعض فالتلفون .. يعني لازم ياخذون راحتهم ..
ونزلت حمدة تحت صوب حجرة امايتها .. لانها صدق من الخاطر تولهت عليها ..
ودقت باب الحجرة وحدرت حتى قبل ماتسمع صوت امايتها ..
ومن حدرت شافت امايتها راقده عالشبريه .. وربعت صوبها وفرت عمرها عالشبريه حذالها .. تروعت ام حمدة ونشت من رقادها ..
ام حمدة متروعة : : " بسم الله .. "
حمدة لاويه على امايتها وشاقه الحلج..
ام حمدة تظك ايد حمدة : " بلاج فديتج زاغدتني جذه ؟؟ .."
حمدة تزاعق : " متولهه عليج مووووووووت .. "
ام حمدة : " فديت روحج انا .. بس دخيلج فجي عني .. "
حمدة : " ماارييييييييييد .. "
ام حمدة : " حرام عليج بتذبحيني .. "
حمدة : " ماعليه .. اريدهم يقولون البنيه ذبحت امايتها من الحب .. "
ام حمدة : " ههههه .. عوذ بالله من شرج .. "
حمدة : " حرام عليج امايه .. انا هب شريرة .. "
ام حمدة : " والله ماادريبج طالعه دلوعه على منو ؟؟.."
حمدة : " اكيد عالمرحوم ابويه وعليج .. "
ام حمدة : " الله يرحمه ويغمد روحه الجنة .. "
حمدة : " امايه .. "
ام حمدة : " عيون امايتج وقلبها .. "
حمدة تشل : " ان زعلت برضيك وكل عمري فداك .. والزعل ماازعله يالغالي عليك .."
ام حمدة : " هههه .. فديت هالصوت انا .. يعلني مااخلى منه .. بس ادري انج تحاولين تقردنين عسب ماازعل عنج .. اسميج لوتيّه .. "
حمدة : " افاااااااااا .. اصلاً انا مااقدر على زعلج يالغالية .. "
ام حمدة : " هافديتج .. وين سرتوا اليوم ؟؟ ..
حمدة : " الله يسلمج .. سرنا اول شي الميركاتو .. "
ام حمدة : " اشووو ؟؟ .."
حمدة : " ههههه .. امايه هذا مول في جميرا .. "
ام حمدة : " اها .. انزين .. وشو سويتوا هناك ؟؟ .."
حمدة : " يقولج الغالية ماخلينا شي ماخذناه .. ماخلينا بدله .. ماخلينا تنورة .. ماخلينا محل ماحدرناه .. "
ام حمدة : " يعني استانستي فديتج ؟؟ .."
حمدة : " هيه الحمدلله .. وااايد .. "
ام حمدة : " الحمدلله .. انا هذا اللي اريده .. بس اريد فرحتج .. "
حمدة : " فديتج والله .. انزين .. خليني اكمّل التقرير .. "
ام حمدة : " هههه .. كملي .. "
حمدة : " وخلاف سرنا وافي .. وسرنا كذا مكان في دبي وخلاف ردينا .. "
ام حمدة : " حمدة امايه . ."
حمدة : " هلا امايه .. "
شواااقي
03-28-2006, 10:15 pm
ام حمدة : " شكلنا ثقلنا عالعرب وايد .. "
حمدة : " اوووف .. انزين متى بنرد العين ؟؟ .."
ام حمدة : " ادري انج مستانسه هني .. وادري انج ماعندج حد في العين .. بس والله مصخناها .. من ثلاث اسابيع ونحن عندهم .. "
حمدة : " خلاص امايه .. ان شاالله عقب باجر بنرد العين .. يعني عالاقل يبالنا يوم الين مانيمع سامانا .. "
ام حمدة : " شورج وهدايه الله .. "
حمدة : " اوكيك .. خلاص انتي كمل رقادج وانا بسير ارقد الحينه .. تشااااو .. "
وحبت امها على راسها وطلعت .. وسارت شويه الصاة عسب تتطالع التلفزون ..
وانصدمت يوم شافت بطي .. وعلى طول ردت ورى على اساس انها بتشرد .. بس بطي كان اسرع عنها ..
بطي : "على وين ؟؟ تعالي اقعدي شوفي التلفزون معايه .. "
ويلست حمدة بعيد شوي عن بطي .. يعني كانوا مجابلين بعض ..وكان بطي يشوف رسوم
بطي : " شورايج بالرسوم المتحركه ؟؟ .. "
حمدة : " هههه .. والله انك ياهل .. "
بطي : " حليلي .. صح اني ياهل بس هب محصل حد يداريني .. "
حمدة باستهزاء : " حليلك والله .. "
بطي : " الله يسامحج .. "
حمدة : " خلاص انا بخليك الحينه . ."
بطي : " وين وين سايره ؟؟ .."
حمدة : " بسير ارقد عسب انش باجر من غبشه وارتب قشاري وساماني .. "
بطي : " شعنه ؟؟ .."
حمدة : " لاننا بنرد البيت ان شاالله ورى باجر .. "
انصدم بطي .. وجنه حد صب عليه ماي بارد ..
بطي : " ليش ؟؟ .."
حمدة : " ياسلام ؟!! .. كم تريدنا نيلس عندكم ؟؟ .. "
بطي : " ماادري ؟؟ بس بعدني ماشبعت .. "
حمدة : " هههههه .. والله مشكلتك .. "
وسارت حمدة عنه وخلته يالس بروحه وهو يتحرطم ..
..
..
..
وفي حجرة سيف .. كان سيف يكلم منايه( آمنه) غناته ..
سيف : " هافديتج ؟؟ شو فخاطرج ؟؟ .."
منايه : " والله ماشي .. بس تولهت عليك .. "
سيف : " بس ؟؟ .."
منايه : " يعني شو ترديني اقولك ؟؟ .."
سيف : " اريدج تقوليلي ..(يغيّر صوته) تولهت عليك موت فديتك .. انا مااقدر اعيش بدونك .. دخيلك لاتهدني .. "
منايه : " ههههه .. شورايك نتبادل الادوار .. وانت تكون انا .. "
سيف : " هههههه .. منووو .. "
منايه : " هلا سوافي .. "
سيف : " خلاص والله مااقدر اعيش بدونج .. لازم اخطبج عالاقل .. "
منايه : " ............ "
سيف : " بلاج ساكته ؟؟ قلت شي غلط انا ؟؟ .."
منايه : " لا .. بس .. "
سيف : " بس شو ؟؟ .."
منايه : " انت تدري ان الكل ماشاالله في بيتكم بيتزوج .. "
سيف : " انزين .. ويعني ؟؟ .."
منايه : " يعني فديتك اتريا شويه .. وخل الاجواء تهدى .. لان الكل يريد عرسه من صوب .."
سيف : " هههه .. صدقج والله .. تصدقين ابويه شكله يبا الفكاك منا ؟؟ .."
منايه : " لا بالعكس .. تفكيره سليم .. انت تعرف البدو وتعرف طبعهم .. يعني لازم الشيبة ايّوز عياله كلهم .. حتى ولوكانوا صغاريه .. وهالشي صح .. صدقني هو يضمنهم قبل لايضيعون .. "
سيف : " اها .. صح .. "
منايه : " يعني عندك اليازيه توها إلا مخلصه الثانويه وبتملج ان شاالله .. "
سيف : " ان شاالله .. "
منايه : " وخليفة اكبر عنها بسنتين وبيعرس .. وان شاالله عقبال العود بطي .. "
سيف : " آمين يارب .. ماشاالله عليج حفظتي العايله كلها .. "
منايه : " لازم .. هب اهل حبيبي سيف ؟؟ .."
سيف : " فديتج والله .. "
وتم يسولف مع غناته ..
.
.
.
وبالنسبه لخليفة كان في دنيا ثانيه .. كان في سابع مليوووون نومه .. وماكان يحاتي حد .. لانه اليوم شاف غناته علاية ..
.
.
وفي بيت سهيل المحيربي .. كان هزاع هب قادر يرقد .. كان يفكر بالدكتوره مها .. كان متلوم عليها ..
لان هزاع هب من طبعه ان يكلم حد بهالجفا .. بس كان هالشي فوق ارادته .. لانه كان يحس انها تشفق عليه .. وماكان يتحمل نظراتها اللي كانت تخترق عيونه وقلبه ..
.
.
وميثانة حليلها كانت يالسه تتريا خطيبها يتصل فيها من امريكا .. لان اللي خطبها ملج عليها .. بس هو يدرس في امريكا ..
يعني هو يدرس في امريكا .. ورد البلاد وملج عليها عسب ماتضيع منه .. وخلاف رد امريكا وديه ثانيه .. وباقيله 4اشهر ويرد ان شاالله بالسلامه ..
..

في مسا يوم الاربعا .. وفي احلى بقاع العالم .. وفي العين بالتحديد ..
كان حريز يالس مع اخوه الوحيد راشد .. ويسولفون مع بعض ..وكانت الساعه وحده بالليل ..
حريز : " بوسنيده .. "
راشد كان يرمس عالمسنجر وهب معبر اخوه ..
حريز : " رشووود ويهد .. "
راشد : " هااااا .. شو ؟؟ .."
حريز : " اكلمك انا هب اكلم ايدار .. "
راشد : " اسمعك .. قول اللي عندك .. "
حريز : " رشود يوم اكلمك صد صوبي وشوفني .. "
راشد ولا عالبال .. ويلس يضحك بروحه ويكتب عاللاب توب ..
ويا حريز وسكر شاشه اللاب توب ..
راشد فول من الخاطر : " حروووووز .. شعنه سكرت الـ screen ؟؟ .."
حريز : " ياويلي عليك يابو الثقافة انت .. اصلاً انا الغلطان اللي عاندت امايه وسرت خذتلك هالبلوه .. "
راشد : " بتيلس تذلني الحينه ؟؟ .."
حريز : " مابيلس اذلك .. بس حرام عليك اللي تسويه بعمرك .. عنبوه ارحم عمرك !!.. 24 ساعه مجابل هالزفت .. عيونك بتطيح .. "
راشد : " اوهوووو .. بنبدى بالمحاضرة اليومية . ."
حريز : " رشود انت تدري انك اخويه الوحيد وعمري ماقصرت عليك بشي .. واللي تريده دوم تحصله .. يامني انا أو من ابويه .. بس الدلع مابيوديك مكان .. وانا مااريد امنعك من النت ولااريد اجبرك على شي مايعيبك .. ولاتخليني اتصرف تصرف ثاني معاك .. بس اسمع النصيحه وحطها في بالك .. انا اريد مصلحتك .. وهالنت الخمام مابيوصلك مكان .. "
راشد : " اوووف .. انزين شواسوي ؟؟ خلصنا الامتحانات وماورايه شغله .. "
حريز : " انزين ماعليه .. مابنختلف . .بس صدقني من تبدى السنه اليايه وتدخل الثانويه العامه .. لابتشوف اللاب توب بعينك ولاعندك خبر .. "
راشد : " عثـــره ؟! .. حشى هب ثانويه عامه ؟؟ اظني سجن .. وبعدين استريح لاني السنه اليايه بدخل ثاني ثانوي هب ثالث .. "
حريز : " انزين طب هالسالفه الحينه وخلني ارمسك .. "
راشد : " انت رمستك ماتطلع إلا آخر الليل ؟؟ .."
حريز : " بتسمعني وإلا آخذ اللاب توب الحينه ؟؟ .."
راشد : " لااااا .. خلاص قول اللي عندك .. كلي آذان صاغيه .. "
حريز : " اتحرى بعد .. "
راشد : " بلاك انت اليوم ؟؟ صدقني هب صاحي .. "
حريز : " رشود باركلي .. "
راشد : "الله يبارك فحياتي .. "
حريز يقرص اخوه : " قول مبرووووك .. "
راشد : " آآآآخ .. الله يبارك فيني .. "
حريز : " رشود عن العبط .. "
راشد : " انزين .. انزين .. مبروك .. على شو ؟؟ .."
حريز : " من ساعه كلمت الحب .. "
راشد حليله استانس وقام اتخاشم مع اخوه وفر عمره عليه ..
راشد متشقق : " مبرووووك ياحريز .. وعقبالي .. "
حريز : " هههههه .. الله يبارك فحياتك .. رشوود .. دخيلك قم من على ريولي .. تتحرى عمرك خفيف ؟؟ .."
راشد قام ويلس عالكرسي وجابل اخوه ..
حريز : " بلاك جذه مستانس ؟؟ جنك انت اللي كلمت خطيبتك هب انا ؟؟ .."
راشد : " انت تدري ان المسلم اخ المسلم .. يفرح لفرحه ويحزن لحزنه .. "
حريز : " ياويلي على بوالادب .. مانقهرك يابوووك .. "
راشد يغمز بعينه : " اعيبك ياطويل العمر .. حريز تعال براويك شي .. "
حريز : " شووو ؟؟ .."
راشد : " تعال اقرى اللي كاتبيلي عالمسنجر .."
حريز : " والله انك متفيج .. اتحريتك بترويني شي يرزى ؟؟ .."
ويقرى حريز المكتوب عالكمبيوتر ..
** الغاويه : " احبك رشووود ومااقدر اصبر عنك .. "
راشد : " تدري اكلم منو ؟؟ .."
حريز : " منوو ؟؟ .."
راشد : " بنت رشيقه ومزيونه وحلوه والكل يريدها .. "
حريز : " منووو ؟؟ بترمس وإلا اكفخك الحينه ؟؟ .."
راشد : " بنت ييرانا الهبله .. خخخخ .. "
حريز : " والله ماعندك سالفه .. وبعدين تعال هاي وين رشيقه ؟؟ إلا درام .. "
راشد هلك من الضحك : " هههههه .. بكتبلها الحينه اخويه يقول عنج درام .. "
حريز : " لااااا يابوك لاتوهقنا .. خلنا في سبيل حالنا .. "
راشد : " تدري انها ماتعرفني ؟؟ .."
حريز : " عيل كيف من وين يبت ايميلها ؟؟ .."
راشد : " بعد .. ربك .. "
حريز : " ناس فاضيه .. "
وهالحزه حد حدر المسنجر وسوى صوت .. ومن صد راشد وشاف اللي حدر واستخف ..
راشد يزاعق : " ياوييييل حاااااااااالي .. "
حريز : " سكنهم مساكنهم .. "
راشد : " حروووز .. الحب حدرت .. "
حريز : " الله لابليتنا .. "
راشد : " حريز .. والله احب هالانسانه .. "
حريز : " بسم الله عليك .. مااحيدهن البنات يخشعونك ؟؟ .."
راشد : " ادري .. بس هاي خشعتني وفرتني بحر بعد .. "
حريز : " ههههه .. الله يعينك .. المهم رشود .. اريدك تتزهب باجر عسب نسرح بوظبي .. "
راشد : " اقولك من الحينه .. مابسير مكان .. لابوظبي ولاغيره .. "
حريز : " عكيفك هو ؟؟ اقووولك . .اتزهب باجر لاني معزوم في بيت عمي عبيد .. "
راشد : " قول جذه السالفه .. خلاص ان شاالله الين باجر يصير خير .. "
حريز : " اوكي .. يلا برايك .. "
وطلع حريز عن اخوه .. وسار حجرته عشان يرقد لانه كان تعبان ..
.
.
.
.
واليوم الثاني من غبشه .. كان حريز شال البقعه على راسه من الحشره ..
حريز : " اماااااااااااايه .. وين الضو ؟؟ .."
ام حريز : " بلاك مشتط ؟؟ الحينه بتييبه البشكاره .. هيّد ياولد الحلال .. "
حريز : " اوهووو .. وولدج المستخف وينه ؟؟ .."
ويحدر هالحزة عليهم راشد ..
راشد : " محد غيرك المستخف .. يابو المحاربه .. "
حريز : " ودك انت في وحده منهن .. والله من تظويهن ياانك تتعوق وتتخشع .. "
راشد : " لادخيلك .. مافينا عالتخشيع والتعويق .. "
ام حريز : " يالله بالستر .. ترمسون عن منو ؟؟ .."
راشد : " طويله العمر .. نرمس عن المحاربه .. "
ام حريز : " وافديتهم انا .. كم تسوى جنتيه المحيربيه .. "
حريز متشقق : " احم احم .. فديت جنتج .. "
راشد : " امايه والله ولدج استخف .. "
ام حريز : " ماعليه .. المهم انه يستخف في هوى حرمته .. هب في هوى الخمام .. "
حريز ماقدر ايّود عمره من الضحك ..
راشد : " هب جنها نغزه ؟؟ .."
ام حريز : " لافديتك .. انا ماانغز .. اللي في قلبي علساني .. وجان تريد الصدق تراك مضيع المذهب وكل يوم مسولنا مشاكل مع البنات .. "
حريز : " ههههههههههه .. امايه .. ولدج مايقهر الجنس اللطيف .. حتى قلبه غادي فندق والسبه هالهوى اللي فراسه .. "
راشد من الصبح ساكت ويسمع التعليقات وآخر شي نقع في ويههم ..
راشد : " هوى في عينك يالهرم .. وبعدين قلبي هب فندق .. وامايه تعالي بقولج شي .. عمرج شفتي عليّه شي ؟؟ .."
ام حريز : " الين الحينه ماشفنا .. بس صدقني خلاف بنشوف .. وياويلي من اللي بنشوفه .."
راشد : " هاي اللي توافل على ولدها ؟؟ عنبوه امايه بدل ماتدعيلي بالهدايه يالسه تتوقعين اشيا ماصارت ولابتصير؟؟ .."
حريز : " هههه .. امك تستبق الاحداث قبل ماتصير .. "
وشويّه وتحدر البشكاره وفي ايدها الضو والعود ..
ودخنت ام حريز عيالها وراشد كان يتحرطم ..
وخلاف ساروا بوظبي رباعه ..
.

** وفي بيت عبيد المحيربي **
خليفة متكشخ من صباح الله .. وكان من الخاطر مستانس .. لانه حلم انه ياخذ علاية ..
خليفة يكلم عمره وكان مجابل المنظره : " ياويلي حالي عليك ياولد عبيد .. والله انك غاوي ( ويتقرب من الجامه ويبوس عمره) امووواااااح .. ياويلي انا .. والله اني لاذوبج اليوم ياعلايه .. لاخليج تمشين وتهاذين بي .. وانا وراج والزمن طويل .. وان شاالله اليوم برد وبكلم الوالد عن موضوع عرسنا .. "
وتعطر خليفة من العطور اللي موجوده عالمستواليت وطلع من حجره .. وحوّل الصاله اللي تحت ..
ومن حدر شاف ام بطي وام حمدة يلوس ..
خليفة : " السلام عليكم والرحمة .. "
وخر يحب راس امايته .. وخلاف سار وحب راس ام حمدة ..
ام حمدة : " حبيت الكعبه ان شاالله . ."
خليفة : " آمين .. "
خليفة مايلس معاهم وعلى طول طلع من الصالة بس ام بطي قبضته قبل لايطلع ..
ام بطي : " خليـــــــــفة .. "
خليفة يفتر صوب امايته : " عونج امايه .. "
ام بطي : " عانك الرحمن فديتك .. وين طالع هالحزه ؟؟ وشعنه مايلست معانا ؟؟ .."
خليفة : " اسمحيلي امايه .. ورايه شغله ومااقدر اتحير .. "
وربع خليفة وطلع .. وسار صوب سيارته اللي في القاراج ..
ام بطي : " الله يحفظه ويهديه ان شاالله .. "
ام حمدة : " آمين .. "
ام بطي : " والله ماادريبهم عيالنا بلاهم مايقرون في البيت ؟؟ .."
ام حمدة : " ياخويتي هالدنيا .. احيد اول الشباب مايطلعون إلا حزه الحايه .. بس الحين 24 ساعه هياته .. "
ام بطي : " صدقج والله .. "
وشويّه ويحدر عليهم بطي ..
بطي : " مرحبا ملاااايين بالغراشيب .. "
وتقرب منهن وحبهن على روسهن ..
بطي : " يعلي مااخلى من الغراشيب والله .. شحالهن عيايزنا ؟؟ .."
ام بطي : " عيزن ركبك يالهيس .. "
بطي : " ههههه .. الله يسامحج .. توج يازينج .. "
ام حمدة : " ههههه .. تراها غلطتك انت .. من ساعه تقردنها والحينه تشتمها .. "
بطي : " خييييبه .. اشتمها ؟؟ انا بس قلت عيوز ؟؟ .. "
ام حمدة : " تراها امايتك عيزت وماتريد تعترف .. "
ام بطي : " حلفي انتي بس ؟؟ لادخيلج .. انتي الحينه صاكه العشرين هب الاربعين ؟؟ .."
ام حمدة : " شوووو ؟؟ الاربعين ؟؟ انتي إلا بتدخلين الخمسين .. "
ويلسن العيايز يتواقعن والسبه بطي ..
بطي : " الله يهديكن بسكن مواقع .. اصلاً انا الغلطان .. ولاتزعلن .. انتن صغار.. لا وفي سن المراهقة بعد .. بس دخيلكن مانريد مواقع من الصبح .."
ام بطي : " اسكت وطب ثمك .. "
بطي : " ههههه .. حشى .. حاقدات عليّه !! .. "
ام حمدة : " لاحاقدات ولاشياته .. "
بطي : " انزين امايه ترى حريز واخوه راشد بيونا عالغدى .. "
ام بطي : " قلتلي البارحه .. و ياحيهم .. البيت بيتهم .. "
بطي : " بس بغيت اذكرج .. وتراني زعلان من هالعيوز اللي يالسه حذالي .. "
ام بطي : " وشعنه بعد زعلان من عيوزك ؟؟ .."
بطي : " هب انتي .. انا زعلان من هااااي (وياشر على ام حمدة) .. "
ام حمدة : " وانا ماعندي اسم يالمستخف ؟؟ .."
بطي : " لااا .. لاني زعلان منج . ."
ام حمدة : " وليش ان شاالله ؟؟ .."
بطي : " ليش بتردون باجر العين ؟؟ .."
ام حمدة : " غربلات بليسك .. روعتني .. اتحريت مسويه فيك شي .. وبعدين لوماردينا بيتنا باجر ترانا بنرد خلاف .. "
بطي : " ماعليه ردوا خلاف هب هالايام .. "
ام بطي وتشوف ام حمدة من طرف عينها : " وليش ماخبرتيني انج بتردين ؟؟ .."
ام حمدة : " والله البارحه إلا قلت برد .. "
ام بطي : " عَــهواج ؟؟ .."
ام حمدة : " عوشه .. السالفه هب سالفه هوايه وإلا هواج .. بس لازم نرد بيتنا .. بسير بيتيه عسب اشوفه .. والله من زمان ماريت فلي هزاع .. وانا مااقدر اصبر عنها .. "
بطي : " ياويلي على فلي هزاع .. "
وتموا يسولفون مع بعض .. وبطي مشتط ويضارب ام حمدة ومايريدها ترد العين .. بس طبعاً محد يقدر يرد كلمتها الحينه ..
.
.
.
والشيخ خليفة كان في دربه صوب بيت عمه عشان يشوف غناته ..
ووصل جدى بيت عمه .. وتم واقف عشر دقايق ورتب افكاره وخلاف حدر ..
وهوّد خليفة ومحد رد عليه ..
خليفة : " هوود .. هود .. "
وتم خليفة خايس في الصالة تحت بروحه .. وهالحزة نزلت علاية تربع .. بس ماكانت تعرف ان خليفة في البيت .. كانت فاله شعرها القصير وكان شعرها يتطاير لى خدها وهي نازله الدري ..
والحبيبه كانت تغني وشالنها الهوى ..
استحى خليفة يوم شافها بليا شيله وعلى طول طلع ..
وتم واقف في الحوي شويّه ..
خليفة : وافديتها .. والله انها تخبل .. " وخلاف قرر خليفة انه يحدر البيت .. لانه مايقدر يصبر اكثر ..
خليفة : " هوووود .. هوود .. "
علاية ربعت فوق عسب تلبس شيلتها .. ونقع خليفة وهو واقف .. تخبل خليفة وقال انه بيرد البيت ..
وقبل لايطلع سمع صوت علاية ..
علاية : " خليفة وين ساير ؟؟ .."
خليفة يفتر صوبها وهو مستانس : " كنت بسير البيت .. "
علاية وهي تنزل وتتقرب منه وتمد ايدها له وتسلم عليه : " السلام عليك .. "
خليفة يمد ايده : " وعليج السلام .. " والود وده مايفج ايدها ..
علاية : " خلووف .. هد ايديه.. "
خليفة توه يفتكر الحبيب : " اووه .. والله نسيت .. "
ضحكت علاية عليه ..
خليفة : " هيه اضحكي انتي .. انا إلا من الصبح زابن هني ومحد رد عليّه .. "
علاية : " هههه .. حليلك .. انزين ايلس شعنه واقف ؟؟ .."
خليفة : " والله ماادريبج ؟؟ شكلج انتي إلا تريدين اتعبيني ؟؟ .."
علاية ماردت عليه ويلست عالغنفات وهو يلس معاها ..
خليفة : " تدرين اني ياي ومتعني بس عشان اشوفج ؟؟ .."
علاية احمرت واصفرت واخضرت وتلونت .. وقامت من مكانها
علاية : " ثواني وبييب الفواله والقهوه .. "
خليفة : " لالالا.. استريحي .. انا ياي اشوفج واروّح .. هب ياي امزر بطني .. "
علاية حليلها ماعرفت شوتسوي وردت يلست مكانها ..
خليفة : " اوهووو .. والله انج ناويه على اجلي ؟؟ .."
تروعت علاية وفجت عيونها عالآخر ..
علاية : " ليييش ؟؟ .."
خليفة : " والله مااقدر .. خلاص بنفجر .. "
علاية : " بسم الله عليك .. بلاك ؟؟ .."
خليفة : " عليووه احبج .. والله امووت فيج .. "
علاية صرطت ريجها وتمت ساكته .. جنها بتموت ..
خليفة : " اسمعيني علاية .. انا اليوم ان شاالله برمس مع الوالد في موضوعنا .. وبخلص الموضوع .. لاني مااقدر اصبر اكثر عن جذه .. مااريد حد يقولي البنيه صغيره وإلا بتكمل دراستها .. تراج جذه وإلا جذه مابتداومين ولا بتشتغلين .. يعني لاتعبين عمرج وتدرسين .. بس جان إلا فخاطرج تدرسين ادرسي .. انا مابمنعج .. بس ادرسي عقب ماآخذج لاني مابصبر اكثر .. "
علاية بحيل وقوه ترمس والويه غادي طماطه : " انزين انا بدرس .. "
خليفة : " هههه بلاج متروعه ؟. خلاص ان شاالله .. اللي تبينه بيصير .. بس اول لازم نعرس .. "
علاية تحس بعمرها بتطيح وماتعرف شوتقول ..
خليفة : " خلاص عيل غناتي .. انا برد البيت .. بس بغيت اشوفج واقولج عن اللي فخاطري .. تامريني بشي ؟؟ .."
علاية : " سلامة راسك .. بس حاسب على عمرك .. "
خليفة : " ان شاالله .. "
وطلع خليفة من بيت عمه وهو متشقق .. بس قبل لايركب سيارته شافه احمد ..
احمد : " مرحبا .. مرحبا .. "
خليفة : " اهلين .. شحالك حماده ؟؟ .."
احمد : " بخير ونعمه .. ومن صوبكم ؟؟ .."
خليفة : " والله مانشكي باس .. "
احمد : " وين ساير حضرتك ؟؟ مايلسنا معاك ؟؟ .."
خليفة : " ان شاالله يوم ثاني .. بسير البيت الحينه لان حريز بيينا .. "
احمد : " سلّم عليه والحينه بييكم انا وهزاع .. "
خليفة : " خلاص عيل .. نشوفكم عالغدا .. "
احمد : " ان شاالله .. "
وسار خليفة بيتهم .. واحمد وهزاع اتزهبوا عسب يسيرون بيت عمهم عبيد ..
.

كان بطي مخطط انه يلم الشله كلها .. يعني تكون يلسه شباب ..
وهالحزه وصل حريز بوظبي وكان جدام بيت بطي ..
راشد : " يلاّ نحدر .. بلاك واقف جدى البيت ؟؟ .."
حريز : " آآآآه .. لحظه خلني اتخيل اليازيه ... "
راشد : " والله انك متفيج .. "
حريز : " آآآه .. يلاّ نحدر .."
وقبل لايحدر حريز اتصل في بطي عسب يطلعله ..
وطلع بطي ..
بطي : " مرحبا .. مرحبا ملاييين .. "
ويتخاشمون الشباب ويحدرون الميلس ..
بطي : " خذوا راحتكم شباب .. بسير اشوف سيفو وخلوف .. وبتصل في هزاع واحمد وبردلكم .. "
وشويّه وإلا حادر عليهم سيف ..
سيف : " حد طراني ؟؟ .."
واشتل حريز من مكانه واتقرب منه ..
حريز : " مرحبا .. هلا والله .. "
واتخاشموا الشباب .. وراح بطي يشوف خليفة ..
وشاف مريامي يالسه في الصالة وشاله هموم الدنيا على راسها ..
بطي : " بلاج مريومه ؟؟ .."
مريامي : " ماشي .. ماشي .. "
بطي اتقرب منها ويلس حذالها ..
بطي : " حبيبتي شبلاج ؟؟ .. "
مريامي فرت عمرها على بطوي ودفنت ويهها في حضنه ويلست تصيح وطلعت كل اللي فخاطرها ..
بطي كان يمسح على راسها وشعرها ويحاول انه يهدي اعصابها ..
بطي : " طلعي كل اللي فخاطرج .. وجان فخاطرج بعد تكفخين حد .. عادي .. تعالي اضربيني .. ماعندي خلاف .. "
مريامي ضحكت غصبن عنها ورفعت راسها من حضنه ..بطي ابتسم في ويهها وشاف بنظره كلها حنان .. هاي النظره خلت مريامي ترتاح .. وردت وفرت عمرها في حضن اخوها ولوت عليه ..
بطي : " فديت روحج والله .. خبريني شبلاج .. "
مريامي وهي تناهي : " ب .. بطاي .. انا .. انا احب امايه .. بس هي راحت عني .. بس الحمدلله ربي عوضني بهنتين .. امايه عوشه واليازيه .. بس اليازيه بتخليني وبتروح عني .. " و ارتفع صوتها ويلست تناهي ..
بطي حاول انه يناقشها في الموضوع .. بس حاول انه يهديها ..
بطي وهو يمسح على شعرها : " حبيبتي انا مااريد اناقشج في الموضوع الحينه .. بس اريد اعرف غلاتيه عندج .. "
مريامي وهي حاطه راسها على صدره وبعدها تصيح : " كيف ؟؟ .."
بطي : " اذا انتي صدق تحبيني بتسكتين الحينه .. وبتفكرين في الموضوع على اساس انج وحده عوده وعاقله .. وخلاف بنتفاهم .. بس اريدج الحينه تذكرين الله وتنسين كل اللي في بالج .. "
مريامي : " ان شاالله .. "
بطي : " مريامي انتي طول عمرج تريديني اعاملج شروات الكباريه .. وهالحزه اريدج تثبتيلي هالشي .. اوكيك ؟؟ .."
مريامي ترفع راسها من حضن اخوها : " اوكيك .. "
بطي : " والحينه سيري اغسلي ويهج واريدج تيلسين بروحج وتفكرين باللي مضايقبج .. وتحاولين انج تحلين المشكله بهدوء .. وبدون اي مناحه .. "
كان بطي يحاول انه يسايس اخته .. لانه يعرف نقطه ضعف مريامي .. وكان يعرف كيف يتفاهم معاها ..
حاول بطي انه يحسسها بوجودها .. ويحسسها انها كبرت وعقلت ..
بطي : " اووووه .. نسيت الشباب والله .. خليني اسير اشوفهم .. "
واشتل بطي من مكانه وهو يربع .. وكانت مريامي تضحك عليه ..
ورد مره ثانيه بطي صوبها : " اقولج .. ماشفتي خولف ؟؟ .."
مريامي : " هههه .. خلوف طالع .. "
بطي : " وين طالع هالسبال ؟؟ .."
وهالحزه حدر خليفة ..
خليفة : " منو السبال ؟؟ .."
بطي : " يلاّ خلوف دخيلك .. هب وقتها هالسوالف .. خلنا نسرح صوب العرب .. "
خليفة : " ان شاالله .. "
وساروا بطي وخليفة رباعه .. وفي الدرب ..
خليفة : " بطوي .. من ساعه شفت حماده وقالي انه بيي مع هزاع .. انت عازمنهم ؟؟ .."
بطي : " هيه .. انا عازمنهم .. "
وحدروا الميلس ومن حدروا شافوا هزاع واحمد .. وتوايهوا يميع .. ويلسوا يسولفون ..
احمد يكلم حريز : " ها .. شوسويتوا في سباق مرعب ؟؟ .. "
حريز : " اسكت دخيلك .. دراجتيه على آخر السباق اختربت .. "
هزاع : " افاااا .. كيف ؟؟ .."
حريز : " يقولك ياريال .. كنا في الجوله اللي قبل الاخيره .. وكنت متجدم اللي معايه .. وواحد من اللي يسابقوني اتقرب مني ودزني متعمد .. وطحت من فوق العرقوب والدراجه معايه .. والله وانا تعبان قمت من مكاني .. بس للاسف الدراجه اختربت وماطاعت تشتغل .. "
خليفة : " اوووف .. المهم سلامتك ياريال .. "
حريز : " الله يسلمك .. بس والله يلست اشتم هالثور اللي دزني طول الوقت .. "
سيف : " والله من حقك .. عيل توصل الجوله اللي قبل الاخيره وآخر شي ماتقدر تكمل ؟؟ والله لوانا بموت من الغصه .. "
حريز : "يلاّ .. خيرها في غيرها .. "
بطي : " لاحووووول .. انت مااتووب ؟؟ ياخي هد هالسوالف .. والله الدراجات ماوراها غير المشاكل والتكسير .. "
راشد : "حليلها امايه عيزت وهي تقوله .. بس راسه يابس .. "
حريز : " خلاص .. خلاص .. طبوا هالسالفه .. "
راشد : " دومه يتهرب .. كل ماقلناله شي .. قال طبوا السالفه .. "
حريز : " خل عنك اللواته .. ماادري منو اللي 24 ساعه يهزبونه على سواياه ؟؟ .."
راشد : " ليش ؟؟ شوسويت انا ؟؟ .."
حريز : " خلني ساكت ابركلي .. "
احمد : " لالا.. افضحه الحينه .. "
خليفة : " هاااا .. شوالسالفه ؟؟ .."
حريز : " ههههه .. لايروح بالكم بعييييد .. "
راشد : " الله يسامحك ياحريز .. خليت الشباب يشكون فيّه .. "
بطي : " هههههه .. رشووود .. شكلك إلا ورثت عني اللواته ؟؟ .."
حريز : " ههههه .. شكله .. لانه مايفارج الكمبيوتر دقيقه .. "
سيف : " ياريال خبرنا عن سوالفك .."
راشد : " اي سوالف الله يهديكم .. انا حليلي بريء .. "
احمد : " مبيّن ؟؟ .."
هزاع : " هههههه .. بوسنيده .. رحت فيها .. "
راشد : " لاتظلموني .. انا بس اكلم شويّه بنات عالنت واتعرف عليهن .. "
هلكوا الشباب من الضحك .. ههههههه
بطي : " شويّه ؟؟ .."
راشد : " لااا .. طشووونه .. "
سيف : " ههههه .. حليله .. بالحيل بريء .. "
وتموا الشباب يضحكون ويسولفون ..
راشد : " تدرون اني اسير سباق المحامل ؟؟ .."
احمد : " هههه .. زاده اشوفك محترق .. "
راشد : " لاوالله .. جد ارمس .. "
هزاع : " والله كفوا .. "
سيف : " بس كيف تسير ؟؟ .."
راشد : " الله يسلمك انا اتدرب في جميرا .. "
بطي : "خييييبه !! تصك الين جميرا ؟؟ .."
حريز : " والله انه مخبل امايه والسبه هالجميرا .. "
خليفة : " بس كيف تنظم وقتك وانت تسير المدرسه ؟؟ .."
راشد : " بيني وبينك .. انت تدري ان الشباب مايداومون دوام كامل .. يعني مش يومياً اداوم .. واليوم اللي مااداوم فيه .. اسير جميرا.. والعصر يكون التدريب .. "
سيف : " بس لو اشتركت مع المحامل اللي في بوظبي ابركلك ؟؟ .."
راشد : " كل حد يقوللي هالرمسه .. بس انا ظاري على دبي وجميرا .. واحب شوّابها .. وبعدين ارتاح في دبي .."
بطي : " بس محامل بوظبي هي اللي متصدره هالسنه ؟؟ .."
راشد : " هيه .. بس الحمدلله كنا متجدمين . بس على النهايه سبقونا .."
بطي : " يالله بالتوفيق .. "
راشد : " آمييين .. بطوووي .. "
بطي : " عووووونك .. "
راشد : " تدري ان عندنا محمل من المحامل باسم النوخذه بطي المحيربي .. "
بطي : " خل عنك السوالف .. "
راشد : " والله جد .. كل مااشوف المحمل .. اتذكرك.."
بطي متشقق : " منو قدّي .. "
هزاع : "لاحوووول .. اسميك يابوسنيده ييت عالعوق .. تراه بطي يحب الخقه .. وانت خليته الحينه يتشقق .. "
ضحكوا كلهم على رمسه هزاع ..
خليفة : " تعااال بتخبرك .. وشو عن الدرجات ؟؟ .."
راشد : " والله لاتتخبر .. كلها زفته .. "
احمد : " يوم انها زفته .. عيل لاتسير المحامل .. "
راشد : " ياريال ماادر .. احسبها في دمي وعروقي .. "
هزاع : " الله يعينك .. "
وكملوا الشباب سوالفهم .. واترخص عنهم راشد .. لانه كان مدوّخ وحاس بعمره بيزوع .. وطلع برع الميلس ويلس في الحوي شوي ..
ومانتبه ان في وحده يالسه في العريش اللي في البيت بس كان العريش على برد البيت ..
وانتبهت مريامي ان في حد يالس جدام الميالس وكان موخي راسه ..
ومريامي الفضول بيجتلها .. وإلا وتعرف منو هذا ..
واتقربت من الريال ..
ومن تقربت يحرك الريال ورفع راسه .. بس الحمدلله ماشافها ..
فصخ راشد سفرته وفرها حذاله .. وتخلخلت اصابعه شعره .. وكان منزل راسه ... ومسك راشد راسه وتم يكلم عمره ..
مريامي ضربتها الغبنه : " بلاه هذا ؟؟ اكيد راسه يعوره .. "
تنحنحت مريامي واتقربت من راشد ..
عاد انتوا تدرون ان مريامي هب متحجبه لانها مش كبيره .. وكان شعرها الين تحت جتفها وكان نعيم وسايح لدرجه انها ماكانت تقدر تسويبه شي .. وماكان شعرها طويل .. بس كان لونه يجنن لانها ماخذه عن امايتها المرحومه لون شعرها .. واللي هو اللون الكستنائي ..وعمرها ماكانت تلمه .. مع ان ام بطي دومها تهزبها .. وبعدين هي متهوره وفي نفس الوقت شجاعه .. وتحيدون سالفه الولد اللي عظته على اذنه في المدرسه .. المهم .. خلونا نرجع لمريامي وراشد..
مريامي : " احم .. احم ..
راشد انتبه ان في حد حذاله ورفع راسه بصعوبه عشان يشوف منو اللي حذاله ..
تسمر راشد مكانه يوم شاف مريامي .. وقال فخاطره : " ماشاالله عليها هالبنيه .. والله انها غاويه .. الله يحفظها لاهلها .. وشعرها والله انه جنان .. "
مريامي : " مممم .. انت راشد اخو حريز ؟؟ .."
راشد والتعب باين في عينه : " هيه نعم .. انا راشد .. "
مريامي : " السلام عليك .. "
راشد ابتسم : " وعليكم السلام .. وانتي منو ؟؟ .."
مريامي : " انا اخت بطاي .. مريم .. "
راشد : " بس بطي مااحيده عنده خوات غير اليازيه ؟؟ .. "
مريامي : " انا هب خليصته .. "
راشد : " هييييه .. انت بنت المرحومه خالو شاديه ؟؟ .."
مريامي : " هيه صح .. "
راشد : " والله توني اتذكرت .. "
مريامي : " ممم .. سوري لاني اتدخل في كل شي .. بس شوبلاك ؟؟ .."
راشد : " هههه .. لاعادي .. بس ماادري شو صابني ؟؟ احس اني قمت اهاوع وحسيت بدوخه.. "
مريامي هلكت من الضحك : " ههههههه .. مبروووك .. "
راشد مستغرب : " الله يبارك .. بس على شو ؟؟ .."
مريامي تمد ايدها لراشد وتصافحه : " مبروك الشيخ ..انت حامل .. "
راشد رغم تعبه ضحك مع مريامي ونسى همومه ..
مريامي : " هههه .. والله سوووري .. بس ماقدرت امسك عمري .. "
راشد : " ههههه .. لاعادي .."
وشويّه وإلا الدوخه تردله ..
مريامي تروعت وماعرفت شوتسوي ..
مريامي وهي بتموت من الروعه : " راااشد .. رااااااشد .. بلاك ؟؟ .."
راشد وهو هب قادر يتكلم وويهه غادي اصفر وعيونه حمر : " مريامي ماعليج اماره .. ييبيلي ماي بارد وحبتين بندول .. "