|
ابا اعرف كل شي عن تخصص القانون>>بليز ساعدوني ابا اعرف عن تخصص القااااااانوون ابا اعرف كل شي عنه وعقب وين نشتغل وجي يعني امررره ابا اعرف كل شي |
والله أنا ماعندي أي معلومه بس بسأل لج غلاي وإذا لقيت برد عليج واخواني الاعضاء ما بيقصرووو حبي ... |
وووووووووووووين الردود؟؟؟؟؟؟؟؟؟؟؟ معقوله مافيكم حد يدرس قانون؟ |
السلام عليكم ورحمة الله وبركاته بالنسبة لتخصص القانون بعطيج اللي عندي عن هالتخصص لأني طالب في كلية القانون اول شي طبعا تعرفين ان هالتخصص بعد 4 سنين تاخذين شهادة الباكالريوس واذا درستي سنتين فوق الأربع سنين بتحصلين الماجستير وسنتين غيرهم بعد دكتوراة .. شي معروف وما يبت شي يديد انا .. بس اللي اعرفه ان مافي اي جامعة لين الحينة في الامارات تمنح شهادة الدكتوراة في القانون .. لين الماجستير وبس وعندنا دكاترة مواطنين حاصلين على الدكتوراة من جامعات خارجية .. تخصص القانون انا أشوفه وايد حلو لان الانسان يتعرف على أشياء وقوانين ما كان يعرفها قبل وما مرت عليه .. من المواد اللي يدرسونها في كلية القانون : قانون العقوبات والقانون التجاري والقانون المدني وقانون الأحوال الشخصية والقانون البحري وقانون الإجراءات المدنية وقانون الإجراءات الجزائية وقانون المكلية الفكرية وغيره وغيره .. بالنسبة للوظايف اللي ترومين تشتغلينها بعد هالتخصص .. بعد البكالريوس تقدرين تلتحقين لمدة سنتين في معهد قضائي وتتخرجين وكيلة نيابة .. تقدرين بعد البكالريوس تتدربين لمدة سنتين اعتقد في مكتب محاماة عقب تستوين محامية .. طبعا ما يحتاي اقول لج المحامي شو يدخل من ورى القضايا ... تقدرين تشتغلين في شركة مثلا او دائرة حكومية كمحاسبة قانونية .. ترومين تفتحين مكتب استشارات قانونية .. بالنسبة للعسكريين اذا ياخذ الماجستير يوصل لرتبة ضابط .. وايد وايد بتفيدج .. وانا اشوف وايد ماشاء الله من بناتنا يدرسون هالتخصص وبالعكس اشطر من الشباب في هالتخصص .. طبعا مب الكل لكن نسبة كبيرة منهم متفوقات .. انا صراحة اشجعج تدرسين هالاختصاص بس يباله همة وعزيمة والمواد اللي فيه مب صعبة وفي نفس الوقت مب سهلة .. وانا عن نفسي من أحلى المواد اللي درستها من يوم دخلت هالتخصص قانون العقوبات والقانون التجاري لانهم مشوقين الصراحة .. شوية متعثر في القانون المدني لانه فيه صعوبة .. بس ماشي حالي .. بعطيج معلومة .. يوم قلت لج الباكالريوس في 4 سنين مب شرط 4 سنين .. هذا على جهد الطالب تقدرين تاخذين الشهادة في 3 سنين ونص بعد .. وترومين في 5 او 6 سنين بعد.. كله يعتمد على جهد الطالب . . كيف يعني ؟؟ يعني انتي لين ما تاخذين البكالريوس عندج عدد من المواد تقريبا 48 مساق ( مادة ) طبعا مب 48 مادة مختلفات .. هم أجزاء يعني قانون العقوبات 1 .. قانون العقوبات 2 .. قانون العقوبات 3 .. جذه يعني أجزااااء .. شوفي لازم تقسمين 48 مساق على 4 سنين .. شوفي كم بيظهر لج في كل سنة مساق لازم تاخذينهم عشان تخلصين في 4 سنين او 3 سنين ونص .. طبعا السنة تكون سمسترين وصيفي ( السمستر الأول والسمستر الثاني والصيفي ) طبعا اذا بتاخذين صيفي هذا بيساعدج تخلصين بسرعة .. انا عن نفسي آخذ كل سمستر 4 مواد والصيفي مادتين والمفروض اني آخذ في السمستر 5 او 6 مواد عشان اخلص في 4 سنين بس مب قادر لأني اشتغل واذا خذت فوق 4 مواد بيستوي ضغط علي بس ما بخلص في 4 سنين .. أتمنى أني عطيتج ولو فكرة عن هالتخصص واذا تبين تنشدين اكثر واكثر عن هالتخصص انا حاظر .. أخوج تحبني ومعذبني |
مرحبا انا بعد حابه اعرف اكثر عن هالتخصص شكرا |
مشكور اخوويه ماتقصر... بتخبرك انزين الحين لو بس اكتفيت بشهاده البكلريوس وين اقدر اشتغل؟؟ لو فمحكمه شو بتكون شغلتيه وكييف الجو هونييك وكم الراتب :78650: وممكن تقولي كم مساق اخذ لو بغيت اتخرج فـ 3 سنوات ونص |
[align=center] اقتباس:
السلام عليكم والرحمة بالنسبة لسؤالج لو بس اكتفيتي بشهادة البكلريوس وين تقدرين تشتغلين : يا طويلة العمر عقب ما تاخذين الشهادة حسب علمي : 1 - تدورين لج معهد قضائي وتلتحقين فيه تقريبا تقريبا لمدة سنتين وعقبها تتخرجين وكيلة نيابة 2 - تتدربين في مكتب محاماة وتتدربين عندهم لمدة سنتين وعقبها تستوين محامية 3 - تدورين لج شركة او جهة حكومية وتشتغلين كمحاسبة قانونية في شغلة ثانية بعد اللي هي تفتحين مكتب استشارات قانونية بس مادري هل بالباكلريوس ولا اعلى من البكلريوس بالنسبة لسؤالج الثاني لو فمحكمه شو بتكون شغلتيه وكييف الجو هونييك وكم الراتب شوفي بالنسبة لشغلتج في المحكمة على حسب انتي شو تبين تكونين بعد هالشهادة يعني اذا دخلتي معهد قضائي ترومين تتخرجين وكيلة نيابة ولج حصانة طبعا فراح تكون شغلتج في المحكمة وكيلة نيابة ووكيل النيابة شغلة مب بسيطة ترى .. وكيل النيابة شخص له مكانته وهيبته واذا التحقتي لمدة سنتين بمكتب محاماة واستويتي محامية بتكون وظيفتج محامية طبعا انتي عارفة هالشي واذا استويتي محاسبة قانونية طبعا سوالف الشركات والمحاسبة القانونية مب مثل وكيل النيابة او محامي يعني في المحاسبة القانونية اقل علاقة مع المحكمة شوية من وكيل النيابة والمحامي لها الشغلة علاقة بس اقل شوية يعني ما بتروحين كل يوم المحكمة مثل وكيل النيابة والمحامي اما بالنسبة للراتب لا تسألين . . . أنتي شوفي المكانة اللي بتكونين فيها وقدري كم الراتب طبعا راتب كبير كبير بالنسبة للجو هناك بيكون حار صيفا بارد شتاء .. يعني كراااااااااااااااااااااااااااف بالنسبة لسؤالج الثالث كم مساق تاخذين لو بغيتي تخلصين في ثلاث سنين ونص شوفي بالنسبة للمساقات تجمعين عدد المساقات وتقسمينهم على ثلاث سنين ونص بيظهر لج كل كورس كم مساق تاخذين على فكرة يوم بتقسمين لازم تحددين هل انتي بتدرسين صيفي ولا بدون الصيفي يعني اذا مثلا مثلا 35 مساق وانتي مب ناوية تاخذين صيفي بيكون عندج 7 كورسات يعني كل كورس او يسمونه سمستر 5 مساقات لازم تاخذين عشان تخلصين في ثلاث سنين ونص اما اذا كنتي ناوية تاخذين صيفي بيكون عندج 7 سمسترات عادية و 3 سمسترات صيفي في الصيفي ما ترومين تنزلين اكثر من مساقين فأنتي اقسمي مجموع المساقات او المواد على السمسترات العادية والصيفي وشوفي كم بيظهر لج شوفي .. بخبرج عن نفسي انا لين الحينة مخلص 4 سمسترات عادية وسمسترين صيفي وكل سمستر أنزل 4 مساقات بس تقريبا او خلصت نص المواد اللي علي وتقريبا باقيلي 4 سمسترات عادية وسمسترين صيفي أو بالكثير 5 سمسترات عادية يعني انتي اذا حبيتي تدرسين صيفي وتبين تخلصين في ثلاث ونص بيكون لازم تاخذين في كل سمستر عادي تقريبا 5 او 6 مساقات والصيفي طبعا مساقين بس أتمنى أني أفدتج بشي واذا لقيتي في المعلومات التي عطيتج اياها غلط بسيط او شي فالسموحة منج هذا على حسب معلوماتي اللي اعرفها واللي سمعتها من زملائي في الجامعة وبالتوفيق ان شاء الله تحبني ومعذبني[/align] |
ما قصر اخوويه تحبني ومعذبني .. قاال لج كل اللي تبينه .. |
| الساعة الآن 08:50 PM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir