|
[motfrk]السلام عليكم ورحمة الله وبركاته اللهم صل على محمد وعلى آله وصحبه أجمعين[/motfrk] ============================================ شحالكم اخواني و بالأخص خواتي علومكم ان شاء الله بخير ببدا بالموضوع:- هل أنت متزوجه؟ .............دخلت علي المكتب زميلة عمل !!!؟؟؟ كانت مستانسه و مبتسمه! قالت: اخوي الغالي ممكن الموبايل؟ قلت: تفظلي اختي خذيه ( تحريت مشكله مستويه). قالت: كانت ترمس بالموبايل( انت وين؟ ...... يالله بسرعه!.....اترياك باي) من سكرت الابتسامه ردت الها و قال لي مشكور على الموبايل اسمحي خسرتك رصيد. قلت في نفسي:شو السالفه اسالها و لا لا؟ قلت بيمع قوتي و برمس. قلت: اختي ممكن اعرف ترمسين منو و ليش اكيد ريلج صح؟ قالت: وهي تظحك ريلي صح شدراك؟ قلت: ليش اول ما دقيتي له ما سلمتي عليه قلتيله شحالك و علومك و ليش ما رمستيه بلطف. قالت: وهي تظحك انا متعوده ارمسه جذه و هو متعود على جذه ترا اذا دلعته اخاف يلبسني. قلت: انتي شدراج انه بيلبسج؟ منو قال لج جذه؟. قالت: نحن متعودين جذه من زمان ترا امي بعد كانت تسوي جذه عند ابوي. قلت : إنا وجدنا آباءنا على أمة وإنا على آثارهم مقتدون. قالت: تقدر تقول شي من ها القبيل. قلت: يا بنت الناس كل شي تحول من زمان غير عن الحين الريال قبل يطلع الصبح يرد المسا ما تطيح عينه علي اي بنت اما اليوم يشوف البنت حتى وهو في بيته شدراج يمكن في وحده تدلعه برع البيت ينعجب فيها عقب يقارن بينج و بينها ما تخفين تخسرين الرهان و انتي ما عندج ترا اسلوب الدلع و الدليل انج برهنتي عليه قبل شوي يا بنت فلان ترا الريال جنتج و نارج صح و لا لا؟ رديت قلت الها: شو تتوقعين راي ريلج يوم يشوفج داقه عليه هاي الحزه؟ قالت: اكيد بيقول في نفسه انه اتاخر علي. قلت: هل تظنين انه يوم يشوف رقمج عتيلفونه يفرح؟ (تمت البنت ساكته جان تسرح) قلت: اسمحيلي ثجلت عليج بس شو بيكون شعوره و انتي داقه له وهو يتحراج بتدلعيه و تلاطفيه بالرمسه عقب سؤال ودود (شحالك حبيبي او يا عمري) ولا كلمتيه باسلوب لعب (شو حبيبي بيمر علي بياخذني من الدوام؟). قالت: اكيد بيستانس بس شي رياييل يسمون حريمهم بالقاب وصخه بالموبايل مثل (الحكومه-الوزيره-ام الخوص). قلت: لكن شي من الرياييل يكتبون(القلب-ام عيالي-الغلا-حوريه)اي من الفريق تبين تكونين انتي يا بنت العرب و الناس؟ بعد ردت فكرت و سرحت. قالت: انزين هو تاخر علي و انا تعبانه ابا ارد البيت. قلت: انزين هو كم تاخر 5 دقايق و لا 10 و لا ساعه؟ قالت: ما يهمني المهم هو تاخر. قلت: زين الغايب عذره معاه يمكن استوا له شي حصل معاه ظرف ما تقدرين تقولين له(ليش تاخر الغالي عني) ترا التعامل مع الزوج من احسن الفنون وهو مورد اجر كبير في حديث عن الرسول بما معناه ( لو لم يكن هناك رب للعالمين لجعلت المراه تعبد زوجها). قالت: زين لو رمسته جذه شو بيقول؟ اكيد بيشك! بيحس بشي متغير و يمكن ما يعيبه الاسلوب. قلت: بيعيبه و نص انتي لاتبدين مره وحده لانه تعود على اسلوبج الجاف ابدي حبه حبه بتفرحين انتي و هو. قالت: لكن هوه ما يعاملني بهاي الطريقه الي انت تتكلم عنها. قلت: شدراج يمكن مب قادر و السبب انتي و يمكن ما يعرف علميه انتي و ان سمع الكلام الطيب بيرد بمثله. قالت: وهي تظحك الفكره حلوه و كلامك منطقي لكن تنفيذه صعب. قلت: ما دمتي اقتنعتي ما يبالج وايد تدربي شوي بتستوين دكتوره و انا متاكد ان النتيجه بتكون حلوه. قالت: بحاول. قلت: لا تقولين بحاول قولي بنفذ. قالت: شو الفرق يعني بين بحاول و بنفذ؟ قلت: الفرق كبير بحاول تعني ( جنج تشبهين بمحاوله فاشله وعند اول محاوله تخليج تفكرين انج بتخسرين). قالت: وهي مستعيله عيل بنفذ شو تعني؟ قلت: اذا قلتي بنفذ تعني(انج متوكله على الله وعندج العزيمه ومصره على ان الفكره بتنجح). ============================================ *للعلم: هذه قصه من تأليفي أجسد فيها الوقع الي حاصل في مجتمعنا. هذا هو الموضوع كله و ان شا الله فهمتوه و الله يعين كل حرمه على ريلها و يعين كل ريال على حرمته و يوفق جميع المسلمين و المسمات يا رب العالمين ترا الموضوع كتبته على اسلوب قصصي ان شا الله يعيب الجميع و بالاخص البنات و عيال محرووووووووووووووووم و اتريا مناقشاتكم و ردودكم اخوكم شـــــــــــــاحـــــــــــــــــــوف |
وعليكم السلام والرحمه عليه أفضل الصلاة والسلام ><ً! مم غلط اسلوبها المفروض الواحد يسلم قبل كل شي { لا تدخلوا الجنة حتى تؤمنوا، ولا تؤمنوا حتى تحابوا. ألا أدلكم على شيء إذا فعلتموه تحاببتم؟ أفشوا السلام بينكم } [رواه مسلم الكلمه الطيبه والحلوه مطلوبه بس هالكلام الحلو لو بغت تقوله كيف بتقوله في بيئة عمل جدام فلان وعلان؟؟! المفروض تثقل بعيد عن التدليع وغيره وتكون رسميه حشا جيه في ويهه انت وين ؟ يلا بسرعه ؟ مب حلوه جنها ترمس دريول والله من وجهة نظري هالكلام يكون في بيتها عنده بعيد عن الناس وبعدين كيف تقولك والله هو ما يقولي هالكلام ؟!! هاي حياتها بينها وبين ريلها المفروض ما ترمس عن هلاشياء عند اي مخلوق وما يخصه اونه امها كانت تقول جيه لابوها ترى يقولك المثل الشامي ( طب الجرة على تمها بتطلع البنت لامها ) هههه مثل ما قلت كل جييل يختلف عن اللي قبله وبعدين يعني امها كانت جييه ترمس بلا سلام !! ما اظن ؟! اذا ما حد حذالها ممكن بس انت تقول ماخذه موبايلك يعني انت عندها وفي الاساس غلط تاخذ موبايلك ليش المكتب مافيه تلفون ؟!! لو متاخر ريلها عليها ذاك التاخير اللي الواحد يتوشل عليه وما عندها موبايل او ما شي تلفون مكتب + ما عندها زميله تستعير موبايلها ممكن تطلب موبايلك وبعدين فضيييحه تقولها ليش ما تقولين لريلج جيه وجيه ؟؟!! تعرف لو انا في مكانها السموحه يعني ما برضاها لانه هاي خصوصيات ما يحق لاي حد يرمسني فيها ما ادري يمكن في ناس يتقبلون ؟:5: و السموحه هذي وجهة نظري ^_^ يعطيك العافيه عالطرح الطيب وبانتظار كل يديد ومميز من صوبك |
هههههههههههههههههههههههههههههههههههههههههه بنت الافلاج السموحه منج احسج ما فهمتي شي مول بتاتا هاي السالفه مب مستويه لي الله يهديج هاي قصه يعني خيال اجسد فيه الواقع الي عايشينه. انتي كتبتي (((((( المفروض تثقل بعيد عن التدليع وغيره ))))))))) على الاقل تسلم انا ما اقصد تقول حبيبي عمري روحي انتي ما فهمتي الموضوع مول ردي اقريه اخر شي حطيت ملاحظه باللون الاحمر و خليت الخط كبير ولله التوفيق |
اقتباس:
ياخي تستاهل ما يااك يوم انته ما وضحت من البدايه كيف تباني ارد عليك بالله :00: وكله قالت وقلت قالت وقلت يعني انت ما كتبت بانه هالشي من خيالك ؟؟!! كل اللي قلته وبعدني ما فهمت !! ممم اساس الموضوع كله يرمس عن كيف الحرمه ترمس ريلها وانا قلت لك ترمسه باسلوب رسمي جدام الخلق وتصلب عودها ويوم تكون وياه وبعيد عن الناس ترمس بالطريقه اللي تعيبها ولازم الحرمه ترمس ريلها بطيب نفس ولازم تحلي لسانها :66: انزين بنشوف راي البقيه وبشوفهم كيف فهمو الموضوع يمكن انا مشلقه والا محوله لاني مواصله هع ولي عوده عقب ما اصحصح لوول |
الحين بقول لج شكرا على مرووووووووووووووورج يا مشرفتنا |
السلام عليكم الصراحة بعدني ماعرست!! بس تكلم عن ربيعيتي خذت واحد جاف لابعد الحدود يمكن باليوم يقول 10 كلمات وكانت تتحدانا انها بتغيره وفعلا عقب العرس تغير 360 درجة وصار ما شاء الله عليه ما يسكت... ثانكس على الموضوع الرائع أختكم/ اللؤلؤة |
احم احم مرحب وعليكم السلام والرحمه اخوي انا جذبني العنوان وعيبني الموضوع صراحه اشكر فنك عالموضوع الغاوي وبقول رايي مع اني مب معرسه لوول بس من التجارب ^_^ ايوا هالشي حاصل وايد تبى الصدق نحن من كمن يوم كنا نرمس فهالموضوع اونه امي تعطي خواتي اللي بيعرسن جريب مواعظ تقوللها لازم تقوليله حبيبي وين انته ومادري شو عسب ما يطالع وحده غيرج انا الصراحه نقعت من الضحك ^_^ قلت لها امي عيل انتي ما تقولين حق ابوي حليله يعني يوم تردين عليه تقوليله وين انته ؟ ليش ما تقوليله حبيبي شخبارك علومك عقب وين انت قالت انا يوم اتصل يقولي هاه خير شو مستوي قلت لها كله بسبتج يعرف انج ما تتصلين الا يوم شي مستوي ولا يوم تبين شي لوول قالت نزين واتصلت حق ابوي جدامنا وقالت له هلا حبيبي شخبارك علومك انته وين شاحوفوه تعرف انه ابوي تشقق حلجه لوول ويلس يرمسها ساعه كامله اول مره تستوي لوول كلام الحب يسوي فعايله فالريال وحتى فالحرمه لوول وااذا مابدى الريال خل الحرمه تبدى ^_^ وهذا رايي والسموحه تفلسفت وايد لوول |
عليك السلام ورحمة الله وبركاتهـ تسلم يمناك ع الطرح المميز موضوعك واقعي والحوار الي كتبته والرمسه الي تقولها البنت قاعده يمشون عليها بعض البنات ربي يهديهم . انا عن نفسي لي اسلوب خاص جداً يوم ارمس زوجي من ايام الخطوبهـ ولليوم الحمد الله الي احسـهـ ان اي خلاف ومهما كان ينحل لو كان الكلام بهدوء ورويهـ ... مابقولك اني اتبعت هلأسلوب من نفسي لاني مثل اي بنت ماعندي خلفيهـ لو عرست شو بسوي او كيف برمس بس يوم انخطبت تم يدي وامايهـ يعطوني نصايح وكيف البنت ترمس ريلها وبلأخص اذا كان معصب وهالشي وايد نفعني .. يعطيك الف عافية يالشيخ وعساك ع القوة تقبل مروري ولك التحيه والشكر |
اقتباس:
ها البسج احينه:78650: ولا ارد :66: ههههههههههههه اسولف مشكور عردج الغاوي حبوبه اخوج شاحووووفوووووووووه عقولة راعية الكلوزر:7799: |
اقتباس:
|
اقتباس:
|
اصلن الغلط من الريال الي كله يطوف المفروض يوم الحرمه جي ترمسه يوقفها عند حدها عسب ما تتمادا تظل وجهة نظر مشكوووووووووووووووووور اخوي الشاحوف ع الموضوع الغاوي ^^ |
اقتباس:
شكرا على المرور اختي الفاظله :3: |
وعليكم السلام ورحمة الله وبركاته أهلين اخوي بصراحه خيالك واسع ومبدع في تاليف القصص والحوارات المهم تعليقي على هالموضوع "" صح كلامك أخوي لازم تبدا بالسلام ولازم اترمسه باسلوب حلو مب بهالاسلوب فمهما كان الريال مثل الياهل يحب الاهتمام والتدليع بس اتخيل نفسي مكانها مابقوله حبيبي ولا غناتي ولا عمريه ولا اي شي من كلام الحب لانه هالشي بخليه مابينا واذا كنت ويا ربيعاتي مب فالشغل او جدام رياييل بس اهم شي ابدا بالسلام .... صح انها فالحوار الي قريته ماقالت له حبيبي والخ والخ .... بس اقول مب حلوه اتقول حبيبي جدام الريال الي ماخذه منه الفون ... "" فهمت عليه ومشكور مره ثانيه اخويه الشاحوف |
اقتباس:
|
اقتباس:
بسم الله @.@ @.@ احم احم أختك مح مح ^____________^ مسموح لانه نكي مايبين اذا بنت ولا ولد وأصلن انته ماقريت الي كتبته لاني كاتبه في الرد والتدليع بس اتخيل نفسي مكانها مابقوله حبيبي ولا غناتي ولا عمريه |
ههههههههههههههه ماشالله عليـــك مؤلف من الدرجــه الاولـــى وانــآآ قولـــ <----ماشالله عليه الله يحفظــه قــآآعد ينصحهـآآ <--تخرط علينــآآآ هههههههه امزح طبعــآآآآ شــوف انــآآ لو مكــآآن هالبنـــيه بالاولـــ اكيــد مابيكــون اسلوبــي جــآآف ويـآآآهـ <--الذوق العــآآم يقول هكزآآآ بــس لو مصخــهــآآآ وطولــهــآآآ <---ياسلاام بيخــلص الدلـــع وبنعـــطيه مشــرآآآع وميـــدآآآفـــ لانـــه لازم يحــترم مكالمتيه الاولـــى <--ويخبرنيـــه انـــه ممكــــن يتــآآخر <--افهمي يابنت النـآآآس عسبـــ ماتعصبيـــن هــــذآآآ اللي عنــديه مشكـــور عالموضــوع الرووعـــه من صوبــك تحيـــآآآتي |
وعليكم السلام ورحمة الله وبركاتة فالبداية وقبل كل شئ الرسول عليه الصلاة والسلام اوصانا بإفشاء السلام لينشرح قلب الطرفيـــن ولـ اضعاف الحسنات .. فقد روى البخاري عن أنس قال: قال رسول اللَّه صلى الله عليه وسلم : "إن السلام اسم من أسماء الله تعالى، وضعه في الأرض، فأفشوا السلام بينكم". بالإضافة الى ان "الكلمة الطيبة لها وزنها" وعيارها الثقيل تجاه الآخريين .. اما من خلال مهاتفتها لزوجها ( انت وين؟ ...... يالله بسرعه!.....اترياك باي) اعتقدت انها تتحدث الى سائق باص او سيارة اجــرة !! ، حتى الغريب يجب ان تفشي اليه السلام (وهذه نصيحة لكلا الجنسين طبعاً) واتمنى لكل امرأه ان تحترم وتصون زوجها سواء في حضورة او في غيابة .. وتحية لك اخونا شاحوف على موضوعك الطيب اللي يستاهل التقييم .. ونتريا منك المزيد اخوك / [mark=ffff99]النعيمي[/mark] |
مح مح قريت ردج والله في ذمت اهليه بس ما انتبهت حق هاي كنت مستعيل ساير دبي باخذ سياره دمعة الشوق انتي الخريطه مب ان هههههههههههههههههه انا بعد اسولف مشرفنا الغالي النعيمي شكرا عمرورك السخي لموضوعي و سلمت الغالي |
السلام عليكم ورحمة الله وبركاته مرحبااا الساااااع الله الله على ياشاحوووف ... ابدعت ... علوم علوم محلااااتني اكلم ريلي عيل خلني ما ادق عليه احسن ... ما اتخيل في حريم جيه بس فالواقع فيه ووايد بعد ... بس هالشي مب حلوه لا في حقها ولا في حق ريلها ... حتى ولو كان هو جاف باسلوبه بتقدر تغيره ... لان هالشي ما بيكون في صالحها بالعكس بيكون ضدها ... على الاقل بقول السلام عليك شحالك ... مب لازم حبيبي وعمري وقلبي ... والله حاله ...! اسميك ما جذبت يوم قلت هالرمسه ... وترا الريال ما يلينه غير الرمسه الحلوه لو كان حجر بيصير لك ماي من كثر ما لان ... وربي يهديهن ... الله يعطيــــك العافيه ... تسـلم على الموضوع الرووووعه ... لاهنت ...~ |
اقتباس:
ههههههههههههه شكرا اختي على المرور |
هههههههههههههههههههههههههههههههههههههههاي هيه والله ليش كلهن دفااااااشه يوم يرمسن ويا ريايلهن ((حليييلهم والله)) جنها تتظارب و المعروف ايام الملجه ولا الخطوبه ياااااالله ما تسمع لها حس يوم ترمسه هههههههههه تسلم شاحوف ع الموضوع الراااااائع |
شاحوف ما شاء الله خيالك واسع .. ان شاء الله باجر انشوفك كاتب مسلسل... انا بالنسبة لي نااااااااااااادر ماشوف ريال يدلع زوجته خاصة لو كان وياه ربعـه .. اونه يسوي عمره قووو ويرد عليها من ورا خاطره .. البنات وحليلهن دومهن طيبوبات ويرمسن بذوووق .. ويحبن يدلعن رياييلهن .. تسلم شاحوف ع الطرح |
اقتباس:
|
اقتباس:
لا ما روم اسوي قصه اخاف استوي مدير هوليووود مشكوره اختي عمرورج |
وعليكم السلام والرحمه والبركه عليهم افضل الصلاوات ،، الصراحه اول شئ قلت ف خاطري ماشاء الله عليك وعليها ،، اممم الحوار شوي قوي انك تقولها مثلا دلعيه كنت اتخيل الموقف انه صدق ،، :0022: المهمـ ،، له له له ،، شوف ف يمكن اسوي شراتها مدام شخص غريب واقف جدامي هههـ وانا اكلمه واقولها مثلا هاا حبيبي وينك تاخرت عليه ،،، الخ ولا انيه بكون جافه يعني ما اسلم عليه ،، اما ف الكلام الطيب ،، احس احلى شئ اذا كان بين الزوجين ف ربيعتيه الله يستر عليها ،، ريلها من النوع الجاف ف الكلام المهم تحس الكلمه الحلوه بالموت يطلعها هههـ تقدر تقول خلته ما يناديها الا بكلمه حلوه ولا ما بترد عليه اذا قالها ,,,,,,,,,,,,,,, الخ بس نفسيا تعبت ،، لانها بعدها تحس الكلام اللي يقوله مثل الدرس اللي حافظنه ويعيدها حقها دومـ لدرجه يلست تقولي كلمه كلمه ،، :54: مثل ما تاخذ هي تعطي ،، يعني اغلب حواء ما تعطي شئ من عندها الا اذا ادم سبق وعطاها من حيث الجراءه انا اتكلمـ ،، يعني مستحيل حواء اول الفترات تتغزل ف ادم وادم ساكت ويسمع اظن العكس لازم بدايه تحفيز ،، يعني بالمختصر لا تحطه كل الخطاء ع حواء ،، ادم له نصيب وبراي هو اللي لازم يبدا عشان حواء تكمل وباهـ ،، وهي قالت ف الحوار انه هو اسلوبه جيه ،، يعني هي خذت من اسلوبه اعرف بتقول لازم هي تغير ،، بس احيانا ادم هو اللي يغير حواء والعكس صحيح بس مب دوم حواء تقدر تغير ادم اختلاف الراي لا يفسد من القضيه ،، |
وعلـيكم السلام و رحمة الله وبركــــاته ....... أبا بعد مب معرسة شرات الربع فالسمووووووحة ما عرف وايد ف هالسوالف ........ تسلم أخوي شاحوف ع الموضوع الرائع .......... أختــكــــــــ فـــــــي الله .... بسمة حزن |
واللهـ هب متزوجه ومآ آعرف هههههه كان خاطري والله ارد يعطيك العاااافيه على الموضوووع ونتريا يديدك .. |
اقتباس:
ام منصور اشوفج منوره مواضيعي ما تقصرين والله لكن اذا الريال ما بدا مرات لازم تبدا و العكس صحيح و السموحه |
اقتباس:
هلا والله بنت اماراتي ما قصرتي و ان شا الله تتزوجين ونشوف عيالج و نشوف مشاركاتج في باقي مواضيعي |
اقتباس:
|
وعليكم السلام و رحمه الله و بركاته عليه الصلاة و السلام : موضوع رائع و مهم و يستحق النقاش : في البدايه من حق الزوج على زوجته أن تهتم فيه و في شؤونه أن تحبه و تداريه..و تغار عليه من حق الزوج أن تقدر زوجته ظروفه و تساعده إذا وقع في مشكلة من حق الزوجه أن تحصل على الحب و الحنان حتى لا تبحث عن ذلك في مكان آخر من حقها أن تحصل على الاهتمام و اذا ضاقت تلقى الصدر الوسيع تشكي له همها و هو يهديها من حقها تلقى من يداريها و يخاف عليها : لكل مرأة أسلوبها الخاص ويا زوجها و بصراحه لازم يشعر الزوج بالحب و الاهتمام من زوجته ولا ببساطه ممكن يدور عنه في مكان ثاني لذا يا المقبلات على الزواج و يا المتزوجات حافظوا على أزواجكم !! : تحياتي و السموحه على الإطاله |
السلام عليكم شاااااااااااااااحووووووووووووووف ما عرفنالك تاجر + مؤلف + مناقش ممتاز= شاحوووف يعطيك الف عااافيه على تواجدك الممز والقوي باستراحة الحوار والنقاااش..... بالرمس عن فئة محدده وليست الكل....الحرمة الله يهديها يوم ترمس ريلها جنها واحد غريب...وإلا دريول.....يا بنت الناس هذا ريلج...ما يمنع انج نتادينه بأي لفظ......لانه ريلج...وانتي يوم ما بدلعين ريلج ابو عيالج...منوه بدلعين.... واصلاً هي بهالشيء تحترمة......وعليها انها تستخدم الكلمة الطيبه مه زوجها...لانه الكلمة الطيبه لها آثرها القوي على النفس.... يالحرمة....حببي ريلج فيج...بأحترامج...وبأسلوبج الطيب ويااه شاااحوف تقبل مروري من صفحاااتك |
اقتباس:
|
اقتباس:
يا وزيرتنا ما عرفت يوم قريت ردج شو اسوي استغربت مدحتيني وايد كلامج عسل على عسل و ان شا الله ما اخيب ظنكم فيني |
يسلموووو خيووو ع الموضوع الناااايس و انا اشوف انه اذا الحرمة صدق اتحب ريلها و مهتمه فيه و ماتباه يطالع بنات غيرها هيه ف اكيد هيه بتعرف ترضيه عدل و ادلعه احسن عن تدليع نور ل مهند و انا الصراااحه مابخلي ريلي يضيع من بين يديديه اذا السالفه جيه و بعرفه ادلعه عدل.....هع هع هع بيشوف الافلام و المسلسلات ويايه,,,,:3::3: ثانكس,,,بااااي |
\\ // تسلمين الغلا ع الطرح الغاوي عيبني الموضوع جان تبي الصراحه ^ ^>> القصه عيبتني اكثر :78650: غناتي الشاحوف ،، اعتقد ان الحرمه و الريال يتشاركون في العلاقة الزوجيه بكل شي ،، و الأخطاء و المشاكل الي تشب من بينهم مستحيل يكون واحد منهم الي افتعلها .. و الله انهم اثنيناتهم.. يعني .. من قصتك.. يفترض من الحرمه في المقام الأول انه اتسلم .. وما اظن بتخسر شي ؟!! وما في ريال يندخل عليه عرض بالرمسه؟؟!،، من بونه الريال يباله مسايس ،، وبطبيعة الحال يحق له انه حرمته ادلعه و اتلبي رغباته،، والنتيجه بتكون في صالح الحرمه ما بيقصر عليها بشي والأهم .. الألفاظ و الكلام و الأسلوب الي تتبعه الحرمه مع ريلها واااااايد مهمين.. لازم تنتبه ازين ما ززين .. حتى لو صرخ فيها او قفطها مره مرتين ..بعدين اروحه بيستحي من عمره و بيعاملها مثل ما تعامله.. هب حلوه اتصل بريلي وانزل على حظة صداع و تأمر و غيره؟! يعني الريال يباله شويه دلع و كلام حلو حتى انه ما يدور على هذا الشي من برع.. ما بيستوي عليها حال لو قالت له كلمه غاويه ..!! هذا اليوم ريلي باجر ابو عيالي .. انا لا افكر باليوم .. افكر في باجر .. جم المده الي بتم على ذمته اذا كنت انا ملعوزتنه بحياته و ما اعطيه ريج حلو او حتى ادلعه؟! ولا ننسى المكان.. المكااان وااايد مهم .. بالذات في اماكن الشغل و جدام الأهل في البيت و جدام صديقاتي و غيرهم.. يعني في الشغل ممكن ما اقول له " حبيبي و عمري و غيرها " بس اقدر على الأقل اسأله عن اخباره ؟ متظايج والا لا؟ في اطره شي ؟ يعني من هذا القبيل ^ ^ والأهل و الأصدقاء مهمين.. لأن تصرفنا جدامهم ..يترك انطباعين .. انطباعهم عني كـ زوجه!! و انطباعهم عنه كـ زوج؟! مهم واايد ان علاقتي و مشاكلي بزوجي تكون من بينا .. اقصاه لا صار شي ادخل حد من طرفي كـ وسيط لحل المشكلة .. هب ايمع الجبيله كلها ؟!! والله عني هب متزوجه .. بس من الحين ما يهون علي ريلي اغربله !! يعطيك العافيه الشاحوف . شكلك متلعوز ويا الحريم :78650: والسموحه ..مجرد راي :ast7eee: تحياتي // \\ |
~ْ مبآرڪ عليْْڪم آلشھٌر ْْ~ تسلم شآحـوـوف ع المـوـوضوع --{لـو حد عرف بموضوعك من اللي يعانون بيحبـوـون رآسك ^^ الفئه اللي تقصدهآ --{ من المتزوجآت اللي يعاملن ريآيلهن بجفآف آو بشكل رسمي هذيلآ مب ناجحات في حيآتهن وهذآ سبب يكفي انه الريآل يشوف غيرها ., او يطلع للبنت اللي ممكن تقدره وتحبه وتعطيه من الكلام الطيب ., هالفئه من الحريم ., بتلاقيهن عآنن في حيآتهن من قسـوة اهل ".. هذا سبب من الاسبآب.." آو هي طبعها مثل ماتقـولـ ".. خشن ومالها للحنيه ., بس خلك من الحرمه اللي جيه .!ّ ليش الحرمه ماتلاقي كلام طيب من ريلهآ ".. بعضهم ماله في سوالف الحب والكلام العدل والرومنس .." هيه تستقبله بشوق وكلام ويمكن اخرتها يقولها ".. مب متفيق فارجي وآآيد تصيـرـر ., بس لـوـو كل وآحد منهم يطلع بأسلوبه ويتحدون بعض منو الاحسن فالدلع والسوالف هاي بتنجح حيآتهم ., وكل منهم بيحب ال2 وبيعيشون شرآت "". مهند ونـوـر :78650: ."" آرجع آقولك تسلم ع الموضوع وان شاء الله ردي يكـوـون خفيف وماثقلت عليك _^ السموحه ~ْآللھٌ يْْتِِقبل ڝيْْآمڪم ۈقيْْآمڪم ْْ~ |
اقتباس:
مشكوره اختي علر ردج الولع و السموحه |
اقتباس:
لا افا عليج والله ما قلتي الى الصح و شكرا عمرورج |
| الساعة الآن 03:09 AM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir