مجبور أنسى !
 

البارت الاول

جود . . اسم بطلة قصتنا . . عمرها 18 سنة . . عانت الكثيييير الكثييير من الهموم و الاحزان برغم صغر سنها . . قبل فترة مب بسيطه توفوا اهلها كلهم بحادث سيارة . . و ما كان عندها حد غير عمها الظالم المتغطرس . . خذ عنها كل ورثها و عيشها في ذل و ظلم . . و حرمه عمها مب أحسن عنه . . بالعكس هي اللي تجرجه على بنت أخوه . . لأنها ما اتييب عيال . . فـ كرهت وجود أي شخص في بيتها غير زوجها . . طبعا السبب غير مقنع . . بس هذا تفكير ضعاف العقوول . .


جود كانت يالسة في الغرفة المظلمة الموجوده حذال المطبخ الخارجي . . كانت الساعه 1 فليل . . المكان جدا مظلم . . ماشي الا نور بسيييط يدخل من فتحات صغيرة متكونة في الشبّاك الخشبي . . كانت منسدحه و النوم مجافنها . . تفكر في أهلها اللي راحوا عنها في لحظة . . تمنت مليون مرة ان الموت خذاها وياهم و ما تركها تعيش الذل اللي عايشتنه الحين . . بس هاذي حكمة الرب . . حمدت الله على كل حال . .
شوي و تسمع حد يزقرها : جوووود . . جود و صصصمخ ان شا الله !
يلست جود ع السرير بعد ما كانت منسدحه . . و حست بألم بسيط في ظهرها بسبب السرير الـ غير مريح . .
جود ترمس عمرها : اوفففف شو الحاله . . لا سرير شرات الناس و لا راحه و لا شياته . . شو اللي مكلف علي أيلس عندهم هني مادري . . "علّت صوتها" نععععععععععم خالوه !
منيرة : تخلخلت عظامج . . تعالي يللا . .
فجت جود الباب و ظهرت لخالتها [ اللي هي حرمه عمها ] : آمري خالتي !
منيرة حاطه ايدها على خصرها : شعنه ما نظفتي الحمام مال غرفة الضيوف ؟
جود : بس خالوه ....
قاطعتها منيرة : لا تقولين خالوه . . ما أتشرف أكون خاله لأشكالج . .
جود نزلت راسها بضعف و شبكت ايدينها في بعض : ان شا الله ..
منيرة بعصبية : يللا سيري نظفييييه . .
جود رفعت راسها : بس هالغرفة محد يدخلها . .
منيرة : منوو راعية البيت هني ؟ انا و لا انتي ؟ هااااااااه . .
جود سكتت . .
منيرة تكمل كلامها : انا راعية البيت . . و أنا اللي ع كيفي هني . . و انتي حالج حال أي بشكارة ياية تشتغل هني ..
جود انجرحت من كلامها وايد .. بس سكتت . . لآنها تدري اذا ردت مصيرها بيكون عقاب من عمها . .
لفّت جود رايحة لغرفتها . .
منيرة بعصبية : هيييييييه هييييه انتي ! وين رايحة ؟ أنا ششو قلت ؟
جود بانكسار : بروح اييب البروش و باقي الاغراض !
منيرة : هيه أتحرى بعد .. يللا ذلفي من ويهي . .

++++++++++

في بيت ثاني ..
رجع ذياب من عند ربعه فليل . . دخل البيت و لقاه هادي . . راح صوب المطبخ يوعان يبا ياكل شي . .
ما لقى شي مسواي ! . . فـ خذ له تفاحه و كلها . .
شاف الساعه . . 1 و نص تقريبا . . راح صوب غرفة عياله [ مهير و مهره ] لقاهم كل واحد في سريره ..
و لقى البشكارة يالسة على كرسي بين السريرين و ماسكتنهن .. و راقده . . شكلها كانت تهزهم و يوم رقدوا هي بعد رقدت بدون ما تحس !
ذياب هز راسه بأسف على هالحال ..
راح غرفته يشوف وديمة حرمته . . و لقى الغرفة معفوسة فووق تحت . . المكياج مفرور ع التسريحة . . و الاكسسوارات مطلعات من البوكس . . و نص الملابس مطلعات من الكبت . .
ضرب ع ويهه من الصدمه [ شووو هالحاله يا رب . . انا ماخذ حرمه تهتم في بيتها و عيالها . . و هي مادري بها وين مرتغده ]
شوي و سمع دقات الكعب على السراميك . . لف ويهه و شافها ياية . . لابسة بنطلون جنز . . و كعب شو طوووووله .. و عباه مفتوحة . . و الكم وسيع يعني لو ترفع ايدها بتنزل العباة لين كتفها و ايدها كلها بتطلع . . مسوية باف كبير . . و لافه الشيلة و مطلعه قصتها . . حاطه من المكياج أشكال و ألوان . . و ماسكها موبايلها و حاطه السماعه في أذنها . . و تتعلج . .
شافها ذياب و قال : ما تقولي لي وين كنتي ؟
رفعت واحد من حياتها : يعني وين بكون ؟
ذياب مسكها من ذراعها : شوفي . . ثاني مرة اذا رحتي بيت أهلج بدون عيالج لا ترجعين .. مفهوم ؟
فجت ايده : اوفف اوففففففف . . اوكي خلاص فهمنا . .
و دخلت الغرفة عنه . .

+++++++++

في عمارة من العمارات القديمة . . اللي شكلها تمت أعوام و أعوام . . باين عليها انها ما تتحمل أكثر عن جي . . يبالها صيانه من أول و يديد .. و بالتحديد في غرفة من غرف هالعمارة القديمه . .
كانوا موجودين بـ ثلاثتهم . . [ سامي . . ميرة . . و ولدهم محمد ] .. كان البرد قارص . . اللحاف اللي عندهم واحد و ما يكفيهم . . محمد الصغير ميت من البرد . .
ميرة : شو بدنا نعمل هلأ ؟
سامي : ضروري أشوف لي شغل أمشي فيه حالي . .
ميرة : طيب وين بتلآقي الشغل . . احنا بلا أوراء "اوراق" ثبوتية . .
سامي : افف افففففففف . . ما بدي أتذكر هذاك اليوم !
ميرة : أي يوم بتأصد ؟
سامي : لما احترأ البيت و راحت كل اوراءنا و أغراضنا . . و صورنا الئديمة كمان . .
تنهدت ميرة : آآآآآآه . . يمكن بتكون خيرة من الله . .
سامي : و النعم بالله . . و النعم بالله . . اممم .. من بكرة ان شاء الله راح أدوّر علي شغل . .
ميرة : توكل على الله و راح تلائييه [ تلاقيه ]

++++++++++

في اليوم الثاني . . الساعه 7 الصبح . . سمعت جود حد يدق الباب . . و شوي انفج بقو . .
جود فزت من رقادها زايغة : خير عمي في شي ؟
صالح : اي خيييير هاه ؟ خبريني أي خير !
جود خايفة : ع . . عم .. . عمي شو صاير ؟
صالح معصب : يعني تعرفيني أدوام من الساعه 7 و نص .. ريوقي وينه ؟
جود : بس خالتي هي اللي تسوي لك الريوق كل يوم !
صالح بعصبية اكثر : لا والله ! امس عقيتها من الدري و طاحت و انكسرت ريلها . . و بعد تبينها تقوم و تسوي لي ريوق ؟ يللا ذلفي بسرعه ع المطبخ قبل ما أتأخر على الدوام !
انصدمت جود من رمسه عمها . . بس خلاص تعودت ان خالتها تجذب على عمها عشان هي تاكل الضرب و المهازب . . و مع هذا قامت و غسلت ويهها و راحت صوب المطبخ !
سوت له قرص بيض . . و سندويج جبن بالزيتون . . و حطتهن له ع الطاولة . . و راحت اتييب له عصير برتقال !
صالح و هو ياكل بسرعه : خلصي شغل البيت بسرعه . . و خلاف روحي عند أم عامر . . ما عندها بشكارة و متصله بخالتج أمس . . و خلصي شغلها و خلاف رجعي هني !
جود حاست بوزها و قالت : بس أنا مب بشكاره !
طلعن شياطين صالح : نععععععععععععععم ؟ عيل شو انتي هاه ؟ ما تفهميني شو موقعج من الاعراب ؟
جود بجرأه : أنا بنت اخوك . . اخوك علي ؟ تتذكره أكيد . . و لا أووووه نسيت . . حرمتك كل يوم تسوي لك غسيل مخ و انت كل يوم تنسى حد من أهلك . .
قام صالح بعصبيه و فر كوب العصير اللي طاح و انكسر . . تقرب منها بعصبية أكثر . .
صالح : انتي تعرفين منو يالسة تكلمين ؟
فجت جود عينها . . و قالت : هيه أعرف . . تونا رمسنا بنفس الموضوع . . ما يحتاي نرد نعيده !
صالح معصب و يرمس من بين أسنانه : جووود . . احترمي نفسج و لا تطولين لسانج علي . . و لا تراج بتشوفين شي ما شفتيه في حياتج !
جود : خير ان شاء الله ؟ شو الشي اللي ما شفته في حياتي . . الهزاب و انهزبت . . و الضرب و كليته . . و شغل البيت شالتنه ع راسي . . و اهلي توفوا ما بقى حد منهم غيرك انته و العله اللي تلعب براسك . . شو بقى بعـ . .
ما كلمت كلامها الا و صالح زاخنها من شعرها و يضربها ضضضضرب . . ما ارتاح الا يوم شافها تحت و تنافخ من التعب . .
صالح : عقاب لج تقعدين عند أم عامر لين ما اتييب بشكاره . . هناك بتعرفين شو الشي اللي ما شفتيه في حياتج !

طلع صالح الدوام و هي على هالحال . . تمت تصيييح بمكانها . . "تعبت يااا ربي تعبت . . العيشه في بيت عمي أبدا ما تنطاق . . يا رب متى بتاخذ روحي و بتريحيني من هالمجرمين اللي عايشة عندهم"
دخلت منيرة عندها : هاااااااه . . اشوفج طايحة . . شو مستوي !
رفعت جود راسها و شافت منيرة لافه ريلها و تلعب بالعكاز . .
جود : انتي حاقده . . انتي أنانية . . انا اكرررررررررررهج . . و قسسسم بالله اكررررهج . .
ضحكت منيرة بسخرية : هاااا هااااا هاااااا هااا . . بعدج ما شتفي مني شي . . أنا الحين بس يالسة أسخن !
جود قامت بصعوبة عقب الضرب . . و راحت غرفتها تتسبح و تبدل ثيابها . . و جهزت لها ثياب . . عشان تروح عند ام عامر . .

+++++++++++++

عند ذياب . . أول ما نش من رقاده . . شاف حرمته وديمه راقده بثياب أمس اللي راده فيهن . . تأفف في خاطره مليون مرة . . و ندم ع اليوم اللي فكّر يعرس فيه . .
قام غسل ويهه و جي و خلاف راح يوعيها : ودييمه . . ودييييييييييمه . .
وديمه : ممممممممم !
ذياب : قومي يللا . . ابا ريوق قبل ما أداوم !
وديمه : اوففف . . ذياااب قول حق البشكارة تسوي لك . .
ذياب : مادري انا ماخذنج و لا ماخذ البشكارة . .
و طلع عنها رايح الدوام بدون ما يتريق و لا شي !

راح صالح الشركة . . و هو متضيج من الخاطر من بنت أخوه جود "يعلك في جهنم يا علي . . رحت و خليت هالعله ع راسي . . انا شو كالفني اخليها عندي و اصرف عليها . . اوففف "
وصل الشركة و على طول راح صوب المكتب . . في دربه جابل السكرتير و سلم عليه من ورا خاطره و دخل . .
السكرتير " في حياتي ما شفته يبتسم شرى الخلق و الناس . . شو مشكلته في الحياه هذا ! "

++++++++++

طق طق طق . .
.... : من ؟
..... : أنا جود . .
أم عامر : ايوووا جود "فجت الباب" تفضلي تفضلي . .
دخلت جود و هي توزع نظراتها في أنحاء البيت اللي قليل في حقه كلمه "وصخ" . .
أم عامر تكمل رمستها : زيييين انج يتي في هالوقت . . عندنا غسيل و كوي . . و المطبخ يباله تنظيف . . و تغسيل الوعيان . . وعيان أمس اللي تغدينا فيهن و اللي تعشينا فيهن بعد . . مب مغسلات ! و شو بعد . .
انصصدمت جود من الكم الهااائل من الشغل اللي ياينها . .
جود : اممم . . خالوه . . ابدي معاي بالترتيب عشان ما أنسى شي . . شو تبيني أسوي الحين ؟
ام عامر : ههه اوكي هه . . شسمه . . اول شي غسلي الملابس . .
جود : على أمرج خالوه . .
و راحت صوب الملابس عشان تغسل . . اول ما شافتهن زخت راسها " يالله . . انا شو بسوي هني . . اففف مب حاله هاي . . ما صدقت على الله اني طلعت من بيت عمي . . هالبيت أخس و أدمر . . الحين عرفت شو قصده عمي بالشي اللي ما شفته في حياتي . . أأأأأأأأأأأاه . . يالله ما عليه . . مع الوقت بتعود . . كل شي بالصبر يكون سهل و حلو . . و نقول بسسم الله "
و بدت جود تغسل الملابس . .

+++++++++

ذياب . . طلع من البيت مب متريق . . يفكر في هالبلوى اللي طاحت ع راسه . . وديمة و وديمة و وديمة . . هاملة بيتها و ريلها و عيالها . . مب مهتمة في حد غير نفسها . . مب عارف كيف يتصرف وياها . . صبر مرة و مرتين و ثلاث و الحين نفد الصبر منه . . لازم يتصرف و يوقفها عند حدها . .
وصل الشركة اللي هو ماسكنها [ مب شركة صالح ] . . و بالرغم من الهم اللي في قلبه إلا انه ابتسم أول ما دخل و سلم على الخلق اللي يجابلهم . . لين ما وصل عند السكرتير . .
ذياب مد ايده : السلام عليك فيصل . . شحالك ؟
فيصل : بخير ربي يسلمك . . من صوبك الشيخ ؟
ذياب : بخير و سسهاله . . هاه شو أخر الاخبار ؟
فيصل : والله ماشي اخبار . . ما غير هالرسايل اللي واصلتنك ع البريد . .
ذياب : اممم . . ما عليه فيصل . . عقب الفطور هاتلي اياهن . . و اذا ما عليك أمر خبّر بابو اييب لي ريوق . .
فيصل : على امرك ..
و دخل ذياب و هو ناسي هم البيت و سوالفه . . عنده وقت الشغل شغل . . من يدخل الشركة ما يفكر بفلان و علان . . تركيزه يكون كله في الشركة و بس . .

++++++++

نروح صوب أهل العمارة الكحيانة . . صوب الاسرة الفقيرة و المتواضعه . .
ميرة : لوين رايح ؟
سامي : ما أنا قلت لك البارح اني راح أدوّر لي على شغل . .
ميرة : طيب طيب . . بتتأخر ؟
سامي : لأ إن شاء الله . . كلها ساعة و أنا راجع . .
ميرة : بحفظ الله . . و الله يعطيك على أد نيتك . .

++++++++

نروح صوب أهل العمارة الكحيانة . . صوب الاسرة الفقيرة و المتواضعه . .
ميرة : لوين رايح ؟
سامي : ما أنا قلت لك البارح اني راح أدوّر لي على شغل . .
ميرة : طيب طيب . . بتتأخر ؟
سامي : لأ إن شاء الله . . كلها ساعة و أنا راجع . .
ميرة : بحفظ الله . . و الله يعطيك على أد نيتك . .
و طلع عنها سامي . . رايح صوب الشركة اللي قرا عنها في الجريدة . . يعلنون انهم بحاجة لموظفين . . راح صوبهم عل و عسى يلاقي له شغل هناك . . عقب المأساة اللي عاشها يوم احترق بيتهم . . مب قادر يتصرف و لا يدبر أموره . . خاصه ان عنده ولد صغير و بحاجة لرعاية و انه يعيش شرى باقي الاطفال . . ما يبا ولده ينقصه أي شي . . يبا يحسسه ان هو شرات الباقي ..
وصل الشركة و سأل عن مكتب المدير و خبروه وين . . و على طول راح عند السكرتير . .
سامي : السلام عليكم . .
زايد : و عليكم السلام و الرحمة . . تفضل . .
سامي : يسلمو . .
زايد : بغيت شي ؟
سامي : هلأ انتوا منزلين اعلان في الجريده . . بدكن موظفين ليشتغلوا عندكن و أنا بـدي ......
قاطعه زايد : بس لو قريت عدل جان لاحظت ان نحن طالبين مواطنين . .
سامي و كأنه فقد الامل : بس أنا ما بشتغل . . و بدي أصرف على عيلتي . .
زايد : سامحني انا مالي خص . . الاوامر كلها من مدير الشركة . .
سامي : طب فيني أشوفه لـ مديركن ؟
زايد : اممم والله ما أضمن لك . . بس لحظة بشوفه . .
قام زايد و دخل ع المدير و مادري شو قال له . . و خلاف ظهر لـ سامي و قال له تفضل . .

+++++

نرجع لـ جود . .
خلصت من الغسيل و راحت صوب المطبخ و نظفته و غسلت الوعيان و تعبت . . شافت شي برتقال و قررت تسوي لها كوب عصير . . أكيد ام عامر ما بتمانع . . سوت لها عصير . . و يلست ع الكرسي اللي فالمطبخ و يلست تشرب على راحتها . .
كانت ماخذة راحتها ع الاخر . . بحكم ان الكل مداوم و محد فالبيت الا ام عامر !
شوي و سمعت صوت ريال وراها : منو هني ؟
زاغت جود و تمت متصنمه في مكانها . . مب تجرأت انها تلف راسها و تشوف منو هاللي يرمس !
رد عليها : صوبنا الغزال صصوبنا !
عقب ما سمعت هالرمسسه حست بعمرها انسانة رخيصه و ما قدرت تسكت .. وقفت و لفت عليه و قالت : نعم اخوي ؟ بغيت شي !
..... : انا المفروض اللي أسألج هالسؤال ! انتي بغيتي شي ؟
جود ايدها ع خصرها : والله ؟ منو اللي ياي عند الثاني ؟
سسوا شرات حركتها و قال : والله ؟ منو اللي ياي بيت الثاني ؟
جود ما عرفت شو ترد !
.... : لا بعد الاخت ماخذة راحتها . . يالسة و تشرب لها عصير و مدلعه عمرها ع الاخر !
جود : شو حارنك انته ؟ شو تبا الحين ؟
... : ماشي سلامتج !
جود : عيل اجلب ويهك و اطلع . .
.... : لا لا لا اشوف الموضوع زاد عن حده . . سمعيني عدل . . يا تلمين حلجج الحين . . يا بتشوفين مني شي ما شفتيه في حياتج !
جود : شي ما شفتيه في حياتج .. شي ما شفتيه في حياتج . . خلاص كم مرة بسمع هالجملة !
رفع واحد من حياته : انتي شو مشكلتج في الحياه ؟
جود : تروم تخلاني في حالي و لا ؟
.... : و لا ؟
جود حطت كوب العصير ع الطاولة و يت تبا تطلع : خلاص ما عليه . . انا طلعت من المطبخ و عاد انته كمل باجي الشغل . . امسح الارضية عدل و امسح الدرايش لا تنسى هاه . .
و قبل ما تطلع . .
ام عامر من بعيد : سعيييييييييييييد !
سعيد : لبيييييييييييه . .
ام عامر : انته هناك ؟ شو يالس تسوا عند البشكارة !
جود انصصصب الدم كله في ويهها "شو يالسة تخربط هاي . . تحمد ربها اني يالسة اشتغل عندها . . بس تتمادى و تقول عني بشكارة"
اما سعيد فـ انصدم . . " مسسستحيل بنت بـ هالحلاه تستوي بششكارة ! لا لا حرام ما يصير . . كسسرت خاطري والله "
ام عامر : سعيييد يللا ادخل داخل . .
سعيد و هو بعده يشوفها : ان شاء الله . . ان شاء الله أماية . .
و راح عنها . .
جود " اوفففففففففف . . اكيد خذ عني فكرة . . بيقول في خاطره بشكارة و تطول لسسانها و تشرب عصير و مادري شو . . افف . . و انا شو علي منه . . يقول اللي يبا يقوله "

++++

صالح معصب : اووووف . . حشرتني تراك . . قاعد لي بدي و بدي . .
سامي و هو شوي و بيصيح : بس ألت لك اني بدي أصرف على عيلتي . . مشان الله وافء . .
صالح : انته ما تفهم هاه ؟ ما تفهم . . اقولك انا ابا مواطنين في الشركة . . مواطنين و بس ..
سامي : والله حتى لو بدك اياني انظف لك الشركة انا راضي . . دخيييل الله وافء . . بدي مصاري هلأ . .
صالح تم يشوفه بنظره . .
سامي : تحملني سنة وحده بس . . و بعدها أفصلني و انا بسافر . . بدي اجمع مصاري للسفر . .
صالح : اوففف .. اقولك "ومد له ورقه" سجل رقمك هني و انا برد عليك عقب . . المهم الحين تطلع من عندي راسي يعورني و ما اريد اعوره زياده . .
سامي : تكرم تكرم . .
و سجل رقمه و طلعه و هو راسم له امل يديد بحياة يديدة بدون فقر و بدون ذل !
اما صالح : يالله شو هالحاله . . مع اني كاتب في الاعلان اني ابا مواطنين بس . . هذا شو مدخلنه عرض . . اوف ..
و مسك الفون و اتصل بزايد . .
زايد : مرحبا أستاذ . .
صالح : هات لي الرسايل هني بسرعه . .
زايد : أن شا.........
شاف السماعه : عنبوه حتى مع السلامة ما قال . .
قام و شل الاوراق و ودانهن عنده . .

+++++++++++

فليل عند جود . . انسدحت ع الشبرية بعد هالتعب . . كان يوم جدا متعب بالنسبة لها . . ع كثر ما تشتغل في بيت عمها الا انها تعبت وايد اليوم . .
" ااااااااخ ريولي شكثر يعورني . . ابدا ما يلست اليوم الا ع الغدا و العشا . . الله يعيني في الايام الياية . . شكلي بكد كد الحمير هني . . الحين فهمت عمي يوم يقول بتشوفين شي ما شفتيه في حياتج . . آثاري وايد اشياء بعدني ما شفتها . . آآآآآآآآآآآآه الله يعين بس "
شوي و سمعت حد يدق ع الدريشة " جنه حد يالس يدق ع الدريشة " شافت الساعه 1 الا ربع فليل " لا لا منو بيي هالوقت . . انا اتوهم اكيد . . من تعب اليوم " شوي و سمعت الدق مرة ثانية و زاغت . .
و صبرت شوي و رد يدق مرة ثانيه . . قامت شوي شوي و فجت الدريشة بس شوي . .
و قالت : منو هني ؟
....: انا !
زاغت . . هذا صوت ريال . . شو يبا هذا . . و سكرت الدريشة و طبته ! بس منو قال . . تم يدق و يدق و يدق و ما خلاها ترقد ! طفففففرت جود و ردت تفج الدريشة . .
جود بعصبية : و بعدييين يعني ؟ يعني الواحد ما يرقد ؟
طلع جدامها : اشششش شوي شوي لا ننكشف !
جود فجت عينها : سعييييييييييد !! هذا انت !
سعيد : اشششش اششششششششش . . الحين بتفضحينا !
جود رمست بصوت هادي : انته شو عندك ! . . شو تبا ياي لين هني . .
سعيد ابتسم : مابا شي والله . . بس قلت بدق سوالف وياج . .
جود رفعت واحد من حياتها : لا والله . . و حد قالك اني ابا اسولف مع حد !
سعيد : في نص الجبهه . . انزين انا ابا اسولف وياج . .
جود : و ان شاء الله تباني اتم واقفه عشانك . .
سعيد : لا لا يلسي انتي ع الشبرية . . و انا بيلس هني و بداجا ع اليدار . .
جود : اوكي مع اني مب مقتنعه ابد . .
ابتسم سعيد : ما عليه مع الايام بتتعودين علي . . كلهم يقولون اني اجتماعي و انحب بسرعه . .
جود عاقده حياتها : مشكله الواحد يوم يكون خقاق . .
سعيد : مب خقة . . هاي ثقة طال عمرج . .
طنشته جود و يلست ع الشبرية . . و هو يوم شافها يلست يلس هو بعد . . بحيث انهم هم الثنينه ما ييشوفون بعض . . تموا ساكتين تقريبا 5 دقايق . . كل واحد فيهم يتريا الثاني يبدا في الرمسه . .
عقب . .
جود : قول شو عندك ؟
سعيد : اممم . . ماشي . .
جود : عيل شو اللي خلاك اتيا هني و في هالحزة !
سعيد : امممم . . مادري . . اول ما شفتج فالمطبخ تحريتج ربيعة عنود . . بس عقب تفاجأت بـ امي يوم قالت انج ...." و سكت "
جود ابتسمت بعذاب : بشكارة !
سعيد و جنه متلوم : هيه . .
جود : لأني أنا بشكاره . . انا انظف و ارتب و اعدل من وراكم . . شو الغريب في الشي !
سعيد : امم . . يعني ما توقعت .. شو اللي خلاج تشتغلين هالشغلة ؟
تنهدت جود و سكتت . .
سعيد : من ورا هالتنهيده قصه كبيييييرة . . قولي . . فضفضي لي . .
جود عاقده حياتها : بصفتك منو ؟
سعيد : اعتبريني اخوج . . اختج . . ابوج و لا امج . . انسي اني انا سعيد . . و اوعدج ان رمستج تكون سر في بير !
جود : يبتها ع الجرح !
سعيد : شو هي ؟ ما قلت شي انا !
تنهدت جود : طريت اهلي . . "و سكتت شوي" كنا يايين من دبي . . و فالدرب كلهم رقدوا الا انا و ابويه . . فـ اعتقد ان ابويه غفى و كانت جدامنا شاحنة . . انا انتبهت عليها و زقرته عشان ينتبه . . فـ يحليله فز و لف السيارة ع اليسار بسرعه . . بس انجلبت بنا السيارة يمكن 3 او 4 جلبات . . و ما طلعنا من الحادث الا و امي و ابويه و اخوي منصور توفووا . . اما مهاري و عبادي و انا تمينا فالمستشفى بحدود اسبوع . . لكن قدر الله و توفوا مهاري و عبادي و تميت انا "مسحت دمعتها" . . تميت عند عمي الظالم . . القاسي المتغطرس . . ما خلاني اتهنى حياتي . . واقفلي في البلعوم . . لو يقولي صدي يمين غصب اصد .. و لا يقول صدي يسار بعد غصب . . امشي على اوامره سواء صح و لا غلط . . مالي أي كلمه . . و لو رديت عليه بيضربني ضرررب اتكسر من عقبه . . بس شو اقول . . الحمدلله ع كل حال !
سعيد كسرت خاطره : يالله . . كل هذا و صابرة !
جود تمت ساكته . . ما عندها شي تقوله . .
سعيد : انزين حرمة عمج ؟ ليش ما توقف وياج ؟ و عيال عمج وين راحوا ؟
جود : عمي ما عنده عيال . . و عشان جي حرمته كارهتني . . مادري شو السبب . . بس كله تتبلى علي و تخرط على عمي عشان يضربني و اتبهدل انا . .
سعيد : و شو اللي خلاج اتيين هني ؟
جود : كالعاده حرمه عمي تمت تلعب بمخ عمي لين ما نازعني و هزبني . . و يوم رديت عليه قال عقاب لج بتشتغلين في بيت ام عامر لين ما هي اتييب بشكارة !
سعيد : بس البشكارة احتمال تطول 20 يوم !
ابتسمت جود : الله يبشرك بالخير . . ع الاقل ابتعد عن عمي و حرمته فترة كبيرة . .
سعيد : ليش ما تسوين شي ؟ ع الاقل انتقمي منهم . .
جود : الله وياي يا سعيد . . و الدنيا دوراة . . يوم لك و يوم عليك . . مثل ما سوولي بيستويلهم !
سعيد : و النعم بالله . . انزين دخلتيني جو وياج . . خلينا نسولف بأشياء ثانية . .
جود : امممم . .
سعيد : آمري !
جود : ابا ارقد . . تعبت وايد اليوم . .
سعيد : اوووه سوري . . اسمحي لي ع الازعاج . . خلاص بخليج الحين . . شي فالخاطر ؟
جود : لا سلامتك . .
سعيد : الله يسلمج . . يالله تصبحين على خير . .
جود : و انته من اهله !
جود ارتاحت جزئيا بعد ما طلعت اللي في خاطرها . . تحس ان هم و انزاح . . جنها شاله حمل ثجييييل ع قلبها . . اما سعيد . . كسسسرت خاطره وايد هالبنت . . كان يتمنى انه يوقف ضد عمها و حرمته . . بس بصفته منو ؟

اممم . .
هذا البارت الاول . . اتمنى انه ينال على اعجابكم . .

شو رايكم بالاسلوب اولا ؟
و الاحداث ؟
و الشخصيات ؟

و شو توقعاتكم !

بانتظار تعليقاتكم اعزائي ؛)
لا تخذلووني بلييز

احبببببببببببببببباط : )

تسسلمون على المتابعة . .
و على التعليقات . .
لا هنتوا ^^ . .

بنزل لكم البارت الثاني باذن الله . .

وآآو روووعهه ححتى رووعهه قلييلهه عليهآ .. :az_flw:

شو تتوقعون بيصير مع جود و سعيد ؟ آمممممممممممم آتووقع يحححبون بععض :001_wub:
و شو اللي بيصير في بيت وديمة ؟ آممممممممم آتووقع يتطلقوون :glare:
و شو نهاية اللي تسويه وديمة في ريلها ؟ يطلقهآإ وتقععد مططلقهه ططول عممرهآ :lolr43:


تقبليي مممروريي .. :ast7eee:

ودي بك صرآآححهه الرواايهه طرررر في قممه الرووعه
أاستمري فديتج ف الروايه
وانا بكون من متابعينج ان شاء الله =)
أمممم نجود تكسر الخاطر وان شاء الله الله بيعوضها عن اللي عاشته
عمها وحرمته جهنم تآخذكم شوو مآتححسون o.O

السلام عليكم و رححمة الله و بركاته
شحالكم ؟

السسموحة من الجميع . .
اششكر كل اللي تابع البارتين . . سواء رديتوا و علقتوا . . او لاء . .
و اشكر اللي يتابعني من خلف الكواليس ^^ . .
و ان شاء الله بنزل لكم البارت الثالث . و السموحه ع التاخير