منتدى استراحات زايد - 乂آآه يا ويـــله .. قلــــبٍ صويــبٍ بانــت أقداره乂

(الجزء 92)

(ومن وصلوا ليوا كان عواس ينزل الاغراض .. ويحس شرا اللي حد ينغزه على جتفه من ورا ..وصد يطالع ..)

فطيم : السلام عليكم (وهو يشل الاغراض وروّح عنها وما رد عليها وهي تمشي وراه ..) انا آسفه ..

عواس: طلعي برع لو سمحتي ..

فطيم : ليش ما تطالعني؟ ليش ما تحط عينك فعيني؟

عواس: من زين سواياج عشان أحط عيني فعينج؟

فطيم دموعها تنزل : والله آسفه .. لين متى ما بتسامحني؟

عواس: الله المسامح ..

فطيم : وانته؟

عواس: قلت لج الله يسامحج ويستر عليج ..

فطيم : شو قصدك؟

عواس: انا قلت شي غلط؟

فطيم: ما تحبني؟

عواس: حب يهال .. اهلي قالوا فطوم لعواس وعواس لفطوم كان حب يهال .. انتي اخت .. (وتوةّ بيكمل بس قاطعته ..)

فطيم تزاعج : لا تكمل !! أخت؟ تعتبرني أخت؟ كل هذا وأخت؟ ياخي خاف الله !!

(وهو كان يقوللها هالكلام يبا يحرق قلبها على اللي سوّته فيه ..)

عواس : أكيد أخت ليش تتوقعين زيادة؟

فطيم بحزم : ما يخصك !!

عواس بجدية : انا قلت لج لا تحطين آمال علية !! ويوم بعرس ماباخذج انتي .. بعدج ما ولتي لمستوانا ..

فطيم: نعم؟ نعم؟ مستوى؟ أي مستوى يا راعي المستوى ؟ انته يالله يالله على معاش الشغل وتتكلم بالمستوى؟ أحينه فطيم اللي هي فطيم اللي تعج الطير من على السماء مب داشة مخك؟

عواس يضحك : مغترة الحرمة فعمرها !! ههههههههههههه اقولج !! عفتها ونسيتها بعد !!

فطيم تصيح : خاف الله ..

عواس: خفتي من الله يوم جرحتيني؟ لا !! أكيد لا !! ليتج قلتيها لي من زمان انج ما تبيني .. لكن قلتيها جدام منو؟ جدام أميه نشبة والكل درا .. وحضرتج كنتي كارهتني كره اليهد يوم كنت زين وياج كرهتيني واحينه عايبنج يوم غدت اللعانة من صفاتي تمي بندمج !! انا بكمل حياتي بدون عوار راس .. وعمري ما برد لج فهمي هالرمسة عدل !! تندااه !!

(ودش داخل عنها اما ميود من سمع الهرن سيده ربع لبيت شمسه هو ورشووود بو لسان طويل )

مايد : خالوه !! خالوه سان .. خالووووه سان !!

راشد الصغير: أبويه يا أبويه !! عواث ويهد !!

(ومن سمع عواس صوت رشود ربع تحت..)

عواس: مرحبا.. مرحبا مليون..

راشد: أبدا لا تكلمني!!

عواس: حشم وغد بدوي..

راشد: البدوي ما يودر ولده روحه ويا بوطبر

مايد يضربه على راسه: من زين طبرك!!

راشد:أي بابا شوفه..

عواس يشله: خشمك..علومك راعي صويغان؟

راشد: ابنعمه..متولهين..

عواس:انف عليك.. (و كان ماخذ ملامح عواس وشطانة ميود ولسانه بعد واهم شي الطبر .. العلامه التجاريه في العائله.. ) اندوك انته.. أغيب كم من يوم و ما توّديه الحلاق؟

مايد: اسمع انته !! يطيع هو؟ بيطّوله يباه شرا..

راشد :أباه مثل بن دعوان بلاك انته !! (قصده بن عدوان ..و شمايل نازله..)

مايد: يا مرحبا مرحبا الساع بالشيخه

شمايل: مرحبا الساع بولد عمي..

مايد: تراني زعلان منج..

عواس:حردان..حردان..

مايد: شعنه ما تستعيلين بأغراض الملجه؟

شمايل تضحك: جيه منو الريال؟

مايد: انف شو ها بعد؟

شمايل:والله انا جاهزة قلت لك بسويعتي..

مايد: واايه فديت راعية السويعيه..

شمسه: مغازل فبيتنا؟

مايد:حشا !!

شمسه: أنا أدري ما يطلع المغازل الا من ميود..

مايد:عدال.. وهذا الجازورا اللي حذالي؟

عواس:أنا؟

شمسه:محشوم محشوم فديت ويهك..

عواس:: احم احم

مايد:خالوه والله هذا أكبر لوتي بطلي تليفونه بتحصلين أرقام بنيات..

شمسه:وابويه صدق؟

عواس:والله لا !! إيييه بوكرشه !! اخرط !! اخرط !

شمسه: سمعوني.. باجر ملجة هنوه.. والأسبوع اللي عقبه ميود..

(شمايل احمر ويهها.. وصدت بتروح.. واتفجج من ميود..)

مايد: اييه !! اييه !! تعالي هني !! وين سايرة؟ ما جحلت عيني عدل !!

شمايل تربع: اييه أستحي!!

(عواس ميت من الضحك..وحصّل ميود ضربه على راسه..)

مايد: حشّم يا ولد !! أعنبوا جدامي بعد؟ أكرم انك هب طبيعي..

راشد:أقولج خالوه انا بعرث وباخذج عادي؟

(و هم يتضحكون عليه..أما هنوه حنّت ساعة الصفر .. قلبها بيطلع من الزياغ .. طول الليل كانت خايفه .. اتخبر أمها عن السالفه ولا؟ ولا تخبر شمايل؟ وهي بتتصرف؟ لالالا يا حبها حق الشماته .. يالله شو الحل؟ والله بنكشف .. أشرد؟ انزين وين أسير؟ أخااااف .. (وتمت لين الصبح كان شكلها مريض .. ما طلعت من الحجرة ..وهم يدقون عليها .. كل مرة تبطل الباب تسوي عمرها تعبانه وفيها رقاد لين استوت الساعه 3 ..)

مايد: عواس؟

عواس: هممم

مايد : ما بتسير اتسلم على يدي ؟

عواس: يوم بيينا البيت مرة وحدة بسلم عليه

مايد : خف شويه عليه لا تيلس اتحط فخاطرك هذا يدي وفنفس الوقت أبوك اللي رباك ..

عواس: اسمعني ميود .. انا آدمي وأحس بكل شي .. يوم من الأيام انكسرت .. وأحينه يوم شفتوني آخذ حقي بإيدي تبوني أخف عشان ياكلون حقي؟

مايد : تغيرت يا عواس .. احس جني أشوف عمري فيك يوم كنت مستلعن أيام قبل ..

عواس: سر سر اسبّح وبدّل وتعال ..

مايد : انزين ..

(مايد ظهر من صوب وهنوه دشت من صوب ثاني بس ما لاحظها عواس كان يفكر ..)

عواس فخاطره : قلبي ما يطاوعني اني ارد ليوا وما اشوف يدي اتولهت عليك يابويه ...

عواس حس انها موجودة : أوووه العروس ما بغت اتنزل واتكلمنا ..

هناء منخطف لونها وتتنافض : ع .. ع .. ع .. ع .. عيسى..

عواس: لبيه ..

هناء: أب .. أب .. ابا اقولك شي .. (وكان توّة مايد بيبطل الباب بيقول شي حق عواس بس وقف يسمع ..)

عواس: بلاج هنوه؟ تعبانة؟ زايغه من شي؟

هناء تترجاه : احلف .. احلف انك ما بتجتلني؟

عواس: يالله أجتلج عاده؟ ليش؟

(دش ميود مفوّل ..)

مايد : مسوية بلوى صح؟

(ومسكها من جتوفها ..)

هناء زاغت: ميود !!

مايد: اتكلمي شو مسوية؟

عواس: بلاك هدها !!

مايد : هذي الخراب كله !! الله يستر مب مشوهه سمعة أختها ..

(اما مانع كان حزتها يلعب ويا هند .. لين حس بوّيع فمعدته ..)

مانع: آآه !! بطني .. آآه !!! (وويهه محمر .. مب رايم يتحرك .. يبا يتكلم مب قادر .. بنته ياهل ما تفتهم .. وهو حزتها يتمنى حد يدخل عليهم ويساعده .. لين دوّخ مرة ثانية ..اما هنيد .. كانت تخم برع .. والشيبه واقف عند الدريشة .. كان جسمها خامل .. واتحس بالتعب .. الدويات لين الحينه فجسمها ما اتخلص جسمها منهن..)

الشيبة أحمد : شو اللي خلاّج تفّرين كرامتج وتشتغلين بشكارة عندها؟

(وكانت اتخم والصيحة جايستنها بس ماسكة عمرها ..)

هنود فخاطرها : سمعتي اللي اختربت والفضيحة ..

الشيبة : شعنه ما تتكلمين؟ منربط لسانج؟ انزين .. عندج مفتاح حجرتي؟ اباج اتمشيني شوي في الحوي .. متوله على الدنيا اللي برع .. (وهي مول مب معبرتنه ..) إيييه أكلمج انا .. ليش جذيه؟ جذيه علموج أهلج تحترمين الكبار جذه؟

(تم يتكلم وهي تسمع بس ما اتحط عينها فعينه كان كلامه درر ينحط عالجرح يبرى يحاول يرفه عن عمره .. اما سعيد ..)

سعيد : وأخيرا حصلته .. (ويتصل .. كانت ناشه من الرقاد ..)

مي: نعم؟

سعيد : الله ينعم عليج

مي: من؟

سعيد : واحد يتخبر عنج ..

مي: معجب وانا مادري؟

سعيد : ما وصلت لهالمرحلة ..

مي: انته انسان فاضي وانا انسانه مشغولة باي

سعيد : بندي وبحرقه تيلفونج ..

مي: في شي اسمه انه الهاتف المتحرك الذي طلبته مغلق ..

سعيد : أقدر أبطله ..

مي منقهرة : نعم .. آمر .. شو تبا ؟ خلصني ..

سعيد يبتسم : قولي اول شي يا عيوني ..

مي: ههههههههههههههههه يا عيوني ..

سعيد : يااااااااااااااااااااااااااا الله محلاتها منج !! ردت لي فؤادي

مي: ليش حضرته مسافر؟

سعيد : الا مهاجر و رد .. مي؟

مي: نعم؟

سعيد: وياج سعيد .. (توّة بيقول الشيخ سعيد بس سكت ..)

مي تتنهد : وانا مي ..

مي فخاطرها : يا صبر أيوب ..

سعيد: اتشرفنا ..

مي: انزين انا بكمل رقادي يالله باي .. (بندت التيلفون ) انسان فاضي !!

(اما هو سيده ضحك وعيّبه فيها لسانها الطويل .. اما عند عواس ..)

مايد: صدقني هذي ماتي الا في راسها شي والله

عواس: هنوه رمسي !!

مايد يزاعج : رمسي ولا والله لأزغدج !!

هناء تنتفض: و و و و .. ما أقدر أعرس ..

عواس: شعنه؟

هناء تتكلم ابسرعه وتعج القنبلة : لأني على ذمة هزاع !! (ويلست عالغنفه حاطة ايدها ع راسها وتنتفض .. وقلبها يدق بطريقه فظيعه .. ميود وعواس منصدمين..)

مايد: على ذمة؟

عواس: ذمة هزاع؟ ذمة هزاع؟ كيف؟ (ويتقرب صوبها ويزاعج ) ككك كيف خذتيه؟(ويضربها ع راسها ) كيف خذتيه؟(وهي تصيح )

هناء : والله والله .. مب قصدي ..

مايد : فضحتينا لا بارك الله فيج !!

(عواس يلس عالغنفه منصدم صدمه من هالآدمية )

عواس: ياعمري ما توقعتها منج !! انتي؟

(ميود قبضها من راسها وعيونه محمرات من الغصة وعفد عليها بالضرب وهي تصارخ )

هناء: دخيلك ميود .. دخيلك التوبة .. آآآي !! آآآي !! والله آخر مرة !! الله يخليك والله ما أعيدها !!

مايد : والله لجتلج !! ضيعتي شرفج يامالج السم !! يعلج بعوقن ما عقبه عوق !!

(وقام عواس ومسكها من راسها وداسها ع بطنها ...)

هناء تزاعج : آآآآآه بطني بطني بطني لحقوا علية بطني ...

عواس: قومي قومي يا مالج الدحق ان شاء الله (مسكها من رقبتها ..) زخها ميود .. ان شردت اجتلها لين أييب الخيزرانة ..

هناء: الله يخليك التوبة .. التوبة والله التوبة .. أميييييييييييييه

عواس سار ورد بخيزرانة يايبنها من برع : انتي ما توبين اللي من هالاشكال ما اتوب .. (ويضربها ع ويهها بالخيزرانة ) فضحتينا ونزلتي روسنا .. الناس كلها بتعرف !!!! وحضرتج ياية على آخر شي تخبرينا قبل ملجتج بكم من ساعه عشان نتلاحق عليج وعلى فضيحتج ؟ والله ما اتمين حية جان انا وراج والله

شمسة : بلاكم تصارخون؟ بلاكم ؟ شو ها ؟ هنووووه؟ ليش تضربونها؟ شو سوّت؟

مايد : طاعي بنتج فضحتنا ونزلت كرامة عايلتنا والله ثم والله ما تطيح بيت يدي ولا والله أجتلها والله حتى ويهها ماداني أشوفها هذي بنت عمنا؟ أكرم .. ياريتكم خلفتوا عليها شي عدل ..قلنا اختج عفدوا عليها ما اظن منيه والدرب والله يإني حاس انج انتي اللي مطرشتنهم والله وهذي حلفة .. (ويزاعج ) شملووووه يا شملووووه !!! (وتربع شمايل)

شمايل: نعم نعم ياية .. خير ...بلاكم؟ (وتشوف ويه مايد محمر )

مايد : كلمة ما تنعاد تسمعين؟ان عرفت انج مكلمتنها او حتى حاطة عينج فعينها صدقيني العرس بيلتغي وعمريما بكلمج لو شو يستوي ..

شمايل: ش ش شو مستوي؟

عواس: الحرمة معرسة ونحن يا غافلين لنا الله .. (ومسكها من راسها ..) بتطوفين ويانا وانا براويج .. ميود زخها ..

مايد ماسكنها : منو قال بهدها ..

شمسة : معرسه؟ اشوووه معرسة ؟ بنتي انا؟

مايد : يا ما قلتلج اتحذري منها وحطي عينج عليها ما صدقتيني هذي شرا الحنيش .. (ويضفعها طراق على ويهها ..)

هناء: أمييييه ..

شمسة معصبة ومحمر ويهها الا منصدمة انه هالشي يظهر من بنتها : وبكل قوة : تظهر من البيت وان شفتها لأفرها خاري بيتي ما تطيحه .. برع !!! انا ما عندي بنت (وتربع شمسة لحجرتها ..)

مايد: شملوه اتصلي بالعرب واتعذري منهم

شمايل زايغة : ان شاء الله

مايد : طوفي جدامي طوفي !!

هناء: والله التوبة خلوني الله يخليكم ..

عواس: منو قال انه بنخليج؟ تشوفين يوم حرقتي قلب امج وقلوبنا بنحرقه وبنشويه الحينه ...طوفي !!

(البارت الياي بعد يومين )