السلااااااام علييييج والرحمهـ ..

الصراااحهـ القصهـ طرررررررررررر ..
سجليني ويا إللي يقرون القصهـ لووولز ^^

فـ انتظاار البااارت الياااي ...



السموحهـ ..

طررررررررررررررررر وربي..

مادري ليش احس حمد خايس <<شو يخصه احيين

المهم

تسلمين غلاي ع البارتات ونتريا البارت اليديد..^^

لا تبطين علينا فديتج..

عشان خاطركم



&* الجــزء الثــاني عــشــر *&

خالد: سمعي .. انا مالومج ان صدقتيــهم .. لكــن صدقينيه والله العظيــــم انه مالــي ذنــب .. انا حالي حالــج .. لكن انتي في سالفتج عرفوا بالحقيقه .. لنه شويخ اعترفت .. اما انا ماعنديه حد يعترف ويقول الحقيقه .. الوحيد اللي كان يعرف السالفه الصدقيه مدفون في قبره الحيـــن ..

حموده: حمــد ؟؟

خالد: هيــه .. لكن انا بخبرج .. اذا كنتي بتصدقتينيه ومابتقسين عليّه في حكمج مثل الكل ..

حموده: بصدقك بس انته قول ..

خالد: مع انج فتحتي جروحيه لكن ماعليــه .. انا مستعد أسوي أي شي بس ألقى حد يصدقنيه ..

تنهد خلاف قال بصوته الغليظ اللي تعودت عليه مسامعيه وغديت ما اخاف منه:

قبل 8 سنين .. وقبل لاتعرس مريم .. كنا نحب بعــض .. هي كانت في نظريه أصدق وأطـهر وأحـلى انسانه فالدنيا .. كنت ارمسها مرات فالتيــلفون .. كنت متعلق بها واحـبها بشكل مب طبيعي .. وخــلاف بكل بساطة قالت لي ماباك وعرســت ..!!!! كنت ابا اعرف شو السبب ورا اللي استوا .. كيف تخلّت عنيه جذيــه ؟؟ الحب اللي كان بينا مب شوية .. آخــر شي اكتشفت انها خايــنه وكانت ترمس "مطر" اللي هو ريلها فالتيلفون .. يعني هي كانت تلعب عليّه وعليه .. كنت ابا افضحها .. مارمت استحمل الخيانه جذيــه .. عصبت ويانيه غيــظ مب طبيعي .. وسرت وخبرت ريلها .. وهو صدقنيه وطلقها .. بس خلاف حمد الله يرحمه .. سار وجذّبنيه جدام الكــل مع انه يعرف بسواد ويه اخته .. وطلعنيه بصورة النــذل اللي يبا يخرب حياة بنت عمه .. ورد مطر مريم .. عقب خيانة مريم واللي سواه فيّه حمد هددته اني باخذ منه اغلى شي عنده .. و الكل فهم هالشي على انيه باخذج انتي منه .. لأنه الكل كان يعرف انه حمد يحب بنت العم المجهوله اللي عايشه في أمريكا .. واللي ماحد يعرف عنها شي غير اسمها وصورها اللي كانت تارسه حجرة حمد .. بس والله العظيم اني ماكنت اقصدج انتي .. انا مستحيل أخرب حياته من عقب ماكان أعز ربعيه من زمان مع انه كان اصغر عني بـ خمس سنوات لكنه كان وايد قريب ليه .. ومستحيل اسوي بج انتي شي بعد .. انا كنت اقصد شي ثاني .. ماعرف شو هو .. بس كنت اهدد وماكنت مخطط اني اسوي شي كان مجرد تهديد .. لكن اهليه انجلبوا عليّه وكل حد خذ عني فكرة شيــنه .. وانا مارمت ادافع عن عمريه .. كلهم كانوا ضديه .. ما قدرت اسوي شي غير السـكوت .. وخلاف يوم دروا انج يايه البلاد .. ظهروا هالسالفه اليديده عشان تكرهينيه .. اني ابا آخذج عشان الورث .. بس صدقينيه اني مافكرت في هالشي ولا طــرا على باليه .. والله يشهد عليّه ..


تميت اطالعه .. كان معقّد حيّاته .. والدموع تلمع في عيونه لكنها ماطاحت .. كان صادق .. أنا متأكده من هالشي .. في حياتيه ما تأكدت من شي كثر ما تأكدت من صدقه ..

قلت له بـ ثقة : مصــدقتنــك ..

التفت صوبيه وكانن عيونه حمــر .. استغربت صبره الطويــل على الظلــم .. كيف ما قبض حمد من رقبته وذبحه ؟؟ انا لو كنت مكانه كنت سوّيت هالشي !!! انا الحين غيظ الدنيا كلها فيّه على شويــخ !!

خالد: انتي من وين الله يابج عشان تنسيـنيه كل الظلم اللي عشته ؟؟

قلت عشان ألطف الجو : بالله عليــك ماتدري من وين الله يابنيه ؟؟ أكيــد من امريكا يالمخرّف !!!

خالد: ههههههههههه ..

حموده: أووووه العيوز نسيناها يالله صوبها ..

خالد: هيــــــــــــه والله صــح .. شقايـــل نسيناها ؟؟؟

وطيّر الفتك فوق العراقيــب ..

حموده: ايه والله دار راسيــه .. (وخلاف تميت اصارخ) يالخريــش يالخبـــله شوي شوي ..

تم يضحك عليّه .. وخلاف وقّف السياره و نزلت وركبت ورا .. وخطفنا صوب يدتيه اللي كانت يالسه في خيمتها وموّريه الضو فالكوار .. يت صوبنا وركبت فالسياره ..

يدوه: ويــنكم انتوا جانه أذن العصر وانتوا بعدكم ماهضلتوا ..

حموده: يدوه السيارة غـــرزت ..

طالعنيه خالد بـ نص عين ..

يدوه: صــدق ؟؟ عيل ماقلتوليه بزقر لكم البيدار يساعدكم ..

حموده: لا الحمدلله ظهرها خالد ..

وحرّك خالد سيارته وردينا صوب البيــت ..



.
.
.



" هـــل كان موتــك خيرة يا حمـــد ؟؟ ربمــا نعـم .. لأنك لو كنت حياً إلى الآن لم أكن سأستطيع تقبّلك ولا حبّك .. انت مجرد ظالمٍ كـ شيخه .. انتما من نفــس النوع .. يبدو ان الله انتقم من كليكما .. انت بأن أبعدني عنك وأخذ روحك مع ان الموت لايبدو كـ عقاب .. ولكنك مت خارج وطنك وانت محروم من أغلى شيء لديك وهم أهلك .. وهي عاقبها الله بأن تزوجت بـشخص يقطن خارج هذا البلاد لكي تعيــش الغربه ..لقد علمت الآن لماذا كانت شيخه تحبك .. كلاكما من نفس النووع !! لا حسـافة عليـك ياحمـد .. فقد كنت ظالماً .. فعلة اختك لم تكن بسيطة للتستر عليـها وكأنها لـم تكن .. كان يجب ان تعاقبها هي .. هي التي فعلت هذه الفعلة التي لاتغتفر .. لا أن تعاقب خالد الذي أحبها بصدقٍ وخانته !! ألا يكفيه ألم الخيانه .. ؟؟ كنت تستطيع ان تعالج الموضوع بهدوء لا أن تفعل بـ خالد مافعلته .. أعترف ان خالد أخطأ بانتقامه .. لكنني لا ألومه لأنني لو كنت مكانه لـ فعلت نفس الشيء .. انه انسان والشعور بالخيانه أشعل فيه ناراً لاتنطفئ بسهوله .. لقد اخطأت في حقه كثيـــراً كثيــراً يا حمد .. رحمك الله .. ! "


.
.
.


ايفرني فر خلن ع الجفا فرّي .. عزيل حالي ونفسن فيه مغترّه
ياليته يقر مثل ما قبل قرّي .. اني حبيبه ويرحم حالتي مرّه
الله وأكبر لاني بشتكي شرّي .. الا لمن كان يسمع مشية الذرّه



فالبيــــت ..


أذن المغرب وصلّيت وخلاف نزلت تحت ما حصلت حد .. سرت ويلست على عتبة الباب برع .. وحطيت ايديه على خديه ..

ماعــرف كم مضى من الوقت عليّه وانا يالســة .. بس خلاف شفت سيارة خالد داخلة البيت .. نزلن منها يدوه والريم وسلامه ..

قمت وسرت صوبهن وايهتهن .. وخلاف قلت ..

حموده: ويــنكم انتوا ؟؟

يدوه: هاذيلا المخبّل سايراتبيه اليمعيه ..

الريم: يدوه نحن كم مرة نقولج اسمها الجمعيـــه ..

يدوه: كله واحــد ..

سلامه: أسميها يدوه لعوزتنا فالجمعية .. تبا حنّا و ياس حق شعرها .. من وين نضويهن ؟؟

يدوه: تراكن انتن قلتن خذي اللي تبينه .. انا هذا اللي أباه !!

حموده: يدوه نصيحة من عنديه هاذيلا لاتسيرين فياهن مره ثانيه ..

يدوه: مايحتاي تقولين .. هاذيلا المغرّم منو يسير فياهن ماخلن قوطي ماخذنه مزرن العربانه الا قوااطــي !!!!

حموده: هههههههه ..

هبطنا داخــل .. والبنات كل وحده شاله أكياسها صوب حجرتها .. وانا يلست عند يدوه ..

خلاف هبط علينا خالد .. سحبته يدتيه من كندورته بعصاها..

يدوه: ويــنك انته مسوّد الويه ؟؟ أدريبك الا قابض هالتيلفون وتهذرب فيه .. جانك الا ماتغازل مادريبــك ..

طلعت ضحكة قويه من خالد ..

خالد: حرام عليــج كنت ارمس اميه .. وخلاف دقت ليه فطوم تبا تي هنيه ..

يدوه: والله مايندرابك يا ولد سالــم !!

في هاللحظه صاح تيلفون البيــت ..

رديت أنا ..

حموده: ألــوه ..

مريم: أهليــن حمووده ..

تذكرت كل شي خبرنيه به خالد .. والله خاطريه أطيح فيها سب .. بس مب وقته الحيــن ..

حموده: هلا والله .. شحالج ؟؟

مريوم: بخير الحمدلله انتي شحالج ؟؟

قاطعتنيه يدوه : منو ترمسيــن ..

طالعت خالد خلاف قلت : هاي مريم بنت عميه ..

يدوه: هيــه عيل عطينيه اياها برمسها ..

عطيت يدتيه السماعه وتميت اطالع خالد اللي كان معقّد حيّاته .. ظهرت من عندهم عشان أسير المطبخ .. يوعانه بشــكــل فظيـــــع .. أول مافجيت باب الكبت مال المطبخ انتبهت انه خالد تبعنيه ..

قلت له : أسويلك اندومـــي ؟؟

خالد: لا مشكوووره ما آكــله هذا أنا ..

ابتسمت و طلعت لي اندومي وصبيت ماي فالجدر وجبيتها داخل .. تميت واقفه عند الجدر وخالد يالس على طاولة المطبخ ..

حموده: ارمس قول شي أول مره تكون يالس وماتقول شي .. أحيدك قبل دوم مسويليه رعب بصوتك !!!

خالد: افا يعني تخافين من صوتيه ..؟؟

حموده: بالله عليك مايخوّف ؟؟ بس الحين تعودت عادي ..

خالد: واكيد بعد تخافين ضروسيه وشكليه بعد كملي ..

حموده: في البدايه هيه .. بس الحين تعودت .. بعدين الانسان مب بشكله بأفعاله ومعانيه ..

خالد: بس انا طايح من عين الكل هنيه ..

التفت صوبه وقلت ..

حموده: أهــم شي انك ماتطيح من عين نفسك ..

خالد: كيف يعني ؟؟

حموده: الناس مايعرفونك كثر ما انته تعرف نفسك .. وأكيد مابيفهمون أسبابك في اللي تسويــه .. لأنهم مايعرفونك ولايفهمونك مثل ماتعرف نفسك .. خل الناس يظنون ويفكرون اللي يفكرونه .. أهم شي انته شو رايك عن نفسك ؟ اذا كنت راضي عن نفسك لايهمك حد !!


أبــا أعرف انا من متى أعطي محاظرات ؟؟؟!!!

رديت صوب الجدر .. تميت أحرك الاندومــي .. عقب ماخصلت حطيتها في طاسه وعصرت عليها لومي وحطيتها في صحن وكنت بظهر من المطبخ .. بس خالد قال ..

خالد: مشكوره على النصيــحه ..

حموده: لا شــكر على واجــب ..

وشليت صحنيه وظهرت .. بس أول ماظهرت شفت مريـم وعيالها رديت ودخلت المطبخ مره ثانيه ..

حموده: خـــالد .. انته لازم تروّح من هنيه ..

خالد: ليــش ؟؟

حموده: مريم وعيالها هنيه ..

عقد حيّاته كالعاده كل مايسمع بطاريها ..

حطيت الاندومي على طاولة المطبخ وتميت اوايق من الدريشه .. دخلت مريم داخل ..

حموده: يالله هبطت داخل لازم تروّح ..

خالد: لا بهبط داخــل وبشوف شو بيستوي ..

حموده: يالله ياخالد مافينا ع المشاكل .. دخيـــلك ..

خالد: بس انا مابا اروّح الحيــن .. !!!

حموده: يووووه ياربي .. اته ليش عنيــد جذيه انته هاوي مشاكل ..؟؟؟ خل الليله تعدي على خيــر ..

خالد: لا مابا انا حطيت شي في راسيه ولازم اسويه ..

حموده: ياخي قول انك بعدك تحبها وتبا تشوفها وتمزر عيونك .. يالله قول لاتستحي ..

تحوّلت ملامح ويهه للعصبيه وقال : ان سمعتج عدتي هالرمسه مره ثانيه والله مابييج خير ..

وظهــر عنيه .. ومشا بسرعه صوب البيـت وانا لحقته عن يسوي لنا مصيبه .. ربعت عشان الحقه ..

حموده: انزين اوقف دخيلك اوقف ..

وقف خالد وهو يتنهد بـ ضيج ..

حموده: هدي أعصابـــــــك .. ريـــــــــــلاااااااااااااااكس .. يالله شهيق وزفير ..

طالعنيه بطرف عينه ..

حموده: يالله عاد اهـــدا !! مايستوي تدخل وانته معصب !! ..

هدا شوي وارتخت ملامــح ويهه ..

حموده :انا بدخل قبل وانته اوقف شوي خاري وخلاف ادخل ..

خالد: انشالله الشيخه حمده ..

توجهت صوب الباب وفجيته وهبطت ..

حموده: أووووه مريوم عندنا ؟؟

مريم: هيه فديــتج ..

توايهنا ..

مريم: شحــالج ؟؟

حموده: بخير وسهاله شحالج انتي ؟؟

مريم: الحمدلله يسرج الحال ..

وخلاف عاد شفت عيالها .. لويت عليهم وقطعتهم من البووس ..

الريم: شوي شوي عليهم ..

حموده : أحبهم شسوي ..

هبــط علينا خالد فهاللحظه .. شفت الصدمه فعيون كل اللي كانوا فالصــآله ..

أنا بس أبا اعرف هو ليــش مصـر يهبــط هنيه وهي موجوده ؟؟

خالد: بسم الله شفيكم اطالعونيه جذيه ؟؟

نزلت مريم راسها .. وخلاف رقت فوق وسارن البنات وياها ..

يدوه: وابويه عليــك شعنه هابط علينا جذيه لاهود ولا هدا !!

خالد: شدرانيه انا انه حد هنيه .. وبعدين نسيت السويـج ..

شل سويجه من فوق الطاوله .. وظهر .. وانا ماعرفت شو اسوي اخاف الحقه يدوه تنقد عليّه .. بس يدوه سوّت فيّه خير ورقت فوق صوب البنات .. وأنا طبعاً لحقت خالد ..

كان راكب السياره وتوه بيسكر الباب .. بس انا لحقت عليه في آخــر لحظه ..

خالد: شفتي ما استوت مشاكـــل !!!

حموده: انا بــس ابا اعرف انته ليش أصريت تهبط .. اذا كان ع السويج كنا نروم نزقر الخدامه تشله صوبك !!

خالد: انا مريوم من كمن سنه ماشفتها .. وأبا احدد شو شعوريه من صوبها ..

حموده: وشو ظهرت النتيجه بالله عليــك ؟؟

خالد: والله انا كنت وايد اكرهها لكـن الحيـن السالفة جدمت .. ولقيت حد يصدقنيه بعد ..

حموده: انته متهوّر ماتدري أي نوع من المشاكل كنت بتسبب ..

خالد: انا الحين بروّح شي في خاطرج ؟؟

حموده: سلامتك ..


ابتسم وبنّد الباب .. وابتعدت انا عن السياره .. وروّح هو .. اما انا سرت صوب المطبخ وشربت ماي ورديت داخل .. حصلت اليهال يالسين فالصاله ومشغلين التلفزون على قناة "طيور الجنة" .. وكانوا حاطين اغنية قـطر .. والريم وسلامه يرقصن وايبسن عليها ..

يا نسمه في ليل السهر .. بحبك القلب انسحر
حبك انتي يا قطر .. نور قلبي والعيــن

دخلت انا وياهن فالجــو .. واليهال يتراقصون ويانا .. عقب ماخلصت الاغنية يلسنا ..

سلامة: أبا أعرف ليـش مايسوون أغنية عن الامارات .. ؟؟ سووا عن قطر والسعودية وسوريا والجزائر والعراق ومصر ولبنان .. نحن ليش مايسوولنا أغنية ؟؟

حموده: ماشالله حافظتنهن شكلج وايد اطالعين هالقناة ..!!!!

الريم: تراهم دوم عيال مريوم يوم ايون تلقينهم حاطيـن هالقناه ..

حموده: أهــا ..

وخلاف حطوا العشــا وتعشيــنا .. كملن البنات سهرتـهن الا أنــا سرت أرقد لأني واعيه قبلهن ..


بالبــــــــــــاجــر ..

العصـــر .. كـنا فارشيـن زولية فالحوش ويالسين نحن البنات ويدتيه وعمتيه وحرمة عميه .. وخلاف يتنا مريــم وهي تصيــح وقابضه تيلفونها وشـكلهـا منهارة .. وطاحت في حضن امها ..

عوشة: شوفيــج يابنتيه شعنــه تصيــحين بسم الله عليــج ؟

مريـم: أميــه مطــر بيعرس عليّه !!!!!!!

عوشة: شووووووووووه؟؟؟ من ويـن ضويتي هالرمسه انتي ؟؟

مريـم: الحيـن خبرنيــه .. من زمان هو يقول هالرمــسه بس ماتوقعته ينفذهــا .. هو الحيـن في بيت أهــل البنت ساير بيخطبــها ..

الكـل انصـدم من الرمسه اللي قالتهـا ..

يدوه: انزيــن شو السبب أكيــد انتي مسويتبه شي ..

مريـم: والله العظيـم اني زيـنه فيه واداريه مدراة عيونيه .. بس هو من كمن شهر متغيّر عليّه ويقول انه يبا يعرّس .. أكيـد شايفله شوفه ثانيــه ..

عليا: هو مابيعرس من البطــره أكيد شي مستوي ..

مريم: شو انتوا ماتصدقونيه أقولكم اني زينه فيه ومب مقصره عليـه .. شالتنه هو واهله على راسيه وماظني سويت به شي عشان ايّازينيه جذيـه ..

عوشة: امبونهــم الرياييل الحيــن يعرسون من البطــره ماعليــج منه بيعافها خلاف وبيرد لــج ..

عليا: بس مايستوي جذيه يا عوشه .. مهما كــان مايحق له يعرس عليها جذيه بدون سبب .. عيال ويابت له وولد عنده وهي مب مقصره عليه شعنه بعد يسير يعرس ؟؟ لو هم معرسين من زمان و هي كبيره فالســن بنقول يبا وحده شباب .. لكنهم هم مب معرسين الا من 7 سنيــن .. وبعدهم صغار ..

فهاللحظه وصــل عمي سيف البيت .. نزل من سيارته و يا صوبنا .. خبروه بالسالفه ..

عمي سيف: ماعليــه انـا برمســه خلاف وبعــرف منه السـالفه .. انتي لاتصيــحين يابنتيه ..

عوشة: اللي مايباج لاتصيحــين عليــه .. شعنه متعبه عمرج ؟؟ خليه جانه بيعرس .. دامنه ارخص بج لا تصيحينه .. آخــر شـي بيرد لــج انتي ..


وانتوا شدراكم انه بيرد لها هي ؟؟ كل واحــد يسوي عمره بو العريــف ماشالله !!!! .. أنــا قدرت أفهـم كــل شي في هالدنيــا –تقريباً- بس ماقدرت أفهــم ليــش الريال يعرس على حرمــته .. كيف يقدر يجمع بين ثنتيـن ؟؟ اذا مايباها يطلقها ليش يعرس عليها بعد ؟؟ اذا كــان عشــان انها تأخرت في العيـال المفروض يصبر عليــها .. أو يخليها تروح في حال سبيلها اذا كان حبه لها يقتصر على العيــال .. انا عنــدي مبدأ في الحيــاه .. الشي اذا ماكان perfect"" (مثالي) فـ ماله داعي من أساسه .. أنـا ما أرضى بالشي اللي يكون نص ونص وأكــره شي أسمــه "شــراكه" ..!!! طبعاً هالشي من وجهة نظـريه اما انتوا مادري عنــكم ..


كـل حد أدلا بدلوه في سالفة مريــم إلا أنــا .. أدري ماحد بيتقبــل هالتفكيــر اللي عنديـه .. مادري تفكيريه انا اللي غلط ولا تفكيــرهم !!!


المهــم .. أذن المغــرب وحط حد حق هالمناقشــات الطويـــله اللي ما انتهت بـ شي فيـه فايده .. سرنا نصلـي .. وانا تميت في حجرتيه لأني الصراحه عوّرنيه راسيـه من هالسـالفه ..

اففف شو بسوي .. ملل فظيـــع .. قررت اني اطلع من الحجره واتحمــل الصدعه ..

نزلت تحت وحصلت فطّوم يالسه فالصــاله اروحها ..

حموده: فطّّّوووووم ..

وسرت ووايهتها ..

حموده: شحالج ؟؟

فطوم: بخير الحمدلله من شفت عيونج الزرق ..

حموده: فديـت عيونج السود والله .. اسميج ييتي فوقتج .. الجو مكهرب هنيه .. بس مادلهم ويــن ؟؟

فطوم: قولي شو مستوي ؟؟

حموده: مريووم ريلها بيعرس عليــها ..

فطوم :حلفي انتي بس !!

حموده: والله العظيــم .. سوت لنا مناحه العصر ..

فطوم: أوووووووووه متى استوت هالبلاوي ونحن ماندري .. خلينيه بنشر الخبر عيل ..

حموده: أيــه انا مادري اذا لازم اقولج ولا لا .. يمكن هم مايبون حد يدري !!

فطوم: لا تخافين ماشي ينخش فهالعايله بخبر خويــلد ..

مره ثانيه حد يسميه خويلد .. ياناس والله مايركب عليـه !!

فطوم: تعالي ويايه هو فالميــلس ..

قامت وقمت وياها .. وسرنا صوب الميلس .. سلمت على خالد .. واشتغلت "إذاعة" فطوووم ..

فطوم: أيـــه خلّووود مادريــت ..؟؟

خالد: خلّود ؟؟ أصغر عيالج انا ؟؟ جانيه أكبر عنج بـ 15 سنه !!

فطوم: يوووه عاد خطفها هالمره .. مادريــت .. مريووم بيعرس عليــها ريلهــا ..

عقّد خالد حياته وسكت خلاف قال : أحســن تستاهــل ..

فطوم: يالله شكلك وايد حاقد عليها .. انزين ماتدري وينهم الحين ماحصلت حد غير حموده ..

خالد: شدراني انا ؟؟؟

كانت ملامحه تخوفنيه مع انها كانت عاديه .. يمكن لأنه رد على اسلوبه الجامد من عقب ماعرفت الجانب الثاني منه .. جموده هذا يخوفنيه .. وايـــد ..

حموده: لحظه بدق لهم بشوفهم ويــن ..

دقيــت على أول رقم طاحت عيوني عليه وهو رقم الريــم .. تم يصيح شوي وخلاف ردت ..

الريم: ألوووه ..

حموده: هــلا ريمووه .. ويــنكم انتوا البيت فاضي ؟؟

الريم: انا وسلّوم عند بيت خاليـه وبنبات عندهم .. اما مريوم وعيالها ويدوه وعموه واميه وابويه سايرين يحاربون قصدي سايرين صوب بيت اهل مطر عشان يتفاهمون وياه ..

حموده: ماشالله مريوم شاله وياها backup ..

الريم: هيــه عاد الله يعلم شو بيستوي ..

حموده: انزيــن أخليــج عيل .. باااي ..

الريم: بااي ..

فطوم: هااااااااااه شو مستوي ؟؟

حموده: عميه وحرمته وباقي الطائفه في بيت مطر يتفاهمون وياه .. اما الريم وسلامه في بيت خالهن وبيباتن عندهم ..

فطوم: أهـــا .. عيل لازم أتم هنيه عشان اشوف شو بيستوي خلاف ..

حموده: ياحبــج للمشــاكل انتي واخوج ..

طالعنيه خالد بطرف عينه ..

فطوم :شنسوي بعد ربج خلقنا جذيــه ..

خالد: انزيــن في خاطركم شي انا مروّح ..

حموده: سلامتك ..

ابتسم خالد وظهر من الميــلس .. يلســنا انا وفطوم نص ساعه تقريباً نسولــف .. وخلاف قالت فطوم ..

فطوم: أيــه حموده خليــنا نسيــر نمشــي ..

حموده: ويــن ؟؟

فطوم: فالشارع وين بعد ؟؟ نشم هوا شوي ..

حموده: اوكيــه ..

وطلـــعنا من البيــت صوب الشــارع .. وتمينا نمشــي .. وخلاف خطف علينا واحد و نزل الدريــشه .. وكان حـاط أغنيــة ميحد "متعني بصوتك" .. فطوم هي اللي كانت من صوب سيارته .. وكان يطالعها وهي ما تغشت ولا شي .. انا شكيت فالسالفه ..

السلاااااام عليييج والرحمهـ ..

تسلمييين خيتو عـ البااارت ..

فـ انتظااار البااارت الياااي ..


السموحهـ ..

واااو البارتات روووعه

استوى وايد تغيرات

انا اقول حمده بتحب خالد مع الوقت

سيس لاتتأخرين نتريا البارت

وثاانكس