|
(الجزء 41) • فطيم طايحة ع شبريتها : والله انه عواس .. لو مب عواس جان ما اعتفس ويه خالوه جذيه .. (وتسير حجرة نشبة ) يالله ما تنش .. يالله ما تنش .. (وخذت التيلفون وهي ساكتة وردت حجرتها ) والله انه عواس ..آآه يا ويله .. انزين ليش جذبوا علينا ؟ ( تتصل وهو راقد ) • عواس لا اراديا رد عليها : هاااه؟ ألو؟ • فطيم : مرحبا .. • عواس : اممم.. (وهي يخفق قلبها ) • فطيم : راقد؟ • عواس : همممم • فطيم : أحبك يا عواس .. • عواس : هااه؟ هممممم .. انته منو؟ (وبطل عين وحدة مب مستوعب شي) • فطيم : انا فطيم .. (وبند التيلفون الا غلقه ..ردت اتصلت كم من مرة .. بس هو كان مغفي ما يدري بالدنيا ) فديته ياربي رمسني !!! (اما ميود وصل البيت على الساعة 5 الفجر .. وكان يائس .. طاح على الغنفة في الصالة وما حس بعمره الا راقد .. وعلى الساعة 10) • شمسة : بسم الله الرحمن الرحيم .. شمايل ؟ بلاج؟ • شمايل : ما فية شي بس اطالع الاوادم من الدريشة .. ليش غلطت؟ • شمسة : لا امايا .. يالله سيري اتسبحي لين إييبون لنا الريوق .. • شمايل : ان شاء الله .. (وهي داشة الحمام ) • شمسة : خازت عنج اللوعة ؟ • شمايل : هيه • شمسة : انزين سيري سيري .. (ويوم سارت ) كيف خازت عنها اللوعة وهي في الثالث ؟ يعني يتها يوم او يومين بس؟ يالله اتقوّمها بالسلامة .. (وشمايل تتسبح) • شمايل فخاطرها : ما بستريح لين أكسر خشمك يا مايد .. انا تلعب بي؟ جيه انا شو سويت؟ طول عمري قلبي يخفق باسم مايد عمره ما نظر لحد ثاني غيرك .. ولا لأني طلبت منهم يعتدون عليّة ولا شي ؟ (وتصيح ) بس انا لازم ما اصيح ( وتحط ايدها على بطنها ) ليش ما احس فيك؟ كل بنية اتحس بوليدها .. الا انا !! يمكن ما عندي قلب .. طبعا ما عندي قلب من اللي صار .. وين بحّب الولد .. الله يصبرني بس (وفبيت حمد ) • نشبة : اقولكم البارحة سوالي واحد • شما: ويدي منو؟ • نشبة : واحد قال يباني اسوي جواز يديد • ميثاء : اعنبوا من شهرين مجددين لج .. • نشبة : قاللي الريال ان ما سويته ما بيطلع لي بيت .. • شما : ابووه !! قصدها هوية !! • ميثاء : ومتى سوا ما شفناه؟ • نشبة : امسات مسوي في الليل !! • ميثاء بججت عيونها : اييييه المدحوبة !! اي ريال يسوي في الليل؟ وين مكتب مفتوح في الليل؟ خلق الله رقود !! • نشبة : انتي شدراج؟ هذيلا قوم بو 12 ساعة عيل فيهم هيازة شراتج .. • ميثاء : ماعليه بنسويلنا يوم وبنسير .. • نشبة : شموس سوّت تيلفون؟ (ويصيح التيلفون ) • ميثاء : بسم الله يالساحرة !! يالساحرة !! • نشبة : اذكري الله ميثووه عن اتعجيني !! • ميثاء ترد : مرحبا .. • الجود : سلامن عليج خويتيه .. • ميثاء : عليج السلام والرحمة .. • الجود : وياج خويتج الجود بنت سعيد .. • ميثاء : مرحبا .. مرحبا الساع .. • الجود : مرحبا بخويتيه .. ياختيه امسات حرقنا تلفونكم ومحد يرد .. • ميثاء : هيييه يا امايا سامحينا كنا فبيت غريبة .. انتي شحالج وشحال البنات ؟ • الجود : بخير ربي يعافيج .. عاد نحن قلنا بني اليوم .. وبنخطب بنتكم .. الهند حق رويشد ولد ولديّة ..ويوم رمسنا ابوها قال تعالوا دبي ... • ميثاء انصدمت : سامحينا موول ما ندري يا خويتيه .. هذا ملعون الصير فضول !! انتي بغيتي منو من البنات؟ • الجود : هند .. هند .. • ميثاء استانست : حياكم الله أي وقت يا غناتي .. (وردت بها الحاسية ) جيه انتوا قلتوا لأبوها؟ • الجود : بسم الله عليج شكلج مغفية .. امايا قاللنا ابوها تعالوا دبي • ..ميثاء : اشوووه؟ جيه؟ خويتيه بسويلج خلاف وبرد عليج الخبر .. • الجود : على خير ان شاء الله .. سلمي سلمي (وبندت عنها ( • ميثاء : واعثرتي عثراااه .. • شما : خير؟ خير؟ • ميثاء : الله يستر من فضول لا بركتن فيه ولا في اللي يابه .. • شما : جيه شو مستوي • ميثاء : جان ما إييّوز هنود !! (ويصيح التيلفون ) شموه !! طرشي زهور تزجر غروب دهديه !! (وترد ) مرحبا .. • ام مانع : مرحبا الساع .. علومج ميثوه؟ • ميثاء : تسّرج علومي يا غناتي .. انتي علومج؟ • ام مانع : بخير والله .. ميثوه؟ ابا اكلمج فسالفة لكن مخيّلة منج (=مستحية منج ) • ميثاء : افا يا عويش من خويتج؟ • ام مانع : ترا والله متلوّمة منج .. • ميثاء : خير؟ • ام مانع : مانع يبا يخطب هنيد .. (ميثاء حطت ايدها على راسها ) • ميثاء : وابوييه .. وابوويييه .. • ام مانع : ادري والله .. أدري وانا اعرف ردكم .. بس ماباج تكدرين عمرج .. • ميثاء فوّلت : احينه يبا هنود؟ جان قلتي له من زمان جدامك .. توّك تباها؟ وبعد على عصمتك عديلة !! اتهبي !! • ام مانع : انزين ميثوه .. امسحيها فويهي ..ورمسي البنية واذا قالت لا .. عمرنا ما بنطريها السالفة .. عشان ما نعيش الندم .. • ميثاء : على خير ان شاء الله .. • ام مانع : تراه فضّول زاجرنه بيكلمه .. • ميثاء : متى ها؟ • ام مانع: هاا امسات .. • ميثاء : والخيبة اتخيبه من أبو .. (وبعد ما بندت عن ام مانع ..) • غريبة : سلامن عليكن .. • ميثاء : لحقي يا غروب .. لحقي على ريلج الهيس !! بيسوي فلم هندي ببنتج !! • غريبة منصدمة : بلاه؟ • ميثاء: اليوم متصلة الجود .. الحرمة .. راعية بوظبي بتخطب هنود لراشد .. • غريبة ابتسمت : يالله هاي الساعة المباركة .. • ميثاء : لا وبشيرج .. متصلة ام مانع اتخطب هنود لمانع بعد .. • نشبة مبججة عيونها : والخيبة !!! مب حظ عليها هالبنية .. على ايامنا ما استوا جذيه .. • غريبة : وابوييه .. إشوووه هذا !! • ميثاء : قومي نشي وعّي ميود !! خلينا نتلاحق عليهم .. فضّول بييّمع مانع وراشد .. • غريبة : أخييييج يا فضيحتنا !! (وخلّت راشد الصغير عند فطيم .. وربعت البيت ) قم !! قم بوطبر قم !! • مايد : شو يا امايا .. والله اني ياي الصبح .. • غريبة : قم يا ريال البيت .. ابوك بيفضحنا جدام العرب !! (وخبّرته بالسالفة .. وسار اتسبح واتلبس .. وسارت وياهم ميثاء .. يعني غريبة وميثاء ومايد بس .. اما عند مي وهنود ) • مي: خلاص خلصتي؟ (هنود اتعدل شيلتها وتهز راسها بالايجاب ) • هنود فخاطرها: يالله تستر .. يالله ما تكون امها مستجلبة !! (وهن نازلات .. يسمعن تيلفزيون .. طارين علية ..) • .............: يمه قرصتني عقربة .. (ويسمعن دبيج ) • مي: السلام عليكم .. (ويوم صدن يمين انه وحدة قصيرة متصابية ومترصصة بالبنطلون .. وقابضتنها رقص ..وهن منصدمات ) السلام عليكم.. زينة صدت وسارت لهم مسرعة : هالو !! هالو !!هالو يا عيوني .. (ومي تنتفض ) هلا ببنيتي .. (وزينة تصيح وعلى طول حضنت هنود ) • هنود فخاطرها : مب انا والله !! مب انا .. • زينة : انا ما كنت ادري انه بنتي جميلة جذيه .. آآآه ويلي عليج .. • مي : شو ها.؟ (وكانت حرمة قصيرة وما فيها وايد حلاة .. عمرها 45 سنة بس تبيّن اصغر متمكيجة ..شعرها اسود وفيه خصل شقر ..وضعيفة بس ويهها منتفخ .. ) انا بنتج هب هي !!! • زينة منصدمة : شنو؟ (وترد تحضن مي ) سامحيني يا بنيتي .. شمدريني .. ههههه • هنود فخاطرها : اتخبلت الحرمة .. (ويلسوا يتريجون ومي اتطالع امها وهذيجي اترمسها بس كانت مي تتأملها .. ) • مي فخاطرها : هاكيه امي العراقية .. هاكيه .. جدام عيني ما ينلامون العرب يوم كانوا يعلقون علية !! كانوا يعرفون انها رقاصة فمرقص .. (ودموعها يغرغرن ) • زينة : آآه ويلي شفيج يا نظر امج؟ • مي : انا ما روم .. ابا ارد ليوا .. • زينة : شنو؟ انتي شنو تقولين؟ ما بيج اتحجين .. انتوا جايين هنانه وبتمون هنانه .. هذا بيتكم .. • مي معصبة : بيت ما ربيت فيه؟ بيت الرقاصة اللي يابتني؟ بيت تيب رياييل؟ بيت تشرب غراش الخمر؟ • زينة : انا يا مي ؟ اتحجين عن امج كذيه؟ • مي: انتي ام في الجواز (وقامت هنود تتمسل وسارت الحجرة ) لكن اللي ربتني وعدتني من بناتها اميه غريبة تفهمين؟ • زينة تصيح : بس انا يا بنيتي ..ابوج اللي خذاج عني .. انا ما كنت رايدة هالشي .. • مي : رايدة ولا هب رايدة !! من يوم انا ياهل يعايروني ببنت العراقية ما كنت افتهم .. وكبر ويايه هالشي .. لدرجة كرهت بلادج .. بس احينه خلهم يقولون ويشبعون بعد .. انا امي اماراتية وابويه بعد ..في وايد ناس من العراق نفسهم عزيزة لكن انتي؟ انتي من حثالة المجتمع !! • زينة : ياعيوني .. انتي ما تعرفي حالة بلادنا كيف .. • مي: لو فيها دمار شامل .. انا اقولج اتمنى اتكون اميه عراقية ويالسة في بلادها .. مب ياية تعرض نفسها في المراقص !! (وروحت الحجرة وهي مفوّلة ) ( اما في مستشفى الامل ) • شمايل : يالله يا اميه .. هذا المستشفى وايد عود ...وايد عرب فيه .. حتى رياييل .. اخاف .. (واندست في ذراع امها) • شمسة : اذكري الله ..اانا حاطتلج في الشنطة مصحف .. • الممرضة : نحن هني بنستلمها .. • شمسة : أي شي سوولي تيلفون .. • الممرضة : ان شاء الله .. (وتوّها الممرضة بتكمل كلامها .. ما حسّت الا بشمايل حاضنة شمسة .. ويوم روحت ) هناء ...حبيبتي .. (وشمايل تصد يمين ويسار مستغربة وينها هنوه ..وعقب اتذكرت انه امها حاطتنها باسم هناء ) اعتبريني ربيعتج وناديني متى تريدين .. (وطاف جدامهم واحد زين ما جلّع جتف شمايل .. وقامت تتنافض ويلست عالارض ) • الممرضة : هوووه !! هووووه!!! هزاع على وين العزم؟ • هزاع : بسير اسوي مكالمة .. • الممرضة : خلص الوقت .. • هزاع : ماشاء الله عضوة يديدة!! مخدرات ولا خبال؟ • الممرضة : هناء لحظة بروح انادي الممرض المناوب عشان يوّديه .. • هزاع : ليش هذا كله؟ قبل لازم اتصل .. • الممرضة : طوف جدامي .. اتحمل اتقرب منها لأنها حالتها حالة اغتصاب .. (وهو يمشي على جدام وصاد وراء يطالعها اللي كان ما يبيّن شي غير ويهها بس اتنافض ) • شمايل فخاطرها : ربي سترك !! ربي سترك .. هذيلا اللي فيهم اعواق الدنيا كلها ميوبين هنه؟ الله يستر يمكن يعفدون علية !! انا ادريبهم هذيلا ما يشوفون شي جدامهم ولا يحسّون بالذنب !! (ويفلت هزاع عمره من الممرضة ويركض صوب شمايل وهي اتطالعه ودموعها نزلن وقلبها يخفق من الزياغ ... ومن وصل عندها نزل على ركبته ومسكها من جتوفها ...وهي داسة راسها على ركبتها) |
(الجزء 42) • هزاع : اعتبريني اخوج .. يوم محد بيسمعج .. انا اللي بسمعج يا شمايل .. انا دوم اكون في الحديقة العصر على الساعة 5 اترياج .. • الممرضة : هزاع !! مب كأنك زوّدتها؟ شكلها اقامتك بتطوّل !! (وروّح وياها .. وهي تمت مبهّتة و منصدمة ومن رفعت راسها ) • شمايل فخاطرها : كيف عرف اني شمايل؟ هذا جذاب !! اكيد من ربع هاييلا !! (وودوها حجرتها .. كانت عبارة عن سريرين ومطلة عالحديقة وفيها سور يعني من سابع المستحيلات الشردة من هالمكان .. يعني اللي مسّواي حق شمايل كنها يالسة في فندق 5 نجوم .. وطاحت عالشبرية .. ) • شمايل : احينه انا وانته بنتجابل وايد .. آآخ يا ولدي .. مادري كيف بتعامل وياك .. اخافني اقصّر فحقك .. (ودخلت الممرضة ) • الممرضة : لا تخافين بس بنسوي تحاليل !! • شمايل : لا !! مابا تحاليل !! • الممرضة : لازم حبيبتي .. عشان الدكتور النفسي يوم بيعطيج الدوا .. ما يكون له آثار يمكن عندج حساسية من شي معين .. • شمايل داست على كرامتها : ان شاء الله .. • الممرضة : شكرا .. معظم اللي إيونا المستشفى ما يتجاوبون بس انتي ما شاء الله عليج .. • شمايل فخاطرها : يالله تستر علية !ولا الفضيحة .. يالله ما تكتشف اني حامل .. بس لازم كرامتي فوق كل شي ولا ميود الهرم ...آآآخ كيف حبه لبسني ... (اما عند عيسى ) • حسن : عواس؟ قوم . قوم ... • عيسى : هممم .. والله ما شبعت والله .. • حسن : فوّتت حصة الرياضة .. احينه بتيك الممرضة .. • عيسى بطل عينه : يالله !! فاتتني صلاة الفير .. (وقام مال بسرعة بسرعة وتوضأ وصلّى وبعد الصلاة سار يتسبح ويوم طلع ) تعال ما خبرتك حسون ... (وهم يتريقون ) هاكي اليوم سرت بعطي الممرضة بيزات على فزعتها ما رضت .. ممرضات اخر زمن .. ناس يتمنون وهي خجاجة .. ما رضت !! • حسن ميت من الضحك :انته اتعرف منو هاي؟ • عيسى يرد شعره على ورا : ملكة جمال امريكا ؟ • حسن : ياريت !! هذي بنت واحد مرشح مال الانتخابات .. سيناتور سيناتور !! يعني مليارديرية !! • عيسى : والخيبة هههههههههههههههه عشان جيه ما بغت البيزات مب من مستواها .. • حسن : عيل شو اتحرى ؟ • عيسى : بس حليلها خيّرة .. • حسن : الا تحبك !! • عيسى منصدم : اتحبني؟ • حسن : اتعرف انه يوم كنت فحالة الادمان مول ما هدتك .. كانت ليلها بنهارها موجودة .. • عيسى : حليلها غمضتني .. بيض الله ويهها .. صدق انها نشمية .. • حسن : هههههههههههههههاااااااااااااي عاش نمر بن عدوان !! انزين عواس كم بتعطيني؟ • عيسى : اللي في البوك .. خير؟ • حسن : هههههههه ماباه بوكك !! انا اليوم بسافر بالسلامة .. خخخخخ • عيسى : يابوك سامحني عجيتك فنشبة ويايه ... • حسن يضحك: احيدها اميه نشبة في ليوا ... • عيسى : ههههههههههههههااااااااااي وأبشرك بتسير تسوي هوية .. (وحسن ميت من الضحك) • حسن : بسألك شو استوا في الحادث؟ • عيسى : يعني هذا وقته؟ • حسن : انته من يبناك لين حزتها ما طعت ترمس .. • عيسى : شو اخبرك؟ اخبرك اني انجتلت من الضرب .. بس الحمدلله .. الحمدلله والشكر انه الله نجّاني .. يعني لو واحد مكاني جان مات .. بس بعد الضرب اللي حصلته .. مول ما انسى هالباكستاني اللوث !! اللي خبر علية !! وما حسيت الا شالني وعاجيني في الدبة .. ولا الحقيرة ميووه !! نزلت راسي .. (وعيونه احمرن ..) وودوني مكان ما اذكر وين .. الله يغربله .. وهدّاني هناكي في السيح .. ويوم وصلت عند الرصيف وانا ميت وداير راسي .. كنت حاس بالدوار .. رقدت عالشارع لأنه بعدها شفت واحد هندي يرمسني وهو زايغ .. وشلاني ودليته بيتك ..ما رمت اخليه يردني البيت عن يستوي شي بأميه وخواتي .. • حسن يبا يغير السالفة: عواس ...؟ • عيسى : خير؟ • حسن : ابا اخطب وحدة من اهلك .. • عيسى مبتسم : هذي الساعة المباركة.. منو بغيت؟ انته آمر .. • حسن : ما يامر عليك عدو .. • عيسى : الهند؟ • حسن : لالالا تبا تستوي المشاكل بيني وبين منوع .. مع احترامي ما اقدر .. • عيسى : مي؟ بس مي اكبر عنك .. • حسن : لالالالا الا مي !! • عيسى : جيه بلاها مي؟ (واتذكر الكلام اللي انقال في التيلفون ) غير عن مي .. المشكلة شمايل حق ميود .. ولا جان يوّزتك الحليوة .. شو رايك ب فطوم؟ • حسن مبجج عيونه : فطوم؟ ايييه عواس؟ اتخبلت؟ • عيسى : ليش اتخبل هاه؟ البنية ما تباني ولا اتطيقني بعيشة الله .. • حسن : انزين انا ماروم آخذها .. منو بعد؟ في حدباجي؟ • عيسى : همممم هيه هنوه ؟؟ ههههههههههههه هذي البنية شيطانة .. بس حليلها طيبة .. • حسن : عيل من اتخلص من الدورة والدراسة .. شو رايك اترمس اهلها؟ • عيسى : على خير ان شاء الله .. وبعد بتكون مخلصة الثانوية .. • حسن : تشبه منو؟ • عيسى : تشبهني هههههههههههههههه وابويه عليك من احينه مستعيل؟ • حسن : انزين طيارتي عالساعة 1 في الليل وانته شكلك تتمايط .. يعني الدكتور وقّع على ورقة الخروج وانته شكلك عايبتنك بنت السيناتور .. • عيسى : انا ما ااتدش راسي الا قهوة البلاد .. • حسن : هااه؟ ثرك ما تحب الكوفي الغسالة .؟ • عيسى : لا لله احب القهوة العربية راعية الهيل والزعفران .. • حسن شاف تيلفون عالارض وشلاه : يا مستهتر !! الشيخ يعطيك موبايله جذيه اتسوي؟ • عيسى : هههههههههه مب قصدي والله اتعرف كنت حلمان اني اكلم فطيم .. • حسن : عشقك لها ماله حدود .. • عيسى : قول عشقي لها وقّف يوم استوالي الحادث .. (وطلع من المستشفى وحط اغراضه ف شقة حسن وساروا يتمشون .. اما في دبي ..) • مايد : والله يا امايا دار راسي ويوعان .. • غريبة : ودنا مكان خلنا ناكل .. • ميثاء : ودنا مكان نتيّدد بيأذن العصر .. • مايد : خلونا انرد البلاد .. ابويه ترا والله ما يرد متقصد انه ما يرد .. ونحن اندوّر في المنطقة ومحد يعرفهم .. • ميثاء : الا نحصلهم !! (ووداهم ياكلون لهم شي ) • غريبة : تصدقين يا اميه؟ يت في راسي فكرة .. • ميثاء : خير؟ • غريبة : فضول طول عمره ما يستحمل هندوه !! مول ما يقهرها .. لو انا قلت له انا ياية آخذها بيناحس وما بيرضى !! شو رايج يا ميه اذا سألنا ليش يايين .. بنقوله عشان ناخذ راي البنية وانروّح وهو اعطيج ضمان من يحيدنا ظاهرين بيقول شليها وياج ماروم لها .. • ميثاء : هي والله صدقتي طول عمره ما يدانيها مع انها من لحمه ودمه .. (اما بعد أذان المغرب .. كان راشد ويا عمه علي وعواد .. ووصلوا عند بيت فاضل وكانوا في الميلس ) • عواد يصاصر راشد : يقول الشاعر .. (واحمر ويه راشد ) • راشد : انطب مب وقته !! • عواد : يالله كل هذا حق العروس؟ والسيوفي يصل من اذنيك لو شمته اخافها اتدوّخ.. ثرك متعبن حالها يا رويشد !! هههههههههه • راشد يدفره بكوعه : بتسكت ولا هههههه • علي: والله يا بوعيسى .. نحن يايين انخطب بنتك هند ل راشد ولد اخويه .. • فاضل: والله زارتنا البركة يا بوحمدان .. (وحد يدق الباب .. فاضل سار يبطل الباب ..) • مانع: السلام عليكم .. (وكلهم ردوا السلام .. ويلّم عليهم ) • عواد يصاصر راشد : هذا اخوها؟ • راشد : شكله مايد اخوها .. (وكان مانع منصدم .. منو هذيلا ..) • علي: وبغينا انعرف رايك .. (اما عند الدكان ) • مايد : بابا؟ في بيت جديد مال ماما زينة مال دانس ؟ • الهندي : انته شنو يقول؟ • مايد: في عرف بيت مال مامازينة؟ • الهندي :إيييه .. هذوه !! (وكان مجابل الدكان ) • مايد : والخيبة هب بيت .. قصر !! (ومن وصلوا .. بطلت ميثاء الباب ) • زينة : هوووه هوووه من تريدين؟ • ميثاء: جاب يالله جاب ..إلتعني مكانج وان اتحركتي يا ويلج وسواد ليلج ... (وتصارخ ) ميووه؟ يا هندوه ؟ (ومي طالعة من المطبخ ) • مي : امايا !! • غريبة : واااايه فديت يومج يا غناتي ... (وتحضنها ) لا خليت من هالويه . • .ميثاء بججت عيونها : سمعيني يالرقاصة !! أي وحدة حجرة هنود؟ • زينة : م م م م م • ميثاء تزاعج : رمسي لا بركتن فيج !! • زينة : مدري (وزايغة ) • مي : اول حجرة عاليسار .. (وتسير ميثاء فوق وهي مفوّلة وكانت توقعاتها انه هنود بترضخ وتبا مانع .. وبطلت الباب فجأة وزاغت هنود ) • هنود فخاطرها: بسم الله الرحمن الرحيم !! • ميثاء : هندوه ؟ تبين تاخذين منوع ولا رشود؟ (وهذيجي تهز راسها مب عارفة شو السالفة ) • هنود فخاطرها : شو قصدها؟ • ميثاء : يالله دهديه قولي !! مانع ولا راشد ؟ .. ولا اقولج؟ قومي ... قومي يالله !! لبسي وجايتج !! • هنود فخاطرها : امييييه بلاها يدوه زيغتني !! (وميثاء ساحبة هنود لين تحت ) • غريبة : وااايه هنود !!! • هنود فخاطرها : امييييه !! (وعيونها كله دموع ..) • ميثاء : إييييه الهزازة وين الميلس؟ (واتأشر زينة ) • مي : شو مستوي اميه؟ (ويسيرون الميلس ويدقون الباب ويفتح فاضل ) • فاضل : شو تسوين هنه؟ (ميثاء تدفره بعيد ) • ميثاء : قوم عني يالنيس .. سلامن عليكم يا عرب زايد سامحوني قاطعتكم .. (وهنود منخشة ورا ميثاء ونازلة لين مستوى جتفها وكلهم وقفوا وردوا السلام بس مستغربين .. ) بس انا يدة هند ومابغي اغشكم مثلما سوا ابوها .. قصده يايبنكم هنه يبا يشوف منو الدفّيع اكثر .. • فاضل احمر ويهه : عيب يا ميثوه !! • ميثاء : انته اتعرف العيب ؟ هاه؟ مسّود الويه !! • راشد فخاطره : يغشنا؟ • ميثاء : تراه هو يحاتي البيزة .. وانتوا يايين اتخطبون صح يا راشد .. ويا مانع؟ (صدوا الشباب على بعض وهنود بعد ) • هنود فخاطرها : وابويييه شو اللي صاير !! منوع ورشود؟؟ • ميثاء : هذي البنت جدامكم (وصدت ورا ) اشوفك ما رمست يا فضول؟ • فاضل : تجذبين جدام العرب؟ (وهنود اتمسّل ايدها تبا تشرد ) • ميثاء تهزبها : تمي مكانج ولا اتحركين ..بس ابا اراويكم .. منو اللي يجذب ومنو اللي صادق .. (وتسحب هنود جدام عشان تي حذالها وهذيجي منزلة راسها) طوفي جدامي الحينه .. كلهم شهود .. منو بغيتي؟ مانع ولا راشد؟ • علي: جانه غصب ما نريد يا اختيه .. • ميثاء : هب غصب بس خله تختار عشان ما تقول ظلمناها او غصبناها .. وعشان ما يظلمها ابوها !! • مانع فخاطره : اكيد تباني .. الله يستر ما تسوي حركة خساس وتاخذ رشود .. • راشد يطالعها وفخاطره : ليتني ما حطيتج فهالموقف ولا شفت دمعتج • ميثاء : ترا جدامكم البنت تراها ما تتكلم .. منو بغيتي؟ (وردت تبا تشرد وكانت تصيح ومغطية ويهها ومستحية .. يالله يا فضيحتها ) • هنود فخاطرها : ماباه يطالعني وانا اصيح !! • ميثاء بحزم : ردي اقولج !! (وكانن ورا الباب يتسمعن غريبة ومي ) يالله اشوف أشري !! (واتدزها على جدام وكانت تتنافض وهم على اعصابهم ومنصدمين من اللي صاير .. ورفعت ايدها وأشّرت عليه واحمر ويهها زيادة وسيده على طول وقفت ورا ميثاء) |
(الجزء 43) • عواد وراشد يطالعون بعض : ههههههههههههههاااااااااااااااااااااااي .. (لأنه هنود أشّرت على العم علي .. اللي كان منصدم وضحك .. وكانت تبا تسويلهم جو ولا هالجو المشحون ) • علي: انا؟ ههههههههههههههههههههههههه • ميثاء : حسبي الله عليج !! فضحتينا !! غربلج الله ... (وهنود تضحك عالهزاز .. ومانع ملامحه جدية ) • علي: خالوه تفضلي يلسي ولا تحرقين اعصابج .. ترا بنتج سوّت لنا جو لأنه شوي مشحون .. اتفضلي اتفضلي .. (ويلست مجابلتنهم وحذالها هند اللي كانت على ريولها وفخاطرها ترفعهم واتطالع حبيب القلب رشود ..) • ميثاء : زاد فضلك يابويه .. سامحنا والله بس هذي ذمة .. (واتطالع فاضل اللي منصدم اللي لا يهش ولا ينش .. وخصوصا جدام ميثاء ) البنية حرام يتسوى فيها هالشي .. وانا ماباها تنظلم على إيد ابوها وخصوصا انه البيزة حارقتنه .. (وحزتها احمر ويه فضّول .. وهنود متيّودة فإيد ميثاء .. وميثاء اتحاول تفلت إيد هنود عشان تتكلم على راحتها ) • هنود فخاطرها : يالله .. سبحان الله .. احينه مانع يركض ورايه؟ بعد كل المشاكل؟ لا وراشد اللي سبيته هاكي اليوم وظلمته .. راشد ...آآآخ منك .. • ميثاء صدت صوبها : بس يا هنود .. هديني خليني اتكلم .. الله يهديج .. (وراشد يبتسم وفيه ضحكة .. وعواد حليله ضحك بس عالهزاز .. وهي تتكلم ) • مانع فخاطره : سبحان اللي خلقج يا ام عيون رصاصية .. والله لو يطلبون مهرج اللي يبونه يفداج .. • ميثاء : شو رايج يا هنيد؟ منو بغيتي؟ (و يت اللحظة الحاسمة واتأشر عليه ) • هنود فخاطرها : ابا راشد .. اباه .. كيف ماباه وانا عاشقتنه .. (وطلعت وهي منحرجة ..) • راشد فخاطره : واااااااااااااااايه يعلني افدااااج وافدا هالصبع اللي أشر علية !!! • عواد : بالبركة .. بالبركة يا راشد .. (مانع قام من مكانه وهو مفوّل الا منصدم وطلع .. ) • مانع: انا؟ انا ترفضني ؟ لويش؟ كله عشان ما خذتها؟ وخذت ربيعتها؟ يعلج ما تتهنين مثل ما حطمتي قلبي يا هنود !! (وعلي يسلم على فاضل وحتى الشباب ..) • ميثاء : عاد شرطنا .. • علي: اللي تريدونه نحن حاضرين .. • ميثاء اتطالع فاضل : نبا اغلى مهر .. (وفاضل سيده ابتسم ) وهو انكم تدفعون للمليج 50 درهم وعن الملجة ويقرا آية الكرسي .. وهذا هو المهر .. وان طلب ابوها شي ثاني تراني بلغي الزواج ..وأسويها يا فضّول .. (فضول منصدم ويلس مكانه ) • راشد ميت من الفرحة : جان تبين خالوه بقرا لج الآية الحينه جان بغيتي تراني حافظنها ... • ميثاء تضحك : حسبي الله على منكرك مستعيل عالملجة؟ ههههههههههه شو رايك يابويه؟ • علي: هذا العرس العدل .. والزهبة علينا .. متى تبونا نملج؟ • ميثاء : انتوا متى تبون؟ • علي: الاسبوع الياي .. (وراشد ينغز علي ) • راشد : خله عقب يومين ... (وعلي متعجب منه ) • ميثاء : على خير ان شاء الله .. عاد يا راشد لا تقول من نملج ملجة الرياييل بشوفها وبتم وياها.. خمس دقايق وبتطلع تسمعني؟ يوم عزيمة الحريم بتشوفها .. (وانقطعت آمال راشد اللي كان متحمس ) • عواد: يقولكم الشاعر .. • ميثاء : شو يقول يابويه؟ • عواد: يقولكم بالبركة عليكم ويعله مبارك وسعيد ..اوووب قصدي راشد.. • ميثاء : علينا وعليك يابويه عقبال ما نشوفك معرس • عواد :هههههههههه خالتيّه انا معرس وتحتي ذرذور عيال هههههههههه • علي: على بركة الله.. (ويسمعون داخل ) • غريبة : كللللويييييييييييييييييييييييييييييييييييش ..وااايه بالبركة .. (وتحضن هنود ) يالله يا فرحتي اليوم.. • مي : بالبركة يا عيوني .. (واتسلم عليهم ) • هنود فخاطرها : الله يبارك فيكم ..اخجلتوني .. يالله يا رشود انته من نصيبي يا عيوني ..ههههه • غريبة : يعلج يا ميوه يا بنتي يا خبز إيدي بريل شيخ او تاجر .. • مي تضحك : فديتج يا امايا .. • غريبة : تصدقين يا ميوه انه ميود متوله عليج؟ (مي تضحك ) • مي : آنيي؟ من متى يا حظي؟ • غريبة : والله .. يقول قبل اشوفها وألعوزهاوتيلس تصارخ .. وأحينه البيت مب شي بدونها .. • مي : وااايه فديته .. (ويتها الصيحة ) وينه هو؟ • غريبة : في الموتر .. ما طاع ينزل .. (وتركض برع .. وتبطل الباب ..) • مي : ميود !! (وتحضنه وهو منصدم ) تولهت عليك يا بوطبر !! (وتضربه على راسه ) • مايد : هههههههه آآي انتي ام طبر طالعه على اخوج .. متى بتردين؟ • مي : اممممممممممم يوم بيبيض الديج .. • مايد : وبعده ما باض ؟ • مي : اصلا محد متوله عليّة ليش ارد.؟ • مايد : ميووه جاب يالله جاب هذا كله .. ومحد متوله عليج يالبطرانة؟ وباجر بنخبركم اذا سارت شمايل عالموعد ولا لأ.. هل بتلتقي ميود او هزاع .. |
(الجزء 44) • ميثاء : انزين عيل بنترخص .. واسمعني عدل يا فضول .. جان تباني أستر على فعايلك جدام الهزازة .. اتتمم عرس بنتك على خير .. وزهاب البنت علية لا تخاف عالبيزة .. (وزينة توايج من المطبخ ..) • فاضل: وليش بخاف عالبيزة دامني بايع البنية وبفتك منها.. • ميثاء اشتطت : غروب !! يالله طوفي .. • مي: على وين؟ (وهنود متعلقة فأمها ) • غريبة بحزم : تموا عند ابوكم .. (وفاضل منصدم ) • فاضل : اكملت !! وانتي ما تبين تربينهن؟ • غريبة : شعلية انا؟ بناتك انته أولابهن !! تراك انته اللي خذتهن.. (وغريبة تصاصر هنود ) لعوزيه هو وحرمته صدقيني بيّردكم عندنا .. (وهنود منصدمة من كلام امها ) • مي : اميه ما تبينا؟ • غريبة : اباكم .. بس يوم بتكرون لي خشم ابوكم .. تذكرين يا مي؟ تتذكر يا فضّول؟ (فاضل صد الجهة الثانية ) • فاضل : يالله اتوكلوا بدون مطرود .. • ميثاء : لا تخاف الاسبوع الياي بني .. اووووووووووه .. قصدي بنطرش لكم البيزات ويا ميود عشان تجهزونها .. ياله غروب .. (وروحن بس كانن في الموتر منكسرات .. لأنهن اتوقعن انه فاضل بيمشي البنات وياهم ..) • غريبة : امايا شفتي ويه ميووه ؟ والله انها غمضتني ... • ميثاء : الله يستر من الهزازة وملاعيبها .. • غريبة : وابوييه ... اخاف اتسوي شي فبناتي .. • ميثاء : اذكري الله .. انتي ما حفّظتي هندوه؟ اكيد بتنفذه دامنه السالفة فيها شطانة !! يا امايا ما شفتيها اليوم فشلتنا جدام العرب .. • غريبة : جيه شو سوّت؟ • ميثاء : انا اقول لها أشري منو بغيتي .. والهرمة أشرت على عمه !! • مايد : هههههههههههاااااااااااااااي .. مسوّدة الويه !! • غريبة : هههههه حسبي الله على منكرها من بنت !! • مايد : امايا .. • غريبة : ها يابويه .. • مايد : سوي حق خالوه شموس .. • ميثاء تنهد عليه : سوّد ويه ابوك يالهرم !! (وتضربه على راسه ) بوطبر تبا تاخذ شملوه عشان بيزاتها !! هذا اللي ربيناك عليه ؟ • مايد : انا؟ امايا انا اللي قلته حق ابويه بس كلام عشان يسكت .. ولا انا رايد شمايل .. • ميثاء : جذوب اسميك انك جذوب . • مايد : ب شو احلف لج يا امايا .. • غريبة : لا تحلف ولا شي .. تبا البنية؟ إلحقها ودوّرها نحن ما يخصنا .. • مايد يتوّعد : صدقوني ان حصلتها باخذها غصب (ن) عن الكل .. • ميثاء : بوطبر !! لا تهمل شغلك !! بيفنشونك !! ومحد بيّدور لك .. • مايد: يلتعن الشغل .. اهم شي غناتي ما تبتعد عن نظري .. كانت تدوم جدامي حتى لو أهزبها بس اهم شي اني كنت اشوفها دوم .. حتى يوم كانت تركب ع الدري وتعفد من بيتهم لبيتكم يا امايا .. نظري موول ما يخوز عنها .. (اما عند هزاع ) • هزاع : ليش ما يت؟ حليلها ما اتوقعت انه اخت هنوه يفرونها في النفسية .. الله يعينها ويصبرها .. لازم هنوه اتكون بدالها مسوّدة الويه .. انا لازم أساعدها .. (وشمسة من وصلت ليوا سيده سارت بيتها ودخلت حجرتها تصيح حتى ما سألت عن هناء .. اول شي دوم بناتها جدام عينها .. كيف بتتعود على فراق شمايل اللي مالية البيت كانت بضحكتها وحتى هدوءها .. اما عند فاضل وزينة في الحجرة ) • زينة : حسبي الله عليها من عيوز مخرفة !! تطلب مهر انه يقرون آية ؟ لا صارت ولا استوت !! لعنبوا شنو هذا العقل !! لا وانا سامعة انه عريس مريّش وعنده بدال المليون ملاييين .. • فاضل : الله ياخذها من عيوز محيصنة !! غصصت بي .. قهرتني !! لكن انا براويها خله الملجة اتعدي وانا ببهدل فبنتها اللي رافعة راسها بها .. دوم هنود وهنود ولا جنه عندهم بنت ثانية .. • زينة : واعلية عليج يا بنيتي اكيد مشغلينج خدامة عندهم .. • فاضل : ما شفتيهم كيف يحتقرونها ويسبونها كل يوم وخصوصا غرّوب .. ومانعتنها من الشغل وحتى الظهرة .. حتى الثياب اتلبسها ثياب هنود المستعملة .. • زينة : آآآويلي .. آآآويلي عليج يا بنيتي .. وانته ساكت ما تقول شي؟ • فاضل : انا تراني ما رمت عليها ويوم طفح الكيل تراني طلقتها وسحبت هندوه بس عشان اكسر قلبها التعبان هذا !! • زينة: اشوف فيج يوم اسود يا غرّوب .. يعلج ما تتهنين فحياتج كلها .. • فاضل : زينة ما خبرتيني سرتي المحطة تسالين عن اوراق ميوه؟ • زينة: إيييه رحت قبل ما تجون .. والصراحة ما كانوا موافقين لأنها ما فيها مقاييس جمال .. • فاضل : وبعدين.؟ • زينة: الواسطة ما تقول لأ !! ههههههههه كلمت واحد يشتغل في المحطة ... بس على امل انها تستغني عن العباة والشيلة.. أصلا شنو هالعبايا .. انا ما ألبس أخلي بنتي تلبس؟ • فاضل : إييييه زينة !! مجتمعنا ما يرضى .. عيب اصلا .. • زينة : والله انته ومجتمعك طقوا روسكم .. انا هذي بنتي انتوا شكوا؟ • فاضل : يصير خير ..اللي تبينه بيصير .. بس هنود مالج خص فيها .. ما فينا انا روحي ابا الفكة منها ما فية اتطيح فجبدي ويشرد عنها المعرس .. • زينة: باجر راح نروح السوق نشتري اغراض الملجة .. وبنسوي تغيير لوك حق بنيتي وبنتك لوجه الله عشان ما يقولون زينة النسرة ما سوّت شي وما فيها خير يا عيوني .. • فاضل : انتي اصلا الخير كله .. انزين ما خبرتيني متى بتحولين لي البيزات عشان امشي عمري في المشروع .؟؟ • زينة : آآني راح افكر وأرد عليك .. انته اتعرف انها فلوس مش لعبة يا عيون زينة .. (حزتها سكت وميت من الغصة لأنه الغصة يته من صوبين زينة وميثاء خخخخخخ دواه ..وعند البنات ) • مي : حظج يا عيوني .. لا وبعد يايينج اثنينه .. عمري ما شفت خطبة جذيه .. • هنود تكتب : عقبالج يالسبالة .. • مي : على قولة ماماتي ب شيخ او تاجر .. • هنود تكتب : تحلمين انتي واميه ...وااااااااااااااااااايد !! (مي تضربها على راسها ) • مي : جاب جاب عيل شو ناقصني آني؟ • هنود تكتب : شوية طول !! شوية توسيع لعينج .. شوية تصغير لبراطمج.. شوية تقصير لسانج .. ويقصرون بعد على حسّج يوم تصارخين .. (وتضحك هنود ) • مي : جليلة الحيا !! اصلا اتمنين تستوين مثلي يالقمة !! • هنود تكتب : خلّج انتي يا اخت القمة .. قصدي يا راعية اليولة .. (طاحت هنود وحطت الموسدة على ويهها اتغطي مستحاها .. من غير تخفي ويهها البشوش ..) • هنود فخاطرها : آآآخ .. ويل حالي عليك .. معقولة احبك؟ معقولة اباك؟ معقولة ضحكتك عذاب؟ انا غبية بعد !! لو رفعت نظري شوية شو بيستوي يعني؟ محد بيلاحظ!! اصلا لو رفعت نظري جان اميه ميثاء جدّت عيني بصبعها .. خخخخ .. أوووف .. أويييه منو كان اللي ويا رشودي؟يمكن حمد او فهد .. او راشد .. او عواد فديته !! هههههههه رشودي بيغار !! (وتحمست اكثر ) ياربي اتخبلت !! هههههههه وحليلها الجود ملّقطة الجمال من صوب ابوها .. وطلع العم علي صدق ما فيه حيلة جنه واحد من الشباب .. لا خليت منه .. ومنوع !! دواه يستاهل الهرم .. انا اللي احترق قلبي وخلاني اصيح صياح عليه .. وذلّني لا وفي الكوشة يقولي مشكورة !! خله الشكر ينفعك انته وحرمتك النسرة .. والله مصخرة !! معرس ويباني بعد !! خلاص فات الفوت !! رشودي متربع فقلبي الحينه ومحد بيروم يشله من قلبي .. ياخي ليش احس انه مرات فمواقف يكون بارد ومرات يعصب ويشتط .. ومعقولة بعد ما ماتت اللي كان بياخذها يفكر يعرس ..؟ طبعا يحق له من غير انا شو ناقصني؟ لو يدوّر ف ليوا محد احلى عني .. مب شكلي زودتها .. بس شو اسوي عشقته .. (وعند راشد ) • فهد : اخخخخخخخخخخخخخخخخ (ما يضحك بس كان يناخر لأنه راقد ) • راشد علي : ياخي صّخ خله يرمس.. • فهد : هاه؟ (نش منتبه على مغفي ) ياخي تعبان خلني ارقد !! (عواد داش عليهم وحاط على جتفه ولده زايد اللي عمره 5 سنين ) • حمد : خاف الله فيه !! طالع عيونه مب رايم يبطلهن !! • عواد: يقول الشاعر !! (ويأشر على راشد ) يا هنود بس الله يهديج !! • راشد : اتعّلق على حرمتيه؟ ماعليه ماعليه خلها توصل اول !! • عواد : ياخي هههههههههههه يدتها فنتكة !! • حمد: جيه ؟ خبرونا شو استوا؟ اذا عندها اخت احجزوا لي اياه دخيلكم ابا اعرس !! • عواد :هههههههههههههههههههههههااااي !! انطم يالدياية !! دخلوا العروس وقالوا اختاري المعرس .. ونحن نتحرى اللي حذالنا اخوها !!! ههههههههه طلع ياي يخطب نفس البنية هههههههههههااااي .. • حمد وراشد وسهيل: اووووب !! اووووب !!عواد : اكمل ولا لأ بو سنيدة؟ (راشد يأشر له يكمل ) والعيوز مشتطة .. يوم قالت لها أشري اتوقعون على منو أشرت؟ • حمد وراشد : على منو؟ • سهيل : عليك !! • عواد يرفع راسه : زيود !! عنلات صير ابوك !!خيّست راسي كله روان !! حسبي الله على ابليسك !! (حليله كان ينود على راس عواد .. ونزله على ثبانه ورقد ..) هههههههههه ادري نذل ما بقول .. اتوقعون منو؟ • حمد: يعني حد غير رشود؟ • عواد :ههههههههه لا !! على ابوكم !! (وعواد ورشود نقعوا من الضحك لأنهم اتذكروا الموقف ) • راشد : انا والله كنت على اعصابي ابا اعرف شو ردها بس والله لو تشوفون ويه عمي علي بجج عيونه والعيوز أخسّين ههههههههههههههههههههااااااااااااي !! • عواد : ابويه اونه يقول انا؟ يباها من الله هو !! ماعليه ان ما خبرت عليه وفاية !!! بس حليلها البنية ياها غربال من العيوز من الخاطر .. شرات عيوزنا ما تقصر !!الله يعين اذا توالفن !! • راشد : بس عاد عيبتك السالفة؟ احينه بتنش يدوه بتقول حد يطريني !! (وكانوا يتكلمون عن الخطبة بس راشد كان بعيد عنهم ) • راشد فخاطره : خطبتج يالمغرورة !! وبتصيرين من نصيبي .. ما اتوقعت اني احب بعد ميرة !! او حتى يتعلق قلبي الشغوف بج يا هنودتي ..لدرجة انه صورتج مب طايعة تنمسح في بالي .. حتى يوم عصبتي هاكي اليوم نظرة الاندهاش حسيت بها .. ليتني ما فلّتت ذراعج .. (اما عند غريبة تسمع حد يدق الباب ..) • غريبة : ويدي بسم الله الرحمن الرحيم !! منو يدق هالحزة؟ صدت يمين وحصلت رويشد راقد .. (وقامت وفتحت الباب ) ويدي؟ ميود؟ بلاك يا بويه؟ • مايد : الصراحة ابا ارقد عندج مب يايني الرقاد .. • غريبة : وابوييييه؟ جيه انته ياهل؟ • مايد : امايا .. قولي اللي تقولينه تراني ولدج الصغير !! قبل عواس كان ويايه في الحجرة هو ونيسي ويوم راح كنت أسمع دبيج خواتي وضرايبهن .. احينه موول صخة ما اسمع الا حسّج وحس رشود .. (وميود جنه ياهل ) • غريبة : تعال انزين تعال .. (وكان شعره مكشش بس حلوعليه وهو داخل وساحب موسدته وياه ) هههه معلوم معلوم لازم هالموسدة !! بترقد عالارض ما عنثري تنجلب على رشود تسمعني؟ • مايد : شمعنى رشود من انوّلد لين الحينه وهو يرقد عندج؟ وانا مسترخصة فية هالرقدة؟ ابا حنان !! • غريبة تضربه على راسه : بوطبر !! انته عاد محد مبزّي (= مدلع ) شراتك!! انته لين كملت 15 سنة ترقد عندي !! ورويشد حليله ما تهنّى !! • مايد : بتذليني عال 15 سنة اللي رقدتهن عندج؟ ماباهن كلهن ضرايب وحشرة ويا ابويه!! احينه ابويه محد !! (ويمارج ) يعني الحنان عندج فول اوبشون ههههههههههههه ابا سيريلاك !! (وردت ضربته على راسه ) • غريبة : انته ما اتوب؟ يالله ارقد !! عنلات صير ابوك !! • مايد : ان شاء الله بس قوليلي قصة قبل ما ارقد .. (وجهزت له الدوشق وهي تتحرطم عليه لأنه يلعوزها ويضحك .. ويلست وحط راسه على ثبانها وهي تمسح على راسه ) • غريبة : أي اوامر ثانية؟ • مايد : ارحم الله والديج جان بتيبين لي سيريلاك مال رشود وخاشوقة !! (ويته ضربة ثالثة ع راسه ) • غريبة : بوطبر حشّم !! • مايد : آآي !! خبقتي لي راسي !! ادريبج حاطة عينج على راسي !! اذكري الله عن يطيح شعري !! ولو سمحتي تمسحينمن قاموسج اسم بو طبر اسمي مايد.. ميادي .. جذي الدلع !! • غريبة : لا حول ولا قوة الا بالله .. الله يعين حرمتك .. (وهو يضحك ) • مايد : حرمتي؟ باجر بسير ادوّر عليها .. صدقيني لو هي فآخر العالم بييبها .. • غريبة : اتحبها ميود؟ • مايد : شوما احبها؟ الا احبها واحبها واحبج يا اماه !! • غريبة : هههههههه حسبي الله على مذهبك !! مادري من وين تيب هالمغازل منو يعلمك؟ • مايد : انا مدرسة وروحي أدرّس .. تبين؟ بعلمج !! انف عيب امايا !!! الحريم ما يغازلن !! (وغريبة تضحك ) ضحكي يا امايا ضحكي .. بسنا من اللي شفناه من ابويه وظلمه !! • غريبة: هي والله في هذي صدقت .. بس انا اللي ماحناتني خواتك .. (اما عند شمايل ) • شمايل : مستحيل اتقرب من ريال .. مستحيل !! (وكانت الليتات مبندة .. واتطالع تحت الباب في حد يمشي كان قلبها يدق ) يالله ارحمني برحمتك ..ياالله .. (وعلى الساعة 1 ..تصرخ ) آآآآآآآآآآآآي إلحقوا علية !!آآآآي !!! بيعفدون علية !! لا تتقرب دخيل الله .. بعطيك اللي تباه !! في عندي بيزات والله !! آآآآآآآآآآآىي !! (وتدخل الممرضة ..عطوها ابرة تهديها .. وعلى الساعة 3 نشت على نفس الصريخ .. وبعد الساعة 6 الصبح نفس الصرخة ....اما اليوم الثاني نشن الصبح وتلبسن ويوم هم على طاولة الفطور ) • زينة : سمعيني عدل يا مي .. وحطي كلامي حلقة فأذنج !! حصلنا لجيا عيوني وظيفة وهي انج تكوني مذيعة .. بس شرطهم .. • مي : شووه؟ مذيعة؟ شو شرطهم؟ • زينة : انج ما تلبسي عباة وشيلة .. (مي وهنود يطالعون بعض ) • مي : تبيني انغسل من الضرب؟ • زينة : ليش يا عيوني؟ انتي ما مسوية شي غلط !! كاني آني ما ألبس شي صار؟ • مي : انتي غير وانا غير !! • زينة : غير ف شنو؟ انا امج اللي يابتج !! • مي : تبين ابويه يسطعني طراقات .؟؟ والله لو يدري ميود جان ذبحني !! • زينة : شوفي اليوم سماح (واستقوت زيادة ) لكن مرة ثانية يوم بحجي شي يتنفذ .. ما ريد أي حجج .. هذا مستقبلج اللي ضيعتيه من قبل !! قوموا روحوا بدلوا بنروح السوق نشتري ل هنود اغراض الملجة !! (وهنود منصدمة انه العراقية بتدفع .. واما في المستشفى ) • الممرضة : هناء حبيبتي قومي .. عندج موعد ويا الدكتور النفسي .. • شمايل : ان شاء الله.. ان شاء الله .. (وبدلت ملابسها ويوم دخلت المكتب ) لالالالا طلعوني !! ما اقدر طلعوني !! • الدكتور زايغ : خير خير شو صار؟ • شمايل تصيح وتصارخ بهستيرية : اقولك لا تتقرب .. دخيلك تراني ما استحمل .. حرام عليك .. حرام عليج يالدنيا تسوين فية جذييه .. بعيد !! بعيد قلت لك !! • الدكتور : خلاص ..خلاص .. اللي تريدينه .. ممرضة منال؟ • الممرضة : نعم دكتور ؟ • الدكتور : حوليها للدكتورة سعاد حالا .. قوليلها حالة طارئة .. (ويوم حولوها بعد ربع ساعة دخلت ) • الدكتورة : هناء؟ خبريني عن حياتج؟ • شمايل : عن شو اخبرج؟ ما عندي شي اقوله.. • الدكتورة : أي شي .. طفولتج .. مراهقتج مع انج مبيّن عليج فمراهقتج !! • شمايل تصرخ فويهها: احينه انا مراهقة؟ امايا انا حرمة لكن حقيرة !! اتعرفين شو حقيرة؟ ضيّعت شرفي !! بس ما كان بإيدي.. غصب (ن) عني .. لو سمحتي ابا اروّح حجرتي انا تعبانة .. • الدكتورة : اسمحي لي يا هناء .. بس باجر بتكلم وياج لأني احس انج مرهقة ..بوصف لج بروزاك بيهديج بس تاخذينه الصبح .. و تاخذينه 3 حبات عشان يريحج .. • شمايل : مشكورة دكتورة • الدكتورة : وعد اتكلميني باجر؟ • شمايل : ان شاء الله .. اللي تامرين به .. (طلعت وهي تنتفض .. زايغة .. شو بتكون ردة فعل الدكتورة ..اكيد بتخبر الدكاترة اللي وياها عنها وعن حالتها الميئوس منها .. اما في السوق ..) • مي : يالله ياربي يا ريولي .. هنود؟ انتي ما يعيبج العجب؟ انتي ما تبين فستان مثل الخلق؟ • هنود تكتب : مادري ما دش شي مخي .. • زينة: هنودة ؟ عيوني؟ اكتبي لنا ..إيش تريدين .. • هنود تكتب : مادري بس انا يالسة اطالع .. • زينة : شو رايج في الاحمر؟ • هنود تكتب : مادري لونه مب شي .. • زينة تتمصخر: ماباجي غير الثوب شو رايج بعد؟ • هنود تغيرت ملامحها وتكتب : صدقتي !!! وانا هذا اللي اباه !! • زينة : صدج؟ • هنود تكتب: هيه والله فخاطري بموووت ان ما سويته !! • زينة : حبيبتي .. ما في خياط بيسويلج اياه .. ويبيله وقت على الاقل شهر .. • هنود تكتب : ما يخصني .. (وساروا دوّروا ..وماشي فايدة كله يحوّشونهم لأنه محد راضي يسويلهم ..) • مي : بسوي حق الجود عادي؟ • هنود تكتب : فشيلة شو نقول لها؟ • مي : نباها تساعدنا ... اذا هي في دبي بنمر عليها او هي تمر علينا .. (وتتصل مرتين .. وخلاف ترد) سلام عليكم • الجود : عليكم السلام ورحمة الله وبركاته • مي : شحالج الجود؟ • الجود : بخير الحمدلله .. منو ويايه؟ • مي: اافا يا عيوني .. • الجود: ميوووووووووووووووووووووه !! فديتج شحالج؟ • مي: بخير الله وشحال النسيب؟ • الجود: ههههههه والله ما يندرى به البارحة اسمعه يهذرب ويا الشباب وطارين الدنيا من الضحك.. • مي : عاد طلبناج .. نحن ما ندل دبي ابدا .. • الجود : انزين تبيني ايي؟ • مي: اذا تقدرين .. هنود طلبتها عسرة تبي ثوب !! • الجود : ههههههههههههههه ثوب؟ حق الملجة؟ احيد فستان يلبسون .. • مي: مزاج غربله الله من مزاج !! (واتطالعها هنود وتضربها على راسها ) آآي ههههههههههه • الجود : انزين ماعليه برمس يدوتي واميه نداية ..وان شاء الله بني نطالع العروس وطلباتها .. • مي: اوكي يا عيوني ... يالله عيل اترخص متنا حر .. • زينة: شنو قالت؟ • مي: قالت بيمرون اليوم اذا الله راد هيي وامها ويدتها .. (اما عالعصر الساعة 4 بعد ما صلّت شمايل ..طلعت وتتمشى ويا الممرضة اللي تكلمها بس هي مسوية طاف .. اتفكر ف ميود ..) • الممرضة منال : وهذي حديقتنا .. (وكانت شمايل تتلفت .. اتطالع ناس كل وايد وخصوصا شباب يتعالجون عن المخدرات .. واللي مرضى نفسيا .. بس ما حصلت ولا بنية .. كله رياييل..) • شمايل: وديني داخل ما روم !! اخاف حد يعفد علية !! (وتنتفض ) • الممرضة : هناء حبيبتي .. شوفي كل واحد وياه ممرضة اتطالعه وتراقبه .. يعني ما عليج خوف ..ما خبرتيني انتي شو تحبين تسوين ؟ • شمايل: مادري .. • الممرضة : انا عن نفسي .. عندي بنية ودوم ايلس وياها ألوّن .. • شمايل: تلوّنين؟ • الممرضة : هي ألّون ليش هذا شي عيب؟ • شمايل: مادري .. • الممرضة : شورايج اييب لج ألوان وكتاب للتلوين؟ (شمايل تهز راسها انها موافقة ..وتمت واقفة عند شجرة عودة اتطالعها .. وحسّت ب فراغ ..ويلست ومتساندة عليها .. ما لاحظت انه في واحد متعلق ع الشجرة يطالعها ..) • شمايل: آآخ منك يا ميود كيف ملكتني؟ • الممرضة : اتفضلي .. هذي الألوان والكتاب.. ترا صفحتين بنتي مريم ملوّنتنهن .. يالله انا بطالعج من بعيد .. • شمايل: انزين .. (وبطلت الكتاب وروحت الممرضة .. وهي تتصدد يمين ويسار اتخاف حد يتقرب منها .. ولقّت انه الدار أمان ) فديييتها ياربي ..شكلها صغيرونة ... (وبطلت الصفحة مرسوم عليها تويتي ويالسة اتلوّن وهي مستمتعة وبعد ربع ساعة وهزاع طول الوقت يطالعها وهو مستمتع ) • وداد: هااااه الحامل؟ بعدج عن اتربين؟ • شمايل رافعة راسها اتطالع منو اللي يدري عنها : انتي؟ • وداد : هيه انا .. يقولون انج حامل؟ ييت ابارك لج هههههههههههههههه حرام يفوتني هالشي .. • شمايل: انتي شو تبين مني؟ مب كفاية الفضيحة اللي سويتيها في المستشفى؟ • وداد: الطراق اللي عطيتين اياه عمري ما بسامحج عليه .. وصدقيني يوم عن يوم بتندمين على اللي بسويه فيج بعده ما ياج شي .. • شمايل: خافي الله يا وداد .. • وداد: انا مب ياية عشانج بس عشان اقولج (وحاطة ايدها على بطنها ) تدرين اني حامل؟ لا وبعد ابشرج انه ميود .. • شمايل: ابوه؟ • وداد: هههههههههههههههه لا مب ابوه .. بس حبيت اقولج اني رديت ل ميود .. ويكلمني ونتقابل بعد • شمايل منصدمة : شو تقولين؟ • وداد: شو اتحرين؟ فديتج ... رد .. وعلى فكرة اعترف انه يحبني ويباني .. وبياخذني من اتطلق من منوع • شمايل: تصيح : انزين ليش ياية اتخبريني؟ • وداد: بس جذييه .. عشان هو بيدوّرج واذا حصلج بيقول والله انا ابا اخذ شملوه عشان بيزاتها .. (قامت شمايل وهي منفعلة وتمسكها من شعرها ) • شمايل: انتي يالخايسة !! ياللوث !!! انا اللي براويج يالجلبة !! (وتطيح وداد عالارض وتصارخ .. تستنجد ) خله ايي ياخذج الحينه يالجلبة !! (وتصفعها .. ) يعلج بعوق (ن ) ما تقومين به !! قراءة ممتعة والبارت الياي يوم الاثنين |
(الجزء 45 ) • الممرضة مندفعة صوبهم وتمسك شمايل : لا يا هناء لا هناء !! • وداد: آآخ الله ياخذج طلعتي الدم !! آآآي !! (وكانت مشرمختنها على خدها ) • شمايل: الله ياخذج وياخذ ميود فوقج !! يالخياس !!! (وبعد ألف يا ويلاه ودوها الحجرة .. وزادت عصبيتها .. وقامت تكسر كل شي ..) يعلكم العدم ان شاء الله .. ما عندكم قلب !! مبهدليني فحياتي يالجلاب !! (وداد وصلت البيت على الساعة 2 ) • ام مانع: وداد؟ بلاه ويهج؟ • وداد منهدة عليها :جاب !! ما يخصج !! (وبطلت باب الحجرة ) • مانع منسدح عالفراش : انتي وين سرتي؟ • وداد: وانته ليش ما ماداومت؟ • مانع: تعبان راسي يعورني .. (ويوم دقق في ويهها ) شو ها؟ بلاه ويهج؟ منو مشرمخ خدج؟ • وداد: هاي قطوة عنودوه اختك .. الله ياخذها تسببت عليّة !! (وعدّت السالفة على خير .. وعند عيسى ) • عيسى : باجر بنبدا دوام .. وبلتهي عن الكل .. حتى عن اميه .. (ويقرا الشروط .. انه ممنوع يستخدمون التيلفون لمدة 6 شهور لأنهم متدربين .. وخصوصا اذا يبا ينتسب للقوة الخاصة الداخلية .. وإييه اتصال ) هلا بطويل العمر .. • سعيد : مرحبا الساع .. مشغول ولالأ؟ • عيسى: والله متملل .. • سعيد : أهأ .. متملل وانا وياك؟ • عيسى : والله صخة .. قبل حسن وانته واحينه ولا حد ويايه .. • سعيد : شو نسوي نتغلى .. • عيسى : انف شو بعد هذا !! • سعيد : هههههههههههه هذي المناكر اللي عندهم .. • عيسى : انزين سعّود متى بتي؟ • سعيد : ليش اتولهت علية؟ • عيسى : لا .. بس اتولهت على منطوقك .. • سعيد : يالله اتفججت تراني .. • عيسى : ادريبك .. انزين عازمنك موافق؟ • سعيد : اوكي .. فأغلى مطعم صح؟ • عيسى : ههههههههههه .. انته قدرك اعلى .. بس عازمنك على قدر ميزانيتي .. • سعيد : وميزانيتك .. شو تسمح؟ • عيسى : اعزمك على ماكدونالد .. • سعيد : هههههههه مطعم مال المهرج هاكي؟ • عيسى : لا يغرك شكله .. ترا احلى اكل اكلهم .. • سعيد : خلاص انزين انا ياينك .. (اما عند مي ) • مي : ألو؟ • الجود : هلا ميوتي .. غناتي وصلنا الشارع العام صوب ... • مي : خلاص يا عيوني نحن بنتلقف لكم .. (ومن بندت عنهم ) لحقي عيني لحقي يا هنود !! (وهذيجي اتطالعها ) قوم جود وصلوا .. (واتراكضن من العيّلة ونزلن تحت ) زينة؟ يا زينة !! • زينة : خير يا بنيتي !! في المطبخ !! في المطبخ !! • مي : قوم جود وصلوا !! والله وصلوا !! • زينة : ويييه ... انا مرخصة السايق اليوم .. حد منكم يعرف السواقة ؟ • مي : كلنا انعرف .. • زينة : آني راح اخلص طبيخ واروح اتحمم .. وانتوا روحوا هاتوهم .. (وتعطيهم مفتاح الموتر ) • مي : أي موتر ناخذ؟ • زينة : خذوا البورش كايين .. (وعلى فكرة عندها 4 مواتر في البيت .. بورش كايين .. ليكزس استيشن ومرسيدس وكامري .. واتفججت مي وهنود أخسين .. ويوم وصلن الموتر ) • مي : هنود فخاطري اسوق .. (وهنود اتطالعها بنظرة ) بس !! اخاف من زمان ما سقت !! (وهنود تدفرها بعيد وتاخذ المفتاح ) • هنود فخاطرها : انا بسوق عنج يالجبانة .. (ويوم ركبن هنود ومي يطالعون بعض ) • مي : بنحصله ولا لأ؟ • هنود تهز راسها بإيجاب وفخاطرها : احساسي يقول انه هو .. ويل حالي عليك يا الغالي .. (وتشخطه ويل وبعد 5 دقايق .. ) • عواد : يالله يالله يالله اعنبوا حرق الشارع !! • اليدة الجود : وابويه الله يسلمهم .. ( ويشوفون نفس الموتر يريوس .. ومي وهنود يطالعون بعض لأنهم اكتشفوا شي ..) • مي تصارخ : اويييييييييييييييييييييييييييييييييييييه • هنود فخاطرها : يا فضيحتنا !! • مي : لا ونحن مجابلينهم كيف جذيه؟ (ثرهن الحبايب متعدلات وحالتهن لله وناسيات يلبسن عباة وشيلة وكانن لابسات شيل بيضاء .. وهن مفتشلات .. هنود اتأشر عليها تتصل ب جود .. وتتصل ) • الجود : هلا ميوتي .. هذا موتركم؟ وابويييه حرقتوا الشارع يابوج !! • مي : هههههههههههه لا وأبشرج نسوق بدون ليسن بعد !! • الجود تضحك : ههههههههههه بعد؟ بارك الله فيكم .. عواد؟ حرّك الموتر هذيلا هم .. (وهو منصدم .. اما مي خبرت هنود انه اللي يايبنهم هو عواد هب راشد وعند عيسى وسعيد ..) • عيسى : وماشي .. قالت انها ما تدانيني بعيشة الله • سعيد منصدم : معقولة ؟ وربي هذي هب آدمية !! • عيسى يضحك : هههههههههه ليش؟ هذي هي الحياة .. (ويصيح تيلفونه ( ياشايف (ن) نفسك على الناس هونك .. الله الكبير .. (ويرد على طول ..) مرحبا الساع .. • فطيم تغير صوتها : مرحبا الساع .. • عيسى : الله حيّه .. • فطيم : الله يحييك .. شحالك؟ (وقلبها يدق بطريقة مب طبيعية لأنها زايغة ) • عيسى : بخير الله يسلمج ... منو بغيتي الشيخة ؟ • فطيم : ليش؟ ما عرفتني؟ • عيسى : لا والله ما عرفتج ؟؟ • فطيم : انا سارة .. • عيسى يضحك : وانا سعيد (وسعيد بجج عيونه ) • سعيد يتكلم شوي شوي : ويلك ويلاه !! (فطيم انصدمت كيف سعيد؟ ووينه عيسى ؟ بعد الصوت مب صوت عيسى .. أصلا كان عيسى زجمان ومتغير صوته بس كان احساسها يشدها صوبه .. ) • عيسى : انتي متصلة تسألين وتعّرفين بعمرج؟ • فطيم مصّرة : أكيد .. (وهي تبا تسمع صوته زيادة عشان تتأكد ..) • عيسى : مخسّرة رصيدج على مكالمة خارجية؟ سمعيني يا بنت الناس .. مب انا اللي بيلس ألعب بعقول البنات .. و الله يستر عليج وعلى أمة محمد .. يالله انا اترخص .. (وبند عنها وهي احمر ويهها ) • فطيم : قسما بالله براويك !! مادري على شو شايف عمرك !! ولد الذين !! خجاج !! بس انا متصلة عشان عيسى مب عشان حلات ويهه الجلب !! (وترد تتصل كم من مرة ) • عيسى : لا حول ولا قوة الا بالله !! بلاها هذي طفرة!! • سعيد : ياخي عطني اياها بهزبها هزبة محترمة !! • عيسى: اندوك عندك اياها !! • سعيد : ألو؟ • فطيم : انته صدق ما تستحي .. مب انته اللي اتبند فويهي .. • سعيد : عنلات صيرج انتي صدق المذهب ما تعرفينه .. الريال ما يبا يكلمج غصب هوو؟ • فطيم : والله ما وجهت لك الكلام .. يوم بتيك الرمسة تقدر اترد .. • سعيد : جاب يالله جاب .. صدق بنات آخر زمن !! يوم تبين المغازل مكوّدين في البلاد !! • فطيم : صدق جليل الحيا !! انته هب متربي لو متربي جان ما نطقت بهالمنطوق اللي شرات ويهك !! • سعيد: اوووه !! انا ليش اعوّر راسي ببنت لوث !! (وبند فويهها ) • فطيم : حقييير !! والله بتشوف .. وانته يا عواس بحصلك يعني بحصلك !! • سعيد : يالله اعنبوا اشوووه هذا !! • عيسى : شدراني والله .. ومن البلاد بعد !! • سعيد : يمكن حبيبتك !! • عيسى : منو قصدك؟ فطيم؟لالالا اصلا فطيم ما عندها موبايل ... (وفطيم اصلا ما استراحت لين خلت يدتها تاخذ لها موبايل ورقم ...اما عند فطيم ) • فطيم: ألو السلام عليكم .. ويايه العقيد ......؟ |
| الساعة الآن 08:06 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir