|
اليوم الثانـي الساعة 6 بالضبط غـلا قامت على عوار بطنها المعتاد ، لكن هالمره كان زايد عليـها أكثر شافت خالد لين الحين نايم فتحت الدرج و مالقت الدوا ، غلا تخرعت والخرعه زادت العوار ان ماخذتهم بتمووت دخلت الحمام بعد مالقته بتذبح خالد اكيد هو المتصرف فيهـم .. فتحت الباب بدون لايحس خالد وراحت تدور اكيد في منهم لكن ماقدرت تكمل خطواتها وطاحت على الكرسـي غلا تحاول تقاوم العوار وتمشي لكن ماتقدر تحس شي في بطنها يطعنها ، خلاص توقعت انها بتموت الخدامه يوم شافتها دورت بالصندوق اللي حاطين فيه الادويه و لقت حبتين من دوا غلا وبسرعه ودتهم لها و غلا كان شكلها يقطع القلب على طول خذتهم وشربت الماي وقعدت وهي لاويه على عمرها لين خف العوار بعد ماخلصت غلا و استوعبت اللي صار قالت للخدامه تطرش يجيبون لها من هالدوا وتخشه عندها عشان لايشوفه خالد .. توها غلا بتفتح الباب تدخل الا هي خابطه فخالد ، غلا مبين عليها ان كان فيها شي خالد وصوته صج قايم من النوم : انتي وينج ؟؟ غلا ماتبيه يشوفها وسبقته لداخل الدار : رحت اشرب ماي خالد رجع ينام ، لكن غلا وينها ووين النوم ، بس تمت منسدحه لان العوار هد حيلها عمر كان يتمشى فحوش البيت و الجو كان ولا أحلـــى و الورد متفتح وشكله يسـر العيـن والحديقه كلها ملونه ماتمنى عمر فهاللحظه شي كثر ماتمنى ان الزمن لو دقيقه يرجع ويكون هو و غـلا بـس .... تسند عمر و غمـض عينـه تخيلها لو صج موجوده شبيسوي .. ! الله حتى طريقة كلامه معاها وله عليـها ، من زمان ماكلمها بطريقته ماغنى لها ماقال لها شـي فتح عينه و شاف الياسمين جدامه قطف ثنتين و دخل للبيت وهو يشمهم .. سعود : شعندك ياروميو مقطف الورود ؟ عمر لاول مره يحس مافي حاجز بينه وبين ابوه : من مايحب الورد يبه؟ من مايحب الياسمين خصوصاً ؟ ها قولي؟ في حد مايحبهم سعود : هههههههه لا يبا محد مايحبهم عمر يلم الورده : حلوووه حلوه ،، شمها يبا ، ولا لا لاتشمها اغار عليها (يغمز لابوه) سعود اللي كان قاعد يظحك على ولده ، عمر سوى روحه معصب على ابوه عمر : عاد ها كلـه ولا الياسميين ، ترا ياويلكم مني سعود : روح يبا روح الله يهداك عمر : بزرع ياسمين بدااااري سعود : يالطيفه ماتجين تشوفين ولدج ؟ عمر : بس يبا بس بروح الدار تكفىىىىىىىى الا الـ........ سعود : هااااا ، يلا يلا دارك عمر راح وهو وابوه يظحكون .. دخل عمر داره وتأكد ان محد يشوفه وقفل الباب ، شال اللوحه الكبيره اللي خاش وراها .............! رسمة غـلا .. ! راسمها بكل التفاصيل اللي ماتخطر على البال ، وكأن الرسمه صوره مو رسام راسمها .. عمر انسدح على السرير والورد لين الحين معاه .. راح لعند الرسمه و علق عليها ورده وحده من اللي جايبهم وهو يغني (( انا محتاج لكلمة " حبيبي " و "حبيبتي" بعيده ياعالم عليَ )) .. تم يطالع اللوحه ويتذكر ايامه مع غلا و نسى انها صارت لخالد كل شي راح عن باله وسرح فعيونها طول وهو قاعد يشوفها ولما طلع من الدار كان يغني آخر خبر ابتسمي وسمعيه .. شارع ذكرياتي وحدي امشيه لفت نظري عطر كنت تحبيـه !! اشتريته ورحت للبيت وعلى صورتك رشيت ! يا (محتاله) انتي ، من الصوره طلعتي !! و بستيني !! أي نعم بستيني و همستي نعم طول زعلنا ياحياتـي ((( يعلي صوووته ))) ياااااحياااااتي المها : شهالاغنيه ؟ عمر تخلبص : مها؟ هلا؟ شنو؟ المها : ههه ولاشي عمر ابتسم لها وكمل طريقه ( المها هني؟ شتسوي؟ " يشوف ساعته " امممم شجايبها ؟ ) عمر دخل المطبخ وامه فيه وهو ياكل من اللي يسوونه عمر : يممه لطيفه : همم ! عمر يصاصرها : المها شتسوي هني؟ لطيفه فرحت عبالها حبها ولا شي قام يسأل عنها : ليش يمه ؟؟ عجبتك ! عمر : استغفر الله ،، اسأل شجايبها تقولين عجبتك؟ تعكسين الكلام انتي؟ لطيفه : اييه ! لا جايه هي وامها عمر : يسيرون الخوات؟ لطيفه : أي شعندك عمر يتغشمر : يلا يلا ماعندنا هالحركاااات لطيفه : روح زين عمر طلع وهو يظحك .. قعد فالصاله سلم على ام المها و هي تظحك على الورده حاطها فمخباة صدره عمر : شبلاكم تظحكون انتو؟ لطيفه : شهالورده ذي؟ قوم شيلها لاتصير لنا مراهق على كبر عمر عصب على كلام امـه : شهالكلام يمه ؟ عمر قام عنهم وخلاهم بس صج افتشل نسى الورده لكن لحظه ليش افتشل؟؟ يييييه حلاة الفشله اذا غلا فيها ماشاف الا عيال خالد متعلقين فثوبه .. ! عمر : شهاليوم يوم المفاجئات؟ تطلعون لنا من وين انتوا؟ غلا : من وراك! عمر هد عيالها والتفت : غلا؟ غلا : شلونك عمر؟ عمر : شلونج انتي؟ غلا : حمدلله طيبين عمر : عساها دايمه غلا : اسفين اذيناكم لكن سوو لنا حفله يبونك و خالد ينتظرني بره عمر : افا ، ينتظر ماله نيه ينزل يعني؟ غلا : انت تعرف بعد اللي صارر .......... ( عمر راح لخالد ) خالد من شافه ( الله يستر) .. عمر يطق له يعني نزل الدريشه خالد : هلاااااااا برذر عمر : امش يلا انزل ، أي والله متمتح فالسياره انزل يلا خالد : ههههههههههه ، يلا يلا عمر : خويلد انزل اذا ابوي درى انك وصلت ومانزلت تعرف سعيود شيسوي خالد يبتسم له : مره ثانيه انشالله مستعجلييييييين عمر يهد السياره ويطالع غلا اللي توها طالعه من البيت .. خالد : يلا حبيبي سلام غلا فتحت الباب وركبت وراحوو ......! عمر مافهم اللي يصير؟ غلا دخلت بيتهم ؟ كلمته؟ خالد؟ مرت جدامه؟ كل هاي صار الحين !!! بعد خلتني وراحــت !! لو يقدر يطلع اللي فداخله بــــس! خالد : تهقين كلام عمر عدل؟ غلا انتبهت له : أي كلام؟ خالد : شكلج مب وياي كلش .. غلا تظحك : لا شدعوى بعد اسبوعيـن خالد كان راد من الشغـل و غلا كانت توها بتطلع لكن هو سبقها وفتح الباب و دخل غلا : هلا والله خالد : هلاا هلااااا بالغلا غلا تقرب منه : شعندك متأخر اليوم (تفرصه) خالد يحاول يسوي نفسه مب متعور : آآ ،، مادري ، احححححححححححح ، يدج يابنييه غلا : هههههههههه عشان تحرم ماتتأخر خالد : اعلمج تفرصين من !! غلا ركضت عنه وهو لحقها وولده وقفه خالد ولاسمعه ودزه بس على خفييف : رووووح زين بعد العشا لما رجع خالد من الصلاة غلا كانت قاعده فالصاله ومريم الدبـه حذاها لوول .. و غلا ماتت ظحك من شافت خالد خالد : ظحكييي يالدبه غلا : انا ولا هيي؟ خالد : يلا يلا انتي الدبه بنتي ولا حد فجمالها ، تعالي بابا ، بس لاتكسرين البيت غلا : هههههههههههههههههههههههههههههههههه خالد : تعالي لاتعاديج امج وتصيرين تتظحكين غلا : لا والله !! خالد : ههههههههههههههههه ( يقلدها) غلا : خاااااااالد خالد : بتفرصين فرصي خلاص صارت عندي مناعه غلا : هههههههه فيصل جا و انسدح بحظن امه خالد : لا والله ، شنو مليق ياولد خلود ، فز يلا فززز فيصل مايدري شالسالفه قام غلا : شفيك عليه؟ خالد : ها ، يلا يلا روح انت ومريوم روحو غلا تظحك عليه خالد : تظحكين ها؟ غلا : انت شفيك اليووم؟ شماكل؟ خالد انسدح بحظنها : من حلاة عيالج غلا : مب عيالي بس خالد يمسك يدها وغلا سكتت غلا جنها تذكرت شي : خاااااااااالد ! خالد : ألبـي ! غلا : باجر عيدميلاد عيالك خالد : شسوي لهم غلا : خاالد ، شنو شسوي لهم خالد : وخير ، أصلآ انتي فاليوم اللي تظحكين فيه هذا عيد ، يلا يلا غلا تخش ويهها بيدها : خااااالد خالد يعتدل ويشيل يدها : غـلااااا المها كانت قاعده فصالة بيتهم و ماتدري عمر شفيه تغير فجأه عليهم ، لا يقعد معاهم ولا يسولف مع حد .! أكيد فيه شي حد مزعله ولا متظايق ؟ مايصير مني والطريج يتغير انزين حتى لو فيه شي شبيعرفني اانا ، من انا عشان يقولي .. افف والله بجن اناا خالد سوى حفلة عياله فبيته و لطيفه اعتذرت راح سعود و عمر سعود راح قبل حتى لايبدون قعد معاهم شوي وخلاهم .. بيتهم كان مليان يهال وحشرتهم .. وخالد و غلا و عمر قاعدين فالصاله مع خالاتهم .. عمر قعد معاهم وتوه بيطلع خالد : وين؟؟ عمر : خلاص بس طولت وايد هني خالد : ازاي؟ هيطفو الشمع عمر : هههههههههههههههههههههه ، لا ماعليه جد مستعجل خويلد ، يلا سلام خالد : على راحتك ، الله يحفظك وطلع عمر عمر(خلاص أكيد تبي تقعد مع ريلها وعيالها،صج إني هبل قاعد قعده جنهم مثبتيني بمسامير!!) غلا انتبهت ان عمر محد وقطت شيلتها وراحت مع خالد على قولته هيطفو الشممع وقفت هي وياه وعيالهم جدامهم وخالد مستغل الفرصه حاط يده على غلا ويفرصها وغلا تنط كل شوي غلا : خلااااااص خالد خالد يفرصها : هاااا، (يفرص) اوووعي تخربين الحفله غلا تشيل يده من عليها و ماشافته الا ينفخ مع عياله و لا يفرصها وهو ينفخ غلا خذت يده وتمت فارصتها فرصه وحده طول الوقت ، يعني بدال لاتمسكها فارصتها .. بعدها البيت فظى وتموا بس اليهال و غلا و خالد معاهم .. خلوهم بروحهم وهم تموا فالصاله خالد : عاد خلاص يدي حرام عليج غلا : عشان تحرم ( وهي قايمه ) خالد: ويين؟ غلا : ببدل ملابسي خالد يجرها : بعدييييين غلا : بعدين بعدين ، بأمرك خالد يغمز لها .. غلا تسندت على خالد وهو يسولف وينكت وغلا تموت من الظحك ، طلع خالد من مخباه علبه فيها خاتم غلا : اللله ، روووعه خالد : اراويج الروعه (ياخذ يدها ويلبسها) ، ، هاي الروعــــــه غلا ابتسمت له خالد : موو بس خواتم ذهـب ، تستاااهل عيوووني غلا : هههه حياااتي والله غلا باسته وراحت تبدل ملابسها .. اليوم الثاني رجع خالد من الشغل وهو شكله عنده خبر .. على الغدا خالد : غـلا ؟ غلا : ها حبيبي؟ خالد : الاسبوع الجاي بسافر! غلا هدت اللي فيدها: شنو؟ وين؟ خالد : رايحين امريكا انشالله ، عشان المشروع ، قلت لج عنه غلا : بس بسرعه ، وايد تسرعتوا خالد خالد : لا عمري يتراوالج ماني مطول كلها اسبوع هناك وراجع انشالله غلا : واتم بروحي؟ خالد : ماتهونين علي والله ، خلاص خلج فالبيت العود لين ارجع .. غلا : أي صح ، البيت العود ، يصير الف خير خالد : والله ماعرفنا لج ، هني تبين ولا البيت العود؟ غلا : اقعد فبيتي احسن لي .. خالد : انزين ، خلج فبيتج يامدام غلا : انزين ؟ وشبتسوي هناك؟ وليش اسبوع خلها 3 ايام خالد : لا ساعه احسن بعد غلا : احسن و احسن خالد : ههههههههه غلا حياتي ماني مطول صدقيني غلا سكتت وماردت عليه .. شبيصير لما خالد بيسافر؟ بيرجع؟ ولا بيصير له شي؟ و عمر ؟ ممكن ينتهز فرصة غياب اخوه ويسوي شي؟ |
رجع خالد و غلا كانت توها مسكره من عمـر ،، تحس حبها القبلي وايد يطري عليها بس كلش مب عدله .. وخالد ؟؟ غـلا : خالـد ..! خالد : ها حبيبي! غلا : توه عمر متصل خالد : لا ! يحليله شقال؟ غلا : اتصل يسلم ويسأل ليش ماجيناهم هالاسبوع بعد ، خالد حبيبي ، مب عدله هذي صلة الرحم مايصير تقطعهم هذا الاسبوع الثاني لنا مارحنا لهم خالد : خلاص خلاص ، يصير خير لافظيت نروح .. غلا رفعت حاجب : ليش عصبت زين؟ خالد : مب معصب غلا : لا معصب ، شفيك خالد : مافيني شي غلا مافيييني خالد قام بس رجع قعد غلا : بتقولي شفيك؟ خالد : بعدين تعرفين غلا : اعرف شنو؟ خالد : غلويييتي كل شي بووقته حلو غلا صج مستغربه : خالد شالسالفه؟ خالد : ولاشي ولاشي غلا : بتخـش علــي؟؟؟ خالد : لااااا ، بتعرفين بس مب الحين انتظرررررري شووي بس غلا وهي صاعده للدار : انتظر !! بنتظرر .. خالد يظحك بمكـر .. على المغرب غلا و خالد كانو قاعدين فالصاله اخيراً خالد قعد فالبيت يالفشغل طول اليوم او معزوم .. لكن ماسلمت غلا الا بدقيقه مع خالد ، وجاه واحد من ربعه ليين البيت غلا : ياااربـي خالد : ماني مطول وياه حيااتي غلا : خالد حرام علييك ازهق بروحي والله خالد : عفييه دقايق وراجع بقوله بطلع غلا تدري انه كلام ، هزت له راسها وراح .. طلعت للدار تشوف أي شي لان تدري انهم بيطولون ودامه وصل للبيت اكيد جاي لشي مهم وبيتعشى وبيطلع .. فتحت الدريشـه وعينها طاحت على نفس المكان اللي شافت فيه سيارة عمر وانصدمت !!!!! بعد؟ موجوده؟؟ لالا اكيد يتراوالي مثل آخر مره .. سكرت الدريشه غلا بس رجعت فتحتها ولين الحين السياره موجوده .. غلا ماصدقت عيونها ، امبلا عمر عمر وقف يناظر الدريشه غلا صفقت وجهها : شيسوووووي هني؟ عمر صار مايحس نفسه الا هو قاعد فهالمكان ، خلاص صار شوقه لغلا كل يوم يزيد ، مستحيل هاللي يصير معاه ..! خلته و راحت لغيره وصارت من المستحيل انها تكون له والكل يدري وهو يدري ، لكن قلبه مب متقبل فكرة ان نبضه يوقف!! غلا : لالا اكيد يتراوالي .. تسحبت شوي شوي بتتأكد فتحت الباب بس كان المجلس كاشف على البيت وايد ماقدرت تطلع .. طلعت من باب المطبخ وراحت من الباب الاقرب لهالأرض .. وقفت قريب منها بس محد يشوفها غلا مسكت قلبها أي هذا هو!! عمر ؟ شيسوي هني؟؟ والله ان شافه خالد يقلبها على راسه رجعت للبيت وهي مب مصدقه اللي تشوفه تحس انها بعد شوي بتخرف بتستخف ، عمر ! أكيد جاي لها ،، لان مافي أي سبب يدفعه انه ينخش ويختار أرض على دارهم على طول الا (غلا) .. غلا دخلت الغرفه وقفلت الباب وقعدت ويدها على راسها عورها قلبها على ولد عمـها و سالت دموعها ، 7 سنين من عرفها و 4 سنين من تزوجت خالد! وهو لين الحين يحبها غلا ( ياريت كل الناس مثلك ياعمر ، وين مثلك ؟ لكن صعبه ارجع لك ماقدر ارجع لك ، جذبت على روحي وقلت انساك وارضى بخالد واعتبرك اخوي ، لكن محد يقدر يتكبر على مشاعره ) عمر من الصوب الثاني كان يتحرى غلا لين الحين ، بس لما فكر ، مستحيل غلا تسويها ، انا شقاعد اسوي ، اتحرش بمرت اخوي؟ وعلى طول ركب سيااارته .. وعلى طول طلع من هالفريج بكبره وصل عمر للبيت وفتح باب غرفته وقفلها عليه وكان معصب على الآخر حذف الغتره على السرير وهو يروح من مكان للثاني يحس عقله بيزر من مكانه ، شيسوي؟ والله جنيت بسبتهااا وقف والمكتب قباله وفتح الدرج لمع الموس بعينه ورفعه فتح راحة يده ومشى الموس عليها لين رسغه حدة الموس علمت على يده لكن ماجرحته .. عمر : آآه يعني شنو بنتحر؟ خلاص مانا ميت الذبح مايفيد معااااي، ذبحوني سووو فيني اللي تبوووون طاح عمر على الارض وراسه فيده مايبي دموعه تنزل عمته فتحت الباب لما سمعت صوته تغريد سكرت الباب عشان لطيفه لا تجي تغريد تمسح على راسه وهو على الارض : عمر حبيبي شفيك؟ عمر مايرد عليها ويصيح وصوته يعلى تغريد : شفيك يايمه؟ قولي ياعمر قولي شفيك عمر اول مره يحس حد قدر يوصل له ويخليه ينطق ، من زمان محد كلمه قال له شفيك شمسوي؟ محد سأله عن حاله من راحت عنه غلا عمر حط راسه فحظن عمته يصيح وتغريد متقطع قلبها عليه تغريد : قولي ياعمر لاتصيح شفيك حبيبي؟ شصاير؟ عمر : ابي غلا ياعمتيي والله ابيها تغريد : لا ياعمر مايصير هالكلام حبيبيي ، انت كبرت ولازم تفهم عمر : ماقدر ياعمتي (يرفع راسه) ، عمتي انتوا ماتدرون عن شي ، كل شي فيني احسه مب معاي ، انا روحي عندهم ياعمتيي صدقوني انا مييت صدقوني ، عمتي من سنيين وانا ساكت لكن ماقدر (يشهق غصب عنه ويخش ويهه) مابي اصيح بتفكروني ظعيف تغريد : وانت مب ظعيف يعني ، انت من خلتك غلا وانت مب واعي لعمرك ، ذبحت نفسك عشانها وانت مب راضي تفهم باللي يصير ياعمر ، خلاص ياحبيبي ، فتح عينك وشوف غلا ، صارت لاخوك ولـ3 عيال منه ، ياعمري خلك من هالوهم اللي معيش روحك فيه عمر يصرخ : لاتقوليين وهم ، غلا بترجع ليي ، غلا صدقوني بترجع لي ، انا قلبي يقولي ، قلبي يقوولي تغريد : عمر لاتقعد تقص على نفسك بهالكلام تسمعني؟ غلا خلاص صارت لخالد اخوك ، تفهم شنو يعني اخوك عمر يوقف ويرجع ياخذ الموس : ان مارجعتوها بذبح عمري تشوفيييييين بذبح عمري تغريد صفقت وجهها بس تداركت الوضع وشافته انه فحالة هستيريتا من الصياح ، سايرته بالكلام وخذت منه الموس وخلته يتسبح عشان اعصابه تهدى طلع عمر من الحمام و لما فتحت الباب تغريد تتطمن عليه لقته نايم ارتاحت وايد وخلتهم وطلعت ، شكانت حالة عمر؟ والله تصعب على الكافر .. لما قام عمر من النوم حس راسه ثقيل وان اللي صار بينه وبين عمته على غلا مثل الفلم ..! غلا نامت و خالد لين الحين ماطلع رفيجه .. لما قامت الصبح شافت خالد نايم بملابسه غلا لما شافته احترت صار عادي عنده يرجع متأخر وهي نايمه قعدته نحاس خالد : تكفيين غلا شوووي بس (يغطي وجهه ) غلا : ماافي الحين تقوم ولا تعرف شبسوي فيك خالد يعتدل : غلا حبيبتي نامي ، صدقيني النوم حلو ، حطي راسج حبيبتي على المخده ،حطيه صدقيني النوم حلوو لذيذ غلا : مافي عشان تتعلم ماتتأخر عن البيت قوم خالد خالد : غلااااااااااااا ( وراح فنومتــــه) غلا خلته ونزلت سعد و فيصل كانوا لين الحين نايمين ومريم نايمه بس معاها فدارها هي و خالد .. غلا : انشالله تصيح عشان تقومك يااارب لوووول نذله بس خالد و لا جنه حد قعده ، صحى من النوم تقريباً على الساعه 11 .. نزل وهو متسبح وريحته تجنن فرررش عدل غلا يوم قعد حذاها خالد تجتفت وصدت عنه شوي خالد : يـه ! (يشرب قهوته) ، صاده بعد ، خلج صاده ،(يجر خصله من شعرها) غلا : شيل يدك خالد خالد : عيل لفي عليي غلا : يوم اللي تغير طريقتك معاي بلف عليك ، ماصارت عيشه ياخالد ، الوقت اللي احنا صاحين فيه وقاعدين معاك تخلينا وتطلع وماترجع الا مع الفجر لين متى بنتم جذي؟ انا ماحس حرام عليك؟ ولاحد معاي فهالبيت ! خالد : غلا ، حرام عليج قدري اللي انا فيه ، قلت لج عندي هالايام شغل وايد والظغط كله علي انا غلا : تعبت خالد بس خلاص ماقدر اكثر من جذي يوم يومين ماقدرت ،، لين متى بتم جذي حرام عليك حس فيني خالد يهديها ويقعدها : ياعمري صدقيني مافي شي يدوم ولا الغلط يدوم ، صدقيني غلا ، اوعدج بعد مارجع من السفر انشالله كل شي بيتغير صدقيني غلا : اكيد خالد؟ خالد : صدقيني ، عمري وعدتج ومانفذت؟ غلا : لاء خالد : عيل هاتي ووح غلا : مابي خالد : ليش بكيفج هو؟ غلا : خاالد ــــــــــــــــــــــــــــــــــــــــــــــــــ ــــــــــــــــــــــــــــــــــــــــتت بقى 3 ايام عن سفرة خالد .. خالد رجع من الصبح شكله موقع وطلع من شغله .. غلا : خالد؟ شفيك حبيبي ؟ تعبان؟ خالد يظحك : لا عمري شفيج متخرعه مافيني شي غلا : طالع وهل ،، هاا شصاير !! خالد يدقها على جنجها : مشتاق للحلويين "يغمز لها" غلا سكتت ومشت وراه لين الدار .. خالد ظحك : هاا ادري بتم فراسج لازم تعرفين شمطلعني غلا تمثل اونها ماتبي :لااا حبيبي شدعوى (وهي موطيه راسها) خالد : لاا حبيبي شدعوى ، طالع لان بعد 3 ايام السفره ولا نسيتي غلا تذكرت وقعدت على الكرسي وهي تتأفف خالد : غلاااا حبيبتي غلا تطالعه بخوف : خالد ماتعودت اتم بروحي! خالد : عيل سمعي هالخبر غلا فرحت يمكن كنسلو السفره او شي : شنوو؟ خالد : السفره بتصير اسبوع غلا شهقت : شنووو؟ من صجك؟ خالد يبوس يدها : سااامحيني غلا ، كل شي صار اليوم غلا فكرت ليش تنكد عليه خلاص بينت له انها ماتبي تفارقه وايد ،، ابتسمت لها غلا : ترجع لي بالسلامه خالد : صـج! غلا : أي صج خالد : بعد عمري والله غلا : بس ها اسبوع بس ان تأخرت يووويلك خالد : هههههههه خلاص انشالله .. عمر طبعاً صار يويماً من يطلع اخوه من البيت يلزم الارض اللي جدامهم و بعدها يرجع لعقليته وبرد البيت .. قعد هاليوم و بس يناظر الدريشه يمكن غلا تطل او شي لكن اللي ماتوقعه شاف خالد اخوه و اللي حذاه غلا طالعين بالسياره ..!!!! انصدم من الموقف هزه من داخله ، كل كلمه انقالت له بعد زواجهم طرت عليه ، كل كلمه الكل كان يحاول فيها يكره غلا فعمر كانت تتردد على مسمعه ، غلا ، خالد ، خلتك ، فيصل وسعد ، واشيا وايد تصورت وسمعها فمخه لين ضرب بيده على السكاان ودمعته طاحت .. حس نفسه مثل المغفل ماله أي هدف فحياته مايدري ليش عايش اذا كان اللي عايش لها خلته وراحت عنه! لكن حتى لو جبر قلبه يحب بآخر خطوه يتراجع قلبه ويعلن الهزيمه ويرجع حب غلا يكبـر ويزيد كأنهم عشاق لين الحين خالد و غلا كانو طالعين يتعشون بطلعه رومنسيه ، خالد يبي يقضي الـيومين قبل سفرته بأوقات كلها حلاوه و صفا مع غلا وعياله وياخذهم تذكار معاه فالسفر .. غلا : خالــد ،،، وين صرت؟ خالد ينتبه لها : سرحان بعيونج غلا حمرت خدودها مع ان الخجل المفروض يكون تخطته لكـن .... خالد يغمممض عيينه غلا : خالد شفيك؟ تعبان؟ خالد يتنهد : لاا ، عشان اخلي صورتج بعيوني غلا ماتعرف شتقوله اليوم صاير رومنسي بزياده .. خالد : عاد بوله علييييه ولي عهدي غلا : هههههههه أي واحد؟ خالد : ولي عهدي وملكتي و السكيورتي غلا : ههههههه ، لا والله عاد ها ماسمح لك خالد : ولا انا ماسمح لج تحطين ولدي سكيورتي غلا : ههههه خالد : آآخ الحين امي شبقول لها ، سين و جيم وسجن بعد غلا : ولايهمك حبيبي ، هذي خلها علي ، انت سافر وتطمن خالد : من غير ماقول لها؟ غلا : أي من غير ماتقول خالد : من صجج غلا ، ماعرف امي اقط هالسالفه عليج .! لوسمحتي مدام غلا : لوسمحت انت ، مالك شغل ، بتسافر اصلآ انا قلت لعمتي وهي قالت لها خالد : غلاا ، حبيبتي ، مو علي انا ، انا خالـــد ، ماقلتي لها ادري .. غلا : خالد وغلاتي بتسافر و انا اللي بقول لها و بعد ماتسافر زين !! واللي بيجي منها بتحمله ، علشانك خالد يرجع على وراه ويطالع غلا وهو مرفع حاجب غلا : شفيك؟ خالد : صايره لنا جيمس بوند ، ههههههه غلا : صصج تظحك علي ها ، زين ياخالد ، ان ماوزيتها خالد : حلاااااتج والله ، وصرتي بحزب امي بدال عندوه ، ياسلام احلى حرب تنشن عليي والله كل يوم بجيكم هناك وسوو لي سالفه ها غلا !! توصي فيني ريلج انا غلا تبي تظحك تبي تسوي اشيا وايد بس ماتعرف شتجدم و تأخر تحس كل شي متلخبط اليوم ..! سهرتهم بره البيت طولـت و عمر مايأس من الانتظار وكأنه ماخذ شي يمنعه من النوم .. لين رجعوا تقريباً قريب الـ1 خالد او ماشاف سياره جايه من بعيد ، طفى سيارته وانخش فيها ولما تأكد انهم وصلوا وتسكر باب بيتهم طلع من الفريج وهو بقلبه عوار وذكريات تزيد آلامـه .. غلا اول مادخلوا البيت سبقت خالد وهي شوي وتطير لعيالها خالد : ها ويين؟ غلا : بشووف فيصل ومريم و سعد خالد : 3 بعيووون الحسود غلا ماتت ظحك عليه : ههههههههههه غلا مشت وخالد جرها : بس ها موتخليني غلا : ثواني وارجع لك غلا دخلت على فيصل و سعد لقتهم نايمين ، و فتحت دارهم و قربت عند مريم، دلوعة خالد ، و تمت تطالعها و شكله كأن حد كان عندها ، لفت انتباهها صوت السلو الميوزك من العلبه اللي على الطاوله ، كان شاريها خالد لغلا وداخلها هديه ، من العلب اللي تنفتح ولها سلو ميوزك .. استغربت بس ماعطت السالفه اهميـه ، غطت مريم عدل وباستها ، تنفست عطر تعرفـه من زمان و شافت عمر بعيونها لكنها ظحكت ( لين متى بتم مراهقه انا ههههه ) .. قامت عنها و بدلت ملابسها و نزلت لخالد لقته يتكلم بالتليفون و عن الشغل تسندت على الطوفه وهي متنرفزه بس ماحاولت تبين لخالد .. قعدت غلا على الكرسي و خالد لين الحين يتكلم ويتكلم تمت يمكن ربع ساعه بعدها صج زهقت طلعت من طورها و راحت الغرفه وهي معصبه وان سألها حد شفيها دموعها بتسوي فيضان غلا (لو انت ياعمي موجود ، ماصار اللي صار) .. .* اليوم الثاني*. خوال خالد و خالاته جوهم الصبح و خالد و غلا تفاجئوا بالزياره حتى ان خالد شك ان غلا قايله لهم .. بعد ماطلعوا خالد قرر يقضي هاليوم بعيد عن الشغل وسكر موبايله لان خذ محاضره مرتبه من غلا امس و كفايه لوول .. لما طلعوا وصلهم خالد لين الباب بعد ماسكره رجع لغلا و هو مستغرب خالد : انتي قلتي لهم؟ غلا : هههه لا والله ، انا مثلك مستغربه ، هذي 2 مره يزورونا اول مره اول مارجعنا من شهر العسل ، غريبه صح! خالد : أي والله (يطل من الدريشه) اخاف السدره فالدرب غلا : ههههههه لا حبيبي مستحيل امك تزورنا خالد : لا عاد مومستحيل غلا سكتت خالد : لاتنكرين انها ماتزور ، زارتنا وايد ، بسس سابقاً غلا : هههه صح سابقاً خالد : شفتي شلووون .. غلا قعدت على الكرسي و خالد راح ورجع وهو شايل مريم ويلعبها ويطيرها و غلا ترتب الكلام اللي بتقوله لامه بعد مايسافر .. على العصر غلا كانت فالصاله و خالد نايم على السوفا ، تذكرت عاليه اللي صج راحت عن بالها ونستها اول مارفعت عاليه السماعـه .. غلا : قلييييييلة اصل انا والله عاليه : هههههه لاا ويي عاذرييييينج ، يبااا بوفييصل نسااج اسمممج هااااا غلا : هههههه حبيبتي علوي وحشتيييني غلا تمت تسولف معها بعيد عن خالد عشان ماتزعجه بنومته .. جات مريم وهي تمشي ، كان توها تخطي وتتدربح من المتن شحلاتها ،، خذت الجهاز المحطوط حذا راس خالد وبتغشمر ضربت خالد فيه على خشمه خالد نقز من على السوفا خالد : اححح (يزعق عليها) مريووم!! مريم شافته معصب تخرعت و غلا سكرت خالد يمسك خشمه ويشوفه فالمنظره هاه قطرة دم صغيره حييل شسوى فيهم غلا : خاااالد شدعوى كلها قطرره خالد : أي قطره شوفيني انزف غلا : الله واكبر ، خالد ، هذي مررريم دلووعتك خالد : يلا تذلف روحي مادلع حد يلا يلاااا غلا : هههههه قامت غلا تمسح النزيف على قولته وهو حواجبه 11 لووول غلا : شدعوى خالد شفيك؟ ياهل من صجك انت خالد : شفييييج يبا ، نتدلع شووووي (يغمز لها) مايحق لي ، ولا بس انتي غلا : ههههههه يحق لك حبيبييي لما بدت الشمس تغرب بعد صلاة المغرب عمر لا إرادياً شاف نفسه قايم ويبدل ويكشخ عشان يتوجه لمكانه المعتاد .. لبس ثوبه وقعد ساعه بس يكشخ بغترته ويعدلها ويرجع يسويها اللي يشوفه يقول رايح يقعد معاها ، مب رايح مثل الحرامي يبوق شوفتها و من ابعد من البعييد .. كت على روحه العطر و كااشخ عـدل .. فتح الباب يطل عشان لايكون حد موجود فالممر ، هو من رجع من امريكا ماغير مكان غرفته ، كانت قريبه من الباب بس مو باب الصاله باب يطلع على جانت من الحوش ... المهم ... تأكد ان لا امه و لا ابوه بيمرون من هني توه مسكر الباب الا بضربة عصا على ريله عمر سكر عيونه الطقه على العظمه احح تعور اليده : عمور وين رايح هاه؟ وينج بتهيت ادري بك ، خلك بره البيت ها لاترجع عمر : يدتي شفيج شفييج ، كلها ساعه ساعتين وراجع ، مع ربعي رايح يدته تدزه : جذاب ، كاشخ وين بتروح هاه؟ تغازل ياعمور تغازل؟ عمر : ياويلي يدتي شبلاج قلبيني سفاح بعد يدته : اييه طول لسانك عليي ، سعووود يا سعووود عمر : لالالالالا يدتي (يحب راسها) يلا يلا فمان الللله و شررد عنها قبل لايوصل ابوه و ركب سيارته وهو يظحك عليها .. عمر : هههه عليها حركات .. خالد ماحب يستعجل فالرده بيقعد شوي فالمسيد لانه من زمان ما قرى غير عن قبل .. سبحان الله ، تم فهالييوم بالذاات مطول فالمسيد .. نسيت اقول لكم ، ان المسيد شوي يكشف المنطقه اللي يتواجد فيها عمر بس مو عدل الا اذا حد انتبه لها يعني .. المهم .. خالد قرى ولما خلص طلع من المسيد راجع للبيت مانتبه للسياره ولا للأرض .. وصل للبيت و غلا كانت فالمطبخ كلمها على السريع لانها كانت مشغوله وبعدها راح الدار يبدل ملابسه .. حس الغرفه شوي كتمـه و جو المكيف ماعطيها ظيقه و الهوا مب وايد نقي ، فتح الدريشه و لف وجهه رجع نظره مره ثانيه وهو شابك حواجبه مستغرب بعد ماضربت ليتات السياره كانه حد موجود .. ماهتم و مشى .. خالد اصطلب مره وحده فمكانه !! هالسياره مب غريبه عليه .. ركز بنظره وفكره شوي على السياره وكانت الرؤيه واضحه حييل عنده !! عمر؟؟ هذا عمر اخوي؟ شيسوي هناك؟ بروحه؟ شيسوي فهالأرض؟ شمقعده؟ غلا ماسمعت الا خطوات خالد وهو يمشي بسرعه مثل المينون كأنه يبي يلحق على شي .. خالد كان يمشي ودقات قلبه تزيد والعرق من راسه ينزل مثل المطر و الغضب شان الحرب على عمر .. لكنه كان حليم ومسك نفسه لين وصل عند الارض ، انخش وطل بنص جسمه شافه ماعطيه ظهره ومركز نظره على الدريشه اللي غلا كانت تطل كانها تدور خالد ..! __________________ |
عمر ماحس الا بحد لافه من ثوبه خالد وهو يزعق عليه : عمر؟ شتسوي هني عمر هني لسانه وقف عن الكلام ، مخه وقف عن التفكير ، كل شي فجسمه تعطل ومات ماعرف شيسوي لابيده يشرد ولا بيده يتكلم صادوه مثل الحرامي بالجرم المشهوود ، شتسوى عليــه ؟ خالد يهزه وهو ماسكه بيد من ياقة ثوبه : ماتتحجى شتسوي هني؟ عمر يبي يتكلم لكن الحروف تخونه وتعصيه ماتطلع على لسانه خالد : آه يالخسيسس انا اخوك جذي تسووي فيني هذي اخرتها عمر :لا لاتفهمني غلط خالد يدزه : بقى فيها فهممم ، انت اخو ؟ عمر مارد عليه و خالد سحبه معاه لين البيت رفس خالد باب البيت ودز عمر جدامه خالد زعق من قمه راسه بصوت واحد هز البيت : غــــلا غلا قلبها على يدها طلعت من الصاله وهي كانها تلقط آخر انفاسها وشافت عمر و الحاله اللي هم فيها غلا : خالد؟؟ عمر؟ شصاير؟؟ خالد : وتسأليني؟ تسأليني يامرتي؟ يام عيالي يابنت عمي؟ هذي اخرتها ، جذي تسوين فيني تخليني مثل الاهبل غلا : خالد شفيك ، شتقول انت؟ خالد : ماتتحجى ياخوي ، قول لها ، قول وين شفتك وشتسوي غلا دموعها تصب وصوتها يرقل :عمر شفيك انت و خالد (تصيح) تكلموا الله يخليكم لاتطيرون عقلي خالد يجره : امش معااي ، تحرك غلا : وين خالد ؟ بروح وياك خالد : انا اعلمك ياعمير ، هذي اخرتها ياولد امي ، افا والللله بس على اللي اعتبرته فيك وعديتك اعز من عندي ، حسافه يوم أمنتك على هلي (يهز راسه) حساافه غلابسرعه لبست عباتها وركبت السياره وهي ولا تدري شالسالفه لدرجة ان سالفة عمر وقعدته راحت عن بالها وصلوا لبيت ابوهم ونزل خالد و عمر و غلا عمر وقف وماقدر يدخل للبيت ، خالد فتح الباب خالد بعصبيه : ادخل عمر ينزل راسه خالد يجره كانه بيضربه من ثوبه ويدزه بكل قوته على الارض خالد : يبــــا ، يمـــــــأ لطيفه جات تركض وسعود سبقها سعود : خالد؟ شفيك؟ شمسوي فاخوك؟ خالد : يخسي ، هذا ماعده اخو من اليوم ، خساره هالاسم فيه حتى غلا تشهق : حد منكم يتكلمم حرام عليكم خالد يصرخ عليها : مابي اسمع صوتج انتي ، فااااهمه مابيه غلا تخرعت من اسلوب خالد و صراخه سعود يزعق عليه : خالد،، تكلم عدل ، شمسوي اخوك؟ خالد : اانا اقولكم والباقي عليكم ، اللي تقولون عنه اخوي ، قاعد و جدام بيتي ولا جدام داري انا ومرتي و صاير مثل المراقب ، ومتى بالوقت اللي انا محد فيه ، ماتقولون لي شنو هاي؟ سعود : شنو؟؟؟ عمور؟ صج اللي يقوله اخوك؟ خالد : قلنا انك تحبها وسكتنا ، غازلتها وهي على ذمتي بما فيه الكفايه ، بس ها ياعمير انا تحملت بما فيه الكفايه و دست على قلبي وكرامتي عشانك يوم كنت اخوي ، لكن توصل فيك انك تفكر تخونييييي ، واللللله احرقك ولا اسأل فيك سعود رفع عمر من على الارض و عطاه بكف ولا حلم فيه الكل انصدم من الكف والحركه ، و خالد عوره قلبه ، صج محتقره لكن كان فيوم اخو له غلا حطت يدها على ويهها ماتصدق اللي تسمعه ولا اللي تشوفه شاللي يصير اشيا كانت تسمع فيها ماتصدق انها فيوم بتصير حقيقه ولهم هم ..! خالد : هذي اخرتها ياعمر؟ جذي تسوي فيني؟ وين النخوه يارجااال؟ ضاعت منك؟ تخوني انا؟ حساافه والله ، غبي انا و اهبل و عمي يوم اني امنتك عليهم غبي يوم فكرتك طيب و غير عن هالناس (يلف على غلا) ، اتهمتيني انا بالخااين ياغلا ، خالد مسكه من ثوبه وقرب وجهه منه وتم يطالعه بنظرات الغصب فيها ماله حدود .. هده خالد و طاح على الارض ، طلع خالد من البيت و غلا تصيح و هي منصدمه ، صورتها لعمـر تغيرت اهتزت ، شبه منكسره ، ماتقدر تثق فيه مثل قبل خالد طلع من البيت مايعرف وين يروح اللي شافه واللي كان فيه مثل الصدمه كهربائيه له حرقت كل شي فجسمه ولا يعرف شيسوي .. كان يمرر راسه على يده من الغضب اللي هو فيه ، فقد اخوه الوحيد ، وبطريقه محد يحبها ، طريقه بشعه ، يخونه؟ خالد وقف عند البحر وتم مثل اللي لسانه مقطوع وقلبه موقف لا حي ولا ميت شيسوي شيسووووي!! تذكر لما مره جا البحر بروحه والبنت اللي شافها ، بس فكر انه كان فحلم او شي .. شاف الظلام يزيد و الوقت تأخر بيرجع البيت! هذا اللي قرره .. ركب خالد السياره فسكون مب طبيعي مايسمع الا صوت موج البحر ، انوار السيارات كانت تضرب فعينه ووو .... ركب خالد السياره و كان فصمت فظيع مع نفسه غير عادتـه .. حتى غترته قاطها ولا يدري بالدنيـا .. انورا السيارات كانت تضرب فعينـه تعكس دموعه المتجمعه بعينـه وحابسها .. كل شي الا غــلا ..! مايبي حتى يقول حق نفسه انه خلاص صار صج مجنونها .. قلبـه من داخل شبت فيه الف نار ، غيره ، وحرقه ، و قهر على غلا و على عمر اخوه .. حسافـه اللي صار ماكان يبي يخسر آخر رجا حاطه فآخر انسان من هله انه يفقده .. و صل للبيت و غلا كانت تنطره كانها قاعده على نار لاتقدر تقعد ولا تقدر توقف و لاتقدر تطلع تدووره ..! و أخيراً وصل غلا بخوف : خالـد ؟ خالد بهدوء : هـلا؟ غلا : وين كنت؟ انشغل بالي عليك خالد يمسح على راسها : تأخرت عليج غلا انصدمت فخالد؟ جذي يعاملها؟ توقعت بيرجع و بينقلب البيت كله فوق تحت وصريخه بيوصل لآخر بيت غلا تمسك يده : خالد؟ خالد : انتي مالج ذنب ، الذنب ذنبي غلا وعيونها تدمع : لاتقول جذي خالد ، انت مالك شغل خالد : انا كان لازم ارفض من البدايه ، حرام اخذج منه ، هذا عقابي من الله ذوقني اللي ذاقه عمر غلا تصيح : خالد لاتقول جذي ، انا بتم لك ، تكفى لاتقول جذي خالد يبتسم لها وهو طالع على الدرج ، رجع لها خالد .. : بس يمكن لازم نتغير شوي! صح! كبرناا غلا مافهمت ولا كلمه من اللي قاله خالد لها ، يتغيرون؟ على شنو؟ خالد دخل الدار يبدل وهو كاره المكان ويحاول كثر مايقدر مايشوف الدريشه سكرها و سكر الستاير عليها بدل ملابسه و انسدح على السرير نص سدحه وهو يفكـر ، صج اللي صار اليوم؟ انا شلون كنت عمي؟ انا شلون ماكنت منتبه له؟ انا اهبل غلا كانت تزعل و تذبحني ليش ان دوامي طول اليوم بره البيت ، وانا الاهبل ولا ادري باللي يصير ، اكيد كانت خايفه منه؟ يعني هو سوى لها شي؟ (فتح عيونها خالد) خالد نقز من على السرير : يسوويها فتحت غلا باب الدار وطلع خالد فويهها ، خالد خفف من عيلته غلا : وين بتروح؟ خالد : نص ساعه وراجع غلا تقفل الباب : لا خالد رجع على وراه وسكت غلا : وين بتروح؟ خالد : شغل غلا عصبت : بعـد ، ردينا للشغل ، شفت آخرة شغلك شنو !! خالد : غلا تكفين سكتيييي مابي اسمع هالسالفه مره ثانيه، سكريها غلا : ماني مسكرتها خالد : اففففففف شتبين تقولين خلاص ، شتبين تسميني فيه بعد!! غلا : انا اسمك؟ خالد (هي مالها ذنب كفايه اللي شافته مني) : مب انتي غلا : تذكر يوم كنت اقولك اعتذر عن شغلك لا تروح ، قلل الساعات ،، شكنت تقول؟ تسكتني تقولي انشالله انشالله بحاول ، يصير خير ، اذا قدرت ، ماني متأخر ، هذا اللي كنت تقوله ، انا من شفته كنت المح لك لكن انت مافهمت ، انا خفت اكون ظالمته ، لاني فكل خطوه اخطيها اكون ظالمه ، مادري ليش؟ خالد فهم قصد غلا و سكت يسمع كلامها .. غلا كانت تكلمه وتشوفه ، شكله وايد يعور القلب ، منزل راسه ويطالع الارض وسااكت مايعلق غلا قعدت عند ريله : خالد كلمني خالد يطالعها: سوى لج شي؟ كلمج؟ قال لج شي؟ غلا : لا ، ولاحتى جا البيت وانت مو موجود .. خالد : زين انج قلتي كنت بروح اخلص عليه غلا ماعرفت شتقول له ، تدري انه ماسك نفسه عنه ، بتسكت لانها اذا زادت السالفه شكله بيهييج مره وحده .. قعدت حذاه وهي ساكته مثله وهو يفكر وهو سااااااااااااااااااااااااكت .. خالد قام يدور فالغرفه و غلا قاعده ، تشوفه ، تناظر الطويل ، البُعد البعيد ، الحي الميت ، هالشي العجيب اللي كانت تحلم فيـه .. ((شلون حبت عمر؟ عمر خوان! و خالد سبق و خانها؟ لاالا خالد مايخوني انا كنت ظالمته، بس انا دايمآ اطلع ظالمه؟ مو يمكن اكون ظالمه عمر؟ لاا مستحيل ، انا اظلم بس خالد لا ، يعني عمر خوان؟)) .. تشوف لمعة عيون خالد و كبريائه المكسور جدامها .. انقهرت من عمر باللي سواه فخالد .. حتى لو كان عمر حبيبها فيوم ، خالد الحين ريلها .. غلا نزلت راسها وانهارت مره وحده تصيح خالد تخرع وراح لها : غلا ، غلا شفيج؟ شصار؟ غلا من كلامه صياحها يزيد خالد : تحجي غلا (يشيل يدها عن وجهها) ، قولي غلا شفيج؟ شصار؟ عمر مسوي شي صح!! غلا شهقت : لالالالا ، لا خالد والله لا (تصيح) خالد : عيل ماتقولين لي شفيج، ريحيني حرام علييج غلا ( شقووول لك بس؟؟) لمت خالد بكل قوتها تطلع الخوف اللي فيها بدون ماتشكي له خالد مط شفته من الحره ، مايبيها تصيح خالد يشيلها ويمسح دموعها : لاتصيحين غلا ، محد بيقدر يصيحج دامج معاي ، فاهمه! غلا كانت خايفه ماردت خالد : فااهمه؟ غلا هزت راسها خالد خلاها وقام فتح البلكونه و قعد على الكرسي و غلا داخل الغرفه خالد قعد وحط يداته الثنتين ورا راسه خالد (( قلبي شبيشيل ياغلا ، حبج ولا قهر من غيرج ، انتي مفكره اني ساكت من قوةٍ فيني يامسكينه ، انتي اقرب الناس لي ، مابي اخسرج ، خسرت عمي ، وابوي و امي واخوي ، خلاص تعبت كل مافيني تعب حتى صبري تعب)) خالد لف على يمينه وهو مبتسم لقى غلا حذاه ، استانس على رغم اللي فيه ، بس كان مايبي يبين لها .. غلا كانت بين كل رمشة عين والثانيه تخطف نظره على خالد وتبتسم كانهم اول مره يشوفون بعـض ..! خالد يطالعها وساكـــت ... غلا انتبهت له وسكتت شتقول له بعد؟ تزيده على اللي فيه .. .* من الهـدب ليـن الهـدب .,,.,. بحـر و مراكــب من لـهـب ، امـواج تبحـر بــ رضا و امـواج تـلعب بــي غصــــب *. خالد : شسوي فيه غلا؟ غلا : فمنو؟ خالد : فيه هو غلا : مادري ، انساه خالـد ، انت اصلآ تبي الشاره عشان ماتروح بيت هلك خالد : من قال؟؟ غلا : عيل ليش ماكنت تروح لهم؟ خالد : مابي اروح لهم عشان يحرمون من هاللي يسوونه فيني و فيج ، عشان يحسون على دمهم ويعرفون شكثر انا تعبان شكثر انا متحمل وساكت (يطالعها) بس عشانج ، ساكت و اعامل الكل فوق المحترم بس عشانج انتي لكن اللي صار ياغلا اليوم هزنـي ، فتح عيوني ، شلون كنت عمي شلووون! كنتي تقولين لي انتبه وانا مادري بشي ، كنت مفكره اخوي ، شلون منخدع فيه ، علميييني شلون؟ __________________ |
غلا : خلاص حبيبـي اللي صار صار ، وانت قلت مب مسوي الا الواجب معاهم ، خلاص سوه معاه هو ، خلك احسن منه خالد : غلا من صجج؟ يخوني و تبيني اعامله بالزين ، من كل عقلج تتكلمين؟ غلا : عيل بتصير غبي مثلي لما خليتك ورحت عنك؟ خالد انربط لسانه غلا : كنت غبيه أي ، ليش سكت؟ غبيه ، كنت ظالمتك بس حمدلله كل شي شفته عدل خالد : تبيني ارجع حق عمور؟ واعامله عادي ؟؟؟؟ غلا : لا ماقصدت اللي تقوله ، قصدي ان السالفه توها صايره ، وانت اعصابك محترقه ، باجر كل شي يتلاشى وينسي ، وانت طيب ياخالد خالد : لو تنطبق السما على الارض ماعانيته بالكلام ، يخسي غلا سكتت عنه غلا : زين خلاص قوم نام ، سفرتك باجر خالد جنه تذكر شي ناسيه : اوهووووووو ، اسافر بعد غلا : افا عليك ياخالد ، شنو يعني ، وان سافرت ، تطمن مب صاير شي ، عمي و درى بالسالفه ، تلاقيهم حابسينه الحين لا طلعه ولا شي ، ولا هو من نفسه مأنبه ضميره خالد : وانتي شدراج؟ غلا بلعتها : اتوقع ياخالد ، تطمن مافي شي من اللي فبالك ودخلت الدار خالد دز الكوب المحطوط ( انا شفييييني ، قمت اشك فيهاا ) خالد يلحقها : غلا ،، غـلاا ! غلا ماردت عليه بس طالعته وهو سكت ماعرف شيقول لها .. خالد تم واقف وهو يقوي من تسكيرته ليده مايعرف شيقول لها ، لو قلت سامحيني يمكن هيي .... غلا : شفيك؟ خالد انتبه : شنو؟ غلا : شفيك؟ خالد : ولاشي خالد انسدح بينام ..... اليوم الثاني خالد قام و عصبية الدنيا كلها متجمعه فيـه ، على أقل شي بيهاوش ويسوي سالفه ويقلب البيت على راسهم .. قام وشاف الساعه لقاها 8 خالد : افف شمقومني انا من الحين تم خالد منسدح على السرير و يفكر ، يسافر ولا يعتذر شيسوي ؟ يخاف يسافر و يخلي غلا هني .. ! فالبيت العود .. عمر كان الكل متغيره معاملته له حتى امـه و يدته .. و لما قال لتركي رفيجه عطاه كلام يسم البدن ولامه ، بس ماخلاه و راح عنه ، لانه يعرف ان عمر محتاج حد يفهمه هو مب فوعيه عمر كان حابس نفسه فداره ولا يطلع ولا ياكل ولا يتحرك قافل الباب وقاعد فالظلام .. رفع سماعة التليفون بيتصل لخالد لكن نزل السماعه عمر ( شبيقول؟ فوق شيني قواة عيني ، اذا هو مايبي يكلمني ، بس انا مابي اخسر خالد ، اخوي الوحيد ، واللي سويته مب شوي ، انا حقير ، حقييييير احقر انسان فهالدنيا كلها ، لو انا مكانه بسوي اكثر من جذي الا بذبح خالد فمكانه ، لكن هو شلون قدر يمسك نفسه عني؟ ) خالد نزل وهو يتسحب مابدل ملابسه حتى نازل بالبجامه شافته غلا لكن مانتبه لها .. قعد خالد على الطاوله يتريق بروحه و غلا كانت تبي تقعد لكن شافته مب طايق حتى ملابسه اللي عليه .. كمل ريوقه و رجع شرب قهوته مره ثانيه خذها وتم يشوف التلفزيون و فيصل حذاه و خالد سااكت .. سعد نادى فيصل و فيصل نقز و من غير مايقصد دقر يد خالد و انصبت القهوه كلها عليـه خالد صرخ عليه : يووووووه وين عيونك انت غلا كانت واقفه تطالعهم خالد يزعق عليه : قووم يلاا قوووووم فيصل راح يركض خايف من خالد صاير عصبي عليهم وايد و اليوم بزياده غلا : شفيك خالد؟ خالد : سلامتج غلا شتقول له مايبي يكلمها و خلاص فهمت .. راحت غلا و تمت لين العصر فوق وهو تحت خالد طيارته الساعه 9 فالليل،، بعد صلاة العصر دخل داره عشان يرتب شنطته دورها مالقاها خالد : غلا؟ (يدورها) غلا ؟؟ ! غلا : نعم؟ خالد : الشنطه وين؟ غلا : شنطتك جاهزه خالد : وينها؟ غلا راحت عشان تراويه وهو يمشي وراها و اول ماتفتح الدار محطوطه الشنطه لكن خالد المسكين وين عقله؟ غلا : كاهي خالد : اها ، مشكوره غلا : العفو وطلعت خالد دخل يتسبح عشان قبل السفر بيروح شغله وبيطلع من هناك ,, غلا كانت قاعده مع مريم فالصاله الفوقيه و مريم تركب الكرسي وتطيح وترجع تركب عليه مره ثانيه و غلا منسدحه على ظهرها تشوفها ويدها على بطنها ، توها ماخذه الدوا لكن تحس صار مايعطي مفعول مثل قبل وكان التعب مبين على وجهها .. خالد طلع من الحمام (وانتوا بكرامه) ، بدل ملابسه يدور غلا فكل مره يلبس هي حذاه عنده تساعده ، لكنها اليوم محد! يلف مره ثانيه يدورها يمكن تجي ..! طلع خالد من داره وشاف غلا و مريم .. قعد على الكرسـي وهو ساكت ، مريم ركضت وقعدت فحظنه وظحك يوم شافها ، هذي الوحيده اللي مايقدر يقول لها شي .. لكن بس كان يظحك وهي تلعب فملابسه وتجر غترته وتمسك اصابعه تلعب فيهم .. بعد طيب الوعـــد من اوده تمـــــرد من احبه تمـــــرد ما رحم قلب خله وتار عنه الرحيل سامني بالزهد في غرامي و تزهد منيتي ليت فعله مثل وجهه جميل خالد سكت : مريومه جيبي لي الجهاز غلا تمد يدها وفيها الجهاز .. خالد خذه منها وهو ساكت ،، و غلا قامت و دخلت عنهم الدار وقفلت الباب مريم وقفت فحظن خالد ومسكت خدوده وفرصتهم لين خلت خالد يزعق من كل راسه وهي ميته ظحك رفعت يده وعضتهااا وشردت ، تطق الباب على غلا و غلا ماتبي تفتح مريم كانت توها تنطق وباليالله تطلع منها كلمة ماما و خالد تناديه لود لووول يعني خلود مريم تطق لكن غلا ماتفتح خالد خاف لايكون صار لها شي ، توه بيقوم غلا فتحت لها و دخلت مريم مريم : لووود لود (تناديه) غلا من داخل الدار : اووش (تأشر لها تعالي) مريم ظحكت ودخلت كانت تبي تنام ، قعدت مع غلا لين نامت ، بس تشوف امها ساكته و دموعها تصب وهي ساكته وتظحك لها عشان ماتخاف خالد لين الحين قاعد يخاف يطق الباب ترجع مثل قبل وتطرده خالد : اوهوو ، خل تطردني قام وطق الباب عليها وهي فمكانها تعرف انه هو بس ماتبي تقوم تفتح له ، اكيد بيدخل يعتذر لكن ماتبيه يعتذر خصوصاً هالمره ، الغلطه مب غلطته ، غلطتها هي خالد برجـا : تكفين فتحي غلا من ورا الباب تسمعه خالد : فتحي الباب غلا ، صدقيني ابيج ، بقولج شي غلا مسحت دموعها عشان ماتبن له انها كانت تصيح .. فتحت الباب وهي خايفه خالد دخل وتسند على الباب خالد : غـ,,,, غلا : لاتقول ولا كلمه ، الغلط كله مني ، مابيك تعتذر ولاتقولي شي ، انا من دخلت حياتك دخلت النكد عليك وانت اللي ماكنت تعرفه ، شوفنا من تزوجنا شصار بسبتي ، كل شي غلط صار مني انا ، انت ماغلطت .... خالد :لا غلا ، لاتقولين جذي ، انتي من دخلتي حياتي كل شي تغير ، صارت لي حياه ، الغلط مب منج و لا من عمر حتى ولا مني ، الغلط من ابوي غلا : عمي؟ خالد : لو ابوي قوى كلمته على امي بدال لايعطيها الكيف كلـه ، وقال لها لها ، جان الحين انتي لعمر ، وعايشين بسعاده بلا هالأرف اللي انا معيشج فيه غلا صرخت عليه : اسكت ، اسكت فاهم خالد يظحك لان شكلها وهي تصرخ فظييع خالد : شفييج؟ غلا : انا العيشه اللي عايشتها معاك ماكنت اتخيلها ، لاتقول جذي خالد والله العظيم ..... خالد : ها هاا اووش بس غلا : سامحني خالد خالد : افا، على شنو؟ غلا .... خالد : ها شفتي ، حتى انتي ماتعرفين على شنو غلا : لازم اعتذر لك خالد : اللي صار صار الضرب و الهواش لو بيجيب فايده جان ماشفتيني ماسك نفسي عنه لين الحين ، خلاص ، انا بعتبر اللي صار مستحيل يتكرر ، وابي اسافر وانا متطمن غلا : انشالله خالد : اوديج بيتنا؟ غلا تبتسم له : عمتي بتجيني خالد : تغريد؟ وعيالها؟ غلا : هي تبرعت خلاص تتحمل النتايج هي خالد يبتسم لها : بعد صرتي تنكتين غلا تظحك له و دموعها تصب خالد : بعد صرتي تصيحييين ، تعالي هنيي لمته غلا وهي تصيح من كل قلبها خالد بعد ماودع غلا و عياله طلع للشغل عشان من هناك يروح للمطار .. بس شاف نفسه واقف عند بيت هله يسلم عليهم نزل وهو ساكت ، فتح الباب و دخل خالد : السلام عليكـم .. لطيفه : وو .. وعليكم السلام خالد يحب راس امه : شلونج يمه؟ لطيفه : حمدلله خالد : وين ابوي ؟ لطيفه : عند يدتك خالد مشى يدور ابوه فتح الصاله الصغيره لقاهم قاعدين مع عمر و ولد خالته بعد خالد خز عمر بنظره وهو رافع حاجبه قط السلام وحب راس ابوه ويدته وقف جدام عمر اخوه و طالع يده (مادري الوحك بكف؟؟) وخر عنه و سلم على ولد خالته وقعد بعد ثواني خالد : استأذن انا يبا سعود : وين ياخالد ، تو الناس يبا ! خالد : وراي سفره الله يخليك سعود : سفره؟ وين ؟ خالد : سفرة شغل يبا كلها اسبوع وراجع سعود : اها ، بالسلامه انشالله خالد : الله يسلمك سلم عليهم مره ثانيه و لما وصل عند عمر حط يده على جتفه يربرب عليه وطلع سعود يطالع ولده وهو ساكـت خالد : يلا مع السلامه لطيفه : وين وين ياخالد؟ تونا ماقعدنا معاك خالد يحب راسها : مره ثانيه انشالله ، يلا سلام وطلع عنهم قبل لايطيح فلسان امه وهو مالـه خلق و مب ناقصته حنة امه وصل لشغله وهو قاعد معاهم وهو ساكــــت ولا يتكلم لما تحركوا رايحين للمطار خالد خلى سيارته وراح مع رفيجه (خليفه) << تذكرونه المهم .. وصلوا للمطار وركبوا الطياره ، خالد من قعد تذكر غلا وشافها خالد يهز راسه يبي يبعد شي عنه خليفه : شبلاك انت؟ خالد : ها لالا ولاشي مصدع شوي خليفه : ايه بطلنا زقاير اشوف خالد : هههه شنسوي بعد شور ام فيصل ، مانقدر نقول لا خليفه : ههههههههههههه اللي يسمعك مايقول كانت متكهرب قبل لايعرس خالد : اسكت فضحتنا جدام الامريكان خليفه : هههههههه طارت الطيـاره و كالعاده خالد لازم حد ينبهه يسكر حزامه .. غلا جاتها عمتها وعيالها الـ3 بعد ماطلع خالد من البيت بشوي .. بالليل لما كلهم نامو و غلا و عمتها تموا سوالف و هذره الخ سهرانين يعني .. تغريد : شخباره عمر؟ غلا برقت عينها : شجاب طاريه ؟ تغريد : بس أسالج .. مارد مره ثانيه مااتصل ماحاول يسوي شي غلا : لا ، وخالد ماسك نفسه عنه لآخر درجه تغريد :الله يهداه بس، والله تعبنا واحنا نكلمه ، انتي مسويه له سحر غلا : عمتي ماله داعي هالكلام ، كنا صغار ، وخلاص الواحد يكبر ويتعلم من غلطاته تغريد احترت شوي : يعني حبج له غلطه ؟ هههه والله وكبرتي ياغلوي قومي نامي بس غلا : شوي والحقج تغريد دخلت و نامت عنها و غلا تمت تدور فالبيت بروحها ، شافت الساعه لين الحين مطول خالد لين مايوصل .. راحت غلا تنام بس تذكرت الدوا ماخذته وراحت تاخذه و طاح الكاس انكسر من يدها ، غلا تخرعت و صارت تتنفس بسرعه وقلبها يدق بقوو .. غلا طلعت بسرعه من المطبخ و ظربت فجسم حد ماتت من الخوف المكان ظلام غلا تصيح وتبي تشوف من لكن ميته خوف ، فتحت عينها طلعت فاطمه غلا ظربتها غلا : شتسوين انتي هالحزه؟ فاطمه : كنت طالعه من الحمام وسمعت شي انكسر what happened ? غلا تذكرت خالد شلون كان يظحك عليها لما تتكلم بالانجليزي ابتسمت غلا : ولاشي حبيبتي طاح الكاس خلاص روحي نامي فاطمه : وانتي ؟ غلا : وانا بعد بروح انام طلعوا للدار و دخلت كل وحده منهم تنام .. غلا كانت مريم نايمه حذاها ماحطتها فسريرها ، قربت غلا من مريم و تمت تشوفها وتتمعن فملامحها مريم كانت عيون خالـد حتى نفس الغمضة نفس الجفون والحواجب .. غلا توخر قذلتها عن جبينها و تلمس جلدتها الناعمه ، باست جبين مريم و حطت راسها على المخده يمكن يجيها النوم.. غلا كالمعتاد قامت مع الصلاه لكن هالمره بدون خالـد .. بعد ماصلت غلا كان الجو بااارد وهي قاعده فالصالـه والكل نايـم غلا دفت عمرها بالشال المحطوط على الكرسي و حطت راسها على ايد السوفـا ويدها تحتها عشان تدفى منها تمت على هالقعده لين طلعت الشمس وخذها النوم من التعب وغفت ولا حست بالدنيـا .. قامت غلا على صوت الخدامات وهم يشيلون ويحطون تنرفزت غلا من الصوت ولانها قامت من وسط نومه ثقيله ودخلت الدار تكمل نومتـها غلا تمت نايمه لين الظهر ولاحد قعدها من نومتها خالد وصل لامريكا وكان الليل عندهم و خالد كان توه قايم و مبين عليه و كالعاده معصب .. نزل و كان كل شي مخلصينه لهم ، ركب خالد السياره وحذاه خليفه خليفه ماحس الا براس خالد طايح على جتفه خليفه : والله ابتلشنا فيييه بعد نص ساعه وصلوا للفندق اللي بينزلون فيه هالاسبوع كان شكله حلو وفخم لكن خالد طول الوقت وهو يتحلطم على راس خليفه وصلوا لغرفتهم و خالد قط روحه على السرير و نايم على بطنه خليفه رفعه من قميصه : انت ماشبعت خالد :لا والله يوعان اطلب لنا شي خليفه : اكيد هم بيجيبون لنا العشا اذا ماجابوا ننزل على حسابي خالد : انزين عيل اذا جابو الاكل قعدني خليفه : لا خالد : افففففففففففف منكككككك خليفه : تصدق خلود خالد : اصدق خليفه : بودي اعطيك كفففف يقعدك من نومتك عدل خالد : روح زين .. ( وحط يده فمخباه يدور موبايله) خليفه : شتدور؟ خالد : حظي الحلو خليفه خلاه و نام له شوي لانهم صج متكسرين خالد اتصل على موبايل غلا ماترد ، اتصل على غرفتهم و غلا نايمه بس تسمع صوت التليفون وماتقدر تفتح عيونها ، فيها نوم مب طبيعي، شالت السماعه غلا غلا بخمول : الووه! خالد : هلا واللله هلا بخلف اهلي والللله غلا نقزت من السرير : حبيبيييييي خالد ، متى وصلت ؟؟ خالد : تووني والله بس النوم ذابحني بس تدرين قلبي مايطاوعني انام وماسمع صوتج غلا : حيااااتي والله ، حمدلله على سلامتك؟ شلونك؟ شلون المكان؟ خالد : كررريه والجو خايس وكل شي ماله طعم بس ولهان عليج غلا الخجل قرص خدودها: شدعوى حبيبيي ، انت عندهم و المكان خاايس ماصدقك خالد : تكفيين لاتقطين حجي حلوو غلا : ههههههههههه عااد ها مو تزيغ عينك على امريكيه خالد : افا واللله ياام فصيل ، الا تعالي شخبارهم؟ والله نسيتهم هههههه غلا : يبوسون ايدك كلهم خالد : مريووومتي وينها لايكون تاكل ترا قريت بالجرايد خبر انفجار غلا : ههههههههه لا عاد خالد خالد : خلاص عيل انا اخليج الحين غلا : الحين؟ خالد : أي الحين حبيبتي انشالله اكلمكم مره ثانيه غلا : خلاص عيل ، خل بالك على روحك خالد : انشالله ، فماان الله غلا : مع السلامه وسكررت .. خالد سكر و على طول نام ، ولاتعشى لا هو ولا خليفه غلا شافت الساعه 11 غلا : ها؟ انا نايمه لهالحزه ! افتحت الستاير غلا وشافت الوقت صار الظهر و الشمس بنص السما سعد : يممممه غلا : ها حبيبي؟ انتوا متى قمتوا وليش خليتوني نايمه لين الحين؟ سعد : هذي ماما تغريد ماخلتنا غلا تذكرت ان عمتها موجوده : اوه أي صح ، انزين تريقتوا؟ سعد : يممه الحين بعد شوي الغدا غلا : الحين بعد شوي (تظحك) ، وانت شفيك؟ سعد : ابي اتصل اكلم ابوي غلا : توه مكلمني حبيبي و راح ينام سعد : متى بيرجع انزيين؟ غلا تنزل لين عنده وتحط يدها على جتفه وهي تفكر : اممممم شنو اليوم؟؟؟ سعد : الأأأأحد غلا : الأحد الجاي انشالله يوصل سعد : اوووووووووووكييييي وراح عنها غلا بعد ماتسبحت ونزلت وتغدوا مع بعض تغريد كانت بالخش متصله لعمر يجي البيت عندهم عشان تحط حد لسالفتهم على العصر عمر وصل والجو كان بارد اكثر من الصبح وصل لباب الصاله و رن الجرس غلا طلت من القزاز و شهقت : عمتيي ، ذي عمرر شجاي يسوي تغريد : انا مكلمته غلا : من صجج عمتي؟ خالد حالف مايدخل البيت ، مستحييل ادخله تغريد : ويه غلا من صجج انتي اقوله روح؟ غلا : انتي جان قلتي لي الله يهداج بعدين اليهال أصلآ شبيقولون لخالد باجر ان سالهم بيقولون عمي جانا البيت ، تكفين عمتي مابي مشاااااااااااكل الله يخليييج مابغينا نخلص منها تغريد : انزين انزين خلاص طلعت له تغريد .. عمر يطالعها وهو مستغرب تغريد : انت ارجع بيتكم و احنا بنلحقك عمر : بس انتـ ........ تغريد : ادري ، انت روح بعدين افهمك عمر يهز راسه : انشالله تغريد دخلت وسكرت الباب غلا : انتي شسويتي ياعمتي اففففف والله ان درى خالد لايطلقني والله تغريد : بعيد الشر ، بعدين سمعيني انا جبته هني عشان اخليج تصارحينه و هو بعد ونحط حد لسالفتكم غلا : مابيني وبينه سالفه عمتي لاتقولين جذي ، شفيكم انتو؟ ؟ تغريد : بسج من هالكلام و يلا امشي معاي غلا : وين؟ تغريد : بنروح بيت ابوي غلا : ليش؟ تغريد : كم مره بقول انا؟ غلا : اها ، اوكي تغريد : فطيم خلج مع اليهال فاطمه : لااااا ليييييييش ؟ تغريد : شوي و راجعين غلا لبست عباتها و طلعت مع تغريد ركبوا السياره ،، فالطريق غلا : اذا اتصل خالد ودرى اني محد شقوله؟ اففف تغريد : شتقولين له قولي طلعت مع عمتي غلا و اعصابها محترقه : انتي ماتعرفينه لازم اقوله قبل لااتحرك حتى تغريد تظحك لها : يحلييلكم توكم معرسين غلا : عمتييييي وصلوا و نزلوا غلا انصدمت عمر متسند على سيارته فالحوش ينطرهم عمر فصخ نظارته السودا الي كاشخ فيها و عطي عيونه حرية النظر و شاف غلا ، بكل حلاوتها غلا عصبت من نظراته لها غلا : ماتقولين له يشيل عيونه ، خلاص مافي حيا عمر ماسمع شتقول عدل كان بعيد تغريد : بس عاد غلوي تغريد مسكت عمر من يده : بسك ها وسبحتهم لداخل البيت غلا قعدت وهي تهز ريلها متنرفزه على الآخر تغريد : شوف عميير و انتي ياغلا ، انا ماجبتكم اليوم تسلمون ولا تعتذرون ، جبتكم تواجهون بعض تقولين اللي تبين تقولينه و تحطون حد لكم غلا : عمتي انتي شفيج؟ ليش تبين تربطيني فيه؟ عمر فتح عيونه والتفت على غلا وهو مب مصدق غلا تعني عمر بالكلام وهي توجهه لتغريد : اذا هو مب راضي يقتنع ولا يصدق اللي صار هو اللي بيخسر هو اللي بيتعب وغيره بيفرح ،(تكلمه) افتح عينك يا عمر انت ماعدت مغمض ولا عدت صغير ، شوفني انا من ولمن صرت ، حرام عليك اللي تسويه فينا وفنفسك عمر : غلا قبل لا تلوميني انتي و عمتي ، افهموا اني انا هويت ، وصدقوني مايحس بالشي الا اللي عاشه ، والحب ترا انواع ، وانا شكلي طحت باكبرهم وباصعبهم ، لاني متعلق فيج ولا اقدر انساج ، انا قلبي لا صخر ولا حديد انا قلبي عشق ولين اليوم يعشق وقلبي بدون حبها ياعمتي والله مثل ،، شقولج ، الخشب اليابس ، وروحي ميته ، حطوا نفسكم مكاني ياعالم ، امس كنت وياها واحبها وتحبني وراسمين طريقنا لبعض و كان كل شي حلو فعيني الحين اقوم على الهم وابات على الياس ، صعبه والله صعبه ، قلت لنفسي حاولت اقنعها ماقدرت غلا : شنو ماقدرت ؟ انا قدرت انت مب راضي تتحرك مب راضي تروح وتشوف غيري عمر عصب: غيرج؟ وين فيه غيرج؟ من تجي مكانج؟ غلا تهز راسها : عمتي اذا هو رافض يتيغير انا شسوي فيه؟ عمر :لا تسوين شي ، خلاص انا اوعدج بتم بعيد عنكم صدقيني ، بغيب عنكم ، لكن شي واحد ماقدر اسويه غلا :شنو؟ عمر : ما احبج غلا : تسمعيين عمتي؟ تغريد ماعرفت شتقول له غلا : خلاص عمتي برجع البيت انا غلا طلعت من المكان وهي دموعها تسبق الثانيه وتنزل ركبت السياره تنتظر تغريد تغريد : سمعت ياعمر خلاااص ، البنت بلسانها قالت لك ماتحبك ونستك عمر : سمعت عمتي خلاص روحي تغريد : بروح لاتخاف .. وطلعت تغريد ,, عمر فتح باب غرفته وشال عن صورة غلا وتم يطالعها الورد الي حاطه عليها ذبل طاحت عينه على عوده عمر : اذا الورد ذبل ، اكيد الاغاني كلها ماتت ، ماقدر اكرهج غلا ماقدرر __________________ |
مشكورة اختي:6500.gif: |
| الساعة الآن 01:08 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir