|
يلا عليا نزلي البارت و نباه طويييييييييييييييييييييييييييييييييييييييييييييييي ييل اذا بتسافرين!!!! اتروحين و اتردين بالسلامة ..... بسرعة!! هههههههههههه نترياج :5: |
يـــِـِـآآللهــِـِـ نـــِـِـِرقب آلبـــِـِـِـآآرت ،، ~ تــِـِـوؤنـي آنتبهــِـِـ آن رآآعيهــِـِـ آلقصَ ـِـِـهــِـِـ ردت تكــِـِـتبهــِـآآ ،، ^^ وآلس َــِـِـموؤحَ ـهـِــ منج ،، >،<" |
وووؤيــــِـِـِـِـن آلبــــِـِـِـآآرت ،، ! ~ ،، :14: ،، ~ |
(الجزء 84 ) (اما في كارفور .. كان مايد يتعامل بشغله بجدية تامة .. كان لابس بنطلون أسود وفانيلة سودة وفوقه قميص الشغل الكات لونه أبيض وأزرق وعليه بطاقة التعريف به .. وكان شغله عالكاشيير ويوم ما يكون في زحمة ياخذ الجواري ويردهن مكانهن ..ويرد البضايع مكانهن بس كان مسوي زحمة فكارفور بسبته .. وأول ما دشن شمايل ونشبه فكارفور .. دشن يتشرن وشمايل اتدوره بعيونها بس شافت طابور طويل من الحريم الصغار .. الكبار في السن .. وانصدمت انه الكاشيير الباقية محد عليهن من الحريم ..) • نشبة : بتخبرج شملوه؟ شو سالفة الحريم مصطفات؟ • شمايل: مادري يا امايا يمكن مسوين تخفيضات • نشبة : يمكن يوزعون اكل ببلاش فهذا اليوم • شمايل: مافي فهالزمن شي ببلاش !! • نشبة : عيل ميود وين؟ وين منخش؟ شملوه اتصلي بميود .. • شمايل: لايابويه أستاثم اتصلي روحج .. • نشبه تضربها ع راسها : تعرفين اني لا أقرا ولا اكتب .. اضربيلي الرقم يالمطوعه وانا روحي برد عليه (وتتصل به ) ألاو !! • مايد يضحك : ألاوين أمري .. • نشبة : وينك مسوّد الضلع؟ • مايد : بعده ما اسوّد ضلعي عشان تشوينه .. خير فديت ويهج .. • نشبة : انا هنيه فكافور ..انته وين؟ تعال سوّلنا دسكون وخبرني شو سالفة الحريم المصطفات طابور هالطول !! • مايد : زارتنا البركة .. أسميه نوّر الكـــــــافوووور بندوا الليتات !! بندوهن !! نور نشيبة بيظهر !! • نشبة تتحرطم : امبونك لغاي شرات أبوك !! يالله تعال نحن واقفين عند الحليب • مايد : يابوج لو قلتيلي جان يبتلج بقرة وروحي حلبتها لج بدال هالحليب السم .. • نشبة : الله يسمم فضول ان شاء الله .. تعال وفكنا !! • مايد : منو وياج؟ • نشبة : ماشي يايه روحي اتمشى انا وزهور • شمايل تتحرطم عليها : جيه وانا شو سامانديجا؟ • مايد بلهفه : واايه واايه وااايه • نشبة : أهــأ أهــأ عن يطيح فجك بس !! • مايد : أحينه ياي أحينه امممرة ياي (وبند عنها وينادي على فيصل ) فيصل ... فيصل !! تعال بابا كمّل شغل • فيصل : انته وين روه؟ • مايد : فاميلي فاميلي يايين !! • فيصل: روه روه روه !! • مايد : مشكوور يا ريال .. • وحدة من الحريم : تعال وين ساير؟ انا ما بدفع ثمن الاغراض الا لك .. • مايد: سامحيني أختي وراي شغل وايد مهمة (و انقهرن الحريم و سار سيده صوب مكان الحليب ..) يالله يالله يالله نور المكان.. (وكان مبتسم ولاحت فعينه.. انه شمايل رقبتها شوي ظاهرة..و سكت..) • نشبه:ما بغيت اتي.. ( مايد يغمز لشمايل عشان تغطي المكان ..و هي مب فاهمه..) • مايد:كان وراي بسبس و عشانكم فضيت.. • شمايل: عدال عدال.. ( وهو يغمز لها..) بلاك؟ • مايد عصّب:ماشي.. • نشبه:عاد نحن يينا نبا انطالعك تشتغل.. • مايد: جيه اتحروني ألعب.. • نشبه: لا..ويايين عشان تسويلنا دسكون.. • مايد: اشوه.. • نشبه: دسكون.. دسكون!! تخفيض!! • مايد يضحك: هيه فديت الدسكون انا !! (ويأشر لها..) • شمايل: بخبرك؟ انته شو سالفتك؟ ارمس!! • مايد: تراج بهدلتيني !! لحفي رقبتج يا بنت الناس!! ( شمايل احمر ويهها مع إنها متغشيه) • شمايل: هااه!! اوكي!! • وحده يايه جداهم: لو سمحت؟ • مايد:آمري.. • الحرمه: ممكن اتيبلي من هذا من فوق.. • شمايل اشتطت و فخاطرها:هاي مول ما تستحي.. الجلبه • نشبه تصاصر شمايل: شفتي كيف البنات متكودات عليه؟ • شمايل:يا مالها السم!! طاعي !! طاعي !! اتحيسّ بعد !! طاعي تطّلع قصتها !! • نشبه: ما عليج..أصلاً ما ينلاح فعينه غير شملوه صح؟ • شمايل بغصه : صح (و كان راكب الدري اييبلها الغرض.. ويوم نزل..) • مايد: اتفضلي.. • الحرمه:مشكور.. أوييه انته مواطن؟ (مايد توه بيجاوب بس قاطعته شمايل..) • شمايل:غناتي؟ أمك تبا كرسي تيلس عيّـــت.. (ونشبه اتسوي عمرها تعبانه..) • نشبه: واعليه على ريولي..أبويه ميود..سر انته و حرمتك دورولي كرسي.. (مايد مب فاهم شو السالفة..) • مايد:اشـــــــوه؟ • شمايل ترفع غشوتها شوي عشان تراويه عصبيتها:امش جدامي..لأدوسك ع بطنك.. • مايد : والخيبة !! ان شاء الله..(ويوم مشوا..كان هو شال السلة..وما خلت شمايل كاكاو ما شلته..) ها كله بتاكلينه؟ • شمايل معصبه: ما يخصك!! • مايد: بلاج حامقه؟ • شمايل: عيل هذي شغلتك؟هااه؟ • مايد: ليش مب عايبنج ؟ عشان البنات؟ • شمايل:هيه !! أباك تفنش!! • مايد بجديه: عشان أرضيج لازم اتفنش!!لا والله ها مب كلام!! • شمايل: عيل شو تبا كل حرمه تدلع ..هات لي هذا و ذاك!! • مايد: هاي شغلتي!!عيبج و لا ما عيبج!!و انا حتى ما عبرتهن..انتي تعرفين منو ابغي.. • شمايل: قص علية بكم من كلمه..أباك و تباني..بس يوم سالفة بنات ما تصبر!! • مايد: أنا؟ • شمايل: عيل أنا؟ • مايد: اتعرفين اني من زمان مودّر البنات!! • شمايل: أنا ما بصدقك لين تفنّش!! • مايد: انتي ليش انانيه جذيه ؟ • شمايل: برايه أنانية ولا جلبه حتى!!بتفنّش ولا؟ • مايد : مب مفنشّ واللي فراسج سويه!! • شمايل دبرت منه : عيل انساني !! (وهو يلحقها و ساكت..الا متغصص..كان مظلوم من صوبها..انظلم فشي ما سواه..) • نشبه: وين سرتوا عني؟ • شمايل: بروّح البيت ممكن؟ • نشبه: بلاكم؟ • مايد: هاتي عنج السله أميه..(وشل عنها السله .. وساروا الكاونتر .. ودفع عنهم ... .ووداهم لين الموتر .. تمت شمايل تفكر بالكلام اللي قالته .. يمكن جرحته .. وخصوصاً انها ذكرته انه راعي بنات ..) • نشبه: شو استوا؟ • شمايل: قلت له يفنّش .. • نشبة : يا امايا .. لا تلعبين بقلبه.. الريال شارنج .. أحينه كلمتج هي اللي بتوّديه وبتيبه؟ فكري ولا تدمرينه .. ترا قلبه رهيف .. واعتدل وغدا ريال .. أحينه يوم تشوفينه تقولين ريال والنعم فيه ... الا ينضرب فيه المثل .. • شمايل تتنهد : انا ما يخصني .. الا يفنّش ولا ما بيرتاح قلبي .. (ونشبة صخّت عنها .. ويوم وصلت شمايل البيت ) • شمسة : هاااه؟ وين سرتي تهومين؟ • شمايل معصبة : امايا .. تبين توّدينا دبي؟ ودّينا !! ابا اطلع من ليوا !! • شمسة : ويييه شو اللي غيّر رايج؟ • شمايل: بس جذيه !! انتي ما تبين؟ • شمسة : ابا اليوم قبل باجر .. • شمايل: عيل نزهب ثيابنا؟ • شمسة : هييه .. بس صبري بندبج تزجرين بشاكير اميه عشان يفزعون .. • شمايل: انزين بسير أزجرهم .. (ووصلت لين الباب .. ويتها النفضة .. وتمت 10 دقايق عند الباب .. وبشجاعة بطلت الباب .. وتحصل عواس مجابلنها ..) اووووف أشوا ... • عواس: بلاج؟ • شمايل: هااه؟ كنت زايغة أظهر روحي .. • عواس: زين عيل تعالي بوّديج البيت .. • شمايل وتزاعج : امايا عواس بيوديني .. • شمسة تزاعج : زين اتسوين .. • عواس: يالله طوفي • شمايل: عواس؟ عادي أسألك سؤال؟ • عواس: آمري يا اختاه .. • شمايل: انته اخويه العود صح؟ • عواس: لا تكبريني الله يهدي سرّج .. تقدرين تقولين أخوج الصغير .. (ويضحكون ) • شمايل: انزين ليش اتكابر؟ يوم انك تحب فطيم .. قوللها .. • عواس: ومنو قالج اني احب فطيم؟ • شمايل: يبيّن عليكم .. • عواس: غلطانة فديتج .. انا يمكن فحياتي القبلية حبيتها وعشقتها .. لكن من عقب ما فكرت فيها كحبيبة او حتى ام عيالي • شمايل: تراها اترييتك وايد .. حرام اللي تسويه فيها .. • عواس: لا لله حلال .. انا ما احس بشي صوبها الا غريزيا يوم اتطيح فمشكلة لازم أساندها • شمايل: بصفتك منو؟ • عواس: عرضي !! وتبيني أسكت عن الغلط؟ • شمايل: فرضا لا سمح الله .. لو حد اعتدى عليها .. ومحد رضا ياخذها .. بترضى تاخذها؟ • عواس يطالعها : وصلنا البيت .. • شمايل: بعدك ما جاوبتني .. • عواس: باخذها وبستر عليها .. وبحطها ع راسي بعد ... بس مستحيل أحبها .. • شمايل: كل انسان وله عيوبه .. • عواس: وكل انسان له مقدرة عالصبر .. (تموا قوم شمايل أسبوع كامل .. وهم يجهزون عشان الحولة .. وآخر يوم ودعوا الاهل .. وكانوا شمايل وهناء والبشكارة ميلسين في الموتر يتريون أمهم ) • هناء: اعنبوا شو تسوي؟ من متى مخلتنا في الشمس .. • شمايل: رفيق !! بطّل المكيف .. • هناء: وييه !! اندوج شملوه .. طاعي منو ياي.. • شمايل تتصدد متوقعه ميود : منوه ؟ منوه؟ • هناء: عواس ... واااااااااااي عليه .. (وبطلوا الجامة ) • عواس: السلام عليكم .. (ويردون السلام ) خلاص بتتحولون ؟ • شمايل: هيه خلاص .. • عواس: الله يوفقكم ان شاء الله .. عادة تراه كل خميس الغدا عندكم ما عليّة منكم !! • شمايل: افا عليك .. • عواس: من ايدج هنوه .. • هناء احمر ويهها : صدق والله؟ تبا مني؟ بتعلم بس عشانك .. • عواس : اباج تغدين حرمة وتفزعين ويا خالوه .. ودراستج اتجابلينها وصدقيني حزت التخرج محضرلج مفاجأة .. • هناء مب مصدقة : كل هذا وحقي؟ • عواس: أكيد .. • هناء فخاطرها : أويييه شكله عواس يحبني .. الله يا حظي !! • شمايل: ما شفت ميود؟ • عواس: أحيده سار لشغله .. • شمايل: خله ينفعه !! • عواس: بتخبركم عندكم جوازاتكم؟ • شمايل:فشنطتي .. ليش؟ • عواس: في اكتتاب وابا جوازاتكم .. (وشمايل تعطيه ) • هناء : الله !! بتاخذ لنا أسهم !! • عواس: سر لا تعلمين حد .. • هناء: انزين ليش ما توّدينا؟ أحس مرتصين فهالموتر !! • شمايل تنغزها : إيييييييييه عيب !! حشمي !! • هناء: إشوووه؟ ما قلت شي !! اصلا حركة وحدة الاغراض بيطيحن ع روسنا .. • عواس يبتسم : انزلوا بوّديكم !! • هناء: الله كشخة !! • شمايل: لا ما يحتاي !! • عواس بحزم : أقولكم انزلوا !! • شمايل: أمايا بتواجعنا !! • عواس : انا برمسها .. اعنبوا .. (ونزلوا وركبوا فموتره ) • هناء: الله !! عواس !! موترك يريّح .. ياني الرقاد.. • شمايل: شو مخلّص الدخون اللي في البيت؟ • عواس: ههههههه يوميا هالدخون !! اوووه عن انسى .. (ويعطي كل وحدة منهم ظرف ) بطلوهن في دبي • شمايل: شو ها؟ • عواس: شي ما يسوى !! (ويعطيهم ظرف ثالث ) عطوا خالوه بس مب جدامي .. • شمايل: ما تقصر ياخويه .. • عواس انحرج : بسير اطالعها .. بلاها اتأخرت !! (ونزل .. وهنوه الفضول ذابحنها ) • هناء : الا أبطّله .. (وبطلته ) وايه فديته .. طاعي حاطلنا بيزات .. • شمايل: صخي !! راسي يعورني .. (وحد يدق على جامة شمايل ) امييه ... ميود؟ (وتبطل الجامة . وبجفاء ) خير؟ • مايد : خير بويهج .. ما باج تروحين وانتي حاطة فخاطرج مني .. • شمايل: يهمك؟ • مايد : واايد .. • شمايل: وانا متمسكة برايي .. • مايد ببرود : تروحين وتردين بالسلامة وانا رايدنج ومول ما بفرط فيج (وصد عنها بيرد البيت .. انه تي سيارة مسرعه صوبهم وطار الدنيا بمقطع يا راحلن عني قلي على وين .. والريال مول مب منتبه لميود .. وشمايل شرا اللي قلبها وبتفقده فلحظة .. ) • شمايل: ميوووووود !!!!! (وتوايج من دريشتها وتمسكه من ثيابه من ظهره وتسحبه جداها..) • مايد يتنفس بصعوبة : اووووففف الرب سلّم !! • شمايل تطالعه وتصيح: زين جذيه؟ زين؟ لو دعمك الموتر؟ كل هذا فلحظة !! • مايد: بتفتكين مني !! • شمايل تضربه ع راسه : سبال واحد !! روحي قبل روحك !! (مايد ضحك وعرف غلاته فقلبها .. وروحوا وكانوا راضين على بعض ) (اما عند مانع المشاكل اللي استوت لفوق راسه دوم ضرايب بين هزاع ووداد .. مع انه هزاع من عقب ما طلع من المستشفى ما يخصه فحد بس وداد مغصصة فعيشته ..ومانع ارتفع عنده الضغط وصبره قام يقل وقام ما يقهرها .. وفاض فيه الكيل وطلقها فلحظة .. وكانت عندها هاللحظة بالنسبة لها مثل العيد .. شلّت اغراضها وروحت بيت اهلها بدون بنتها .. وهزاع كل يوم والثاني يحّن على امه تخطبله هناء .. كان عنده وعده انه ياخذها ويستر عليها شرا ما وعد شمايل .. وكان انسان ثاني يخاف الله وما يفوّت صلاه في المسيد .. وهمومه قلّن بس بعد رفضته أم شمايل ..السبب لأنه هناء محيرينها لحسن ... وهو حاول وايد ويأس .. بس ما شي فايدة .. حتى حاول يتصل بها لكن البنية غيّرت رقمها من زمان .. وأكبر مشكلة سواها مانع بدون ما يدري ولا يحس انه عندهم دريول ثاني لكن جنسيته باكستاني وهو نفسه الباكستاني ناصر اللي يوّزع مخدرات على الشباب .. حاول هزاع كم من مرة انه يطرده لكن مانع منعه بدون ما يدري ليش طبعا ..بس كان هزاع موول ما يأمن عالبيت دامنه هالانسان موجود .. وطبعا لا مانع ولا هزاع يدرون انه ناصر هو اللي معتدي على شمايل واللي حاول يعتدي على هنود ويا ربعه .. وهو كان العقل المدبر لكن لا حياة لمن تنادي .. مسير الحي يتلاقى ..) (اما عند زينة كانت انسانة حساسة والضغوطات اللي زادت عليها من قبل فاضل ومي ..) • زينة : الله يخليك قولي مكانها .. انا ما يجيني النوم في الليل .. يحرم علية النوم وهنود بعيدة عني .. • فاضل: هنود بالاصل ميتة وكله منج لو انتي ما ظهرتي فحياتنا جان كملناها ببساطة • زينة تصيح : حرام عليك ..ام عيالك تجيني في الحلم .. توصيني على عيالها وانا أبجي ماعرف أرد عليها .. شنو أقوللها؟ أقوللها بنتج ماتت على ايد ابوها ؟ اقوولها ولدج حي مامات؟ اقوللها أبو عيالج شتت العايلة كلها من صغير لين جبير؟.. شو من الأبهات انته؟ حتى الحيوان فيه احساس .. لكن انته مافيك ذرة احساس وينك من ربك !! (وبعد كم من يوم كانت مخططة تسوي شي ..) • مي: زينة؟ شو رايج اتردين بلادج وتيلسين فترة هناك؟ احس نفسيتج تعبانة .. • زينة :ومن متى انا زينة؟ انا اسم زينة لكن احساس ماكو .. قتلوا اختج وما حسيتي ولا ذرفتي دمعه عليها لعنبوا انتي وأبوج من نفس الطينة مافيكم ذرة احساس !! ماتخافوا يوم من الايام ينقلب شي ضدكم؟ • مي بعصبية : حبيبتي لا تفكرين انه شي بيستويبي انا محصنة .. لكن ليش بسمع من وحدة رقاصة لا سارت ولا يت .. والناس يعتبرونها أميه ... وانتي بالاصل مب أميه .. انتي فنظري رقاصة ويا حلو هالاسم عليج يليق بج .. • زينة بعصبية : انتي اشتريدين مني؟ فلوس؟ يلعن أبو الفلوس !! • مي تفر على ويهها ملف : وقعي على هالتوكيل وحزتها بعتبرج أميه (وبكل قهر خذت الاوراق ووقعت وفرتهن فويه بنتها ) • زينة : مو توّج تقولين رقاصة؟ هذي فلوس الرقص .. خذيهن وشبعي .. حلال عليج لكن لا تتوقعين يوم من الايام اني اسامحج لا انتي ولا أبوج .. انا رايحة لبلادي • مي: روحة بلا رجعه .. الله يقصف عليج بصاروخ ويشّلج • زينة مروّحة : آمين !!! (ومن أسبوع كانت دافنة عمرها في البيت تشغل عمرها .. لا صاحت ولا شي .. بس فكرت لو إنها تكمل شغلها أحسن بدال ما تفكر فأشياء تافهة ..) • حسن يتصل بها : خير يا سارة؟ انتي شغلج بدا من أسبوع .. شو صار ؟ ليش ما حضرتي؟ • سارة : لو سمحت أريد أنقل مكان شغلي بليز .. • حسن : ما مداج وانتي بعدج ما بديتي .. • سارة : انا اطلب العفو .. ما اقدر أشتغل هناك • حسن: انا ما اقدر .. على الاقل داومي شهر وبعدها قولي هالكلام وبنوافق .... • سارة بيأس : ماتقدر تعفيني؟ بليز .. انا فورطة .. أبي أرد بلادي عندي كم من شغلة .. • حسن : انتي إلتزمتي ويانا .. وما عندنا بديل لج وانتي وقعتي على كل الاوراق .. • سارة : زين يعني أقدر اني مووول ما اطلع من المكتب المخصص لي؟ • حسن : أكيد .. لين يخلص دوامج • سارة : خلاص على خير .. • حسن : باجر الساعه 8 تكونين في المكتب تسمعين ؟ • سارة : اوكي.. (اليوم الثاني كانت سارة موجودة في الشغل واللي هو المكافحة .. وكان حسن أول الواصلين ..) • حسن : ماشاء الله من الساعه 7:30 • سارة : I'm always punctual • حسن : انزين تفضلي مكتبج .. (ويأشر لها للمكتب اللي مجابلنه ويدخلون ) • سارة : في ناس يحتاجون لهالشي؟ • حسن : أول شي تفضلي يلسي فمكتبج .. وثاني شي لا تتوقعين شغلتنا سهلة .. الضباط مهمومين بس متفانين فشغلهم لكن في محيط العايلة مهمومين ومحتاجين للمساعدة .. • سارة : يعني بكون نيرس وطبيبة نفسية فنفس الوقت؟ • حسن : تقدرين تقولين هالشي .. بس كل شي له حدود .. مواضيع الشغل تنترك في صوب وانتي موقعه اتفاق ويانا انه.. ان تسربن أي معلومات بتخضعين للتحقيق • سارة : انا قريت الاتفاق وانا بكامل قواي العقلية وراضية بهالشي .. • حسن : أي شي تبينه هذا رقمي في البطاقة لأنه ممنوع دخول الطابق الثاني غير الضباط .. • سارة : مفهوم .. ممكن طلب؟ • حسن : آمري .. • سارة : ما ابا عيسى يدري اني موجودة .. • حسن : شو السبب ... أووووووه لايكون هالسبب اللي خلاج ما تين؟ • سارة : آسفه هذي أسباب شخصية ... • حسن : على راحتج ..والله يوفقج فشغلج .. (اما سارة كانت حالتها حالة ما تبا عواس يشوفها او يتعرف عليها .. والضباط اللي كانوا موجودين مب شايفين خير كل دقيقة والثانية داشين عندها اللي يبا لزقة واللي يبا عايدين لكن معظمهم اكتشفت انه عندهم هموم تهد جبال .. اللي مديون .. واللي معاشه ما يكفيه .. واللي واللي واللي .. كانت تطالع عمرها وتقول انا ابويه سيناتور وعندنا خير وهذي البلاد اللي فيها كل الخير.. بعد عندهم ناس فقراء ويحتاجون للمساعدة.. ومن ناحية ثانية نسبة قليلة اييّونها عشان حالتهم العاطفية والله ما اعرف شو اشتري لحبيبتي فتضحك من خاطرها و مب كله مآسي وحزن .. بس يوم السالفة تي صوب عواس .. ماخذتلها عباة وشيلة وقايلة للريسيبشين لو ياء تتصل بها عشان تتحذر .. مع انه لو درا بيقول انه لاحقتنه .. والصدق انها قبل ما تقول انها تحبه كانت مقدمة على نفس الشغل وياه بس عشان تشوفه .. لكن أحينه المشكلة الالتزام .. تمت على هالحالة اتدوس على قلبها .. وكانت اتيها عروض زواج بس اكبر عنها بوايد من رياييل محترمين بس كانت تعارض .. وعواس ما يدري بها ..) (مرت الايام بصعوبة على الاهل .. فراقهم عن هنود .. وأصعب شي كان بالنسبة لهنود .. اول شي تعيش فغرفة الفرّاشة كأنها مريضة .. تعامل كمريضة .. الابر المخدرة متلبسة جسمها تلبيس ..لدرجة وصلت لنهاية الجنون ما تتكلم ولا تعقد صداقة لا ويا الممرضات ولا الاطباء ولا تتكلم حتى .. كارهة عمرها .. تتذكر اكثر شي ايام صغرها وفرحها.. ودورة الحياة تدور .. وكلهم كملوا حياتهم .. وبعد سنتين ونص بالتمام اكتشفت مي السر عن طريق الصدفة ..) • فاضل يتكلم في التيلفون : قلت لج ما عندي بيزات مووني مافي خلاص .. صبري علية لين أدبرهن لج !! اعنبوج ما تشبعين يامالج السم !! والله .. والله بزوالج ان ظهرتيها .. خبري انا ماعلية منج !! بس انتي اللي بتتسفرين بلادج !! مب انا اللي اعطي بنتي ابر ههههههههههههههههههههه • مي ترمس شوي شوي : بنتي ابر؟ (وتشهق )هنود !! • فاضل: لا بركتن فيج من فلبينية جلبة !! ماعليه صبري علية ان ما عجيتج في بلى !! انتي تبندين فويهي ماعليه !! • مي تدخل على ابوها وترض الباب وراها : مالت عليك من أبو .. • فاضل زاغ: اتغربلتي!! روعتيني !! • مي: وين حاطنها؟ • فاضل: منو؟ • مي: لا تستهبل .. ولا والله بتصل على عواس وهو بيقولك انته منو • فاضل انفضة جاسته من قالت اسم عيسى: جاب يالله جاب لأصكج كاف على ويهج !! • مي: لا تتحراني هنود ولا غريبة بينصاعون لكلامك وبيسكتن.. انا لساني أطول عن لسانك .. انته جرب بس مد ايدك وصدقني الشرطة بتسحبك شرا الجلب اليربان !! • فاضل: والله وظهرلج لسان يا بنت العراقية !! • مي: هيه والله ظهر .. بتقول ولا اتصل على ميود ؟ • فاضل يضحك : ههههههههه راويني شو بتسوين يالياهل .. • مي تبتسم وتتصل: اممم .. (وتصيح وتزاعج ) ميييييييوووود .. الحق علية .. أبويه يبا يجتلني !! هيه والله .. مثل ما جتل هنود يبا يجتلني !! (ويسحب الموبايل من ايدها ويبنده ) • فاضل فوّل: يالجلبة !! شو تسوين !! انا ابوج تبين تمشكليني ويا اخوانج؟ • مي: ان ما قلت صدقني لطرطر ثيابي واكشش شعري وصدقني بقوللهم انك ضربتني وبدون سبب .. وعادة هالمرة بيصدقوني لأنك ماشاء الله تبارك الرحمن .. اشتهرت في الشرطة .. يوم انك فريت بنتك فهاكي المستشفى .. بتقول ولا؟ • فاضل يضرب بإيده عالباب : فمستشفى الامل .. استرحتي؟ • مي: لا بعدني .. اللي اعرفه انهم ما خلوا مكان وما حصلوها وين خشيتها؟ • فاضل: فغرفة الفرّاشة .. بس حولتها خلاف لحجرة ثانية .. • مي: سنتين وداخلين عالثالثة يالظالم !! • فاضل: كان لازم تموت وتفكنا بدال هالصدعة وبدال ما تلهط بيزاتي هالفلبينية !! • مي: مثل ما قصيت علينا هالكم من سنة .. انا تراني ما اتصلت فميود .. كنت متصلة اطالع الساعة كم .. ههههههههههه (وتربع لحجرتها تمت تفكر ) • مي فخاطرها : وحليلها زينة روّعها أبويه .. وانا استغليتها .. أصلا لو ما سارت بلادها .. صدق ما باخذ براحتي .. وانا تحريت هندوه شاردة ويا واحد غير عن رشود .. أويييه أحينه حانت لحظة هالشي .. وبعدها بيطلبوني أكون مذيعه .. ( وتبتسم ابتسامة انتصار ) ييتي يا هنود والله يابج .. انا كنت مأجلتنها عشان ما عندي غير صورة وحدة لج .. لكن أحينه بسويها وبتكونين ويايه .. هههههه بيقولون عنا توائم .. الله كشخة !! باجر الا أطلعج .. (وتتصل تحجز موعد حق العملية لباجر وكانت اتكلم الدكتور .. وبعد ألف يا ويلاه رضا يسويلها .. لأنه جدوله مزدحم .. أصلا لو ما قالت بتدفعله زيادة جان ما طاع يسويلها هالفترة ..) مب جني أنانية ؟ أفكر بالعملية وكل شي .. وأنسى أختيه واللي عانته؟ ماعليه بعوّضها عن كل شي .. وانا بعد بتعوّض عن كلمة خسيفة .. (وتبتسم .. وتتصل بربيعتها عشان تعطيها الفلوس حق الفلبينية اللي بتظهرها .. وتعّنت وحصلت رقم الفلبينية طبعا من أبوها اللي استكان وخصوصا كانت تسكته بالبيزات .. وباجر بتظهر هنود وبتلقى الحرية) (عند سعيد وعواس في المقهى ) • سعيد يشّل شلة : اذا طرفي مع طرفك تقابل .. تصيب القلب رعشاتن قوية .. • عواس: ياعيني عليك !! مافيك حيلة .. ياحظها بس .. • سعيد : منو؟ • عواس: اللي تشل حقها .. • سعيد يبتسم ويسوي عمره منشغل بطربوشته :تقدر تقول اعجاب من طرفيّة .. • عواس : شيخ .. طول .. عرض .. جمال .. وهيبة .. وبعد من طرف واحد ؟ أسميها ما تستحي .. • سعيد : ههههه عيبتني .. • عواس: وين اتعرفت عليها؟ • سعيد : بعدني .. • عواس: اتمصخر حضرتك؟ • سعيد : لا والله اتكلم جد .. شفتها في التلفزيون .. • عواس يضحك : أحينه بتقولي نانسي ولا هيفاء .. • سعيد :لا ما وصلت لهالمرحلة من الخبال .. • عواس: يا ريال خبرني انا اخوك .. من زمان ما سمعت بقصص حب .. • سعيد : والله مب حب • عواس يقلد سعيد : تقدر تقول اعجاب .. • سعيد : هيه تقدر .. شفتها مرة في الاخبار .. مادري مع انه شكلها أقل من العادي .. كان عايبني فيها اصرارها انها اتكمل الحوار .. كانت اول شي زايغة واتأتىء وخلاف اتعودت أذكر أول مرة أشوف مذيعة أخبار اتغلط وتقول يا عيوني هههههههههههههههه واختفت فجأة .. • عواس قلبه يدق بزياغ : شش شو اسمها؟ • سعيد : مي (عواس اتغير ويهه ) • عواس: أوووه !! سعّود !! اقول انا برد البيت مواعد الاهل عالعشا • سعيد : خلاص اوكي .. (وعواس في الموتر ) • عواس فخاطره : ميوه؟ كل ما احاول انساها شي يردها .. كل تصرفاتها لها مبرر .. خصوصا لأني كنت محد عنها .. كانت تكسر بخاطري كل ما اتذكرها .. أتوله عليها وعلى شطانتها .. ويوم تتجاتل ويا ميود .. ويوم أحايز عنها تقولي .. آسفة يا عيوني .. كنت أدري انه محد بيي بيخطبها .. بس كنت أنا سندها .. وأحينه خليتها روحها .. من سنتين تقريبا ما سمعت صوتها .. وأحينه أخويه وأقرب الناس لي يدوّرها ويباها .. آآخ يا سعوّد .. لو تدري بس .. لو تدري انها أختيه .. يالله يا فضيحتنا .. (وأول ما وصل البيت ) السلام عليكم .. • مايد : عليكم السلام .. • عواس: وينهم العرب؟ • مايد : وديتهن العرس .. • عواس : ورشود؟ • مايد : هاكوه منخمد .. ترا نحن واعدينه بنعلمه يسوق البوشنب .. • عواس: هههههه هزره بيعرف؟ بيكمل ال6 سنين .. شو رايك نيبله بو شنب لعبة؟ • مايد : جييه تتحراه سهل؟ نحن متى متعلمين السواقة؟ • عواس: على ما اظن يوم نحن 5 سنين .. تحيدها دجة قوم اميه ميثاء؟ • مايد : هيييييييييييه هههههههههههههههه لازم واحد منا يركبها بالموتر ويكسر دجتها .. وانا بعد لاحظته يوم أسوق روحه يشتط .. أونه مواعد نشيبتنا بيوديها العزبة كل يوم .. • عواس: طالع فهيم على اخوه العود .. • مايد : عدال عدال يا ولد اوناسيس .. • عواس: منو ها؟ • مايد : ولد عم بروناي .. • فطيم داشة : انتوا هنيه؟ طلعوني !! الرحمة !! • عواس: انا تعبان وفيةرقاد .. • مايد : وانا بعد .. • فطيم : انا عيل مروحة البيت (وعواس يغمز لميود عشان يسير وياها ) • عواس فخاطره ويسوي بعيونه لميود : يالدب وصّلها البيت !! • مايد فخاطره ويسوي بعيونه : شو؟ شو تقول؟ (يسوي عمره أهبل ) • عواس عصب: درام واحد !!! (صدت فطيم) طوفي بوّديج البيت !! • مايد : جازورا واحد !! • عواس يمسح ع ويهه : خلني أرد وانا براويك شغل الله ... • مايد يضحك : حشا مسحة برقع مب تحلّيف هذا !! حوووه حوووه سارت عتك إلحقها !! • عواس يلحقها : إيييه شوي شوي • فطيم : خليتك .. شكلك وايد متوله على أخوك .. • عواس بغياظ : وااااااااااااااااااااااااايد !! • فطيم : طالبتنك بطلبة .. ابا اسكريم • عواس: انزين اتريييني هنيه ما تحركين .. • فطيم : من عيوني (عواس سار ويوم رد ما حصلها ) • عواس: انا قايللها ما تتحرك (ويدخل البيت يدورها .. ويسيربيت قوم نشبة ويدق الباب وايد ومحد يرد ..) وين سرتي؟ الله يستر بس !! (وقلبه يدق من الزياغ عليها .. ما خلا مكان ما دوّره ..هو عمره ما اتصل بها بس هالمرة داس على قلبه واتنزّل واتصل .. وسيده ردت ) • فطيم منفعلة : عوااس.. • عواس: وينج؟ اتغربلتي من بنية مب قايلج ما اتحركين ؟ لازم تكسرين كلمتيّة؟ • فطيم تصارخ : إلحقني .. واحد باكستاني يلعوزني انا في الساحة !! (عواس يربع شرا المينون وفر الاسكريم من ايده .. بيخسر فطيم .. بتستوي حادثة شمايل للمرة الثانية .. وعاقد العزم اللي بس يحط ايده على فطيم ليذبحه لو يكون اللي يكونه ..) (وهذا كان البارت الأخير بس مب الحلقة الاخيرة .. يعني على الله ان شاء الله بعد شهر بالكثير بينزل البارت ال 85 ) |
يسلموو ترووحين و تردين بالسلامه انشالله ^^ |
| الساعة الآن 11:58 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir