يلا حطيتلكم جزء يديد


قصدي ثنين








&* الجـــزء العـــاشــر *&


بعـــد مرور أربعــة أشهــر من الأحداث السابقة ..



" لقــد أنهيت دراستي الجامعية بمساعدة من أصدقائي الذين لم يتركوني لحظة .. جميع الذين كانوا في المطعم ذلك اليوم قد ساعدوني .. كانوا يتناوبون .. لا أعلم كيف أشكرهم لأنني مهما فعلت لن أوفيهم حقهم .. إنهم أصدقاءً أوفياء نادرين في هذه الدنيا الغريبة !! و لكنني الآن أحزم أمتعتي لكي أعود إلى الإمارات .. لا أعلم كيف ستطأ قدماي هذا المكان وحمد ليس موجوداً .. هل سأنهار ؟ هل سأبكي حتى تحمّر عيناي ؟ لا أعلــم .. لن أتوقع أي شيء .. و لن أفكر في أي شيء .. كل شيء سيحدث لوحده .. هذا ما علمتني إياه هذه الدنيا !! .."




فالطيـــارهـ ....


الشي اللي ماعرفتوه إني الحين رادة ويا خــالد !!! تراه حمد الله يرحمه كانوا يايبينه عشان يعالجونه في أمريكا وماكان حد فالعايلة يدري غير خالد وعميه سيف فـ عشان جذيه كانت عمتيه ترمسنيه وهي ماتدري عن شي مسكينه .. لكنه مثل ماتدرون .. عطاكم عمره .. لالا مابصيح ردي يا دمعتيه مكانج .. المهم .. وهو الوحيد اللي اهتم انه يخبرنيه .. فيه الخير !! تم فيايه في أمريكا شهرين لين خلصت دراستيه .. والحين رد فيايه ..

خالد: شفيج من ركبنا الطيارة وانتي ساكته ؟؟

حموده: ماشي ..

خالد: إذا تفكرين في العايله وردة فعلهم .. ماظني بيقولولج شي .. انتي مهما كان بنتهم وانا شفت انهم لانوا فالايام الاخيرة .. تحديداً عقب .. (وسكت شوي ) موت حمد .. ويدتيه كانت وايد اتخبّر عنج .. وتقول انها مسامحتنج مهما سويتي ..

قلت ببرود وهدوء وانا اطالع الدريشه : الله اللي يسامح مب هم .. لأني انا ماسويت فيهم شي .. وبعدين انتوا مصدقين رمسة شويخ يعني ؟؟؟؟؟ ماقول الا الله يرحمنيه برحمته .. انا حتى اهليه اللي هم اهليه مايعتبرونيه بنتهم ولا يصدقونيه !!!

خالد: انتي شو تقولين ؟؟؟ ليش شويخ شو قالت ؟؟؟

حموده: بالله عليك ماتدري ؟؟؟ تراها هي اللي يابت السالفه من عندها ونشرتها ..

طالعنيه خالد باستغراب ..

خالد: يعني انتي مظلومه ؟؟

حموده: ماظني هالشي يهمكم دامنيه طحت من عينكم !!

خالد: لا .. يهمنا ويهمنيه انا بالذات .. قولي السالفه الصدقيه وانا مستعد ادافع عنج وما أخلي حد يقولج شي .. جانها شويخ ظالمتنج والله لراويها ..

قلت بطنازه: شو هالاهتمام يا ولد العم .. توك حسيت على دمك ؟؟

وضحكت عقبها بـ طنازة وصديت عنه صوب الدريشة ..

مسـك ايديه بقوة وخلانيه ألف صوبه ..

خالد: مب انا اللي ترمسينيه جذيه يا حمودة .. بتقولين شو استوا ولا تراه مابيصير خير !

طالعته بنظرة حادة وقلت : فـــج ايديه !!!!

فج ايديه .. وقال: والله ان مارمستي بمسكها بس الا بكســرها !!!!!

رمست ببرود وانا مالي نفس ارمس ومابا اتذكر اللي استوا ذاك اليوم لأنيه اكيد بصيح .. لكني لازم ارمس هذا الصراحه ينخاف منه ..


حموده: يوم كنا في امريكا حمد قالّيه انه يحبنيه .. ومن هنيه بدت السالفه .. وفالبر يوم شافنيه نازله من عندك عصّب وقال ليش كنتي راكبه عنده ومادري شو .. وودانيه مكان بعيد عشان يكمل هزبته وآخر شي تم هو يعتذر منيه .. ومسك ايديه .. وخبرت شويخ بما انها اقرب وحده حقيه .. وهي ماصدقت ظهرتها اشاعه ووحطت بهارات ع السالفه من عندها عشان تضمن طردتيه من البيت !!


ماحبيت اتعمق فالتفاصيل اللي انتوا تعرفونها لأنها ماتغيّر شي بما اني هالاشياء ماقلتها حتى حق شويخ .. !! لكنها هي ظهّرت اشاعات من عندها !!

خالد: ماصــدق انه شويخ حقيره جذيه !!! هي خلت السالفه أكبر من جذيه بوااااااايد .. قالت انــه ..........

حموده :بس لاتكمل .. انا مابا اسمع ولا اعرف شي سكّر ع الموضوع .. حمد توه من كمن شهر ميّت وانتوا تجلبون فهالسوالف !!!!

طاحت دمعة عينيه وصديت عنه الصوب الثاني ..

خالد: انتي تحبينه .؟؟

قلت وانا خانقتنيه العبره : وشو الفايده الحين تراه خلاص مات !! ماااات !!

سكــت عنيه خالد .. وانا كملت صياحيه بلا صوت .. كل ذكرياتيه ويا حمد مرّت في باليه .. وطلعت منيه شهقه بدون ما أحس .. ياناس جرح قلبيه توه طري .. ليش تزيدونه ؟؟ ليـــش ؟؟ عايبنكم نزيفه أو انكم تتلذون فيه ؟؟


واخيراً ظهرت لنا اشارة ربط الاحزمه .. يعني الحين انا فوق ارض الامارات .. حسيت بطنيه يعورنيه من الخوف ..


خلاف نزلنا من الطياره وخلصنا خربطان المطار .. طالعت المواقف .. تذكرت حمد وسيارته .. كتمت عبرتيه وركبت سيارة خالد .. الفتك الابيض .. اللي كان يلمع مثل ضروس خالد !!


خالد: شوفي حمدة .. انا أباج تهديــن .. مابا اشوف دموعــج .. خلج قوية .. لأنج انتي أكثر وحدة تعرف انه الضعف في هالزمن مامنه فايدة ..

تصدقون أول مره يقول كلام فيه فايدة !!!!! زين تطوّر ملحوووظ .. !!!

حمودة: والله وقمت تقول حكم يا خالد .. ماشالله ..

خالد: لو اني عارف انها طنازة لكن ماعليه .. شو تبين تاكلين ؟؟

حمودة: شو ياب طاري الاكل الحين ؟؟ منو قالك اني يوعانه ؟؟

خالد: طالعي ويهج وانتي تعرفين ..

حموده: شو فيه ويهيه ؟؟

خالد: طالعي روحج وبتعرفين ..

طالعت عمريه فالمنظره الجدامية .. ويهيه كان شااحــب ومصفّر .. وعيونيه حمر وذبلانات .. كان شكليه يرثى لحاله !!!

شغّل خالد الاف ام عشان يغيّر الجو الكئيب شوي .. بس الاغنية زادت الطين بلّه !!

بلغه بالحال ياريفن سرى .. مخطرن حالي ولي ساير يسير
كل مارديت بالذكرى ورا .. مادريت الا على خدي غدير

بس هو عرف شقايل ينقد الموقف ..

خالد: يييه شو هذا جنه عنز مزنوطه ..

حموده: هههههههههههههههههههههههه ..

ابتسم هو بس بدون مايظهرن ضروسه ..

وخلاف بدّل وحط على محطة ثانيه .. أظني كانت الخليجيه .. و يت اغنية ربشه غيّرت الجو ..

كان صدق تحبني وايد .. رد قبل يفوتك أوانك
لا تخلي البعد يتزايد .. تبتعد ويطول نسيانك

قال خالد بابتسامه : هاه أخليها ولا بتصيحين ..

حموده: ههههه لا مابصيح ..

وطوّل ع الاغنية ..

خالد: يالله مابغيتي تضحكين .. الحمدلله يارب يوم شفت ضروووسج !!

حموده: ههههههههههههههه ..

خالد: شو علّقتي ؟؟

حموده: هههههه لا خلنا نسمع الاغنيه حشششرتنا !!!!

حيث ودك فالحشا سايد .. تارك العالم على شانك
في كياني دوم متواجد .. ليش فيّه تشب نيرانك

تم يطالعنيه .. استغربت نظرته .. ماخوّز عيونه عنيه .. لفيت صوب الدريشه وتجاهلته ..

يا زعيم الحسن يا قايد .. لجل عينك حب عربانك
فيك من وصف المها العايد .. مرتعك في روضة أوطانك
يوم موج البحر بي هايد .. تم يضرب فيه طوفانك
لا تخلي نفسك محايد .. حرب ولا عطني أمانك

كنا غاصّين فالزحمـــه طبعاً تعرفون زحمة دبي .. خاصةً انه الصيــف الحين .. وصلنا نهاية شهر سته ماشالله .. والمهرجان هو سبب كل هالزحمه ..

خالد: يييييه ياهالزحمه اللي هب طايعه تخلّص من متى نحن واقفين هنيه !!

حسيت بـ حلجيه يابـــس ما أذكر متى آخر مره شربت ماي !!

حموده: خالد انا عطشانه ..!!!

خالد: من وين اييب ماي انا الحين ؟؟ لحظه بدوّر فالثلاجه .. أحيدنيه مرات أحط ماي ..

وتم يدوّر وخلاف قال: هو شي وحده بس مادري اذا بطّيعين تشربين منها ..

حموده: ياخي أي شي مايخالف والله انه حلجيه ياااابس ..

خالد: بس انا شربت منها .. يعني ما تجّزين ؟؟؟ ..

هو أنا أجز بس شكلنا لين نص ساعه مابنخلص من هالزحمه .. ما باليد حيله بشرب من هالماي .. المهم انه ماي !!!!

حموده :هات أي شي عادي .. فيّه عطش مب طبيعي ..

عطانيه الغرشه .. تيمت اطالعها شوي وصرطت ريجيه .. الله يقطعك يالعطــش اللي خليتنيه أشرب مكان هالخالد ..

شربت لين قلت بــس .. تم شوي فالغرشه .. كان الماي بااااارد .. حسيت ردت فيّه الروح من شربت ماي .. عطيت خالد الغرشه بما انه تم فيها شوي .. شلها وردها فالثلاجه ..

خالد: يمكن تعطشين خلاف بعد ..

طرا في باليه سؤال وقلت : انا يوم برد العين وين بسكن ؟؟

خالد: عندنا !!

حموده: عندكم ؟؟ مب جنه بيتكم كله شباب !!! انته وسعيد وعلي .. انا الصراحه ماروم آخذ راحتيه ..

خالد: عيل وين تبين تسيرين ؟؟ عند شويخ ؟؟ ولا عند قوم عميه سيف عشان كل شوي تذكرين حمد الله يرحمه ؟؟ تعالي عندنا أحسن .. نحن مانيلس فالبيت .. أوعدج مابتشوفينا .. نحن مانرد الا فلّيل ..

قلت بفضول : وين تهيتون انشالله ؟؟

ابتسم خالد وقال: والله ماشي من الشغل لين الموولات لين سهرة الشباب لين البيت ..

حموده: انته كم عمرك ؟؟

خالد: ههههههه لين الحين ماتعرفين كم عمريه ؟؟ عمريه 30 ..

حموده: ماشالله .. سؤال يسدح نفسه .. انته ليش لين الحين ماعرست ؟؟

خالد: يهمج تعرفيــن ..

حموده: والله جان بتقول قول وجان مابتقول كله واحد !!

خالد: هيه عيل مابقول .. !!

حموده: برايك ..

وصديت صوب الدريشه .. مـــرت حوالــي نص ساعه وظهرنا من الزحمــه .. وخلاف وقّف خالد جدام مول الامارات ..

حموده: ليش يبتنا هنيه ؟؟

خالد: عشان تاكلين وهذا أقرب مكان .. مستحيل أخليج بلا أكــل ..!! ولا تفجين الباب انا بفج عنج ..

تذكرت حمد يوم كان يفج لي الباب .. طلعت منيه تنهيده قويه كتمت فيها دموعيه .. بس خالد كان نازل من السياره فـ ما سمعها .. فج لي الباب .. ونزلت .. والله أحس عمريه أميرة ياناس !!!

هبطنا المول وسيدة صوب المطاعــم ماخلانيه خالد أسير أي مكان ثاني .. يلسنا ع الطاوله وطلبنا وعاد طاح خالد طنازة ع الساير والراد وانا ميته ضحك .. ماكنت أدري انه عنده هالجانــب "الفكاهــــي" ..!!


خالد: طالعي مقاس عيون هالفلبيني .. مب جنهن صناعة اماراتيه ؟؟

حموده: أكيد ابوه سوّا فيه نذاله وخذ وحده فلبينيه .. والحين عاد شوف مصيره فالحياه عنده جواز فلبيني مع انه ابوه مــواطن !!

تذكرت عمريه يوم قلت هالسالفه ..

خالد :لا انتي غلطـــانه ..

حموده: ليـــش ؟؟

خالد: ماحسيتي انها حرمــة ؟؟

تميت اطالع عدل .. يوم دققت فالملامح اكتشفت انها حرمة .. ضحكت بقو مع انه السالفه ماكانت تضحّك وايد بس من يلست ويا هالخالد اليوم وانا معلقه ع الضحك ..


وصل الاكــل وتمينا ناكــل .. انا كلت بشهية ماكلت بها من قبل .. نسيت كل هموميه .. مادري شو اللي استوا اليوم بس الضحك اللي ضحكته اليوم ماقد ضحكته من قبل ..

وعقب ماخلصنا سرنا نتمشى ..

خالد: تبين تسيرين السكي ..؟؟

حموده: دخيـــلك لا شبعانه من الثـــلج ..

خالد: شعليج مادري كم سنه عايشه هناك !! الا نحن هنيه محروميـن .. يالله يارب تنزّل علينا الثلــج ..

كانت اسلوبه يضحّك .. ضحكت وقلت : ثلج مره وحده ؟؟ بعدك قول مطر بَرَد .. مب ثلج .. أتخيّل ثلج فوق العراقيب وين صارت هذي ؟؟

ضحك خلاف قال: حموده انتي مستانسه ؟؟..

حموده: هيــه الصراحه اليوم ضحكت ضحك مب طبيعي ..

خالد: أوعدج اني أخلي أيامج كلها ضحك وسعادة ..

سكت ماعرفت شو أقول .. على أي اساس هو يوعدنيه ؟؟ والله مادري .. المهم انه بيخلينيه أضحك وهذا أهم شي ..!!

تحوطنا شوي وخطفت انا على كمن محل .. وخلاف ظهرنا من المول .. وتوجهنا صوب العين وانا متشوقة لها ..

وفالدرب كان خالد حاط اغنية "يا كحيل الطرف " مالت بالروغه ..


يا كحيل الطرف ياذاك الجميل .. جوّك الصافي عليّه شـ كدّره ؟
ما نظرتك العين من وقتٍ طويل .. لا ولا منك نديب اتخبرّه ..


أحلى شي كان عنديه يوم يقول ..

المحبه تتلف الجسم الثقيل .. لاتفكرها لعوب ومصخرهـ ..

هيـــه والله ..!!


وصلنا العوهه أو الفوعه شرات مايسمونها الحين .. كنت خايفه بس حسّيت بالراحه .. مادري شو يستوي فيّه من أدخل العين أحس بهدووء وراحه .. مادري ليش !! فجيت الدريشه عشان أشم نسمة هواها اللي اشتقت له .. مع اني عشت فيها شهر لكنها سطت في قلبيه اكثر من أي مكان ثاني ..


كان هواها جاف مب رطب شرات هوا دبي .. غمضت عيونيه وخليت الهوا يضرب في ويهيه .. خذت نفس طويل وخلاف بندت الدريشه ..

حموده: تصدق اني تولهت على هوا العين .. ياخي حتى هواها غيــر .. !!

خالد: صدقينيه انتي تنتمين لهالمكان هب لأمريكا وانشالله مابتظهرين من هنيه لأنه هاي دارج .. وأبشرج انا خلصت كل اجراءات جوازج .. بس باقي انج تسلمين جواز امريكا .. واذا تبينه يتم عندج ماعليه .. بس بيكون عندج جنسيتين ..

حموده: لا ماباه جواز أمريكا .. مابا ارد لها مرة ثانيه لو شو يستوي انا مابطلع من هالدار ..

ابتسم خالد وكملنا دربنا صوب مقر التجمع الرسمي في بيت عميه سيف !! الله يستر من التجمع هالمره ..

عقب نص ساعة وصلنا زاخــر .. وقف خالد داخل فالقراج .. قررت اني أتجرأ وما أفكر بالعواقب لأنه بصراحة مايفرق عنديه تعودت أعيش بروحيه وأدبر عمريه ..

فجيت الباب ونزلت روحيه .. وقف خالد جداميه ..

خالد: لا تخافين .. مابيقولولج شي .. دام الشيخ خالد وياج ..

حموده: تراك انته وايد مختق بعمرك !!

خالد: بالله عليج يوم شفتينيه أول مره ماخفتي ..

حموده: تبا الصدق ماخفت .. بس أبداً مادشيت راسيه .. ماكنت ادانيك ..

خالد: افــــا .. والحين ؟؟

حموده: الحين عدلت صورتك شوي في عينيه ..

خالد: ماعليه بعدلها أكثر خــلاف .. يالله روّحنا ..

خطف خالد جداميه وانا وراه .. كان طويــــــــــــــــــــــل !! وانا كنت قزووووووووومه عداله .. قصدي وراه ..

فــج الباب وهبط .. وانا وراه .. كنت أحس بالامان وانا وراه ومابا اتجدم .. فـ تميت وراه .. التفت صوبيه وقال بهمس ..

خالد: تجدمي شفيج والله مابياكلونج ..

طالعته بخوف ..

خالد: يالله عاد انا عدالج مابخوز .. مابخليج .. لا تخافين دام انا موجود ..

تجدمت بتردد .. ووقفت عداله .. رفعت عيونيه .. الكل كانت عيونهم صوبيه .. أكيد لاحظوا اني ضعفت وايد عن قبل ..


ماقدرت اتحرك فـ ما حصل خالد حــل غير انه يمسك ايديه ويمشينيه صوبهم .. كانت مسكة ايده خفيفه .. لكني غصباً عنيه مشيت .. تذكرت مسكة ايد حمد .. بعدنيه لين الحين أحس بلمسة ايده على خديه .. آآآآهـ الموت خذك مني يا حمد .. الله يرحمك .. ماكنت ليه ولا بتكون .. انته مب نصيبيه فالحياه .. لكن حبك بعده مطبوع في قلبيه ويباله وقت لين ينمحي .. ياربي ليش تينيه هالعصره في قلبيه .. آنس قلبيه بيظهر من مكانه ..



&* الجــزء الحــادي عشــر *&


شفت ردة فعل ماتوقعتها من عمومتيه .. كانوا مبتسميــن .. وعميه سالم ابو خالد لوا عليه وعميه سيف بعد .. ماكنت متوقعه هالشي منهم .. عميه سيف كانت الدموع في عيونه ..

سيف: سامحينا يا بنتيه نحن وايد ظلمناج وااااااااااايـــد .. الله ايّازي اللي كان السبب ..

لويت على عميه أكثر وتميت اصيح .. هذا ابو حمد كيف ماتبونيه أصيــح ؟؟


فج عنيه عقب فتره .. ومسح دموعيه بإيده اللي كان فيها تجاعيد على شوية خشونه .. مادري شو اللي استوا وخلاهم يعفون عنيه الحين .. لكن اللي اعرفه اني أحس بـ راحة ماقد حسّيت فيها من قبل ..

وخلاف سلمت على يدتيه .. لوت عليّه وتمت تصيح شوي كان برقعها بيطيح !! هع .. فديتها والله ..


وخلاف عاد كملت السلام ع الباقين .. والبنات (ماعدا شويخ اللي كانت محد وشكلهم ذبحوها وعلقوها على مبنى الاتصالات ) سوّن عــزا .. كلهن يتصايحن سامحينا يا حموده ونحن آسفات وغلطنا في حقج وظلمناج ومادري شووه .. بس قلتلهن اني مالومهن .. شويخ هي اللي عاشت وياهن طول عمرها أكيد بيصدقنها لأني أنا ماعشت عندهن الا شهــر .. لو حطيت نفسي مكانهن ما ألومهن ولا الوم أي حد .. غير شويــخ اللي خربت سمعتيه .. !!


وخلاف قلت لهم اني مابا أسير عند قوم خالد بتم هنيه .. ووافقوا .. بما انه البيت هنيه مافيه غير البنات .. وعمتيه بعد يابت قشارها وبتسكن هنيه .. لكن اللي كان محيرنيه شويخ ويــن ؟؟ شكلهم صدق ذبحوها وعلقوها على مبنى الاتصالات !!!!


شلّوا قشاريه وودوه صوب وحده من الحجر .. أما أنا تميت يالسه فالصاله .. تجرأت وسألت عن شويـخ ..

قلت حق سلامه بصوت واطي: شويخ وين ؟؟

سلامه: عقب كل اللي سوته فيج وبعدج اتخبرين عنها ؟؟

حموده: لابس أبا اعرف ..

سلامه: شويخ عرّست !!

حموده : شوووه؟؟

سلامه: واحد شوي كبير فالسن تقريباً فالاربعين خطبها وغصبوها عليه .. والحين هي ويا ريلها بيستقرون في بريطانيا .. لأنه ريلها كل شركاته واشغاله هناك ..

ربي استجاب لدعواتيه !!! صدق انه دعوة المظلوم مستجااابه .. خليها تجرب الغربه .. وتبتعد عن اهلها وتحس انها منبوذه .. ع الاقل تحس بـ شوي من اللي أنا حسيت فيه !

خلاف حطوا الغدا .. الرياييل ساروا يتغدّون فالميلس اما نحن الحريم في صالة الطعام ..

عقب الغدا يلسنا انا وسلامه والريم وفطوم ..

فطوم: خبرينا عن حياتج في أمريكا ..

حموده: لا يابويه انا مابخبر حد شي .. اخاف ..

الريم: نحن مب مثل شويخ .. شويخ امبونها أصلاً من ربي خلقها جذيه .. خبيثه ومن تحت لين تحت وآخر شي تعق الواحد في مصيبه ..

سلامه: ونحن متفهمين انج عشتي 6 سنين في أمريكا وأكيد يعني خذتي شي من طبايعهم .. عادي .. خبرينا عن ربعج .. أوعدج مانسوي فيج شي ..

ضحكت على كلامها .. الصراحه كانوا شلة عوده واشتقت لهم كلــهم ..

حموده: سلمج الله انا عنديه شلّة طويــــلة عريضــه الصراحه ماعرف كم عددهم .. أظني 6 بنات و7 شباب .. اذا مانسيت حد .. المصيبه ان الشباب كلهم عرب .. اثنينه منهم اماراتيين .. ساعدونيه وااايد يوم كنت منهارة .. ماكانوا يغيبون عنيه .. يتناوبون عليّه .. الصراحه لو لفّيت الدنيا كلها مابحصل شراتهم ..

الريم: ياليتنيه عشت في أمريكا .. آآآآآخ أحسدج الصراحه .. مابتعرفينا على حد ..

حموده: تعرفن انجليزي ؟؟

سلامه: لا مانبا البنات .. نبا الشباب ..

حموده: يالله بالستر لا مابخربكن واخذ فيكن اثم يكفي اثميه انا !!

سلامه: انزين المواطنين شو اسمهم ؟؟

حموده: سيف وحمدان ..سيف هذا كنا مسوّين انا وياه عصابه .. كان ويايه من أول سنه فالجامعه .. الكل يعرف يوم تستوي ضرابه منو اللي يكون وراها !!

سلامه بفضول : وحمدان ؟؟

حموده: هههههه لا هذا مامنه أمل هذا يحب كرستينا البريطانيه ام عيون خضر .. تم يغني لها اغنية ميحد وهي تشققت عاد ..

فطوم: هههههههههههههههه أي اغنية غنالها ؟؟

حموده: انا مسلم لكن انته ويش دينك .. وعاد ترجمنالها وتمت تتفداه بالانجليزي ..

الكل: ههههههههههههه ..

الريم : تبادلين ؟؟ انا بسافر أمريكا عطينيه جوازج بس ..

حموده: هيه سيري هيتي انتي بعد .. لا يبوج .. ماتسدكن وحده عاشت نص عمرها في أمريكا ؟؟

سلامه: عيل تخلين ربعج ايون هنيه نبا نتعرف عليهم ..

حموده: أسميكن انتن ادورن الخراب وين يكون .. !!

الريم: شنسوي محروووميـــن ..!!!

حموده: حمدن ربكن ع النعمه .. لو عشتن اللي انا عشته ما بتقولن هالكلام .. لكن ربي رحمكن وماشفتن اللي شفته ..

سكتن كلهن ..

حموده: يييه عاد خلاص خلونا نغيّر السالفه خبرنيه عنكن ..

سلامه: ماعندنا شي نرمس عنه .. انتي خبرينا عنج .. امممممممممم شو هواياتج ؟؟

حموده: ماشي محدد .. بس مرات يوم أتأثر بـ شي أكتب شعر ..

سلامه: يالله سمعينا شي عيل ..

حموده:انشاااااااااااااااااالله .. احم احم ..

الشعر نبضي وعشقي وله أعيش . . ما عشقت الا الشعر في ذا الحياه
الخوي ياناس لو هو لك رفيق . . رفقته يومين والتالي نســاه
والحبيب اللي مود ولك عشيق . . يتركك بالهون ما يقدِّر غلاه
والقريب اللي تأمن له يبيح . . سـدك ويفضحك عند قاصي ودناه
مالقيت اللي في ذا العالم مريح . . غير شعري والكتابه والقراه
هو ونيسي هو رفيقي هو صديق . . هو اللي من ظلمة ايامي اراه


ســلامه: في ذمتيه انج صادقه .. صـــح لسانج ..

حموده: صح بدنج ..

الريم: والله انج شاعره لاتقللين من قيمة عمرج ..

حموده: ثانكس لو انج تبالغيـــن .. الشعر ماهو قصايد فالدواويني .. الشعر أفكار والمبدع يوصلها .. وانا مب مبدعــه ..!!! انا يالله يالله كتبت هالبيتين ..

وكمــلنا سوالــف .. وخلاف روحوا قوم عميه سالم .. وتمينا انا و عميه وحرمته وعمتيه والريم وسلامه ..

وانا سرت صوب "حجرتيه" .. خاطريه تكون لي حجرة أتم فيها فتره طويله مب كــل يوم أبدل مكاان !!

دخلت وقفلت الباب .. تسبحت وبدلت ثيابيــه ورقــــدت ..


فلّيــــــــــل ..


كنت توني واعيه .. غسلت ويهيه ولبست لي كندوره .. وحطيت شيلتيه فوق راسيه وظهرت .. أحــس بـ راحة مادري ليـــش .. بس اللي أعرفه اني مابا أحزن ولا ابا اخاف ولا ابا اغترب مرة ثانيه .. أبا أرمي الماضي ورايه و أبدا من يديد .. أحس انه هالمره ربي بيوفقنيه .. لأني أحس بأمان وراحة ماحسيت فيها من قبـل .. وأهم شي اني أحس بالسعادة .. الكل يبتسم في ويهيه .. الكل يعاملنيه بطيب .. انا مستعدة أسوي أي شي عشان أتم جذيه للأبـد .. !!


طلعت فالحووش .. تميت أطالع المكان وخلاف سمعت حد يزقرنيه من فوق .. طالعت وشفتها سلامه يالسه تزقرنيه من عند البلكونه ..

حموده: هاه شو تبيـــن ؟؟

سلامه: تعاالــي حجرتيه بسررررعـــــــــه ..

حموده: على أمرج حضرة الشيخه ســلامة ..

وهبطت داخل ورقيت صوب حجرة سلامة .. دخلت عندها شفت حجرتها كلــها كتالوجاااات ..

سلامة: تعالي بتختارين أثاث حق حجرتج ..

حموده: ياحافـــظ بتأثثولي اياها ..

سلامة: هيه أكيــد عيل عايبنج هالاثاث المصخره اللي فالحجرة ..

حموده : لا ..

سلامة: عيل طالعي هالكتالوجات وانا بسير أزقر ريمووه ..

حموده: سلّووم ..

سلامه: هاه حمّود ..

حموده: ههههههه لاوالله ؟؟ اقولج ابا ماي ..

سلامة: انشالله من عيوووني ..

طلعت سلامه من عنديه .. وانا تميت أجلب فالكتالوجات .. الحجرة متوسطه يعني لازم ما آخذ شي عود لأني ابا اخلي فيها مساحة مابا أترسها ..

هبطن عليّه الريم وسلامه .. وسلاه في ايدها غرشة ماي باااردة عطتنيه اياها وشربت .. أهم شي يباليه ثلاجة صغيرونه فالحجرة ..

سلامه: هاه عيبج شي ؟؟

حموده: كلهن حلوات الصراحه مب عارفه شو أختار ..

سلامه: بعد لازم تختارين الستاير والصبغة والبلاط وكل شي .. وايد اشياء بعدها باقية ..

حموده: وين مال الصبغات ؟؟

سلامه : لحظه بدوره عنديه ألف وألفين كتالووج ..

تمت تنبش وجلبت المكان فوق تحت وخلاف ظهرت كتالوج عوود مال الصبغات ..

سلامه: يالله عاد عقب هالتدوير اللي دورته غصباً عليج بتختارين صبغة ..

حموده: انشالله تامرين أمر ..

وتميت أجلب ذاك الدفتر العود .. الحجره مب عوده فـ لازم أختار صبغة فااتــحة .. عيبنيه صبغتين بس ماعرفت أي وحدة أختار .. وحدة لونها موف ووردي ووحده لونها أصفر ..

حموده: بناااات أي وحده أحلى ؟؟؟

الريم+سلامه: الصفرا ..

حموده: انزين شوي شوي عنبو مره وحده ؟؟

الريم: شو تبين فالوردي يلوّع بالجبـــد !!

سلامه: صدقها ختيه .. الوردي والموف اييبن المرض طبيهن وحطي أصفر ..

حموده :انزين خلاص اصفر .. والستايــر ؟؟


كمـــلنا خربطاننا لين وقت متأخر من الليل .. آخر شي استقرينا على ستارة نصها احمر ونصها اصفر .. قررنا نسير هوم سنتر وناخذ من هناك اثاث على قد الحجرة .. وعقب ماخلصنا وتفيقنا سرنا نتعشى .. الساعة 11:30 فلّيــل ..


حصلناهم مخليلنا عشا خلينا الخدامه تحرره وتيبلنا اياه فالصاله .. يلسنا مجابلين التلفزون وداقين سوالف ..

حموده: ريموه انتي مخلصة الجامعه .. صح ؟؟

الريم: هيه يبوج مابغيت افتك ..

حموده: وانتي سلّوم ؟

سلامه : انا بعدني باقيلي سنتين .. وفالتقنية مب فالجامعه بعد ..

حموده: اهــا ..

سولفـــنا وعبرنا السوااالــف و خلاف تمينا نطالع فــلم لين الساعه 2:30 .. وعقبه سرنا نرقــد ..


عقــب اسبوع .. كانوا مخلصين صبغة حجرتيه والستاير والاثاث وانا كنت طول هالاسبوع مشغوله بهالسوالــف .. اما اليوم افتكيت ورقدت على كيفيه ..


وعيـــت الساعه 11 الضحى .. تسبحت ولبست كندوره عيناويه ساده وعليها دانتيل أسود ..الصراحه يعيبنيه العيناوي .. وجحلت عويناتيه ورسمتهن رســم بما اني من زماااان ما جحلتهن .. نزلت تحت حصلت يدتيه و عمتيه عليا وعوشة حرمة عميه ..


حموده: صباح الخيــر ..

عوشة: يا مرحــبا بج بنتيه اقربي .. والله زين منج يوم وعيتي الحين هالبنات لين القايله بيقومن ..

سرت وسلمت على يدتيه و عمتيه وحرمة عميه ويلست عندهن .. كانن يالسات فالدعنه وحاطات دلال القهوه والجاهي والحليب بالزعتـر والســح ومجبة الهريــس ..

يدوه: تعالي تريقي بنتيه .. قربي هاذيه الهريسه بعدها حاره مابردت ..

فجيت المجبه وغرفت لي في صحن .. وتميت آكــل .. امممم والله حلو تعديلهم فالهريــسه .. أكيد يدوه هي اللي أشرفت عليهم .. ولا مابتي حلوه جذيه ..

حموده: وايد حلوه يدتيه منو معدلنها ؟؟

يدوه: أنا وقفت على روس الخدامات .. ولا هن مايعرفن .. دوم يسونها رخوه مثل الماي ..

حموده: أنا قلت أكيد يدتيه هي اللي حاطه ايدها فيها ولامابتكون حلوه جذيه ..

يدوه: فديـتج يابنتيه ماعليه بعملج انشالله بخليج انتي تعدلينها ..

حموده: انشالله ..

عليا: هاه حموده عساج مرتاحه ؟؟

حموده: شقايل مابرتاح وانا عندكم ..؟؟

عوشه: سامحينا يابنتيه على اللي ياج منا قبـل .. تراها هاي شويخ لعبت بمخنا .. ووووو ..

قاطعتها احتراماً لمشاعر عمتيه : خلاص يا عموه هذا شي انتهى وفات لا تطرونه جداميه دخيـلكم مابا اتذكره ..

سكتت حرمة عميه ونزلت راسها وعمتيه ابتسمت و هزت راسها بـ رضا ..

يدوه: بنتيه اليوم بنهيّر صوب العزبــه بتين فيانا ..؟؟؟

حموده: هيــه فديــتج يدوه أصلاً انا من زمان أبا أسيــر ..

يدوه: هيه عيل تزهبي عقب الغــدا .. اليوم براد وسحاب وبنسير القايله ..

حموده: انشالله .. بس منو بيسير بنا ؟؟

يدوه: وابويه ثره حد يسير فيايه العزبه غير خويـــلد ؟؟..

ضحكت على اسم خويــلد .. والله ماينفع له الاسم .. كل هالطول والعرض والهيبه آخر شي خويــلد ؟؟

حموده: عموه مابتسيرين ؟؟

عليا: لا يبوج انا وين والعزب وين ؟؟

يدوه: خليها هاي متحضره امره هاي هب مونتها .. هاي بس حق الاسواق واليمعيات (الجمعيات) ..

ضحكت على اسلوب يدوه .. أوين اليمعيات .. وبعدين شو دخّل الجمعيات ؟؟ الناس من بدو وحضر يسيرون صوب الجمعيه .. والله انج تــــــحفه يا يدوه ..

حموده: وانتي عموه الثانيه ؟؟ لايكون انتي بعد متحضرة على قولة يدتيه ؟

عوشة: لايبوج لا متحضره ولا شي .. لكنها يدتج بتهيّر القايله وانا مافيّه ابا ارقــد ..

يدوه: انتن ماتستحن انا اللي اكبر عنكن بـ عشرين سنه ما ارقد الظهر ولا اتحظى شراتكن .. أسميكن عيزتن قبل وقتكن ..

طالعن عموه وحرمة عميه بعض .. وخلاف قامن عنّا ..

حموده: ههههههههه يدوه خليهن انتي شيختهن صــح ؟؟

عدلت يدوه برقعها وقالت : هيه عيــل ..

نقعت من الضحك على حركة يدوه .. وهي تمت تضحك فيايه بعد ..

....: عساها دوم هالضـــحكة انشالله ..

التفت صوب مصدر الصوت كان خالد .. عدلت شيلتيه ويلستيه لأني كنت متساندة على يدوه ولاويه على رقبتها .. كنت بقوم بس خالد حلف علينا نتم يالسين .. ويلس عدال يدوه ..

خالد: شحالج يدوه ؟؟

يدوه: بخير وسهاله شحالك انته ؟؟

خالد: بخير من شفت هالويوه الطيبه .. شحالج حمده ؟؟

حموده: الحمدلله يسرك الحال ..

خالد: ها يدوه متى ناوية تسيرين العزبه ؟؟

يدوه: الظهــر هب الحين من متى انا أسير الضحى .. تحيدنيه ولا الفير ولا الظهر ..

خالد: عاد طلعات الفير ماشي شراتهن .. حتى لو ماشوف الدرب من الرقاد تخلينيه أسوق ..

حموده: لازم وانته أصلاً تروم ترد يدوه ؟؟

خالد: لا أكيـــد ..

يدوه: هيه حموده فديتها بتسير فيانا اليوم ..

خالد: صدق ؟؟ هيه زين عشان يدوه تحصل مرافق غيريه ..

يدوه: لالا انته مابتفجج منك انا ما أأمن أسير فيا الدريول ..

خالد: أفا عليج منو قال بخليــج .. ؟؟ وانا اروم افارقج أصلاً يا شيختهن ..

يدوه: ماشالله كلكم طايحين فيّه اليوم شيختهن وشيختهن ..

خالد: ليش منو قالج شيختهن غيريه ..

يدوه: منو غيرها حميده ..

حموده: أنا حميــــــــــــده ؟؟؟؟؟ الله يســـامحج يدوووووه !!!!

يدوه: وابويه عليـــج خلاص حمووده .. زين جذيه ؟؟

حموده: هيه زين يعلني افداج ..

ولويت عليها ..

خالد: راحت ذيج الايام يوم يدوه حقيه اروحيه وماعندها حد غيريه .. راح الزمان اللي نعيمه صفالي ..!!!

لويت على يدوه أكثر عشان اغايضه .. وخلاف فجيت عنها ..

خالد: يعلني ماخلا من يدوووه ..

ولوا عليها ..

يدوه: وابويه شعندكم عليّه اليوم كلكم طايحين فيّه تلوون عليّه ..

حموده: نحبــج يدوه شنسوي ؟؟؟

يدوه: يالله والله انهم مايسوونج يا حموده ..

خالد: أفا وانا ؟؟

يدوه: انته غلاك من زمان تعرفه .. من 30 سنه وانا أحدي عليك .. الحين دور حمّوده ..

فهاللحظه أذن الظهــر .. و عقب ما خلّص الاذان قمت عنهم ..

خالد: وين سايره ؟؟

حموده: ماسمعت الاذان ؟؟

طالعنيه باستغراب وخطفت عنه .. شو مستغرب يعني اني أصلّـــي ؟؟ والله كل شي جايز !!

صلّيــت ومن عقب الصلاه يا عميه ووعن البنات وتغدينا ..

عقب الغــدا ..

يدوه: هاه مابتسيرن العزبه ..

الريم: لا يدوه تونا واعيــن مافيــنا !!

يدوه: هيه عيل يالله حموده روّحنا ..

حموده: يالله ..

قمنا انا ويدتيه ..

سلامه باستغراب: حموده بتسيرين ؟؟

حموده: هيه ليش ؟؟

سلامه: لا ماشــي .. بس استغربت ..

حموده: ليش استغربتي ؟؟

سلامه: لا يعني ماتوقعتج تسيرين العزبه ..

حموده: لا توقعي كل شي ..

وظهرت فيا يدوه .. وركبنا سيارة خالد .. هي جدام وانا وراها .. وظهرنا من البيت ..

فالدرب .. شغّل خالد المسجـل وطلعت هالاغنيه ..

لقيت روحي بعد مانا لقيتك .. بعد اللقا ارجوك لالا تغيبي
صعبن علي ابقى وانا مانسيتك .. احساسي كني بين ربعي غريبي

ظهّر السي دي بسرعه يوم احتشرت يدتيه على هالاغنيه .. انا كنت اتحسبها فـ الاف ام ماكنت متوقعه انه خالد يسمع هالاغـــاني !!!!

حط أغنية ميحد .. كان يجلب من بين السيديات اللي عنده عشان يحط هالاغنيه ..


طيور الحب بـ انغامن تلجلج .. صباح الخير مونس يا فطين
علامك ليش يالون البنفسـج .. أحبك و انت من طبعك حزيــن ؟؟


طالعت كندورتيه .. أوبس لايكون يقصدنيه ؟؟ لا مستحيــل شهالافكــار الغبية ؟؟

كملنا دربــنا .. ووصلنا عقب نص ساعه بما انه يدتيه ماخلته يســـرع ..

نزلنا من السياره .. كان الجو وايد مغيّم .. والمهب تهب بهدووء .. كان المكان يريّح الاعصاب لولا صوت الهوش واليعد والبوش ..

تيمت أحوط فيا يدتيه عند البهم ..

وخلاف مشيت روحيه صوب واحد من العراقيب الطويله خذت وقت لين رقيته .. يلست ع راس العرقوب .. وتميت اطالع المكان من فوق .. دفنت ريوليه فالعرقوب .. كان دافي من تحت .. وانا عيبنيه الدفا عقب كل البرد اللي عشته في أمريكا ..

خالد: هاه عايبنج المكان ..؟؟

بسم الله من وين طلع هذا ؟؟؟؟

حموده: هيــه ..

خالد: تعالي براويـج شي ..

حموده: شو ؟؟

خالد: انزين تعالي انتي ..

قمت وسرت وياه .. وخلاف وقفنا عدال ستور (مستودع) وهبط هو داخل .. وطلع وهو راكب دراجــه ..

قلت جني ياهــل : أبــــا أركـــب ..

خالد: تعرفيــن تسوقينها ؟؟

هزيت راسيـه بـ لا ..

خالد: تعالي ركبي براويــج ..

ونزل هو .. بس انا احترت قبل لاأركب أكيد بيشوف صرواليه !!!!! لا يارب لاتفضحنيه عنده .. ركبت والحمدلله ان الكندوره كانت وسيعه وغطّت ..

وقف خالد عدال الدراجه وتم يأشر ويخبرنيه وين البريك ووين يوم أبا أسرع ووين لازم أدوس ..

خالد: بس البريك لازم تهوسين عليه بـ قو .. لحظه بشوف جانج ترومين عليه .. يالله هوسي عليه ..

حطيت ايديه ع البريك تميت مهوسه عليه بقو لكنه ماطاع يلين ..

خالد: ايدج رخوه .. طالعي جذيه ..

وحط ايده على ايديه وهوّس بقو .. ايديه عورتنيه ..

حموده: آآآآي عورتنيه !!!

ورفعت راسي صوبه هو كان موخي عليّه لنه كان ماسك ايديه .. يوم شفته قريب جذيه نزلت راسيه .. وخوّز هو ايده ..

خالد: آســف ..

تميت انا اطالع ايديه اللي احمرّت .. وتميت انفخ عليها جنّي ياهل والدمعه فعيونيه .. وايد عورتنيه ..

طالعته وقلت له : ايه وايد عورتنيه ..

تم يضحك خلاف قال : ايدج رخوه شسوي ؟؟؟

حموده: مب منك من اللي يدزلك ويه و ايي فياك ..

وقمت عن الدراجه .. وسرت ويلست على عرقوب قريـــب وانا قابضه ايديه وانفخ عليها .. يا هو و يلس عنديه بس بعيد شوي ..

خالد: بعدها تعورج ؟؟

حموده: هيه عيل ؟؟

خالد: بسير اييب لج ماي بارد من السياره تحطينه عليها ..

وقام عنيه .. وانا تميت انفخ على ايديه .. وخلاف حسيت بـ قطره بارده على راسيه .. وخلاف توالت القطرات .. وبدا المطر يغزر شوي .. قمت من مكانيه عن اتخرس أكثر .. وخلاف يانيه خالد بسيارته .. وركبت عنده .. كان عاق السفره و مظهّر شعره الغليظ اللي واصل لين جتفه .. تذكرت شعر حمد الله يرحمه .. ماكان ايي ربع شعر خالد .. !! كيف انا أرمــس عن حمد جذيه ؟؟ كيف ماطاحت دمعة عيونيه يوم ذكرته ؟؟ مادري .. حتى انه قلبيه ما اهتز ولا حسيت بـ شي .. شو اللي صــار ياربــي ؟؟ لايكون قلبيه استوا فيه شي وما قام يحس ؟؟ والله مادري ..

تميت أطالع عمريه فالمنظرة .. مشيت جحاليه اللي كان سايـح شوي .. وخلاف سمعت هالاغنية ..
خفف كحل عينك ترا عيونك وساع .. رد النظر عنهن وفيـهن مهابة
لو برقت في راهب العلم يرتاع .. وبطرفها تجذبك شدة جذابة
شطين والرمشين فيهن وسط ضاع .. منها فوادي ذايبن في عذابه
تخلع قلوب الرجاجيل نزاع .. واللي يعاتبني اضيع عتابه
واذا جرا منهن بلا قصد الادماع .. اتحس ان الانس مقفول بابه
والمضحك ان يرفع لك السعد الاقناع .. كن الفرح فوقك تناثر سحابه
ياعين فيها كل زينن بالاجماع .. اهديك من شوقي ووجدي شبابه
عينن بليا كحل تامر وتنطاع .. وعين تسال ولاتحصل اجابه
وعين فيها جمع نشرن وينشاع .. فيهن لطافه والفضا والرحابه
فكري على حبك نواياه نزاع .. مثل الرحيق بشوق شمة صحابه
ساري سرابي واسر الجسم في ساع .. عنيد تفكير الهواجيس جابه
بين الشعور عناد وخضوع وصراع .. ومطوع احساسي وقلبي رضابه
واهديك شعري والبصاير والاسماع .. واهديك ثم اهديك بما ينصخا به
خفف كحل عينك ترا عيونك وساع .. رد النظر عنهن وفيـهن مهابة


ضحكت وتميت اطالع خالد .. فيه شي غريب هالانسان .. معقوله يكون كل اللي قالوه عنه غلــط ؟؟ معقوله يكون مظلوم شراتيه ؟؟ ويمكن يكون الكلام اللي قالوه صدق .. ويطلع مثل شويخ وامثالها .. لا مستحيــل .. انا دوم أحس بالامان عنده .. شخصيته قويه .. أحس انه صدق "ريال" !!! انا لازم أسأله .. اللي سوالي اياه مب شوية .. هو الوحيد اللي اهتم يخبرنيه يوم توفى حمد .. وهو اللي تم عنديه شهرين في أمريكا لين خلصت دراستيه .. وقف عنديه في أصعب لحظات حياتيه .. ماروم أحكم عليه بالشيــن وانا ماشفت منه غير الخير .. بغض النظر عن بعض المواقــف !! مثل اللي استوا اليوم .. !!


استجمعت شحاعتيه وقلت : خالد ..

التفت صوبيه وابتسم ..

خالد: عونج .. هاه ايدج بعدها تعورج ؟؟

حموده: هاه ؟ لا ..

انا أصلاً نسيت الويع !!

حموده: اممم بس ابا اتخبرك عن شي .. بس أظن انه يباله يلسة طويلة والحين يدوه اتريانا ..

خالد: انا خطفت عليها قبل شوي قالت عايبنها الجو تبا تيلس فالمطر شوي .. يالله قولي اللي عندج ..

حموده: بس اوعدنيه ماتعصب ..

خالد: تم خلاص ..

حموده: انا ابا اتأكد اذا كل الرمسه اللي سمعتها عنك صــح ..

خالد: أي رمسه .. ؟؟

حموده: أول شي بخصوص مريم ..

ابتسم بطنازه وقـال : حتى انتي وصلوا لــج السالفه ؟؟ أكيد .. مابيرتاحون لين يسوون اللي يبونه .. وأكيد خبروج اني ابا آخــذج عشان ورث عميه الله يرحمه ..

هزيت راسيه بـ هيه ..