منتدى استراحات زايد - இஇ يـــــــــــــــــــــــــــا عذابــــــــــــــــــــــــــــــــــــي இஇ

سارة وهي تدق باب حجرة أحمد: أحمد؟؟؟ فج الباب أبي أرمسك
أحمد وهو ما له نفس يرمس بعد السالفة اللي صارت قبل شوي: أفففففففف ساروه مالي خلقج ما ابي أفتح الباب.. أبي ارقد تعبان
سارة: أحمد صدقني ما بتحرك قبل لا تفج الباب..وقعدت تدق بقو على الباب
أحمد وهو مفول من حركات سارة.. وما قدر يتحمل أكثر وسار فج الباب بقو: نعم خيييير؟
سارة وهي ماتت من الزيغة بعد ما شافت منظر اخوها ..كان الشرار يبان من عيونه .. لا شكلها السالفة صج..
سارة وهي مرتبكة.. ضاع منها كل الكلام اللي كانت بتقوله... شكلها حتى لو سألتها عن اسمها في هاي اللحظة عادي تقول سعيدة بدال سارة من الخرعة..خخخخخخخخخ

سارة: أ...أححممد..شفيك معصب؟
أحمد: أففففففففف، سارووه الله يخليج ترى خلاص واصلة حدي.. قولي اللي عندج بسرعة؟
سارة وهي تحاول تستجمع قوتها: حصة..
أحمد:............................."ما يرد"<<<<<<<<< يضرب الحب شو بزل خخخخخخخخخخخخ
سارة: بلاك ما ترد، يعني اللي قالته حصوه صج؟
أحمد: هي صج، وأنا من باجر بخلي أمايا أدور لي على بنت الحلال.. ولا مذلة هالبنت..حشى تقول باخذ الملكة ديانا
سارة وهي تستعبط : من هالناحية صدقت والله .. هاي حصوه ما ادري على شو شايفة نفسها.. على قولتك تتحرى عمرها الملكة ديانا
أحمد: تخسين ألا انتي..والله كل العالم ما يسوون حبيبة قلبي حصة
سارة: يا سلام..توك تقول رمسة والحين تحطها علي.. سبحان اللي يغير ولا يتغير
أحمد: آاااااااه يا سارة أنتي ما تعرفين حصة شو بالنسبالي ، حصة هي كل حياتي.. حصة هي الهوا اللي اتنفسه.. هي الدوا اللي يشفيني..هي ..
وتقطعه سارة: بس بس بس.. حشى هب حصوه هذي..روميو وجولييت بزمانكم
أحمد: هههههههه
سارة: هي اضحك.. خلني أشوف ضحكتك الحلوة..
أحمد وهو يجرب من سارة ويبوسها على خدها: والله أحبهااااااااا
سارة: أنا والله هب حصوه.. أنا سارة .. والله العظيييييييم
أحمد: هههههههههههههههه
سارة: شوف.. الحين بسير أزقر حصة وبييك أوكي.. لازم تراضيها حرام.
أحمد: هي وينها الحين؟
سارة: في حجرتي... الحين بزقرها لك.. وسارت سارة عسب تزقر حصة بس ما لقتها.. الظاهر روحت البيت..
أحمد: عنلاتها الخامة. سارت البيت يعني.. بس ما علي أراويج فيها يا ساروه
سارة: هي والله.. ابيك تكسر راسها
أحمد: مو جني عطيتج ويه؟

سارة: نعم نعم..الحين عطيتج ويه.. بس ماعلي بوشهاب..الشره هب عليك الشره علي أنا اللي قاعدة أساعدك
أحمد: تساعدني أونه.. أصلا أنا وحصة دومنا نتزاعل ونتصالح بروحنا..من غير عذااال
سارة وتسوي عمرها زعلانة: الحين أنا عذال؟ بس ما علي...الله يسامحك
أحمد وهو يجرب من سارة ويحضنها: فديييييييت سارونة أنا..اممممممممممممواح..بلاج استهبل وياج
سارة: أحلف..اتحرى صج
أحمد: سخيييييييفة
سارة: هب اسخف عنك
أحمد: جب جب.. ويا شعرج هذا.. عنبوه حتى شعر عبسي أطول عنه..خخخخخخخخخ
سارة: وأنت شلك، أصلا أنت غيران لأنه أنعم من شعرك هذا الفلفول ههههههههه
أحمد: تخسين شعري أنا فلفول..
سارة: لا والله ما ادري منو يدش حجرتي ويستعمل الاستشوار مالي
أحمد: يعني تعترفين أن شعرج كله استشوار..ههههههههه
سارة: لا والله.. أنا بس استعمل الاستشوار عسب أجفف شعري..
احمد: هي صح صح خخخخخخخخخخخ
وتموا يسولفون ويتمصخرون حق بعض.. وقدرت سارة أنها تعيد المياه لمجاريها بين أحمد وحصة.. وهذا المعروف عن سارة.. دايما تحاول تحل الأمور بعقلانية..

بعد أسبوع من الأحداث السابقة..
قدر أحمد أنه يراضي حصة .. طبعا بمساعدة سارة.. واتفقوا أنهم يخطبون رسمي لكن الزواج تم تأجيله شوي الين ما تحس حصة أنها مستعدة للزواج..
.................................................. ....................
نش الساعة 4,30 الفجر، على صوت الأذان اللي دوم يحب يسمعه وخاصة في مثل هالوقت.. كان متعود يوقف في البلكون ويردد الدعاء.." اللهم رب هذه الدعوة التامة، والصلاة القائمة، آت محمد الوسيلة والفضيلة، والدرجة العالية ، وابعثه اللهم مقاما محمودا الذي وعدته" وصلى الله اللهم على سيدنا محمد

وعلى آله وصحبه أجمعين.
عقبها دش الحمام(عزكم الله) عسب يسبح ومن بعدها توضأ وصلى الصبح..
توجه صوب خزانة الملابس.. وكالعادة لقاها معطرة ومبخرة..ارتسمت على ويهه ابتسامة حب وحنان.. أخذ لبس الفروسية اللي صار له مدة طويلة ما جاسها..عقب ما خلص من لبسه.. وقف جدام المنظرة عسب يتأكد من أناقته..كان فعلا قي قمة الوسامة.. بنطلون بيج على قميص أسود مع كاب الفروسية الأسود المخملي.. وكان شعره الطويل ظاهر تحت الكاب..عقبها قعد على الكرسي عسب يلبس البوت الأسود الطويل..
نزل تحت.. وكانت السماء للحين مظلمة، والشمس للحين ما أذنت لأشعتها بالانتشار..توجه صوب الاسطبل.. وكالعادة كان " الكاسر" في انتظاره..
فتح رباطة وجرب منه يهمس في أذنه جنه انسان يكلمه..
حارب: أصصصصص، لا تسوي دوشة.. خلنا نظهر أنا وأنت بس .. أخاف تسمعنا " إليزابيث " عقب تحشرنا..
هز الكاسر راسه وجنه فهم رمسة حارب..فعلا كان الكاسر يعي رمسة حارب الوحيد لأن مدربنه من يوم ما كان عمره 6 سنوات.. كان هدية من خالته ظبية.. على الرغم من وجود أكثر من خيل وفرس في الاسطبل ألا أن الكاسر وايد غالي على حارب بحكم أنه أول خيل يستلمه من خالته ظبية..
ظهروا برع.. وامتطى حارب الكاسر.. وانطلق بكل قوته........وانطلقت معاهم أشعة الشمس الذهبية اللي انتشرت بين الورد..مكون لوحة فنية عجيييييبة.
.................................................. .......
في هالوقت كانت حصة سهرانة ترمس أحمد في التليفون..
حصة: لا ما بقووووول
أحمد: والله تقولينها
حصة: أحمد.. والله استحي
أحمد: أقولج ما بسكر قبل لا أسمعها
حصة: ياربي..أبي ارقد حرام عليك..من أربع ساعات وانا قاعدة أرمسك خلاص
أحمد: كيفج والله.. لو تبين الحين بسكر.. بس قوليها بالأول
حصة: أفففففففففف، خلاص بقولها وأنت كيفك سمعتها ولا ما سمعتها.. لأني بقولها بسرعة

أحمد: كيفج ... المهم تقولينها
حصة وبسرعة..: أحبك....وعلى طول سكرت التليفون في ويه أحمد اللي ذاب من سمعها.......
.................................................. .......

شو تتوقعون يصير بين احمد و حصة؟؟

شو ايكم في البارت؟؟
.

.

سيلانية و انتحر