منتدى استراحات زايد - 乂آآه يا ويـــله .. قلــــبٍ صويــبٍ بانــت أقداره乂

(الجزء 83)

عواس: انتي اذكري الله .. وقوليلي مكانج .. وصدقيني انا اللي بوّديج أعالجج .. مب واثقة فأخوج؟

هنود : انسى .. انسى انه عندك أخت .. تسمع؟ انا اصلا شاردة ويا واحد يحبني !! (وانغلق تيلفونها )

فاضل : أسميج اتعرفين اتمثلين !!

هنود تصيح : زين جذيه؟ خليتني أجذب على أخويه؟ أقرب الناس لي؟ سندي !!

فاضل بعده ماسك رقبتها : انتي انطبي ومابا أسمع لج حس ..

(هنود يعلى صياحها واتدقق براسها )

هنود : خلاص ابا اموت !! مابا أعيش .. اجتلوني !! أقولكم اجتلوني !!

فاضل : غناتي .. بدون ما تقولين أصلا .. الحبوب اللي تاخذينهن يسمونهن الموت البطيء شرا الشلل .. الله يشلج !!

(وكانت وايد ضعيفة .. لدرجة انه أبوها دفرها وما مداها دوخت ..)

النيرس : انا في يعطي مورفين مشان جذيه دوخة واجد .. يالله فلوس !!

(ويفر البيزات فويهها )

فاضل: يوّدي !! فضلت عنج !! ومن تنتهي سالفة الشرطة .. اتصلي عشان أرد أدخلها .. تفهمين؟

النيرس : اوكي دونت ووري !!

(ويوم هو طالع حس شرا اللي قلبه يعوره ..)

فاضل: آآخ !! ماروم أتنصخ !! (تم يعاني مكانه .. والنفضة جايستنه لمدة 25 دقيقة .. ووقف ) يالله شو جاسني؟

(اما عند مانع )

مانع واصل البيت : أميه؟ وينج؟

ام مانع: خير .. خير.. ليش الزعيج؟

مانع: تعالي اباج ..

ام مانع: خير؟ شو مستوي؟ شو فيها الصغيرونة؟

مانع: ما فيها الا كل خير .. ترا هزاع باجر بيوصل البلاد ..

ام مانع اشرق ويهها : ويييييه يعله مبارك وسعيد !! بتنوّر البلاد .. واااايه يعلني أفداه وأفدا يومه ..

مانع: اميه؟ كنتي تدرين انه عواس حي؟

ام مانع : حشا علية .. انا الا من فترة معلميني واعلية عليه .. مب مترقع أبدا ..

مانع: شعنه؟ بلاه؟

ام مانع: ربيعك وخويك وما تدري عنه؟

مانع: انا الا اليوم ملتقي فيه .. وصدمتي فيه صدمة .. خلتني اتنافض حتى ..

(وتخبره بكل شي استوا به في السفر ..)

مانع فخاطره : وحليله .. صدمة ورا صدمة .. موول هالريال مب متهني فحياته .. الله يستر بس من ردتّه المفاجأة ..

ام مانع: حوووه !! حوووه !! فشو سرحت؟

مانع: هاااه؟ (ويت على باله هنيد ) أمايا؟ هنيد شخبارها؟

ام مانع اتطالعه بنظرة : بعدك اتفكر فيها؟ اتحمل يابويه ترا عندك بنية ..

مانع: ههه لا بس اسأل ..

ام مانع : والله مادريبها .. موول مالها حس وهي في دبي بعيد عنا ..

مانع: ما نطقت بشي؟

ام مانع: ولا حرف .. الله يشافيها ويعافيها ..

مانع: امايا انا بترخص عنج .. قولي حق البشاكير يحولون اغراض هزاع تحت فهذيجي الغرفة .. وغينظفونها عدل .. وباجر بعد بتطلع وداد ..

ام مانع: ان شاء الله .. انته عندك شفت؟

مانع: هيه أميه ..

ام مانع: الله اييسّر أمرك ان شاء الله .. (ويوم وصل مكتبه )

مانع فخاطره : يالله اتخفف عن اللي في صدري (وكان ياخذ في اليوم واحد 3 حبات بنادول .. واللي يخفف عليه صورة بنته هند اللي سماها على اللي عشقها .. اما عند عواس كان شال اخوه ودخل وهو مفوّل )

عواس: والله ما اسامحها والله !! أكيد دامنه ميوه وراها لازم اتكون اتعلمت الفراطة .. ما ينلام فيها رشود !!

ميثاء : بلاك مشتط؟ (وكانوا ميثاء وحمد ونشبة وشما وشمسة ميلسين )

عواس والدم يفور فيوفه : إإه .. هاااه؟ الجلبة يوم رمستها .. أونه تبا تطلق ..وبتسافر ويا فاضل .. مالت على شكلها الجلبة !! موول أبدا ما فيها خير .. لاهي ولا اختها !!

حمد بكل يأس : ما قلت لها يدّج يباج تردين؟ محد مالي علينا البيت الا هي !!

عواس : ما خلت لي فرصة .. تلتعن !! خله يفيدها فضوّل !! من اليوم وساير بنكمل حياتنا بدونهن .. ما فيهن بركة !! الا بعد ما اتعلمن الحيا والمستحى !!

(وسار فوق مفوّل وحزة العشاء نزل وهو هادي ..هم اتعشوا بس هو ما كل وسحب خالوته شمسة للميلس.. وهي اتوقعت انه بيكلمها انه يباها تمهد الطريج بينه وبين فطيم ..)

عواس :خالوه اتعرفين ليش يايبنج روحج؟

شمسة : اكيد عشان تجابل ويهي ..

عواس: والله كل الخير بويهج وانتي الخير والبركة ..

شمسة : خير بويهك يابويه ..

عواس: مادري شو اقولج يا خالوه .. بس واحد من الربع مرمسني ويبا يخطب .. وانا قلتله ما في أحسن من بنت عمي ..

شمسة منصدمة: شمايل؟

عواس: لا مب شمايل .. قصدي هناء..

شمسة : وييييه هذي الساعة المباركة .. بس هنوه بعدها تدرس ..

عواس: شو رايج انحيّرها له .. لأنه الريال ما يتفوت ويشتغل ويايه .. عشان لو ياء حد خطبها ولا شي بنقوله محيّرة لواحد من اهلنا ..

شمسة : عيل نحن ما بنخبرها .. عشان ما تيلس تفكر في العرس وتهمل دراستها ..

عواس: هذا الشي الزين ..وباجر بخلي يرمس اهله يتصلوبج .. زين؟

شمسة : على خير ان شاء الله .. (اما عند راشد كان يتصل في عواس )

راشد: السلام عليكم ..

عواس: عليك السلام

راشد : عيسى .. ماشي خبر عن هنيد ؟

عواس: لا اتدوّرها .. دخيلك انساها وكمل حياتك ..

راشد : خبرني اتصلت؟

عواس: اتصلت .. بس اقولك انساها .. لأنها اتفكر بعمرها بس ..

راشد : وينها هي؟ وين انخشت؟

عواس: لا منخشة ولا شي .. سارت برع البلاد تتعالج .. خلها عنك وكمّل حياتك ..

راشد : انته اخوها تقول جذيه؟ واصلا ما يستوي تسافر انا ريلها لازم تاخذ أذني ..

عواس فخاطره : شو تباني أقولك؟ أقولك شاردة ويا واحد؟

(راشد بند عنه وما حصّل الاجابات اللي يباهن .. الا اتكسرن مياديفه )

راشد : خسرتها؟ خسرت هنيد؟ كانت دوم مجابلتني .. بس انا اللي كنت أكابر .. (ويحس قلبه يخفق بطريقة مب طبيعية .. ويصيح ندم ) أحينه تخفق؟ تخفق يا قلب؟ أصلا كان عندي قلب حزتها؟ يوم خليتها؟ يوم خليتها تعيش العذاب هناكي ؟ يالله .. يالله تسمعني .. يالله أخصلها .. يالله تسامحني .. مع انه ولا آدمي بيغفر لي على اللي سويته فيها ..

(عيسى تم واعي ويتجلب ويفكر بكل كلمة قالتها اخته في التيلفون .. ليش تخلي بلادها وتسافر برع ويا واحد غريب هذا اللي بيذبحني .. شو حصل لها؟ لا يكون حد معتدي عليها ؟ بس أكيد حد ورا السالفة .. محد غير فضّول .. أكيد ينّن بها .. والا هالكلام ما يظهر منها .. اختيه واعرفها .. اما اليوم الثاني .. )

هزاع: بتظهرني؟ وين بتوّديني؟

مانع: البيت ..

هزاع: أميه تدري اني برد؟ (وهزاع يمشي ورا مانع وساحب ريله سحاب .. وويهه وارم .. وإيده لافينها ..)

مانع : هيه

هزاع: خبرتها بكل شي ؟

مانع: لا

هزاع: شفت عيسى؟

مانع: هيه

هزاع: رمسك؟

مانع: هيه

(وكانت اجابته على قد السؤال .. وهزاع متخبل يبا يعرف شو استوا ..)

(اما في شغل مانع كان دوم متخفي ونادرا ما يلتقي فعواس .. كان مدني بسبب عواس .. كان ما يبا يلتقي فيه .. عشان ما يحس في الذنب اللي يحسه كل يوم .. اما فضول زاد شره .. وخذ أوراق مي الثبوتية .. ووداهن مستشفى الامل .. وكان ساحب هنود اللي تمشي وراه وكانت مشمئزة منه ..)

هنود : بزووع !!

فاضل : ان تكلمتي .. صكيتج كاف على ويهج ..

هنود : والله بزوع !! هدني !! (ويوم هداها انها تربع )

فاضل يربع وراها : زخوها !! بتشرد !! زخوها !!

(وبكل سهولة زخوها .. وتمت تصيح وتترجاهم بعيونها .. بس ماشي فايدة دخلت المستشفى .. من سوولها التحاليل تبيّن انها تتعاطى ابر مخدرة .. طبعا يوم خبروا فاضل كان مستانس من داخل .. اما هنود .. كانت اتصيح وما اتوقف صياح لأنها مظلومة .. وكل يوم الظلم يزيد عليها ... اما في شغل عواس )

سارة تتصل بعواس : شحالك عيسى؟ (سارة الممرضة اللي كانت اتعالجه يوم كان فأمريكا )

عواس: بنعمة .. ومن صوبج؟

سارة : ممكن نتلاقى فمكان؟

عواس: خير؟

سارة : ابا اكلمك ..

عواس: ان شاء الله وين تبينا نتلاقى؟

(وساروا الكوفي شوب جريب من شغله بس هي اتأخرت.)

سارة : آسفة عالتأخير ..بس المكان شوي صعب ..

عواس: لا عادي .. (ويلسوا .. وطلبوا .. اما هي من شافته سيده سرحت به ) سارة .. هووه !! سارة .. سارة ..

سارة : هممم يس؟

عواس: هههههه وين سرحتي؟ لا يكون فية؟

سارة احمر ويهها وقلبها يدق بزيادة : عيسى انا .. انا .. (وتوّها بتتكلم بس تقاطعهم وحدة تحط طلباتهم .. بس عواس سيده عرف هي شو تبا تقول بس انصدم )

عواس منصدم : سارة انتي؟

سارة : انا .. انا .. انا .. (ويصيح تيلفونه يقاطعهم )

عواس: سوري لحظة .. (وهي حسّت عمرها متقفطة ) انزين؟

سارة : انته مشغول؟

عواس: شوي .. (ويبتسم ابتسامته الساحرة ) سارة .. انا اعرف شو فخاطرج ..

سارة : صدق؟

عواس: طبعا من كلامج وزياغج .. سامحيني يا سارة انا ما احبج .. او احس بأي شي صوبج أو صوب أي بنت .. (وسارة احمر ويهها وحسّت عمرها شرا المطعونة ) سامحيني ما اباج اتعلقين بأي خيط أمل انه يمكن انحب بعض .. أو آخذج .. انا من سابع المستحيلات آخذ من برع بلادي .. مع انه مب ناقصنج أي شي .. وأي ريال يتمناج..

سارة : Stop

عواس: هلا

سارة شلت شنطتها : مع السلامة .. (وسارت صوب الكاشيير ودفعت الفاتورة وظهرت ..)

عواس : سارة .. سارة !!

عواس فخاطره : انزين هذا الصدق .. يعني تباني أحبها غصب؟ أعوذ بالله ..

(اما عند نشبة )

نشبة: إييه بنيات !!

شما وميثاء :خير !!

نشبة : مب إلكن !! أقول شملوه

شمايل : هممم؟

نشبة : قومي بنسير كافور بنتشرى غريضات ..

فطيم : والجمعية ما تقول شي ..

نشبة : فخاطرية أشوف بوطبر وهو يشتغل وينكرف .. يمكن بعد يسويلنا دسكون ..

شما وميثاء وفطيم : إشوووه؟

نشبة : دسكون دسكون بلاكم؟ تنزيلات اعنبوا ما تفتهمون؟

فطيم : اندوك انته !! والله واتطورت نشيبة وقامت تعرف تنطق دسكاونت !!

نشبة : عيل أغدي بلهة شراتكن؟ يالله لبسن عباياكن .. وانتي راعية بوطبر ما بتين؟

شمايل: مشغولة .. مشغولة ..

نشبة تطنز : واعلية عليج .. لا يكون تحشين ملفوف؟ (قصدها ورق عنب )

شمايل: لا والله بس أقص ظفوري وأصبغهن ..

نشبة : ويدي فضل عنج !!

شمايل : شوفي شو رايج في الصبغ؟ (وتقرب ريلها من ويه نشبة )

نشبة : ويدي فضل عنها من ريل !! اعنبوا جاارة (قصدها سودة ) تمشين محفاية انتي؟

شمايل: انا اصلا ياية بدون نعال..

نشبة : اللهم مالك الحمد والشكر .. المال فوقكم وتحتكم وانتي تمشين محفاية شرا السيلانية اللي مدهنة ريلها بفيكس ..

شمايل: سيلانية ولا لبنانية مب سايرة !!

نشبة: ماعليه انزين يوم بيتحاودن به بنات كافور بتيني اتصيحين ميود سوا وميود قال

شمايل: اصلا من يطالع وحدة غيري بيتطلق ..

شما: جيه الشو بإيدج؟

شمايل: أسميج ما شفتي شي يا خالوه .. براويه البقرة يوم اتشوف الحريجة كيف عيونها ..

شما: هب هبيتي !!

ميثاء: ظنتيّه تطري عمرها..

شمايل: لا امايا كنت اطري زهور ..

شما: واعلية عليها ..ودوها وياكم تتونس..

نشبة : قصوري !!

شما: ودوها وحليلها من زمان ما طلعت

نشبة : حرام ان دريت انها ماكلة بصل ما تخطي ويانا ..

شمايل: انا شايفتنها ماكلة راسين بصل وخالطتنه ويا المايونيز .. (ولاعت جبدهم )

نشبة : يالله ترحمنا برحمتك ياربي ..سيروا قولولها تاكل نعناع بتفوتخ علينا .. شملوه؟

شمايل: مب سايرة ..

نشبة : غصبن عن خشم ريلج ..

شمايل: انزين بعده ما جف اللي فريلي !!

نشبة وتمطها من شعرها : ما بتقومين؟

شمايل: آآي !! آآي !! بقوم .. بقوم والله بقوم التوبة ..

نشبة : لبسي عباتج وسيري غسلي ريولج وخذي نعال فطموه !!

(وكلهم في الموتر زهور ومحمد الدريول ونشبة الا حضرتها ما يت )

نشبة ضاق صدرها : اضرب لها هرن .. (وتنزل الجامة ) شملوه ويهّد !!بتين ولا أرقعج بالنعال !!

شمايل: ياية !! ياية !! (وتزاعج ) والله لأراويج يا فطموه ان ما قصيته نعالج !! (وهي تركب ) أوووه عندكم دريول يديد؟ أخبارك رفيق؟

(ومحمد يهز راسه )

نشبة : أبويه محمد ودنا كافور ..

شمايل تشم : بتخبركم تشمون اللي أشمه؟

نشبة : شوه؟

شمايل: ريحة خايسة مادري من وين ياية .. منو سواها؟

نشبة : بتصطلبين ولا أحيسه هاللسان؟

شمايل: صدق والله ريحة ..................

نشبة: انف عليج .. عيب امايا .. ريال ويانا !!

شمايل: ما عليه ما يفتهم .. عندي عطر عادي ارش؟ صبري برّشه .. (وهي تدري انه الريحة من زهور ) برّشه عالمكيّف (أول ما رشته على مكيف نشبة سيده انبخ في عيونها ..)

نشبة : ويه ويه ويه عيوني !! آآخ يا عيوني .. غربلج الله يا شملوه عميتيني !!

شمايل: هههههههههههاي هاتي بشوف .. (وتنفخ ) أوووف أووووف .. انا ما اعرف انفخ عدل .. زهور؟ انفخي فعيونها .. (وزهور مسكت يبهة نشبة عشان تنفخ )

نشبة : لالالالا الا زهور .. (من نفخت عليها .. تبطلت عيونها .. بس حسّت نشبة شرا الدوخة جاستها ..)

شمايل ميتة من الضحك : يوم اقولج مب سايرة .. محد قالج تغصبيني عالييّة!!