|
حارب: أم علي درت؟ سارة: لأ محد يدري غيري والبنات حارب: أحسن لا تخبرونها أخاف تزيغ سارة وبترجي: حـــــــارب.. حارب: قلبــــــــــــــــــــــه استحت سارة.. كلش كلش هب وقته...حتى نست شو كانت بتقوله حارب وهو يبتسم: بلاج صخيتي؟ سارة: ولا شي.. خلاص.. بسكر حارب: ههههه خلاص ما علي.. دقايق وبكون عندج.. خليج زاهبة وسكر من عندها.. وبعد ما تطمن عليهم رجع حارب البيت عسب ياخذ سارة ويردون البيت أما أحمد فقعد عند حصة.. عسب بترقد في المستشفى ................................................ |
في اليوم الثاني .. في المستشفى.. الكل عرف بالسالفة والكل كان المستشفى في حجرة حصة حصة للحين هب مستوعبة السالفة أم علي قاعدة تواسي بنتها أم سهيل وسارة قاعدات عندهن وبرع عند الرياييل.. حارب وعلي وأحمد.. حارب: أحمد.. أحمد اللي حالته حالة رفع يطالع حارب حارب وهو يجرب منه: سير أنته البيت وبدل وارتاح وعقب تعال أحمد: لا لا هب لازم علي: شو هب لازم؟ من البارحة وأنت حالتك حالة؟ هب زين يأبوك أحمد فعلا كان تعبان وطول الليل كان سهران ويا حصة.. وبعد محاولات كثيرة من حارب وعلي اقتنع أحمد وسار البيت على أساس أنه برد عقب ....................................... |
.. في حجرة حصة ... حصة قاعدة تصيح أم علي: ما علي يما.. الله بعوضكم إن شاء الله حصة: كله مني.. كله مني سارة: بلاج انتي تخبلتي؟ شو كله منج؟ وأنا اللي كنت اتحراج عاقل.. أم سهيل: يا حصة يا حبيبتي أنتوا بعدكم بأول الطريج ويا ما ناس وايد صارت عندهم نفس الحالة والحينه ما شاء الله عليهم الله منعم عليهم بالعيال وشوي ... حارب وعلي: هود هود تحجبت حصة عدل ومسحت دموعها أم سهيل: هدى هدى حارب + علي: السلام عليكم الكل: وعليكم السلام حارب وهو يطالع حصة: أجر وعافية.. ما تشوفين شر حصة: الشر ما اييك.. الله يسلمك علي: يلا ما علي..الله بعوضكم إن شاء اله بدال الواحد درزن إن شاء الله سارة: حشى درزن مرة وحدة.. الكل: هههههههههه علي: هي بعد شو..؟ إن شاء الله أنا باجر يوم بعرس ما برتاح الا إذا يبت درزن سارة: خيــــــــــــــــــــــــــــبة الله يعين اللي بتاخذها عيل.. الكل: ههههههههههه أم سهيل: الله يزقكم يا عيالي ويوفقكم وقعدوا يسولفون وقدرت حصة أنها تنسى الحادث شوي أم علي: عيل وينه أحمد ما أشوفه؟ حارب: أنا قلت له يرد البيت عسب يرتاح من البارحة وهو هني أم سهيل: زين تسوي يما وعقبها ظهروا حارب وعلي وخلوا الحريم لحالهم.. شوي ويرن موبايل سارة... سارة: هلا سهيل.. |
سهيل: هلا هلا سارة شحالج؟ سارة: تمام الحمد الله سهيل: ها شخبار حصة الحينه؟ سارة: لا الحمد الله غزال والشر طار سهيل: الحمد الله.. عطيني إياها سارة وهي تعطي السماعة حق حصة.. حصة وبصوت تعبان: هلا سهيل سهيل: الحمد الله ع السلامة.. ما علي يالدبة ما بغيتي تطيحين الا في ملجتي الحين منو بسكته ريلج؟ حصة وهي تبتسم من سوالف سهيل: هههههههه سهيل: يلا ماعلي الله بعوضكم إن شاء الله حصة: إن شاء الله سهيل: وينه أحمد؟ حصة: سار البيت عسب يرتاح سهيل: خلاص ماعلي... يلا مع السلامة وسكر عنها .................................................. ..... |
بعد اسبوع ظهروا حصة من المستشفى.. وللحين حصة هب قادرة تحط عينها في عيون أحمد تحس أنها السبب في اللي صار.. طبعا حصة هاليومين بتقعد في بيت أمها عسب ترتاح .................................................. . في بيت أم علي حصة قاعدة في الصالة ويا سارة اللي ما خلتها طول هالمدة عسب تنسيها اللي صار شوي سارة: شوفي شوفي حصوه شرايج في هالفستان؟ سارة كانت تأشر حق واحد من الفساتين اللي ظاهر في التلفزيون وحصة في عالم ثاني.. حصة: ......................." الأخت سرحانة " سارة: حصـــــــــــــــــــــــــــوه حصة: هـــــــا؟؟ سارة: الحمد الله ع السلامة وين وصلتي؟ حصة: عند أحمد.. سارة: أحمد؟ ليش بلاه ؟؟؟؟؟ حصة: تصدقين من يوم اللي صار وهو للحين ما يرمسني... سارة وهي منصدمة: شـــــــــــــو؟ يستهبل هذا؟ وانتي شلج؟ حصة: شو شلي؟ بصراحة عنده حق كله مني سارة: وربي هبلة.. حووه انتي للحين هب راضية تفهمين أنه قضاء وقدر حصة: والله ما ادري سارة: ما علي الحين أراويج فيه وقامت سارة وطلعت موبايلها عسب تدق عليه وبعد 10 دقايق سارة: اففففففففففف حصة: ما يرد صح سارة: ما يرد نزلت حصة راسها: ما قلت لج سارة وهي تجرب من حصة وتلوي عليها: حصوه حبيبتي يلا عاد لا تكبرين السالفة وبعدين لازم نعذره .. تعرفين أحمد شكثر يموت في اليهال حصة: انزين دقي حق حارب عسب يرمسه توهقت سارة... أفففففففف كله ولا حارب.. الحين شو أقول لها.. حصة: سارة الله يخليج أعرف انج ما تحبين ترمسينه في التليفون بس عسب خاطري أرجــــــــــــــــــوج سارة وبعد ما غمضتها حصة: أوكي أوكي.. خلاص لا تحنين استانست حصة من الخاطر وعطت سارة بوسة قويه سارة: وأبويي عليج انتي.. يا أم المصالح حصة: هههههههه أحبج شسوي؟ وقامت سارة ودقت حق حارب.. |
| الساعة الآن 01:02 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir