|
الجزء الخامس عشر ((( محبتك بالقلب والله عميقة ..وأنا بقلبي حاجز لك مكاني ..هذي الحقيقة كان تبغي الحقيقه ..وهذا كلام الصدق ما فيه ثاني .. إذا أنت تمنى شوفتي بالدقيقه ..أنا آتنمى شوفتك بالثواني ))) \ \ محمد : أريد أشوفج مريم :حبيبي ما قدر محمد : عشان خاطري ..حدي ولهان عليج مريم : شوف صورتي محمد : صورتج ما تكفيني ..أبا أشوفج على الطبيعة مريم بدلع :حمووود محمد بأصرار : أريد أكحل عيوني بشوفتج حبي لا تحرميني من هالاحساس مريم بتردد : اممم محمد : أهون عليج مريم : أكيد ما تهون بس أهلي محمد يقاطعها : كلها أسابيع وبتكونين حلالي ..وبكون كل أهلج مريم بفرحه : صدق محمد : اكيد حبيبتي ياه خط ثاني على التليفون محمد : لحظة مريومتي عندي خط وشبك عليه من دون ما يسمع ردها محمد يبتسم : هلا ووالله بسعود سعود : يا هلا فيك محمد : من زمان ما نور أسمك شاشت تليفوني ..اكيد في مصيبه ولا ما بدق سعود :ههههههههه يعني عارفني محمد بخوف : ترمس صدق ؟ شو مستوي سعود : لا تخاق ربيعك مسوي حادث بسيط وهو الحين فالمستشفي محمد وقف : أي مستشفي ؟ سعود : توام محمد : دقايق وبكون عندك ..يلا باي سعود :باي . .. . حركت راسي يمين ويسار ..هند كانت يالسه ونشت من شافت حركتي .. يت صوبي ومسكت إيدي تميت أطالع المغذي اللى بيدي وهند فنفس الوقت هند بخوف : أتحسين بآلم ؟ سفهتها وتمت أطالع الغرفة : أنا كيف يت أهني ؟ هند : حبيبتي نحن قاطعتها : منصور ليش مب معاج ؟ وينه هند بلعت ريجها رديت بسرعه : منصور تعبان صح " بخوف " أريد أشوفه هند : ما يصير صرخت عليها : ولييييش اكيد فيه شي هند حطت إيدها على راسي : منصور حاطيلة مغذي مثلج عشان جيه ما تقدرين تشوفينه لين ما تتحسن حالتج بشك : جذابه هندووه ردت علي بنفعال : تتوقعين يعني لو منصور فيه شي بكون معاج الحين حسيت بنوع من الراحه : يعني بخير هند تحرك راسها هيه شفت إيدها محمرة : وأنتى ؟ هند: بخير الحمد لله ما عليج من لون إيدي ..الدكتورة قالتلي رضة وبتخف مع الأيام غادة : الحمد لله " كح " أحس بتعب بكل جسمي وريلي تعورني هند : ريلج فيها كسر وجبسوها وفراسج بعد جرح بس الحمد لله مب غريز وايد عشان جيه بيرقدونج اليوم غادة :ما ابا ارقد فالمشفي هند : مب عكيفج .. جسمج محتاج فيتامينات بسبت الدم اللى نزفتيه من راسج.. فبحطولج مغذي بين الفتره والثانيه وفنفس الوقت بيطمنون على الجرح وانا بكون معاج ما بتحرك تنهدت وغمضت عيوني وتميت أتذكر تفاصيل الحادث اللى صار .. تلاشت افكاري لما أمايه دشت الغرفة تصيح ...ويت وتحضني بتعب : أنا بخير أماية أمايه تتهيسني : شو يعورج حبيبتي حاولت أخفف عنها : لا تصيحين ..ما يعورني شي مول تصيح وترمس بخوف : شو ما يعورج شي وراسج ملفوف وأخوج بعد توهم مظهرينه من غرفة العماليات فجيت عيوني وشفت هند بدهشه :كان فالغرفة العمليات وأنتى تقوليلي بخير هند صخت اعيوني أحمرن : ليش سوله عملية ؟؟ أمايه : حديده دشت إيده وظهروها حاولت أمسك عمري وما اصيح جدام امايه اللى فيها مكفيها : أبا أشووفه أمايه تصيح : هناك أبوج وولد خالتج وربعه عنده لا تحاتينه انتى اللى فيج يكفيج مسحت دمعتها : أهدي دامه بخير وانا بعد شوفيني بخير بسج صايح امايه منهاره : كنتوا بتروحون عني تيها هند من وراها وتمسكها من جتفها هند : الحمد لله كلنا بخير أمايه : الحمد لله ..الله يحميكم يا رب ..مالي غير بهالدنيا ردينا عليها : آمين دخلو علينا فاطمة ومشاعل وريم ريم على طول راحت صوب هند وحضنتها .ومشاعل وفطوم يوا صوبنا .. امايه من شافت عيون مشاعل متورمه من الصايح حضنتها ومشاعل رجعت تصيح بقوو فاطمة تبوسني : شخبارج حبيبتي ؟ سلامات أشوف مشاعل : الله يسلمج فاطمة : هذي حالتها من صار الحادث غادة :ما تنلام والله يتني مشاعل وباست خدي : سلامات مسكت ايدها : قربي مني أبا أحضنج تقربت مني وحظنتها : يا بخت أخوي فيج ردت بصوت خفيف : ما مخليني أشوفه ..أونه بعدة ما صار ريلج تقربت منها : ولا يهمج بساعدج مشاعل : والله همست فأذنها : والله بس لا تعلمين حد عن يكفخوني ..روحي متكسرة مشاعل أبتسمت : فديتج ريم أطالعني : كيف خليتيها تضحك شفتها بتعب بس ما رديت عليها ..مب متفيجه راسي يعورني أمايه : بخليكم بروح أطمن على منصور .. رديت عليها : طمنينا عاد أمايه : ان شاء الله وراحت تبا تطلع بس دشت خالوه فنس الوقت خالوه تحضن امايه وتصيح : سلامات سلامات الغاليه ..طار الشر الله يهديج خالوه نحن بالغصب مسكتينها .. رجعت أمي تصييح : الله يسلمج الغاليه تمن فترة حاضنات بعض .كلنا تأثرنا من شفنا حالتهم .. حسيت بضيج : حبيبي منصور كان مستانس عشان الملجه بس مشاعل من سمعت كلامي يلست على الكرسي ..منهد حيلها من الخاطر مب قادرة تتحمل أكثر طالعتني فاطمه : أستغفري ربج هذا قضاء وقدر تنهدت : أستغفر الله خالوه : بيطلع من المستشفي وبنحتفل فيه وفبنتي قريب ان شاء الله الكل : امين يا رب خالوه أطالع بناتها توها أستوعبت أنهن موجودات: وأنتن منو يابكن فاطمه وريم يطالعن بعض وأشرن على مشاعل مشاعل منزله راسها : خفت وايد ومحد فيكم طمنا أمايه ترد عليها : ما راحن عند غريب خالوه : صدقتي بس هند : خالووووه اصلا لو ما ين أنا كنت بخلي سعوود أيبهم أمايه : خليهن عنج وياله نروح نطمن على منصور خالوه : يلا وتحركن بيطلعن من الغرفة زقرتها : خالوه صدت صوبي ويتني وباست راسي :سمحيلي ما سألت عن حالج والله راسي دايخ من اللى صار ابتسمتلها : لا تحاتين خالوه.. انا بخير بس بيرقدوني فالمستشفي جم يم عشان يطمنون علي أم سعود : زين أهم شي سلامتج غادة : الله يسلمج .. خالوه طلبتج أبا مشاعل ترقد معاي اليوم محتاجتنها وايد خالوه : مشاعل عندها دوام باجر ردت مشاعل بسرعه : بخذ إجازة وبتم معاها خالوه : خلاص عيل لج اللى تبينه . . . أبو منصور يرمس سعود : مشكور ولدي تعبانك معانا سعود: شو هالرمسه أنتوا أهلى أبو سعود يرد على أبو منصور : واجب عليه يوقف معاكم أنتوا أهله وعزوته سعود بتعب يطالع ساعته : الوقت تأخر روحوا ريحوا وأنا بيب أغراضي وببات محمد يقاطعه : بسك عاد مصختها ..شكله عيبك المدح ..أنا برقد معاه أبو منصور وأبو سعود أبتسموا سعود : أنا ولد خالته وأولابه محمد : وأنا أخوه "يطالع أبو منصور "صح خالي أبو منصور : اكيد أنته ولدي اللى ما يبته محمد يرجع يطالع سعود ويرفع حاجبه : سمعت يعني انا برقد سعود :هههههههه ارقد يابوك كلتنا الكل :هههههههههههه |
الجزء السادس عشر (( شف قصيدي صار مجموعه كلام ..يبتدي منك ..{ومنك ينتهي} قلي وش معنى نهاييات الغرام ..غير واحد حب وواحد {ملتهي} )) \ \ دخلت فاطمه غرفتها بتعب ..فصخت عباتها وفرتها على الشبريه ..مسكت تليفونها أجيك عليه ..حصلت 9 مكالمات و4 مسجات كلها من عمر ..فتحت المسج الأول : (( مساء الحب شوو تحسين بعد ما شفتيني اليوم ؟ وحاط قلب )) فتحت المسج الثاني (( عمري وينج ردي علي )) فتحت المسج الثالث (( فطامي انتي زعلانه مني )) فتحت المسج الرابع (( ردي على بلاج لا تخوفيني )) أتصلت عليه عمر على طول رد : الووو فاطمة بتعب : هلا عمر : وينج حبيبتي أحاتيج فاطمة : عيال خالتي سوا حادث وكنت معاهم طول الوقت وتليفوني نسيته فالبيت عمر : هيه ..خفت عليج والله .. فاطمة فخاطرها فديتك عمر : انزين طمنيني شخبارهم ؟ فاطمة : الحمد لله بخير عمر : زين زين .. ولهنا عليج عاد فاطمة بستهبال : صدق عمر: تشكين يعني بحبي ؟ فاطمة تبتسم : لا والله ما أشك بحبك لي عمر : فديتج والله فاطمة بدون ما تحس : افداك حبيبي عمر: شو قلتي ؟ فاطمة قفطت عمر : عيديها دخيلج فاطمة: بخليك الحين عموري ..منهد حيلي وأبا أرقد عمر: ما يخصني ما بسكر لين ما تقولينها فاطمة : عموري اليوم اختى بترقد معاي فالغرفة "تبتسم " فبتسكر صح عمر : قتلج ما بسكر لين ما تقولينها فاطمة بستهبال : أقول شوو ؟ عمر : قولي حبيبي فاطمة : عموررر عمر: قلبه وروحه انتى فاطمة بحيا : حبيبي عمر : عيديها فاطمة مستحيه : بسك عمر : عيديها فاطمة خذت نفس : حبيبي عمر : أموت أموت فيج فاطمة بحيا : عيل حبيبي بعد عمر تفاجئ لانها دوم تجافيه : عيل أعشقج وأهواج ..أنتى قلبي اللى ينبض وروحي وعقلي ودنيتي كلها وو فاطمة بحيا : بس بس بس عمر: خليني اطلع اللى فيني فاطمة : عقب ما نتزوج طلعه عمر : ما روم أصبر فاطمة فخاطرها "ولا انا " عمر يكمل : أنزين قوليلي أحبك فاطمه : عموري جنه طلباتك زايده اليوم عمر : ما استاهل يعني فاطمة : امبلا تستاهل عمر : عيل فاطمة تعرف ان راسه يابس ومستحيل أيسكر قبل ما يسمعها منها ..بصوت خفيف : احبك عمر : وانا احببج والله احبج فاطمة تبتسم : امم اقدر أريح الحين عمر : اكيد لو أني ما شبعت منج فاطمة :بتشوفني باجر وبتشبع عمر : لو تكونين حذالي طول الوقت مستحيل أشبع منج فاطمة :ولا أنا عمر تنهد : ااااااااه فاطمة : يلا تصبح على خير عمر : وانتى من اهله حبي . . سعود : دقايق وبكون عند باب الغرفه ..بدقلج رنه وظهري مشاعل : أوكيه أترياك وسكرت التليفون سألتها: هذا سعود مشاعل : هيه يحليله يايب أغراضي رن تليفونها مشاعل وقفت : بيب أغراضي وبرجعلج رديت عليها : خذي راحتج حبيبتي طلعت حصلته مجابل الغرفه وراحتله سعود يعطيها الكيس :شوفيها عدل ..كل اغراضج اللى طلبتيها موجوده مشاعل فتحتها وخذتلها لمحه : هيه اعتقد كل شي موجود سعود : يلا عيل بروح عنج ..ما وصيج ديري بالج على نفسج مشاعل : ان شاء الله ..ووانت أنتبه فالدرب أدريبك تعبان سعود : ما يهمج .. يلا رجعي دخلي الغرفه مره ثانيه جدامي مشاعل ابتسمت :اوكيه وراحت صوب الغرفة ودشت ..سعود من شافها دشت أطمن وتحرك من مكانه رايح البيت مشاعل تدخل وتسكر الباب فتحت عيوني بتعب : راح مشاعل : هيه راح فديته رمستها بلووم: اخوج تعب معانا اليوم وايد مشاعل : حبيبتي نحن أهل لا تقولين هالرمسه .."تقربت مني " انتي تعبانه ولازم ترقدين الوقت تاخر غادة: وانتي ؟ مشاعل : بحاول ارقد سالتها : تبين تشوفينه صح مشاعل : صح غمضت عيوني يمكن تيني فكره : اممممم شوفي ربيعه محمد راقد معاه فماعندج غير فرصه وحده بس مشاعل : اللى اهي ؟ غادة : لما يأذن الفجر اكيد ربيعه بيروح مصلى المستشفي يصلي ..حزتها انتى روحيله الغرفة وتطمني عليه مشاعل : واذا ما راح غادة : كوني متفائله مشاعل تبتسم : ان شاء الله تضبط "تمسك ايدي" حبيبتي خليني عنج وريحي حطيت إيدي على حلجي وتثاوبت :هيه والله تعبانه .. تصبحين على خير مشاعل :وانتي من اهله . . محمد يطالع أيد منصور : تعورك وايد منصور مغمض عينه : هيه محمد : تحمل الدكتور قال لازم بتحس بألم بعد العمليه منصور مب قادر يتحمل :ااااااه حمود مب قادر العوار يزيد محمد خايف عليه : انزين بروح ازقرهم عشان يعطونك مهدي ..مشي بيطلع منصور : تعال وين رايح ؟..اضغط على الفص اللى فوق وبيون بروحهم محمد يطالع الفص : هيه والله ذكي ضغط عليه ..دقايق وياهم الدكتور لين الغرفة الدكتور : خير شو في محمد : العملية وايد تعورة دكتور.. عطوه ابره تهديه منصور يتويع: ابا اي شي يخفف الآلم اللى احسه الدكتور : توقعت هالشي ..عموما ان شاء الله يصد صوب محمد : لو سمحت محمد يسمع الأذان : انزين بطلع "يرمس منصور" بصلي بالمره عقب برجع منصور يحرك راسه تمام طلع من الغرفة وراح صوب المصلى *** وهي تتقرب من الغرفة فجئة أنفج الباب ..ووقفت مكانها تشوف الدكتور يطلع من الغرفة " ااااااااف الحمد لله انه الدكتور ..ان شاء الله يكون بروحه .." تغشت وكملت مشي لباب الغرفة "لازم الحين أتشجع وادش " فجت الباب شوي شوي منصور حس بالباب وعباله محمد رجع : شو هالصلاه اللى صليتها فالدقيقة مشاعل من سمعت رمسته تطمنت انه بروحه فالغرفة ..دخلت وسكرت الباب وراها منصور :حمود تعوذ من الشيطان وروح صل . مشاعل تخوز الغشوة : منصور منصور انتبه على نبرت الصوت وأطالع صوب الباب حصل مشاعل وواقفه غمض عيونه وفتحهن وشافها واقفه مكانها تقربت منه منصور : مشاعل مشاعل أطالع أيده كيف لافينها : تعورك منصور : هذا صوتج مشاعل تبتسم : لا تخاف مب ينيه ..ادري انك مستغرب وجودي عندك هالوقت بروحي ..بس تطمن أنا راقدة فالمستشفي مع أختك غادة لانها تعبانه شوي وقلت هذي فرصه أطمن عليك فيها منصور براحه : فديتج مشاعل : افداك والله منصور : مستانس لأني أشوفج مشاعل : وانا اكثر حبيبي منصور : انا حبيبج ؟ مشاعل تفكر : امممم يمقن هيه يمقن لا منصور :ههههه حتى انتى علموج مشاعل : شو اسوي "تمسك خده " فديت هالابتسامه ..خوفتني عليك وايد منصور : حبيبتي انا بخير مشااعل : تعورك العمليه ؟ منصور : من شوي الدكتور عطاني أبرة مهدئه وبيخف الآلم ان شاء الله مشاعل تتقرب منه أكثر وتبوسه ع خده : احبك وايد منصور تجمد الدم فجسمه من حركتها مشاعل تنزل دمعتها : خفت تروح مني ..خفت افقدك منصور يمسح دمعتها : مابا أشوفج أدموعج تراها تعذبني .. انا بخير وما بخليج "يبتسم" ياريتني مسوي الحادث من زمان مشاعل تخوز أيده : منصووور منصور مبتسم : مستانس لاني مريض دام مرضي بيخليني أشوف هالأهتمام الكبير منج مشاعل استحت منصور بحزن :يوم ملجتنا راح مشاعل : من تطلع بالسلامه بنملج ان شاء الله منصور : بس انا ما با جيه مشاعل تعقد حياتها : كيف يعني منصور : ابا الملجه والعرس مره وحده من أظهر مشاعل استحت ونزلت راسها منصور : مشاعل مشاعل أطالعه منصور : ابا احضنج مشاعل من سمعت اللى قاله على طول تقربت منه أكثر وحضنته بس من دون ما تلمس ايده اللى تعورة منصور : لا تخليني محتاجج وايد مشاعل : ما بخليك منصور : راح كل الآلم وانتى معاي مشاعل تبتسم : احبك منصور : اموت بحبج مشاعل : لازم أروح الحين منصور يطالعها : لا تتغيرين علي مشاعل خلج جيه حنونه مشاعل ترجع تبوسه ع خده منصور تنهد : آآآآآآآآآآآه يا قلبي ..انتى يايه تطمنين على ولا تذبحيني مشاعل : الأثنين منصور أبتسم : حبيبتي شريرة "تذكر محمد" حياتي لازم تروحين أخاف ربيعي يرجع من الصلاة ويشوفج مشاعل : حاضر من عيوني ..اهم شي اطمنت عليك صدت عنه بتروح بس مسك ايدها منصور :اخاف انج مب موجوده ونا اتخيلج .."غمض عيونه " قولي بسم الله الرحمان الرحيم مشاعل ضحكت : بسم الله الرحمان الرحيم .."فتح عيونه يطالعها " تطمنت الحين اني مب ينيه منصور: تطمنت " يبتسم " لا تلوميني حبج ما خلا فيني عقل بادلته الأبتسامه وبتعدت عنه وعدلت شيلتها منصور :ديري بالج ع نفسج مشاعل تغشت : ان شاء الله طلعت وقلبها عنده ..سكرت الباب ورجعت غرفة غادة وحصلتها راقدة ..دشت الحمام توضت وصلت وعقب وطت راسها ورقدت على طول من التعب |
الجزء السابع عشر (( أن دعاك الضيف أحذر لا تضيق ..كم عطيت الوقت لكنه جحد ! اختر من الوقت لدروبك صديق ..يستمع لك بس لا تضمن آحد )) \ \ مرن ثلاث أسابيع عن الحادث ..منصور ومشاعل ملجوا فالمحكمه من دون حفله بسبت وضعه ..كانت إيده تعوره بس مع مرورالوقت صارت احسن وقام يحركها شوي شوي ومشاعل كانت معاه طول الوقت يا ترمسه على التليفون يا علي البلاك بيري ..وغادة ومريوم وهند وريم بدوا أمتحانات الفاينل وكانن طول الوقت منشغلات بالدراسه ..أما فاطمة عينها عمر سكرتيره عنده وصارت علاقتهم أقوا فبعض رغم أحساس أللوم اللي يطاردها دووم بس كانت تسفهه وتتناساه قد ما تقدر..سعود كان مضغوط فالدوام ولهذا السبب صاره له فتره ما نزل العين .. محمد تغير وايد وصار ما يرمس عن علاقاته الغراميه وهذا الشي منصور كان ملاحظنه ومفرحنه .. . . طلعت من قاعه الأمتحان ورحت صوب مريوم : سممممممم مب أمتحان مريم بضيج : هيه والله ..تصدقين فيني صيحه غادة : لا تطرين لصياح لا اسويلج الحين فلم هندي مريم ابتسمت : مينونه ادريبج تسوينها قعدت حذالها : طالعه عليج مريم : باقي امتحان واحد وبنودع هالمكان حسيت بحزن : بنودعه بكل ذكرياته مسكت مريوم أيدي : هالشي ما بياثر فصداقتنا رصيت على إيدها : اكيد حبيبتي ..مافي شي ممكن ياثر على صداقتنا مريم ابتسمت قتلها : ان شاء الله يكون ختامها مسك اخر امتحان مريم : الله يسمع منج فنفس اللحظه وصلها مسج شفتها توترت فتحته وسكرته بسرعه سألتها : بلاج؟ ردت علي : ماشي اخووي محتشر يترياني برع ..عنده شغل أستغربت : جيه والدريول وين ؟ مريم : مع امايه يقضي مشاويرها حسيتها تجذب علي بس قتلها :هيه عيل طلعي بسرعه عن يهزبج مريم وقفت : صدقج ..يلا درسي زين ما اوصيج أبتسمت : من عيوني ..وانتى بعد مريم : لا توصين مشت عني وتغشت .. كانت تمشي شوي شوي تقرا أرقام ألسيارات لين ما حصلت السيارة وركبت محمد : صباح الفل مريم قلبها يدق بخوف : حمود محمد :عيونه مريم : يعني أنا ما مغلطه بالسيارة محمد : لا حبي ما مغلطه مريم تسكر الباب ومحمد حرك السيارة بسرعه وطلع من الجامعه مشى ربع ساعه عقب وصل المبزرة ووقف سيارته فمكان فاضي ما فيه حد محمد يصد صوبها : حبي خوزي الغشوه ونزلي مريم : حموود اخاف حد يشوفني محمد يطالع المكان : شوفي المكان حيااتي ..محد هني غيري انا وياج مريم خوزت الغشوه تشوف المكان محمد :ياااربي شووه الجمال مريم استحت : لا تقص علي حموود محمد : والله انج حلووه واناا امووت عليج مريم تغمض عيونها وتصد صوب الدريشه محمد : ماروم علي يستحون مريم: بسك بسك محمد يمسك أيدها : خلينا ننزل مريم فجت الباب بسرعه من حركته ونزلت نزل بعدها وراح صوبها محمد يمد ايده ..ومريم اطالعه محمد بحنان : مسكيني حبي مريم مارامت تقاوم نبرت صوته ومسكت إيده محمد يمسك إيدها بقوو ويشدها صوبه محمد : احبج مريم مبتسمة : وانااااااا محمد : فديتج والله يمسكها ويخليها مجابلتنه مريم : مب قادرة أستوعب أنك بتتقدملي الأسبوع الياي محمد : يعني انتى مستانسه ؟ مريم : حلم حياتي بيتحقق وما تباني استانس محمد : قتلج قبل صبري علي وكل اللى تبينه بيصير مريم: صبرت تراني محمد يخزها : صبرتي مريم :هههههههه شسوي كنت خايفه أنك تقص علي محمد بحنان : وللحين خايفه ؟ مريم :لا ..أحبك وأثق فيك ثقه كبيره محمد يرفع راسه فوق : ياربي هالبنت بتخبلبي بتذبحني ينزل راسه ويهمس بذنها : احبج موت يمسك أيدها ويحطها على قلبه محمد :تسمعين دقاته ؟ مريم تغمض عيونها: أسمع محمد يبتسم بخبث ويقربها صوبه اكثر واكثر واكثر . . هند تدخل البيت بتعب : السلام عليكم أم منصور :وعليكم السلام ..بشري امايه كيف الأمتحان؟ هند: صصصعب خسارة ذيج الدراسه اللى درستها لو كنت راقده احسن أم منصور : قولي الحمد لله على كل حال هند : الحمد لله على كل حال بس صدق لو رقدت ابركلي اوني شاده حيلي وسهرانه أم منصور تحرك راسها : انتى ما منج فايده هند: حرام عليج قولي بعد ما درست أم منصور : منو قال ما درستي بس الواحد يسوي اللى عليه ويوكل أمره لرب العالمين هند :ونعم بالله أم منصور: هيه جيه اباج هند تغير الموضوع : غادة وصلت ؟ أم منصور : وصلت من ساعه تقريبا هند : حضها باقلها أمتحان واحد وبتفتك "تبوز" مب أنا يحليلي أسبوع ام منصور : انتى لو تروحين ترقدين ابركلج عن القرقه الزايده هند تبتسم : ان شاء الله هذا احلا طلب .. ولا تنسون توعوني على الغداء أم منصور : ما بنساج أطمني . . مريم : بس وقفني أهني محمد : وايد بعيد مريم : احسن عن حد يشوف سيارتك محمد يفتح درج السيارة ويطلع كيس ويحطها فذبان مريم محمد : لج حبي مريم متوتره : ماله داعي محمد : لا ترديني مريم ما علقت فجت الباب ومسكت الكيس ونزلت محمد : وايد استانست معاج اليوم مريم أبتسمت محمد : اول ما توصلين الغرفه طمنيني مريم :اوك يلا رووووح محمد : احبج مريم تتنهد :مي توو . . أم سعود تعطي بنتها بندول وقلاص ماي : شربي حبيبتي مشاعل تكح : شربت من ساعه تقريبا أم سعود : نشي عيل خلي أبوج يوديج المستشفي مشاعل: ما أبا أسير أم سعود تحط ايدها على راس مشاعل : انتى لابجه من الحمى مشاعل تغمض عيونها : الدواء بياخذ مفعولة وبصير أحسن سمعوا هرن مشاعل تتلحف : هذا اكيد منصور يبا يوديني المستشفي غصب أم سعود: لا حول ولا قوة إلا بالله ..مشاعل ودري عنج البيزاء الزايد ويلا تلبسي ..الريال ياي ومتعني وآخر شي ما تبين تروحين مشاعل : ما أحب المستشفي وبعدين إلا زجام وبيخف ام سعود سفهتا وطلعت حق منصور أم سعود : أقرب أقرب ولدي منصور يحب راسها : شحالج عموه .؟ ام سعود : الحمد لله ما نشكي باس ..انته شخبارك ؟ منصور : بخير وسهاله ام سعود :زين يوم يت مشاعل حرارتها سكت الألف ومب طايعه تروح المستشفي منصور : مب عكيفها .عموه من بعد اذنج ابا اوديها المستشفي ام سعود : اذنك معاك حبيبي هذي حرمتك بس المشكله انها مب راضية تروح حاولت معاها ..كنت بخلي ابوها يوديها بس ما رمت عليها منصور :ما عليج منها انتى لبسي عباتج وشليها معاج غصب وانا بترياكم فالسيارة ام سعود : الله يعيني عليها طلع منصور وركب السيارة ومسك تليفونه ودقلها مشاعل : هلا منصور منصور :حبيبتي بتيج عمووه الحين بتساعدج تلبسين عباتج .. تقاطعه : قتلك مابا اسير منصور بعصبيه : بتروحين مشاعل بصوت مبحوح : من شوي شربت بندول وبصير احسن ان شاء الله مالها داعي روحتي منصور :مشاعل انا مب قاعد أناقشج ..اقولج لبسي عباتج وهذا امر مشاعل : لا والله منصور : اللى سمعتيه واترياج لا تتاخرين علي مشاعل : واذا ما يت شو بتسوي يعني منصور : ما بسوي شي لانج بتين مشاعل تكح منصور : يلا اترياج حبي باي وسكر الخط ام سعود تدخل الغرفة مشاعل : ياله حبيبتي منصور يتريانا مشاعل :اففف منه أم سعود: الريال خايف عليج مشاعل نشت تلبس عباتها وهي مفوله ع الآخر .شوي وطلعت مع امها ..منصور من شافها ابتسم "فديتها والله حبيبتي تسمع الكلام " ركبت مشاعل وراء أم سعود : قعدي حذالي ريلج مشاعل : اخاف اعديه ام سعود ركبت جدام ومنصور فهم انها زعلانه "زعلي برايج المهم اني اطمن عليج " ووصلوا المستشفي ..كانت حرارتها وايد مرتفه لهذا السبب دخلوها عند الدكتورة على طول ..فحصتها الدكتورة : لازم نحطلها مغذي عشان جسمها يقوى شوي مشاعل :ما يحتاي منصور : لا يحتاي كلها ساعه بالكثير مشاعل بتعب : دخيلك مابا منصور رحمها :خلاص دكتورة عطينا مغذي شراب مع الادويه الدكتورة :تمام كتبت لهم الادويه وخذ منصور الورقه وراح العياده . . |
الجزء الثامن عشر (( من جروح الوقت يكفينا جروح .. عظم الله جرح قلبي والسلام .. قلت لك باروح لكن وين أروح .. والطريق اللى بيبعدني حطام .. للجروح آرواح يا روح الجروح .. مال جرحك غير تعظيم السلام )) \ \ مريم منسدحه ع البانيو بملابسها ومشغله الرشاش وتصيح ..كيف خليته يلمسني كيف ؟.. كل هذا عشان ما ازعله مني " تبتسم بحسره " وبرضاااااي بعد تمت تصفع عمرها بقوووو وتصيح ..ليش سويت بعمري جيه ...ليش سمحتله يلمسني ...دموعها تنزل بغزارة ..رخصت بعمري عشانه ..وضحيت بسمعت اهلي ..اتخيل فالنهايه ما يتقدملي ..والله بنهار ..اااااااااااااه يا غادة لو تعرفين ربيعتج شووو سوت اليوم بس ..ليتني ما خبيت عليج شي ..ترجع تضرب عمرها ..انا حيوانه وحقيره.. ما استاهل ثقة اهلي فيني ولا ثقتج يا غاده .. يارب سامحني ع اللى سويته يارب تغفرلي يا رب ...عصيتك ونا ندمااانه ..شوو كان بيصيرلي لو صبرت شوي ..قالي بيتقدملي بعد جم يوم ..ليش خليت مشاعري تحكمني ..ياليتني ما طلعت معاه ااااااه سمعت حد يدق الباب بقوو أمها : بلاج امايه خوفتيني عليج ليش تصيحين . مريم تاخذ نفس وبصوت مبحوح : ما فيني شي بس مضايقه عشان الامتحان امها: ما يرزا الامتحان تسوين بعمرج جيه عشانه ..طلعي اشوف بسرعه مريم : امايه خليني بروحي ربع ساعه وبظهر لا تحاتيني اناا بخيررر امها : لا تخوفيني عليج اكثر مريم تعلي حسها : والله العظيم انا بخير أمها تطمنت شوي : لما تظهرين من الحمام مري علي الغرفة مريم : أن شاء الله من حست ان امها راحت غرفتها "غمضت عيونها "اهدي مريوم اهدي المفروض اني ما احسس حد بشي خصوصا امايه .. وبعدين حمود بيتقدملي وانا واثقه فيه .. صح اللى سويته غلط بس بعد جم يوم بيكون ريلي وجدام الكل ..يعني ما في شي يستاهل اخاف منه "تفتح عيونها وتبتسم بحسره" لازم افكر جيه عشان اقوي عمري لين ما يتقدملي رسمي عقبها بس برتاح .. والحين المفروض افكر فشي واحد بس .... الأمتحان . . . . مشاعل فصخت عباتها وصبتلها قلاص ماي وشربت دواها رن تليفونها تمسكه وترد : منصور منصور : عيونه انتي .. شربتي دواج مشاعل تنسدح ع الشبريه : هيه حبيبي شربته منصور : جيه اباج مشاعل بلوم : سوري حبيبي لاني عصبت عليك ..بس ماحب اروح المستشفي ونا المريضه منصور : ههههه عيل متى تحبين تروحينه مشاعل ابتسمت بتعب : اذا حد مريض اروح معاه بس انا لا منصور يرفع حياته : هالبزاء مب معاي مشاعل تتحلف : انت بذات بتبزا عليك لين ما اقول بس " تبتسم"مب ريلي منصور : يا ويل حالي ..تبزي يابوج ..اروم اقولج لا ؟؟ مشاعل : هيه عبالي بعد منصور :هههههه ..اقول شوو تحسين الحين ؟ مشاعل : بصراحه حاسه بتعب وراسي داير منصور : ياقلبي ريحي عمرج مشاعل : تمام وانت حبي دير بالك ع نفسك منصور : ان شاء الله انتى تامرين مشاعل : باي منصصور : مشاعل مشاعل : هلا منصور : احبج مشاعل : ونا بعد احبك منصور : يلا مع السلامه مشاعل :باي حطت التليفون صامت وتلحفت عدل وغمضت عيونها وراحت بسابع نومه . . . . ريم :اهلين هند: وسهلين ريم تبتسم : شحالج دبوه ؟ هند : الحمد لله تمام وانتى ؟ ريم : ماشي والله سخافه .. احاول ادرس بس مب قادره هند: مي تووو اصلا ضغط وايد علينا ريم : معاح حق بس ما عليه هانت ماشي باقي وبنفتك هند : هيه والله..اسميني من اخلص برقص راب من الفرحه ريم : ههههههههههه ما استبعد عليج شي هند : تعالي صح مشاعل شحالها؟ منصور يقول مريضه ريم : امم احيدها راقد فغرفتها من يت من المستشفي ..تعرفين عاد زجام الصيف كيف هند :هيه والله يذبح ... ربي يشافيها ريم : اامين هند : ريموه اول ما انخلص امتحانات بروح دبي نشتري فستاتين ياخي ماشي وقت ريم : هيه والله ما شي وقت هند : اقول شرايج نلبس نفس الشي ريم مبتسمه :الله حلووو خلاص تم ولا يهمج هند : لازم عاد نكش عدل ..يمكن نعيب وحده من العيايز وتزوجنا ولدها ريم: ههههههه اوك بس بشرط هند: شوو؟ ريم : اذا حد تقدملج لا توافقين لين ما ايني نصيبي هند : لا والله ريم : هيه عيل شوووو هند: اذا حد ياني "تبتسم " بتبراء منج وبخلي عمري ما اعرفج ريم تشهق : يا الخايسه هند : ههههههههههه شو اسويبج ..اتريني اوين ريم : ههههههههههه الله يعينه اللي بياخذج هند : حبيبتي اللى بياخذني اكيد امه داعتله من قلب ريم : اخاف العكس حبيبتي هند: ههههههههه والله انج دبه . . . محمد : شحالج حبيبتي ؟ مريم : تبي تعرف حالي"تبتسم بستهزاء" حمود متى بتتقدملي محمد : بعد جم يوم بحدد موعد عشان تخبرين اهلج مربم : صدق حمود محمد: صدق يا عيون حمود مريم براحه :ريحتني محمد : حبيبتي والله ..شرايج بالهديه ؟ مريم : تهبل حبيبي ثانكس محمد : انتى تستاهلين اكثر عن جيه مريم تبتسم محمد : بخليج الحين مشغول شوي مرم : تمام قلبي ..انتبه ع روحك محمد : وانتى بعد ..يلا مع السلامه مريم :: مع السلامه . . . يالسه أعابل فالمطبخ فالليل حسيت بصوت وفزيت : بسم بالله منصور يبتسم : شو شايفه يعني ويا ويهج يني حطيت إيدي ع قلبي : زيغتني والله منصور : ههههههه شو تسوين هالوقت ؟ سكرت باب الثلاجه : يالسه اسويلي نسكفيه عشان اصحصح وكمل دراسه منصور : باجر عندج امتحان رديت عليه : هيه وآخر امتحان بعد ..الله يعيني الماده صعبه واايد منصور : انتى ما ينخاف عليج ..دحيحه قتله : بدينا حسد منصور :هههه ماشاء الله ما شاء الله أبتسمت : ومشاعل شو هباتها الحين ؟ منصور: بعدها تعبانه بس الحمد لله احسن بووايد عن قبل فرحتلها : الحمد لله ..كنت بدقلها بس ما تفيجت منصور : ماعليه مشاعل تعرف انج مضغوط بالدراسه غادة : سلم عليها لما ترمسها منصور : يوصل خذت الكوب : بخليك الحين وبرجع للكراف منصور : الله يوفقج غاده : امين طلعت من المطبخ ورجعت أشوف منصور : تبا أسويلك شي منصور : شو السالفه عارضه خدماتج ابتسمت : شو اسويبك اخوي الوحيد ابتسم : روحي درسي مابا شي كنت ابا اشرب ماي بس قتله : تمام باي رد علي : باي ودرته ورحت غرفتي وحطيت الكوب ع المكتب ومسكت تليفوني ودقيت ع مريوم مريم : الوووو غاده : هلا حبيبتي ..شحالج ؟ مريم : كيف تبين يكون حالي وادرس هالعله غاده :هههههههههه نفس الحل والله ..قلت ادق واطمن عليج مريم : فديتج والله قتلها : مريوم عيل بخليج الحين ..شدي حيلج حبوبه ولا طولين وايد فسهر خلينا نرقد ع الساعه 2 شرايج ؟ مريم : اووكيه من عيوني لو اني احس لو أواصل لصبح ما بفلح شربت يغمه من النسكفيه : لا تقولين جيه خلج متفائله مريم : صدقج ..يارب سهل علينا رديت عليها : اآآمين سكرت عنها ورجعت الكوب مكانه ..ونشيت أقصر على المكيف ..اليوم برودته زايده .. ..عقب يلست على المكتب رغم ان فيني رقاد مب طبيعي بس لازم أقاوم لين ما أخلص دراسه.. قصوري بعد اخوره ع آخر كورس ..رجعت شليت كوب النسكفيه وتميت أشرب منه ونا مستمتعه بطعمه ..حسيت نفسي تنشط شوي ..حطيت الكوب ع صوب ومسكت كتابي أكمل دراسه |
تسسسلميننن حبيبتي ع هالبببآرتتآت الروعهه حححدههاا نتريآ البآرتآت اليآيهه ع احر من جججمر |
| الساعة الآن 02:24 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir